Agregador de novas

Santiago acolle unha relevante xornada sobre mulleres que collen as rendas do sector TIC

códigocero - Ven, 03/02/2018 - 09:49

O vindeiro 16 de marzo celebrarase en Santiago de Compostela unha completa e interesante xornada sobre as importantes posibilidades de enriquecemento que se abren nas empresas TIC de todo coa incorporación da muller a todo tipo de postos de relevancia. A sesión, que se vai desenvolver co epígrafe A era tecnolóxica: un desafío para as empresas e os seus líderes, vén da man de AUDICON e a Asociación para el Progreso da Dirección (APD), e conta (no que a nosa terra se refire) coa colaboración activa do Colexio Profesional de Enxeñaría en Informática de Galicia (CPEIG), Executivas de Galicia, Mindset, e Valora Consultores. A xornada terá lugar no Auditorio ABANCA, no número 23 da rúa do Preguntoiro, en horario de 9:00 e as 14:30 horas.
A xornada busca pór de relevo dous feitos que, en palabras dos organizadores, son a todas luces incontestábeis: “Estamos convencidos de dúas cousas; a primeira, que ningunha actividade económica poderá sobrevivir se non integra a tecnoloxía ao seu modelo de negocio e ao seu quefacer cotián; e a segunda, que é imprescindíbel que as mulleres estean presentes nesta revolución tecnolóxica que estamos a vivir e que é noso deber outorgarlles visibilidade”.
Para incidir neste obxectivo de “dar visibilidade” participarán na sesión empresas e profesionais referentes en Santiago de Compostela para falar de tecnoloxía, talento e “do imprescindíbel papel da muller no proceso de crecemento das organización”. Participará como relatora a directora financeira en Ebay Internacional, Laurent St. Clair, e outros representantes de organizacións como a Fundación Telefónica (Rosa María Sainz e Milagros Sainz), Bahía Software (Ana Armada), MindSet (Mónica Quintana), Gamering (Txema Arnedo), Accenture (María José Sanz), Gradiant (Luis Pérez Freire), Clun (Adali Morales), Executivas de Galicia (Carla Reyes Uschinsky), Inteligenz (Cristina Aranda), Eventim.com (Basola Vallés), e docentes da Universidade de Santiago de Compostela (Ángeles Romero ou Elela Vázquez Cendón).

Categorías: Ciencia

¿Por qué se «divorcian» las parejas de aves?

Investigación y Ciencia - Ven, 03/02/2018 - 00:00
Algunas especies muestran este comportamiento para asegurar su éxito reproductivo.
Categorías: Ciencia

Lowi ofrece fibra óptica no fogar por só 26 euros/mes

códigocero - Xov, 03/01/2018 - 23:00

Até o 30 de abril Lowi está a ofrecer aos seus clientes de móbil ou de fibra+móbil o dobre de volume de datos, promoción que están a dar a coñecer a partires de hoxe entre os seus clientes, mentres que non parecen dar importancia a un cambio bastante máis profundo da súa oferta actual, xa que as súas conexións de fibra óptica de 50 Mbps pasaron de custar 33 euros/mes a 26 euros/mes, estando suxeita tal rebaixa de prezo á aceptación dun compromiso de permanencia de 24 meses. Deste xeito, temos así cunha das opcións máis económicas do mercado para gozar dunha conexión de fibra óptica no fogar que, ao non incluír número de teléfono fixo, pode rebaixar o seu prezo até un límite moi asumible.
A fibra óptica de Lowi emprega a infraestrutura de Vodafone, inclúe instalación e router Wi-Fi de balde e tamén pode combinarse con números de teléfono móbil de Lowi con chamadas ilimitadas.

Categorías: Ciencia

A Policía Nacional arresta ao fundador de Blusens

códigocero - Xov, 03/01/2018 - 23:00

Distintos medios de comunicación deron conta nas últimas horas da detención de José Ramón García, fundador de Blusens, por un delito contra a propiedade industria e por organización criminal, quedando liberdade con medidas cautelares tras declarar ante o xuíz.
O arresto teríase realizado este mércores en Santiago de Compostela por axentes da Policía Nacional adscritos ao grupo especial contra os delitos intelectuais e industriais (con base operativa na Coruña) e mantívose até esta tarde en dependencias policiais até que o puxeron a disposición xudicial para declarar no Xulgado de Instrución número 3 de Compostela.
O motivo exacto da investigación non se puxo en coñecemento público, pero parece que estaría relacionado coa comercialización dun dispositivo para conectar televisores á Internet.
Blusens xa fora condenada hai anos por infrinxir a propiedade intelectual de Televés, pero tras a presentación de Blusens a concurso voluntario de acredores o emprendedor compostelán participou en moitos outros negocios, como Ultra Smart Networks, Mr. Nutrición, Valliciergo Investments, Atlántica Trader, Moonoff, Trend Luxury... conseguindo especial visibilidade Tendeus, que baixo o nome de Amazing Outlet abriu unha tenda hai pouco en Área Central.

Categorías: Ciencia

O Goberno galego quere garantir que os polígonos poidan tirar o máximo proveito da Rede

códigocero - Xov, 03/01/2018 - 23:00

O Goberno galego vén de comunicar a súa intención de asegurar nos polígonos industriais públicos novos ou ampliados as condicións axeitadas para gozaren Internet de alta velocidade. O compromiso da Xunta para garantir estes equipamentos foi dado a coñecer hoxe polo presidente da Xunta, Alberto Núñez Feijóo, trala xuntanza do Consello. Segundo fixo saber, remitirase ao Consello Consultivo o novo decreto destinado a blindar a devandita disposición. O titular do Goberno galego lembrou que ao remate deste ano, 81 polígonos terán acceso a redes de ata 350 Mbps.
Estas complexos industriais, dixo, sumados aos que xa contaban con este tipo de acceso á Internet, “farán posíbel que se chegue a máis do 93% da superficie empresarial ocupada”. Feijóo engadiu que o novo decreto establecerá os criterios de deseño e dimensións que deben cumprir as infraestruturas de telecomunicacións e de soporte, “para que se instalen de xeito homoxéneo e con seguridade”. Tamén “permitirá despregar redes ultrarrápidas cunha axilidade moito maior, trámites administrativos máis sinxelos e menores custos”, engadiu, facendo un repaso polas vantaxes de contarmos nos espazos empresariais con “boas infraestruturas de telecomunicacións”. Dispor delas, sinalou, “fará máis atractivos os parques empresariais e facilitará a captación de novos investimentos industriais en Galicia”.

Categorías: Ciencia

A Fundación Uxío Novoneyra e a Deputación de Lugo achégannos ás novas tendencias en edición

códigocero - Xov, 03/01/2018 - 16:53

A Deputación de Lugo e a Fundación Uxío Novoneyra seguen a dar pasos importantes na súa colaboración cultural e de impulso social, pasos que se suman ao labor conxunto de promoción da nosa literatura (unha promoción que porá en foco onde non chega ou chegou, precisamente, a nosa literatura) anunciado en febreiro. Agora, ambas entidades volven xuntar forzas para organizar un curso de novas tendencias en edición. O curso foi dado a coñecer hoxe pola deputada Pilar García Porto e o xerente da Fundación Uxío Novoneyra, Uxío Novoneyra. Segundo fixeron saber na cita, celebrada no Obradoiro do Libro do CENTRAD, a formación incidirá (entre outras cousas) nos novos xeitos de lanzar literatura ao mercado botando man das novas tecnoloxías dixitais. Tanto para a promoción, a mercadotecnia, a distribución e a comunicación cos lectores, como para o propio produto editorial en si mesmo.
Segundo engadiron, na proposta participarán autores e editores galegos. Ademais, o alumnado terá ocasión de realizar unha antoloxía de nova poesía luguesa, así como unha mostra expositiva da evolución dos soportes-libro, hoxe en día moi abeirados ao dixital (alomenos nalgún elo da cadea de produción).
García Porto avanzou que “esta iniciativa está enmarcada dentro do marco de colaboración que mantemos coa Fundación. Con esta proposta queremos traer á provincia unha formación actualizada nas tendencias de edición literaria de vangarda, con ensino técnico, e contando ademais coa experiencia dos profesionais do sector de maior relevancia de Galicia”. Asemade, explicou que a Deputación é “coñecedora das inquedanzas do mundo da edición literaria, que vén de vivir un período de grande dinamismo, así como das novas propostas que conflúen coa revolución dixital”.
Pola súa banda, Uxio Nononeyra explicou que o curso consta de 60 horas e que está previsto para o mes de abril e para comezos de maio, impartíndose na aula Central do CENTRAD. O obradoiro, engadiu, fica aberto ao público en xeral, que poderá inscribirse (previo pago da matrícula de 90 euros) na web da entidade que preside, uxionovoneyra.com.

Categorías: Ciencia

AJE Vigo organiza un encontro co fundador das quedadas de youtubers

códigocero - Xov, 03/01/2018 - 13:44

A Asociación de Empresarios Novos de Vigo, AJE Vigo, organiza este dous de marzo unha clase maxistral con Óscar Cumí, fundador das quedadas youtubeiras que se realizan de setembro a xuño por todos os recantos do territorio estatal, e que son coñecidas como Talent Mercadotecnia Days (TMDay). En formato de clase maxistral, Cumí dirixirase na súa sesión de Vigo a autónomos, startups, PEME e microPEME da cidade e a súa contorna, co fin de mostrar a importancia que hoxe teñen os referentes nas redes sociais (influencers e microinfluencers) arredor das distintas marcas e das tendencias de mercado. Cumí porá o foco nas importantes posibilidades profesionais que se abren a través da intermediación coas empresas que estean pensando en dirixirse á que se coñece como “xeración millenial”.
Durante o encontro con emprendedores e novos profesionais, o relator explicará a importancia destes comunicadores influentes, as diferenzas entre un influencer e un micro-influencer e como se deben elixir o máis idóneo prescriptor, que é como se designa en castelán a aquelas persoas, persoeiros ou entidades que son quen de influír nun determinado público coas súas opinións e decisións. Cumí tamén detallará casos de éxito. O encontro será no Círculo de Empresarios de Vigo, ás 17.00 horas. Está aberto para socios e non socios de AJE e para poder asistir só é necesario inscribirse previamente no mail da asociación: info@ajevigo.es.

Categorías: Ciencia

Santiago estréase hoxe no desafío Hash Code de Google da man do grupo GDG local

códigocero - Xov, 03/01/2018 - 12:02
Participantes nunha das roldas internacionais do Hash Code

A Residencia Monte da Condesa da Universidade de Santiago acolle hoxe a celebración dunha proba inserida no reto Hash Code, o desafío colectivo de programación de Google para estudantes e profesionais do sector. A cita, que se celebra por vez primeira na USC, desenvólvese a partir das 18.00 horas e de aí en adiante até as 22.30 horas. Quen queira participar poderá facelo en grupos de dúas, tres ou catro persoas, na linguaxe máis axeitada para as súas habilidades e coñecementos. Hash Code, para que non o saiba é un concurso internacional de programación de Google dirixido a estudantes e desenvolvedores de Europa, Oriente Medio e África para que resolvan un problema real de enxeñaría proposto pola compañía. A cita de hoxe vén da man do grupo GDG Santiago.
Trátase da proba dunha rolda de clasificación que se celebra en máis de 70 países nun total de 636 puntos de encontro. Desta volta, os equipos máis destacados neste inicio do concurso serán convidados á rolda final para competir polo título de campións do Hash Code 2018, que ten lugar en Dublín o día 28 de abril.
A novidade da proba de hoxe é que por vez primeira, e grazas ao traballo do grupo Google Developer Group Santiago, organizouse este hub na USC para que “todos os participantes poidan reunirse nun espazo común e compartir o ambiente da competición”. A organización calcula que van concorrer na proba medio centenar de persoas. O evento conta co patrocinio de dous negocios locais, a Hamburguesería Carpanta e o Pub Central Perk.
Respecto do grupo GDG de Santiago, sinalar que é un colectivo independente de Compostela que funciona como punto de encontro para desenvolvedores familiarizados coas tecnoloxías de Google. A día de hoxe está coordinado por alumando da USC. O seu obxectivo é “compartir experiencias e formar comunidade, conseguindo así mellorar o nivel profesional amais de fomentar o traballo cooperativo”. A proba de hoxe é a primeira dunha serie de eventos que se prevé longa.

Categorías: Ciencia

A Deputación da Coruña escanea os gravados do Dolmen de Dombate

códigocero - Xov, 03/01/2018 - 11:30

Contribuír a preservar, visualizar, reivindicar e coñecer mellor un dos nosos grandes monumentos megalíticos, o Dolmen de Dombate (Cabana de Bergantiños). Estes son os obxectivos dos traballos de rexistro dixital avanzado que están a realizar in situ (no propio dolmen) investigadores e especialistas da Universidade de Alcalá de Henares, da Escola Superior de Conservación e Restauración de Galicia e da Deputación da Coruña. Máis polo miúdo, o seu labor consiste no escaneado dos gravados inscritos nas lousas do monumento. Onte mesmo, responsábeis das ditas entidades participantes no proxecto supervisaron os traballos realizados. Estes buscan ampliar o noso coñecemento sobre a xénese e a historia do dolmen.
As tarefas de escaneado láser das lousas, coordinadas polo enxeñeiro Roberto Cabeceira, tamén permitirán valorar cal é o estado de conservación actual dos elementos que o integran.
Segundo informou a Deputación da Coruña, a actuación reconstruirá dixitalmente unhas litografías “que até o de agora non foran sometidas a un exhaustivo estudo, unhas indagacións que si se realizaron sobre as pinturas prehistóricas presentes no conxunto arquitectónico”. A entidade provincial tamén explicou que os achados que deriven das investigacións actuais serán incorporados ao estudo realizado polo CSIC sobre as manifestacións pictóricas de Dombate.
A visita ao monumento contou tamén coa participación de dous arqueólogos, unha historiadora da Arte e tres restauradoras da Deputación da Coruña, quen xunto co alumnado da Escola Superior de Conservación e Restauración de Bens Culturais de Galicia presenciaron o avance dos labores de escaneo.
Os traballos sobre o conxunto artístico fican encadrados dentro do proxecto de investigación Rebuilding Megalithic memories, unha iniciativa que está a ser financiada e coordinada pola Universidade de Alcalá de Henares (UAH).
Lembrar, para que non o saiba, que o Dolmen de Dombate forma parte do Patrimonio da Deputación da Coruña dende o ano 1975, sendo un dos monumentos megalíticos máis sobranceiros da nosa terra (está declarado Ben de Interese Cultural dende 1985).

Categorías: Ciencia

A cuarta edición de Galicia Open Future aposta de cheo pola innovación aberta

códigocero - Xov, 03/01/2018 - 11:00

Para quen non o saiba, Telefónica o Goberno galego (AMTEGA) comezaron o ano avanzando na sua colaboración e poñendo en marcha unha nova edición (a cuarta xa) de Galicia Open Future, o centro de crowdworking da Cidade da Cultura. Segundo avanzaron daquela, esta nova entrega ía vir con novidades. Por exemplo: unha viraxe cara ao que se coñece como Industria 4.0, ou sexa, cara ás metodoloxías intelixentes de traballo que resultan da confluencia entre a industria e o mundo das tecnoloxías da información. Dar conta destas e doutras novidades foi o obxectivo da xornada Galicia en Dixital, Industria 4.0, que se celebrou onte no Gaiás e na que participou, entre outros, o conselleiro de Economía e Industria, Francisco Conde.
Na cita, Conde salientou a importancia de desenvolver proxectos de innovación aberta, como os de Galicia Open Future, precisamente, co obxectivo “de dar resposta ás necesidades do tecido empresarial co novo talento”. E engadiu: “A industria do futuro será dixital, polo que é necesario dar cobertura aos proxectos que nacen do talento e a innovación”, apuntou.
O conselleiro aproveitou para facer un chamamento a emprendedores, startups, PEME e organismos de investigación “para que participen no programa e presenten os seus retos de negocio, xa que poden ser abordados mediante solucións baseadas en tecnoloxías”.
Segundo se fixo saber na cita de onte, o prazo para achegarmos propostas a Galicia Open Future (retos que serán afrontados polas empresas participantes) estará aberto até o 13 de marzo. Entre estas propostas figura, por exemplo, unha de Nova Pescanova, que consiste en procurar respostas de coñecemento detallado sobre o ciclo de cría do langostino. Outra das empresas que concorre cun desafío é FINSA, que conta cun proxecto para o deseño de novo mobiliario que aproveite as novas tecnoloxías para a creación de hábitats intelixentes.
Máis datos sobre a cuarta edición de GOF
Baixo o epígrafe Galicia Open Future_: Edición Retos Industria 4.0, a cuarta edición de GOF busca “dirixir o talento emprendedor cara á resolución de problemas concretos da industria galega”, informou os días pasados Telefónica, engadindo que nesta cuarta entrega colaborarán novamente a Axencia Galega de Innovación (GAIN), a Axencia Galega para a Modernización Tecnolóxica de Galicia (AMTEGA) e o Instituto Galego de Promoción Económica (IGAPE).
Como dixemos, ao abeiro do novo programa, proporase a grandes empresas referenciais galegas (entre as que se contan as devanditas Nova Pescanova e FINSA) que lancen publicamente un total de seis retos reais de negocio, baixo un modelo de innovación aberta. Ao abeiro desta proposta colectiva, abriranse convocatorias a través da plataforma Telefónica Open Future para cada un dos desafíos, ás que poderán presentarse startups, PEME, centros tecnolóxicos, universidades e emprendedores, e entre os que se seleccionará a un gañador, que poderá desenvolver un piloto da súa solución coa empresa tractora, e tres finalistas.
O gañador terá unha axuda de GAIN de 20.000 euros para a posta en marcha do proxecto piloto. Ademais, tanto o gañador como os tres finalistas poderán acceder a un programa de aceleración dentro do ecosistema Open Future de Telefónica, e recibirán ademais un patrocinio de 10.000 euros, achegado por GAIN, como “recoñecemento ao seu esforzo innovador”. Logo, transcorrido o tempo de aceleración, seleccionarase ao mellor do tres finalistas, que recibirá unha axuda adicional de 10.000 euros achegada por AMTEGA.
Telefónica tamén explicou que aparte das achegas económicas directas, Xesgalicia concederá á empresa gañadora un préstamo reembolsábel pola cantidade de diñeiro investido para a posta en marcha do piloto nas empresas, até un máximo de 100.000 euros. Ademais, poderá conceder aos finalistas un préstamo reembolsábel de até 50.000 euros.
A xeito de balance, a compañía tamén recordou que nas tres edicións anteriores de Galicia Open Future presentáronse un total de 416 proxectos de alicerce tecnolóxico, dos cales foron acelerados 145, o que supuxo un total de 1.100 horas de traballo individualizado e o desenvolvemento de 90 actividades formativas e obradoiros abertos en materias como fiscalidade, mercadotecnia dixital, imaxe de marca ou novos modelos de financiamento.
Durante a súa participación, as novas firmas innovadoras puideron presentar os seus proxectos a potenciais clientes, participar en eventos internacionais como o South Summit, recibir apoio á internacionalización, celebrar sesións de adestramento e retro-alimentación con directivos de Telefónica, entrar en contacto coa rede global da plataforma Telefónica Open Future e recibir un apoio económico por parte da consellería de Economía, Emprego e Industria dirixido a aquelas empresas con mellor aproveitamento na aceleración.

Categorías: Ciencia

A Deputación da Coruña achega 4,3 millóns de euros para impulsar a creación de emprego e a innovación nas empresas

códigocero - Xov, 03/01/2018 - 10:30

A Deputación da Coruña confirmou esta semana que vai destinar 4,3 millóns de euros para axudar ás PEME da provincia e ás persoas emprendedoras nas súas estratexias de contratación de novas e novos traballadoras/es e máis na adquisición de bens que lles axuden na súa actividade de mercado. Estas contribucións da entidade que preside Valentín González canalizaranse a través das liñas PEL PEME e PEL Emprende. O primeiro programa diríxese a incentivar a incorporación de novo persoal en pequenas e medianas empresas e o segundo, a impulsar as novas iniciativas empresariais no ámbito provincial. Ou sexa, a fortalecer os seus recursos para seren máis eficientes e competitivas (por exemplo a través da adquisición de material TIC e outros elementos innovadores).
O presidente da Deputación da Coruña, Valentín González Formoso, salientou que estes dous programas de axudas convócanse por segundo ano consecutivo, “tralo éxito da convocatoria anterior, que contou cunha gran acollida entre as empresas da provincia e que cumpriu cos obxectivos fundamentais de impulsar o emprego de calidade nos concellos coruñeses e dinamizar o tecido socioeconómico local”.
Segundo fixo saber, en 2017 as axudas do PEL permitiron a creación e mantemento de preto de 1.000 empregos na provincia. Nun plano máis detallado, a través da liña PEL PEME, a Deputación contribuíu á creación de 224 novos postos de traballo, mentres que ao abeiro do PEL Emprende impulsáronse 194 novos proxectos emprendedores. A estas liñas cómpre engadir unha terceira liña, PEL Concellos, que se convocará en datas vindeiras e que na anterior edición posibilitou a contratación de 477 persoas desempregadas para a prestación de servizos locais básicos nos 82 municipos da provincia de menos de 20.000 habitantes.
O presidente puxo o foco ademais na intención da entidade provincial de “continuar ofrecendo estas axudas e mesmo incrementar aínda máis a dotación do plan de emprego nas vindeiras edicións do programa”.
O prazo de presentación de solicitudes para concorrer ás subvencións comezou esta cuarta feira, mércores 28, e remata o día 22 de marzo de 2018, ás 14.00 horas. As persoas interesadas poden presentar as súas solicitudes de forma telemática a través do portal de subvencións da Deputación da Coruña.
A liña PEL PEME, dotada con 3,1 millóns de euros, ofrecerá as mesmas axudas que en 2017, para financiar o 75% dos custos salariais das novas contratacións nas empresas da provincia durante 1 ano. Para concorrer a esta liña, as empresas deben ter o seu centro de traballo rexistrado nun concello de menos de 20.000 habitantes da provincia da Coruña.
As contratacións deberán realizarse entre o 1 de xaneiro de 2018 e até dous meses despois da data de concesión da axuda, que cubrirá os custos salariais e as cotas da Seguridade Social, cun importe que varía entre un mínimo de 13.500 euros e un máximo de 16.500 euros, en función da categoría profesional do traballador ou traballadora a contratar.
Ademais, e como novidade, as firmas que xa contrataron a unha persoa ao abeiro do PEL PEME 2017, poderán solicitar tamén unha nova axuda para custear o 50% do salario deste traballador durante un segundo ano.
Polo que respecta á liña PEL Emprende, que terá un orzamento total de 1.161.528 euros, a Deputación concederá ao seu abeiro axudas aos novos emprendedores e emprendedoras da provincia para realizar investimentos e actividades necesarias para o desenvolvemento da súa actividade profesional. O importe máximo da axuda a conceder ascende a 20.000 euros, cun orzamento de gasto de ata 25.000 euros, o que supón un financiamento do 80% do investimento realizado polo solicitante. Ademais, se quen realiza a petición ten a súa empresa nun concello de menos de 20.000 habitantes, é unha muller, unha persoa con diversidade funcional ou en risco de exclusión social, a axuda poderá incrementarse 3.000 euros máis, até un total de 23.000 euros.
Para recibir a devandita subvención, os investimentos deberán realizarse entre o 1 de xaneiro e o 31 de decembro, e deberán estar directamente relacionados co desenvolvemento da actividade empresarial. Poderán subvencionarse bens como maquinaria, aplicacións informáticas, mobiliario ou equipos e útiles de traballo.
No capítulo de novidades cómpre salientar que PEL Emprende tamén subvencionará actividades e actuacións que sirvan para desenvolver a empresa e potenciar a súa competitividade, como servizos de consultoría, mercadotecnia e comunicación ou formación. Esta nova liña PEL Emprende - Actividades convocarase oficialmente nos próximos días.


Categorías: Ciencia

Estimar la velocidad de envejecimiento mediante un análisis de orina

Investigación y Ciencia - Xov, 03/01/2018 - 00:00
Una molécula relacionada con el estrés oxidativo permitiría monitorizar el proceso de senectud, pues su concentración aumentaría con la edad.
Categorías: Ciencia

O Concello de Pontevedra impulsará na Rede o talento do alumnado do Campus

códigocero - Mér, 02/28/2018 - 22:43

O Concello de Pontevedra vai afianzar as súas ligazóns coa Facultade de Ciencias Sociais e da Comunicación (Universidade de Vigo), emprazada no campus local. Estas ligazóns, segundo fixeron saber hoxe os responsábeis da dita escola e do programa Pontevedra ten un puntazo (Concello), fortaleceranse en boa medida na Rede. Sen ir máis lonxe, hoxe mesmo o alcalde Miguel Anxo Fernández Lores e máis a concelleira de Promoción Económica, Anabel Gulías, tiveron ocasión de coñecer a fondo a páxina web que promove o traballo do alumnado da Facultade. Estamos a falar de A Canteira, o espazo dixital do centro que mostra os proxectos de alumnado e egresados e que contará, segundo se confirmou, coa colaboración do Concello para achegar o talento do campus ao tecido empresarial.
O obxectivo máis extenso do Concello, obxectivo no que se insire a xuntanza de hoxe, é iniciar unha nova liña de traballo ao abeiro edición de 2018 de Pontevedra ten un Puntazo, dirixida a establecer vencellos entre as empresas que conforman o programa do Goberno local (centrado na industria creativa, cultural e de innovación da cidade) co ámbito universitario. Na cita deste 28 de febreiro engadiuse que o vindeiro o vindeiro mes de marzo, a devandita páxina web sexa obxecto dunha presentación dentro das actividades do devandito programa local, así como outras accións ligadas á visualización de novos talentos formados a cidade.
Na cita de hoxe, na que tamén participaron o decano (Xosé Manuel Baamonde), o vicerreitor do Campus (Juan Manuel Corbacho) e o vicedecano (Oswaldo García), fíxose un percorrido polos platós de cinema e televisión da facultade, ao tempo que se lles mostraba aos representantes do Concello os contidos e o funcionamento do portal. Un portal que, coincidindo co inicio da súa campaña dixital, será promovido igualmente través das webs do Concello, o que permitirá, explicaron, “que o alumnado dispoña dun maior coñecemento das empresas no momento de decidir onde quere realizar as súas prácticas, ao tempo que se favorece que as empresas entren en contacto cos diferentes perfís profesionais que abrollan da facultade”.
Máis datos sobre a web
Impulsada co apoio do Consello Social da Universidade de Vigo e do Campus Crea S2i, o portal dá continuidade a un proxecto iniciado en 2015 polo anterior equipo decanal e naceu precisamente co propósito de “servir ao sector empresarial para atopar profesionais diferentes perfís”. A día de hoxe reúne máis dun cento de traballos de estudantes e egresados, tanto audiovisuais como fotográficos, publicitarios ou multimedia, completados cun perfil profesional dos seus autores e autoras. Trátase ademais, como sinalou García, dun proxecto desenvolvido por dous ex-alumnos, Iago Souto, que se encargou do seu deseño e de dotalo dos seus primeiros contidos no marco do seu traballo final no grao en Comunicación Audiovisual, e David Segarra, responsábel da parte técnica. Entre os proxectos presentes neste portal atópanse curtas como Fume, series dixitais como Interfecto ou vídeos musicais como as gravacións acústicas de músicos galegos que integran o proxecto Sesións Destelo, que recentemente presentaba a súa segunda tempada; e tamén mostras de gráfica publicitaria, fotografías ou proxectos de videoxogos.

Categorías: Ciencia

Twitter permite gardar chíos en Marcadores

códigocero - Mér, 02/28/2018 - 22:09
Na aplicación móbil de Twitter os Marcadores coñécense polo momento como Elementos guardados

O pasado mes de outubro Twitter anunciou que estaba a preparar unha función para facilitar o gardado de chíos de interese, e finalmente é hoxe cando inician a implantación global de tal prestación que na versión en galego da web responde ao nome de Marcadores mentres que nas aplicacións móbiles (en español) chámase Elementos guardados.
Deste xeito, cando queremos conservar algún chío para poder consultalo logo con calma non teremos que recorrer a aplicacións de terceiros como Pocket, senón que simplemente teremos que premer no último botón dispoñible baixo o chío e elixir a opción de Engadir chío aos marcadores.
Para acceder aos Marcadores que teñamos gardados está dispoñible tal opción no menú principal de Twitter, entre as opcións de Listaxes e Momentos, e que achegará a relación de mensaxes gardadas para interactuar con elas con normalidade.
A opción de compartir que temos agora en Twitter é así máis versátil que antes, xa que deixa enviar chíos mediante mensaxes directas, gardalos para máis tarde e compartilos mediante a función xenérica do noso dispositivo.
No momento de escribir estas liñas os Marcadores están a chegar a usuarios de Twitter para iOS, Android, Twitter Lite e a versión móbil da web de Twitter.

Os Marcadores están xa dispoñibles na web móbil de Twitter
Categorías: Ciencia

O Grupo Euskaltel sumou nun ano 151.000 novas liñas de móbil, un 20% máis ca en 2016

códigocero - Mér, 02/28/2018 - 20:50

O Grupo Euskaltel, do que forman parte Euskaltel (Euskadi), R (Galicia) e Telecable (Asturias) vén de facer balance dos froitos acadados no ano que vimos de deixar atrás. O informe, ateigado de datos do máis variado, salienta por unhas cantas cifras de especial interese. Para comezar, faise saber que o grupo medrou un 8,6% logo de culminar o seu afianzamento na fachada norte da Península. Ademais, obtivo uns ingresos de 622,2 millóns de euros, fronte aos 572,9 millóns do anterior exercicio. Por outra banda, o beneficio bruto de explotación (Ebitda) emprazouse nos 306,9 millóns de euros, o que significa un medre do 9,4%. Amais, disparouse o número de liñas de móbil, de TV por subscrición e de produtos contratados de banda larga.
No informe tamén se informa que o Consello de Administración do grupo propuxo distribuír aos accionistas un dividendo final de 27,8 céntimos de euro por acción. Isto farase con con cargo aos resultados de 2017 e con base no beneficio neto do exercicio. “Este dividendo implica unha rendibilidade do 3,9% sobre a cotización media do último mes de 2017”, explica a compañía.
En termos de usuarios e de porcentaxes, o informe destaca que a carteira de clientes con contratos de 3 e 4 produtos alcanzou xa o 68 % sobre o total, mentres que a penetración deses clientes de alto valor engadido ao final do 2016 supoñía un 67 %.
Polo que se refire aos ingresos do segmento residencial, subiron en 2017 nun 11,6 %. No segmento empresa medraron un 2,4 %, o que, en palabras do grupo, mostra “un cambio de tendencia cunha evolución positiva ao final do último trimestre do ano, como consecuencia das medidas postas en práctica durante o ano”. Esta tendencia, engade Euskaltel, estase a manter nos primeiros meses de 2018.
No balance tamén se fai saber que no segmento de telefonía móbil sumáronse 151.000 novas liñas nun ano, até acadar as 915.000 liñas, un 20 % máis.
Polo que atinxe á televisión por subscrición, aumentou en 124.000 clientes (un 45,5 % de incremento), até alcanzar os 394.000. Este medre debeuse sobre todo á proposta de “televisión de valor” e ao lanzamento do novo Desco 4K con Android TV, que, segundo explica o grupo, é o primeiro do Estado. Desde setembro activáronse máis de 36.000 novos descodificadores.
Os produtos contratados de banda larga medraron nun 23,8 %, e situáronse nos 489.000, 94.000 máis que ao peche de 2016.

Categorías: Ciencia

O polígono das Somozas contará en breve con conexión ultrarrápida á Rede

códigocero - Mér, 02/28/2018 - 18:39

O delegado territorial da Xunta de Galicia na Coruña, Ovidio Rodeiro, participou esta mañá nunha reunión con empresarios do parque empresarial das Somozas na que adiantou a inminente implantación da conexión ultrarrápida á Internet, dentro do Plan de Banda Larga que está a desenvolver a AMTEGA en colaboración coa operadora R.
O Plan de Banda Larga da Xunta chegará este ano a catro novas superficies empresariais, acadando así un total de 28 polígonos conectados a redes ultrarrápidas na provincia grazas ao Plan. Ovidio Rodeiro estivo acompañado polo alcalde da localidade, Juan Alonso Tembrás, e polo responsable de Pequena e Mediana Empresa de R, Jacobo González. No encontro tamén participou a directora do Plan Ferrol, Natalia Barros. O delegado territorial explicou que as empresas «poderán contratar servizos de Internet a través de fibra óptica cunhas velocidades de ata 350 Mbps de baixada e 35 de subida, e cunha garantía de caudal do 80% sen límite de descargas». Ademais, R porá a disposición das empresas do polígono das Somozas a tecnoloxía necesaria para que poidan acometer a súa transformación dixital.
As actuacións do Plan comezaron en agosto 2016 e ao remate de 2017 había xa 22 polígonos da provincia habilitados. Ao remate de 2018 cumprirase o obxectivo dos 26 previstos, que sumados aos que xa dispoñían do servizo, suporá que o 98% das superficies empresariais ocupadas da provincia terán acceso a redes de máis de 100 Mbps. Ademais das Somozas, para este ano está previsto que o Plan realice novas actuacións en polígonos de Cerceda, As Pontes e Curtis, entre outras.
O Plan xa completou o despregamento en 51 polígonos e este ano chegará aos 30 restantes. Deste xeito, en 2018, un total de 130 polígonos, que concentran case o 93% da superficie empresarial ocupada, disporán de acceso. A AMTEGA aporta unha axuda de 3,4 millóns de euros, que xerarán un investimento total de 5,2 millóns. Estas subvencións cofináncianse ao 75% polo Fondo Europeo Agrícola de Desenvolvemento Rural (FEADER) no marco do Plan de desenvolvemento rural de Galicia 2014-2020 (PDR).

Categorías: Ciencia

Carnota e o Monte Pindo enchen Google de quilómetros mapeados: case 170

códigocero - Mér, 02/28/2018 - 13:27

Carnota vén de pasar a historia por ser o concello galego e estatal que máis quilómetros de seu mapeou e visualizou no Google Maps e Google Street View. De feito, estamos a falar da cifra nada desprezábel de 169 quilómetros de sendeiros e 50 camiños cubertos coas súas diferentes variantes. Segundo informaron hoxe en Santiago os principais impulsores deste importante traballo de cobertura dixital, visual, paisaxística e etnográfica (a Asociación Monte Pindo e o Concello de Carnota, coa colaboración de Google), o rico patrimonio natural de Carnota ben merecía o esforzo. E non foi un esforzo calquera, xa que as/os voluntarias/os que participaron no mapeo tiveron que cubrir os devanditos trazados coa mochila de rexistro emprestada por Google: un dispositivo carrexábel ás costas que pesa a respectábel cifra de 23 quilogramos.
O obxectivo do proxecto Trekker Monte Pindo foi seguir traballando pola protección do Monte Pindo como Parque Natural e, tamén, por mostrar Carnota do mundo da mellor maneira posíbel: coma se estivésemos alí aínda que non esteamos.
A presentación compostelá dos resultados do proxecto celebrouse este 28 no Hostal dos Reis Católicos, dando continuidade á cita os medios desenvolvida os días pasados na Lonxa Vella de Lira. A iniciativa foi debullada polos membros da dita asociación (Santi Llecha, Mario Maceiras), o concelleiro de Turismo, Patrimonio, Medio Ambiente, Deportes e Comunicación e TIC (Iván Franco) e mailo profesor da USC, divulgador e blogueiro Manuel Gago. Asemade, na cita presentouse o documental de 10 minutos no que se explican as orixes e os obxectivos do proxecto, producido por Guillermo Ascanio e por Miguel Mariño, colaborador da asociación e recentemente proclamado director da Academia Galega do Audiovisual.
A cita arrancou da man de Maceiras, que expuxo detalles interesantes da estratexia levada a cabo con Google, e afondou nas orixes da colaboración, un traballo conxunto co xigante de Internet que naceu da man de Santi Llecha, en 2016, e que tivo de xeito inevitábel un elemento importante de abraio: “A empresa Google deunos a sorpresa de estar interesada na nosa proposta de mapear o Monte Pindo, e iso malia a importante demanda das mochilas Trekker por parte de entidades de todo o mundo, e a pesar tamén do número limitado de mochilas coas que conta a compañía”.
Segundo engadiu, a proposta consistiu en solicitar a participación da asociación no programa Trekker Loan de Google, que permite ás entidades facer uso dun avanzado e vangardista equipo tecnolóxico de rexistro para incorporar ás súas plataformas cartográficas Maps, Earth ou Street View camiños que os coches da marca non poden percorrer.
De maneira parella á aprobación da solicitude comezáronse a estudar os roteiros a percorrer, vindo do Concello o convite de ampliar o tecido de camiños a mapear, sen limitarse só ao macizo do Pindo e a súa contorna. Segundo fixo saber Maceiras, o resultado foi unha iniciativa pioneira a todos os niveis, xa que con toda probabilidade non haxa ningún outro concello que levase tan lonxe as posibilidades ofrecidas por Google nos seus servizos. E, ademais, co mérito de terse realizado o traballo de rexistro en carreiros e corredoiras costentas cunha máquina de 15 cámaras e 23 quilogramos de peso. Por certo que o labor non se limitou aos camiños en terra, senón que tamén se estenderon, coa axuda do alcalde Ramón Noceda (pescador no seu tempo de lecer), á costa de Carnota, achegando vistas espectaculares do macizo, das aldeas que o circundan e, no propio mar, do arquipélago das Lobeiras e o seu faro.
“A nosa intención”, engadiu Maceiras, “é conseguir que toda a xente que polas razóns que sexan está lonxe do noso concello, teña a oportunidade de volver a el, ou de descubrilo, botando man das novas ferramentas de Google”. Ferramentas que non son outras que Google Maps (onde xa podemos ver os roteiros carnotáns trazados en azul e con todo luxo de detalles, produto do traballo de mapeo) ou Google Street View, onde se ofrecen 20 panorámicas de diferentes enclaves de Carnota, incluído o seu famoso Hórreo, a Fervenza do Ézaro ou a Laxe da Moa, no cumio do monte.
Ente o capítulos de anécdotas, fíxose saber que o traballo coa tecnoloxía Google deu como resultado cousas curiosas, como o feito de que se pixelizasen figuras antropomórficas do macizo como o Xigante da Mina, entre outras formacións graníticas, por mor da entrada en xogo do algoritmo do buscador que fai esvaecer as persoas que aparecen nas fotografías por razóns de anonimato e privacidade, entre outras. Dito doutro xeito: Google pensou que o Xigante da Mina era unha persoa e por iso é, de toda a súa contorna, o único que non se aprecia con claridade.
Na cita cos medios tamén se recordou que o aproveitamento das tecnoloxías do buscador non supuxeron gasto algún, máis ben o contrario, xa que a empresa achega diñeiro para cubrir gastos de transporte e loxística.

Categorías: Ciencia

Amazon merca Ring por máis de mil millóns de dólares

códigocero - Mér, 02/28/2018 - 12:49

A axencia Reuters dá conta da compra do fabricante de timbres e cámaras de seguridade Ring por parte de Amazon, operación que tería superado os 1.000 millóns de dólares, polo que sería unha das compras máis importantes realizadas pola compañía de Jeff Bezos.
Esta operación ten bastante sentido se temos en conta que dende o outono pasado Amazon ten un servizo chamado Amazon Key co que permite que os seus repartidores poidan deixar pedidos no interior dos fogares aínda que os clientes non estean na casa grazas a un sistema de pechos electrónicos complementados cunha cámara conectada á nube.

Ring tamén conta no seu catálogo con cómodas cámaras de seguridade

Ring é un dos referentes globais no sector dos videoporteiros conectados e as cámaras de seguridade, facendo accesible a tecnoloxía que permite que poidamos responder ao timbre do noso fogar dende calquera lugar a través do noso smartphone, tableta ou ordenador persoal, podendo recibir tamén alertas instantáneas cando se disparen os sensores de movemento, de xeito que temos unha experiencia de uso equivalente a estar sempre na casa. Esta tecnoloxía aproveita a conectividade Wi-Fi que teñamos no fogar, mentres que para a súa alimentación resulta moi versátil, xa que pode operar con cable e con batería.

Categorías: Ciencia

O influencer Álex López introdúcenos na potencialidade da mercadotecnia en redes

códigocero - Mér, 02/28/2018 - 12:30

Este 28 de febreiro, cuarta feira, desenvólvese na Coruña o quinto Taller Mercadotecnia Expertise - Optimizar ao máximo a estratexia comercial dunha empresa (clientes e B2B), en cuxa organización colabora o Centro de Investigación TIC, o CITIC. O obradoiro estará impartido polo que está considerado o meirande referente dixital (influencer) do ámbito das redes sociais e a mercadotecnia no eido hispano, Álex López. A cita terá lugar de 10 a 14 horas na Sala Eisenman da Cidade da Cultura (Santiago de Compostela) e, pola tarde, de 17 a 20 horas na Facultade de Economía e Empresa da Coruña.
Segundo informa o CITIC, as sesións están dirixidas a profesionais e responsábeis de empresas que queiran apostar pola dixitalización, así como os departamentos implicados na mellora dos seus resultados comerciais aproveitando as oportunidades que ofrecen as redes sociais profesionais e a nova contorna dixital.
Álex López é formador de redes sociais en IESE, ESADE, IE, ISDI e na Universidade de Deusto. Nas súas sesións aconsella sobre trucos útiles e boas prácticas en materia de Business-To-Business (B2B), e tamén adoita facer fincapé nos principais problemas que poden xurdir con estas contornas de traballo. De feito, posúe unha dilatada experiencia como dinamizador dixital da súa propia empresa (Social And Retail Training International Academy (SARTIA), Retail Meeting Point). É un dos expertos máis acreditados en redes profesionais como LinkedIn.

Categorías: Ciencia

A Deputación de Pontevedra pon en funcionamento a sede SmartPEME da Estrada

códigocero - Mér, 02/28/2018 - 09:49
Xuntanza celebrada en xaneiro na que a Deputación e o Concello confirmaron a participación da Estrada en SmartPEME

Hoxe formalízase finalmente a ampliación do programa SmartPEME, a rede de formación e asesoramento TIC impulsada pola Deputación de Pontevedra. E faise coa incorporación da Estrada, constituíndose finalmente unha rede formada por este concello e por Pontevedra, Vigo, Porriño, Ponteareas, Cambados e Lalín. Segundo explica a entidade provincial, o servizo estradense xorde en parte para evitar os desprazamentos cara a Lalín dos participantes nos obradoiros de SmartPEME. En Lalín, como lembraremos, é onde se atopa o punto da rede que atende ás comarcas do Deza e Tabeirós-Terra de Montes. Por outra banda, a sede estradense, en cuxa posta en marcha tamén colaborou o Concello, pretende dar resposta á elevada demanda local de participación en SmartPEME (o 33% das consultas rexistradas na sede de Lalín).
A partir de hoxe, todos os primeiros e últimos mércores de mes, entre as 10.00 e as 14.30 horas e 16.00 e 19.00 horas, unha persoa especializada en novas tecnoloxías atenderá ás empresas e persoas autónomas no viveiro de empresas da Estrada ás PEME que precisen asesoramento personalizado. Segundo explica a Deputación, un dos sectores que terán un especial seguimento e dedicación será o agrogandeiro, que na comarca de A Estrada, representa preto do 37 por cento do empresariado.
Esta cuarta feira (mércores), amais do inicio dos asesoramentos personalizados, celebrarase un obradoiro formativo, entre as 19.00 e 21.00 horas, titulado A túa páxina web en menos de 90 minutos. Durante o mes de marzo desenvolveranse dous novos obradoiros comezando o día 7 de marzo cun de Factura electrónica (19.00 a 21.00 horas) e outro o día 28 titulado A túa páxina web con Wordpress.
Seguirán a estas accións formativas os obradoiros de A túa páxina web con Wordpress II (25 de abril), Woocommerce-Módulo I. A solución que buscabas para vender por Internet (30 de maio), Woocommerce-Módulo II. A solución que buscabas para vender por Internet (20 de xuño), Google Analytics: iniciación á analítica web (18 de xullo), Google Analtytics: interpretación de datos e toma de decisións (26 de setembro), Comercializa os teus servizos a través das redes sociais (3 de outubro), Unifica a túa xestión das túas redes con hootsuite e outras ferramentas (7 de novembro) e Guía de boas prácticas para redes sociais (5 de decembro), que se celebran todos eles entre as 19.00 e 21.00 horas.
A Deputación tamén engade que, amais da carteira de formación e asesoramento que vai ofertar o SmartPEME na Estrada ao longo do ano, a través desta colaboración tamén se fará especial fincapé nos servizos específicos para o turismo, debido a que a comarca de Terra de Montes conta con importantes recursos turísticos ligados á cultura e ao patrimonio.

Categorías: Ciencia

Páxinas

Subscribirse a IGACIENCIA lector de novas