códigocero

Subscribirse a Orixe códigocero
Información sobre novas tecnoloxías en Galicia e en galego.
Actualizado: fai 4 min 6 seg

Netflix podería integrarse en Movistar+ nos vindeiros meses

Lun, 01/29/2018 - 10:31

A chegada de grandes plataformas de vídeo baixo demanda como Netflix a España estivo rodeada de certa polémica, ante o diferente xeito de reaccionar dos distintos operadores, e ao igual que Vodafone converteuse nun socio prioritario para Netflix, facilitando a súa contratación e favorecendo a calidade das conexións co servizo, Movistar fixo todo o contrario, chegando Netflix a culpar á compañía dos problemas coa recepción do vídeo baixo demanda que tiñan os seus clientes. Cando HBO púxose a seguir os pasos de Netflix, a reacción foi a mesma, e Vodafone volveu asociarse coa compañía de vídeo á carta, de xeito que actualmente a través de Vodafone TV é posible ver directamente tanto Netflix como HBO, mentres que Movistar daba a impresión de pór atrancos para que os seus clientes optasen pola súa oferta de vídeo.
A situación actual parece que vai camiño de mudar, e aseguran que Telefónica España e Netflix están a ultimar un acordo que anunciaríase a finais de febreiro e que permitiría que os clientes do operador puidesen recibir os contidos de Netflix a través de Movistar+.
Ao parecer xa terían pechado un principio de acordo, pero o que faltaría por negociar serían os matices contractuais e os prezos. Debido ás complexidades da integración, non se espera que Netflix estea dentro de Movistar+ até despois do verán.
Estímase que Netflix en España chega ao 7,3% dos fogares con acceso á Internet, o que serían uns 1.163.000 clientes, mentres que Movistar+ chegaría ao 12,6% e a HBO ao 2,6%, descoñecéndose os datos reais dado que as compañías non achegan tal información, que pode verse moi distorsionada pola contratación de períodos de proba e polas promocións asociadas a distintos operadores.

Categorías: Ciencia

A galega Docuten leva os seus servizos dixitais a Europa

Ven, 01/26/2018 - 22:51

Docuten, a marca da firma galega Enxendra Technologies, vén de dar o chimpo cara ao mercado internacional. E faino logo da súa salientábel andaina no mercado español, achegando servizos TIC avanzados a compañías do talle de Desigual ou o Grupo Planeta. Segundo puidemos saber, a firma Docuten estreou presenza en Reino Unido, Alemaña, Francia e Polonia, que son os primeiros países nos que ofertará os seus servizos dixitais. Docuten, que quere a actividade internacional supoña o terzo da súa facturación ao cabo de tres anos, desenvolverá o seu labor cos socios locais nos ditos mercados.
A finalidade da empresa coruñesa é crear unha marca afianzada que fortaleza o traballo realizado nestes anos (dende os comezos en 2009) e continuar o seu proceso de espallamento. Tamén anunciou que en datas vindeiras lanzará ao mercado un servizo que integra facturación e sinatura electrónica. Ao abeiro desta fase de expansión internacional, Docuten ten o obxectivo de integrarse no proxecto PEPPOL (Pan-European Public Procurement Online) un estándar europeo cunha plataforma de seu destinada a garantir a total interoperabilidade entre servizos electrónicos de aprovisionamento e facturación (e-Invoicing). A compañía pechou 2017 duplicando a facturación do ano anterior.
Que é Docuten?
Docuten, en palabras dos seus impulsores, é a primeira plataforma que agrupa o servizo de facturación electrónica, sinatura dixital e xestión en liña de toda a documentación dunha entidade. Ademais, na parte que inclúe a facturación electrónica, Docuten intégrase cos puntos xerais de entrada de facturas nas administracións públicas españolas máis importantes, permitindo o envío no formato Facturae. Por outra banda, o servizo de sinatura dixital permite asinar contratos e outros documentos con pleno valor legal a través da web e do móbil.

Categorías: Ciencia

O sorteo telemático de Merca e Gaña na provincia Lugo saldouse con 40 gañadores

Ven, 01/26/2018 - 22:51

Este venres, na sede do Cárcere Vello de Lugo, entregáronse os galardóns da campaña Merca e Gaña polo Nadal, que puxo en marcha a Deputación provincial coa colaboración da Federación e do Concello, no caso da capital, co obxectivo de incentivar as compras nos 5.500 establecementos que hai en todos os municipios lucenses durante as devanditas datas. No acto fíxose saber (entre outras cousas) que a campaña acadou uns beneficios de 1,6 millóns de euros, que son o valor das 27.000 compras rexistradas. Ademais, lembrouse que os tíckets das mesmas participaron nun sorteo por Internet (a través da web www.nadalmercaegana.com) do que resultaron 40 gañadores de 20 tarxetas regalo de 300 euros e outras 20 de 200.
Na cita de hoxe, os premiados recolleron os seus agasallos, dun total de 10.000 euros, que poderán destinar a máis compras no comercio local da provincia. Asemade, proxectáronse os vídeos de promoción dos establecementos lucenses feitos pola Fundación TIC e pendurados nas redes.
No evento participaron o deputado de Relacións Institucionais, Álvaro Santos Ramos, a alcaldesa de Lugo, Lara Méndez López, e o presidente da Federación de Comercio de Lugo, José María Seijas López.
O sorteo dos galardóns de 10.000 euros de Merca e Gaña polo Nadal fíxose ante notario, incluíndo no mesmo os 27.000 tíckets con compras de 1,6 millóns de euros. Os veciños que resultaron gañadores son os seguintes:
- Recibiron tarxetas de 300 euros: Rosario García Maseda, de Vilalba; Ana Pernas Cendán, de Vilalba; Marta López Rodríguez, de Lugo; Begoña López Silva, de Lugo; Amador Pardo, de Lugo; Isolina Rodríguez López, de Lugo; María Manteiga Valle, de Rábade; Jennifer Quiroga Cela, de Sarria; Ángel Gorgoso Belda, de Lugo; María Eugenia Fernández Touzón, de Lugo; Ángela Rincón Rodríguez, de Sarria; José Ramón Irimia Souto, de Lourenzá; Fabio Jato Alonso, de Lugo; María Carmen Rivas Rodríguez, de Foz; Montse López, de Sarria; Mª del Carmen González González, de Covas en Viveiro; Silvia Dopazo Fernández, de Lugo; María Teresa Fernández Luaces, de Monforte; Germán Ramírez, de Chantada; María Fernández Torneiro, de Lugo.
- Recibiron tarxetas de 200 euros: Patricia Vázquez Pena, de Viveiro; Pilar Arias Goyanes, de Sarria; Nerea Diéguez Porto, de Taboada; M. Nieves Cando López, de Burela; Cristina Fraga Novo, de Foz; Daniel Río Trigo, de Foz; Beatriz Irigoyen Vázquez, de Ribadeo; Susana Corbelle Gómez, de Lugo; Ana de Castro Rego, de Ribadeo; Cristina Otero Sanmiguel, de Guitiriz; Sonia Fernández Longarela, de Mondoñedo; Yasmina Díaz Rodríguez, de Sarria; Tamara Gayoso Felpeto, de Vilalba; Yolanda Lara Cruz, de Lugo; Miguel Ángel Doel Arias, de Lugo; Yolanda Maciñeiras Soengas, de Monforte; Dolores Nieto Milla, de Lugo; Anita Pérez Santín, de Becerreá; Antonio Souto Prieto, de Vilalba; e Marcos Cambeiro Vázquez, de Lugo.
Concurso de Escaparates de Nadal
Durante a entrega destes premios, tamén se coñeceron os 3 gañadores do Concurso de Escaparates de Nadal, co que se busca pór en valor o traballo dos profesionais do sector do comercio. Participaron 23 establecementos da capital lucense, pois esta iniciativa partiu do Concello de Lugo e da Federación. Os galardoados son Confecciones García, Óptica de la Torre e Peletería Lucus.
Colaboración da TIC da Deputación
Durante o acto, como dixemos, proxectáronse os vídeos de promoción sobre os establecementos da provincia que elaborou a Fundación TIC da Deputación co obxectivo de “incentivar as compras no comercio local da provincia”. Segundo engadiu Darío Campos, a devandita foi unha iniciativa máis da campaña Merca e Gaña polo Nadal. Esta desenvolveuse dende o 6 de decembro ao 6 de xaneiro. Durante este período, todas as persoas que mercaron en calquera dos establecementos da provincia rexistraron (eles mesmo ou coa axuda dos comerciantes) os seus tícket de compra, que foron un total de 27.000, na páxina web específica www.nadalmercaegana.com. Todos eles formaron parte do sorte dos premios de 10.000 euros entregados hoxe.

Categorías: Ciencia

Movistar subirá en 3 euros a súa tarifa Fusión #0

Ven, 01/26/2018 - 21:58

Continúan as subas de prezo de Movistar para comezar o ano con malas novas para os petos dos consumidores, e tras saberse do incremento das tarifas móbiles e o converxentes, unha das tarifas que quedara fóra das subas, a Movistar Fusión #0, finalmente verá incrementado o seu prezo mensual en 3 euros, o que contrasta por tratarse dunha oferta de baixo custo que sitúa ao operador nunha peor situación fronte aos seus competidores máis directos.
Actualmente Movistar Fusión #0 achega fibra óptica simétrica, teléfono fixo con chamadas ilimitadas a fixos, 2 liñas móbiles (1 con 200 minutos en chamadas e 2 GB de datos e outra con chamadas a 0 céntimos/minuto e 200 MB de datos) e un servizo básico de televisión por 45 euros/mes para conexións de 50 Mbps e por 57 euros/mes para conexións de 300 Mbps, prezos que quedarían en 48 e 60 euros/mes respectivamente. A suba de prezo está prevista para o 5 de marzo.

Categorías: Ciencia

A xaponesa Coincheck é vítima do meirande roubo de criptomoedas da historia

Ven, 01/26/2018 - 21:21

Hai catro anos a empresa de cambio de Bitcoin Mt. Gox tivo que declararse en bancarrota tras saberse que padecera un roubo masivo dos seus fondos na popular criptomoeda que naquel momento representaría uns 343 millóns de euros, e agora hai outra empresa xaponesa afectada por un escándalo semellante, pois Coincheck tería padecido o roubo de 500 millóns de unidades de NEM, unha criptomoeda de recente creación que durante a xornada de hoxe tería unha cotización de entre 0,62 e 0,79 euros, polo que poderíamos falar duns 340 millóns de euros.
Tras confirmarse os feitos Coincheck anunciou a suspensión dos seus depósitos en NEM, para paralizar logo todas as operacións con NEM.
O co-fundador de Coincheck, Yusuke Otsuka, apareceu en rolda de prensa para recoñecer que non sabían onde foran a parar 500 millóns de unidades de NEM, aínda que asegurou que están a traballar para asegurar os activos de todos os clientes (de feito, xa estudan compensacións económicas para non prexudicar aos seus clientes).
Estariamos ante meirande desaparición de moedas dixitais dende o lanzamento de Bitcoin, aínda que desta volta a moeda baseada en blockchain sería outras, o NEM, a décima en volume de mercado global, que destaca por empregar métodos de confirmación das transaccións que consumen menos enerxía que os Bitcoin, ou sexa, que buscan deixar unha menor pegada ecolóxica.
Deste tipo de acontecementos hai leccións que aprender, pois confirman as dificultades para manter seguras as moedas dixitais e o risco que supón que non estean reguladas, de xeito que os usuarios non teñen garantías de recuperar os seus investimentos ante roubos e incidentes de distinto tipo.

Categorías: Ciencia

Os dereitos de autor na Sociedade Rede, a debate nunha nova xornada do CCG

Ven, 01/26/2018 - 17:16

O vindeiro xoves 22 de febreiro, o Consello da Cultura Galega convídanos a reflexionar sobre o punto no que se atopan os dereitos de propiedade intelectual co espallamento e a consolidación das novas canles dixitais. A xornada Dereitos de autor, lei aplicábel e percepción social tamén quere ser un chamamento a esculcarmos nas múltiples transformacións radicais que afectaron, da man da chamada Sociedade Rede, os xeitos de crear e difundir contidos, así como de compartilos, “en relación coas contornas analóxicas do século pasado”, unhas contornas que parecen moi afastadas no tempo pero que estaban vixentes, coma quen di, aínda onte.
A cita, que se celebra a partir das 10.00 horas na sede do CCG no Pazo de Raxoi (xeira de mañá) contará coa presenza de José Ignacio Aguaded, da Universidade de Huelva, quen falará sobre as sobrecargas de información, a propiedade intelectual e a chamada edu-comunicación. Asemade, tamén intervirá Javier Díaz Noci, da Universitat Pompeu i Fabra de Barcelona, co relatorio Dereitos de autor e propiedade intelectual. O programa completarase coa presenza de Raquel Xalabarder Plantada, da Universitat Oberta de Catalunya, que afondará nos regulamentos sobre dereitos de auor e na xurisdición competente na era dixital.
O obxectivo desta xornada é “contribuír a difundir as cuestións básicas de dereitos de autor que cómpre ter en conta na Sociedade Rede segundo o novo marco normativo e coñecer aqueles aspectos sometidos a análise e revisión”. Trátase, segundo engade o CCG, de “debuxar desafíos e fixar pasos para as actuacións no traballo diario”, achegando formación en edu-comunicación e coñecemento sobre o marco que rexe no escenario actual. Estes ingredientes, sinala o Consello, resultan “básicos para intervir con eficiencia na Sociedade da Información e o Coñecemento”.

Categorías: Ciencia

DIMElab, nova spin-off da USC, fornecerá de serious games o noso ámbito docente e empresarial

Ven, 01/26/2018 - 14:07

Co novo ano, vén de coller pulo a que sería a primeira empresa de alicerce tecnolóxico xurdida da Facultade de Ciencias da Educación da Universidade de Santiago. Estamos a falar da DIMELab, spin-off da USC acabada de constituír e centrada en boa medida no desenvolvemento e análise de medios educativos. A nova firma foi posta en marcha polo Grupo de Investigación Stellae, integrado por profesionais e investigadoras/es do ámbito docente.
Segundo fan saber, a orixe deste proxecto está nas máis de dúas décadas de traballo do GI Stellae (de 1997 á actualidade), unha equipa de traballo moi centrada en formación e desenvolvemento profesional, organización educativa, inclusión, materiais didácticos e tecnoloxía educativa. A súa spin-off envorcará boa parte da bagaxe xerada ao longo dos devanditos 20 anos no ámbito tecnolóxico e dixital. De feito, unha das súas liñas estratéxicas (amais do asesoramento pedagóxico a institucións educativas e empresas de tecnoloxía) será a desenvolver recursos didácticos do tipo serious games (xogos serios para educación e formación).
Así mesmo, DIMElab tamén centrará parte dos seus esforzos na realización de probas, análises ou testing de produtos didácticos, para tentar garantir que os materiais deseñados para a educación sigan certos estándares de calidade pedagóxica.
A idea de DIMElab xorde tras o traballo de Stellae coa AVTE (Área de Valorización, Transferencia e Emprendemento da USC), que axudou a transferir os resultados de investigación do grupo ao mercado, e ante as necesidades sociais detectadas na actualidade, entre as que se inclúen as seguintes: a necesidade de desenvolver novos medios educativos para o sector educativo e profesional, a demanda crecente de serious games, a necesaria actualización do profesorado en metodoloxías activas superando ou complementando ás tradicionais ou a demanda de máis formación en competencias dixitais por parte da sociedade.
A empresa, que ten a súa sede no Edificio Emprendia (Campus Vida en Santiago de Compostela), constitúena a día de hoxe preto de dez persoas, entre socias/os, xerencia e persoal con demostrada experiencia profesional no sector da educación e da tecnoloxía.

Categorías: Ciencia

Google está a probar unha nova plataforma de xornalismo cidadán

Ven, 01/26/2018 - 12:01

O servizo de Google News, non dispoñible en España para evitar a lexislación local que forzaría a Google a pagar aos medios de comunicación por escolmar as súas informacións, está a experimentar coa potenciación das novas de ámbito local, e para iso teñen en probas un novo servizo chamado Bulletin, que consistirá basicamente nunha aplicación para smartphones que facilitará que calquera poida crear historias de proximidade para compartilas coa súa comunidade, permitindo así dar voz a particulares que queiran narrar acontecementos que doutro xeito non chegarían ao público, e que estarán visibles de xeito público, doadas de atopar en buscas de Google, e que poderán compartirse en redes sociais, correo electrónico e aplicacións de mensaxería a través de ligazóns.
Bulletin é unha aplicación lixeira de balde, que permite publicar fotografías, vídeos e imaxes directamente no móbil, sen ter que crear un blog ou desenvolver unha páxina web, de xeito que cada historia de Bulletin pode crearse de xeito autónomo.
O programa piloto deste servizo está a realizarse en Nashville (Tennessee) e Oakland (California), estando aberta a presentación de solicitudes para participar nesta iniciativa na súa fase temperá.

Categorías: Ciencia

Chrome permite silenciar sitios web

Ven, 01/26/2018 - 11:49

O navegador web de Google actualizouse esta semana para recibir 53 parches de seguridade, xunto con pequenas melloras, que nun caso en concreto supón todo un antes e un despois para moitos usuarios, pois a partires de agora, cando premamos co botón dereito do rato nunha das lapelas do navegador Chrome, entre as opcións dispoñibles deixa de aparecer a posibilidade de silenciar a lapela potenciándose tal funcionalidade para permitir agora directamente silenciar sitio web, ou sexa, que cando detectemos que certas páxinas web teñen a teima de reproducir vídeos con son de xeito automático ou presentan publicidade con son, o que resulta moi intrusivo e molesto, poderemos eliminarlle o son de xeito indefinido, evitando así que teñamos que estar alerta en cada visita.
Para gozar desta funcionalidade en Windows, macOS e Linux temos que ter instalada a última versión de Chrome.

Categorías: Ciencia

A aplicación de Fotos permite destacar a persoas en concreto nos seus vídeos personalizados

Ven, 01/26/2018 - 11:37

A actualización de outono de Windows 10 incorporou grandes novidades na aplicación de Fotos, que agora incorpora ferramentas para coller fotografías e vídeos da nosa colección e crear pequenos vídeos con movemento, transicións e música para poder gardar os recordos dun xeito atractivo e poder tamén compartir estas creacións con amigos e familiares, e para facer esta funcionalidade aínda máis atractiva está a distribuírse unha nova versión da aplicación que engade unha función na que permite elixir a unha estrela para estes vídeos, ou sexa, que se eliximos a unha persoa que sae nos vídeos e fotografías que introducimos na selección a mesturar, o vídeo resultante procurará destacar á persoa facendo zoom na mesma e aplicando distintos efectos.

Categorías: Ciencia

Office 365 incorpórase á Microsoft Store

Ven, 01/26/2018 - 11:26

Nos últimos anos a suite ofimática de Microsoft deu un forte xiro de temón, conseguindo que boa parte dos seus usuarios pasasen de ser compradores das aplicacións a subscritores dun servizo que inclúe sempre as últimas versións engadíndolle incentivos como chamadas de voz por Skype, almacenamento na nube e acceso anticipado a funcións. Para facer aínda máis doada a adquisición e administración do servizo Office 365, vén de completarse a súa incorporación á tenda de aplicacións de Windows, ou sexa, que dende as últimas horas na Microsoft Store temos acceso a Office 365 Hogar e Office 365 Personal, o que facilítanos a súa contratación, a renovación de subscricións e o acceso á súa administración.
A integración do Office 365 na tenda atende en boa medida ao lanzamento de Windows 10 S, versión de Windows que non permite instalar aplicacións de fóra da tenda por motivos de seguridade (converténdose nunha boa solución para, por exemplo, contornos educativos), pero a funcionalidade tamén está dispoñible para versións ordinarias de Windows 10, o que podemos entender como unha simplificación do proceso de instalación e administración de Office 365.
Actualmente Office 365 Persoal para 1 usuario ten un custo anual oficial de 69 euros, mentres que Office 365 Hogar permite o acceso a 5 usuarios por 99 euros/ano, incluíndo en ambos casos 1 TB de almacenamento en OneDrive para cada usuario, incentivo que para moitos xa compensa a subscrición ao servizo.

Categorías: Ciencia

Makers de todas as orixes e idades xúntanse en Milladoiro este 2 de febreiro

Ven, 01/26/2018 - 11:07

Este 2 de febreiro, na Casa de Cultura do Milladoiro, temos unha cita co espírito Maker. Ou sexa, que temos un convite para tirar abaixo os atrancos que nos separan da creación tecnolóxica coas nosas propias mans, a todos e cada un de nós e sen importar, para nada, a nosa formación na devandita materia. A cita Innovames vén da man do Concello de Ames, e trátase, como dixemos, dunha xornada de innovación e argalleira (Maker). Contarase coa presenza de grandes referentes da filosofía do Do it yourself aplicada ao software, á robótica, a proxectos científicos ou a calquera tipo de enxeño, tanto a nivel galego como estatal e internacional.
Pola mañá, de 09:00 a 14:00 horas, haberá unha xornada adicada a profesionais do sector. De seguido, pola tarde, entre as 16:00 e as 20:00 horas, desenvolveranse obradoiros para nenos/as, unha exposición de proxectos da Maker Faire Galicia 2018 e demostracións de experimentos científicos. Este é o segundo evento destas características que organiza o Concello de Ames, despois do Roteiro Maker feito en decembro de 2016. Para obter máis información ou inscribirse na xornada profesional e nos obradoiros hai que acceder á web innovames.gal. Segundo informa a organización, premendo na ligazón da dereita, baixo o apartado de descargas, poderemos obter o programa de Innovames.
O obxectivo deste encontro Maker é achegar as últimas tendencias no mundo da innovación a todos os públicos, “xerando un espazo para a aprendizaxe e o diálogo, onde se comparta coñecemento e xurdan sinerxías que dean lugar a proxectos innovadores”. Esta iniciativa está composta de conferencias e mesas de debate que versan sobre a tecnoloxía, a innovación, o audiovisual e a utilización de novos materiais. Todo isto, informa o Concello, conforma o groso dunha programación que se artella en dúas xeiras. Por unha banda, a matinal, que estará dirixida exclusivamente ao sector profesional. As 09:30 realizarase a presentación do evento. De seguido, de 10:00 a 10:30 horas, contarase coa presenza de Sonia Pazos Álvarez do INL, International Iberian Nanotechnology Laboratory, que ofrecerá un relatorio sobre as posibilidades que nos outorga a nanotecnoloxía en múltiples sectores e onde presentará todo o que se está a facer neste centro de referencia internacional. No programa matinal tamén destaca a presenza de diferentes representantes das empresas asentadas no polígono do Novo Milladoiro como NanoGap, Escenoset, Cartogalicia, CineMar films ou Zenit entre outras compañías locais, que ofrecerán a súa visión particular do estado da innovación dentro dos seus diferentes sectores.
Ademais, haberá un espazo de exposición no que os asistentes poderán coñecer de primeira man exemplos da Galicia máis innovadora, coa presenza de makers galegos creadores de proxectos de innovación de referencia. Uns petiscos porán o punto final a unha sesión de networking que se dirixe a impulsar creación de sinerxías entre empresarios e argalleiros asistentes.
A concelleira de Promoción Económica, Isabel González, destaca que “coa creación de Innovames o Concello de Ames busca pór en valor os recursos e a capacidade de innovación da nosa Comunidade, fomentando a colaboración entre as empresas e inventores galegos, e dando a coñecer ao público xeral o capital Maker galego”.
Programa de tarde
O evento completarase cunha sesión de tarde que estará máis enfocada ao público familiar a través da programación de diferentes actividades e obradoiros orientados aos máis cativos. Celebraranse demostracións de ciencia e de realidade virtual, obradoiros de robótica e videoxogos, e habilitarase un espazo para programar aplicacións móbiles. A xeira de tarde comezará as 16:00 horas cun obradoiro de papirotrónica, dirixido a nenos e nenas de máis de 6 anos. De 18:00 a 20:00 haberá outros dous obradoiros de robótica e de programación de apps, que están dirixidos a nenos/as de máis de 8 anos.
Ademais, durante toda a tarde haberá unha exposición de proxectos da Maker Faire Galicia 2017 na que participarán as entidades 3D Limitless, MAKEROID, Arcade Pi, B.R.A.I.S., I.E.S. Sánchez Cantón, MINIMO, IOTLAB, PSICOVR, e SPAINLABS, así como demostracións de experimentos científicos.

Categorías: Ciencia

O BBVA anuncia que este ano a metade da súa clientela será dixital

Xov, 01/25/2018 - 23:39

O BBVA vén de informar das súas previsións en materia dixital. A información veu achegada polo presidente da entidade bancaria, Francisco González, durante a súa estadía no Foro Económico Mundial de Davos. Segundo fixo saber, a metade da clientela do banco vai estar no mundo dixital. Na súa análise sobre o intre actual do sector financeiro e a transformación tecnolóxica de BBVA, explicou que converterse nunha empresa dixital non é só unha realidade inevitábel para a entidade que preside, senón tamén unha necesidade urxente: “Temos que converternos nunha empresa dixital canto antes”, sinalou.
Respecto do 50% de clientela en liña, sinalou que se trata dunha cifra que vai alén dun simple cambio de hábito en usuarios: “Significa que teñen máis produto, máis relación co banco e están moito máis satisfeitos”.
Con respecto ao contexto global, e preguntado sobre se está preparado o regulamento vixente para asimilar as transformacións da industria financeira, Francisco González comentou que “é probábel que non, porque estamos a crear unha nova orde mundial”. Segundo engadiu, “estamos inmersos na cuarta revolución industrial e estanse creando moitas cousas, unha parte importante das cales serán diferentes, e para aproveitar todo o potencial das tecnoloxías é necesario ter un regulamento axeitado”. Asemade, avogou por un “regulamento 2.0”, que traballe “mirando os intereses de consumidores, os riscos sistémicos, a estabilidade financeira e, loxicamente, que apoie a innovación”.

Categorías: Ciencia

A Coruña acolle o 2 de febreiro a oitava edición da LaconNetwork e a primeira dos Premios TIC-Galicia

Xov, 01/25/2018 - 22:00

O venres día 2 de febreiro, celebrarase na Coruña (PALEXCO) a oitava edición-aniversario da LaconNetwork e a primeira dos Premios TIC-Galicia. A xornada desenvolverase cun gran programa con charlas, mesas de debate e entrega de galardóns. Á xeira de tarde engadirase un Demo Day da aceleradora Conector e unha nova iniciativa de pitching onde emprendedores de proxectos exporán a asistentes e investidores cadansúas propostas de negocio. Segundo informan os organizadores, este ano a novidade é que a xornada vén con dúas sesións: a xeira de mañá que será de entrada libre para todos os asistentes rexistrados na web, e maila sesión de tarde, que comeza coa sesión de traballo en rede LaconNetwork e que será exclusiva a asistentes que mercasen a entrada.
Trala inauguración do evento por parte do fundador do concepto, Frankie Gómez (director executivo de Confirmsign) haberá unha keynote de inicio da man de Telmo Pérez Luaces, xefe de Innovación no Grupo Acciona, que ofrecerá o seguinte relatorio: Entre corporacións e startups, quen acelera a quen?
Tamén haberá unha mesa de debate na que participan empresas como R, Estrella Galicia, ABANCA e Kaleido, que teñen aceleradoras e que participarán na xornada mostrando o seu funcionamento e máis os éxitos e os fracasos nas súas traxectorias coas firmas innovadoras impulsadas.
Durante o evento farase entrega dos primeiros Premios TIC-Galicia, fusión dos galardóns do Clúster TIC Galicia e os propios de LaconNetwork, que xuntan forzas neste evento para demostrar, en palabras dos responsábeis das entidades, “que sumar está no ADN das empresas e entidades TIC galegas”.
Como grandes novidades do formato, nesta edición presentarase o primeiro proxecto colaborativo impulsado por empresas LaconNetwork, o proxecto Hana, e desenvolverase o Pitch Lacon Estrella e o Demo Day da aceleradora Conector que será clausurado por Carlos Blanco, investidor en máis de 35 compañías dixitais.
A xeito de colofón final, celebrarase unha nova edición da xornada de traballo LaconNetwork, que, como lembraremos, foi votada recentemente como unha das mellores iniciativas de networking de todo o panorama estatal.
Temos o programa completo do encontro na súa web.

Categorías: Ciencia

A sétima edición dos INCUVI-Emprende premiará novamente o enxeño innovador universitario

Xov, 01/25/2018 - 18:30

Onte no Politécnico presentáronse os detalles da sétima edición dos Premios INCUVI-Emprende da Universidade de Vigo, destinados a apoiar, recoñecer e impulsar os novos proxectos galegos destinados a marcar un antes e un despois na nosa relación coas tecnoloxías e co coñecemento. Proxectos de emprendemento postos en marcha por mozas e mozos acabados de saír dos tres campus da UVigo (catro iniciativas do de Ourense, dous do de Pontevedra e seis do de Vigo). Segundo se fixo saber, o prazo para presentar achegas ficará aberto até o 31 de xaneiro. O acto contou coa presenza José María Faílde, director da Área de Descentralización do Campus de Ourense, que salientou que os premios brindan “un de preincubación dun ano de duración” no que as persoas beneficiarias “contan co apoio das institucións para transformar as súas ideas en proxectos emprendedores”.
Alejandro Martínez, director da Área Emprego e Emprendemento da Universidade de Vigo, foi o encargado de explicar os asistentes as características da convocatoria, á que se pode presentar tanto alumnado da Universidade de Vigo de grao, mestrado e doutoramento como persoas tituladas no curso 2014/2015 ou posteriores.
Os premios, sinalou Martínez, fornecen aos proxectos gañadores de actividades formativas e de asesoramento, así como a subvención, durante o mesmo período, dos custos de estadía nun espazo de traballo na preincubadora correspondente. “As propostas”, dixo, “poden ser elaboradas de xeito individual ou en grupos formados por un máximo de catro persoas”. Amais, engadiu, a súa temática deberá encadrarse nalgún dos eidos de coñecemento contidos nos plans de estudo da Universidade de Vigo: artes e humanidades; ciencias; ciencias da saúde; ciencias sociais e xurídicas e enxeñaría e arquitectura.
Entre as novidades desta edición, Alejandro Martínez destacou a incorporación da Xunta de Galicia ao panel das entidades colaboradoras e cambios no proceso de selección, que nesta edición contará con tres fases: unha primeira de entrevista persoal ante un panel de persoas expertas en emprendemento, unha segunda consistente nun obradoiro de ideas para as iniciativas preseleccionadas e unha terceira de presentación ante a comisión de selección.
No acto tamén interveu Ricardo Capilla, director do Parque Tecnolóxico de Galicia Tecnópole, entidade na que se instalan durante un ano os proxectos gañadores dos INCUVI-Emprende de Ourense. Capilla salientou que se trata “dunha oportunidade única e moi interesante”, cuns importantes premios que achegan aos emprendendores e emprendedoras “a posibilidade de pórse en contacto con empresarios” do ámbito estatal e internacional e “desenvolverse nunha contorna empresarial”.

Categorías: Ciencia

Marcos Mata, novamente á fronte do CPETIG

Xov, 01/25/2018 - 14:26

Finalmente a comunidade do Colexio Profesional de Enxeñaría Técnica en Informática de Galicia (CPETIG) resolveu outorgarlle o seu apoio ao presidente actual da entidade, Marcos Mata. O respaldo renovado a Mata, que asume un novo mandato como presidente do CPETIG, materializouse ao ser proclamada directamente a súa candidatura pola xunta electoral (o 21 de xaneiro), sendo innecesario o proceso de votación convocado, tal e como dispoñen os estatutos do Colexio no suposto de que se presente unha única candidatura ao proceso electoral.
Mata, desta maneira, asume con esta nova andaina o seu terceiro mandato como titular do órgano colexial, acompañado de Juan Luis Miguéns na Secretaría; Anxos Cabado, na Tesouraría; Miguel Abal, na Vicesecretaría; e Pablo Belay, Isaac Castro e Carlos Vila, como vogais. Estes dous últimos colexiados son de nova incorporación á xunta de goberno.
No seu roteiro para a novo mandato, a directiva do CPETIG dará prioridade, entre os seus obxectivos, a “traballar intensamente a prol da regulación da Informática para que se corrixa a discriminatoria situación que sofre, derivada do Real Decreto 1837/2008, que exclúe a Enxeñarías en Informática das profesións reguladas”. Xunto a iso, a liña de acción será de continuidade para, en palabras do novo equipo de goberno, “consolidar a oferta de eventos profesionais que anualmente organiza o Colexio, así como accións formativas nas materias relacionadas cos perfís máis demandados polo mercado laboral e ofrecer máis e mellores servizos para as persoas colexiadas”.
Dez anos de CPETIG
Como lembraremos, o Colexio Profesional de Enxeñaría Técnica en Informática de Galicia vén de celebrar os seus dez anos de traxectoria, unha década ateigada de accións de impulso tecnolóxico, divulgación, formación TI, innovación, colaboración cos restantes axentes do sector (galegos e estatais) e defensa da profesión (en relación a este punto, o colexio serve como garante de que o exercicio da profesión se axuste ás normas e ás regras que aseguren a eficacia e a eventual responsabilidade de tal exercicio). Por outra banda, a entidade profesional salienta polo seu firme compromiso a prol de acadar unha contorna tecnolóxica-dixital igualitaria e con maior presenza feminina. Entre as súas actividades máis destacadas atópanse as Xornadas de Informática Xudicial (un importante e ambicioso evento participativo onde se intercambiaron experiencias e puntos de vista sobre seguridade en Rede e novos retos tecnolóxicos da Xustiza). Recentemente a entidade renovou a súa presenza na Internet apostando pola comunicación directa e a vontade de facer comunidade.

Categorías: Ciencia

José Luis Orihuela mostraranos na Coruña as novas tendencias en comunicación dixital

Xov, 01/25/2018 - 13:29

O vindeiro 31 de xaneiro, ás 14.00 horas, celébrase no Club Financeiro Atlántico da Coruña un almorzo-coloquio dirixido a mostrar os camiños que vai adoptar en anos vindeiros o noso xeito de acceder á información de actualidade, e tamén de traballar con ela, uns camiños que van ficar inevitábelmente marcados polo dixital, tanto no fondo, coma na forma, coma no código. A cita, organizada polo Foro de Comunicación Alumni Universidad de Navarra, contará coa presenza de José Luis Orihuela, que ofrecerá o relatorio Escenario e tendencias da comunicación dixital.
Orihuela, para quen non o saiba, é profesor na Facultade de Comunicación da Universidade de Navarra, amais de consultor de comunicación do Banco Mundial e autor dunha manchea de investigacións acerca da comunicación multimedia, as redes sociais e o novo xornalismo.
Orihuela, ademais, está considerado un experto referencial en materia de comunicación dixital, prestixio ao que contribuíron o seu blog eCuaderno.com e máis a súa comunidade en Twitter (@jlori), con 162 mil seareiros. A cita vai dirixida a empresarios e profesionais da comunicación.

Categorías: Ciencia

O CPEIG ilustra aos escolares de Sanxenxo sobre as vantaxes e os riscos das redes

Xov, 01/25/2018 - 11:51

O Colexio Profesional de Enxeñaría en Informática de Galicia (CPEIG) impartirá hoxe 25 de xaneiro unha charla no CEIP Noalla-Telleiro (Estrada. da Lanzada, 140. Noalla) de Sanxenxo, sobre os aspectos positivos e enriquecedores das redes sociais e Internet e sobre os riscos derivados dun mal uso destas tecnoloxías. O coloquio, organizado polo colexio, a AMPA O Telleiro e a Asociación de Veciños San Esteban de Noalla, celebrarase ás 20:30 horas na biblioteca do centro escolar.
A xornada informativa, dirixida a escolares, pais, nais ou titores, organízase con motivo do Día da Protección de Datos (efeméride que se conmemora o 28 de xaneiro, promovida polo Consello de Europa, a Comisión Europea e todas as autoridades de protección de datos dos países membros da Unión Europea), e estará impartida polo colexiado Iván Luis Vázquez, quen avaliará a evolución da nosa sociedade cara ao dixital, e na que xorden termos como o nativo dixital ou os nacidos a partir de 1980 e o inmigrante dixital ou aquelas persoas que naceron entre 1940 e 1980.
Porén, de maneira máis ampla, Iván Luis explicará que é Internet e os seus usos como un medio de comunicación para “informar, comunicar e entreter”. Ademais, analizará a influencia das redes sociais, falando de conceptos como a identidade dixital ou a pegada dixital.
Iván Luis tamén falará dos perigos dun uso incorrecto de Internet, un emprego sen a debida formación previa, “desde o feito de consumir ou xerar contido desaxeitado ou falso, sentir a obriga de estar sempre conectado e sufrir roubo de información ou suplantación de identidade”. Ademais, fará especial fincapé en “algo máis cotián, pero non menos perigoso” como é a perda da intimidade, privacidade e confidencialidade, onde xorden delitos como o coñecido ciberbullying no que rapaces e rapazas empregan as redes sociais e a mensaxería instantánea para agredir psicoloxicamente a outro rapaz. Por outra banda, comentará outro delito de acoso sexual a menores coñecido como grooming, ou a práctica de producir ou reenviar contidos eróticos ou pornográficos de menores.
Segundo o estudo Screening do uso problemático de internet entre os adolescentes da comunidade galega, elaborado en 2014 pola Xunta de Galicia, a Universidade de Santiago e o Valedor do Pobo para coñecer os hábitos de uso de Internet entre os estudantes de ESO en Galicia (255 centros participantes e 44.051 adolescentes de 12 e 17 anos), un 71% dos enquisados afirmaron que usaban a diario internet, o 13,5% conéctase máis de 5 horas ao día (22,9% no fin de semana) e un 81% accede a través do seu móbil.

Categorías: Ciencia

Os mellores robots dos nosos estudantes medirán forzas na UVigo o 4 de maio

Xov, 01/25/2018 - 10:22

O bo destes tempos é que os robots, o seu deseño e construción, deixaron de estar ao alcance duns poucos. Agora, non hai dúbida, existen tecnoloxías, comunidades e movementos sociotecnolóxicos (por exemplo o movemento Maker) que nos permiten botar abaixo as barreiras que nos separan do que, en tempos, era pouco máis que ciencia ficción. Por se isto fose pouco, tamén hai certames onde o futuro faise presente e aléntase abertamente á creatividade tecnolóxica. Por exemplo a Competición de Robots da Escola de Enxeñería Industrial (UVigo) que se celebra o 4 de maio, convocando a estudantes de ensino secundario e superior da nosa terra. No certame, que vai pola súa cuarta edición, convidarase aos participantes a dar forma aos seus propios robots. O 4 de maio, os seus enxeños veranse as “caras”.
Segundo fai saber Juan Pardo, director da Escola de Enxeñería Industrial, un dos obxectivos da cita é “achegar á Universidade aos futuros e futuras estudantes”, amais de “fomentar o interese do alumnado polas disciplinas STEAM (Science, Technology, Engineering, Art and Mathematics)” e potenciar o traballo por proxecto e a autoaprendizaxe no deseño, construción e programación dos robots autónomos.
A competición realizarase por equipos, que deberán deseñar, construír e poñer en funcionamento cadanseu robot a partir dun kit básico que lles entregará a organización. O 4 de maio será o día no que os equipos porán a proba os seus robots, que deberá superar unha serie de probas de destreza. Os alumnos e alumnas de ensino secundario que desexen vivir esta experiencia e desenvolver as súas capacidades tecnolóxicas deberán facelo na categoría Wall-E, mentres que os estudantes de titulacións superiores pode inscribirse na modalidade R2D2. A data límite para formalizar a matrícula é o vindeiro luns 29 de xaneiro.
Como dixemos, neste 2018 a competición acada xa a súa cuarta edición, consolidándose, en palabras dos organizadores, “como unha cita de referencia que cada ano reúne centos de estudantes de toda Galicia”. Segundo indican, facendo balance de edicións previas, en 2017 superáronse os 800 inscritos e as expectativas desta nova convocatoria pasan por manter o mesmo grao de participación.
Respecto das categorías, a modalidade Wall-e está concibida para estudantes de ESO e Bacharelato, sendo o seu obxectivo que as e os participantes se familiaricen co mundo da robótica, participando na montaxe e programación dun robot móbil partindo do kit mBot Robot Educativo (2.4G), programábel de xeito doado con Scratch e compatíbel coa plataforma aberta Arduino. A competición realizarase en equipos de entre tres e seis estudantes e un profesor titor que deberán someter o seu autómata a dúas probas: completar no menor tempo posíbel un circuíto con obstáculos e unha especie de combate ente droides que deben sacar do campo de xogo aos seus opoñentes.
Polo que atinxe á outra categoría, o alumnado de Formación Profesional e de titulacións universitarias competirá en grupos de menos de seis persoas ou ben de maneira individual na modalidade R2D2, que comprende catro probas, tres individuais e unha colectiva. Neste caso cada equipo debe crear un robot cun tamaño máximo de 20 cm de lado e un peso máximo 1.500 gramos. Na proba de rastrexo os robots deben completar unha volta completa de non máis de catro metros, pero si con cambios bruscos de dirección, nun máximo de 60 segundos. Nun tempo inferior a un minuto, os robots deberán superar o seguinte exame de clasificación, un labirinto rectangular de 2x2 metros. Na terceira proba deberán retirar seis latas dun recinto de aproximadamente 1 metro de diámetro, e o derradeiro test será tamén un combate entre droides, como na modalidade Walll-e.

Categorías: Ciencia

Plex convida a consumir vídeos en realidade virtual

Mér, 01/24/2018 - 23:00

O organizador e reprodutor de contidos multimedia Plex continúa a medrar en posibilidades, e agora tira proveito da posibilidades da tecnoloxía Daydream de Google para permitir que poidamos gozar da nosa colección de vídeos a través dun casco de realidade virtual.
A idea de Plex VR é non precisar dun potente ordenador equipado cun caro casco de realidade virtual, senón operar directamente cun casco baseado nun smartphone con Android, facendo así como máis accesible esta tecnoloxía que non se limita a permitir empregar Plex nunha pantalla pegada aos ollos (o que pode aproveitarse para transmitir a impresión de que temos unha pantalla xigante), senón que ao integrar a visualización dentro dun espazo virtual decidiron abrir a experiencia á interacción con outros usuarios, de xeito que permiten que no noso salón virtual estean tamén amigos vendo os mesmos contidos para poder interactuar en tempo real a través dun chat de voz.
Aínda que Plex VR é unha aplicación para Android que pretende acceder aos contidos dun servidor Plex, tamén permite a reprodución de vídeos almacenados no smartphone, incluíndo vídeos en 3D e en 360 e 180 graos, converténdose nunha ferramenta moi práctica para o consumo audiovisual en dispositivos compatibles con Daydream.
Cómpre salientar que a reprodución multimedia con Plex VR é de balde para todos os usuarios, mentres que as opcións para compartir a experiencia con outros usuarios é exclusiva para subscritores de Plex Pass.

Vídeo promocional de Plex VR

Categorías: Ciencia

Páxinas