Ciencia

Unha xornada do CPEIG axudará ás administracións a adaptarse ao novo regulamento de protección de datos

códigocero - Ven, 03/16/2018 - 22:30

O Colexio de Enxeñaría en Informática de Galicia (CPEIG) organizará o 23 de marzo unha xornada técnica e divulgativa sobre o impacto do regulamento xeral de protección de datos sobre a actividade dos concellos e administracións públicas. A actividade, organizada en colaboración coa Federación Galega de Municipios e Provincias (FEGAMP) e a Axencia para a Modernización Tecnolóxica (AMTEGA), celebrarase de 9:30 a 14:30 horas no Edificio CERSIA de Santiago de Compostela. Será inaugurada pola directora da AMTEGA, Mar Pereira; o vicepresidente executivo da FEGAMP, Manuel Mirás; e o presidente do CPEIG, Fernando Suárez. O obxectivo é poñer o foco nas responsabilidades das administracións locais e das restantes administracións de velar pola salvagarda dos datos persoais dos cidadáns no desenvolvemento das súas funcións.
Este labor de análise, reflexión e formación é máis preciso ca nunca, segundo informa o CPEIG, sobre todo se temos en conta o “forte impacto” que vai ter o Regulamento Xeral de Protección de Datos (RXPD), tanto en cidadáns e empresas coma nas propias administracións, requiríndose “un gran esforzo de adaptación ao novo marco legal por parte de todos”. A xornada botará luz sobre a entrada en aplicación da nova normativa. Ademais, explica a organización, “servirá para concienciar da necesidade de adaptarse progresivamente ás novidades introducidas”.
Para quen non o saiba, o Regulamento Europeo de Protección de Datos (RXPD) foi publicado en maio de 2016, entrando en vigor nese mesmo mes, e será de aplicación a partir do 25 de maio de 2018, polo que todas as modificacións no tratamento de datos que deban realizarse terán que estar preparadas para esa data.
Os relatores encargados de explicar estas novidades serán a doutora en Dereito, secretaria de administración local e codirectora da Red Localis, Concepción Campos; a directora xeral de UNIVE Avogados, Carmen Cas; o xefe do departamento de Seguridade en AMTEGA, Gustavo Herva; e o doutor en Dereito e director do Master Protección e Tratamento de datos da Universidade de Santiago de Compostela (USC), Daniel Neira.

Categorías: Ciencia

O Concello de Vigo salienta a avalancha de solicitudes do novo cartón cidadán

códigocero - Ven, 03/16/2018 - 20:30

O alcalde de Vigo, Abel Caballero, informou esta semana dunha ampliación do prazo de funcionamento da vella tarxeta cidadá debido “á avalancha de peticións dos últimos días”, peticións referidas ao novo cartón, Pass Vigo. Segundo fixo saber, esta demanda resultou ser “un éxito extraordinario, e todo o mundo na cidade quere ter a nova tarxeta”.
Como lembraremos, o cartón que substitúe a Tarxeta Verde é un cartón moedeiro que permite o acceso a todos os servizos que ofrece a Administración local. En detalle, é un instrumento de pago que, usando as máis modernas tecnoloxías de identificación e pagos en liña, permite cousas como pagar o transporte urbano da cidade e da contorna (nun primeiro intre) para, progresivamente, irse estendendo ao resto dos servizos municipais, como o servizo de taxis, as bibliotecas ou o uso de instalacións deportivas.
Caballero sinalou que o prazo para dar de baixa a Tarxeta Verde do transporte metropolitano e cambiar á nova tarxeta PassVigo estará aberto até o vindeiro 15 de abril. Tamén fixo saber que a día 12 de marzo o Concello xa enviou un total de 103.666 tarxetas PassVigo, das que bonificadas son 67.852, para estudantes ascenden a 7.650, para pensionistas I e II (totalmente de balde) 22.458 e para universitarios 4.953. Ademais, enviáronse 753 tarxetas sociais. Ademais, do total das enviadas, 38.389 están xa en uso, o que representa un 37 por cento.

Categorías: Ciencia

Vigo opta a un investimento de 5 millóns para transformarse en Cidade Intelixente integral

códigocero - Ven, 03/16/2018 - 19:59

Vigo vai optar a un plan piloto europeo para impulsar a aplicación das tecnoloxías máis innovadoras no funcionamento das cidades (Internet das Cousas, ferramentas de xestión e comunicación propias das Cidades Intelixentes, tecnoloxías 5G). Esta mesma semana, froito da candidatura de Vigo a un proxecto europeo para interconectar edificios, os promotores do Plan Nacional de Territorios Intelixentes reuníronse co alcalde, Abel Caballero. Este programa, dirixido a municipios de máis de 200.000 habitantes, suporía un investimento na cidade galega de 5 millóns de euros.
Para concorrer no proxecto, os concellos deberán proporcionar polo menos 150 edificios para unha actuación piloto onde se habilitarán e porán en marcha diversos nodos interconectados. O obxectivo é dar forma a cidades “baseadas en capas”, destinadas estas a captar, acubillar e avaliar datos a gran escala xerados a nivel municipal e cidadán. Entre os inmóbeis e infraestruturas que participarán neste proxecto, conectándose co nodos de Internet das Cousas, estarían as estacións de tren e autobús, os museos, os recintos deportivos ou os mercados.
Segundo fixo saber Caballero na xuntanza, o proxecto acáelle “moi ben ás características de Vigo”. Trala reunión cos promotores do Plan Nacional, da Secretaría de Estado para a Sociedade da Información e Axenda Dixital, o alcalde anunciou a candidatura viguesa ao proxecto europeo, que, segundo salientou, “procura a aplicación das últimas tecnoloxías, e posteriormente o 5G, na interacción e conexións entre edificios e distintas zonas da cidade”. O rexedor engadiu que o Concello “ten moito interese neste proxecto”, que impulsaría Vigo cara a vangarda tecnolóxica.

Categorías: Ciencia

A plataforma de datos masivos do SERGAS, premiada por WITSA

códigocero - Ven, 03/16/2018 - 17:00

A tecnoloxía HEXIN, a plataforma de Big Data do Servizo Galego de Saúde (SERGAS), centrada da explotación de datos clínicos e epidemiolóxicos, vén de ser premiada polo World Information Technology and Services Alliance (WITSA) na categoría de innovación en eSaúde. Segundo salientaron os responsábeis do certame, a plataforma premiada, desenvolvida con tecnoloxía de GMV, é pioneira na súa categoría nunha comunidade autónoma e ofrece a máis de máis de 300 profesionais sanitarios información composta por informes predefinidos con datos estatísticos de utilidade clínica, máis de 800 documentos corporativos en total de disposición pública.
HEXIN foi presentada aos Premios WITSA por AMETIC (Asociación de Empresas de Electrónica, Tecnoloxías da Información, Telecomunicacións e Contidos Dixitais), membro deste consorcio de asociacións internacional que representa máis do noventa por cento do mercado de TIC mundial.
Os Premios WITSA Global ICT Excellence diríxense a identificar aos usuarios máis destacados do panorama tecnolóxico-dixital, a nivel mundial e distinguindo as organizacións que obtiveran logros excepcionais no uso das novas tecnoloxías. Logros orientados ás sociedades, os gobernos, as persoas, as organizacións e o sector privado.
Contribución de HEXIN
HEXIN, a plataforma de datos masivos desenvolvida con tecnoloxía de GMV, contribúe á mellora da vixilancia epidemiolóxica, a asistencia clínica, a xestión e a investigación médica. Ao explotar a inxente cantidade de información da que dispón o Sistema Galego de Saúde (informes médicos, notas, receitas, probas diagnósticas que se orixinan nas súas distintas áreas de competencia), é unha “ferramenta esencial para os seus profesionais da saúde coa que extraer información e obter resultados de saúde dos seus pacientes”. Así mesmo, coa información que fornece, posibilítase a avaliación do modelo de farmacia por medio de técnicas de data mining que permiten comparar os patróns dos servizos farmacéuticos.

Categorías: Ciencia

Amosan como é GrayKey, o desbloqueador de iPhone

códigocero - Ven, 03/16/2018 - 16:30

Hai uns días desvelouse a existencia dunha empresa norteamericana que comercializaba unha solución relativamente económica para desbloquear teléfonos iPhone sen coñecer o seu PIN, pensando no seu uso por forzas de seguridade en labores de informática forense, pero dende Malwarebytes van un paso máis aló e decidiron compartir máis detalles sobre GrayKey, produto que consideran que resultará de grande utilidade para as forzas da orde, pero que tamén supón un grande risco para os usuarios, xa que deixa a seguridade dos seus dispositivos en mans de compañías que lle resultan totalmente alleas.
O dispositivo comentado resultaría bastante compacto (mide uns 10 x 10 x 5 centímetros) e contaría con 2 cables lightning na súa parte frontal de xeito que permitiría a conexión de 2 teléfonos á vez. Os teléfonos terían que conectarse un par de minutos ao trebello e logo, nun tempo que iría entre as 2 horas e os 3 días, aparecería na pantalla dos teléfonos o seu respectivo PIN para o seu bloqueo.
Unha vez desbloqueado o dispositivo os contidos completos do seu sistema de ficheiros descárgase ao dispositivo GrayKey, facilitando acto seguido o seu acceso vía web dende un ordenador conectado. Os contidos desencriptados do chaveiro do teléfono tamén estarían dispoñibles para a súa descarga.
Temos así unha ferramenta de grande valor para a peritaxe informática, pero que en malas mans podería ser moi perigosa, xa que nos teléfonos gardamos moitísima información susceptible de venderse no mercado negro. Tamén é preocupante que o dispositivo consegue desprotexer dalgún xeito o acceso ao smartphone, sendo polo momento descoñecido o método empregado, o que é preocupante, xa que a existencia dun fallo de seguridade sen corrixir pode ser explotado de moitos xeitos que poderían no ser percibidos polo usuario, con graves consecuencias para el.

Categorías: Ciencia

O presidente da Xunta avoga polas vocacións científico-tecnolóxicas

códigocero - Ven, 03/16/2018 - 13:04

Durante a inauguración da xornada La era tecnológica: un desafío para las empresas y sus líderes, Alberto Núñez Feijoo avogou por seguir impulsando e apoiando as vocacións científico-tecnolóxicas para acadar a plena incorporación da economía galega á revolución dixital. «É necesario que as institucións e as empresas sigamos confiando e apoiando o talento galego», dixo tras incidir en que aplicar ás empresas os avances da era dixital serve: para captar máis investimentos, para optimizar os procesos e para aumentar as vendas.
Neste sentido, recordou que, segundo o informe avaliado onte no Consello da Xunta sobre o impacto das tecnoloxías 4.0 no sector produtivo galego, mentres no eido da automoción hai unha implantación moi importante das tecnoloxías 4.0, no resto de sectores un 40% das empresas galegas as están empregando, o que significa que aínda queda moito traballo por diante.

Fomentar as vocacións científico-tecnolóxicas entre as mulleres

Ao longo do acto, Feijoo referiuse tamén ao reto de aumentar as vocacións científico-tecnolóxicas entre as mulleres, para o que lembrou que nos últimos catro anos, por exemplo, se duplicou a taxa de participación das mulleres nas axudas da Xunta destinadas á innovación, pasando do 27% en 2013 ao 53% en 2017. Ao que engadiu que o apoio da Administración autonómica á igualdade na I+D+i se plasma, ademais, en documentos como o Plan galego de muller e ciencia, en vigor desde 2016; e no impulso a programas de referencia internacional como Innopharma, para o desenvolvemento temperán de fármacos, e un proxecto sobre nanomedicina contra o cancro metastásico, liderados por Mabel Loza e María José Alonso, respectivamente.
Así mesmo, o presidente da Xunta subliñou que este esforzo non o está liderando en solitario o Goberno galego, ao contar co compromiso das universidades e das empresas. Non en van o 47% das persoas que traballan en I+D+i nas universidades son mulleres (por riba da media nacional); “e, aínda que a porcentaxe segue sendo menos do que nos gustaría, hoxe, hai un 36% máis de mulleres traballando en innovación nas e empresas que hai unha década”.
O responsable do Goberno galego valorou as moitas iniciativas que están a brotar da comunidade escolar e universitaria galega para impulsar as vocacións STEM entre as mozas galegas como: Estalmat Galicia, un proxecto que leva xa dez anos impulsando os talentos matemáticos entre nenas e nenos de 12 e 13 anos, amosándolles desde as idades máis temperás que na súa vocación non debe haber diferenzas de xénero. E, coa iniciativa Donas do código, alumnas e alumnos de 6º de primaria do colexio de Laredo, en Redondela, investigaron e deron a coñecer as figuras de nove mulleres de referencia nos ámbitos da ciencia e a tecnoloxía.
Ao fío disto, expresou tamén a necesidade de que as mozas con vocación científica coñezan ás mulleres que viñeron antes e lles abriron o camiño. E, con este fin, recordou o premio María Wonenburguer.

Categorías: Ciencia

O Concello da Coruña afirma que a cidade ten potencial para converterse nun gran referente en economías TIC

códigocero - Ven, 03/16/2018 - 12:19

Na mañá desta quinta feira (xoves) celebrouse na Coruña a entrega de premios da oitava edición da Feira das Ideas Empresariais de Inicia, un programa (Inicia) que impulsa o talento empresarial no alumnado dos ciclos formativos. Na cita participou o concelleiro de Emprego e Economía Social, Alberto Lema, quen lembrou que o programa consiste nunha formación práctica na que os estudantes fan o estudo de viabilidade dunha iniciativa empresarial, co apoio do profesorado, e o uso dun software especializado de simulación para a creación dun plan de empresa. As mellores ideas foron recoñecidas na mañá deste 15 de marzo, precisamente, con premios aos seus centros de formación profesional.
O edil de Emprego lembrou aos e ás participantes que “se deciden darlles continuidade aos proxectos emprendedores”, teñen á súa disposición “o servizo de asesoramento a empresas da Concellería de Emprego e Economía Social”, un servizo emprazado no viveiro de empresas Accede Coruña, no Papagaio, no que poden “completar aínda máis a formación recibida e acceder a un posto en pre-incubación nun dos postos baleiros do viveiro de empresas, como ten acontecido xa en anteriores ocasións”.
Para alentar aínda máis o espírito emprendedor local, o concelleiro salientou as oportunidades de innovación que se abren perante A Coruña, que ten potencial “para converterse nun centro de referencia nas economías que van marcar o presente século, que é o das tecnoloxías aplicadas á información e o coñecemento”, tecnoloxías concretas que son o alicerce (xa) de empresas locais, emerxentes e consolidadas. Lema tamén sinalou que o camiño das políticas públicas pasa por dotar ao novo empresariado de "infraestruturas e asesoramento". Segundo sinalou, para asegurar o devandito “precisamos máis solo industrial, máis transferencia de coñecemento desde a Universidade e máis coordinación de todas as administracións implicadas”.
Oito centros participantes
Un total de oito centros participaron nesta edición do programa, no que se asesoraron 50 proxectos de 20 especialidades distintas. Deles, 15 foron seleccionados para esta Feira das Ideas. Os centros participantes foron o CIFP Someso, CIFP Imaxe e Son, IES Calvo Sotelo, IES Sardiñeira, EASD Pablo Picasso, CPR López y Vicuña, CPR Nebrija e CPR Afundación.

Categorías: Ciencia

Brión fomentará a empregabilidade con cursos de informática básica

códigocero - Ven, 03/16/2018 - 11:57
Exterior do consistorio de Brión nunha imaxe da Galipedia

O Concello de Brión vén de anunciar o vindeiro desenvolvemento de actividades formativas para rachar coa fenda dixital e incrementar, con capacitación dixital, a empregabilidade da cidadanía. Máis polo miúdo, vai organizará cursos de balde de informática básica para persoas desempregadas, a celebrar na data que concreten os propios participantes e en canto haxa un mínimo de 8 persoas inscritas. Trátase dunha actividade que, en palabras do Concello, “busca que o alumnado adquira coñecementos básicos de informática de cara a mellorar a súa empregabilidade”.
En detalle, as persoas que participen aprenderán nocións básicas do manexo dun computador, do sistema operativo Windows, a manexar un procesador de textos, así como crear e manexar contas de correo electrónico e navegar por Internet. O curso terá lugar na aula CeMIT local, de martes e xoves, en horario de 10:30 a 12:30 horas, na data que concreten as persoas que estean interesadas. A inscrición, polo tanto, estará aberta durante todo o ano na Casa da Cultura, no teléfono 981 50 99 08 ou en empregobrion@gmail.com.

Categorías: Ciencia

Os desafíos da cultura dixital centraron unha xornada en Compostela

códigocero - Ven, 03/16/2018 - 11:47

O Consello da Cultura Galega celebrou onte a xornada A cultura dixital en Galicia: de ida e volta ao Big Data, á verificación e á mobilidade, que abordou de xeito multidisciplinar o ámbito dos datos masivos dende o punto de vista da investigación, a historia, a comunicación e a enxeñaría informática a través de distintos expertos que alertaron de problemas como a necesidade de sistemas de verificación que eviten a propagación de falsidades ou a demanda de relatos visualmente atractivos para os usuarios. No caso específico da cultura galega advertiron que, pese á existencia de numerosos proxectos e iniciativas voluntaristas que aproveitan as ferramentas en liña, a emerxencia de algoritmos nas grandes plataformas na Rede están a invisibilizar os contidos xerados na nosa lingua, o que supón un grande atranco que cómpre superar.
Na sesión de mañá, Carlos Elías, da Universidade Carlos III de Madrid, abordou os riscos da sobreabundancia de mensaxes, do ruído e alertou da facilidade coa que se propagan os díxomes. Xaquín G.V., infografista, e Clara Higuera, Data Scientist da BBC, explicaron como tratan os datos masivos dende o punto de vista informático e da súa visualización para ser contados ao público. Incidiron na necesidade dunha ética dos datos que permita compatibilizar a necesidade de comprender mellor o comportamento dos usuarios co respecto á súa intimidade. Xaquin G.V. falou, ademais, da importancia de que os datos relaten historias que outros medios non poden contar e que consigan formatos atractivos para os usuarios.
Durante a tarde, Jesús Miguel Flores Vivar, director de Internet Media Lab na Universidad Complutense de Madrid alertou da alta presenza de canfurnadas na Rede e avogou por procesos de verificación e sistemas para achegar valor engadido aos produtos culturais. Tamén salientou a intencionalidade de moitos díxomes para incluír na opinión pública e fixo un chamamento á responsabilidade dos medios de comunicacións advertindo que a creación de falsidades pode rastrexarse.
Carmen García Mateo, catedrática de Teoría do Sinal e Comunicacións da Universidade de Vigo, ofreceu o punto de vista tecnolóxico e analizou as posibilidades e responsabilidades que ofrece o Big Data, a automatización e a intelixencia artificial. Deu conta das dificultades de procesar grandes volumes de datos, deixando claro que o realmente complicado é peneirar os datos relevantes, de aí que cada vez sexa máis importante a análise da información. No caso do audiovisual tamén é posible aplicar estas tecnoloxías, e así deu conta de sistemas que mediante o procesamento de linguaxe natural e outras tecnoloxías semellantes de xerar etiquetas para poder organizar documentos multimedia, o que pode ser unha ferramenta de enorme utilidade.
A xornada concluíu coa posta en común das realidades e desafíos que ofrece a cultura dixital en Galicia da man de María Yáñez, especialista en estratexias nas redes; Marcus Fernández, webmaster de Código Cero e Rubén Bastón, de Elogia. Marcus Fernández estableceu paralelismos entre os ámbitos culturais tradicionais e os vieiros que atopan na contorna dixital; Rubén Bastón quixo destacar a ameaza para a nosa lingua que supón Google, desincentivando o uso do galego na web; mentres que María Yáñez quixo expor toda unha serie de cuestións sobre as que sería preciso reflexionar para tomar posicións a longo prazo para poder garantir o futuro da nosa cultura.

Categorías: Ciencia

O uso de drons contra os lumes colle pulo nas comarcas de Deza e Tabeirós-Montes

códigocero - Ven, 03/16/2018 - 10:03

Combater os lumes con drons e tecnoloxías de seguimento e análise da información non só é posíbel, é que xa case é unha realidade. Así nolo conta a Universidade de Vigo que impulsa o proxecto internacional FireRS (wildFIRE Remote Sensing) e que, en materia de aplicación directa dos obxectivos do proxecto, vai poñer o foco nas comarcas de Deza e Tabeirós-Montes, moi castigadas por lumes forestais que se repiten ano tras ano. O proxecto, que ten un importe de 2 millóns de euros (até 2019), inclúe a entrada en xogo dun picosatélite, unha flota de drons e sensores infravermellos en terra, ademais dun centro de control para a xestión da información. En definitiva, búscase “crear unha ferramenta que sexa quen de realizar unha detección temperá e achegar información en tempo real dos lumes forestais aos servizos de emerxencia”.
O papel crucial da comarca pontevedresa no proxecto coordinado pola Universidade de Vigo e no que participan a Universidade de Porto e o Laboratorio de Análise e Arquitectura de Sistemas de Toulousse de Francia, materializouse este 15 de marzo nun convenio asinado entre a institución académica viguesa e o Consorcio para o Servizo Contraincendios e Salvamento das Comarcas do Deza e Tabeirós-Montes, que será o encargado de testar as tecnoloxías desenvolvidas ao abeiro da iniciativa, a través de varios simulacros parciais e un final con lume real e controlado.
“É moi importante para nós dispoñer de usuarios reais”, asegurou o docente e investigador principal do proxecto FireRS, Fernando Aguado, que incidiu no impacto directo que a investigación ten na sociedade. Aguado, xunto ao tamén investigador da institución académica viguesa Pablo Izquierdo e Juan José Muñoz, xerente-xefe do consorcio, acompañaron á vicerreitora de Investigación da Universidade de Vigo, Asunción Longo, e ao presidente do consorcio e alcalde de Agolada, Ramiro Varela, na sinatura do acordo de colaboración entre ambas as dúas institucións.
Lume 1
Ao abeiro do proxecto, a Universidade de Porto e LAAS-CNRS encárganse dos procesos de integración dos vehículos aéreos non tripulados (UAV polas súas siglas en inglés) e cámaras infravermellas e do software e a predición do comportamento dos lumes forestais, respectivamente. Pola súa banda, a Agrupación Aeroespacial da Universidade de Vigo fai o propio co deseño e integración de Lume 1, o cuarto satélite da Universidade de Vigo tras XaTcobeo (2012), Humsat-D (2013) e Serpens (2015). “Estamos neste intre no proceso de licitación pública da empresa que se vai encargar del proceso de integración para el lanzamento do cubesat”, avanzou Fernando Aguado, que confirmou que o satélite chegaría ao espazo, no derradeiro trimestre de 2018, a bordo do foguete indio PSVL (Polar Satellite Launch Vehicle), ben, nun Falcon 9 de Space X.
Segundo informou, o cubesat ten unhas dimensións de 20X10X10 centímetros e un peso aproximado de 2,45 quilos e orbitará a unha altura de entre 500 e 600 quilómetros durante aproximadamente un ano. “A idea é validar a nova tecnoloxía que incorpora na carga útil, que é unha evolución dos satélites anteriores, e que sexa un produto transferíbel”, explicou Aguado.

Categorías: Ciencia

Bacterias como pigmento

Investigación y Ciencia - Ven, 03/16/2018 - 00:00
Se ha logrado manipular genéticamente bacterias para que sus colonias produzcan distintos colores.
Categorías: Ciencia

A xornada CIMS GAL pon de relevo a importancia de vivirmos en smart cities

códigocero - Xov, 03/15/2018 - 22:59
A concelleira de Ponteareas durante a celebración do CIMS GAL

Este 14 de marzo falouse na Cidade da Cultura de smart cities e de todo o que poden facer as tecnoloxías para mellorar a xestión das cidades e a calidade de vida das persoas, ao tempo que se crean contornas máis sustentábeis. Estamos a falar da xornada CIMS GAL (Cidades Innovadoras Modernas Seguras) na que participaron, entre outras entidades, concellos como o de Santiago, Vigo e Ponteareas, o Clúster TIC, a axencia AMTEGA, o Colexio Profesional de Enxeñaría en Informática de Galicia (CPEIG) ou Vicepresidencia da Xunta.
Na cita, o vicepresidente da Xunta, Alfonso Rueda, salientou a aposta do Goberno galego para fomentar a accesibilidade en todos os ámbitos e lograr cidades máis intelixentes. No acto de apertura do evento, Rueda avogou por unha administración doada, útil e próxima para os cidadáns, no marco do que cualificou como "movemento imparábel" a prol da accesibilidade das institucións públicas.
Pola súa banda, o presidente do Clúster do TIC de Galicia, Antonio Rodríguez, interveu na apertura da xornada para por de relevo a importancia das tecnoloxías smart para as contornas urbanas como un sector en auxe na economía dixital. Ao seu xuízo, cómpre traballar para "atopar novos modelos de prestación de servizos onde o sector privado asuma tamén riscos baseados na tecnoloxía”.
No acto tamén concorreu, entre outras administracións locais galegas, o Concello de Ponteareas, a través da súa concelleira de Ensino, Participación Cidadá e Réxime Interior do Concello de Pontearea, Cristina Fernández, quen interveu acompañada do técnico da EDUSI, Víctor Varela. A edil salientou “a importancia de estar sempre renovándose e actualizando a formación e os métodos de xestión para ofrecer servizos máis áxiles, eficaces e de calidade á cidadanía”. Tamén engadiu “a necesidade de coñecer as últimas lexislacións e normativas en materia de protección de datos” e fixo fincapé nos esforzos de Ponteareas para “actualizarse e converterse nunha cidade de futuro, tal e como se marca na estratexia Ponteareas, Hábitat Saudábel, e para dar cumprimento ás novas normativas e aplicar as novas ferramentas tecnolóxicas na mellora da calidade de vida da veciñanza”.
A cita veu da man do Clúster TIC Galicia, Vicepresidencia da Xunta e as axencias AMTEGA e GAIN. Polo evento pasaron diferentes profesionais afondando en aspectos vitais para as administracións públicas (Leis 39 e 40, RGPD, Transparencia, Open Data, nueva LCSP de 9 de marzo,…) e que terán aínda máis relevancia no futuro. Nunha única mañá déronse cita representantes da Axencia Española de Protección de Datos, da Subdirección Xeral de Fomento da Innovación, da Subdireccións Xeral de Desenvolvemento Urbano, da Secretaría do Estado para a Sociedade da Información e da Secretaría Xeral da Administración Dixital, das Axencias Galegas de Innovación e de Modernización Tecnolóxica (GAIN e AMTEGA), dos Concellos de Santiago e de Vigo, de Ruta N de Medelllín, da Universidade de Santiago e de empresas especializadas en seguridade protección de datos.

Categorías: Ciencia

Mariano Rajoy estrea videoblog

códigocero - Xov, 03/15/2018 - 22:30

De xeito un tanto sorprendente, o presidente do Goberno de España e do Partido Popular, Mariano Rajoy, estreou hoxe a través de Twitter e Facebook un videoblog, no que semella un xeito de modernizar as súas canles de comunicación para achegarse ao público máis novo.
Aínda que podería ter empregado a súa primeira intervención para facer declaracións sobre temas de actualidade, parece que tiveron a ben iniciar esta nova aventura dun xeito moito menos arriscado, optando por unha mensaxe de corte promocional no que Rajoy reflexiona sobre a súa traxectoria como afiliado do Partido Popular, diríxese aos novos afiliados da formación política e aproveita a ocasión para dar conta da campaña #SoyPopular, organizada co gallo da Convención Nacional en Sevilla os vindeiros días 6, 7 e 8 de abril, na que queren que os afiliados e simpatizantes acheguen un breve vídeo contando a motivación para adherirse ao PP.
Resulta un tanto rechamante que Rajoy empregue un formato que normalmente se emprega para conseguir unha proximidade case persoal para publicar unha peza máis propia dunha campaña electoral, fuxindo así da naturalidade que o público esperaría dunha canle de comunicación como esta. Tamén é curioso que esta peza se dirixa a afiliados do Partido Popular e non á cidadanía en xeral.

Primeira entrega do videoblog de Mariano Rajoy

Categorías: Ciencia

Directivos de PSA visitaron as JAI 2018

códigocero - Xov, 03/15/2018 - 21:30

Os equipos de dirección e os responsables de innovación das tres fábricas que compoñen o polo ibérico de Groupe PSA visitaron hoxe o showroom das Xornadas de Automatización Industrial JAI 2018 organizadas pola Escola de Enxeñería Industrial da Universidade de Vigo, onde puideron coñecer as principais innovacións tecnolóxicas presentadas polas empresas participantes.
A visita dos directivos de Groupe PSA organizouse como actividade complementaria dunha Xornada para a Transversalización da Innovación nas fábricas do polo ibérico, que con carácter interno celebrouse no centro de Vigo, con asistencia dunha trintena de responsables das fábricas de Vigo, Madrid e Mangualde (Portugal) a fin de compartir os principais avances tecnolóxicos postos en marcha nos últimos meses nas tres fábricas ibéricas do grupo de automoción francés.
A delegación de Groupe PSA estivo encabezada polo director do polo ibérico e do centro de Vigo de Groupe PSA, Fréderic Puech, e contou coa presenza dos directores das plantas de Madrid e Mangualde (Portugal), Óscar Fernández Ponte e José María Castro Covelo, respectivamente.
Frédéric Puech asegurou que «esta visita foi un magnífico complemento para a nosa xornada de traballo, xa que nos permitiu coñecer solucións de automatización industrial moi interesantes da man de empresas destacadas neste ámbito, e á vez reafirma a vontade recíproca de cooperación coa Universidade de Vigo no seo do ecosistema de innovación aberta da Automoción en Galicia».

Categorías: Ciencia

As novas tecnoloxías cobran protagonismo nas candidaturas dos premios empresariais da Deputación da Coruña

códigocero - Xov, 03/15/2018 - 16:48

Os galardóns empresariais da Deputación da Coruña vanse entregar o vindeiro 23 de marzo. Estamos a falar do Premio Provincial á Mellor Iniciativa Empresarial e das súas tres categorías, dotadas con 25.000 euros cada unha: Mellor Iniciativa Empresarial Nova (para proxectos emprendedores con menos de 12 meses de antigüidade, Mellor Iniciativa Empresarial Consolidada (para empresas que conten con máis de cinco anos de actividade), e Mellor Iniciativa Socialmente Responsábel (que premiará as firmas que contribúan ao medre sustentábel da provincia). Segundo fai saber a Deputación da Coruña, coma na anterior convocatoria hai unha nutrida presenza de iniciativas tecnolóxico-dixitais entre as candidaturas presentadas. Estes e outros datos foron dados a coñecer esta semana, na xuntanza do xurado dos galardóns na sede da entidade que preside Valentín González.
Como dixemos, os gañadores daranse a coñecer o vindeiro venres 23 de marzo, nun acto que contará coa presenza do presidente da Deputación e o deputado de Promoción Económica, José Luis García, e representantes do tecido empresarial da provincia.
A Deputación convocou este premio por segundo ano consecutivo dentro das accións do Plan de Emprego Local (PEL), co obxectivo de recoñecer o traballo realizado polas pequenas e medianas empresas, autónomos e emprendedores comprometidos co desenvolvemento económico dos concellos coruñeses.
Na xuntanza desta semana fíxose saber que un total de 78 empresas da provincia presentaron as súas candidaturas ás tres categorías coas que conta o galardón. O xurado estivo presidido polo deputado de Promoción Económica e Emprego, José Luis García, mentres que o secretario foi Rafael Díaz-Aguado, Xefe do Servizo de Promoción Económica, Turismo e Emprego. Así mesmo, participaron especialistas de diferentes ámbitos relacionados co mundo da empresa e representantes de asociacións e outras organizacións de empresarios con presenza nos concellos coruñeses, entre as que se inclúen a Asociación de Empresarios Novos da Coruña, a USC, a UDC, a CEC ou a Cámara de Comercio de Santiago.
Os dez membros do xurado avaliaron as candidaturas seguindo criterios como “a orixinalidade do negocio, a formación do seu promotor, o seu grao de innovación, a participación en redes de traballo ou a implantación de medidas de RSC, entre outros”.
En canto aos ámbitos de actividade das empresas, salientan as adicadas ás novas tecnoloxías da información e á programación informática, así como as empresas de servizos de enxeñaría e consultoría, comercio en liña e desenvolvemento de aplicacións. Tamén concorren a este segundo premio empresas dos sectores da alimentación, hostalería, cosmética e estética, educación, turismo e actividades de servizos sociais.

Categorías: Ciencia

A UCGAL fai un chamamento a prol da protección de datos persoais no Día dos Dereitos do Consumidores

códigocero - Xov, 03/15/2018 - 16:47

A Unión de Consumidores de Galicia (UCGAL) está a celebrar este 15 de marzo o Día Mundial dos Dereitos do Consumidor, unha efeméride cuxo lema de campaña centrouse este ano nos mercados dixitais e no gran espallamento que tiveron nos últimos anos. Segundo lembra UCGAL, a campaña está a poñer o foco nos desafíos que representan os mercados en liña para as persoas consumidoras e para as entidades que velan polos seus dereitos. Nesta data de tal relevancia, a organización galega quere poñer o foco en tes cuestións “cuxos efectos sobre o conxunto da cidadanía galega aínda está por determinar”. Trátase da actualidade do caso Volkswagen en Portugal, a sanidade e a protección de datos.
Respecto do tema que nos ocupa en Código Cero, a salvagarda da información e da privacidade, UCGAL quere facer fincapé no que considera unha realidade que non se pode deixar de lado: nas contornas dixitais, as relacións entre as liberdades e a seguridade, e as estratexias comerciais e de xestión, “non están exentas de tensións”. Neste senso, UCGAL considera “que os grandes retos que afrontan os consumidores na era dixital están relacionados coa xestión e salvagarda da privacidade e a protección dos datos de carácter persoal”. Por este motivo impulsou en colaboración coa Asociación de Internautas e a Asociación Pro Dereitos Civís Económicos e Sociais (ADECES) a Plataforma pola Seguridade e a Privacidade Dixital, polas súas siglas PSPD, unha plataforma interasociativa de carácter aberto, centrada en tratar temas relacionados coa seguridade e a privacidade dixital.

Categorías: Ciencia

O documental sobre a marea verde dos nosos montes busca apoios na Rede

códigocero - Xov, 03/15/2018 - 16:00

Se cadra os máis importantes recursos e axudas para salvar o noso medio ambiente estean tan preto que ás veces nin os vemos. Por exemplo trala pantalla do computador, nas redes, onde “fan vida” acotío millóns de activistas dispostos a pechar fileiras arredor dunha causa. Así o entende o impulsor de Agora Axuda, o documental sobre os plans de reforestación con especies autóctonas que se están a desenvolver na nosa terra. O proxecto, que vén da man de Juan Carlos Gargiulo, está envorcando esforzos na Internet cunha campaña de micromecenado en Verkamí. O obxectivo é obter financiamento. A campaña ficará aberta na plataforma de crowdfunding até o 27 de marzo. Neste intre, a iniciativa conta con mais de 70 micromecenas.
Gargiulo, cuxas dúas últimas obras estiveron presentes na Mostra de Cine Europeo de Segovia (MUCES), é un director activista de orixe arxentina e de nai galega. Segundo fai saber, os seus vencellos con Galicia son moi fortes, e pasa longas tempadas na súa terra de orixe. No outubro pasado viviu “con angustia” as novas dos incendios pero o ler en novembro unha nova sobre o éxito desbordante dunha convocatoria local solicitando voluntarios para os traballos de recuperación da terra, quixo sumarse á “marea verde” e contribuír fotografando e documentando con cámara de vídeo o desenvolvemento da iniciativa ambiental.
A intención do director é render unha homenaxe ás persoas que loitan pola biodiversidade a través da cooperación colectiva a prol do ben común. Para quen queira saber máis do seu traballo, mantén na Rede un blog (Fotosemanal) onde dá conta dos seus proxectos e das causas ás que contribúe coas súas cámaras.

Categorías: Ciencia

O quinto Carballo Interplay terá en competición 42 webseries de todo o mundo

códigocero - Xov, 03/15/2018 - 13:17

Até 42 webseries de todo o mundo competirán na sección oficial da quinta edición do Festival de contidos dixitais Carballo Interplay, que se celebrará os días 4, 5, 6 e 7 de abril na vila coruñesa e que repartirá máis de 5.000 euros en premios. Así nolo contaron os días pasados as principais impulsoras do certame, Sonia Méndez e Sandra Lesta, xunto co Concelo de Carballo, engadindo que a quinta edición do concurso elixiu (entre máis de 250 propostas chegadas de todo o mundo) un total de 3 propostas galegas e en galego, 12 do resto do ámbito estatal e 27 do resto do mundo.
Noutras palabras: os que acudamos ao festival, teremos a sorte e o privilexio de ver, dende o corazón de Bergantiños, achegas audiovisuais innovadoras (por formato, por contido) de Arxentina, Australia, Canadá, Chile, Estados Unidos, Finlandia, Francia, Holanda, Italia, Líbano, México, Nova Zelanda, Reino Unido, Suíza, Uruguai e, por suposto, España.

Montaxe das contribucións galegas

Cada unha das tres categorías repartirá 800 euros en premios. O xurado do certame estará composto polo guionista e realizador Carlo Padial, a crítica Desirée de Fez, o xornalista Iago Fernández, a actriz María Tasende, o guionista Óscar Cruz e a directora Anxos Fazáns. Ademais, o público decidirá cos seus votos (entre todas as contribucións) un premio de 400 euros e, por vez primeira nesta edición, un xurado novo entregará outro premio de 400 euros. Conforman este xurado a youtubeira Nuria Espasandín, o músico Cristian Andrade a ilustradora Laura Tova e o picadiscos e programador do Xiria Pop Maikel Pérez.

Categorías: Ciencia

Novo número da nosa edición impresa

códigocero - Xov, 03/15/2018 - 12:22

Como todos os meses, chega outro número de Código Cero na súa edición impresa, que se pode achegar de balde nunha completa rede de puntos de distribución, podéndose descargar tamén en formato PDF ou ler en dispositivos móbiles a través da aplicación de quiosco dixital Magzter.
Nesta nova entrega celebramos os 25 anos da chegada da Internet a Galicia, que abordamos nun Foro Tecnolóxico celebrado na Cidade da Cultura. Tamén abordamos temas como os seguintes:
- A Deputación de Pontevedra estende a rede SmartPEME até A Estrada
- A Deputación da Coruña reforza as empresas con axudas ao emprego e á innovación
- O CITIC apoia un proxecto de eSaúde para mellorar a calidade de vida dos nosos maiores
- A Xunta comeza en 10 rulas o proceso de dixitalización das nosas lonxas
- AMTEGA e as empresas do Pacto Dixital impulsan as vocacións STEM na nenez
- O estudio galego Gato Salvaxe presenta novo videoxogo
- O Monte Pindo e Carnota enchen Google de paisaxes espectaculares
- A UVigo impulsa un proxecto para protexer os cabalos salvaxes con drons
- A cultura e a creatividade galega ferven dende múltiples recantos da Rede
- Na recta final do inverno Galicia ínzase de software libre e xeiras Maker

Categorías: Ciencia

Volven as Xornadas de Tecnoloxía de APETEGA, desta volta en Compostela

códigocero - Xov, 03/15/2018 - 12:06

Os vindeiros 13 e 14 de abril celebraranse no IES Lamas de Abade de Santiago de Compostela a nova edición, a número 17, das Xornadas de Tecnoloxía da Asociación de Profesorado de Tecnoloxía de Galicia, APETEGA. Trátase, para quen non o saiba, dun acontecemento divulgativo e formativo encamiñado a achandar no ámbito docente o camiño da investigación tecnolóxica e científica. A metodoloxía empregada, basicamente, é formar a formadores e alumnado e intercambiar recursos e capacidades. O obxectivo, en última instancia, é estimular o noso talento.
Haberá 120 prazas, habilitadas sobre todo para o profesorado de Secundaria e Bacharelato, homologadas pola Consellería de Educación como actividade de formación do profesorado por un total de 12 horas. A inscrición pódese facer na páxina da APETEGA.
Respecto do programa de actividades, estas comezan o día 13 cunha visita ao CiTIUS, no Campus Sur da USC, centro referencial a nivel galego e estatal en materia de novas tecnoloxías de comunicación. Pola tarde, logo do xantar, celebrarase o acto inaugural, unha charla sobre satélites e un coloquio sobre escenas de cinema e debates tecnolóxicos. Ao día seguinte, o programa arranca cunha charla-coloquio sobre unidades didácticas de tecnoloxías e prosegue con comunicacións didácticas e exposición de proxectos. Logo, ao mediodía, será a quenda dos primeiros obradoiros, que proseguirán pola tarde, logo do xantar.
Por temáticas, os obradoiros porán o foco nas seguintes cuestións: deseño en 3D, téxtiles intelixentes, galgas extensiométricas con Arduino, realidade aumentada, drons, robótica e aproveitamento e reciclaxe de material tecnolóxico. Ademais, introducirase aos participantes na iniciativa AppInventor, unha contorna de desenvolvemento de software creado por Google Labs para a elaboración de aplicacións dirixidas ao sistema operativo Android, lanzado por Google.

Categorías: Ciencia

Páxinas

Subscribirse a IGACIENCIA agregador - Ciencia