Ciencia

AMD traballa en mitigar os efectos de Spectre no seu hardware

códigocero - Ven, 01/12/2018 - 11:04

Tras saír á luz pública as vulnerabilidade que afectan a numerosos procesadores modernos, Meltdown e Spectre, dende AMD saíron rápido a argumentar que os seus procesadores estaban libres de todo risco, pero iso non era totalmente exacto, e o fabricante ten que contribuír a mitigar estas ameazas a través de actualizacións de firmware e de software para o seu hardware, polo que vén de publicar un boletín de seguridade para dar conta das medidas adoptadas.
Das tres variantes das vulnerabilidades detectadas, os procesadores de AMD só se librarían totalmente de unha (a coñecida como Meltdown), pero para Spectre si teñen que tomar medidas para evitar que este problema de seguridade poida explotarse no futuro por algún tipo de malware.
Para as variantes que si afectan a AMD advirten que están a traballar con Microsoft para arranxar os problemas que xurdiron nos últimos días cunha das actualizacións de seguridade de Windows, permitindo así que para a semana que vén xa estean dispoñibles parches para practicamente todos os equipos afectados (que para Linux xa están dispoñibles) e que estiman que poderán illar completamente unha das variantes de Spectre, mentres que a outra variante, moi complicada de explotar, está a evitarse mediante parches de sistema operativo e actualizacións de microcódigo, polo que durante varias semanas irán distribuíndo numerosas actualizacións que buscan contribuír a evitar que Spectre poida converterse nunha seria ameaza para a seguridade informática.

Categorías: Ciencia

Gradiant presenta as súas últimas solucións biométricas en CES 2018

códigocero - Ven, 01/12/2018 - 09:46

O Centro Tecnolóxico Gradiant vén de anunciar a súa participación na nova edición da feira Consumer Electronics Show (CES 2018), o foro de meirande referencia a nivel mundial en materia de industrias das tecnoloxías de consumo. O evento, no que Gradiant concorre por vez primeira, celébrase estes días (até hoxe) en Las Vegas, Estados Unidos. Na feira CES, o centro galego ten presenza no pavillón español do ICEX, onde está a mostrar as súas solucións biométricas orientadas a procesos de onboarding dixital (solucións de identificación electrónica de persoas que permiten, por exemplo, a apertura remota de contas bancarias) e KYC (Know Your Customer); así como as ferramentas de inicio de sesión biométrico para dispositivo móbil.
Máis en detalle, Gradiant mostra a integración da tecnoloxía de Verificación de Sinatura Dinámica (DSV polas súas siglas en inglés) nos dispositivos Samsung Galaxy Note. Esta solución, chamada Gradiant Signer, permite acceder e asinar de forma segura calquera documento en calquera lugar, e foi especialmente deseñada para Samsung Galaxy Note.
Ademais, no transcurso do CES 2018 Gradiant está a presentar polo miúdo outras dúas novas solucións. Por unha banda a tecnoloxía faceIDNN, que incorpora un motor de recoñecemento facial baseado en coñecemento profundo (Deep Learning) axeitado para os devanditos procesos de onboarding dixital e de Know Your Customer (KYC polas súas siglas en inglés); e selfie&sign, unha solución de recoñecemento facial para inicio de sesión biométrico con dispositivos móbiles que inclúe un mecanismo de suplantación de identidade baseado na verificación simultánea da sinatura e a faciana.

Categorías: Ciencia

¿Cómo congelar los tejidos orgánicos o los cultivos celulares sin dañarlos?

Investigación y Ciencia - Ven, 01/12/2018 - 00:00
Una proteína anticongelante sintética y biodegradable, la poliprolina, podría simplificar y mejorar la compleja técnica actual de criopreservación.
Categorías: Ciencia

Nova liña do Plan de Banda Larga para despregar redes de 100 Mbps en núcleos rurais de menos de 150 habitantes

códigocero - Xov, 01/11/2018 - 22:08

A Xunta lanza unha nova actuación do seu Plan de Banda Larga 2020 para facilitar o acceso á Internet, cun mínimo de 100 Mbps de velocidade, en núcleos de menos de 150 habitantes. Con este obxectivo o Consello do Goberno galego aprobou hoxe unha liña de axudas a operadores de telecomunicacións cun importe de 14,2 millóns de euros para despregar redes ultrarrápidas en zonas do rural que non contan con esta cobertura nin previsión de dispoñer destas redes.
Os operadores poderán actuar en calquera das 26.386 entidades de poboación de menos de 150 habitantes e noutros 80 núcleos de entre 150 e 300 habitantes. Poderán presentar varios proxectos cunha subvención mínima de 20.000€ para cada un deles ata esgotar a dotación orzamentaria prevista.
A Administración autonómica concederá unha subvención máxima do 90% do custo total de cada proxecto. Estas subvencións cofináncianse ao 75% polo Fondo Europeo Agrícola de Desenvolvemento Rural (FEADER) no marco do Plan de desenvolvemento rural de Galicia 2014-2020 (PDR).

Complementariedade entre administracións

Con esta medida a Administración autonómica actuará nos núcleos máis pequenos con fondos FEADER, mentres que o Estado focalizará os seus esforzos en cubrir as entidades de maior tamaño coas convocatorias que licite nos vindeiros anos no marco do Programa Nacional de Extensión da Banda Larga de Nova Xeración (PEBA).
Actualmente, o Goberno do Estado ten adxudicados 21 millóns de euros do PEBA, que permitirán dotar de cobertura de 100 Mbps a preto de 260.000 galegos nos vindeiros dous anos. Grazas á complementariedade e coordinación entre ambas Administracións en 2020, un 74% dos galegos terá acceso a redes ultrarrápidas. Esta porcentaxe de cobertura poderá ampliarse coas próximas convocatorias previstas polo Estado no marco Programa Nacional de Extensión da Banda Larga de Nova Xeración.

Prazos e características da convocatoria

A nova convocatoria do Plan de Banda Larga 2020 publicarase proximamente no DOG e os operadores de telecomunicación poderán presentar as súas solicitudes no prazo máximo dun mes dende o día seguinte á publicación.
A convocatoria inclúe un anexo con 26.466 entidades de poboación consideradas zonas brancas de redes de nova xeración, é dicir que carecen de cobertura de redes dun mínimo de 100 Mbps así como de previsión de dispoñer delas.
As redes coas que se dote ás entidades de poboación deberán proporcionar servizos de cando menos 100 Mbps de baixada e 20 de subida, non establecer limitacións de descargas e permitir a realización de comunicacións de voz e vídeo en tempo real.

Categorías: Ciencia

A Xunta destinará 2,7 millóns de euros a pequenas empresas de nova creación e os proxectos nados nas universidades

códigocero - Xov, 01/11/2018 - 22:05

O presidente do Goberno galego, Alberto Núñez Feijoo, avanzou hoxe a convocatoria dun paquete de axudas, dotadas con 14 millóns de euros, para incentivar a contratación de 1.300 desempregados en 220 concellos rurais e en 700 PEME e empresas de base tecnolóxica. Sobre a última das liñas de axuda, cun orzamento de máis de 2,7 millóns, o titular da Xunta explicou que destinarase a fomentar e consolidar o emprego nas pequenas empresas de nova creación e en iniciativas de carácter tecnolóxico, é dicir, en proxectos innovadores xurdidos na Universidade.
En relación ás pequenas empresas de nova creación, estableceranse axudas para xerar emprego estable, formar os xerentes ou financiar gastos de constitución da empresa, arrendamento do local, maquinaria ou equipamentos informáticos, entre outros.

Categorías: Ciencia

Apple ten problemas para satisfacer a demanda de baterías para o iPhone 6 Plus

códigocero - Xov, 01/11/2018 - 22:00

Tras saberse que Apple facía que os iPhone con baterías degradadas reducisen a súa velocidade de funcionamento sen ter informado de tal práctica a compañía de Cupertivo tivo que dar explicacións e prometer unha compensación, que consistiu principalmente en reducir temporalmente o prezo das substitucións de baterías dos móbiles afectados, de xeito que en vez de ter que pagar 89 euros o cambio custaría só 29 euros, prezo que moitos están dispostos a pagar para renovar o seu móbil, e precisamente iso parece que está a provocar serios problemas de abastecemento para as baterías dalgúns modelos de iPhone, de xeito que nalgúns países para poder cambiar a batería dun iPhone 6 Plus haberá que agardar a finais de marzo ou primeiros de abril, que é para cando prevén ter dispoñibles novas partidas de baterías para satisfacer a inesperada demanda que vén de xurdir.
Outros modelos como o iPhone 6s e o iPhone 6s Plus terían demoras dun par de semanas, mentres que co iPhone SE, o iPhone 7 e o iPhone 7 Plus parece que non hai demoras na meirande parte de países.
Pode entenderse que o feito de abaratar a substitución de baterías de smartphones vellos disparase a demanda, pois en condicións normais estes dispositivos deixarían de utilizarse polo seu comprador orixinal ou de cambiárselle a batería moitos optarían por servizos técnicos non oficiais para conseguir prezos máis reducidos, pero dado que ningún sería tan barato como o novo prezo establecido por Apple como compensación, distorsionouse claramente o mercado.

Categorías: Ciencia

A Deputación de Lugo abre 2018 achegando aos maiores da provincia 51 obradoiros TIC

códigocero - Xov, 01/11/2018 - 21:59

A Deputación de Lugo comeza 2018 apostando forte polas novas tecnoloxías e, tamén, por acurtar a distancia entre estas ferramentas (cheas de posibilidades e vantaxes para o noso día a día) e a cidadanía. Froito deste compromiso renovado polo dixital son os 51 cursos e obradoiros que a entidade provincial vai celebrar durante o primeiro trimestre de ano, ao abeiro do programa InLugo. As actividades foron dadas a coñecer hoxe polo presidente da Deputación, Darío Campos, nun multitudinario encontro os usuarios de InLugo e das súas vertentes formativas e de envellecemento activo pola vía TIC. Serán, en total, 731 prazas, dirixidas todas elas aos maiores da provincia.
Segundo fixo saber Darío Campos, a dita programación vai alén do puramente formativo, entra de cheo nos terreos do social, da saúde, do participativo e do inclusivo. “O fomento do uso das novas tecnoloxías entre os maiores da provincia”, explicou, “desempeña un importante labor social do que me sinto especialmente satisfeito”. Segundo engadiu, este compoñente social vese reflectido na alta demanda, “xa que as diversas actividades organizadas en 2017 superaron os 2.500 usuarios”.
Campos tamén fixo fincapé na utilidade das ferramentas dixitais, non só como canles de información e comunicación, senón tamén como recursos para estarmos no mundo: “Son útiles porque nos axudan no noso día a día e permiten que esteamos en contacto cos nosos seres queridos e coa sociedade en xeral, algo especialmente importante cando nos imos facendo maiores, porque promoven un envellecemento activo e favorecen a nosa autonomía”.
Campos dixo aos usuarios que asistiron ao acto que “sodes a mellor proba de que aprender non ten idade, e todo un exemplo para aquelas persoas que cren que son demasiado maiores para introducirse neste mundo”. Por esta razón, convidou aos participantes de InLugo a que comproben “que o uso de Internet ou dos móbiles é moito máis doado do que parece”.
As novidades do programa
Das 51 actividades que inclúe a programación do primeiro trimestre, 28 serán cursos ordinarios. Segundo concretou o presidente da Deputación, haberá novamente actividades formativas básicas de uso de Internet ou móbil para aqueles que estean a dar os seus primeiros pasos na Sociedade do Coñecemento. Polo que respecta ás novidades, salientou a convocatoria de “obradoiros máis específicos”, como os de banca electrónica ou talleres sobre servizos de mensaxes instantáneas como Messenger ou Whatsapp. Asemade, engadiu, incrementarase o número de talleres adicados ao retoque fotográfico, unha das actividades máis demandadas polos usuarios.
Os outros 23 cursos serán de repaso. “Neste caso están especialmente destinados aos maiores que xa participaron nos cursos habituais. O obxectivo é refrescar o aprendido, polo que teñen uns contidos moi prácticos”.
Aberto o prazo de inscrición
O máximo responsábel provincial anunciou que o prazo de inscrición para o primeiro trimestre ábrese hoxe mesmo, 11 de xaneiro, e animou aos interesados “a que se apunten canto antes xa que as prazas soen cubrirse ás poucas horas”. De feito, dixo, en 2017 houbo máis do dobre de inscritos que de prazas. As persoas interesadas poden reservar praza a través das webs www.fundaciontic.org e www.deputacionlugo.gal ou chamando ao teléfono 982 225 186.

Categorías: Ciencia

A Biblioteca de Galicia impulsa a primeira recolleita dos sitios en liña con dominio galego

códigocero - Xov, 01/11/2018 - 20:15

A instancias dunha petición da Biblioteca de Galicia, a Biblioteca Nacional de España vén de incluír a que sería a primeira recolección do dominio galego, o .gal, que se integra deste xeito na colección web de Galicia e no seu depósito legal electrónico. Segundo informa a Consellería de Cultura e Educación (encargada da xestión dos dous ditos acubillos de coñecemento da nosa terra, a través da Biblioteca de Galicia), o rastrexo do noso dominio desenvolveuse este mes de decembro e achegou ao remate a descarga de máis de 140 GB de información.
O proceso de recollida de datos realizouse a través da captura dos sitios web rexistrados baixo .gal. A finalidade do devandito proceso foi arquivar e preservar “a maior cantidade posíbel dos contidos que conforman os recursos web deste dominio, que lle permite á cultura e á lingua galegas dispoñer dun identificador de primeiro nivel para visualizalas e para incrementar o tráfico na Rede cara aos portais galegos”.
O labor levouse a cabo sobre unha listaxe de 4.261 dominios fornecidos pola Asociación PuntoGal, entidade responsábel da xestión do dominio de noso. A Consellería sinalou que a metade deles non ten contido, a maioría por ser só dominios reservados. Da outra metade, un 26% recolleuse na súa totalidade, mentres que o resto alcanzou o límite de tamaño de 150 MB por dominio, o mesmo que se estableceu para a última recolección masiva do dominio .es.
A preservación dos contidos dos sitios web que alcanzaron o límite de 150 MB complementarase con recoleccións selectivas xestionadas pola Biblioteca de Galicia, tamén en colaboración coa BNE.


Categorías: Ciencia

Unha app achegaranos á riqueza histórica e vitivinícola de Oímbra a través de realidade aumentada e 3D

códigocero - Xov, 01/11/2018 - 19:33

O Concello de Oímbra, a empresa Xoia e a Deputación de Ourense están a impulsar unha iniciativa innovadora para reivindicar e visualizar o rico patrimonio do devandito municipio a través de tecnoloxías de realidade aumentada e 3D. O proxecto, unha proposta que cingue riqueza histórica local, turismo e viticultura, foi dado a coñecer onte no consistorio pola alcaldesa Ana Villariño, o presidente da entidade provincial, Manuel Baltar e os responsábeis da dita compañía, Xoel Vázquez e Iván Olmos. Segundo fixeron saber, “trátase dunha iniciativa de vangarda tecnolóxica que amosa unha nova maneira de achegar aos visitantes os valores de Oímbra, que conta con importantes elementos arqueolóxicos e cun sector do viño que ten oito adegas acollidas á Denominación de Orixe Monterrei", explicou Manuel Baltar na presentación.
En termos máis concretos, o proxecto permitirá a visitantes e residentes percorrer e revivir “visual e informativamente” o devandito concello ourensán, que é, para quen non o saiba, o que xunta maior concentración de lagares rupestres, amais de acubillar unha adega do século XVIII cun alto valor arquitectónico.
Segundo indicou o presidente da Deputación, a iniciativa é un claro exemplo de como a tecnoloxía pode poñerse ao servizo da historia, fornecéndoa, e fornecéndonos, dunha “viaxe no tempo inclusiva e interactiva sen movernos do século XXI, valorizando a riqueza do noso rural".
A proposta pon en xogo unha aplicación móbil que é, en boa medida, o eixe tecnolóxico do proxecto. A través dela, o usuario poderá facer cousas como reconstruír o pasado local e ver en tempo real a época de meirande actividade e importancia dos Lagares de Oímbra, coas súas edificacións, as súas tarefas e as súas escenas “revividas”. Ao mesmo tempo, achégase aos usuarios completa información sobre a historia das adegas e as características do seu viño. En definitiva, a aplicación, amais dunha máquina de tempo, representa unha fonte de experiencias visuais innovadoras, lúdicas, didácticas e turísticas, sinalaron os responsábeis da mesma na presentación.
Ana Villarino salientou precisamente este factor turístico do proxecto: “Con esta aplicación pretendemos promover o turismo cara aos lagares de Oímbra e levar a cabo un labor de promoción económica das adegas". A alcaldesa de Oímbra agradeceu o apoio da Deputación de Ourense e subliñou "a importancia de pór en valor por medio da innovación tecnolóxica a riqueza histórica do municipio, que conta coa maior concentración de lagares rupestres".
Ademais da visualización en 3D dos lagares e da adega centenaria, o visitante poderá ver unha ficha con cada unha das adegas de Oímbra, na que se explica a súa historia e as características do seu viño, segundo explicaron os responsábeis de Xoia, que salientaron tamén a veracidade histórica que acompañada cada escena, a través do modelado 3D das estancias, xunto a personaxes, mobiliario e accesorios, ademais de animacións que permiten coñecer como se desenvolvía unha determinada actividade.
A ferramenta móbil, que non requirirá de conexión a Internet, só a súa descarga, estará dispoñíbel en galego e castelán para os sistemas iOS e Android.

Categorías: Ciencia

Penalizan a un youtuber que filmou a un suicida

códigocero - Xov, 01/11/2018 - 12:09

O youtuber Logan Paul leva preto dun par de semanas protagonizando unha grande polémica que puxo a YouTube no obxectivo de todas as miradas ante a súa pasividade por mor dun vídeo publicado no que Paul internábase en Aokigahara, o bosque dos suicidios de Xapón, véndose claramente como atopaban o cadáver dunha persoa pendurada nunha árbore.
O vídeo non só violaba claramente as normas de YouTube e carecía de todo o respecto ao ser humano (tras a impresión inicial os protagonistas chegaban a rir), senón que a reacción do público en contra non se fixo esperar, e finalmente o propio responsable da canle decidiu eliminar o vídeo e publicar unha desculpa que non resultou satisfactoria para a comunidade.
Ante o malestar causado, e tras moitos días de inacción, finalmente dende YouTube publicaron unha carta aberta na que pedían desculpas pola falta de comunicación, insistindo en que o suicidio non é motivo de broma, e recoñecen que a canle de Logan Paul, con máis de 39 millóns de subscritores, incumpre as normas de YouTube e adoptarán accións en consecuencia.
Suspender a canle de YouTube parecería algo demasiado drástico, pero o que si fixo YouTube finalmente foi eliminalo do programa Google Preferred, que é o que o abre aos principais anunciantes, polo que esta medida suporá un duro golpe económico para Logan Paul. Tamén queda en suspenso un proxecto de Paul para YouTube Red, o filme The Thinning: New World Order, que tería que ver a luz este ano, á vez que cancélase a súa participación na serie Foursome.

Vídeo de desculpa de Logan Paul

Categorías: Ciencia

Un novo fallo de seguridade pon en dúbida os controis de calidade das actualizacións de Apple

códigocero - Xov, 01/11/2018 - 11:45

A poucas semanas do grave fallo de seguridade de macOS High Sierra que permitía identificarse como superusuario nun equipo empregando un contrasinal en branco, a historia parece repetirse, e detectaron un novo fallo de seguridade na actual de macOS High Sierra que permite desbloquear o menú de configuración da App Store empregando calquera contrasinal.
Ao parecer este problema só aparece dende contas con dereitos de administrador e non afectaría a outros menús de configuración, pero resulta moi preocupante que xurdan dous fallos de seguridade relativa ao control de contrasinais baixo macOS High Sierra en tan pouco tempo, especialmente porque Apple comprometérase a implantar medidas para auditar os seus procesos de desenvolvemento e así previr este tipo de fallos se seguridade, o que dá a impresión que non fixeron (pois falamos de novos fallos de seguridade introducidos por actualizacións de sistema), quedando a reputación da compañía en materia de seguridade nunha situación moi comprometida.

Categorías: Ciencia

Vivo amosa en Las Vegas un sensor de pegadas dixitais integrado en pantalla

códigocero - Xov, 01/11/2018 - 11:24

Os lectores de pegadas dixitais que poden integrarse detrás das pantallas avanzan para converterse en breve nunha realidade, e a tecnoloxía da que daban conta o pasado xuño que consistía nun sensor ultrasónico desenvolvido por Qualcomm parece que non será finalmente a que antes chegue ao mercado, pois o fabricante chinés Vivo xa ten un prototipo de teléfono moi próximo a produción que incluiría un sensor óptico detrás da súa pantalla OLED.
Este novo sensor desenvolvido por Synaptics empregaría a propia pantalla do teléfono para iluminar as pegadas dixitais e recoñecelas opticamente, de xeito que os fabricantes poderán continuar a gozar do recoñecemento de pegadas en terminais con pantallas case sen marcos, sen ter que mover o sensor á parte traseira e sen ter que mudar de tecnoloxía de identificación como fixo Apple co iPhone X.
Vivo decidiu situar o sensor de pegadas na parte inferior da pantalla, para manter a posición tradicional deste sensor e que a fricción do usuario sexa o menor posible, aínda que cómpre salientar que o sensor CMOS de Synaptics só é compatible con pantallas OLED, de xeito que non é unha solución que poderemos ver en breve en todos os novos smartphones, senón só nuns poucos escollidos.

Categorías: Ciencia

Un estudio refuerza la importancia de la vacunación anual antigripal en mayores

Investigación y Ciencia - Xov, 01/11/2018 - 00:00
La vacunación previene complicaciones y reduce la mortalidad: los pacientes mayores de 65 años vacunados tuvieron una protección del 74% para evitar ingresos en la UCI y del 70% para prevenir fallecimientos asociados a la gripe.
Categorías: Ciencia

Fiebre en el espacio

Investigación y Ciencia - Xov, 01/11/2018 - 00:00
La ingravidez aumenta la temperatura corporal de los astronautas. Concretamente, ésta alcanza los 38°C en reposo, mientras que después de realizar ejercicio puede superar los 40°C.
Categorías: Ciencia

A Biblioteca Virtual de GaliciaDixital chega aos 91 títulos

códigocero - Mér, 01/10/2018 - 23:20

GaliciaDixital vén de comunicar que a súa Biblioteca Virtual foi quen de chegar esta mesma semana aos 91 títulos acubillados, unha destacada escolma de títulos de temática moi diversa e co engadido extra de estar ao libre dispor dos internautas, na Rede e de balde. Como lembraremos, a Biblioteca Virtual é unha iniciativa da plataforma GaliciaDixital que se dirixe a achegar en libre acceso obras en liña, publicadas ou inéditas, que doutro xeito os lectores dificilmente poderían conseguir.
No caso de obras inéditas, facilítase aos autores de xeito gratuíto a súa publicación, co fin de achegarse aos seareiros da lectura e poder recibir comentarios e xuízos sobre o seu traballo creador ou investigador. En canto ás obras xa editadas, poden estar esgotadas ou ser de difícil localización, ofrecendo aos seus autores este complemento ou alternativa para dar a coñecer as súas creacións
A intención de GaliciaDixital é seguir facilitando de balde este servizo a todos os autores que o desexen, podendo os interesados poñerse en contacto coa plataforma a través do enderezo correo@galiciadigital.com. Entre as últimas incorporacións figuran Vivimos unha longa traxedia, de Manuel Rodríguez López, Crónicas del alba, de Joaquín Antuña, De pura cerna, de Xosé María Gómez Vilabella, e Adeuses a Xosé Manuel Carballo, co compendio de obituarios que a través das páxinas de GaliciaDixital despediron a este singular crego, escritor e ilusionista lucense.

Categorías: Ciencia

O Redmi 4X de Xiaomi foi o smartphone máis vendido en España en novembro

códigocero - Mér, 01/10/2018 - 23:00

Os últimos resultados do mercado de smartphones elaborados por Kantar Worldpanel ComTech, correspondentes ao trimestre que concluíu o pasado novembro, presenta como os novos smartphones de Apple están a perder cota de mercado nos principais mercados europeos con respecto o mesmo período do ano anterior, diferenza que aínda está máis acusada nos EE.UU., onde Apple consegue colocar os seus 3 novos teléfonos no Top 3 de terminais máis vendidos, mentres que en España o impacto do iPhone X foi moito máis reducido, non sendo quen nin de colocarse no Top 10 no mes de novembro.
O mercado español parece dominado por fabricantes con prezos moito máis competitivos que Apple, como Samsung, Bq, Huawei e Xiaomi; deixándose notar claramente o desembarco oficial de Xiaomi no noso territorio, xa que o móbil máis vendido en España en novembro foi o Redmi 4X.
Samsung mantense como o fabricante líder en España, seguido por Huawei e Xiaomi, ou sexa, que nun par de meses Xiaomi pasou de ser o quinto fabricante en vendas de España a situarse en terceira posición, crecemento que parece ter afectado principalmente a LG, que pasou dunha cota de mercado do 9,1% ao 5,3%.

Categorías: Ciencia

nVIDIA actualiza os seus controladores para loitar contra Meltdown e Spectre

códigocero - Mér, 01/10/2018 - 23:00
Pese a que as gráficas de nVIDIA son inmunes ás ameazas informáticas detectadas, actualizan os seus controladores para axudar a loitar contra as mesmas

Nos últimos días non cesan as informacións sobre as medidas para mitigar os efectos de Meltdown e Spectre, e a última compañía en actualizar o seu software é nVIDIA, que lanzou parches para as súas tarxetas gráficas, aínda que quixeron deixar clara unha cousa: o hardware gráfico de nVIDIA (GPU) é inmune aos problemas de seguridade detectados, ou sexa, que as actualizacións que lanzan queren axudar a mitigar o problema dos procesadores (CPU) afectados.
Sobre as distintas variantes das vulnerabilidades detectadas dende nVIDIA matizan que a primeira é á que corrixen coa nova actualización, a segunda precisará de maiores actualizacións no futuro (para o que nVIDIA colaborará con outras compañías) e para a terceira non atopan motivos para pensar que o software de nVIDIA poida verse afectado.
En calquera caso temos un novo exemplo da necesidade de manter os nosos equipos informáticos actualizados, tanto no que ao sistema operativo se refire como tamén os controladores de hardware, xa que as ameazas informáticas poden chegar a través de distintos vectores, e cómpre pór o maior número de atrancos posibles ás ameazas informáticas para manter seguros os nosos equipos e os que se relacionan cos mesmos.

Categorías: Ciencia

Un investigador da UVigo achanda o camiño para as redes rurais sen fíos baratas e sustentábeis

códigocero - Mér, 01/10/2018 - 20:14

O investigador Luis Alexandre Lopes Frazão, da Universidade de Vigo, vén de achegar un proxecto que garante a eficiencia, a sustentabilidade e a rendibilidade dunha rede sen fíos en eidos non urbanos. A súa proposta, probada con éxito na vila portuguesa de Memória, vén debullada na tese doutoral de seu, titulada Sistema intelixente para a xestión de redes sen fíos de banda ancha en ambientes rurais, que foi presentada na Escola Superior de Enxeñaría Informática do Campus de Ourense, sendo a súa titora Silvana Gómez. Segundo fai saber Luis Alexandre, o obxectivo principal deste traballo de investigación foi achar os requirimentos para administrar e facer seguimento dunha rede sen fíos de área rural. Amais, achega claves para crear un modelo de xestión doado, económico e sustentábel.
O xermolo do proxecto está en emendar unha discriminación que persiste: a que sofren, en comparación coas cidades e vilas, as contornas non urbanas en materia de oferta de servizos tecnolóxicos. Segundo lembra Luis Alexandre, “a oferta real de Internet non é igual para todos debido á non rendibilidade da implementación destes servizos nas zonas rurais”. En definitiva, o modelo proposto foi deseñado para ofrecer alternativas aos problemas identificados na análise previa da situación de fenda dixital urbana-rural. Entre as características da proposta resultante, o seu autor salienta “o uso da intelixencia artificial para crear funcións que axuden aos administradores das redes a lograr unha boa calidade de servizo para os usuarios finais”. Segundo engade, as vantaxes destes sistemas smart céntranse en reducir os custos de instalación e mantemento e mellorar o rendemento.
Luis Alexandre explica que o modelo fornecido artéllase en varios módulos que teñen os mesmos obxectivos: redución de custos e automatización dunha xestión remota. Segundo fai saber, o seguimento de dispositivos e servizos, xunto coas ferramentas de diagnóstico e prevención, “permiten ao xestor de rede coñecer en tempo real a rede, os dispositivos e o seu estado de servizo”. Ademais, o factor mantemento vén asegurado pola creación de informes históricos e gráficos de valores dos dispositivos e os seus servizos.
No transcurso da elaboración da tese o investigador deu forma a un portal que busca subministrar datos salientábeis e de valor aos usuarios das redes. Ao remate, o o modelo propón a monitoraxe de usuarios para evitar abusos de tráfico e dar prioridade a algúns tipos de tráfico de aplicacións. “A solución permite mellorar o rendemento da rede mediante a toma de decisións intelixentes baseadas no estado actual das variábeis de tráfico da mesma que resultará nun uso xusto da infraestrutura e mellorará a calidade da experiencia para todos os usuarios”, comenta Frazão.

Categorías: Ciencia

Carballo incrementa nun 38% o volume de RAEE recollidos

códigocero - Mér, 01/10/2018 - 16:30

O Concello de Carballo vén de achegar un reconto da actividade xerada a través do punto limpo de Bértoa, onde se leva a cabo un importante labor de xestión e tratamento de aparellos eléctricos e electrónicos. En total, xestionáronse neste emprazamento 46.932 quilos deste tipo de refugallos: electrodomésticos e aparellos TIC, o que representa un incremento do 38% con respecto ao ano anterior. Esta suba, segundo fixo saber o concelleiro de Obras e Servizos, Luis Lamas, é “unha mostra de que este tipo de produtos están cada vez máis presentes nas nosas vidas, pero tamén de que a poboación está cada vez máis sensibilizada nas cuestións medioambientais”.
O Concello sinalou tamén que o maior aumento rexistrouse nos aparellos eléctricos non perigosos, que pasaron de 4.700 a 10.560 quilos nun ano. Respecto do material de meirande risco, con compoñentes moi contaminantes, sitúanse os televisores, que pasaron de 18.700 quilos no 2016 a 22.420 no 2017. En segundo lugar destacan as neveiras e conxeladores, que tamén se incrementaron desde os 10.260 quilos do ano 2016 ata os 13.780 do 2017. Cos fluorescentes, que tamén son perigosos, a tendencia é a contraria. Entre o 2016 e o 2017 a súa presenza no punto limpo reduciuse de 259 a 172 quilos.
Segundo insiste o Concello, este incremento nas cifras de xestión débese por unha banda á meirande sensibilización da cidadanía acerca dos perigos dun tratamento non axeitado, e pola outra, ao incremento da presenza dos aparellos tecnolóxicos no noso día a día. A maiores, hai outro factor de importancia: as medidas de concienciación impulsadas polo Concello, que insiste, con diferentes accións da Concellería de Obras e Servizos, na importancia de empregar o punto limpo, que é de balde e que permite non só recoller, senón tamén xestionar correctamente os RAEE (Residuos de Aparellos Eléctricos e Electrónicos) para que os seus compoñentes poidan ser debidamente tratados e/ou reutilizados.

Categorías: Ciencia

As operadoras frean a Huawei nos EE.UU.

códigocero - Mér, 01/10/2018 - 13:15

Nas últimas horas tivo lugar a presentación de Huawei entro do CES de Las Vegas, evento que a compañía chinesa aproveitou para anunciar o lanzamento estadounidense no seu Mate 10 Pro, smartphone que venderase a partires do 18 de febreiro a través de Amazon, Best Buy, Microsoft, Newegg e B&H a un prezo de 799 dólares na súa edición estándar e a 1.225 dólares para a súa versión Porsche Design. Pero o novo móbil estrela de Huawei veuse eclipsado pola intervención do director xeral da compañía, Richard Yu, quen saíuse completamente do guión para amosar o seu malestar polo feito de que AT&T decidise a última hora non vender os teléfonos de Huawei nos EE.UU., o que supón un duro golpe para o fabricante, xa que a venda de móbiles a través de operadores nos EE.UU. supera o 90% do mercado.
Esperábase que 2018 fose o grande ano de Huawei nos EE.UU. (éxito que xa conseguiu en Europa nos últimos dous anos), pero parece que as presións políticas son as que farán que iso non aconteza, pois dende o Goberno norteamericano consideran que Huawei é unha ameaza. Se ben non hai evidencias de que Huawei realice prácticas de espionaxe, o mero feito de que a compañía tela ligazóns con Goberno chinés parece dabondo para as autoridades estadounidenses para frear o seu espallamento dentro das súas fronteiras, o que semella unha simple escusa para aplicar medidas proteccionistas no mercado interior.
Huawei tamén anunciou o nomeamento da actriz Gal Gadot (quen representa ao superheroína Wonder Woman no cine) como Chief Experience Officer, un novo cargo que lembra ao que outros fabricantes crearon no pasado para introducir a celebridades nas súas campañas de marketing, e que desta volta parece algo bastante natural, xa que Gadot protagonizou varias campañas de Huawei en Israel nos pasados anos.

ACTUALIZACIÓN: Verizon tamén estaría a cancelar o seu acordo de distribución con Huawei por presións políticas.

Un dos vellos anuncios de Huawei protagonizado por Gal Gadot

Categorías: Ciencia

Páxinas

Subscribirse a IGACIENCIA agregador - Ciencia