códigocero

Subscribirse a Orixe códigocero
Información sobre novas tecnoloxías en Galicia e en galego.
Actualizado: fai 58 min 9 seg

Nedgia Galicia lanza aplicación para facilitarnos a lectura do consumo de gas

Mar, 04/17/2018 - 18:30

Nedgia Galicia, a distribuidora do grupo Gas Natural Fenosa que opera na nosa terra, vén de poñer a a disposición dos seus usuarios unha ferramenta móbil que lles fai máis doada a interpretación dos datos xerado polo seu consumo. Trátase da aplicación YoLeoGas, dirixida a facilitar o proceso de lectura de contador do gas, de maneira sinxela e simple a través do móbil ou tableta do usuario.
Segundo explica a dita empresa, trátase dunha iniciativa compartida polas principais distribuidoras de gas no ámbito estatal, a devandita Nedgia, Redexis Gas, Madrileña Rede de Gas e Nortegas. O desenvolvemento da app responde, de feito, ao seu compromiso común a prol dunha maior eficiencia nos procesos e dun mellor servizo aos usuarios a través da dixitalización.
Para tirarlle proveito, o cliente ten que rexistrar o número do CUPS (Código Unificado de Punto de Subministración que figura na factura emitida polo comercializador) na aplicación e facer unha foto ao equipo de medida. Logo, a ferramenta avisa ao cliente se a foto é correcta e envíaa aos sistemas informáticos da distribuidora correspondente, que é quen de procesala de maneira automática.
Entre as opcións que ofrece este novo e innovador recurso móbil atópase a configuración de notificacións para que recibamos un aviso en canto haxa que realizar a lectura do contador. Ademais, a aplicación mostra o histórico de lecturas para que poidamos facer seguimento do consumo.
A aplicación, que está xa dispoñíbel para dispositivos iOS e con Android, está ao alcance da man de todos os usuarios de gas canalizado de España das distribuidoras promotoras da aplicación, así como por todas as comercializadoras existentes, que poderán así recibir de forma en liña a información de consumo de cada punto de subministración.

Categorías: Ciencia

As Xornadas Empresariais de Bergantiños incidirán en como dixitalizarnos e como sacarlle partido

Mar, 04/17/2018 - 16:00

É posíbel concibir hoxe en día un encontro empresarial e de emprendemento sen abranguer as posibilidades das novas tecnoloxías da información? A resposta é de maneira categórica “non”, e así o entenden os organizadores das terceiras Xornadas Empresariais de Bergantiños, que se van celebrar no Fórum de Carballo nas tardes dos días 10, 22 e 29 de maio, e que van incluír no seu programa un bloque adicado en exclusiva ás posibilidades da dixitalización empresarial e aos mellores xeitos dos que dispoñemos para acadala. O epígrafe das xuntanzas fala por si só dos seus obxectivos: Adaptarse para competir con éxito cando todo cambia.
Nun plano máis xenérico, as xornadas contarán coa presenza de catro empresarios da comarca de Bergantiños, un economista, dous enxeñeiros, un avogado, un notario, o director rexional de ICEX, o conselleiro económico comercial da Embaixada de España en Santiago de Chile e o propio alcalde de Carballo, Evencio Ferrero, para sensibilizar e orientar sobre os atrancos do emprendemento, o reducido tamaño de boa parte das PEME, as dificultades para acceder ao crédito e os requirimentos para buscar o afianzamento noutros mercados.
As xornadas, que son de balde (previa inscrición en liña), están dirixidas a empresarios, directivos de PEME e empresas familiares, emprendedores, sucesores, autónomos, profesores de Formación Profesional e dirixentes de asociacións. Na organización atópase a consultora Eurogabinete coa colaboración do Concello de Carballo, o ICEX e a Asociación Castaño y Nogal.
O programa inclúe seis relatorios de cualificados expertos, unha mesa redonda e coloquios cos asistentes ao final das xornadas.
Na primeira xornada abordaranse cuestións como a xestión dos recursos humanos, o talento e o liderado empresarial. Tamén haberá unha mesa redonda sobre modernización de empresas e exemplos de emprendemento de éxito local na que participan tres empresarios da comarca e o director do Centro Efa-Fonteboa. Ver programa.
A segunda xornada centrarase na innovación tecnolóxica, no deseño de procesos, na presentación de produtos e na mercadotecnia e a venda dixital (en liña), amais de incidir na comunicación comercial e na presenza en Internet con perfil propio e diferenciado en páxinas web e pasarelas de pagos. Estes temas serán avaliados por Thais Pérez e Diego Fraga, enxeñeiros da Universidade de Vigo. Pechará a xornada o letrado director das xornadas, Antonio Álvarez, cun relatorio sobre Riscos e condicionantes da consolidación e supervivencia empresarial.
Na terceira xornada abordaranse a internacionalización das empresas españolas e a cuestión da substitución xeracional na empresa familiar.

Categorías: Ciencia

Francia prepara unha alternativa a WhatsApp e Telegram

Mar, 04/17/2018 - 14:06

O uso de aplicacións de mensaxería instantánea por parte de políticos e altos funcionarios está a considerarse toda unha ameaza para a seguridade por parte de distintos gobernos, e como reacción temos agora que o goberno de Francia decidiu desenvolver o seu propio servizo de mensaxería cifrada ante o temor de padecer espionaxe de gobernos estranxeiro e, moi especialmente, ante a desconfianza sobre a seguridade das ferramentas actuais de compañías como Facebook (propietaria de WhatsApp), que nas últimas semanas está a demostrar o pouco coidado que ten cos datos dos seus usuarios.
Emmanuel Macron é un usuaio activo de Telegram, pero tanto esta ferramenta como WhatsApp operan dende fóra de Francia, polo que o risco de que haxa filtracións de datos sobre os que non poidan ter control é moi elevado, de aí que agora estean xa a probar a nova aplicación de mensaxería instantánea entre 20 altos cargos gobernamentais, coa intención de converter esta ferramenta en obrigatoria para todo o goberno francés a partires do vindeiro verán.
A voceira do goberno francés asegura que precisan «atopar un xeito de ter un servizo de mensaxería cifrada que non estea cifrado polos EE.UU. ou Rusia» engadindo que o risco de filtracións é demasiado preocupante como para non tomar medidas.
A aplicación de mensaxería que están a desenvolver parece estar baseada en código aberto, e tamén abriríase a todos os cidadáns, aínda que polo momento non dan detalles sobre esta nova plataforma.

Categorías: Ciencia

Investigadores do CITIC organizan introducen ao noso alumnado na computación cuántica

Mar, 04/17/2018 - 12:02

Investigadores da área de Arquitectura de Computadores, Sensórica e Comunicacións do CITIC, en colaboración coa Facultade de Informática da Universidade da Coruña (FIC) organizan hoxe unha interesante actividade formativa sobre as posibilidades que se abren coa confluencia entre a informática cuántica e as novas tendencias en intelixencia artificial e Machine Learning (máquinas con capacidade de aprender conceptos e tomar decisións). O curso Introdución á programación en Computación Cuántica ten como obxectivo presentar os conceptos básicos da programación dos computadores cuánticos empregando ferramentas gráficas e Python.
A actividade está dirixida tanto a investigadores do CITIC e da Facultade de Informática, como a estudantes da FIC, poñendo o foco en estudantes matriculadas/os nos dous últimos cursos de grao ou másteres. O curso celébrase como dixemos este 17 de abril a partir das 10 horas e estará impartido polo responsábel do departamento de Aplicacións e Proxectos do Centro de Supercomputación de Galicia (CESGA), Andrés Gómez. Doutor en Ciencias Físicas pola Universidade de Santiago, Gómez conta con máis de 25 anos de experiencia no sector das Tecnoloxías da Información e as Comunicacións (TIC) e é autor de máis de 60 publicacións científicas. A día de hoxe adica parte da súa actividade ás tecnoloxías de Machine Learning e de computación cuántica, sobre todo aplicadas ás áreas científicas e industriais.

Categorías: Ciencia

La Casa de Papel é a produción de fala non inglesa máis vista na historia de Netflix

Mar, 04/17/2018 - 11:52
La Casa de Papel foi un dos grandes éxitos en Netflix no último trimestre

Netflix vén de publicar os seus resultados financeiros correspondentes ao primeiro trimestre do ano, salientado que chegou aos 125 millóns de subscritores que xeraron uns ingresos de 3.602 millóns de dólares no seu servizo de streaming, cun detalle moi salientable: os ingresos de fóra dos EE.UU. están xa no 49,47%, polo que prevén que no vindeiro trimestre o volume de negocio local véxase superado polo internacional.
A compañía tamén confirma que ten previsto gastar entre 7.500 e 8.000 millóns de dólares ao ano en contidos en numerosos formatos e idiomas, buscando así contentar á diversidade do público que está a aglutinar a plataforma de vídeo baixo demanda de referencia a nivel mundial. Dende Netflix destacan que continúan a incrementar a súa aposta por producións orixinais en falas distintas do inglés, como Túnel de Corrupción (serie do creador de Narcos que narra a investigación dunha trama de corrupción gobernamental no Brasil, conseguindo magníficas audiencias no país).
Tamén salientan que La Casa de Papel (produción para Antena 3 que converteuse nun fenómeno internacional ao integrarse na oferta de Netflix) conseguiu neste último trimestre converterse na serie de fala non inglesa máis vista na historia de Netflix.
Aproveitan a presentación de resultados para celebrar que o documental Icarus, de Bryan Fogel e Dan Cogan, conseguise un Óscar, de xeito que sería o primeiro Premio da Academia en ir parar a un traballo para Netflix.

O actor galego Pedro Alonso é un dos protagonistas de La Casa de Papel
Categorías: Ciencia

Ponteceso e a Festiciencia celebrarán coa rapazada o Día da Internet

Mar, 04/17/2018 - 11:49

Ponteceso (a aldea do Couto) vai ser os días vindeiros o principal lugar de encontro da nova comunidade científica e desenvolvedora galega, a formada polas rapazas e rapaces que queren cambiar o mundo para mellor e saben que a clave está no traballo colaborativo, no impulso do talento de cada quen e na confluencia de todo isto coas novas tecnoloxías. A cita será o 17 de maio, que amais de ser o Día das Letras Galegas tamén é o Día de Internet e da Sociedade da Información, unha significativa coincidencia de festividades que sempre nos gusta salientar polas implicacións que achega. Na organización dos actos da Festiciencia 2018 está a Fundación Pondal, que, co apoio da Fundación Española para a Ciencia e a Tecnoloxía (FECYT), prepara unha completa axenda de actividades de divulgación (con ducias de adolescentes mostrando os seus enxeños científicos e tecnolóxicas) que complementan as Festiletras.
Na xornada do 17, entre outras cousas, traballarase arredor da divulgación científica e o desenvolvemento de novas tecnoloxías. O programa provisional inclúe xa unha gravación do programa de radio Efervescencia, unha xeira de traballo colectivo sobre ciencia cidadá, un xeocoaching tecnolóxico, unha sesión de observación de estrelas e máis unha xincana nocturna na que os participantes buscarán elementos da táboa periódica ocultos en diferentes recantos da aldea.
Na xornada do 18 habilitarase unha carpa para dar acubillo aos proxectos dos escolares. A feira terá horario de mañá e de tarde e ficará aberta para público escolar e familiar. Rematará, ao fío das 19.00 horas, coa entrega de premios ás mellores propostas.
Amais de todo o devandito, haberá obradoiros para a rapazada, experimentos científicos, xeiras de programación de robots LEGO e un taller de investigación CSI. Igualmente, está previstas excursións guiadas á praia de Balarés, un café científico e espectáculos variados.
En Festiciencia, amais da Fundación Pondal, a FECYT e os concellos locais, o CSIC, a Deputación da Coruña e a empresa Ceo Aberto.

Categorías: Ciencia

Vitae adéstranos en Vigo perante posíbeis ciberataques á nosa información

Mar, 04/17/2018 - 11:12

Que facer ante un incidente de seguridade TIC? Saberíamos seguir o protocolo establecido ante unha investigación relacionada cun roubo de información? Cales son as medidas máis axeitadas de prevención que podemos aplicar nunha empresa para evitar a perda de datos? Estas e outras preguntas van ter resposta no obradoiro que prepara a consultora Vitae para os meses de maio e xuño: unha actividade formativa que nos adestra e nos prepara para ser bos custodios de tecnoloxías e coñecemento.
Entre outras cousas, ao rematar o curso teremos a capacidade de saber actuar ante incidentes de seguridade en activos TI dende o punto de vista legal e de procedemento, fortalecendo a nosa capacidade para axudar nunha posíbel investigación tecnolóxica por parte das autoridades. A nova edición do curso Protocolos ante Ciberataques e Incidentes en Seguridade TIC vaise celebrar en Vigo os días 25 e 26 de maio e 1 e 2 de xuño. Serán 20 horas de contidos.
Aprenderásenos, como dixemos, a sabermos actuar en caso de incidente TI, os pasos que cómpre dar para facilitar unha solución e encarreirar unha posíbel investigación, distinguir entre incidentes que constitúen delito e os que non, ou poñer en práctica medidas que eviten roubos de información.
Segundo sinala Vitae Consultores, hoxe en día é especialmente relevante para moitos profesionais TI contar cos coñecementos (tecnolóxicos, técnicos, legais, de procedemento) e as habilidades máis avanzadas en materia de protocolos e accións a seguir a prol da ciberseguridade. “Cando os ingresos proveñen de Internet ou das TIC, ou cando os servizos empréstanse pola Rede ou a través das TIC, ou cando na produción industrial utilízanse de maneira importante as novas tecnoloxías da información, as empresas e os organismos están a concienciarse da importancia de asegurar estes activos”, lembra Vitae a propósito da importancia dos contidos do devandito curso para os nosos profesionais. A actividade formativa está dirixida, sobre todo, a administradores de sistemas TI responsábeis da seguridade e a administración de activos informáticos ou a calquera profesional que teña responsabilidade sobre estes activos.
O seminario abranguerá 20 horas de formación en catro xornadas de cinco horas. Os venres o horario será de 16.00 a 21.00 horas e os sábados de 9.00 a 14.00 horas. O lugar elixido para o desenvolvemento do curso é o Centro Social Afundación de ABANCA, na rúa Policarpo Sanz de Vigo. O encargado de impartir os contidos será novamente Gonzalo Sotelo, responsábel do equipo de Investigación Tecnolóxica da Garda Civil de Pontevedra. Sotelo é diplomado en Policía Xudicial pola Universidade Complutense e en Investigación Tecnolóxica pola Garda Civil, Europol e Interpol. É formador en cursos relativos á seguridade informática e a investigación tecnolóxica. A día de hoxe é garda civil e exerce como responsábel do devandito equipo pontevedrés dende a súa creación en 2003.

Categorías: Ciencia

O Porto e a Universidade de Vigo queren fortalecer o sector do mar con novas tecnoloxías

Mar, 04/17/2018 - 09:39

Levar as novas tecnoloxías e as súas vantaxes ao ámbito do mar, e facelo con todas as consecuencias, procurando que o sector da pesca sexa máis rendíbel, sustentábel e eficiente grazas ao afianzamento no seu seo da Industria 4.0. Este é o gran obxectivo do proxecto presentando onte pola Autoridade Portuaria de Vigo, unha iniciativa de formación para as/os profesionais do mar que abrangue obradoiros de capacitación e actualización ante os importantes cambios sociais, ambientais, tecnolóxicos e industriais que se aveciñan. Nesta iniciativa, o Porto de Vigo conta co apoio da Dirección Xeral de Desenvolvemento Pesqueiro, o Campus do Mar (UVigo), Campus de Excelencia Internacional del Mar (Andalucía) e a Autoridade Portuaria de Huelva, xa que as accións se dirixirán a ambas comunidades autónomas. A idea, segundo fixeron saber estas entidades, é apostar polas novas ferramentas para ser máis competitivos.
Na presentación oficial participaron o presidente da APV, Enrique López Veiga; o reitor da Universidade de Vigo, Salustiano Mato; a directora xeral de Desenvolvemento Pesqueiro da Xunta, Susana Rodríguez, e a directora da Autoridade Portuaria, Beatriz Colunga. O responsábel do Porto explicou que a finalidade desta iniciativa é dar resposta ás “principais necesidades" trasladadas polos axentes, principalmente referidas ás Industria 4.0 e as TIC. E engadiu: “Buscamos proporcionar unha oferta formativa de calidade para actualizar os coñecementos do persoal, porque debemos asumir que temos que perder prácticas antigas que xa non se axustan á comercialización moderna”.
O reitor da Universidade, Salustiano Mato, apuntou á formación como “a mellor forma de visualizar que a perda dos traballos que coñecemos pola incidencia das novas tecnoloxías nos anima a ser capaces de anticipar os traballos que veñen”. Mato destacou tamén a importancia da alianza entre o Campus do Mar e o Porto de Vigo que permitiu crear “un ecosistema de innovación que achega contido á estratexia de crecemento azul que abriu un camiño con grandes posibilidades para fabricar futuro”.
Segundo engadiron, as accións formativas serán de balde e desenvolveranse ao longo de 2018 e grazas a elas máis de 165 persoas recibirán formación especializada e máis de 250 asesoramento específico. O programa enfocarase a unha tripla perspectiva: por unha banda, promover a cualificación profesional; por outra, xerar emprego de calidade e unha terceira, potenciar a competitividade da economía marítimo-portuaria dende a sustentabilidade social e ambiental.
O primeiro curso, centrado na Industria 4.0, arrancará o vindeiro 2 de maio e está dirixido a persoal directivo e mandos intermedios con competencias para a toma de decisións e ligados ao sector portuario e pesqueiro. A docencia estenderase ao longo dos meses de maio e xuño co obxectivo de dotar ás persoas participantes de coñecementos, habilidades e ferramentas prácticas baseadas na incorporación das novas tecnoloxías, para a adaptación dos procesos industriais e operativos aos cambios tecnolóxicos, ambientais e normativos. O prazo de inscrición no curso está aberto, o número de prazas é limitado e a matrícula, de balde.

Categorías: Ciencia

LibreTeo lévanos o 28 de abril ao miolo do software libre e da tecnoloxía para compartir

Lun, 04/16/2018 - 22:54

O Concello de Teo (A Coruña) vaise converter novamente, da man do Concello e por terceiro ano consecutivo, no centro de actividade da tecnoloxía sen cancelas, do software libre e colaborativo e das potencialidades deste software para empresas, asociacións, entidades públicas e usuarios de a pé. Estamos a falar da xornada LibreTeo, evento a prol do coñecemento, a cultura e a tecnoloxía libres en calquera das súas moitas manifestacións. A cita será o 28 de abril no Auditorio Municipal Constante Liste e xa están abertas as inscricións nas diferentes mesas e obradoiros. O Concello informou os días pasados que xa está dispoñíbel o programa completo (e a posibilidade de inscribirnos) no sitio web do evento, libreteo.gal. Todas as actividades serán de balde.
Respecto do programa, a organización ten programadas varias accións de gran interese. Por exemplo unha mesa redonda sobre liberdade informativa, en palabras do Concello “unha cita que xuntará destacados profesionais dos medios de comunicación” que tentarán achegar respostas a unha serie de preguntas de actualidade: onde está a liberdade informativa, cales son as consecuencias de querer exercela, é real a presión de grupos económicos ou políticos sobre as empresas xornalísticas ou que son os medios independentes entre outras cuestións. A mesa comezará ás 11:00 horas e contará con Anibal Malvar (xornalista do Diario Público); Belén Regueira (xornalista da Radio Galega); Raquel Ejerique (xornalista de eldiario.es); Adirán Estévez (administrador da Wikipedia-Galipedia); Xurxo Salgado (editor de Galicia Confidencial), Cristina Huete (xornalista de El País) e Manel Pardo (xornalista e director de Lindeiros), como moderador.
Programa
Segundo engade o Goberno local, o programa completo do LibreTeo amosa “a diversidade temática coa que se concibiu este evento anual”. Así, está previsto que unha das actividades mostre o potencial actual do software libre para o ensino, a cargo de Félix Díaz e Benxamín Salgado; e outra tratará sobre xogos pedagóxicos para toda a familia, da man de Francisco Lorenzo. Ademais, Miriam Calvo dirixirá un obradoiro sobre elaboración de bonecos a partir de calcetíns e Iñaki Quenerapú ofrecerá outro sobre o deseño de cartelería utilizando a ferramenta Canva. A Asociación Aberteo falará de seguridade na Rede.
Todas as actividades serán no Auditorio Municipal Constante Liste ou na Casa do Concello, na Ramallosa, como sedes principais. A programación comezará ás 10:00 horas e prolongarase ata o serán.
Conchi García, concelleira de Promoción Económica salientou os días pasados que “o LibreTeo mantén a súa aposta por aspectos coma a liberdade informativa e o traballo colaborativo na busca de coñecemento común como temáticas destacadas". A maiores, engadiu, “tamén nos preocupamos por presentar unha oferta para toda a familia, con obradoiros para a infancia e outros para adultos”.

Categorías: Ciencia

ZTE non poderá empregar procesadores de Qualcomm por mor dunha sanción

Lun, 04/16/2018 - 22:00

A ofensiva do Goberno dos EE.UU. contra os fabricantes chineses de teléfonos móbiles xa non se limita a recomendar evitar a súa compra no territorio norteamericano (e presionar ás compañías de telecomunicacións para frear a expansión destas marcas) senón que agora podería escalar a un nivel inédito entre países nos que hai libre comercio, xa que o Departamento de Comercio dos EE.UU. vén de prohibir ás compañías estadounidenses a exportación dos seus produtos a ZTE, ao parecer, por ter a compañía chinesa enganado ao Goberno dos EE.UU. cando solicitou información sobre a exportación de equipamento de telecomunicacións a Irán e Corea do Norte.
Aínda que a simple vista parecería que tal decisión non tería efecto para ZTE, xa que os seus produtos fabrícanse en China, resulta que o fabricante de procesadores móbiles de referencia, Qualcomm, é norteamericano, ou sexa, que ZTE non podería mercar procesadores Snapdragon por mor do veto estadounidense. Falamos dunha medida que chamaría a revisar o catálogo de smartphones de ZTE dun xeito profundo, xa que actualmente os principais teléfonos de referencia do fabricante chinés están equipados con procesadores de Qualcomm, e só emprega procesadores de MediaTek non seu terminais máis económicos.

Categorías: Ciencia

En febreiro de 2016 e mobilizados baixo o...

Lun, 04/16/2018 - 20:40

En febreiro de 2016 e mobilizados baixo o cancelo #QuedadaCoruña, ducias de usuarios de Twitter congregáronse na Praza de María Pita da Coruña coa finalidade de atoparse cara a cara e, de paso, contribuír cunha causa solidaria ao achegar aos participantes alimentos non perecedoiros para o Banco de Alimentos. O éxito desta convocatoria levou á súa repetición en marzo de 2017, e para consolidar esta celebración temos que vén de convocarse a 3ª Edición #QuedadaCoruña para o 4 de maio ás 20:30 horas na Praza de María Pita.
Unha vez máis, este encontro para desvirtualizar aos tuiteiros coruñeses e favorecer a súa interacción terá unha face solidaria, e ínstase aos asistentes a achegar alimentos non perecedoiros e produtos de necesidade (cueiros, leite de continuación, produtos de hixiene persoa...) que entregaranse á Cociña Económica, á vez que tamén colaborarase con AFACO promovendo o seu proxecto #CaminoPorLaMemoria en redes sociais.

Categorías: Ciencia

Un blogueiro de viaxes e o director de comunicación do Dépor protagonizarán o vindeiro Coruña Bloggers

Lun, 04/16/2018 - 20:10

O vindeiro 25 de abril celebrarase na Fundación Barrié da Coruña a XVII edición do encontro Coruña Bloggers, que desta volta terá lugar nunha sala do primeiro andar do insigne edificio herculino, o que supón unha limitación de aforo, de xeito que os interesados en acudir a esta cita que comezará ás 19:30 horas deberán bulir para facerse cunha das 100 invitacións que estarán dispoñibles. Como en anteriores ocasións, prégase aos asistentes que acudan cun mínimo de 1 quilogramo de alimentos non perecedoiros que entregaranse á Cociña Económica local.
O primeiro relator da xornada será o blogueiro de viaxes Luís Gago, de Destino Ikigai, quen percorre o mundo como fotógrafo de viaxes dende hai 6 anos, e explicará aos asistentes como financiar unha viaxe grazas a un blog, explicando como é posible reducir o maior gasto que supón viaxar (o aloxamento) grazas a colaboracións con empresas. Gago pretende desbotar certos mitos sobre os contidos patrocinados nun blog, asegurando que en poucas semanas é posible obter rendibilidade dun blog e pasar a vivir como un nómade dixital.
Tamén participará no encontro o director de comunicación do R.C. Deportivo de A Coruña, Gabriel Barrós, quen afondará nas posibilidades do contorno dixital na difusión dos valores de marca e nas relacións cos seareiros e con outras marcas. Tamén abordará a importancia dos sinais de identidade de seu na comunicación como elemento diferenciador coa competencia e como ligazón cos afeccionados.

Categorías: Ciencia

A nosa vindeira comunidade científico-tecnolóxica xúntase esta semana en Santiago

Lun, 04/16/2018 - 19:00

Este 20 de abril, sexta feira, o Pazo de Congresos e Exposicións de Galicia (Santiago) vai acoller unha feira educativa centrada no ámbito da divulgación científico-tecnolóxica, ou sexa, en todos os recursos que os docentes e as familias poden aplicar para as nenas e os nenos atopen a investigadora ou a desenvolvedora que todas/os levan dentro. Estamos a falar da feira STEMlab Galicia que, segundo apuntan os seus organizadores, será o meirande evento educativo da nosa terra para centros educativos.
Na cita, entre outras cousas, amosarase o labor divulgador e “fomenta-vocacións” dunha manchea de centros galegos, todos eles co nexo común de traballar a prol da ciencia, a enxeñaría, as tecnoloxías e as matemáticas, pero sobre todo a prol de lembrarlle a toda a rapazada da nosa terra o seu inmenso potencial STEM (polas súas siglas en inglés Science, Technology, Engineering and Mathematic).
A feira insírese na estratexia Edudixital 2020 da Consellería de Cultura e Educación. Esta estratexia diríxese á formación no pensamento computacional, o desenvolvemento de competencias STEM e a resolución de problemas desde a perspectiva maker (xuntando coñecemento técnico, creatividade e innovación). En termos máis concretos, o que se busca a través deste programa é conseguir que todo o noso alumnado teña formación en ámbitos como a robótica ou a programación. De aí que ao seu abeiro se puxeran en marcha materias de libre configuración autonómica ligadas ao eido STEM, clubs de ciencia, campamentos ou (a maiores) a feira deste 20 de abril. En breve impulsaranse tamén espazos Maker ou o Bacharelato de Excelencia en Ciencias e tecnoloxía.

Categorías: Ciencia

Os empregados da Administración galega recibirán formación avanzada en protección de datos

Lun, 04/16/2018 - 17:30

O Goberno galego, a través tres departamentos (a Axencia para a Modernización Tecnolóxica de Galicia, Vicepresidencia, a EGAP e a Consellería de Presidencia) vén de pór en marcha un programa de formación para dotar de recursos e capacitación TIC aos empregaa, facendo fincapé en cuestións relacionadas coa privacidade e a protección dos datos. Segundo fixo saber o Executivo, esta liña de actualización e fortalecemento dos coñecementos dixitais é o complemento formativo do proceso de dixitalización do que está a ser obxecto a Xunta.
O plan, explicou AMTEGA, brindará este ano máis de 1.200 horas de formación en 55 cursos presenciais e en liña. Os temas a tratar serán múltiples e variados, aínda todos serán (en boa medida) diferentes facianas dun proceso común: o proceso de dixitalización.
Deste xeito, formarase aos empregados públicos en cuestións como a tramitación electrónica integral, as optimizacións dos rexistros ou o uso dos novos sistemas de información como os de notificación electrónica, o de rexistro único ou a plataforma Pasaxe!, entre outros.
Segundo explica AMTEGA, estas achegas formativas tamén responden a un desafío concreto: a necesidade de actualizar os nosos coñecementos sobre os detalles que pon en xogo a entrada en vigor do Regulamento Xeral de Protección de Datos, o vindeiro 25 de maio. Este novo marco legal “implica un importante impacto nas administracións públicas, polo que parte da formación do Plan está orientada a formar e divulgar as novidades desta normativa”, informa AMTEGA.
A Vicepresidencia, Consellería de Presidencia, Administracións Públicas e Xustiza, a Axencia para a Modernización Tecnolóxica de Galicia (AMTEGA) e a Escola Galega de Administración Pública (EGAP) asinaron un convenio de colaboración para o desenvolvemento deste Plan durante 2018. En virtude deste acordo a axencia facilitará os perfís docentes e o material didáctico desta oferta formativa e a EGAP, pola súa banda, publicará no DOG e na súa web as diferentes convocatorias de cursos e actividades e os prazos de matrícula correspondentes.

Categorías: Ciencia

A Deputación de Pontevedra e a blogueira Fiona Ferrer promoven a provincia no mundo

Lun, 04/16/2018 - 14:00

Esta fin de semana desenvolveuse unha nova actividade blogueiro-viaxeira da Deputación de Pontevedra para promover nas redes e no mundo os atractivos da provincia. A iniciativa estivo protagonizada pola comunicadora dixital Fiona Ferrer, que percorreu (con formato blogtrip) o destino Rías Baixas e os seus innumerábeis puntos de interese turísticos, paisaxísticos, hoteleiros, gastronómicos e arquitectónicos. O obxectivo da actividade foi contribuír a “converter o destino Pontevedra provincia nun lugar de excelencia, de calidade, único e exclusivo como marcan as liñas do Plan estratéxico de turismo”, segundo explicou a semana pasada a presidenta da Deputación, Carmela Silva, con motivo da presentación do itinerario.
Para darlle forma á experiencia, durante as pasadas semanas a Deputación de Pontevedra levou a cabo unha planificación da viaxe da blogueira Fiona Ferrer, seleccionada por American Express para coñecer a contorna provincial. Xa a mediados de abril, Ferrer encargouse de compartir a través das súas redes sociais información do destino e o seu enfoque da viaxe, que lle serviu finalmente para coñecer Tui (afondando no patrimonio cultural e realizando unha ruta de shopping), Baiona (co obxecto de descubrir a riqueza natural do concello e como relaxarse nas Rías Baixas), Sanxenxo, O Grove, a Illa da Toxa, Cambados (vila na que realizou unha ruta cultural e gastronómica) ou Cuntis (onde se aloxou nun establecemento de turismo rural). A última xornada do blogtrip de Fiona Ferrer celebrarase hoxe, 16 de abril, cunha visita a Lalín para percorrer o pazo de Liñares e Castrodeza e descubrir, así, o patrimonio arqueolóxico e o gastronómico a través dunha degustación de cocido.

Categorías: Ciencia

Juan Viaño aposta polo talento feminino e pola transformación dixital na USC

Lun, 04/16/2018 - 13:23

O actual reitor da Universidade de Santiago, Juan Viaño, presentou a semana o seu programa electoral, un roteiro de accións e obxectivos que aposta forte pola transformación dixital da institución académica. Os detalles do programa foron dados a coñecer polo propio Viaño, quen salientou tamén a importante presenza de mulleres na candidatura da súa equipa, formada na súa maior parte por mulleres (segundo fixo saber, a primeira vez que acontece isto na historia da USC).
Segundo engadiu, o programa está formado por dúas partes. Na primeira avalíase en detalle a misión e a visión da USC como “univers idade pública de calidade”, poñendo o foco na oferta docente, na investigación, na transferencia de tecnoloxías e no espallamento da universidade alén da nosa terra.
Na segunda parte, debúllanse os cambios que debe acometer a USC para “afrontar con éxito o futuro e seguir sendo unha referencia”. A equipa de Viaño, neste senso, avoga por metodoloxías diferentes na xestión dos membros da comunidade dos campus, pola aposta polo talento e por refacer a organización da USC, “unha adaptación da cultura institucional para atender de aneira axeitada ás demandas da sociedade dixital”. Segundo fixo saber, a USC “sabe adaptarse aos cambios porque o leva facendo máis de 500 anos, e agora é o intre de asumir un novo xeito de facer as cousas”.

Categorías: Ciencia

A Biblioteca Ánxel Casal de Santiago inicia un servizo de préstamo de tabletas

Lun, 04/16/2018 - 13:00
Fachada da Biblioteca Pública Ánxel Casal de Santiago

A partir deste 16 de abril, segunda feira, os usuarios da Biblioteca Pública de Santiago Ánxel Casal van ter a posibilidade de empregar nas salas de lectura unha tableta co fin de ler libros electrónicos, facer traballos, navegar por Internet, estudar ou mesmo xogar. Os requirimentos que se esixen son (entre outros) os seguintes: que quen pide o dispositivo en préstamo sexa maior de 18 anos, que non se use ou grave software ilegal e que non se acceda a contidos pornográficos, violentos ou xenófobos.
O préstamo das tabletas realizarase no mostrador de información do andar baixo e os trebellos só de poderán empregar dentro do edificio da biblioteca, sendo o prazo máximo para darlles uso dun día (deberá devolverse no dito mostrador sempre unha hora antes do peche do centro).
Polo que se refire á ficha técnica dos dispositivos, trátase de modelos Samsung Galaxy Tab 3 cunha
pantalla de 10 polgadas, procesador dual-core de 1.6GHz, 1 GB de RAM, 16 GB de almacenamento, cámara traseira de 3 MB, cámara frontal de 1.3 MB e acceso Wi-Fi. Funcionan baixo sistema operativo Android 4.4.2. e préstanse coa configuración de fábrica. Instala só aplicacións móbiles da Play Store.

Categorías: Ciencia

En marcha unha comunidade formada arredor das máquinas virtuais Java, CoruñaJUG

Lun, 04/16/2018 - 12:39

A nosa terra conta cunha nova comunidade técnica que ten como obxectivo facer colaboración e xuntar forzas arredor das linguaxes que se executan na JVM, as siglas que en inglés designan á Máquina Virtual de Java, que engloba linguaxes como Java, Groovy, Scala ou Kotlin, entre outros, e que teñen a característica común de impulsar aplicacións avanzadas que simulan ser unha computadora (co seu conxunto propio de instrucións, o seu manexo de memoria de seu, o seu propio hardware).
Entre as vantaxes principais do concepto JVM figuran a carrexabilidade do software, meirandes facilidades no manexo de programas, creación e dispoñibilidade de grandes e completas librarías, etc.
A nova comunidade técnica chámase CoruñaJUG e busca compartir experiencias e coñecemento arredor de JVM. Ten o apoio do Concello a través de Coruña Dixital, que facilitar que os integrantes do colectivo dispoñan do espazo Accede Papagaio para as súas actividades.
Estas actividades, nun principio, serán citas con periodicidade mensual a xeito de meetups, a celebrar o terceiro mércores de cada mes. As xuntanzas ábrense este 18 de abril cunha primeira sesión dedicada a Elastic stack: desde obtención e datos ata visualización e análise. Ademais, este mes tamén hai prevista unha segunda sesión, neste caso virtual, o día 28, que tamén conta xa co seu meetup.
Segundo lembran dende Coruña Dixital, CoruñaJUG dispón dun slack ao que podemos acceder en liña, así como unha páxina en Meetup e unha conta no Twitter dende a que podemos estar a tanto das súas actividades.

Categorías: Ciencia

Netflix para Windows 10 permite ver vídeo nunha fiestra flotante

Lun, 04/16/2018 - 10:30

A aplicación de Netflix para Windows 10 vén de recibir unha actualización cunha atractiva novidade: a posibilidade de reproducir os seus contidos nunha fiestra de tamaño reducido que flote sobre o resto de aplicacións abertas. Deste xeito, os usuarios desta plataforma de streaming poden reproducir películas e series de televisión no seu ordenador mentres traballan, manténdose sempre o vídeo en pantalla e facilitando así o consumo audiovisual mentres se realizan outras tarefas.
Esta funcionalidade da aplicación de Netflix o que fai realmente é tirar proveito dunha nova prestación da grande actualización de Windows 10 do pasado outono, na que se introduce a posibilidade de que as aplicacións empreguen fiestras flotantes para a reprodución de vídeo, á vez que permiten uns controis básicos visibles. Até o momento Películas y TV era unha das poucas aplicacións para Windows 10 que aproveitaba esta posibilidade do sistema, e o feito de que Netflix optase por facer tal agora é unha magnífica nova para os usuarios que agora, aparte do botón para ver os vídeos a pantalla completa teñen tamén outro botón para gozar dos contidos nunha pequena xanela flotante.

Categorías: Ciencia

O xoves comeza unha nova edición da iniciativa de capacitación dixital Ao lado dos nosos maiores

Lun, 04/16/2018 - 08:00

A AMTEGA e operador de telecomunicacións Orange organizan un ano máis a iniciativa Ao lado dos nosos maiores, un ciclo formativo sobre o uso de dispositivos móbiles, un total de 17 obradoiros prácticos e de balde de dúas sesións de dúas horas de duración, que se realizarán de xeito presencial entre o xoves 19 de abril e o mércores 27 de xuño en diversas localidades da Rede de aulas CeMIT de Galicia.
O obxectivo principal desta actividade, impartida por persoal de Orange en calidade de aliado dixital, é ensinar aos participantes as pautas básicas do funcionamento das tabletas e móbiles así como solucionar as dúbidas que poidan ter para facer a súa experiencia máis doada, que adquiran maior autonomía persoal e que se familiaricen coa tecnoloxía móbil.
Durante as 4 horas de actividade ensinarase a enviar fotos, vídeos e mensaxes por WhatsApp, gardar contactos, facer chamadas, acceder e navegar por Internet e resolver todas aquelas dúbidas que lles poidan xurdir no uso do teléfono e/ou tableta.
Para asistir á actividade non é necesario ser cliente de Orange. É preferible que os participantes leven cadanseu terminal para acadar un maior aproveitamento do obradoiro e no caso de que algún dos asistentes non acuda cun dispositivo móbil, os formadores disporán de 2 tabletas e 2 smartphones dispoñibles para o seu préstamo.

Relación de centros da Rede CeMIT nos que se desenvolven os obradoiros
Categorías: Ciencia

Páxinas