Agregador de novas

Volven as Xornadas de Tecnoloxía de APETEGA, desta volta en Compostela

códigocero - Xov, 03/15/2018 - 12:06

Os vindeiros 13 e 14 de abril celebraranse no IES Lamas de Abade de Santiago de Compostela a nova edición, a número 17, das Xornadas de Tecnoloxía da Asociación de Profesorado de Tecnoloxía de Galicia, APETEGA. Trátase, para quen non o saiba, dun acontecemento divulgativo e formativo encamiñado a achandar no ámbito docente o camiño da investigación tecnolóxica e científica. A metodoloxía empregada, basicamente, é formar a formadores e alumnado e intercambiar recursos e capacidades. O obxectivo, en última instancia, é estimular o noso talento.
Haberá 120 prazas, habilitadas sobre todo para o profesorado de Secundaria e Bacharelato, homologadas pola Consellería de Educación como actividade de formación do profesorado por un total de 12 horas. A inscrición pódese facer na páxina da APETEGA.
Respecto do programa de actividades, estas comezan o día 13 cunha visita ao CiTIUS, no Campus Sur da USC, centro referencial a nivel galego e estatal en materia de novas tecnoloxías de comunicación. Pola tarde, logo do xantar, celebrarase o acto inaugural, unha charla sobre satélites e un coloquio sobre escenas de cinema e debates tecnolóxicos. Ao día seguinte, o programa arranca cunha charla-coloquio sobre unidades didácticas de tecnoloxías e prosegue con comunicacións didácticas e exposición de proxectos. Logo, ao mediodía, será a quenda dos primeiros obradoiros, que proseguirán pola tarde, logo do xantar.
Por temáticas, os obradoiros porán o foco nas seguintes cuestións: deseño en 3D, téxtiles intelixentes, galgas extensiométricas con Arduino, realidade aumentada, drons, robótica e aproveitamento e reciclaxe de material tecnolóxico. Ademais, introducirase aos participantes na iniciativa AppInventor, unha contorna de desenvolvemento de software creado por Google Labs para a elaboración de aplicacións dirixidas ao sistema operativo Android, lanzado por Google.

Categorías: Ciencia

A UVigo e Bahía poñen en marcha unha cátedra de innovación TIC

códigocero - Xov, 03/15/2018 - 11:52

A Universidade de Vigo e a firma TIC Bahía Software, con sede en Santiago, veñen de xuntar forzas a prol do talento, a transferencia e o fluxo de coñecemento entre os campus e o tecido empresarial, entre os ámbitos de investigación e o cidadán de a pé. Así nolo fixeron saber esta cuarta feira (mércores) o reitor Salustiano Mato e o director da dita compañía, Martín Gómez, na sinatura dun convenio marco de colaboración entre ámbalas partes. A primeira iniciativa desta súa alianza será a posta en marcha da Cátedra Bahía Software de Innovación Tecnolóxica. O obxectivo deste proxecto conxunto, con base na Escola Superior de Enxeñaría Informática do Campus de Vigo, será “promover o intercambio de experiencias investigadoras, empresariais e de coñecemento entre a empresa e a institución académica”.
Segundo apuntou o reitor trala sinatura do convenio, a cátedra permitirá o desenvolvemento de accións de “formación, captación e retención de talento e dar mellores e máis oportunidades aos nosos estudantes”. Ademais, “permitirá desenvolver iniciativas no eido da investigación e a innovación”. O convenio formalizado con Bahía Software, engadiu o reitor, suporá “pasar dunha colaboración puntual a unha estrutural, estratéxica e institucional”.
Pola súa banda, Martín Gómez salientou como a posta en marcha deste convenio marco xorde tras colaboracións puntuais coa Escola Superior de Enxeñaría Informática que se desenvolveron de xeito “moi satisfactorio”. Amais, o director de Bahía Software dixo que a posta en marcha desta cátedra permitirá “o desenvolvemento de proxectos e tecnoloxías innovadoras, aproveitar o talento e achegar a empresa á universidade e a universidade á empresa”.
Mato e Gómez tamén explicaron que haberá “actividades de formación dual”, como por exemplo a organización de conferencias e seminarios, concesión de bolsas para o traballo do alumnado en contornas reais ou con proxectos simulados e apoio á realización de teses de doutoramento e traballos de fin de grao e mestrado. Ademais, no eido da difusión e transferencia de coñecemento inclúense iniciativas como a realización de xornadas de divulgación técnica e tecnolóxica e publicación de traballos sobre temas de interese. Por último, en materia de I+D+i, a cátedra pretende ofrecer apoio á realización de traballos de investigación e participar en proxectos de I+D+i conxuntos, seminarios, foros e encontros de expertos no ámbito da innovación tecnolóxica.
A cátedra estará dirixida por Francisco Javier Rodríguez, profesor da Área de Linguaxes e Sistemas Informáticos do Departamento de Informática da Universidade de Vigo e director da Escola Superior de Enxeñaría Informática do campus de Ourense. Contará cunha comisión de seguimento paritaria, integrada por tres representantes de Bahía Software e tres representantes da Universidade de Vigo.

Categorías: Ciencia

Redegal e Elogia, recoñecidas nos eAwards de México

códigocero - Xov, 03/15/2018 - 10:35
Parte do equipo mexicano de Redegal recibindo o galardón

Redegal e Elogia estiveron os días pasados no punto de mira dos premios eAwards de México. En primeiro lugar, a firma galega Redegal, con sede principal en Ourense e especializada en servizos de desenvolvemento web e mercadotecnia en liña, foi recoñecida nos ditos premios como Mellor Axencia Dixital Social Media. Segundo fixeron saber os impulsores destes galardóns, entregados en México DF (no WTC), a firma galega recibiu a devandita distinción pola súa xestión eficaz na presenza en liña en redes sociais dos seus clientes.
O xurado valoraba aspectos como o alcance das estratexias, a interacción cos seareiros, a reputación en liña, o retorno publicitario nas diferentes redes sociais e a participación da firma avaliada en cada unha das fases que compoñen unha acción de marketing nas redes sociais: planificación, xestión, análise e optimización.
Redegal lémbranos que estes premios convócanse anualmente e entréganse aos mellores negocios en liña, ou sexa, a empresas con presenza destacada no mundo dixital, así como axencias que traballan neste sector.
Enmarcada dentro da feira eShow México 2018, a cerimonia congregou a grandes personalidades do mundo da publicidade e mercadotecnia dixital do país. Respecto da valoración feita pola firma galega a conto deste galardón, Redegal considera que “con este premio, o sector dixital mexicano referenda o bo momento de Redegal no país e o premio convértese nun novo recoñecemento ao labor desta axencia formada por máis de 100 profesionais”.
Ao fío deste proceso de crecemento, a empresa de raizame galega tamén anuncia que nos vindeiros meses abrirá nova sede en Coruña co obxectivo de “apostar polo talento local e atender de maneira máis próxima aos actuais clientes estratéxicos da zona”.

Pedro Abad recollendo a distinción a Elogia

Elogia
Pola súa banda, Elogia, empresa con fondas raizames galegas, resultou premiada como Mellor Axencia de Captación de Tráfico. A axencia, experta en digital commerce marketing, volveu alzarse como unha das gañadoras logo da distinción de 2014 neste mesmo certame, cando foi recoñecida polos seus resultados con empresas como Volvo, Burger King, Avon, Pedidos.com ou Sección Amarilla.
Pedro Abad, director executivo en México de Elogia, expresou a súa emoción de obter este galardón: “Gañar este premio é un orgullo, pero sobre todo un recoñecemento ao traballo ben feito. Nos últimos 15 anos que estivemos presentes en México vimos como madurou o mercado e como evolucionaron as campañas de tráfico ata o día de hoxe”.

Categorías: Ciencia

Alteraciones vasculares, ansiedad y alzhéimer

Investigación y Ciencia - Xov, 03/15/2018 - 00:00
Demuestran que, en ratones, existe una asociación entre la enfermedad neurodegenerativa, los trastornos de conducta ansiosa y las alteraciones en los vasos sanguíneos periféricos. La correlación se observa principalmente en hembras.
Categorías: Ciencia

Os produtos de Smartbot poden verse nas JAI 2018

códigocero - Mér, 03/14/2018 - 22:30

Smartbot, a marca de robótica galega, está presente no Showroom Industria 4.0 nas VII Xornadas sobre tecnoloxías e solucións para a automatización industrial JAI 2018 , evento de referencia na Industria 4.0 que até o venres desenvolverase en Vigo. A este evento asisten máis de 700 profesionais do sector e as diferentes Escolas de Enxeñería de Galicia
Smartbot acode a esta cita cos seus robots para o fogar como para contornas industriais. Podemos ver en funcionamento os novos modelos de Robot Limpacristais Smartbot Hobot 198 e 288, cunha tecnoloxía que nos permite controlar desde o noso Smartphone o seu funcionamento mentres limpa os cristais, así como o novo modelo 288 capaz de realizar a limpeza de cristais sen marco grazas aos seus sensores láser. No campo da robótica para o xardín, mostrará os seus distintos modelos de Robot Cortacespede Smartbot para xardíns de ata 4.000 m2 e o novo robot limpiabarbacoas Smartbot Grillbot, que nos permite liberarnos realizar a dura e incómoda tarefa da limpeza de grellas.

Categorías: Ciencia

O CCG avalía os fenómenos e transformacións aos que nos aboca o Big Data

códigocero - Mér, 03/14/2018 - 22:19

O Consello da Cultura Galega quere tomarlle o pulso aos nosos xeitos actuais de xerar coñecemento e comunicarnos. Uns xeitos que, queirámolo ou non, pasan de xeito irremediábel (na súa maioría) a través dos novos acubillos dixitais e “conviven” cun volume de información que se duplica cada pouco. Por este motivo e co obxectivo de avaliar os procesos que nos están a mergullar na chamada cuarta revolución industrial, o CCG organiza este 15 de marzo a xornada A cultura dixital en Galicia: viaxe de ida e volta ao Big Data, á verificación e á mobilidade. Nela participan persoas expertas tanto na xestión de datos masivos como no seu tratamento informativo. No roteiro da xornada figura facer análise do chamado Big Data, un fenómeno que “non só mudou o acceso á cultura, senón que está transformando moitas das dinámicas culturais das sociedades actuais”, en palabras da organización.
Na xornada preténdese ofrecer unha visión panorámica do que acontece no panorama do Big Data, coa presentación dalgunhas experiencias, e “analízanse vías para aproveitar esa circulación masiva de datos nas iniciativas culturais nos diferentes ámbitos”. Coordinada por Xosé López, Xosé Ramón Pousa e Rosa Aneiros, a xuntanza contará con diferentes achegas que nos permitirán abordar a cuestión desde o punto de vista da tecnoloxía, a análise e a comunicación.

Programa

O catedrático da Universitat de Valencia, Anaclet Pons, abrirá a xornada coa perspectiva do historiador para dar paso ao tratamento comunicativo do Big Data da man de Carlos Elías, catedrático da Universidad Carlos III, Xaquín G.V., xornalista e infografista con ampla experiencia en medios internacionais e Jesús Miguel Flores Vivar, director de Internet Media Lab na Universidade Complutense de Madrid.
Datos masivos, ruído, aplicación a produtos culturais, novas falsas, procesos de verificación e sistemas para achegar valor engadido aos produtos culturais serán algúns dos temas a tratar.
Na xornada, Clara Higuera, científica de datos da BBC, e Carmen García Mateo, catedrática de Teoría do Sinal e Comunicacións da Universidade de Vigo, ofrecerán o punto de vista tecnolóxico e analizarán as posibilidades e responsabilidades que ofrece o coñecemento a gran escala, a automatización e a intelixencia artificial.
A xornada concluirá coa posta en común das realidades e desafíos que ofrece a cultura dixital en Galicia da man de María Yáñez, especialista en estratexias nas redes; Marcus Fernández, webmaster de Código Cero e Rubén Bastón, customer happiness director de Elogia. A xornada emitirase en directo dende a web institucional www.consellodacultura.gal e os contidos poderán ser consultados en diferido na mediateca web da institución.

Categorías: Ciencia

Vodafone España minimiza o retardo no envío de contidos de realidade virtual en tempo real

códigocero - Mér, 03/14/2018 - 18:34

Vodafone España vén de consolidar un importante avance en materia de comunicacións, poñendo o foco en reducir tempos e incrementar eficacia. Máis polo miúdo, a operadora levou a cabo unha demostración na que empregou a tecnoloxía MEC (Multi-access Edge Computing) para enviar contidos de realidade virtual en tempo real a través da súa rede comercial 4G, reducindo a menos da metade o retardo neste tipo de servizos.
Ademais, esta tecnoloxía usouse de maneira conxunta con solución de infraestrutura virtualizada (Network Function Virtualization) de Huawei. Estas iniciativas forman parte da estratexia da operadora para aproveitar ao máximo as posibilidades da vindeira tecnoloxía 5G, explorando servizos e potencialidades que lle serán propios.
Segundo informa Vodafone, a dita demostración consistiu en asistir desde a sede da operadora á retransmisión en directo do programa diario Yu, No te pierdas nada, de Vodafone yu, que se emite nos 40 desde os estudos da cadea SER en Madrid. Ao abeiro da proba empregáronse diferentes dispositivos, lentes e tabletas de realidade virtual nos que se podían reproducir cun campo de visión de 360 graos o que acontecía no propio estudo de gravación, no mesmo intre da súa realización e emisión.
Vodafone, para ilustrar a natureza das probas, lembra que a tecnoloxía MEC permite xestionar contidos desde a propia rede e achegalos aos usuarios, mellorando a súa percepción do servizo. “Co fin de garantir a calidade desta experiencia”, explica a empresa de telecomunicacións, “era precisa unha reducida latencia, dispoñibilidade de largo de banda e calidade de servizo a partir de recursos da rede comercial de Vodafone para retransmitir sinais de moi alta definición durante o evento, o que foi posíbel coa tecnoloxía MEC na rede de Vodafone”.

Categorías: Ciencia

Broadcom retira a oferta de compra por Qualcomm

códigocero - Mér, 03/14/2018 - 13:30
Expositor de Qualcomm na pasada edición do Mobile World Congress de Barcelona

Dende o pasado outono o fabricante de semicondutores Broadcom está a negociar a compra do seu meirande competidor, Qualcomm, tendo que escalar paulatinamente a súa oferta económica (de 130.000 a 160.000 millóns de dólares), considerada insuficiente, pero finalmente deron o brazo a torcer e retiran a súa oferta de compra, non porque non consideren atractiva a operación que os colocaría nunha situación privilexiada, senón porque a Casa Branca decidiu bloquear a compra por considerar un risco para a seguridade que unha compañía estranxeira tomase o control de Qualcomm.
Broadcom pretendía trasladar a súa sede oficial aos EE.UU. para minimizar o control gobernamental sobre a operación de compra de Qualcomm, pero a orde presidencial emitida o pasado luns facía imposible que directivos de Broadcom puidesen participar na dirección de Qualcomm. Queda agora por ver se o cambio de domicilio de Broadcom pode servir para mudar o parecer da Administración Trump, permitindo unha operación que aínda parecía lonxe de pecharse.
Dende Broadcom continúan convencidos da necesidade de medrar par consolidar unha posición nun sector moi competitivo e dinámico, no que gañar volume é crucial para a supervivencia, polo que non sería de sorprender que no futuro retomasen as negociacións para absorber grandes compañías do seu sector.

Categorías: Ciencia

O CPETIG pide á Xunta que corrixa unha convocatoria de xestión informática na que se omite a enxeñaría técnica

códigocero - Mér, 03/14/2018 - 13:28
Marcos Mata, presidente do CPETIG

O Colexio de Enxeñaría Técnica en Informática (CPETIG) vén de dar un novo paso a prol da defensa da profesión que representa, un cometido que constitúe un dos seus obxectivos fundamentais. Segundo informa a entidade, esta vén de solicitar á Administración autonómica que emende unha convocatoria da escala de xestión de sistemas de Informática na que “se omite a titulación de Enxeñaría Técnica en Informática”. Por este motivo, o CPETIG enviou a principios desta semana unha carta á Dirección Xeral de Función Pública da Xunta de Galicia para que corrixa a Orde de 1 de marzo de 2018 pola que convoca un proceso selectivo, pola quenda de promoción interna, para o subgrupo A2 da devandita escala.
O CPETIG lembra que ao abeiro desta convocatoria establécense como requirimentos de titulación estar en posesión ou en condicións de obter “a diplomatura ou grao nunha carreira de calquera rama”. Porén, a entidade profesional apunta que nestas bases omítese a titulación de enxeñaría técnica, “feito que causa preocupación ás persoas tituladas en enxeñaría técnica informática, ás que representa o colexio”.
Na súa misiva, o CPETIG solicita a Función Pública “unha corrección de erros da citada orde, de xeito que se inclúa expresamente a Enxeñaría Técnica en Informática como titulación admitida para concorrer á convocatoria ou ben que se emita un comunicado aclaratorio indicando a aceptación da enxeñaría técnica como titulación para optar a este proceso selectivo”.
O colexio explica que a solicitude está fundamentada na Lei 2/2015, de 29 de abril, do emprego público de Galicia, que determina que “poden acceder ao subgrupo A2 as persoas en posesión das titulacións de enxeñaría técnica, diplomatura, arquitectura técnica ou equivalente”.
Por outra banda, a entidade que preside Marcos Mata sinala que baixo esta solicitude atópase “a necesidade de que se modifique o actual marco normativo para que este tipo de prazas da escala técnica de informática non estea aberto a calquera titulación”. O CPETIG considera que “abrir a convocatoria destas prazas á xeneralidade das profesións infrinxe os principios de mérito e capacidade e quebranta o de igualdade, amais de supor unha rotunda discriminación ao ver usurpada a súa especialización”.
O colexio pide “que Galicia aplique o modelo doutras Comunidades Autónomas, que si dirixen as convocatorias de postos semellantes única e exclusivamente a persoas tituladas en Enxeñaría Técnica en Informática, que son as únicas oficialmente capacitadas pola súa titulación para o exercicio das funcións propias das prazas convocadas”.

Categorías: Ciencia

Mañá remata o prazo para presentar vídeos a Youtubeir@s

códigocero - Mér, 03/14/2018 - 13:13

A conta atrás para participarmos no certame Youtubeiras.gal, o concurso encamiñado a encher YouTube de vídeos en galego, remata mañá, tal e como lembra hoxe unha das entidades organizadoras do concurso, o Concello de Santiago, que, xunto coas demais institucións implicadas (os servizos de Normalización Lingüística dos Concellos da Baña, Ames, Carballo, Ourense, Pontevedra, Ribadeo, Santiago, Teo e O Grove, as nosas tres Universidades e a Deputación da Coruña) fai así un chamamento ás creadoras e creadores que teñan entre mans unha peza para presentar, que non deixen para pasado mañá o que poden facer mañá. Segundo lembran, Youtubeiras é unha iniciativa para impulsar o talento das nosas novas directoras e directores ao tempo que se traballa pola presenza da lingua nas contornas dixitais.
Segundo sinalamos esta semana, un dos intres álxidos da presente edición do certame será a gala de entrega de premios, que vai contar cunhas mestras de cerimonias de excepción: as integrantes da compañía teatral A Panadaría. A cita será o 20 de abril no Teatro Colón da Coruña. Participarán as actrices Areta Bolado, Noelia Castro e Ailén Kendelman.
Os galardóns artéllanse este ano, logo da primeira edición de 2017, en cinco categorías: video-facermos, vídeo-opinarmos, canle, creatividade, eficiencia comunicativa, calidade técnica, calidade lingüística e o premio do público. A estes cinco apartados poden concorrer todas as persoas maiores de 14 anos a través de vídeos de opinión ou videotitoriais autoproducidos en galego subidos a Youtube de xeito independente ou nunha canle.
Na edición presente haberá 5.500 euros en premios. Este repartiranse as ditas categorías, que incrementan o seu número con respecto ao ano pasado. O premio do público, chamado #propostayoutubeira, é unha das grandes novidades deste ano. Como temos sinalado dende Código Cero noutras ocasións, a través deste recoñecemento, os membros de Facebook poderán propoñer a través dun comentario no perfil de Youtubeir@s un vídeo do que sexan seareiros/as incluíndo o cancelo #propostayotubeira.
Segundo puidemos saber, a convocatoria 2017 saldouse cunhas importantes cifras de convocatoria, con máis de 200 vídeos presentados da man de internautas de idades comprendidas entre os 17 e os 30 anos. Todas estas pezas salientaron pola súa riqueza temática, tocando temas que oscilaron entre a crítica de cine e as cuestións de actualidade, pasando por titorías con trucos e consellos no ámbito da tecnoloxía, a mecánica ou a cociña. Ademais, lográronse altos niveis de implicación por parte de diferentes asociacións e colectivos, e de persoas de idades moi diversas.

Categorías: Ciencia

Vitae recunca co seu curso sobre uso eficaz dos datos para a toma das mellores decisións

códigocero - Mér, 03/14/2018 - 12:04

Vitae Consultores quere que sexamos profesionais TIC con amplitude de coñecementos, e que ademais esteamos en disposición de aplicar eses coñecementos a cada intre ou en cada reto no que vexamos mergullados. Por certo que moitos destes desafíos aos que nos imos ver abocados, máis tarde ou máis cedo, teñen relación directa coa información e co seu manexo, tratamento e aproveitamento útil e intelixente. É por este motivo que Vitae recunca esta tempada cunha nova edición, a terceira, do seu Curso en Aberto Ciencia de Datos con Excel, Power BI e R. O obradoiro, de 20 horas, celebrarase en Vigo (o Centro Social AFundación da rúa Policarpo Sanz) os días 20, 21, 27 e 28 de abril.
Novamente, coma nas anteriores edicións, diríxese a adestrarnos nas ferramentas actuais máis eficaces para a xestión dos datos, máis necesarias ca nunca tendo en conta dúas cousas: o proceso imparábel de medre da información e, tamén, as posibilidades que se derivan desta marea de coñecemento para obtermos as mellores decisións.
En palabras de Vitae, trátase dun curso que bota luz sobre a importancia actual da información e de como esta medra a pasos axigantados, poñéndose de relevo como unha fonte importante de achados (sempre e cando deamos coas mellores metodoloxías de manexo e estudo).
En termos máis concretos, o obradoiro fornecerá aos asistentes formación en conceptos e recursos como os usos e vantaxes dos histogramas, os gráficos de Pareto, os boxplots ou o Teorema de Bayes (que, na teoría da relatividade, emprégase decote para revisar probabilidades previamente calculadas cando se posúe nova información).
Segundo Vitae, ao remate deste curso de estatística aplicada os participantes estarán en posesión de novos e importantes coñecementos e habilidades no ámbito da ciencia dos datos. Os beneficios disto pasan en boa medida por outorgarlles a capacidade precisa para tomar as mellores decisións, amais de achegarlles unha sólida experiencia en estatística e probabilidade básica, o que axudará a unha mellor comprensión dos datos.
Os obxectivos do curso son os seguintes: subministrar formación avanzada en estatística (estatística descritiva, probabilidade básica, variábeis aleatorias, probas e intervalos de confianza, probas de hipóteses), visualización de datos con Excel e Power BI, coñecemento da ferramenta libre R para a análise de datos e visualización.
No que atinxe aos requisitos que se solicitan, para poder tirar proveito do curso debemos de estar familiarizados coa organización e a análise de datos en Excel, empregando as ferramentas que proporciona a folla de cálculo como táboas, táboas dinámicas e gráficos dinámicos.
O profesional que impartirá o obradoiro será novamente Antonio Soto Rodríguez, enxeñeiro en Informática de Sistemas pola Universidade da Coruña e profesional con máis de dúas décadas de experiencia como consultor técnico experto e certificado, achegando formación na Universidade Microsoft e a empresas e organismos como a NASA, NASDAQ, PEMEX, SERGAS, Citroen, CEAGA, Inditex, Ferroplast, Banco Popular, ABANCA, Xunta de Galicia ou Abertis.

Categorías: Ciencia

O arquetipo de AMTEGA amplía coa súa liberación os nosos recursos para crear aplicacións

códigocero - Mér, 03/14/2018 - 09:39
O equipo de desenvolvedores na presentación do lanzamento da primeira versión do arquetipo en febreiro de 2017

Os días pasados a axencia AMTEGA deu un paso importante no aproveitamento dos recursos de seu e, a un nivel máis xeral, no reforzamento dos mecanismos propios do software libre (crear, compartir, reutilizar, enriquecer, etc) no eido das administracións. Estamos a falar da liberación do seu arquetipo corporativo, unha aplicación web que, nesta nova vida a disposición da comunidade de desenvolvedores, pode beneficiar a outras entidades públicas, organizacións ou particulares, amais de ampliar os recursos dos que dispón a comunidade para dar forma a aplicacións Java Spring Web. Para saber máis sobre o arquetipo, cuxo código fonte atópase dispoñíbel no repositorio de Software Libre da Xunta de Galicia, na Forxa de Mancomún, tivemos ocasión de falar cun dos responsábeis da súa liberación, Pablo Paz-Trelles Sánchez, da Área de Solucións Tecnolóxicas Sectoriais de AMTEGA.
-En que consiste exactamente o arquetipo corporativo de AMTEGA? Para que nos entendan todos os lectores, de que estamos falando exactamente? Do esqueleto do sistema informático da axencia? Da súa imaxe dixital?
-O arquetipo pretende ser a base sobre a que se constrúen novos produtos software Java na AMTEGA, sendo un estándar que sirve de modelo de facto para os desenvolvementos de software da Xunta. O arquetipo é unha completa aplicación web construída coas tecnoloxías máis empregadas hoxe en día. Proporciona unha estrutura básica da que partir e un exemplo de como traballar sobre el. Inclúe a reutilización de numerosos aspectos transversais como pode ser a imaxe corporativa que comentades... pero tamén, a aplicación de estándares de desenvolvemento, tanto de carácter xeral como os propios internos da AMTEGA, infraestrutura básica (autenticación, log, persistencia, seguridade, ...) ou propio funcionamento nos servidores corporativos.
-Temos a impresión de que o software libre xa deixou de ser un ámbito revolucionario para integrarse no ADN propio do día a día das administracións e de boa parte das empresas. Credes que a liberación do arquetipo dun organismo público como o que se acaba de liberar sería posíbel hai uns cantos anos?
-Hai anos existía software potencialmente reutilizábel na Administración pero efectivamente era imposíbel propoñelo, xa non licencialo como software libre, senón compartilo de maneira interna. Afortunadamente, ao longo dos últimos anos impuxéronse os importantes beneficios técnicos da reutilización e compartición inherentes ao software libre, até o punto de dispoñer na actualidade de plans concretos para o seu impulso. Aínda así, non hai que descansarse e cómpre seguir avanzando, especialmente nos aspectos non técnicos enraizados no software libre que actualmente son os grandes descoñecidos.
-En termos concretos, de cousas que se poden ver e usar, que vantaxes ten o arquetipo para unha entidade, empresa ou usuario que decida tirarlle proveito?
-As principais vantaxes de partir dun arquetipo destas características son: homexeneizar o código nas aplicacións e a velocidade no desenvolvemento, especialmente nas primeiras etapas nas que o que se intenta, precisamente, é crear unha estrutura inicial que funcione nun determinado entorno. Máis polo miúdo, do arquetipo da AMTEGA aportaría ademais unha seguridade na súa evolución ao longo do tempo e a posibilidade de estender as súas capacidades mediante un sistema de plugins.
-Na información que recibimos sobre o ceibado deste software libre non se especifica o traballo que houbo detrás. Faládenos deste punto. Foi preciso moito labor preparativo para levar a cabo a liberación?
-
Para realizar a liberación traballamos en colaboración coa Oficina de Coordinación de Software Libre da AMTEGA a quen agradecemos o ternos facilitado moi boa parte do traballo. Respecto dos cambios a realizar indicarvos que coas tecnoloxías empregadas no arquetipo xa se respectaban bastante as características necesarias para a liberación polo que realmente non foi moito o tempo empregado, sendo o traballo principal realizado a eliminación da versión liberada de toda configuración sensíbel de AMTEGA no que a seguridade e infraestrutura se refire.
-Tendes preparadas próximas liberacións de software libre a maiores?
-O seguinte paso no que estamos traballando é liberar o arquetipo para o desenvolvemento de servizos web na AMTEGA que viu a luz a finais do ano pasado.

Categorías: Ciencia

La ciencia llora la muerte de Stephen Hawking

Investigación y Ciencia - Mér, 03/14/2018 - 00:00
El gran físico e icono de la ciencia ha fallecido a los 76 años.
Categorías: Ciencia

Los bebés aprenden patrones abstractos visualmente

Investigación y Ciencia - Mér, 03/14/2018 - 00:00
Los lactantes de tres meses ya son capaces de abstraer normas generales de una sucesión de objetos que aparecen en una sola imagen.
Categorías: Ciencia

Tampoco es esa su huella

Investigación y Ciencia - Mér, 03/14/2018 - 00:00
Se creía haber dado con una posible detección indirecta de la materia oscura en la parte central de la Vía Láctea. Diversos estudios apagan esa esperanza.
Categorías: Ciencia

Ponteareas organiza unha charla para nais e pais sobre novas adicións

códigocero - Mar, 03/13/2018 - 23:04

O Concello de Ponteareas quere traballar a prol da formación e a divulgación en materia de uso das TIC entre os menores, poñendo en foco na capacitación das nais, pais e profesorado. Nesta liña insírese a charla Sexo, drogas e moitas apps, que organiza a Concellería de Ensino que dirixe a nacionalista Cristina Fernández.
A charla, dirixida sobre todo a nais e pais, desenvolverase esta cuarta feira (mércores 14) ás 19:00 horas na sala multiusos do auditorio municipal. A médico de familia Raquel Plana e o enfermeiro Nemesio Boente, ámbolos dous profesionais do Centro de Saúde de Ponteareas, falarán de dependencias, incluídos os hábitos negativos ligados ao uso das novas tecnoloxías da información (móbiles, redes sociais, aplicacións, etc). Tamén se falará de prevención de doenzas de transmisión sexual e da sexualidade na adolescencia.
A Concellería informa de que para facilitar a participación de todas as familias, ofrécese servizo de gardería na entrada principal do auditorio.

Categorías: Ciencia

O Xeoportal de Santiago e as súas posibilidades, ao detalle na Cámara de Comercio

códigocero - Mar, 03/13/2018 - 19:08

A Cámara de Comercio de Santiago de Compostela acolleu este 12 de marzo a presentación do Xeoportal IDE do Concello de Santiago, unha iniciativa dirixida a facilitar o coñecemento dos cidadáns acerca da información xeográfica do termo municipal, cousas como a relación que ten cada predio ou leira coas administracións, as súas características ou a súa cualificación urbanística. O portal foi dado a coñecer ante os asistentes ao acto (empresarios, representantes camerais, autónomos e profesionais) polo concelleiro de Espazos Cidadáns, Dereito á Vivenda, Mobilidade e Relacións Veciñais, Jorge Duarte, e o xefe da sección de Cartografía e SIT, Rogelio Canedo. Segundo fixeron saber, coa nova ferramenta podemos ter constancia e información de cada lugar e da súa situación exacta coa axuda das tabletas, smartphones ou computadores.
O servizo, un visor dixital, permite que “institucións, profesionais e cidadanía en xeral poderán coñecer en detalle cuestións como cal é a cualificación urbanística dunha finca determinada, cal é a administración titular dun viario ou cal é a área de influencia de cada colexio da cidade”, segundo lembrou Duarte, que tamén fixo fincapé na natureza evolutiva do portal, “un instrumento vivo que se irá cargando de información a medida que pase o tempo”. O servizo acubilla centos de documentos urbanísticos (unha cifra que medra de maneira progresiva) e todas as ortofotos realizadas dende 2001 a 2014 no Concello de Santiago. Duarte e Canedo tamén fixeron fincapé nas facilidades de uso que pon en xogo o portal e tamén nas súas diferentes seccións, das que dimos conta recentemente en Código Cero con motivo da súa presentación.

Categorías: Ciencia

Os clientes de ABANCA poderán xestionar os seus seguros vía móbil

códigocero - Mar, 03/13/2018 - 17:00

ABANCA segue adiante, este ano, incrementando e asentando o chan dixital no que se asenta. Este 13 de marzo, sen ir máis lonxe, lanzou unha nova versión da súa aplicación de banca móbil que pon en xogo novas funcionalidades das que tirar partido nos teléfonos móbiles. En termos máis concretos, a actualización ferramenta vai permitir facer cousas como consultar desde o noso smartphone ou tableta os datos básicos dos seguros que teñamos contratados con ABANCA. “Na pantalla e dunha soa ollada poderemos ver os seguros e o detalle da tarifa plana que posúamos en ABANCA”, informan fontes da entidade financeira galega.
Por outra banda, a actualización deixaranos marxe para informar directamente á compañía de calquera sinistro do que sexamos vítimas. A maiores, en datas vindeiras habilitarase outra función para consultarmos o último recibo de cada seguro, modificar algún aspecto (como variar a conta de cobro) ou cambiar as características do seguro. A través do móbil poderemos (tamén) solicitar unha cita con calquera oficina para contratar unha tarifa plana ou calquera seguro que precisemos. Para resolver calquera dúbida relacionada con estes servizos, teremos á nosa disposición un servizo telefónico premendo no botón Aclarar datos do meu seguro que nos porá en contacto cun operador.

Categorías: Ciencia

A sede SmartPEME en Cambados realizou preto de medio milleiro de asesoramentos

códigocero - Mar, 03/13/2018 - 14:35

As instalacións da rede SmartPEME en Cambados luciron éxitos de actividade e participación este 12 de marzo. Segundo fixeron os responsábeis deste punto formativo TIC, a sede realizou desde a entrada en funcionamento máis de 400 asesoramentos e organizou máis de 90 obradoiros sobre novas tecnoloxías da información aos que asistiron máis de 700 persoas. Ademais, os técnicos das oficinas de Cambados achegaron atención a máis de 130 empresas. Estes e outros datos foron subministrados durante a visita a Cambados da presidenta da Deputación de Pontevedra, Carmela Silva. Segundo fixo saber, o obxectivo este ano é “impulsar asesoramentos en materia tecnolóxica vencellados ao turismo, un dos sectores económicos máis importantes para a comarca do Salnés e para a toda a provincia”.
Na achega de datos celebrada nas instalacións de SmartPEME participaron tamén a alcaldesa Fátima Abal, o deputado de Innovación e Promoción Económica, Javier Dios, e a responsábel dun dos proxectos empresariais de éxito que se beneficiaron da actividade local de SmartPEME: Elisa Franco, impulsora de Mamacosesola.
Carmela Silva fixo balance dos resultados e funcionamento da Oficina de Cambados e recoñeceu sentirse “moi contenta por ver que os recursos públicos serven para poñer a disposición da cidadanía e da actividade económica proxectos de futuro que sirvan ás empresas para internacionalizarse, ter máis beneficios, poder contratar a máis persoas ou ter máis presenza”.
Pola súa banda, a alcaldesa de Cambados, Fátima Abal, agradeceu o traballo que está a desenvolver a Deputación de Pontevedra a través da oficina de SmartPEME na vila arousá. Máis polo miúdo, Abal destacou que “ata aquí acoden moitas persoas emprendedoras e empresas a diario, para buscar axuda e asesoramento para seguir adiante cos seus proxectos, para ter un futuro máis prometedor”.
Pola súa banda, Elisa Franco fixo un percorrido pola súa experiencia en SmartPEME, onde recibiu asesoramento en innovación e novas tecnoloxías. Franco explicou que o seu traballo comezou cosendo dende a casa de xeito autodidacta e, trala costura, “empecei a formarme en patronaxe dixital infantil e impulsei a miña empresa, Mamacosesola, co obxectivo de ofrecer ás familias patróns e instrucións para poder levar a cabo vestiario infantil de xeito sinxelo”. A emprendedora destacou “a axuda fundamental de SmartPEME para actualizar a miña presenza en Internet”. En detalle, puido aprender a impulsar a presenza en liña dos contidos de Mamacosesola e capacitouse ao máximo en mercadotecnia dixital, optimización de redes sociais e no emprego intensivo da analítica.

Sobre SmartPEME e a súa nova andaina

Para quen non o saiba, SmartPEME é un programa da Deputación de Pontevedra que fornece ás persoas emprendedoras, autónomas, ás asociacións e aos axentes dos concellos, servizos personalizados para o desenvolvemento económico do tecido empresarial a través das Tecnoloxías da Información e da Comunicación. Actualmente conta con sedes en Cambados, Pontevedra, Vigo, Lalín, A Estrada, O Porriño e Ponteareas. Asemade, tamén achega formación en Barro.
Respecto das novidades deste ano, a Deputación informa que a través do Centro Provincial de Economía Dixital vanse dar a coñecer ás empresas as ferramentas, aplicacións e solucións innovadoras máis relevantes que a economía dixital ofrece. Para isto, o CPED vaise apoiar nas instalacións do FabLab que a Deputación de Pontevedra ten instalado no viveiro de Barro, co obxectivo de posicionarse na vangarda da innovación da provincia ao servizo das empresas.
Doutra banda, SmartPEME Impulsa, abrirá novas vías de asesoramento en materia de innovación, competitividade e internacionalización unindo, deste xeito, os obxectivos das empresas coas máis novas tecnoloxías, procesos e servizos, e preparando ás empresas locais para competir nos mercados internacionais.
Outra das novidades é TurisTIC, que se quere erixir como o punto de apoio do sector turístico. Este servizo, enmarcado no Plan Estratéxico de Turismo Rías Baixas, pretende potenciar ao sector a través de axudas ás empresas para adaptarse á contorna dixital, cun enfoque específico para cada colectivo.

Categorías: Ciencia

O Campus de Pontevedra achega en aberto catro cursos para impulsar as nosas capacidades con tecnoloxías

códigocero - Mar, 03/13/2018 - 13:17

A Vicerreitoría do Campus de Pontevedra (UVigo) vén de presentar os seus cursos de verán: catro actividades formativas que teñen aberto xa o prazo de inscrición e que mostran o nexo común de abrir xanelas ás tecnoloxías do futuro e motivar as capacidades creativas e innovadoras que todas e todos levamos dentro. Os cursos xirarán arredor das seguintes temáticas: a aplicación dos últimos avances da neurociencia no proceso de aprendizaxe, as posibilidades que achega á produción artística a impresión tridimensional, as novas tendencias na prevención e recuperacións de lesións no deporte e as posibilidades que outorga a robótica e o encerado dixital no ensino das ciencias. Con 250 prazas, contando todos os obradoiros, estes estarán novamente abertos á participación de toda a cidadanía. Desenvolveranse no mes de xuño nas facultades de Ciencias da Educación e do Deporte e Belas Artes e nelas combínanse “novas propostas que serven tamén para completar a formación do alumnado do campus, xunto con cursos que tiveron moi boa acollida en anteriores edicións”, como salienta o director da Área de Extensión Cultural do Campus, Manuel Morquecho.
Neurociencia na escola
“As últimas investigacións en neurobioloxía sobre o funcionamento do noso cerebro na aprendizaxe demostran cousas que xa sabíamos pero que non se aplican, como que o aumento da consolidación de novos coñecementos está relacionado coa creatividade, coa curiosidade, co movemento, coa autonomía, é dicir con factores de motivación intrínseca”, salienta a profesora de Ciencias da Educación e do Deporte, Margarita Pino, responsábel de Aplicacións da neuroeducación na escola. Entre o 4 e 8 de xuño, investigadores e investigadoras do grupo Gies-10, que coordina esta docente, e da rede Ries abordarán técnicas e estratéxicas para aumentar a motivación do alumnado na aula.
Ciencias con robótica
Nesta facultade desenvolverase tamén, entre o 5 e o 21 de marzo, Ensinar ciencias con robótica, programación e produción de contidos multimedia para encerado dixital, un obradoiro coordinado pola profesora María Álvarez Lires que dá continuidade aos cursos de verán celebrados nos últimos anos, incorporando novos contidos. Nese senso, o manexo do kit Science Learning Resources e o desenvolvemento de novas actividades interactivas para o encerado dixital figuran entre os novos contidos dun taller dirixido a “desenvolver as competencias tecnocientíficas do futuro profesorado”, como sinala outra das responsábeis desta actividade, a investigadora María Lorenzo.
Deporte e tecnoloxía
Outra das actividades é Estratexias para a prevención e recuperación de lesións na actividade física e o deporte, un curso dirixido polo catedrático Carlos Lago que dá continuidade a seminarios anteriores poñendo o foco novas tendencias na prevención e recuperación de lesións, dar a coñecer as posibilidades laborais que no eido do deporte. De carácter práctico e dirixido tanto a estudantes e profesionais vinculados ao eido do deporte como ao sanitario, o curso que se desenvolverá entre o 4 e o 6 de xuño en Ciencias da Educación e do Deporte reunirá no campus a “profesionais excelentes” formados ou vinculados a esta facultade.
Impresión dixital en 3D
Por último, tamén o 4 de xuño dará comezo, na Facultade de Belas Artes, outra das novidades desta oferta formativa, o curso Facendo físico o intanxíbel. Introdución á impresión dixital tridimensional, unha actividade que dá continuidade a outros obradoiros sobre impresión 3D que se desenvolven no campus centrándose desta volta “no aspecto creativo desta tecnolóxica e as súas posíbeis aplicacións no ámbito das artes plásticas e belas artes en xeral”, como sinala o seu responsábel, Ignacio Pérez.

Categorías: Ciencia

Páxinas

Subscribirse a IGACIENCIA lector de novas