Agregador de novas

TomTom deixa de dar soporte a numerosos navegadores GPS de antes de 2013

códigocero - Mar, 01/30/2018 - 20:12

Os navegadores GPS son produtos que están en vías de extinción como produtos dunha única función, por mor da súa integración nos smartphones, e entre os factores que contribuíron a esta situación están os elevados prezos dos navegadores (máis caros que un teléfono) e os problemas para mantelos actualizados, o que vén de quedar moi claro co último anuncio de TomTom, fabricante que dá conta dunha serie de navegadores anteriores a 2013 que deixarán de recibir actualizacións dos mapas.
O anuncio non foi nada ben recibido, e tiveron que saír rapidamente a matizar que os novos dispositivos e os que teñen mapas vitalicios non están afectados polo cesamento do servizo de actualizacións de mapas, asegurando que só quedarán sen mapas os navegadores de vella xeración que carecen de recursos suficientes para traballar cos novos mapas e o novo software.
Concretamente deixan de soportar o navegadores TomTom START 20 con números de serie que comezan polas letras AO, os TomTom START 25 con números de serie que comezan por BK, os TomTom START 45 que con números de serie que comezan por GT, os TomTom START 55 con números de serie que comezan por GU e os TomTom START 60 con números de serie que comezan por WM, xunto cunha completa listaxe de navegadores dos que eliminan o soporte da súa serie completa formada polos modelos GO 750 (W7), XL 2nd Edition (RC/RI/RN/RV), XXL 530(RY)/535(RW)/540(RX)/550(GL) SERIES, ONE 4th Edition (PC/PF/PI/PL/PO/PQ), START (XB/XD/XF/XH), EASE (XI/XJ/XK/XL), PLUS (XN/XM), XL 4th Edition (GJ/GI/GK/GP), GO 1000 (TD/TB), GO 1005 (SF/SB), VIA 110(AG)/130(AV)/220(AQ), VIA 120 (AN/AU/FM), XXL CLASSIC SERIES (GQ), GO 700 (M5), GO 630 (JB), GO 720 (M6), GO 730 (J4), GO 740 (WR/WL), GO 750 (W4), GO I90 (DC), ONE IQ ROUTES (P1/PS/P2/PU), ONE 140 (RED) (PM), XL 3rd Edition (R1/RS/R2/R4/RU), GO 820 (FT) e GO 825 (FY).
Para deixar claro que non estamos ante un abandono dos seus produtos anticuados, dende TomTom explican que un mapa de Europa en 2010 ocupaba 1,6 GB e actualmente ocupa 6,5 GB, polo que os dispositivos que non contan con recursos dabondo non poden traballar cos novos mapas por limitacións de seu. Un argumento máis para que o investimento en navegadores GPS autónomo resulte algo pouco atractivo.

Categorías: Ciencia

O que poden facer os drons e os satélites polo agro, a debate no Campus de Lugo

códigocero - Mar, 01/30/2018 - 17:05

O potencial dos satélites e dos vehículos aéreos non tripulados (UAV polas súas siglas en inglés) en agricultura (optimizando producións e plans, mellorando a xestión e o seguimento) vai ser unha das grandes cuestións a debater na terceira edición do Simposio Nacional de Enxeñaría Hortícola que se organiza no Campus de Lugo (USC) os vindeiros 21, 22 e 23 de febreiro. A cita, que se desenvolverá na EPSE (Escola Politécnica Superior de Enxeñaría), vén da man do Departamento de Enxeñaría Agroforestal da EPSE, en colaboración coa Sociedade Española de Ciencias Hortícolas (SECH). O simposio contará coa presenza de expertos no uso dos drons e dos satélites no ámbito da gandaría e do agro, que achegarán diferentes puntos de vista a través dunha interesante serie de relatorios.
Na primeira das xornadas, presentaranse os avances levados a cabo polo Polo de Innovación Dixital no Sector Agroalimentario, por parte do xestor de Innovación e Transferencia do Campus Terra, José Roberto Lamas Pérez, e Marcos Pérez, en representación do Centro Tecnolóxico de Telecomunicacións de Galicia (Gradiant). Os relatorios Futuro da agricultura de precisión, a cargo de Ricardo Braga do ISA-Lisboa; O Instituto Nacional de Técnica Aeroespacial (INTA) como Organismo Público de Investigación, de Bartolomé Marqués Balaguer, subdirector de Sistemas Aeronaúticos do INTA; e As ICTS e o CIAR, a cargo das técnicas do proxecto CIAR, Ana Corrales e Neves Seoane, completarán as intervencións desta primeira xornada que se culminará cunha recepción no Concello de Lugo.
Na segunda xornada, celebraranse varios obradoiros técnicos, impartidos por persoal especializado de empresas privadas e investigadores que facilitarán o achegamento dos asistentes aos produtos que se atopan no mercado fóra de Galicia. Os relatorios Aplicacións de drons e satélites na xestión de cultivos en clima árido, a cargo de Diego Intrigliolo (CEBAS-CSIC); e Avances en gandería de precisión e smart farming: o futuro faise presente de Jesús Pomar da Universidade de Lleida completarán a quenda de mañá. Xa pola tarde, María Jesús Gutiérrez de la Cámara, abordará a teledetección no INTA, onde dirixe o Departamento de Observación da Terra e a Atmosfera; e Jean Charles Samalens de Telespazio analizará os avances máis recentes dos satélites na agricultura de precisión. Ademais, celebrarase tamén en quenda de tarde, unha mesa redonda, liderada pola Axencia Galega de Innovación (GAIN) en relación co futuro dos drons e satélites na agricultura.
Na derradeira xornada levarase a cabo unha visita técnica as instalacións da Granxa de Recría Gayoso Castro, xestionada pola Deputación Provincial de Lugo, e situada no concello de Castro de Rei; así como ao Centro de Investigación Aeroportada de Rozas do Instituto Nacional de Técnica Aeroespacial-INTA.

Categorías: Ciencia

A RAG e PuntoGal baixan os prezos dos dominios galegos e lanzan concurso de micro-relatos

códigocero - Mar, 01/30/2018 - 16:20

A Real Academia Galega e a plataforma Puntogal van xuntar forzas a prol de impulsar e espallar o dominio galego, .gal. E farano a través dunha campaña e dun reclamo ben concreto: a redución do prezo de novos rexistros durante o mes de febreiro (prezo máximo de 15 euros por dous anos). Ademais, premiaranse os mellores micro-relatos que concorran nun certame convocado ao abeiro da dita campaña. A RAG e Puntogal fixeron hoxe un chamamento á sociedade galega a participar (cidadáns, empresas, colectivos, institucións), poñendo o seu gran de area para fortalecer a presenza da nosa lingua na Rede. A campaña coincide no tempo con tres significativas celebracións: os aniversarios de Rosalía de Castro (24 de febreiro) e Eduardo Pondal (8 de febreiro), e o Día Internacional da Lingua Materna (21 de febreiro).
O presidente da Real Academia Galega, Víctor F. Freixanes, e o presidente de PuntoGal, o tamén académico Manuel González, presentaron as ditas iniciativas esta mañá na sede da RAG. Con esta colaboración, a RAG aposta por “seguir potenciando a presenza do idioma na modernidade que representan as tecnoloxías da información e comunicación e por reforzar a identidade de Galicia no ciberespazo a través de .gal”, salientou Víctor F. Freixanes.
Segundo explicou Manuel González acerca das implicacións de xuntarmos forzas arredor do dominio galego, “o .gal é unha mensaxe continuada ao mundo a través do ciberespazo na que lles estamos dicindo que somos un pobo cunha lingua útil e funcional. Neste mundo globalizado, a identidade é un valor cada vez máis cotizado e o dominio .gal é un vehículo excelente para darlle a coñecer ao mundo a nosa identidade”.
González tamén lembrou que a día de hoxe, o dominio galego ten máis de 4.300 nomes rexistrados. Da súa xestión ocúpase a Asociación PuntoGal, a entidade sen ánimo de lucro constituída por entidades de todos os ámbitos da sociedade galega grazas á cal Galicia conta con esta marca de identidade no mundo virtual desde o ano 2014.
No acto tamén se fixo fincapé en que os rexistradores de dominio galego acollidos son Dinahosting, Arsys, CDMon, Blacknight e Openprovider. As condicións da promoción poderán consultarse en dominio.gal/promotion/ ou dirixíndose directamente ás empresas rexistradoras.
Premios tecnolóxicos e libros para os mellores textos de ata 200 palabras
A Real Academia Galega e Puntogal convocan ademais un concurso de micro-relatos para avivar a produción creativa nos novos espazos da comunicación. As persoas que desexen participar no concurso deberán enviar os textos, de até 200 palabras, ao correo comunicacion@academia.gal do 1 ao 28 de febreiro.
O primeiro premio consistirá nun Ipad e unha cámara goPro, o segundo, nun Kindle e un disco duro externo e o terceiro (poderá haber até tres), nun lote de libros, un dominio de balde durante un ano e merchandising de PuntoGal, agasallos estes últimos que tamén recibirán os dous mellores relatos. As bases completas poderán consultarse nas páxinas web dos organizadores. O xurado fará pública a súa decisión no mes de marzo.

Categorías: Ciencia

Narón leva a formación TIC á contorna rural

códigocero - Mar, 01/30/2018 - 13:31

Os locais sociais da zona rural de Narón acollerán cursos de informática a partir do vindeiro mes de febreiro. A concelleira de Novas Tecnoloxías, Natalia Hermida, explicou esta semana que a iniciativa enmárcase na programación CeMIT Rural 2018 e que se vai desenvolve até o vindeiro mes de xuño. As sesións programadas impartiranse a grupos dun máximo de dez persoas, xa que se levarán aos locais sociais ese mesmo número de equipos portátiles, cedidos polo consistorio para realizar estes cursos. As persoas interesadas en anotarse poden facelo nos locais sociais de San Mateo, San Xiao, Doso, Castro, Pedroso, Sedes e O Val.
Segundo fixo saber, “esta acción formativa é unha demanda dos veciños e veciñas que o ano anterior xa foron alumnos e alumnas e nos indicaron o modelo de curso a impartir que sería de utilidade para eles”. Nas clases aprenderán: Informática básica, Redes sociais e o Manexo de móbil e whatsapp, cunha duración de 51 horas. Os cursos programados teñen unha duración, en conxunto, de 357 horas, para o primeiro semestre do ano e cunha previsión de continuar a partir do mes de setembro con máis accións formativas desta índole.
As clases desenvolveranse en tódolos grupos en horario de tarde, a razón de dous días á semana, sendo de hora e media cada unha das sesións.
A edil de Novas Tecnoloxías destacou que se trata dunha proposta “coa que continuamos achegando desde o Concello as novas tecnoloxías á zona rural e deste xeito evitamos que os residentes deses núcleos non teñan que desprazarse ata a zona urbana para asistir a este tipo de oferta formativa, facilitándolles ademais os medios para poder realizar os cursos, neste caso os ordenadores portátiles”.

Categorías: Ciencia

Vitae mostra as respostas da neurociencia para a selección ideal de profesionais TI

códigocero - Mar, 01/30/2018 - 12:52

Os profesionais TIC son, hoxe por hoxe, os máis demandados polo mercado profesional, e nada indica un cambio de tendencia á baixa, máis ben o contrario: o mundo conectado expándese e, con el, as necesidades tecnolóxicas das nosas empresas. Porén, hai postos de traballo onde un tipo de profesional encaixará mellor que noutros, e outros labores onde se requira outro tipo de profesional. O problema reside en como saber onde desenvolveremos mellor o noso potencial e, a nivel das empresas, que características específicas demandar. Para despexar dúbidas e formarnos para tomar, a respecto do devandito, as máis sabias decisións, Vitae Consultores vén de convocar a novena edición do seu Curso de Avaliación e Selección Avanzada de Perfís TI (e non TI) baseadas na Neurociencia. O obradoiro, de 20 horas de duración, celebrarase na Coruña os días 26 e 27 de febreiro e 5 e 6 de marzo, no Hotel Attica 21.
O curso, moi acaido para directores de proxecto e profesionais dos recursos humanos, achega recursos para emendar unha das principais eivas da análise profesional do noso tempo: a falta de instrumentos axeitados, eficaces e flexíbeis, para valorar que tipos de talentos ten un profesional candidato a formar parte dun proxecto ou empresa. Tamén se busca dotar aos directores de proxectos e aos profesionais de recursos humanos das ferramentas precisas para saber formular as súas necesidades e interpretar, tamén, as diferentes propostas que se fagan en resposta a esas necesidades.
Segundo explican dende Vitae, o primeiro paso para calibrar a outro profesional será aprender a calibrarnos a nós mesmos. “Coñecéndonos deste xeito acadaremos meirande obxectividade na avaliación doutras persoas”, sinalan dende a consultora, engadindo que neste curso subministraranse as ferramentas e recursos máis indicados para lograr o autocoñecemento e para o exame doutros profesionais, sexa cal sexa o modelo de avaliación do desempeño do que se bote finalmente man.
Para Vitae, é unha realidade incontestábel que o sector das novas tecnoloxías da información (o sector TI) demanda cada vez máis profesionais dos dispoñíbeis no mercado laboral, o que xera tensións nas empresas en canto a dar cumprido cos compromisos profesionais en calidade e prazo cos clientes de seu e en controlar os custes salariais e a equidade interna dos mesmos.
O curso que presenta Vitae céntrase “na eficacia, en que facer, máis que na eficiencia, en como facer, para seleccionar candidatas/os e avaliar o desempeño dos nosos profesionais en contornas de escaseza de traballadores, aínda que ambas as facetas, a eficacia e a eficiencia, son necesarias para o éxito nos procesos de selección e avaliación”.
En definitiva, neste curso proporcionarase un método e unhas ferramentas coas “que se conseguiu unha porcentaxe de éxito de máis do 90% en selección de perfís TI, incluíndo perfís técnicos, perfís de xefes de proxectos, perfís de desenvolvemento de negocio e perfís de alta dirección”, informan os organizadores do obradoiro.
O curso virá da man de Marcos Carbonell, profesional con máis de tres décadas de experiencia nos sectores do deporte, as novas tecnoloxías e os recursos humanos. Carbonell é diplomado en Empresariais, máster en Recursos Humanos e posgrao en Marketing e en Organización de Empresas. Dende 2006 é socio director de Vitae Consultores e tense responsabilizado, directa ou indirectamente, de máis de 1.000 procesos de selección cunha taxa de máis dun 90% de éxito.

Categorías: Ciencia

Innovames mostrará enxeños galegos para mellorar a nosa calidade de vida

códigocero - Mar, 01/30/2018 - 12:02

Este 2 de febreiro celébrase no Milladoiro a cita Innovames, organizada polo Concello de Ames. O evento, unha xuntanza Maker, contará coa presenza de grandes referentes da filosofía do Do it yourself aplicada ao software, á robótica, a proxectos científicos ou a calquera tipo de enxeño, tanto a nivel galego como estatal e internacional. Será, ademais, unha cita para todas as idades e contornas: rompendo barreiras xeracionais e de formación. Un dos moitos proxectos que se poderá ver na exposición de Innovames vén da man, precisamente, dun grupo de estudantes do IES Sánchez Cantón de Pontevedra, baixo a tutela dos profesores Lourdes García e Benito Búa. Trátase dun micrófono direccional que mellora a capacidade auditiva das persoas con problemas de audición.
O enxeño, que recentemente foi seleccionado para participar no prestixioso concurso Teen Tech e máis o evento Galicia Maker Faire (Santiago), foi desenvolvido por Inés Pérez, Javier de la Cruz e Carlos Argibay, todos eles estudantes de segundo de bacharelato. A súa proposta consiste nun micrófono direccional que emenda as eivas dos audífonos convencionais en espazos pechados, evitando ruídos e permitindo seguir polo miúdo os relatorios.
Doutra das achegas que poderemos ver na área expositiva (mostra de iniciativas presentadas en Galicia Maker Faire) temos falado previamente en Código Cero, salientando a súa participación no programa Connecting for Good Galicia de Vodafone, destinado a impulsar e acelerar proxectos tecnolóxico-sociais con vontade de mellorar a calidade de vida dunha manchea de colectivos. Trátase de PsicoVR, un software desenvolvido para lentes de realidade virtual, destinado ao tratamento psicolóxico de fobias, tensións ou pánico.
O programa de Innovames
Pola mañá, de 09:00 a 14:00 horas, haberá unha xornada adicada a profesionais do sector. De seguido, pola tarde, entre as 16:00 e as 20:00 horas, desenvolveranse obradoiros para nenos/as, unha exposición de proxectos da Maker Faire Galicia 2018 e demostracións de experimentos científicos. Este é o segundo evento destas características que organiza o Concello de Ames, despois do Roteiro Maker feito en decembro de 2016.
O obxectivo deste encontro Maker é achegar as últimas tendencias no mundo da innovación a todos os públicos, “xerando un espazo para a aprendizaxe e o diálogo, onde se comparta coñecemento e xurdan sinerxías que dean lugar a proxectos innovadores”. Esta iniciativa está composta de conferencias e mesas de debate que versan sobre a tecnoloxía, a innovación, o audiovisual e a utilización de novos materiais. Todo isto, informa o Concello, conforma o groso dunha programación que se artella en dúas xeiras. Por unha banda, a matinal, que estará dirixida exclusivamente ao sector profesional. As 09:30 realizarase a presentación do evento. De seguido, de 10:00 a 10:30 horas, contarase coa presenza de Sonia Pazos Álvarez do INL, International Iberian Nanotechnology Laboratory, que ofrecerá un relatorio sobre as posibilidades que nos outorga a nanotecnoloxía en múltiples sectores e onde presentará todo o que se está a facer neste centro de referencia internacional. No programa matinal tamén destaca a presenza de diferentes representantes das empresas asentadas no polígono do Novo Milladoiro como NanoGap, Escenoset, Cartogalicia, CineMar films ou Zenit entre outras compañías locais, que ofrecerán a súa visión particular do estado da innovación dentro dos seus diferentes sectores.
Ademais, habilitarase o devandito espazo de exposición.
Uns petiscos porán o punto final a unha sesión de networking que se dirixe a impulsar creación de sinerxías entre empresarios e argalleiros asistentes.
A concelleira de Promoción Económica, Isabel González, destaca que “coa creación de Innovames o Concello de Ames busca pór en valor os recursos e a capacidade de innovación da nosa Comunidade, fomentando a colaboración entre as empresas e inventores galegos, e dando a coñecer ao público xeral o capital Maker galego”.
Pola tarde
O evento completarase cunha sesión de tarde que estará máis enfocada ao público familiar a través da programación de diferentes actividades e obradoiros orientados aos máis cativos. Celebraranse demostracións de ciencia e de realidade virtual, obradoiros de robótica e videoxogos, e habilitarase un espazo para programar aplicacións móbiles. A xeira de tarde comezará as 16:00 horas cun obradoiro de papirotrónica, dirixido a nenos e nenas de máis de 6 anos. De 18:00 a 20:00 haberá outros dous obradoiros de robótica e de programación de apps, que están dirixidos a nenos/as de máis de 8 anos.
Ademais, durante toda a tarde haberá unha exposición de proxectos da Maker Faire Galicia 2017 na que participarán as entidades 3D Limitless, MAKEROID, Arcade Pi, B.R.A.I.S., I.E.S. Sánchez Cantón, MINIMO, IOTLAB, PSICOVR, e SPAINLABS, así como demostracións de experimentos científicos.

Categorías: Ciencia

¿Qué tienen en común la percepción del sabor ácido y el equilibrio?

Investigación y Ciencia - Mar, 01/30/2018 - 00:00
Descubren un canal de protones que permitiría a las papilas gustativas detectar la agrura de los alimentos. Además, en el oído interno, este transportador también participaría en el mantenimiento de la estabilidad corporal.
Categorías: Ciencia

Pero ¿y cómo se aterriza en Europa?

Investigación y Ciencia - Mar, 01/30/2018 - 00:00
Parece que la superficie de esa luna de Júpiter es muy poco consistente, muy poco densa.
Categorías: Ciencia

A Deputación de Ourense, líder en Twitter

códigocero - Lun, 01/29/2018 - 22:38

A Deputación de Ourense comezou o ano disposta a incrementar e ampliar o seu nivel de transparencia (coa incorporación de Fernando Suárez) e, tamén, a súa presenza nas redes sociais. Hoxe mesmo, a entidade provincial lembrou que a institución ourensá e o seu presidente, Manuel Baltar, arrincaron 2018 “liderando a comunicación na rede social Twitter” a nivel estatal. De feito, ocupa o primeiro posto logo de Valladolid, Xaén e Barcelona, nunha listaxe na que figuran 45 gobernos provinciais e en relación á suma total dos apartados de publicacións, porcentaxe de chíos propios, compromiso e relación cos usuarios desta rede social (engagement).
A Deputación sinala tamén que Manuel Baltar lidera a comunicación en Twitter (número de chíos e engagement, impacto social e impacto medio por chío) por diante dos seus homólogos das deputacións de Málaga, Alacante, Castelló e Guipúzcoa, nunha listaxe de 32 presidentes provinciais. Segundo informa a Deputación, esta circunstancia dáse sobre todo “polas iniciativas de promoción da innovación, transparencia, interactividade cos cidadáns e goberno aberto”.
Manuel Baltar afirma que este liderado é consecuencia das políticas de “máxima interacción cidadá e cos gobernos locais da provincia” por parte da Deputación de Ourense, e de manter "un constante compromiso por compartir toda a información que a lei permite, a través das canles máis eficaces, con iniciativas innovadoras de goberno aberto", reafirmándose na necesidade “de seguir aspirando ao máximo da transparencia, para render contas permanentemente diante dos veciños da provincia”.

Categorías: Ciencia

Un fallo permite saltar a seguridade dos lectores de pegadas dalgúns equipos de Lenovo

códigocero - Lun, 01/29/2018 - 19:58

Lenovo vén de recoñecer un fallo de seguridade no xestor de pegadas dixitais, que afecta a un bo número de equipos das familias ThinkPad, ThinkStation e ThinkCentre, que facilitaba o acceso aos equipos saltando o lector de pegadas dixitais e incluso descrifrando as credenciais actuais de Windows.
A aplicación vulnerable está dispoñible para Windows 7, 8 e 8.1, e permite tanto identificarse tanto para entrar no sistema como en distintas páxinas web mediante a pegada dixital nos equipos ThinkPad L560, ThinkPad P40 Yoga e P50s, ThinkPad T440, T440p, T440s, T450, T450s, T460, T540p, T550 e T560, ThinkPad W540, W541 e W550s, ThinkPad X1 Carbon (20A7 e 20A8) e X1 Carbon (20BS e 20BT), ThinkPad X240, X240s, X250 e X260, ThinkPad Yoga 14 (20FY) e Yoga 460, ThinkCentre M73, M73z, M78, M79, M83, M93, M93p e M93z e ThinkStation E32, P300, P500, P700 e P900.
Cómpre así que os usuarios con equipos afectados actualicen á última versión a aplicación Fingerprint Manager Pro para que manter a súa seguridade, aínda que por tranquilidade para moitos a vulnerabilidade só pode aproveitarse fisicamente.

Categorías: Ciencia

Bahía Software logra a xestión da imaxe médica dixital dun dos maiores hospitais de Chile

códigocero - Lun, 01/29/2018 - 19:30

A compañía galega Bahía Software, con sede en Santiago, vén de resultar elixida para o servizo de soporte e mantemento integral do sistema de imaxe médica dixital e interoperabilidade de aplicacións do Novo Hospital de Antofagasta, un dos complexos médicos máis grandes e importantes de Chile. Con este novo contrato, a empresa galega TIC consolida definitivamente a súa presenza en Latinoamérica e envorca alén do Atlántico a súa experiencia en solucións innovadoras en imaxe médica dixital (unha experiencia materializada a través da súa colaboración cos servizos públicos de saúde de tres Comunidades Autónomas e da xestión de seis millóns de estudos anuais de probas diagnósticas baseadas na imaxe).
Segundo informan fontes de Bahía, o proxecto en Chile supón “o cumprimento dun dos principais fitos do plan de expansión da empresa galega en Latinoamérica”, un plan que fixa unha facturación de ao redor de 950.000 euros para os vindeiros 15 anos.
Nun plano máis detallado, o novo proxecto implica que a compañía galega xestione a imaxe médica do novo Hospital de Antofagasta, que cun investimento de 300 millóns de dólares e unha superficie total de 130.000 m2, convértese nunha das maiores infraestruturas hospitalarias do país. Para facernos unha idea da súa importancia, deste complexo médico beneficiaranse unhas 500.000 persoas. O hospital será ademais o centro de referencia para a macrozona norte de Chile e conta con 671 camas, 16 quirófanos, 6 paritorios e 79 salas para consultas externas.
Como dixemos, a experiencia de Bahía neste ámbito é longa no tempo. A día de hoxe, de feito, máis dun centenar de centros hospitalarios públicos e privados españois contan con algún dos seus servizos desenvolvidos especificamente para o sector sanitario, como a xestión da interoperabilidade de aplicacións sanitarias. Estas solucións tecnolóxicas están xa funcionando en grandes corporacións como o Grupo Quirónsalud, que segundo lembra a empresa galega é o grupo sanitario máis grande de Europa. Bahía, ademais, tamén achega xestión de imaxe médica en centros de Galicia, Aragón, Cantabria e en diversas institucións españolas de ámbito privado. Máis de 7.500 usuarios, dos cales 600 son radiólogos, benefícianse dos sistemas de imaxe médica dixital xestionados pola compañía.

Categorías: Ciencia

A Deputación de Lugo xunta na Rede demandantes e fornecedores de emprego

códigocero - Lun, 01/29/2018 - 18:22

A Deputación de Lugo presentou este luns un servizo gratuíto de emprego a disposición de veciñanza, empresas e colectivos. Trátase da Axencia de Colocación, un instrumento da entidade provincial con plataforma web de seu (deputacionlugoportalemp.com), que servirá para que os profesionais da institución lucense poñan en contacto aos demandantes e aos fornecedores de emprego da provincia. O sitio dixital tamén permitirá trasladarlle á Deputación toda a información xerada.
O servizo foi dado a coñecer pola deputada de Promoción Económica e Social, Sonsoles López Izquierdo, quen lembrou que, amais do devandito sitio web, tamén conta con oficina presencial no Pazo de San Marcos, sede da Deputación. Alí desenvolverán o seu labor de asesoramento e atención persoal os profesionais-axentes de emprego do organismo provincial.
Segundo engadiu, a oficina atenderá ás persoas demandantes de traballo e emprendedores pero tamén aos representantes de entidades ou asociacións da provincia que estean a buscar novos traballadores, orientándoos sobre os perfís que requiren, tendo en conta as súas necesidades, para mellorar ou ser máis competitivos.
Este xoves porase en marcha no Pazo de San Marcos dita oficina, funcionando de luns a venres dende as 09:00 horas ás 14:00 horas; e estará a pleno rendemento a devandita plataforma deputacionlugoportalemp.com. Tamén se pode acceder á mesma dende www.deputacionlugo.gal, pois hai un banner de enlace directo.
Segundo engadiu a deputada, “trátase dun servizo moi humano, próximo e fiábel, ao contar coa oferta e demanda de emprego que existen na provincia”. Na súa opinión, a axencia marca as diferenzas con respecto a instrumentos análogos, tanto pola súa proximidade aos lucenses como polo amplo abano de servizos que fornece, tanto de xeito presencial como de maneira telemática.

Categorías: Ciencia

WhatsApp estrea compatibilidade con CarPlay

códigocero - Lun, 01/29/2018 - 17:29

A aplicación de WhatsApp para iOS recibiu hoxe unha actualización que entre as súas novidades incorpora a compatibilidade de Carplay, de xeito que os usuarios de iPhone que teñan o seu smartphone enlazado cun vehículo compatible poden xa ver no automóbil as mensaxes que teñen sen ler, poden pedirlle a Siri que llos lea en voz alta e incluso permiten empregar o asistente de voz para enviar novas mensaxes. Os usuarios tamén recibirán notificacións de novas mensaxes co nome do remitente pero, pola contra, non poderán navegar entre a listaxe de mensaxes.
Deste xeito WhatsApp convértese na primeira aplicación de mensaxería de terceiros en ser compatible con CarPlay, aínda que as súas funcionalidades estean bastante limitadas. A aplicación xa era compatible dende hai tempo con Android Auto, polo que agora os usuarios para iPhone non se verían discriminados á hora de empregar a aplicación no seu automóbil.

Categorías: Ciencia

Ponteareas empregará 251.000 euros en renovar o seu Centro de Procesamento de Datos

códigocero - Lun, 01/29/2018 - 15:05

A Concellería de Novas Tecnoloxías de Ponteareas vén de anunciar a vindeira renovación do seu Centro de Procesamento de Datos (CPD), unha actuación que terá un custo total de 251.000 euros e que, en palabras do edil Benito Márquez, encamíñase a “mellorar os sistemas de almacenamento e xestión da información do consistorio e dar cumprimento á Lei 39/2015 de Procedemento Administrativo”. A iniciativa, máis en detalle, abrangue a creación dun segundo CPD, polo que será posíbel gardar a información municipal en dous acubillos, un na casa consistorial e outro no centro social, onde estará emprazados os servidores de respaldo. A idea é incrementar a seguridade e imposibilitar a perda de datos, a través do duplicado de todos os documentos, ao tempo que se incrementa a capacidade de almacenamento de arquivos e correos.
Segundo engadiu o concelleiro de Novas Tecnoloxías, as medidas queren emendar unha eiva herdada do anterior equipo de Goberno: “A situación era nefasta, o CPD era tan obsoleto cando chegamos que para que non se sobrequecese tiña as 24 horas do día, toda a semana, numerosos ventiladores normais funcionando”. Do mesmo xeito, engadiu, “non existía ata o de agora ningún centro de datos de respaldo, como marca a lei, o que implica que se por algún motivo ardese o consistorio, non habería copias de seguridade de tódolos datos e información, como pode ser algo tan importante como o padrón municipal, e que sería un auténtico problema”.
Márquez tamén explicou que a renovación das infraestruturas informáticas municipais suporá tamén “un cambio no traballo diario” e unha actualización de todas as licenzas dos programas. “Cando chegamos, no 2015, o 90 % das licencias de informática estaban caducadas ou directamente eran programas pirateados; logo, fomos renovando de maneira paulatina todas estas licencias e mercando outras, para cumprir coa legalidade”, indicou, engadindo que, de xeito complementario a todo o devandito, a Concellería de Novas Tecnoloxías está a realizar unha adaptación dalgúns regulamentos como o do Esquema Nacional de Seguridade e do RGPD (Regulamento General de Prestación de Datos) que entrará en vigor o 25 de maio do 2018. Esta mellora tamén suporá a mellora dos equipos informáticos municipais, que pasarán dos PC físicos aos equipos que se denominan “terminais lixeiros”.

Categorías: Ciencia

Unha aplicación deportiva facilita a identificación de bases militares

códigocero - Lun, 01/29/2018 - 14:14

A aplicación de rexistro da actividade física Strava, que mediante GPS consegue indicar por onde practican exercicio os seus usuarios, publicou hai uns meses un mapa de calor no que poden verse os traxectos percorridos sobre o mapa, o que a priori non debería supor unha invasión da privacidade dos usuarios nin nada semellante, pero que segundo un membro da Instituto para Analistas de Conflictos Unidos (IUCA), Nathan Ruser, podería facilitar a identificación e o mapeado de bases militares dos EE.UU.
A práctica deportiva dos soldados sería a que permitiría, por exemplo, localizar bases en Afganistán, e tamén en España, xa que a base de Rota e a de Viator serían identificables pese a que a de Viator está censurada nos mapas de Google. É bastante habitual que os sistemas de imaxe por satélite amosen edificios e estradas que as autoridades queren manter ocultas por seguridade, pero no caso de mapas como o de Strava a información que se achega é diferente, xa que presenta como se move a xente nesas áreas, o que pode ser unha maior ameaza para a seguridade.
Aínda que non sería sorprendente que solicitasen a Strava a censura da información publicada, este tipo de incidente debería espertar consciencia sobre a subministración de datos a terceiros que facemos a través de numerosos dispositivos e servizos, e no caso de gobernos e organismos militares está nas súas mans decidir os que son os posibles puntos febles da súa seguridade, e as políticas que deben adoptar no uso de dispositivos electrónicos.

Categorías: Ciencia

As últimas actualizacións de Windows suprimen as medidas contra Spectre por provocar problemas

códigocero - Lun, 01/29/2018 - 13:39

A emerxencia da ameaza de seguridade coñecida como Spectre levou a que os fabricantes de software e hardware lanzasen urxentes actualizacións dos seus sistemas que parece que non superaron os necesarios controis de calidade, e así puidemos ver como Intel recoñecía que o microcódigo que publicara para mitigar a variante 2 de Spectre estaba a provocar reinicios en numerosos equipos, recomendado adiar a instalación dos seus parches de seguridade e a súa desinstalación no caso de estar a empregalos, en espera a unha mellor análise da situación.
Microsoft confirmou estes problemas, e mentres Intel busca solución aos fallos detectados, decidiron lanzar novas actualizacións de Windows 7 SP1, 8.1 e 10 para desactivar as medidas de mitigación das vulnerabilidades da segunda variante de Spectre, de xeito que recomendan instalar canto antes esta nova actualización para non padecer os problemas que xurdiron cos parches defectuosos.
Aínda que o normal é recomendar sempre manter os equipos informáticos seguros ante potenciais ameazas, dende Microsoft lembran que polo momento non existe risco por non ter os nosos ordenadores sen os parches contra Spectre, dado que aínda non se deu ningún caso real de aproveitamento desta vulnerabilidade.

Categorías: Ciencia

Vigo fai medrar as tramitacións electrónicas nun 20%

códigocero - Lun, 01/29/2018 - 13:19

O Concello de Vigo vén de facer balance da actividade local en materia de Administración Electrónica ao longo de 2017, unha actividade que acadou datos positivos en todos os parámetros, segundo fixo saber o alcalde Abel Caballero. En palabras do rexedor, os datos obtidos poñen de manifesto que Vigo é unha cidade pioneira no emprego dos sistemas en liñas, entre outras cousas porque as cifras mostran que un 75% dos rexistros xa se fan de maneira electrónica. Ademais, dixo, o Concello rexistrou en 2017 unha suba do 20% en tramitación dixital, acadando os 470.000 procedementos.
Caballero engadiu que os 470.000 trámites foron feitos por 110.000 cidadáns e 10.000 empresas. Ademais, explicou, contabilizáronse 2 millóns de consultas e 2 millóns de visitas á páxina oficial www.vigo.org (tamén accesíbel a través do dominio galego, www.vigo.gal). Respecto do factor sustentabilidade que se pon en xogo polos logros en eAdministración, o rexedor destacou que a “tramitación electrónica supón un gran aforro e mellora da competitividade para a cidadanía, empresas e administración, ao evitar o sistema que se teñan que imprimir 1 millón de documentos ou facer 500.000 desprazamentos na cidade, o que supón 400 toneladas de CO2”.

Categorías: Ciencia

Educación e o CPEIG premiarán os mellores traballos literarios dos escolares arredor da protección de datos

códigocero - Lun, 01/29/2018 - 13:11
O conselleiro de Cultura e Educación, Román Rodríguez, e o presidente do CPEIG, Fernando Suárez

Coas crianzas accedendo ás redes e aos dispositivos tecnolóxicos dende as idades máis temperás, faise máis necesario que nunca facer fincapé, nos colexios e nos fogares, na necesidade de protexer a súa información e a dos demais. Con este cometido, a Consellería de Cultura e Educación e o Colexio Profesional de Enxeñaría en Informática de Galicia (CPEIG) convocan o segundo Concurso Literario Infantil e Xuvenil sobre a Protección de Datos, un certame dirixido ao alumnado de centros sostidos con fondos públicos que cursen quinto ou sexto de Primaria ou algún dos catro cursos de ESO. Segundo informan os organizadores, a iniciativa organízase con motivo do Día da Protección da Datos, que se conmemorou este 28 de xaneiro en toda Europa.
O obxectivo do concurso é “que a sociedade galega, en especial os máis novos, tomen conciencia da necesidade de incorporarse á cultura da protección de datos, promovendo o coñecemento sobre os dereitos e responsabilidades nesta materia”. Os traballos presentaranos os propios centros educativos, a través do enderezo premioliterario@cpeig.gal, até as 15 horas do día 28 de febreiro de 2018.
Bases do certame
As obras que se presenten deberán ser inéditas e estar escritas en lingua galega. Os estudantes poderán presentar ao certame diversos xéneros, como o artigo xornalístico, exposición divulgativa (entrada de blog ou artigo de divulgación), conto ou relato curto. O obxectivo dos traballos deberá ser responder a preguntas como Que é para ti a protección de datos?, Como afecta no teu día a día? ou Como podo protexer os meus datos?. Os textos de referencia serán Protocolo de Protección de Datos da Consellería de Cultura, Educación e Ordenación Universitaria (educonvives.gal) e as publicacións da Axencia Española de Protección de Datos (www.agpd.es).
A extensión dos traballos, que deberán presentarse en formato dixital en PDF, será de entre 1.000 e 2.000 palabras para as categorías de ESO, e de entre 800 e 1000 palabras para a categoría de 5º e 6º de Primaria. Cada concursante poderá presentar ao certame cantos traballos desexe.
Haberá un premio para a categoría de 5º e 6º de primaria, outro para a categoría de 1º e 2º de ESO e outro para a categoría 3º e 4º de ESO, que consiste nunha tableta para o autor ou autora e un kit de robótica para a súa aula. Ademais, o centro que conte con maior participación recibirá un recoñecemento especial da organización. O fallo do xurado, composto por membros nomeados polas entidades convocantes, daranse a coñecer no mes de marzo.
Segundo lembran a Consellería e o CPEIG, a primeira edición participaron 40 escolares de toda Galicia, e os gañadores foron na categoría Eva Riveiro Formoso co traballo oinc, do Colexio Compañía de María de Santiago de Compostela, e Gustavo López Leyenda, co traballo PISOTE, do CPI de Cova Terreña de Baiona. Ademais, recibiu o recoñecemento especial o Colexio Compañía de María de Santiago de Compostela.

Categorías: Ciencia

A Deputación de Lugo apoia a dixitalización dos arquivos históricos de Castro Ribeiras de Lea

códigocero - Lun, 01/29/2018 - 11:57

A Deputación de Lugo vai financiar o proxecto Castro na Memoria, que se dirixe a dixitalizar os arquivos históricos de Castro Ribeiras de Lea, máis de 200 arquivos. Así o fixo saber hoxe o presidente da Deputación, Darío Campos, que lembrou que a devandita iniciativa vén da man da asociación cultural Gaia de Lea e que a contía que a entidade provincial lle dedica é de máis 10.387 euros. Campos achegou esta información nunha vista á localidade de Castro de Ribeiras de Lea, na compaña dos membros da devandita entidade veciñal, cos que puido coñecer ao detalle os detalles da súa proposta de dixitalización.
Segundo informaron, trátase dunha iniciativa “coa que se busca recuperar a traxectoria histórica da vila”, a través da recuperación e posta en valor de documentos históricos como fotografías, proxectos, informes. Tamén se fixo saber que até o de agora son xa máis de 200 os arquivos documentados. O documento histórico máis antigo xa dixitalizado data de 1750, é trátase dun documento do primeiro catastro de Castro de Rei
Campos Conde subliñou “a importancia que supón para o Goberno da Deputación colaborar neste proxecto, co que se busca preservar e divulgar a identidade cultural da nosa provincia, que é a maior das riquezas que temos como sociedades. É por esta razón pola que colaboramos coa Asociación Cultural de Gaia, por ser un proxecto no que ademais de participar os veciños da propia vila, que son os que levan os seus documentos para seren dixitalizados e almacenados, busca divulgar o patrimonio histórico, social e cultural de Castro”.
O proxecto en Castro na Memoria, cuxo director e coordinador é Ricardo Lamela Castro, recibe o financiamento do Goberno da Deputación para o mantemento da plataforma dixital na que se almacenan os documentos; a presencia en redes así como o mantemento da oficina física que ten esta asociación na Antiga Biblioteca de Castro de Ribeiras de Lea onde se facilita o proceso de dixitalización dos arquivos.

Categorías: Ciencia

Grande incremento das descargas da aplicación móbil do Camiño de Santiago

códigocero - Lun, 01/29/2018 - 11:21

A aplicación móbil que ofrece información en tempo real das distintas rutas do Camiño de Santiago en Galicia superou no último ano as 13.000 descargas, o dobre das que se rexistraran o ano. Con versións para iOS e para Android, a aplicación móbil está dispoñible en galego, castelán e inglés, e estase a consolidar como unha das ferramentas deste tipo máis descargadas de Turismo de Galicia.
Os usuarios poden consultar información de utilidade como o trazado, a descrición, fotografías e datos sobre os diferentes itinerarios xacobeos, dos albergues, dos recursos turísticos e dos distintos eventos previstos nos diferentes concellos. Ademais, ten acceso ás condicións meteorolóxicas e ás direccións e contactos dos centros de saúde e emerxencias. A maior parte das súas funcións están dispoñibles sen necesidade de cobertura no móbil.
Xunto á aplicaciòn móbil, no ano 2017 tamén se rexistrou un moi bo comportamento doutras iniciativas enmarcadas no plan Smart Camiño, desenvolvido conxuntamente por Turismo de Galicia e a AMTEGA. No caso da páxina web caminodesantiago.gal, a curva de crecemento mantívose constante en todo o ano, con preto de 250.000 sesións de usuarios que visitaron máis dun millón de páxinas, o que supón un incremento de máis dun 20% con respecto a 2016.
En relación ao uso que os usuarios fan da páxina, na que se recollen todos os aspectos precisos para descubrir, preparar e planificar a ruta xacobea medrou a duración media da sesión de visita, ata alcanzar máis de 5 minutos por persoa, o que demostra o interese dos contidos amosados. Por países, tras España, a páxina web recibiu visitas de Portugal, Estados Unidos, Italia, Arxentina, Alemaña, Brasil, Francia, México ou Reino Unido.

Categorías: Ciencia

Páxinas

Subscribirse a IGACIENCIA lector de novas