Agregador de novas

Denuncian que o HomePod deixa marcas en certas superficies de madeira

códigocero - Mér, 02/14/2018 - 23:00
Fotografía de Jon Chase na que podemos ver as marcas que sobre a madeira pode causar o HomePod

O altofalante conectado de Apple, o HomePod, por fin está á venda nalgúns mercados como o estadounidense, o que levou a que nos últimos días puidésemos ver numerosas análises do dispositivo e as súas posibilidades, e aínda que a meirande parte das críticas coinciden en que é un bo produto no que a calidade de son se refire, tamén apuntan eivas importantes como o feito de que estea excesivamente orientado ao seu uso dende o iPhone e co servizo Apple Music (ou sexa, que non é compatible con, por exemplo, Spotify), as posibilidades de Siri co altofalante son moi limitadas, carece de soporte multi-usuario e aínda ten en desenvolvemento funcionalidades chave (como o uso de varios altofalantes na mesma instancia ou a posibilidade de instalar altofalantes en varias habitacións para conseguir unha mesma ambientación musical en todo o fogar), pero hai un fallo que desvelaron dende Wirecutter que resulta bastante sorprendente, e que vén de ser recoñecido por Apple nas páxinas de soporte do produto: o HomePod pode danar os mobles de madeira.
Ao parecer a base de silicona do HomePod en conxunción coa vibración do altofalante pode provocar marcas circulares nalgunhas superficies de madeira, polo que haberá que ter este factor en conta ao elixir o lugar de colocación do trebello, xa que ninguén quere estragar un moble clásico por culpa dun dispositivo cunha vida moi inferior. Hai usuarios que denuncian o problema tras menos de 20 minutos de uso do HomePod, o que dá a entender que estamos ante un fallo de deseño que deberían solucionar rapidamente, xa que non o padecen outros produtos semellantes que hai no mercado, e claramente está a estragar a reputación do trebello que incluso chegou con retraso ao mercado (polo que os consumidores son menos tolerantes á detección de erros no mesmo).

Categorías: Ciencia

Entréganse en Vigo os premios do certame Lingua de Namorar

códigocero - Mér, 02/14/2018 - 22:31

Na tarde deste 14 de febreiro, coincidindo de maneira significativa co día de San Valentín (a festa por excelencia das e dos namorados), entregáronse en Vigo (no Museo do Mar de Galicia, a carón do Pergamiño Videl) os premios do certame Lingua de Namorar, impulsado pola Secretaría Xeral de Política Lingüística (Consellería de Cultura e Educación) e a Dirección Xeral de Xuventude co obxectivo de promover a nosa lingua no ámbito das novas tecnoloxías da información. E co requirimento temático de que as creacións presentadas estean construídas, de maneira íntegra, para engaiolar ao destinatario ou destinataria. No acto de hoxe participaron o conselleiro de Cultura, Educación e Ordenación Universitaria, Román Rodríguez; a directora xeral de Xuventude, Participación e Voluntariado, Cecilia Vázquez; o secretario xeral de Política Lingüística, Valentín García; o delegado da Xunta en Vigo, Ignacio López-Chaves; e a escritora galega Rosalía Fernández Rial como condutora.
Durante a súa intervención Román Rodríguez salientou a importancia de “manter o galego como unha lingua dos afectos e das relacións persoais, de visualizala como o que sempre foi, a lingua do pobo de Galicia”, ao tempo que se avanza na súa presenza nos espazos formais, como a Administración.
O conselleiro explicou que as cantigas do Pergamiño Vindel “xa expresaban o amor en galego, tal e como o fixeron tamén os participantes neste certame Lingua de namorar”, demostrando que a lingua propia de Galicia non “só ten historia senón que tamén ten futuro; unha lingua de pergamiños, pero tamén de whatsapps”.
Os participantes no acto salientaron que o certame “foi un éxito”, xa que dobrou de maneira considerábel a participación da mocidade con respecto a todos os anos anteriores e chegou aos 1.509 mozos e mozas. Un total de 704 concorreron ao concurso coas súas declaracións de amor en galego, 488 na categoría A (de 14 a 19 anos) e 216 na categoría B (de 20 a 35 anos); 805 en total, votaron as súas favoritas.
De entre as 50 máis votadas en cada categoría, resultaron gañadoras do primeiro premio na categoría A, Nee Barros (Marín), pola mensaxe Muiñeira; do segundo Ania Ferreira (Vigo), pola mensaxe Tes lume? e do terceiro Uxía Martínez (Vigo), pola mensaxe Amor adiantado.
Na categoría B fixérono do primeiro premio Teresa Pérez (Lousame), pola mensaxe Infinito; do segundo Aitana Iglesias (Narón), pola mensaxe Fagamos melodía e do terceiro Iria Carreira (Arzúa), pola mensaxe Terroristas.
As gañadoras recibirán como premios un Hoveboard Nilox, unha cámara Fuji instantánea mini 9, un auricular Panasonic Diadema, unha smart TV Panasonic 32”, un smartphone Wiko 5” e unha cámara deportiva Mini Wifi 2”, respectivamente, acompañados de cadansúa reprodución do Pergamiño Vindel, conmemorativa da súa estadía en Vigo en 2017 e 2018 e mais un diploma acreditativo. Toda a información e textos gañadores está xa dispoñíbel na web Lingua.gal.

Categorías: Ciencia

FINSA e Nova Pescanova lanzan retos de innovación emprendedora ao abeiro de Galicia Open Future

códigocero - Mér, 02/14/2018 - 22:29

As compañías galegas FINSA e Grupo Nova Pescanova veñen de pechar fileiras a prol do emprendemento innovador e de lanzar cadanseu desafío ao abeiro de Galicia Open Future, o centro de crowdworking de Telefónica con sede na Cidade da Cultura, arestora inserido na súa cuarta edición. FINSA, no seu reto, expón o desenvolvemento dun sistema que axude a xestionar de forma máis intelixente o seu mobiliario, obtendo información de interese a través dos datos dos sensores colocados nos seus produtos. O Grupo Nova Pescanova, pola súa banda, busca un modelo de predición que axude a optimizar a rendibilidade da súa produción de lagostino de acuicultura. Os gañadores desenvolverán o proxecto piloto acompañados pola empresa tractora e poderán acceder ao programa de aceleración de Galicia Open Future, ademais de recibir axudas económicas da Xunta de Galicia.
As dúas devanditas propostas son as primeiras das achegadas por FINSA e o Grupo Nova Pescanova para Galicia Open Future: Edición Retos 4.0, o novo modelo do programa de aceleración de Telefónica, que, como dixemos recentemente en Código Cero, busca dirixir o talento emprendedor cara á resolución de problemas concretos da industria galega.
Nun plano máis detallado, a proposta de FINSA tenta responder á seguinte pregunta: Como poden as novas tecnoloxías dotar ao sector da madeira de capacidades dixitais para ofrecer aos seus clientes un mobiliario máis intelixente? O obxectivo da empresa con sede en Santiago é fornecer aos seus clientes finais dunha plataforma de software que permita acceder aos elementos de sensórica instalados nos seus produtos (taboleiros de madeira, chans laminados ou compoñentes para móbeis) e executar accións para “crear hábitats intelixentes”. FINSA expón este reto para desenvolver tamén unha plataforma que almacene datos de uso dos produtos para poder obter así un histórico que permita facelos evolucionar, e a súa idea é que sexa unha plataforma aberta a todos os fabricantes para crear no futuro un ecosistema do que tiren proveito múltiples axentes do sector. Por último, busca que o sistema cumpra con criterios de seguridade óptimos, “para lograr a confianza do cliente final neste tipo de produtos”, sinala a compañía.
Pola súa banda, o Grupo Nova Pescanova lanza o seguinte reto: Como podemos modelar os datos recolleitos nos sucesivos ciclos de cría do lagostino para predicir e corrixir, no seu caso, comportamentos e optimizar a toma de decisións presentes e futuras? Para o Grupo Nova Pescanova, que dispón de máis de 1.000 piscinas para cría de lagostino situadas en distintas partes do mundo, a eficiencia óptima deste cultivo extensivo é un reto a conseguir, debido á influencia de múltiples factores como o clima, as condicións e a densidade da sementeira ou a dosificación do alimento, entre outros, polo que busca dispor, nas súas palabras, “dun modelo de análise de predición que faga realidade anticipar comportamentos e dispor de curvas esperadas de supervivencia, medre e rendibilidade”. O obxectivo final deste reto é “incorporar ao cultivo de lagostino un método de autoaprendizaxe en función de decisións e resultados, de forma que nunha fase posterior a produción esta o máis preto posíbel da súa rendibilidade óptima”.
Galicia Open Future inaugura desta maneira a súa primeira fase de lanzamento de retos coa participación de dúas empresas galegas de referencia, e líderes nos seus respectivos sectores. Ás propostas poderán presentarse startups, PEME, centros tecnolóxicos, universidades e emprendedores. Seleccionarase a un gañador por cada desafío, que poderá desenvolver un piloto da súa solución coa empresa tractora, e tres finalistas. O gañador terá unha axuda da Axencia Galega de Innovación (GAIN), dependente da Consellería de Economía, Emprego e Industria, de 20.000 euros para a posta en marcha do proxecto piloto. Ademais, tanto o gañador como o tres finalistas poderán acceder a un programa de aceleración dentro do ecosistema Open Future de Telefónica, e recibirán ademais un patrocinio de 10.000 euros, achegado por GAIN, como recoñecemento ao seu esforzo innovador. Transcorrido o tempo de aceleración, seleccionarase ao mellor do tres finalistas, que recibirá unha axuda adicional de 10.000 euros achegada pola axencia AMTEGA.

Categorías: Ciencia

O novo programa Xornalismo na Escola alentará o espírito crítico perante as falsas novas nas redes

códigocero - Mér, 02/14/2018 - 19:00

O Colexio de Xornalistas de Galicia informou hoxe da posta en marcha da terceira edición do seu programa de obradoiros Xornalismo na Escola, destinado a divulgar nos nosos centros educativos en que consiste a profesión comunicadora, que vantaxes profesionais achega, como se distingue o xornalismo do que non o é, e que potencialidades atesoura para contribuír a un mundo máis igualitario, xusto e libre. A nova edición do programa, que ten novamente o apoio de La Caixa, estréase este 15 de febreiro no IES de Bembibre, no Val do Dubra. Coma en anteriores entregas, nos obradoiros (destinados ao alumnado de terceiro e cuarto da ESO) haberá un importante compoñente de divulgación TIC.
O primeiro taller (primeiro de case un centenar) virá da man de Rosa María Bueno Crego. Ademais dela, Xosé Lois Carrión González, Pablo Díaz Bouza, Maica García Rodríguez, Emilio Gómez, Mónica González Alonso, Sara Martínez, Paula Méndez e Manuel Vilas López son os e as xornalistas (todos eles con ampla traxectoria profesional) que impartirán as actividades en centros de todos os recantos da nosa xeografía.
Segundo informa o Colexio, durante os meses de febreiro, marzo, abril e maio, “os nove xornalistas tratarán de inculcar na xuventude o espírito crítico ante a información e as noticias nos medios de comunicación offline e online”. Deste xeito, engade a entidade profesional, “os alumnos tratarán temas como os riscos e vantaxes das novas Tecnoloxías de Información e a Comunicación (TIC), a necesidade da mediación e o contraste de fontes no xornalismo ou tamén o que pode supor para á xente nova a veracidade e o rigor xornalístico”.
A semana que vén, Xornalismo na Escola “La Caixa” vai chegar ao alumnado do IES San Rosendo de Mondoñedo (o luns 19), o IES Monelos da Coruña (martes 20), o IES Sanxillao de Lugo (martes 20 e xoves 22), o IES Fernando Esquío de Neda (xoves 22) e o IES de Quiroga (venres 23). Ribeira, Curtis, Monforte ou Maceda son outras das localidades nas que se impartirán os obradoiros nos vindeiros días.
O programa pódese seguir en Twitter baixo o cancelo #XornalismoNaEscola. Naceu grazas a un acordo acadado a finais de 2015 entre o Colexio Profesional de Xornalistas de Galicia e a Obra Social La Caixa. As dúas primeiras edicións desenvolveron con grande éxito no 2016 e no 2017 máis de 150 obradoiros de comunicación en case setenta puntos da xeografía galega, levando estas actividades a milleiros de alumnos e alumnas da comunidade galega.

Categorías: Ciencia

Sesións Destelo inicia segunda tempada co reto de encher a Rede de música galega

códigocero - Mér, 02/14/2018 - 16:30

O proxecto para Internet de sesións musicais acústicas en galego, Sesións Destelo, vén de iniciar a súa segunda tempada. Así nolo contan os impulsores desta iniciativa, dispoñíbel na web Destelo.gal e con data de estrea oficial (esta segunda tempada) este 16 de febreiro, co lanzamento do primeiro dos vídeos desta nova andaina, da man da cantautora MJ Pérez, gravado “unha xornada de néboa nunha mañá de inverno en Arzúa”. O proxecto ten ás súas costas o mellor dos precedentes: o ano pasado foi quen de contar coa participación de media ducia de agrupacións musicais dos estilos máis diversos, interpretando as súas creacións en lugares singulares e tradicionalmente pouco empregados para interpretacións musicais e a súa posterior visualización na Rede.

A cantautora MJ Pérez interprentando unha canción de seu nun día de néboa en Arzúa

Logo da estrea deste 16 de febreiro iranse dando a coñecer, paseniño, os outros proxectos participantes. Os responsábeis de Destelo agardan que esta segunda tempada, que vai de febreiro até abril, supere a cifra dos seis vídeos que compuxeron a primeira. Entre sesión e sesión iranse publicando nas redes do proxecto contido audiovisual adicional, así como tamén o contido que conforma o miolo do proxecto.
O proxecto foi inaugurado hai oito meses da man de Alberto Busto. Dende aquela, sinala, “todo foron boas novas”. Por exemplo, conseguiuse chegar á cifra das 2.500 reproducións dos vídeos acubillados e xuntar, a maiores, máis de 1.500 usuarios únicos na comunidade web de Destelo. “Con estes datos témolo claro”, sinalan, engadindo, que estas cifras non fan máis que confirmar que “a música en galego interesa, e queremos ser un dos seus altofalantes, a escusa para que a xente se achegue a ela; cada vez son máis os grupos que queren saír do ourizo!”
Segundo explican acerca do peculiar formato elixido, “desta volta a realización dos vídeos é máis simple que nunca, e se nas primeiras propostas contábamos cunha pequena edición de vídeo, esta redúcese agora ao mínimo para gozar da canción tal e como foi interpretada”. Por ese motivo as novas sesións virán en plano-secuencia, sen cortes, un tipo de formato que afonda e amplía a estética simple e directa do proxecto.

Un proxecto cultural por e para Internet

Sesións Destelo, en palabras dos seus creadores, é un proxecto sen ánimo de lucro que ten como obxectivo facer promoción dos proxectos musicais que inclúen cancións en galego no seu repertorio para así “poñer en valor a lingua propia fronte á inxente cantidade de medios de comunicación que non programan música no noso idioma”. É, engaden, “un produto dos nosos días, nacido para ser publicado nas redes e que outorga moita importancia tamén á comunicación nas mesmas”. De aí que teñan presenza en Facebook, no Twitter, no Instagram, no YouTube ou mesmo en LinkedIn.

Resumo da primeira tempada das Sesións Destelo

Categorías: Ciencia

Mediapro non distinguirá entre operadores tradicionais e por Internet na comercialización do fútbol

códigocero - Mér, 02/14/2018 - 14:36

A Comisión Nacional dos Mercados e a Competencia (CNMC) acordou a aprobación da terminación convencional do expediente sancionador incoado a Mediapro por un posible abuso de posición de dominio no mercado de comercialización maiorista de canles de televisión de pagamento premium en España, o que supón que os compromisos asumidos por Mediapro resolven de xeito inmediato o problema de competencia identificado pola CNMC sen a necesidade de pronunciarse de xeito definitivo sobre as condutas anticompetitivas imputadas.
O expediente abriuse tras unha denuncia da empresa que xestiona a plataforma de deportes en streaming Opensport, que pretendía comercializar as canles BeIN Sports e BeIN La Liga, con contidos moi relevantes no mercado español.
Aínda que inicialmente Mediapro negábase a achegar esas canles a Opensport en condicións semellantes ás das plataformas de televisión de pagamento tradicionais, finalmente o xestor dos dereitos mudou de parecer e ofrece un modelo de comercialización maiorista non discriminatorio aos operadores OTT (por Internet).
Podemos entender así que a contratación de paquetes con contidos audiovisuais deportivos a través da Internet vai normalizarse para que os consumidores poidan acceder aos mesmos con independencia do operador de telecomunicacións contratado.

Categorías: Ciencia

Estoura a batería dun smartphone ZTE en Palma de Mallorca

códigocero - Mér, 02/14/2018 - 14:14

Os casos de móbiles con baterías que esbouran son moito máis frecuentes do que queremos crer, e o último caso que busca gañar visibilidade é o dun rapaz de 15 anos que mentres esperaba a entrar á súa aula nun instituto de Palma de Mallorca veu como o seu ZTE Blade L5 Plus quecía e emitía un cheiro raro, e tras notar que estaba queimándolle o pantalón, sacouno (queimándolle os dedos) para ver como a batería estalaba no aire, sen chegar a tocar o chan, para logo comezar a arder.
Este caso foi denunciado por FACUA, asociación que advirte da gravidade do acontecido pois se o usuario non tivese sacado o móbil do peto podería ter importantes queimaduras. Trasladaron o caso á Axencia Española de Consumo, Seguridade Alimentaria e Nutrición (AECOSAN) e requiriron a ZTE información sobre as causas do ocorrido, así como que comuniquen se aconteceron máis casos semellantes.
O teléfono en cuestión mercárase o pasado 27 de maio a un prezo de 72,90 euros, e este incidente coñeceuse principalmente porque a nai do mozo que veu esbourar a batería do seu móbil é socia de FACUA, polo que púxose en contacto coa entidade para denunciar os feitos.

Categorías: Ciencia

Qualcomm anuncia un modem LTE que consegue descargas a 2 Gbps

códigocero - Mér, 02/14/2018 - 14:04

Aínda que nos últimos anos temos a vista posta na futura tecnoloxía 5G, esta non será unha realidade comercial até 2020, e mentres o 4G ten moita marxe de mellor, como vén anunciar Qualcomm, que cos seus novos modems X24 LTE estrea o LTE de Categoría 20 con soporte de velocidades de descarga de até 2 Gbps, sendo tamén o primeiro chip fabricado por un procedemento FinFET de 7 nanómetros.
Este grande avance tecnolóxico poderá comprobarse no Mobile World Congress de Barcelona, onde varios fabricantes (Ericsson, Netgear e Telstra) realizarán demostracións destas solucións de LTE Gigabit que permitirán que as compañías de telecomunicacións aproveiten moito máis as súas actuais infraestruturas 4G, maximizando a capacidade das súas redes e achegando o que podería considerarse case como un adiante do 5G.
Para poder conseguir velocidades de 2 Gbps de descarga cun modem X24 de Qualcomm é preciso manexar simultaneamente 20 fluxos LTE con diferentes frecuencias e tecnoloxías, de xeito que non todos os operadores poderán conseguir tal velocidade (dependerá das bandas das que teñan licenza de uso).
O uso dos novos modems LTE de Qualcomm permitirían gozar en contornos móbiles de velocidades de acceso á Rede equivalentes á que temos actualmente a través de liñas de fibra óptica, o que facilitaría o consumo de contidos en 360 graos, vídeos en ultra alta definición, servizos de computación na nube ou aplicacións instantáneas, abrindo moitas posibilidades de negocio e permitindo que cada vez poidamos gozar de mellores servizos con independencia de onde esteamos.

Categorías: Ciencia

Magic Leap revolucionará o xeito de gozar da NBA

códigocero - Mér, 02/14/2018 - 13:09

Dende Magic Leap van dando detalles do que será a súa revolucionaria proposta de realidade mixta, e aínda que faltan meses para a súa chegada ao público, son conscientes de que a tecnoloxía sen contidos non serve de nada, de aí que anuncien que queren transformar o xeito de consumir contidos audiovisuais, que deixarían de ser planos para ser tridimensionais, comezando por retransmisións deportivas, para o que pecharon un acordo coa NBA e Turner para desenvolver unha aplicación da NBA para Magic Leap One.
Grazas a esta colaboración os seareiros do baloncesto poderán gozar de múltiples pantallas virtuais no seu campo de visión, que poderán presentarse en calquera tamaño e posición, así como combinarse con estatísticas, repeticións e comentarios, sen perder a acción do xogo, conformado unha experiencia nunca vista.
Esta será simplemente unha das moitas posibilidades desta tecnoloxía que poderá aplicarse a outros deportes e a moitos outros usos, sendo posiblemente o seu principal atranco para introducirse no mercado o seu prezo, que segundo pode desprenderse de declaracións do fundador de Magic Leap, Rony Abovitz, estaría por enriba do milleiro de dólares.

Categorías: Ciencia

As axencias de intelixencia estadounidenses temen aos fabricantes chineses

códigocero - Mér, 02/14/2018 - 12:54

Durante a pasada edición do CES de Las Vegas o director xeral de Huawei amosou o seu malestar ante o boicot que estaban a facer á súa marca algúns operadores de telecomunicacións norteamericanos ante presións do Goberno dos EE.UU., e aínda que non exista ningunha evidencia que indique que existan riscos ao empregar smartphones do fabricante chinés (de feito, o fabricante conta cunha grande presenza en Europa) onte mesmo 6 das principais axencias de intelixencia estadounidenses (entre as que figuran a CIA, o FBI e a NSA) defenderon ante a Comisión de Intelixencia do Senado a súa desconfianza de Huawei (así como tamén da chinesa ZTE) de xeito xeral, ou sexa, que recomendan que os cidadáns norteamericanos non merquen smartphones de compañías chinesas.
O director do FBI, Chris Wray, asegura que están moi preocupados ante aos riscos de permitir que compañías ou entidades con ligazóns a gobernos estranxeiros «que non compartan os nosos valores» poidan gañar posicións dentro das redes de telecomunicacións, o que facilitaría potencialmente a espionaxe.
Sobra dicir que as acusacións contra Huawei carecen totalmente de fundamento (de feito, a compañía leva décadas sendo un dos principais provedores de infraestruturas de telecomunicacións en case todo o mundo) e non deixa de parecer unha medida proteccionista que emprega o medo como xustificación.

Categorías: Ciencia

O Concello de Ames inicia os traballos para situarse na vangarda de servizos TIC

códigocero - Mér, 02/14/2018 - 11:43

O Concello de Ames comezou neste mes de febreiro os traballos relativos á optimización dos servizos públicos a través das novas Tecnoloxías da Información e a Comunicación (as TIC) e a implantación da Administración Electrónica, que é, segundo informa o Goberno local, un dos catro grandes obxectivos incluídos na Estratexia DUSI Impulsa Ames. Segundo engade o Concello, a empresa tecnolóxico-dixital Balidea, con sede en Santiago, será a encargada de desenvolver os ditos traballos.
As tarefas a desenvolver, co-financiadas a través do programa europeo FEDER de Crecemento Sustentábel 2014-2020, consistirán en parte nunha auditoría que avaliará a situación actual do Concello no eido das TIC. Ademais, a devandita empresa ofrecerá asesoramento e apoio técnico, coa formación dunha oficina técnica, para a colaboración na redacción dos pregos necesarios para a contratación dos novos servizos que se consideren mellorábeis.
O Concello de Ames foi seleccionado na segunda convocatoria europea de Estratexias de Desenvolvemento Urbano Sustentábel e Integrado (DUSI), co-financiada polo programa europeo FEDER de Crecemento Sustentábel 2014-2020. O Goberno local sinala que o devandito implica a concesión dunha axuda de 5 millóns de euros, aos que o Concello de Ames sumará 1.250.000 euros. En total entre 2018 e 2022 investirase 6.250.000 euros nas accións estratéxicas do plan Impulsa Ames, que parte dun estudo de necesidades de Bertamiráns e O Milladoiro, dado que son os espazos urbanos o obxectivo da DUSI, aínda que o Executivo local apunta que o conxunto de actuacións beneficiará a todo o termo municipal.
O roteiro fixa catro grandes obxectivos estratéxicos:
· O primeiro para a mellora de acceso aos servizos públicos a través das TIC e a implantación da Administración Electrónica.
· O segundo para facer de Ames “un concello integrador, ben comunicado con transporte público e privado”.
· O terceiro é para converter Ames nun concello sustentábel medioambientalmente, accesíbel e con calidade de vida para a veciñanza.
· O cuarto e último busca “ancorar a poboación xuvenil no concello”, brindándolle ferramentas atractivas para o seu lecer e cultura e facilitando o emprego por medio do emprendemento.

Categorías: Ciencia

O Kit de Activación Dixital da Coruña abriuse á participación da xente

códigocero - Mér, 02/14/2018 - 11:42

O Kit de Activación Dixital, posto en marcha polo Concello da Coruña para atender a demanda dos axentes sociais e culturais (docentes, centros culturais, activistas, servizos sociais, traballadores de bibliotecas e profesionais en xeral de moi diversos ámbitos) de ferramentas accesíbeis e universais que favorezan a creación e distribución de contidos, está estes días aberto á participación directa da cidadanía. Segundo explican dende Coruña Dixital, recolleranse até o 28 de febreiro as contribucións de “todas aquelas persoas que teñan unha experiencia relacionada co audiovisual e as narrativas dixitais como ferramentas de traballo ou aprendizaxe no contexto da educación ou da transformación social”. O obxectivo: acadar entre todas e todos unha ferramenta máis completa e útil á comunidade.
A metodoloxía a seguir polos cidadáns que queiran achegar as súas propostas é esta: en primeiro lugar hai que acceder ao espazo web do Kit, e unha vez dentro, entrar no apartado de Achegas e cubrir un formulario online. Do mesmo xeito recóllense ideas, suxestións e dúbidas que teñan como obxectivo mellorar a guía metodolóxica do proxecto ou calquera outro apartado do mesmo. Segundo explican os responsábeis do Kit, a idea é que unha vez pechado o prazo de recollida, sexa posíbel elaborar un documento, que se habilitará para descarga en formato PDF e que “será a guía metodolóxica final”. Esta guía, xa definitiva, incorporarase á web o día 15 de marzo.
Para quen non o saiba, Kit de Activación Dixital é unha guía e un punto de encontro entre “persoas que fan e persoas que queren facer”, en palabras de Coruña Dixital, que engade que o proxecto pon en común experiencias, retos e recursos cos que poder expandir novas prácticas culturais e activistas a través da creación audiovisual e a comunicación dixital, “pensando especialmente nas aulas de ensino (formal ou non) e nos espazos culturais de proximidade, pero tamén en asociacións veciñais, culturais ou vinculadas a colectivos específicos”.
O Kit de Coruña Dixital está dispoñíbel para o público dende o 3 de febreiro. Detrás deste proxecto atópanse as seguintes entidades e colectivos: Coruña Dixital (Concello da Coruña), Gingko e La Mujer Forzuda.

Categorías: Ciencia

Un investigador do CiTIUS obtén unha das seis axudas Ramón y Cajal en computación

códigocero - Mér, 02/14/2018 - 11:18

O CiTIUS (Centro Singular de Investigación en Tecnoloxías da Información) segue a gañar prestixio e a constituírse como referente innovador do noso tempo. Proba diso son os importantes achados científicos e tecnolóxicos da investigadora Paula López (en materia de topografía de semicondutores), do Grupo de Arquitectura de Computadores (que mellorou o rendemento dos servidores poñendo o punto o acceso á memoria), da spin-off Situm Technologies (obxecto de importantes recoñecementos recentes) ou dos investigadores Paulo Félix, Tomás Teijeiro, Constantino García e Daniel Castro, que se impuxeron no meirande desafío internacional de computación en cardioloxía clínica. Agora, puidemos saber que o Ministerio de Educación, Cultura e Deporte concedeu unha das 6 axudas Ramón y Cajal da área de Ciencias da Computación e Tecnoloxía Informática a José María Alonso del Moral.
Alonso, segundo informa o centro da USC, adicará un período mínimo de cinco anos ao desenvolvemento dos obxectivos fixados na competitiva axuda Ramón y Cajal. O principal obxectivo do proxecto que vén de ser referendado polo Ministerio é desenvolver novas solucións de Intelixencia Artificial que sexan quen de extraer información e de presentala de forma comprensíbel para todo tipo de usuarios. A maiores, informa o CiTIUS, estas novas solucións deberían estar dotadas da capacidade de diálogo, de tal forma que “poidan explicar aos seres humanos os fundamentos que sustentan as conclusións que obteñen os seus algoritmos”.
O centro tamén explica que a devandita é unha liña de traballo inserida na área da Intelixencia Artificial Explicábel, un eido de estudo que nos aproxima aos actuais sistemas de tipo “caixa negra” (como o Deep Learning), moi efectivos, “pero aos que resulta moi difícil identificar os fundamentos dos resultados que presentan, cando non imposíbel”. Ao longo do proxecto que agora comeza, o equipo de José Alonso combinará diferentes técnicas de Intelixencia Artificial, como Lóxica Fuzzy, algoritmos xenéticos ou sistemas de xeración de linguaxe natural. Todos eles serán empregados no desenvolvemento de solucións coa capacidade de presentar as súas conclusións aos usuarios mediante unha combinación de audio, gráficos e textos, permitindo que estes poidan adaptarse de xeito dinámico ás necesidades de cada persoa e á información requirida en cada momento.

Categorías: Ciencia

O Concello de Redondela comezou ano estreando nova páxina web

códigocero - Mér, 02/14/2018 - 11:17

Entre os Concellos que encararon o novo estreando novidades tecnolóxicas atópase o de Redondela, que vén de presentar nova web, accesíbel xa a través do dominio galego: www.redondela.gal. A firma encargada dos traballos de renovación foi J&J Publicidade e Comunicación de Vigo. En palabras do Goberno local, estamos ante unha páxina web “máis intuitiva, máis operativa e máis interactiva”, ou sexa, máis preto da cidadanía. Segundo explican o concelleiro de novas tecnoloxías Julio Mougán, e máis o alcalde Javier Bas, o novo portal “permite avanzar en transparencia e participación cidadá, un índice que sitúa a Redondela como un dos concellos máis transparentes de toda Galicia”.
O traballo de renovación da web implicou un investimento de 6.000 euros. Entre os retos principais que se asumiron figurou o de pór ao alcance da veciñanza todas as vantaxes da Administración Electrónica. Ou sexa, buscouse que os cidadáns dispuxeran dunha ferramenta que lles permitise levar a cabo a meirande cantidade trámites e xestións de maneira dixital, evitando desprazamentos, axilizando os procesos e facéndoos máis seguros. Trámites como por exemplo descargar formularios para solicitar subvencións municipais, solicitar o padrón ou reservar pistas deportivas. Ou dos retos foi o de crear un portal que fose accesíbel e manexábel en todo tipo de dispositivos tecnolóxicos, computador, smartphones e tabletas.

Categorías: Ciencia

Neuroimágenes para redefinir la inteligencia

Investigación y Ciencia - Mér, 02/14/2018 - 00:00
La exploración del cerebro en reposo a través de técnicas de neuroimagen puede proporcionar una nueva forma de definir e interpretar la capacidad mental.
Categorías: Ciencia

El visitante de fuera del sistema solar

Investigación y Ciencia - Mér, 02/14/2018 - 00:00
Se ha ido afinando la determinación de las características de 1I/'Oumuamua, el primer objeto de fuera del sistema solar que se ha observado dentro de este y del que hasta se investigó si emitía señales que pudiesen corresponder a una nave espacial (no se encontró ninguna).
Categorías: Ciencia

Nokia supera en cota de mercado a fabricantes como HTC ou Sony

códigocero - Mar, 02/13/2018 - 21:03

Dende que HMD Global colleu o temón da marca Nokia apostou por ofrecer unha serie de smartphones coa versión máis pura posible de Android, de xeito que, xunto con Motorola, ofrecería unha das experiencias de uso máis semellantes ás dos móbiles das familias Nexus/Pixel, pero cun éxito de vendas mellor do que algúns podían esperar, se atendemos a declaracións de Neil Shah, quen sostén que no último trimestre de 2017 os smartphones da marca Nokia superaron en vendas a marcas recoñecidas como HTC, Sony, Google, Alcatel, Lenovo, OnePlus, Gionee, Meizu, Coolpad e Asus.
Pese aos bos resultados, Nokia non conseguiría entrar no Top 10 de fabricantes de smartphones, conformándose cunha 11ª posición con 4,4 millóns de unidades vendidas no cuarto trimestre do ano, o que non estaría nada mal se temos en conta que superaría sobradamente os 3 millóns de unidades que a familia Google Pixel vendeu en todo o ano. Iso si, en Reino Unido foi quen de colocarse como o terceiro fabricante de smartphones, e en mercados como Rusia, Vietnam e boa parte dos países de Oriente Próximo conseguiron situarse entre os 5 primeiros fabricantes en cota de mercado.
A progresión de Nokia está a ser moi boa, pero quédalle moito traballo para achegarse a fabricantes como Huawei ou Samsung, e incluso ás cifras de vendas que a propia Nokia manexaba durante a época na que estaba aliada con Microsoft para ser a locomotora de Windows Phone (hai 4 anos venderan 10,5 millóns de móbiles Lumia).

Categorías: Ciencia

Comeza a facer ruído a edición 2018 dos GPUL Labs

códigocero - Mar, 02/13/2018 - 19:37

Para quen quedase con máis fame dos obradoiros participativos e construtivos do GPUL arredor do software libre, os GPUL Labs do Grupo de Programadores e Usuarios de Linux, dicirlle que todo indica a que en datas vindeiras teremos unha nova entrega de encontros argalleiros. Segundo puidemos saber, os integrantes desta fronte galega de desenvolvedores con sede na FIC (Facultade de Informática da Coruña) xa están a preparar a nova edición dos GPUL Labs, quedadas de programación e tecnoloxías abertas postas en marcha hai dous anos para, entre outras cousas, crear máis recursos, mellorar os que xa hai e, tamén, acrecentar a gran comunidade galega de usuarias e usuarios.
O ciclo de obradoiros, abertos a estudantes e profesionais, non só do ámbito TIC senón tamén doutras disciplinas, terá o seu comezo a mediados de febreiro e durará no tempo até o verán aproximadamente, tendo sesións con periodicidade máis ou menos fixa.
Como de costume, o GPUL xa lanzou un chamamento a pechar fileiras. De feito, xa están a buscar persoas que queiran impartir charlas, obradoiros ou coloquios. Asemade, poñen a vista no tecido empresarial para procura colaboradores e patrocinadores, mostrando na páxina de patrocinadores as vantaxes de concorreren dando o seu apoio.
A previsión é que o ciclo se complemente, coma nas entregas anteriores, con diversas hackatons. Un dos grandes puntos fortes deste ano é a celebración de Coruña Hacks, evento organizado conxuntamente con Coruña Developers, Árticos e GDG Coruña. Trátase dunha iniciativa cunha clara vertente profesional a través da que se busca desenvolver “proxectos reais en forma de software libre que resolvan un problema real e de forma continuada no tempo”. Ao abeiro de Coruña Hacks levaranse a cabo actividades de programación, charlas formativas en tecnoloxías libre e tamén actividades dinamizadoras e de networking, centradas por exemplo en como avaliar modelos de negocio validos para o software libre. Quen estea interesado en colaborar, pode facelo xa realizando propostas de proxectos.

Categorías: Ciencia

Google quere potenciar a interacción a través do correo electrónico

códigocero - Mar, 02/13/2018 - 19:30

Definitivamente a tecnoloxía AMP de Google quere ir máis aló da aceleración da carga de novas dende o móbil, e tras anunciar as historias AMP, agora anticipan unha versión das Accelerated Mobile Pages (AMP) para o correo electrónico, de xeito que Google publica un framework de código aberto que hoxe ábrese de xeito preliminar a desenvolvedores e que permitirá crear experiencias por correo electrónico que inclúan interacción.
Deste xeito será posible efectuar accións sinxelas dende as propias mensaxes de correo electrónico (cando menos se temos unha conta de Gmail, aínda que ao ser unha especificación aberta confían en que outras plataformas adopten esta tecnoloxía) o que permitirá responder a un convite, programar unha cita ou completar un formulario sen saír do cliente de correo electrónico.
Os compoñentes AMP que poderán incluírse nas mensaxes de correo electrónico serán carruseis, acordeóns e formularios, entre outros, de xeito que os correos electrónicos xa non serán elementos pasivos e desfasados, podendo amosar sempre información actualizada, o que podería ser de grande utilidade para numerosos servizos de compra de entradas, reservas de voos, seguimento de envíos, comercio electrónico... Queda agora en mans dos desenvolvedores tirar proveito desta tecnoloxía con moito potencial, especialmente se pasa a ser adoptada rapidamente polos servizos de correo electrónico de Yahoo e Microsoft (xa que, de limitarse a Gmail podería ser complicada a súa implantación de xeito xeral).

Categorías: Ciencia

Poñen cancela aos números telefónicos 118 para evitar abusos

códigocero - Mar, 02/13/2018 - 19:06

O Ministerio de Enerxía, Turismo e Axenda Dixital modificou a Orde Ministerial que regula os números telefónicos 118, os que se usan para proporcionar servizos de información sobre números de teléfono, para eliminar o custo de establecemento de chamada, limitar o prezo por minuto e fixar a duración máxima da chamada.
A nova norma, publicada hoxe no BOE, inclúe a prohibición de cobrar un prezo polo establecemento de chamada ao servizo de información, de xeito que facturaríase só por tempo, sen cota fixa inicial, evitando así o abuso de casos nos que chegaban a cobrarse até 6 euros por establecemento de chamada.
A Orde tamén fixa o prezo máximo de 2,5 euros/minuto (cando había compañías que cobraban 6 euros/minuto) e, no caso de querer establecerse un prezo superior, estes números 118 non serían de acceso libre, senón que só estarían dispoñibles mediante solicitude previa ao operador.
A duración das chamadas tampouco poderá superar os 10 minutos de duración, incluíndo nesta duración aos servizos que ofrecen a posibilidade de conectar a chamada co número polo que se realizou a consulta, restrinxindo considerablemente os sustos que recibían moitos consumidores nos últimos anos.
Cando chamemos a un número 118 escoitaremos unha locución de 20 segundos no que informarase do prezo por minuto da chamada, da súa duración máxima e do responsable do servizo, estando prohibido que se inclúa contido adicional algún.
Tamén queda prohibido que as chamadas a servizos 118 podan realizarse mediante sistemas de marcación automática ou inadvertida, sendo obrigatoria a marcación activa, manual e consciente por parte do usuario.
A Orde pasará a ser efectiva dentro de tres meses a partires de mañá, para dar así tempo a que os provedores do servizo poidan adaptarse ao regulamento.

Categorías: Ciencia

Páxinas

Subscribirse a IGACIENCIA lector de novas