Ciencia

Láseres de microondas prácticos

Investigación y Ciencia - Mér, 03/28/2018 - 00:00
Se ha creado un máser continuo que funciona a temperatura ambiente, un dispositivo perseguido desde hace mucho.
Categorías: Ciencia

A Ourense ICC Week mostrará os novos roteiros dos videoxogos e os deportes en liña

códigocero - Mar, 03/27/2018 - 23:32

Os videoxogos e as competicións de e-sports serán temas fundamentais de debate, análise e demostracións na cuarta edición da Ourense ICC Week, levada a cabo pola Deputación de Ourense. O encontro, celebrado do 2 ao 5 de maio, contará con novidades como un novo apartado, a ICC Gamers, que inclúe dúas actividades: a ICC Technium R Encounter e a ICC eSports. O apartado ICC Gamers xorde da colaboración entre a Deputación de Ourense, a Universidade de Vigo, R euskaltel, a Federación Galega de Automobilismo e Mahou.
Indo ao miolo, a xuntanza ICC Technium R Encounter botará a andar o día 3 de maio ás 18 horas e rematará o 6 de maio á mesma hora, no Pavillón Universitario de Ourense. O pre-rexistro dará comezo o día 28 de marzo e a inscrición á party será o 30 de marzo, sendo a elección de sitios o día 7 de abril. A entrada ten un custe de 25 euros, contando cunha inscrición de balde aos torneos da ICC Technium R Encounter, acceso a todo o recinto e ás actividades da party. Engadir que tanto o rexistro como a inscrición poderán realizarse a través da páxina www.technium.es. Cómpre dicir que desta volta a quedada informática terá catro grandes torneos: League Of Legends, Counter Strike Global Offensive, Hearthstone e Super Smash Bros Brawl, que se celebrarán ao longo deste evento. Haberá 4.000 euros en premios en torneos ou en outras actividades lúdicas dentro da party.
A xeito de curiosidade lembrar que na pasada edición do ICC Technium, o moañés Aarón González Santomé, acadou un novo récord Guinness do xogo Final Fantasy 10, logo de permanecer 40 horas consecutivas competindo.
Volvendo ao apartado de xogos, este completarase coa ICC eSports, que tamén se celebrará no Pavillón Universitario de Ourense, o 5 de maio ás 10 horas até o 6 de maio ás 15 horas. Dentro desta celebración os torneos que se disputarán serán: FIFA 18, Clash Royale, e GT Sports. A entrada aos mesmos poderá adquirirse nas vindeiras semanas en Ticketea (podéndose acceder a ela a través da web). Neles poderán participar xente de fóra da ICC Technium R Encounter, así como as persoas da propia party.
En canto ao torneo de Clash Royale, dividirase en dúas modalidades: o torneo Profesional invitacional por equipos no que se darán cita os mellores clubs a nivel nacional (Valencia CF Esports, Giants, Movistar Riders, Teamqueso, Artic Gaming ou Team Heretics) e no que se repartirán máis de 4.000 euros en premios. O torneo de FIFA 18, no que participarán 128 persoas, ten un custe de entrada de 5 euros e os premios serán para o primeiro clasificado unha PlayStation 4, para o segundo clasificado un mando de PlayStation 4, e para o terceiro clasificado unha tarxeta PSN de 20 euros. No torneo de GT Sports poderán participar 32 persoas, e os premios deste torneo serán un Thrustmaster T-GT para o primeiro, unha tarxeta PSN de 50 euros para o segundo, e unha tarxeta PSN de 20 euros para o terceiro.
Este novo adianto de programación da Ourense ICC Week 2018 complementa as propostas presentadas até o de agora, que aglutinan novas tecnoloxías, humor, músico e incluso premios para xestores culturais de Galicia. En concreto, no que se refire aos novos sectores emerxentes e ás TIC (Tecnoloxías da Información e Comunicación), o 4 de maio as mulleres tecnolóxicas serán as protagonistas da xornada, tal e como sinalamos hai uns días dende Código Cero, facendo fincapé no epígrafe da actividade (Unha viaxe cara a Sociedade do Coñecemento), na participación das profesionais Sara Rodríguez, Cynthia Gálvez e Luz Castro, e tamén no cometido da xornada: visualizar ao máximo o importante papel despregado polas nosas mulleres referentes e expertas en tendencias de máxima actualidade, como por exemplo a realidade virtual, a realidade aumentada, o mundo do software, a chamada gamificación (aplicar en actividades da vida real metodoloxías propias dos videoxogos, estimulando a creatividade e a cooperación) ou a economía colaborativa.



Categorías: Ciencia

Firefox estrea unha extensión para evitar que Facebook rastrexe a nosa actividade na web

códigocero - Mar, 03/27/2018 - 22:00

Ante o escándalo de Cambridge Analytica dende Mozilla decidiron suspender a súa publicidade en Facebook, pero non quixeron que a súa postura quedase nun simple xesto, e prepararon unha extensión do seu navegador web que probablemente goce de moita aceptación entre os preocupados polo deficiente coidado que Facebook fai da información dos seus usuarios, xa que Facebook Container construirá un valado ao redor da web de Facebook para que a compañía de Mark Zuckerberg non poida facer un seguimento dos usuarios na súa actividade no resto de páxinas web.
A nova extensión principalmente o que fai é illar a identidade dos usuarios de Facebook nun contedor separado, dificultando que Facebook poida rastrexar a actividade dos usuarios noutras páxinas web a través de cookies de terceiros, o que consideran que é unha opción máis razoable que abandonar Facebook. Deste xeito os usuarios poderán optar por gozar dos contidos en Facebook á vez que teñen un maior control sobre os seus datos.
Cando empreguemos o Facebook Container veremos como na barra de enderezos do navegador aparece a palabra Facebook en azul xunto á icona dun maletín, para indicar que estamos no modo especial do navegador, e cando premamos nunha ligazón fóra de Facebook abandonaremos ese modo de funcionamento, mantendo separada a actividade na web coa que se teña en Facebook.
Mozilla advirte de que non recollerá datos desta extensión, senón que limitarase a saber o número de veces que se instala ou desinstala. Tamén dá conta de que, ao empregar a nova extensión, cando visitemos páxinas web que teñan integrados os comentarios de Facebook ou o botón de Gústame, estes elementos non poderán operar correctamente, pois o contedor non lles permite identificarnos.

Categorías: Ciencia

O dispositivo para axudar aos golfiños premiado en Galiciencia estará na maior feira STEM de Europa

códigocero - Mar, 03/27/2018 - 17:30

Os nosos novos investigadores (novas e novos, literalmente falando) están a facer ruído a nivel galego, estatal e, tamén europeo. Por exemplo os responsábeis do proxecto gañador do certame Galiciencia (impulsado pola Tecnópole), dirixido a espertar vocacións científicas e tecnolóxicas a través dunha gran feira de achados, un completo programa de obradoiros, campamentos e exhibicións e un concurso para premiar os mellores proxectos. Pois, ben, segundo puidemos saber, a equipa responsábel do proxecto gañador da última edición de Galiciencia representará a España na meirande feira científica de Europa. A chave para acadar este pase foi a súa vitoria en Expocerca.
A orixe do éxito deste proxecto hai que rastrexala en 2017, cando se impulso no certame Galiciencia 2017 e logo, gracias ao dito recoñecemento, participou en Expocerca 2018 representando ao Parque Tecnolóxico de Galicia (Tecnópole). Agora, Carlos Fole, Jaime Alonso, Miguel Herranz e Mateo Martínez, do Colexio Montecastelo de Vigo, volven de Catalunya co primeiro premio da que sería, en palabras da Tecnópole, a feira científica máis relevante de España. Cal é o seguinte paso? Pois, o vindeiro mes de xullo, Carlos, Jaime, Miguel e Mateo representarán a España no certame europeo Expo-Science Europe, que se celebrará na cidade polaca de Gdynia.
O seu enxeño, a razón dos seus éxitos e recoñecemento, é unha tecnoloxía cun gran compoñente medio ambiental e de responsabilidade co medio mariño. Trátase dun dispositivo para salvar vidas de golfiños varados que, ademais, inclúe unha aplicación móbil para facer comunidade de usuarios-colaboradores arredor de proxecto e permitir que calquera persoa poida fotografar unha manda de golfiños na costa ou mesmo un varamento e enviar a imaxe cos datos de situación. As vantaxes disto son claras e evidentes: amais de salvar a vida de moitos golfiños, trázanse mapas de tránsito de arroaces nas nosas costas e contribúese a limitar o tráfico marítimo en contornas concretas.
Segundo explica a Tecnópole, o dispositivo salvavidas de golfiños varados tivo un papel moi destacado entre os 112 traballos presentados en Exporcera, 42 deles procedentes de Brasil, China, México, Paraguai, Bélxica e Turquía. Ademais do primeiro premio, os estudantes fixéronse co accésit ao mellor proxecto na categoría ciencia en sociedade.
O enxeño, bautizado co nome de SISEDE (Sistema de Seguimento de Delfíns), inclúe a programación dun hidrófono para ser mergullado no mar e, mediante a captación do son que emiten os golfiños, facer seguimento dos cetáceos e emitir alertas á Coordinadora para o Estudo dos Mamíferos Mariños (CEMMA) e ao 112 cando se detecte que entran en zonas de perigo de varamento.
Máximo recoñecemento dos participantes
Ademais, a alumna de Aulas Tecnópole Iria Ollero logrou que o seu proxecto fose votado como o preferido polos participantes na devandita feira celebrada en Catalunya. O seu Baby safety levou o recoñecemento máximo outorgado polos seus compañeiros e, ao mesmo tempo, rivais no certame. O sofisticado dispositivo foi concibido nas Aulas Tecnópole e consiste nun enxeño múltiple para a prevención da morte súbita dos lactantes. A partir dos parámetros indicados polos pediatras, deseñou catro dispositivos que permiten controlar os factores de maior risco. Dous deles fan seguimento da posición do bebé no berce mediante uns sensores de presión e unha cámara de IR, outro controla de xeito simultáneo a temperatura da habitación e do bebé e un cuarto sistema consiste nun body que mide as pulsacións do lactante mentres dorme. Cando algún dos sensores rexistra unha situación de risco, actívase unha alarma sonora que avisa aos pais de xeito inmediato.
Ademais, Laura Costas e Inés Castro, do Colexio Alborada de Vigo, levaron un terceiro premio na Exporecerca co mesmo proxecto que fora recoñecido como o máis innovador na Galiciencia 2017. Trátase dun invernadoiro con autorrego de auga de mar, con forma de piscina cuberta.

Categorías: Ciencia

Blogaliza pechará o 25 de abril

códigocero - Mar, 03/27/2018 - 14:39

No ano 2003, coincidindo co nacemento do fenómeno de blogs en galego que recibiría o nome de Blogomillo, naceu un servizo de hospedaxe de blogs chamado Blogaliza, que facilitaba que os usuarios galegos non tivesen que recorrer a plataformas como Blogger para publicar as súas bitácoras.
O volume de cadernos publicados ao amparo do servizo era bastante importante nos primeiros anos, converténdose en todo un referente, traxectoria que non resultou doada, pois a plataforma nunca contou con grandes medios para operar e, de feito, tivo que rematar sendo asumido pola asociación Algueirada, que hai 5 anos decidiu realizar unha purga de blogs inactivos, e que agora anuncia unha media moito máis drástica: pecharán as súas portas virtuais o 25 de abril. Deste xeito, o usuarios que quedan na plataforma terán tempo para realizar copia dos contidos e migrar a outras plataformas.
O abandono de Blogaliza parecía algo inevitable, pois non só os seus blogs máis significativos migraron a outras plataformas hai anos (actualmente só acolle uns 80 cadernos), senón que tamén a actividade nos blogs persoais experimentou unha drástica caída coa emerxencia de plataformas como Facebook, Twitter, Instagram e YouTube, eliminando a necesidade de manter un blog persoal para comunicar a través da Internet.
Di así adeus o que foi un faro da Internet en galego, feito que debería chamar á reflexión sobre a necesidade de conservación do noso patrimonio dixital, xa que cada vez resulta máis complexo consultar mostras de fenómenos como o Blogomillo, por estar desaparecidos boa parte dos espazos web que o formaron no seu día, escribindo un dos capítulos máis interesantes da historia da Internet en Galicia.

Categorías: Ciencia

O Concello de Santiago adxudica a T-Systems o proxecto de eAdministración

códigocero - Mar, 03/27/2018 - 13:30

Santiago vén de dar un importante paso adiante en materia de servizos dixitais. En detalle, o Goberno do Concello adxudicou a semana pasada o contrato de subministro e mantemento de Administración Electrónica, cunha contía de 1,5 millóns de euros, á empresa T-Systems. Os datos sobre o proxecto foron achegados polo concelleiro de Medio Ambiente, Convivencia e Informática, Xan Duro, que fixo saber que se trata “da iniciativa de mellora e modernización da Administración municipal máis relevante da historia recente do Concello de Santiago”.
Tamén explicou que o subministro da eAdministración custaralle ao Goberno local preto de 900.000 euros, IVE incluído, e a devandita empresas encargarase dos traballos de mantemento durante catro anos, por un importe de 160.000 euros anuais.
Duro engadiu que a adxudicataria ofertou como “melloras do contrato” servizos como “a asistencia dun consultor especializado para a posta en explotación do sistema, o seguimento da atención á cidadanía e formación para o persoal do Concello para a utilización do xestor de bases de datos documental”. A idea do Goberno local é tirar o máximo partido desta iniciativa para “avanzar en transparencia” e “axilizar a relación da veciñanza coa administración, xa que os cidadáns poderán realizar a maioría dos trámites de maneira telemática desde as súas casas”.

Categorías: Ciencia

Un investigador do CITIC obtén o premio ao mellor TFG da Facultade de Informática

códigocero - Mar, 03/27/2018 - 13:00

Finalmente a Facultade de Informática da Coruña (FIC) deu a coñecer o gañador da terceira edición do seu Premio ao Mellor Traballo Fin de Grao Aplicado. Estamos a falar do investigador do Centro de Investigación TIC (CITIC), Plácido Lizancos Vidal, quen obtivo o devandito galardón grazas ao seu traballo Extracción de zonas quísticas en imaxes OCT de fondo de ollo. O evento de entrega celebrouse o pasado xoves 22 de marzo. O certame, no que colaboraron novamente o Centro de Investigación TIC (CITIC) e a FUAC, buscou enxalzar e visualizar a capacidade investigadora e desenvolvedora do alumnado.
A terceira edición do Premio ao Mellor TFG da FIC incluíu un primeiro galardón de 1.500 euros para o gañador e dous accésit de 500 euros.
A investigación de Lizancos consistiu en dar forma a un sistema automático con capacidade para avaliar as imaxes obtidas con métodos como a tomografía e definir con precisión se existen corpos quísticos na retina e en que grao se atopan. O fin último é detectar a dexeneración macular asociada á idade e a retinopatía diabética, doenzas que poden acabar en cegueira.
Segundo informou o xurado, “este sistema é máis preciso cós actuais métodos de análises de imaxes, polo que incrementa a fiabilidade das probas, a través de técnicas de visión artificial”.
Os outros dous finalistas foron Laura Montes Pombar, co TFG Análise de patróns cerebrais para o control de cadeiras de rodas, e Miguel Villar Rodríguez, co traballo Desenvolvemento de módulos para robótica educativa en AppInventor. Cada un deles recibiu 500 euros
Lembrar que esta terceira convocatoria do certame da FIC contou novamente co patrocinio de importantes empresas como Everis, Grupo Voz, Indra, Instituto Tecnolóxico Galego (ITG) ou Telecom, amais da devandita colaboración do Centro de Investigación TIC (CITIC) e a Fundación Universidade da Coruña (FUAC).
O xurado que avaliou os aspectos técnicos das solicitudes presentadas e o interese práctico do desenvolvemento das mesmas foi conformado unha vez máis polas propias empresas colaboradoras.

Categorías: Ciencia

Inicia Coworking Lugo impulsa buscadores en liña, servizos de domótica e recursos de eficiencia enerxética

códigocero - Mar, 03/27/2018 - 11:53

A semana pasada o Concello de Lugo abriu a programación da terceira fase de Inicia Coworking, o plan de apoio ao emprendemento local. A nova andaina da iniciativa, impulsada polo Executivo lucense en colaboración coa Escola de Organización Industrial, inclúe a posta a disposición dos participantes de nove locais comerciais no barrio da Tinería, no que se porá en marcha un viveiro de firmas a pé de rúa. O obxectivo, segundo fixo saber a alcaldesa Lara Méndez nunha xuntanza coas/os 22 emprendedoras/es de Inicia Coworking, é “dinamizar social e economicamente o barrio”. A cita celebrouse no CEI Nodus e nela fíxose fincapé na calidade e e no interese que espertan os proxectos acubillados, entre os que se contan un buscador online de animais para cruces entre razas seleccionadas e iniciativas de domótica, eficiencia enerxética, turismo sustentábel e accesíbel, adestramento canino, interiorismo, teatro ou organización de eventos.
Na xuntanza desenvolvida no CEI Nodus Méndez salientou “o éxito de Inicia para o impulso do tecido empresarial lucense e a creación de emprego, en tanto que máis do 60% dos 44 emprendedores que tomaron parte nas dúas primeiras fases están a día de hoxe en marcha e facturando”.
Tras o encontro, procedeuse a plantar un carballo no exterior do CEI Nodus, que simboliza “o desexo de que xerminen as iniciativas empresariais participantes”. Na segunda edición plantouse un castiñeiro tamén no exterior do Centro de Empresas e Innovación.
O Concello e a Escola de Organización Industrial co-financian o Inicia Coworking, un plan que ofrece gratuitamente un apoio integral, individual e personalizado para lanzar con éxito un negocio, asegurando a súa viabilidade tanto técnica como financeira. Deste programa resta unha fase, a cuarta, que se desenvolverá no segundo semestre deste ano e que dará a oportunidade a polo menos outros 20 emprendedores de lanzar o seu propio negocio.

Categorías: Ciencia

Vitae colabora no arranque do capítulo galego de PMI, o 5 de abril no Gaiás

códigocero - Mar, 03/27/2018 - 11:27

Vitae, a consultora galega centrada e servizos de formación e adestramento avanzado para os nosos profesionais da innovación e das novas tecnoloxías, vén de anunciar a súa colaboración e participación no novo capítulo de PMI en Galicia, coa presenza de todo o equipo no primeiro Congreso PMI Galicia Chapter. Neste escenario, o director de Proxectos en Vitae, Marcos Carbonell, será un dos relatores do evento, que se celebra o vindeiro 5 de abril na Cidade da Cultura de Santiago (Monte Gaiás).
Como lembraremos, PMI son as siglas de Project Management Institute (PMI), a máis referencial organización mundial adicada á dirección de proxectos. Foi fundada en 1969 e é unha entidade sen arela de lucro que xunta profesionais en todo o mundo e cuxa sede central está en Pensilvania. Ten máis de 200 capítulos, incluído o galego, en máis de 125 países. Por certo que a cita do 5 de abril implica en boa medida o comezo da andaina do chapter da nosa terra.
No congreso, Marcos Carbonell ofrecerá o seu punto de vista nunha mesa debate sobre a profesión de xestión de proxectos. Máis en detalle, achegará a súa experiencia de máis de 30 anos de experiencia nos sectores das Tecnoloxías da Información e a Comunicación (TIC) e os recursos humanos.
A día de hoxe, Vitae está a consolidarse na consultoría de xestión de proxectos asesorando a algunhas das empresas máis representativas do sector TI en Galicia, complementando esta liña coa formación e certificación en PMI, Scrum Manager e Kanban, ao tempo que fornece adestramento en avaliación e selección de perfís TI encamiñados a directores de proxectos e profesionais dos recursos humanos.

Categorías: Ciencia

As firmas Dinahosting, Opseeker e Porto Muíños, premiadas pola Deputación da Coruña

códigocero - Mar, 03/27/2018 - 10:47

Finalmente as distincións da segunda edición dos Premios ás Mellores Iniciativas Empresarias da provincia que entregou a Deputación da Coruña foron unhas distincións de marcado cariz dixital e, sobre todo, moi innovadoras. A segunda edición dos Premios PEL entregáronse o 23 de marzo, no salón Arao do recinto PALEXCO, e a gala contou cos mellores precedentes: un esforzo especial da Deputación por aglutinar arredor dos recoñecementos a meirande cantidade proxectos e de persoas emprendedoras que se saldou coa cifra salientábel de 78 candidaturas, moitas delas pertencentes ao ámbito das novas tecnoloxías da información. No palmarés final tamén houbo, ao cabo, presenza TIC: distinguiuse o labor e a traxectoria de Dinahosting, Opseeker Tech e Porto Muíños.
A gala, na que participaron unha manchea de alcaldes e representantes do tecido económico coruñés, contou coa presenza do presidente provincial, Valentín González Formoso; o deputado responsábel da área de Economía e Emprego, José Luis García; e o presidente da Confederación de Empresarios da Coruña, Antonio Fontenla.
A empresa OpSeeker Tech, con sede en Ames e especializada en adestramento financeiro en liña, foi galardoada co distintivo de Mellor Iniciativa Empresarial Nova, mentres que a cercedense Porto-Muíños recibiu o galardón á Mellor Iniciativa Empresarial Consolidada e a santiaguesa Dinahosting, centrada en servizos de hospedaxe, dominios e VPS, obtivo o premio á Mellor Iniciativa Socialmente Responsábel. Cada unha das premiadas recibiu un trofeo de olería de Buño, un diploma acreditativo e 25.000 euros en metálico.
Como dixemos, a esta segunda edición dos premios presentáronse un total de 78 candidaturas de toda a provincia e de ámbitos de actividade moi variados, destacando ás dedicadas ás novas tecnoloxías da información e a programación informático, así como as empresas de servizos de enxeñaría e consultoría, comercio en liña e alimentación, hostalería, cosmética e estética, educación, turismo e actividades de servizos sociais.
O presidente da Deputación da Coruña, Valentín González Formoso, foi o encargado de entregar os galardóns ás tres empresas, das que salientou a “súa gran capacidade de innovación e a súa aposta decidida pola calidade, o fomento de boas prácticas de xestión empresarial, a internacionalización e a aplicación de políticas de responsabilidade social corporativa". Asemade, destacou a súa capacidade creativa e para traernos cousas que marcan un antes e un despois: “Nun mundo onde parece que todo está inventado, Dinahosting, OpSeeker e Porto-Muíños amosan que arredor de nós aínda temos novas vías que explorar”. Tamén puxo o foco na liña de impulso empresarial na que se encadran estes galardóns: “Na Deputación da Coruña, queremos que a nosa acción política se entenda ligada á creación e promoción do emprego”, ao tempo que fixo fincapé no Plan de Emprego Local (PEL) no que se inscribe o galardón entregado hoxe. “O PEL multiplica por 6 os recursos que a institución provincial viña destinando ao emprego, investindo 30 millóns de euros para apoiar aos concellos na contratación, apoiar o emprendemento e impulsar ás pequenas e medianas empresas en todos os concellos da provincia”.
Antonio Fontenla, presidente da Confederación de Empresarios da Coruña e tamén presidente do xurado, agradeceu á Deputación da Coruña “o pulo a unha brillante iniciativa que valoriza a innovación, o esforzo e a responsabilidade social das nosas empresas” e destacou o elevado nivel das empresas que concorreron aos premios.
O xurado, amais de por Fontenla, estivo formado por José Manuel Cotos, adxunto ao reitor para Transferencia, Innovación e Emprendemento da USC; José Andrés Faíña, presidente do Grupo de investigación de Competencia e Desenvolvemento da Unión Europea da UDC; Carlos Fernández Bermúdez, vicepresidente da Cámara de Comercio da Coruña; Fernando Barros Fornos, secretario da Cámara de Comercio de Santiago de Compostela; Miguel Miragaya, presidente da Asociación de Empresarios Novo da Coruña; Isabel Ferro, xerente de I+D na empresa Calvo e José Sierra, presidente de honra de UROVESA.
OpSeeker Tech
Segundo fixo saber a Deputación, OpSeeker Tech, destaca “por ter como misión a mellora da saúde financeira das empresas e das persoas particulares”. Como lembraremos, OpSeeker pon en xogo unha serie de recursos en liña para adestrarnos na xestión responsábel dos nosos cargos. A tecnoloxía da firma de Ames, que xa foi distinguida polo BBVA, inclúe unha aplicación móbil que simula investimentos en bolsa e movementos de capitais con diñeiro ficticio, establecendo patróns de comportamento para cada un de nós e axudándonos a detectar erros e a aprender a investir adoptando boas prácticas financeiras.
Porto-Muíños
En canto a Porto-Muíños, trátase dunha empresa familiar situada en Cerceda que comezou a súa andaina en 1998 comercializando algas. Segundo informa a entidade provincial, nun primeiro intre procesábanas para a súa venda en deshidratado e conserva, pero a día de hoxe tamén se poden atopar os seus produtos en po, salgadura e en fresco. Os seus argazos distribúense por toda a xeografía española e en distintos países dos cinco continentes. Porto-Muíños adícase tamén á elaboración doutros produtos autóctonos das costas galegas: conservas de ovas de ourizo de mar, fígado de rabada, mexillóns con algas ou infusións, entre outros produtos. Ademais, o xurado tamén salientou o compromiso sustentábel de Porto-Muíños, destacando pola súa implicación na conservación da diversidade biolóxica do medio mariño, a súa fonte de subministración. Por este motivo, ten especial coidado na sustentabilidade dos recursos que explota e colabora co Departamento de Bioloxía Vexetal da Universidade da Coruña e co Instituto Oceanográfico de Santander para investigar e desenvolver técnicas de cultivo que contribúan á súa preservación.
Dinahosting
A empresa compostelá Dinahosting, coa súa referencial sede na rúa das Salvadas, centra a súa actividade na xestión de aloxamento web e dominios, poñendo á disposición dos usuarios diversas ferramentas e servizos para facilitar a dixitalización e o desenvolvemento de proxectos en liña. A Deputación lembra que entre as medidas de responsabilidade social empresarial da firma de Santiago destacan o seu Plan de Igualdade, a aposta polo emprego de calidade mediante a contratación indefinida da práctica totalidade de cadro de persoal, a preocupación e o coidado dos seus traballadores, a constitución dun Comité de Ética, a súa colaboración coa Fundación para a discapacidade e emprego Xoán XXIII dándolle aloxamento web de balde e facendo unha doazón anual de 20.000€ ou a colaboración con Paideia, con numerosos centros de FP e a USC para a inserción da xuventude no mundo laboral.
Ademais, Dinahosting vén de lanzar unha campaña de colaboración coa Asociación de Montes do Mancomún de Vincios (Gondomar), para axudar no repoboamento das áreas afectadas pola vaga de lumes que afectou a Galicia, e moi especialmente á provincia de Pontevedra, o pasado ano.
Do mesmo modo, Dinahosting ten en marcha accións e proxectos para loitar contra a violencia machista, promover do deporte, fomentar hábitos alimentarios saudábeis e patrocinar máis de 300 webs con fins sociais.

Categorías: Ciencia

La unificación de las matemáticas

Investigación y Ciencia - Mar, 03/27/2018 - 00:00
Generaciones de investigadores han proseguido el «programa de Langlands», que quiere crear una gran teoría unificada de las matemáticas.
Categorías: Ciencia

El hambre podría aliviar el dolor

Investigación y Ciencia - Mar, 03/27/2018 - 00:00
En ratones, el cerebro priorizaría la búsqueda de alimento a la convalecencia por una lesión crónica e inflamatoria. Este mecanismo inhibiría la sensación dolorosa a fin de favorecer la supervivencia del animal.
Categorías: Ciencia

Santiago estrea axenda en liña de congresos e eventos

códigocero - Lun, 03/26/2018 - 22:52

O Concello de Santiago presentou o pasado 23 de marzo unha axenda en liña cos congresos e eventos que se celebran na cidade. A ferramenta foi dada a coñecer pola concelleira de Turismo, Marta Lois, e pola xerente de Turismo de Santiago, Flavia Ramil, que sinalaron que o novo recurso de información pode consultarse xa na web www.santiagoturismo.com, onde se agarda que xere unha importante actividade en beneficio do sector (que viña anos demandando coñecer coa maior antelación posíbel as datas de celebración de eventos e congresos na cidade para así poder adaptar a súa oferta), da cidadanía e, por suposto, dos visitantes en potencia que estean a piques de acudir a Compostela.
A nova ferramenta está xestionada polo Santiago Convention Bureau, servizo de Turismo de Santiago para a promoción como destino de congresos, que incluirá actividades na axenda baixo os seguintes parámetros e criterios: ter un número mínimo de 50 participantes, ter unha duración mínima de 6 horas, celebrarse no termo municipal compostelán, estar confirmado e ser xa público ou contar coa aprobación dos organizadores para publicalo na axenda. En xeral exclúense eventos culturais, deportivos, galas, feiras…, agás casos concretos de especial relevancia para o destino.
Lois e Ramil lembraron que a ferramenta xorde cos mellores agoiros: o do afianzamento progresivo de Compostela como cidade congresual, un proceso que segue unha tendencia á alza dende hai anos e que se mantén claramente este 2018. Segundo fixeron saber, “só entre os seis principais congresos e eventos que se celebrarán este ano chegarán a Santiago máis de 6.000 participantes”.

Categorías: Ciencia

A tecnoloxía de xestión da auga do ITG, implantada con éxito en cinco concellos de España e Italia

códigocero - Lun, 03/26/2018 - 22:44

O sistema SANePLAN do Instituto Tecnolóxico de Galicia, unha avanzada plataforma de xestión integrada de saneamento e planificación urbana, está a consolidarse como solución innovadora en Europa. Así se fixo saber durante o transcurso da edición 2018 (este 21 de marzo) do Water Market Europe, encontro organizado en Bruxelas pola entidade europea de empresas e organización dos sector Water Supply and Sanitation Technology Platform, evento no que o instituto galego participou como relator e no que se puido ver a punta de lanza da innovación en materia de auga.
O ITG, representado por Juan Luis Sobreira, director de operacións, acompañado de Óscar González Represas e Lucía Garabato Gándara, salientou as potencialidades de SANePLAN a prol da xestión sustentábel de equipos de saneamento, a través da recompilación de datos fiábeis e exactos para unha axeitada previsión das necesidades actuais e futuras dunha rede de urbana.
O ITG tamén fixo saber que o sistema SANePLAN, dirixido a concellos e organismos con competencias nas ditas cuestións, achega como novidade a xestión integrada do saneamento e a planificación urbana, reunindo a información das redes de saneamento e da EDAR (estación depuradora de augas residuais) nun único punto, “conseguindo desta maneira unha visión completa do ciclo de augas residuais”. Esta solución é froito de experiencias previas de éxito do centro tecnolóxico ITG relacionadas coa auga potábel nas cidades. É o caso de ASAP (2006-2009), un optimizador de redes de auga potábel; e de Wiz (2010-2013), un sistema de planificación urbana recoñecido como Best of the Best Project polo programa Life da Comisión Europea no ano 2015.
Respecto do seu espallamento internacional, o ITG lembrou que xa houbo experiencias de éxito en en cinco concellos de España e Italia, tanto pequenos e medianos municipios (4.500 e máis de 10.000 habitantes respectivamente) como en Baiona, Chiesina Uzzanese e áreas mancomunadas cunha poboación superior aos 27.000 habitantes.

Categorías: Ciencia

HQ Trivia estrea concursos patrocinados esta semana

códigocero - Lun, 03/26/2018 - 22:00

O xogo móbil que permite participar nun concurso cun presentador que formula as preguntas nun vídeo en directo, HQ Trivia, que destaca por ofrecer premios económicos aos seus concursantes que participan totalmente de balde, parece ter atopado o rego polo que seguir, aproveitando a grande masa de usuarios que aglutina todos os días para campañas como as que ten esta semana, na que tras varios meses de actividade estrea patrocinadores oficiais.
Así, durante a xornada de hoxe celebrará o Air Max Day, xornada patrocinada por Nike, na que celebrarán unha partida sorpresa de 15 preguntas para que os gañadores poidan repartirse 100.000 dólares de premio, de xeito que os habituais do xogo terán que estar atentos aos seus teléfonos para saber cando poderán participar nesta competición que incluirá tamén un premio que os cartos non poden mercar (o que probablemente sexan unha edición limitada de zapatillas Nike Air Max).
Pero tamén a Warner Bros. pechou un acordo de patrocinio co HQ Trivia, que aseguran que tería un investimento total de 3 millóns de dólares para promover 3 filmes, dos que o primeiro sería Ready Player One. Para dar unha maior visibilidade ao novo filme de Steven Spielberg en HQ celebrarán unha partida o mércores cun bote de 250.000 dólares, que de seguro que captará moita atención e casa especialmente coa produción patrocinada (xa que está ambientada nun mundo de realidade virtual na que hai unha competición que saldarase cun grande premio no mundo real).
HQ Trivia xunta a centos de milleiros de xogadores a diario, chegando até preto dos 2,2 millóns o pasado 4 de marzo e tendo como bote máximo até o momento 50.000 dólares, polo que estas novas campañas patrocinadas poden supor un antes e un despois para a plataforma, disparando a súa popularidade e demostrando o poder que ten xuntar a unha grande audiencia diante do seu móbil durante varios minutos e cun nivel de atención moi elevado.

Categorías: Ciencia

Prenden a un cibercriminal que podería ter roubado máis de 1.000 millóns de dólares

códigocero - Lun, 03/26/2018 - 19:30

Axentes da Policía Nacional, nun operativo coordinado por Europol e a Fiscalía Especializada de Criminalidade Informática, detiveron en Alacante ao cerebro dunha organización presuntamente responsable de centos de ciberatracos a entidades bancarias de todo o mundo cometidos desde España mediante sofisticados ataques informáticos e que subtraeu «máis de 1.000 millóns de dólares».
O arrestado, Denis K., de nacionalidade ucraína, xunto con outros tres membros da organización, de nacionalidades rusa e ucraína, infectaban cun software malicioso os sistemas informáticos de entidades bancarias, principalmente rusas, pero tamén de Bielorrusia, Acerbaixán, Casaquistán, Ucraína e Taiwán, tomando o control dos sistemas críticos que lles permitía baleirar caixeiros de forma remota, alterar saldos ou modificar contas.
No caso de España, a organización criminal atacou durante o primeiro trimestre de 2017 caixeiros situados no centro de Madrid realizando extraccións fraudulentas por un valor de medio millón de euros. «Estamos ante unha das operacións máis importantes da Unidade Central de Ciberdelincuencia da Policía Nacional pola transcendencia internacional do cibercriminal detido», subliñou o ministro do Interior, Juan Ignacio Zoido, durante unha comparecencia pública para informar deste «complicadísimo traballo de investigación».

1,5 millóns de dólares de media en cada operación

Desde que comezaron a operar no ano 2013 este grupo de delincuentes logrou acceder a practicamente todos os bancos de Rusia. Os beneficios obtidos con cada ataque, que superaban o millón e medio de dólares de media, eran convertidos inmediatamente en criptomoedas co fin de facilitar o seu movemento nunha rede internacional de branqueo de capitais.
No rexistro realizado no domicilio do detido interviñéronse equipos informáticos, xoias valoradas en 500.000 euros, diversa documentación e dous vehículos de alta gama, entre outros efectos. Ademais bloqueáronse contas bancarias e dúas vivendas valoradas en preto de 1.000.000 de euros.
A investigación iniciada a principios de 2015 resultou especialmente complexa ao ter que conxugar técnicas de investigación tradicionais contra o crime organizado e novos métodos para a procura de indicios probatorios en infraestruturas cibernéticas e o uso de criptomoedas. Os investigadores españois han contado co apoio operativo do FBI e de Interpol.

Lideraba a organización de ciberdelincuentes desde o ano 2013

O arrestado dirixía esta organización criminal desde España creada a finais do ano 2013 e integrada por outros tres individuos cos que establecera contacto a través de foros na internet e cos que non mantiña contacto persoal algún.
A pesar do elevadísimo nivel técnico dos seus integrantes, os ciberdelincuentes necesitaban o apoio doutros grupos criminais para coordinar o traballo das mulas encargadas das extraccións de diñeiro en efectivo dos caixeiros automáticos que atacaban en diferentes países. Ata o ano 2015 foi a mafia rusa a encargada deste labor e a partir de 2016 fíxoo a mafia moldava.
Desde a súa constitución fai cinco anos os cibercriminais evolucionaron o software malicioso empregado nos seus ciberataques. Entre 2013 ata mediados de 2017, a banda criminal desenvolveu varios deles, denominados anunak e carberp, que cambiaron cando as empresas de seguridade desenvolveron mecanismos de detección. A partir de aí decidiron desenvolver unha nova ferramenta, denominada Cobalt Strike, de acceso remoto, que utilizou a organización como parte das súas ciberataques. Durante este período, non só atacaron a bancos de Rusia, senón que ampliaron a súa actividade criminal a outras entidades de antigas repúblicas soviéticas e mesmo a Taiwán.
Desde mediados do ano 2017 a organización criminal centrouse no desenvolvemento dunha nova ferramenta indetectable que tiña maiores capacidades e sofisticación. Cando tiveron dispoñible unha versión de avaliación probaron a súa efectividade para penetrar nos sistemas de entidades bancarias de todo o mundo (incluídas entidades españolas), tendo previsto utilizala para as súas ciberatracos de forma inminente. Os investigadores lograron obter unha mostra deste novo software durante a análise dos dispositivos informáticos intervidos ao detido.

O xeito de operar

O modus operandi utilizado desde o inicio das súas actividades criminais era similar. O ataque comezaba co envío masivo de correos electrónicos fraudulentos suplantando a identidade de organismos ou empresas lexítimas e dirixidos a unha multitude de direccións de correo electrónico de empregados de entidades bancarias de todo o mundo. Estes correos achegaban un ficheiro, xeralmente en formato . RTF ou . DOC, que contiñan un código malicioso que facía posible explotar algunha vulnerabilidade non actualizada nos sistemas informáticos das vítimas.
Unha vez o empregado recibía o correo electrónico e abría o ficheiro adxunto, e naqueles casos nos que a vulnerabilidade non se atopaba debidamente actualizada no computador do empregado, executábase no seu computador un código malicioso. Leste iniciaba a descarga dun paquete do software que permitía, posteriormente, o control remoto do mesmo desde servidores de comando e control.
Desde o computador infectado do empregado tentaban escalar privilexios dentro do sistema comprometido e movíanse lateralmente a outros dispositivos da rede interna bancaria, ata que tomaban o control de sistemas críticos do banco (sistema de transaccións ou infraestrutura de caixeiros automáticos). Unha vez os cibercriminales conseguían o control, manexaban ao seu antollo os caixeiros automáticos ordenándolles remotamente que expedisen diñeiro, executaban modificacións de saldo en contas concretas para realizar posteriormente extraccións con cartóns asociados, ou desviaban transferencias de grandes cantidades de diñeiro a contas da organización.
A selección das entidades bancarias obxectivo facíase en función do interese que presentaban para a organización, de acordo a parámetros de capacidades económicas e informáticas. Da investigación dedúcese que, ao longo da súa actividade, a organización conseguiu tomar o control da rede da práctica totalidade dos bancos de Rusia, extraendo diñeiro duns 50 deles, aqueles que polas súas características e estrutura poderían reportarlles maiores beneficios.
O impacto económico ocasionado coas súas actividades delituosas estímase en máis de 1.000 millóns de dólares. Entre os seus obxectivos figuraban, ademais de bancos rusos, entidades de Bielorrusia, Acerbaixán, Casaquistán, Ucraína e Taiwán. No referido a España, a organización criminal atacou caixeiros do centro de Madrid durante polo menos o primeiro trimestre do ano 2017. Realizaron extraccións por un valor de ao redor de 500.000 euros usando tarxetas asociadas a contas correntes con saldos modificados fraudulentamente e pertencentes a bancos de Rusia e Casaquistán.
Os beneficios da actividade ilícita en forma de grandes cantidades de diñeiro en efectivo eran cambiados a bitcoins en casas de cambio de Rusia e Ucraína. Os bitcoins eran posteriormente transferidos a contas do detido, que chegou a acumular ao redor de 15.000 bitcoins. O detido utilizaba plataformas financeiras en Xibraltar e Reino Unido para cargar tarxetas de prepagamento con esta criptomoeda que podía utilizar en España para a compra de todo tipo de bens e servizos (incluídos vehículos e vivendas). Así mesmo, o detido dispoñía dunha enorme infraestrutura de minado de bitcoins que utilizaría como medio de branqueo.
O altísimo nivel de vida que levaría o detido tanto en Ucraína como en España, xunto con investimentos realizados en infraestrutura cibernética necesaria para executar novos ataques e incrementar os beneficios, ao que hai que sumar perdas millonarias en disputas coa mafia rusa e en plataformas de intercambio de criptodivisa, fai sospeitar que o seu patrimonio actual en moeda virtual diminuiría considerablemente.

Categorías: Ciencia

Os polígonos industriais de Noia, Padrón e Melide gozan de accesos á Rede de até 350 Mbps

códigocero - Lun, 03/26/2018 - 14:10
A mellora dos accesos á Rede dos polígonos é posible grazas a unha liña de axudas da AMTEGA

As máis de 70 empresas localizadas entre o Polígono Industrial Agualevada (Noia), o Polígono Industrial de Cortizo (Padrón) e o Parque Empresarial da Madanela (Melide) contan xa con acceso a Internet de até 350 Mbps. Son tres das 81 das superficies empresariais de toda Galicia que se beneficiarán do Plan de banda larga 2020, impulsado pola Xunta, a través da AMTEGA.
As actuacións do Plan comezaron en agosto 2016 e ao remate de 2017 había xa 22 polígonos da provincia con este servizo de banda larga ultrarrápida. Ao remate de 2018 cumprirase o obxectivo dos 27 previstos no plan, que sumados aos que xa dispoñían deste servizo, suporá que o 98% das superficies empresariais ocupadas da provincia terán acceso a redes de máis de 100 Mbps.
Ademais, como complemento a esta actuación, a AMTEGA abriu en 2017 unha convocatoria de axudas para dotar de redes ultrarrápidas a empresas e autónomos das zonas máis illadas do rural. Destináronse preto de 400.000 euros a subvencionar solucións específicas a máis de 30 empresas que agora dispoñen de velocidades de acceso a internet de entre 50 Mbps e 350 Mbps.

Prazos e orzamento

O Plan xa completou o despregamento en 55 polígonos da Comunidade e este ano chegará a outros 26 máis. Deste xeito, en 2018, un total de 130 polígonos, que concentran case o 93% da superficie empresarial ocupada, disporán de acceso a redes de máis de 100 Mbps.
A AMTEGA subvenciona estes despregamentos cunha axuda de 3,4 millóns de euros, que xerarán un investimento total de 5,2 millóns de euros. Estas subvencións cofináncianse ao 75% polo Fondo Europeo Agrícola de Desenvolvemento Rural (FEADER) no marco do Plan de desenvolvemento rural de Galicia 2014-2020 (PDR).

Categorías: Ciencia

Facebook explica o rexistro de chamadas e SMS que realizan nalgúns smartphones

códigocero - Lun, 03/26/2018 - 13:07
O anuncio de Facebook puido verse en medios como The Observer

O escándalo de Cambridge Analytica mantén os seus ecos, e aínda que a campaña de #deletefacebook parece terse quedado nunha política de xestos, a pasada fin de semana Facebook contratou anuncios a toda páxina en distintos xornais entre os que non faltaban os que destaparon a fenda na confianza da plataforma de Facebook, nos que podía verse unha desculpa asinada por Mark Zuckerberg na que cítanse algunhas das medidas que tomarán de cara ao futuro pero continúan sen explicar os motivos que levaron á compañía a manterse pasiva sobre o tema durante anos e incluso a ameazar con tomar medidas legais contra os medios de comunicación que informaron do asunto.

A sincronización de contactos do móbil a través da aplicación de Messenger detallouse en todo momento

Para botar máis leña ao lume, nos últimos días distintos medios comezaron a denunciar que Facebook estaba a gardar rexistros de chamadas telefónicas e mensaxes de texto na súa aplicación móbil, dando conta do que detectaban distintos usuarios, o que sorprendeu que tomase tal magnitude mediática, xa que era algo do que Facebook sempre deu conta e para o que pedía permiso expresamente.

Explicación oficial

A propia compañía sacou un comunicado para deixar claro o asunto, explicando que tanto nas aplicacións de Messenger e Facebook Lite para Android ofrecen a opción de acceder ás mensaxes e chamadas do teléfono como un xeito de axudar a atopar e manter o contacto cos nosos máis achegados. Ou sexa, que en vez de empregar só a información das relacións a través das aplicacións de Facebook, tamén fíxase nas comunicacións a través da rede telefónica para saber con quen nos relacionamos máis, para aproveitar esa información na personalización da experiencia de uso das aplicacións.

Esta funcionalidade é moi visible cando instalamos o Messenger no noso smartphone, cunha advertencia a pantalla completa, na que convídanos a dar permiso á aplicación para acceder aos contactos do móbil, estando na man do usuario elixir se dar ou non autorización, e podendo desactivarse en calquera momento.

Dende Facebook insisten en que esta información colleitada non inclúe os contidos de chamadas e mensaxes, almacénase de xeito seguro e non se vende a terceiros, deixando en todo momento o control ao usuario.

Categorías: Ciencia

Unha baliza no seu vehículo tería facilitado a detención de Puigdemont

códigocero - Lun, 03/26/2018 - 11:00

A xornada de onte estivo protagonizada pola detención en Alemaña de Carles Puigdemont como parte dunha operación de servizos secretos, pero este seguimento do expresidente de Cataluña tivo unha importante compoñente tecnolóxica segundo desvelou laSexta Noticias, que asegura que foi posible grazas á colocación dunha baliza no seu automóbil con matrícula belga e no sinal do seu móbil.
A detención realizouse grazas á cooperación entre a Oficina Federal de Investigación Criminal de Alemaña (BKA) e a Policía Nacional española en coordinación co CNI, como reacción á reactivación da orde europea de detención e entrega contra Puidgemont, fuxido da Xustiza.
Segundo comentan, o Renault Espace con matrícula belga no que se desprazaba o expresidente catalán levaba unha baliza que facilitaba a súa posición e movementos de xeito constante, o que permitiu ás forzas de seguridade a elección do momento máis axeitado para efectuar a detención de cara a unha previsible repatriación a España. Ao parecer o teléfono de Puigdemont tamén tería sido un elemento chave para a súa localización (entendemos que para establecer unha vinculación entre Puigdemont e a baliza no vehículo).

Categorías: Ciencia

O Portal de Transparencia dos concellos, finalista nos Premios CNIS

códigocero - Lun, 03/26/2018 - 10:26
Intre da presentación do portal, celebrada a comezos deste mes de marzo

O proxecto para crear o Portal de Transparencia dos nosos concellos vén de obter un importante recoñecemento. Máis polo miúdo, foi seleccionado como finalista nos Premios CNIS (Congreso Nacional de Innovación e Servizos Públicos) 2018, na categoría Colaboración Universidade e Administración Pública. Como lembraremos, o proxecto vén da man do Goberno galego, a FEGAMP (Federación Galega de Municipios e Provincias) e a Universidade de Vigo. Ten a súa orixe en 2016, coa sinatura do convenio entre as tres ditas partes, que tiñan o obxectivo común de de acadar a máxima fiabilidade posíbel na información xerada polos concellos, achegando recursos dixitais para garantir a correspondencia entre o que fan as administracións locais e o que informan.
A plataforma, segundo puidemos saber recentemente, activarase en breve contando coa presenza activa dunha trintena de concellos. O prognóstico é que de maneira progresiva poidan embarcarse no proxecto máis administracións locais. Nun plano máis concreto, o portal diríxese a fornecer á cidadanía de información pormenorizada sobre o funcionamento das administracións locais da nosa terra, “desde as declaracións de bens dos alcaldes e concelleiros, até información sobre as subvencións, seguimento das tramitacións en liña, etc”.
Detrás do seu desenvolvemento, por parte da Universidade de Vigo, atópase a Rede Localis, unha equipa de traballo formada por docentes e investigadores universitarios e profesionais que traballan no ámbito local e que está xestionada polo grupo de investigación Gen da dita institución académica galega.

Categorías: Ciencia

Páxinas

Subscribirse a IGACIENCIA agregador - Ciencia