códigocero

Subscribirse a Orixe códigocero
Información sobre novas tecnoloxías en Galicia e en galego.
Actualizado: fai 58 min 48 seg

FACUA denuncia que a resistencia á auga do iPhone 8 é publicidade enganosa

Mar, 10/17/2017 - 12:56

Dende que chegaron ao mercado os smartphones resistentes á auga é frecuente a polémica por mor de que os fabricantes non se fan responsables dos danos provocados por líquidos, o que levou a que mudasen a súa publicidade drasticamente para indicar que non son somerxibles e só soportarían molladuras accidentais, pero ese detalle non se está a salientar debidamente, ou iso entenden dende FACUA-Consumidores en Acción, asociación que vén de denunciar a Apple por publicidade enganosa no seu teléfono iPhone 8, que anuncia como «resistente ás salpicaduras e á auga» pero cunha garantía que matizan en letra pequena que «non cubre os danos producidos por líquidos».
FACUA presentou a súa denuncia ante a Dirección Xeral de Consumo da Comunidade de Madrid, onde Apple Retail Spain, S.L. ten sede, alertando a dito organismo que a publicidade vixente do fabricante para promocionar o novo smartphone expón o produto como impermeable, pero non asume a responsabilidade dos efectos á exposición de líquidos, o que consideran unha contradición que suporía un caso de publicidade ilícita para o consumidor.
A xuízo de FACUA, a publicidade de Apple pode levar a un consumidor a mercar un iPhone 8 sen coñecer realmente as súas características ou, cando menos, as prestacións que están cubertas pola garantía legal ofrecida.

Categorías: Ciencia

O programa Sé Dixital preséntase na Rede CeMIT

Mar, 10/17/2017 - 11:20

O IGAPE e a AMTEGA en colaboración coa Escola de Organización Industrial (EOI) e o operador de telecomunicacións Orange organizan o vindeiro xoves a xornada de presentación do programa Sé Dixital, que se retransmitirá desde as instalacións do Centro Demostrador TIC Galicia a través de videoconferencia a 11 aulas CeMIT en horario de 10:00 a 11:00 horas.
Sé Dixital é un programa para fomentar a transformación do tecido empresarial de municipios e vilas, co fin de acadar unha rápida e efectiva adaptación destas poboacións e os seus habitantes aos retos que require a nova economía dixital global. Este plan de formación online de balde contribúe a que empresarios e emprendedores locais desenvolvan as súas habilidades dixitais e melloren as súas actividades profesionais gracias ao aproveitamento das novas tecnoloxías.
O obxectivo é que todas as persoas que participen nestes cursos poidan adquirir formación nas competencias que esixe a nova economía dixital, algo fundamental para fortalecer a competitividade e impulsar o emprego e a transformación dixital nos municipios e vilas. Este programa inclúe vídeos explicativos e testemuñas sinxelas que son accesibles a través dunha plataforma de teleformación, con contidos que acadan as 20 horas de formación amena e directa, obténdose un certificado da EOI ao remate do programa.
As persoas interesadas en seguir esta xornada poden acercarse á aula do Centro Demostrador TIC en Santiago de Compostela ou ben a calquera das aulas CeMIT de Boiro, Carballedo, Celanova, Fisterra, Leiro, Ortigueira, Porriño, Ribadeo, Sada ,Sarria e Valga, que amosaron o interese en retransmitir a través de videoconferencia a dita xornada e así poder evitar desprazamentos innecesarios.
Por outra banda, de xeito complementario e no marco do convenio asinado pola Xunta de Galicia, a través do IGAPE, a EOI e Orange, en breve está prevista a realización de cursos no marco deste programa nas seguintes localidades: Viveiro e Monforte de Lemos, na provincia de Lugo; Verín, Carballiño, O Barco e A Rúa, en Ourense; Carballo e Arzúa na provincia da Coruña; e Vilagarcía de Arousa, A Estrada, Redondela e Marín en Pontevedra.

Infografía sobre o programa Sé Dixital

Vídeo promocional do programa Sé Dixital

Categorías: Ciencia

Arranca a quincena da ciberseguridade en seis aulas da rede CeMIT

Mar, 10/17/2017 - 09:40

A formación en materia de ciberseguridade centra as actividades da vindeira quincena en seis aulas da rede CeMIT, que xestiona a Axencia para a Modernización Tecnolóxica de Galicia (AMTEGA), que informa estas actividades formativas serán de balde, abertas a toda a cidadanía e que se van celebrar en xornadas de 3 horas desde as 11 da mañá ata as 2 da tarde, de luns a xoves, desde o 16 ata o 26 de outubro. A actividade está liderada desde a aula CeMIT de Cuntis, que se conectará a través de videoconferencia coas aulas de Bande, Boiro, Celanova, Oroso e Ortigueira, seguindo uns contidos formativos facilitados polo Instituto Nacional de Ciberseguridade-INCIBE.
AMTEGA tamén engade que estas actividades enmárcanse no proxecto do Banco de Tempo da rede CeMIT, que “facilita que unha das aulas guíe e comparta as súas iniciativas de formación coas restantes aulas participantes”.
Por certo que o único requisito para poder asistir a estas actividades gratuítas é solicitar praza na localidade de interese, ben directamente na aula CeMIT de cada concello - Bande, Boiro, Celanova, Cuntis, Oroso e Ortigueira-, ou a través da web http://cemit.xunta.gal.
Módulos formativos
Entre o 16 e o 26 de outubro desenvolveranse un conxunto de 8 módulos formativos de 3 horas cada un, co seguinte contido:
O meu ordenador é un zombie (luns 16/10/2017). Funcionamento das redes botnets, así como o seu proceso de creación e infección.
Fundamentos do análise de sitios web (martes 17/10/2017). Funcionamento dun sitio Web. Detección, identificación, análise e forma de explotar as vulnerabilidades web.
Análise de malware en Android (mércores 18/10/2017). Prácticas máis habituais de análise de malware en dispositivos Android.
Espionaxe e cibervixilancia (xoves 19/10/2017)Análise das diferentes técnicas e ferramentas utilizadas para realizar as labores de espionaxe e cibervixilancia.
Programación segura de sitios web (luns 23/10/2017). Identificación dos principais requisitos a ter en conta para desenvolver aplicacións web seguras.
Fundamentos do análise de sistemas (martes 24/10/2017). Identificación, análise e explotación das principais vulnerabilidades dos servicios soportados por un servidor.
Seguridade Wi-Fi (mércores 25/10/2017).Seguridade dos dispositivos Wi-Fi. Funcionamento dun punto de acceso falso.
Forense en windows (xoves 26/10/2017). En que consiste e principais técnicas do análise forense en sistemas Windows.
O Banco de Tempo da Rede CeMIT é unha iniciativa que xurde nas aulas da rede coa finalidade de compartir actividades e optimizar os medios dispoñibles, intercambiando actividades entre aulas a través de recursos como a videoconferencia de alta calidade.

Categorías: Ciencia

Vitae ábrenos a porta da calidade no desenvolvemento cun novo curso sobre Angular 5

Mar, 10/17/2017 - 09:40

Vitae Consultores, no seu camiño de poñernos ao tanto das tecnoloxías de meirande potencial para o noso día a día, ten no seu programa formativo deste outono unha actividade encamiñada a abrirnos novos horizontes de desenvolvemento informático. Trátase da quinta edición do Curso Angular 5 con TypeScript e Observables, un obradoiro de 20 horas previsto para os días 17, 18, 24 e 25 de novembro, na Coruña (Hotel Attica 21) e en horario de 16.00 a 21.00 horas (venres) e de 9.00 a 14.00 (sábados). Que podemos atopar neste curso? Pois basicamente introducirnos de cheo no que sería o esquema de traballo de aplicacións (framework) JavaScript máis empregado e prestixioso do mundo: Angular 5.
En palabras de Vitae, “esta nova versión foi redeseñada e reprogramada de arriba a abaixo, e o resultado é máis que un framework, é unha plataforma de desenvolvemento de calidade empresarial e capacidade de evolución sen precedentes”.
Entre as características e principais vantaxes de Angular 5 atópanse as seguintes: promove o emprego de TypeScript como linguaxe de partida, ten vocación de saír do navegador (conquistando servidores, escritores e teléfonos móbiles) e acompáñase de ferramentas de desenvolvemento, probas e guías de programación. Ademais, ten ao seu arredor, velando pola súa calidade, evolución e dispoñibilidade, un ecosistema-comunidade internacional a gran escala.
Segundo nos conta Vitae, os obxectivos do curso pasan por axudarnos a actualizar os nosos coñecementos para “estar á altura deste novo reto”, amais de ensinarnos os fundamentos e achegarnos as claves “para comezar a crear as aplicacións web do futuro”. Nun plano máis detallado, coñeceremos as mellores estratexias de migración ou convivencia con versións 1.x para optimizar o esforzo e o rendemento das aplicacións migradas ou híbridas, facendo fincapé en cal sería a mellor opción a elixir, mudar ou convivir segundo o escenario de partida.
En termos aínda máis concretos, desenvolveremos aplicacións multiplataforma con Angular 5, empregaremos TypeScript, dominaremos o novo renderizador deseñado para o máximo rendemento ou coñeceremos a arquitectura de grandes aplicacións baseada en módulos que agrupan compoñentes e inxección de servizos.
O curso está especialmente dirixido a programadores de aplicacións web e programadores de backend, aplicacións móbiles ou deseñadores web. Segundo lembra Vitae, é necesario que os participantes atesouren un coñecemento básico de JavaScript e HTML.
O obradoiro terá unha duración de 20 horas e presentará un enfoque eminentemente práctico.
O formador será Alberto Basalo, enxeñeiro técnico en Informática con dúas décadas de experiencia como analista programador, xefe de proxectos e formador en pequenas e grandes empresas. Basalo é, a día de hoxe, socio director de AgoraBinaria e consultor asociado a Vitae Consultores.

Categorías: Ciencia

A xornada XTdT, éxito de contidos e público

Lun, 10/16/2017 - 21:02

Finalmente a Xornada Transformación Dixital e Talento (XTdT), organizada este 16 de outubro polo CPEIG e AMTEGA para impulsar ideas e propostas novas a partir de ideas e propostas previas de éxito (presentadas por relatores de primeiro nivel), resultou ser todo un éxito, tanto no que se refire a contidos (moitos, variados e de valor) como no número total de persoas participantes, máis dun centenar. En palabras da organización, foi unha cita de primeiro nivel coa sabedoría e coas ganas de aprender. Celebrouse na Cidade da Cultura e foi inaugurada por Mar Pereira (AMTEGA) e Fernando Suárez (CPEIG). Os relatores deron a coñecer esclarecedores casos de éxito.
Os relatores que participaron no encontro foron Constantino Fernández, presidente executivo de Altia; Enrique Dans, profesor de Innovación do IE Business School; Juan Carrillo, Director de Relacións con Clientes de LinkedIn; e David Tomás, co-fundador e director executivo de Cyberclick.
A xornada, dirixida ao público en xeral e en particular a estudantes universitarios, contou coa presenza do mago mentalista Javier Luxor, que oficiou de animador-condutor do encontro TIC.

Categorías: Ciencia

Google permítenos localizar fotografías das nosas mascotas polo seu nome

Lun, 10/16/2017 - 16:30

O servizo de Fotos de Google leva tempo mellorando a súa intelixencia artificial, de xeito que facilita a localización de fotografías grazas á súa tecnoloxía de recoñecemento de imaxes, o que permítenos atopar instantáneas en función das persoas que saen nelas, os lugares nos que están tomadas, os elementos que saen... e agora dan un paso adiante no ámbito do recoñecemento de mascotas, de xeito que, aínda que até o momento puidésemos atopalas buscando palabras como perro ou gato, o sistema mellorou dabondo como para distinguir a cada criatura peluda comas e fose unha persoa, ou sexa, que ao buscar por Trotski, Lúa ou Misifú o sistema entenderá que estamos a preguntar por un cadelo ou gato en concreto, axudándonos así a recuperar as súas fotografías e facendo así doada a creación de álbums ou películas coas mesmas.
O sistema de recoñecemento de imaxes de Google Fotos tamén recoñece agora as razas dos animais, e incluso permite empregar a emoticona dun can ou dun gato para buscar imaxes destes animais.

Até o de agora Google Fotos só localizaba a mascotas de xeito xenérico
Categorías: Ciencia

Makers grandes e pequenos participaron nunha nova quedada argalleira nas Pontes

Lun, 10/16/2017 - 16:25

O Lar de Endesa das Pontes acolleu este sábado 14 unha nova xornada de traballo de Amigus Labs, o proxecto argalleiro e Maker da Asociación Informática Amigus. A cita desta finde centrouse en dar forma a unha das máquinas que integrará o Fab Lab da dita entidade, o pantógrafo CNC. No encontro, ao que asistiron un bo número familias, tratáronse temas coma a Industria 4.0, a democratización da fabricación, ou o movemento Maker e as súas vantaxes (economía humanizada e cooperativa). Na zona de impresión 3D do obradoiro os participantes aprenderon a deseñar e producir unha manchea de pezas, amais de afondar en distintas aplicacións de materiais e en como usalos en todo tipo de sectores. A actividade abrangueu toda a cadea de actividade: dende a montaxe de impresoras até a impresión en si mesma, onde houbo marxe para acadar as mellores calidades posíbeis.
Segundo a organización, a zona que xerou máis interese para os argalleiros foi a de montaxe do pantógrafo CNC, onde todos os participantes puideron botar unha man á hora de darlle forma e descubrir os compoñentes e materiais para fabricar un pantógrafo e ver como funciona. Houbo tempo para rematar o desenvolvemento dun aparello destas características? Segundo a organización, os asistentes estiveron a piques de conseguilo ao longo das oito horas que durou o obradoiro, cubrindo boa parte do traballo previsto e deixando para o seguinte sábado “a parte da electrónica”.
Os máis pequenos tamén tiveron o seu espazo, na zona Amigus Labs Kids, onde mediante Raspberry PIs con OS Kano puideron aprender a debuxar mediante programación, traballaron en desenvolvemento de ferramentas con Scratch ou manipularon imaxes co GIMP, ademais de usar o Minecraft e a zona retro.
Amigus agradeceu por unha banda a participación activa dos asistentes ao obradoiro, en especial a Alvaro Rey, de MakerGal, “por compartir de maneira altruísta os seus coñecementos”; e, pola outra, o apoio das seguintes entidades colaboradoras no evento: Concello das Pontes, COHEMPO, ENDESA, EuroEume, Nauta, No Ping, Nodo Dixital, Triade, Severiano Agrocomercial, Escourido Asociados, Clip Carbono, Ferretería Marcos, Lujo, Matojoma, You can school of English, Fitter, Pontesa Marmoles y granitos, Desguaces Vilabella, Óptica Carmela, Galiorient, Servicio Móvil, Areco, Panadería San José, Fotografía Fabian, Don Dino, CONPLC, IcoEume, Preludio Musical, Arprosa, Radio Eter.

Categorías: Ciencia

As redes Wi-Fi actuais poderían ser totalmente inseguras

Lun, 10/16/2017 - 12:32

As redes Wi-Fi teñen grandes problemas para manterse seguras, de aí que os seus protocolos se vaian actualizando para evitar vulnerabilidades doadas de aproveitar, e aínda que até o momento o sistema de seguridade máis empregado na actualidade, o WPA2, estaba considerado bastante fiable, están a advertir de que atoparon serias vulnerabilidades a nivel de protocolo, ou sexa, que todas as implementacións veríanse afectadas.
Falamos dunha grande ameaza a nivel global que hoxe podería detallarse se atendemos a información difundida polo US-CERT, xa que está previsto que este mediodía os investigadores que descubriron a vulnerabilidade alcumada como KRACK dean detalles sobre o funcionamento deste fallo de seguridade que permitiría saltarse a seguridade das redes sen fíos con WPA2.
O grande problema deste tipo de fallos de seguridade é que non chegaría con distribuír actualizacións a través de equipos informáticos, senón que normalmente precisaría da actualización da seguridade dos puntos de acceso sen fíos que empreguemos, ou sexa, que fabricantes e operadores terían que parchear os seus routers, algo que dificilmente acontecerá, cando menos a curto prazo, polo que durante os vindeiros meses haberá que ser prudente coas redes sen fíos, especialmente nas redes corporativas.
Para evitar grandes problemas co fallo de seguridade que se detallará a recomendación máis habitual é conectarse só a páxinas web que cifren as comunicacións mediante HTTPS e incluso facer uso de VPN para engadir unha capa máis de seguridade. Tamén hai quen recomenda ocultar as nosas redes Wi-Fi para minimizar a súa exposición a ameazas (aínda que realmente non é unha medida efectiva ante ataques serios).

ACTUALIZACIÓN: Marthy Vanhoef de Imec-DistriNet (KU Leuven) foi o investigador que descubriu os ataques de reinstalación de chave (KRACKs) que afectan ao protocolo WPA2, ou sexa, que afectaría a todas as redes Wi-Fi modernas protexidas, e permitiría a inxección e manipulación de datos, de xeito que incluso permitiría que un atacante introducirse ransomware ou outros tipos de malware nas páxinas web que visitemos. O fallo de seguridade afectaría a ordenadores persoais, dispositivos móbiles, routers... e presentarse nos congresos Computer and Communication Security (CCS) e Black Hat Europe, aínda que xa se publicou para a súa descarga a investigación ao seu respecto.
Na páxina oficial sobre KRACK detallan que os dispositivos con Linux ou con Android 6.0 ou superior son especialmente vulnerables a este tipo de ataques (por ser máis doados de enganar), o que fai que sexa extraordinariamente sinxelo o roubo de, por exemplo, credenciais de acceso a páxina web que non empreguen HTTPS, tal e como demostran en vídeo:


Un detalle curioso é que a vulneración das redes Wi-Fi con WPA2 non extrae en ningún momento o contrasinal da rede sen fíos, senón que consegue a infiltración na rede sen fíos sen precisar de tal información. Estiman que no 41% dos dispositivos con Android sería moi doado interceptar e manipular o seu tráfico a través de Wi-Fi, o que fai que este problema sexa moi preocupante (e potencialmente afectaría a todos os dispositivos con Wi-Fi actuais).

Categorías: Ciencia

Ábrese a inscrición para un Coruña Bloggers en clave feminina

Lun, 10/16/2017 - 11:55
Mar Castro falará do spam social o vindeiro día 25

O vindeiro día 25 a partires das 19:30 horas celebrarase no salón de actos da Fundación Barrié na cidade da Coruña a edición número 12 de Coruña Bloggers, encontro solidario para interesados no mundo dos blogs, as redes sociais, a Internet e tecnoloxía en xeral que achega os últimos mércores de cada mes información interesante sobre o mundo 2.0 sendo a súa asistencia de balde, aínda que dende a organización pregan aos participantes acudir con cando menos 1 quilo de alimentos non perecedoiros para a súa doazón á Cociña Económica, estándose a pique de sueprar os 2.000 quilos achegados dende que comezou a organizarse esta iniciativa.
Os interesados en acudir o mércores 25 poden xa solicitar o seu convite a través da Rede, quedando así rexistrado o seu interese en asistir a este encontro que este mes terá lugar en clave feminina, xa que as relatoras serán a economista Isabel Loureiro, quen falará sobre o uso da Internet na procura de emprego, mentres que Mar Castro, consultora en comunicación e protocolo, abordará o spam social, ese grande problema cando as comunicación non desexadas, molestas ou irrelevantes non chegan só do correo electrónico, senón tamén das redes sociais.
A xornada desenvolverase até as 21:00 horas, cando os asistentes trasladaranse a un local de hostalaría próximo para a correspondente sesión de networking.

O salón de actos da Fundación Barrié acollerá unha vez máis a celebración de Coruña Bloggers
Categorías: Ciencia

Redegal aumenta a súa facturación nun 44%

Lun, 10/16/2017 - 11:47
Jorge Vázquez, CEO de Redegal, nunha imaxe de Guille Dacal

A firma galega Redegal, centrada en servizos innovadores de desenvolvemento web e mercadotecnia en liña, vén de facer reconto da actividade xerada na primeira metade de ano. Os datos achegados semella que non poden ser máis positivos, o que confirma o afianzamento da empresa na nosa terra e máis en mercados externos, complementando este proceso de fortalecemento cunha apertura cara a novos sectores. En termos concretos, Redegal foi quen de pechar o primeiro semestre de 2017 crecendo en facturación un 44% sobre o mesmo período do ano anterior.
Lembrar que Redegal pechou 2016 cunha facturación de 2,5 millóns de euros en España e 3,4 millóns a nivel global, o que supuña un crecemento do 26% respecto ao 2014 e unha mellora no EBITDA (acrónimo de Earning Before Interest, Taxes, Depreciation and Amortization) do 40%. Esta mellora, segundo sinala a firma galega, debeuse a un incremento en facturación, á reestruturación de custos da empresa e ao rendemento dos investimentos executados en anos anteriores.
O devandito completouse coa incorporación este ano de novos e relevantes socios procedentes dos sectores da moda, a saúde e as telecomunicacións (socios integrados no IBEX 35). Respecto das principais liñas de actividade de 2017, unha das máis destacábeis para Redegal foi a do desenvolvemento de aplicacións móbiles para sistemas iOS eAndroid, “a liña de negocio que máis crecemento está a experimentar”.
Ademais, ao abeiro do mercado internacional, Redegal consolidouse entre as 10 primeiras axencias de México no seu sector e prevese que un 10% da facturación proceda de Estados Unidos, onde Redegal vive o seu primeiro ano de andaina, cando, en palabras da firma galega, “o prognóstico inicial era dun 5% no escenario máis optimista”.
En palabras de Jorge Vázquez, director executivo de Redegal, “o medre que experimentou a compañía foi moi satisfactorio, tendo en conta que se afianzou en plena recesión económica”. Ademais, engade, “no último ano efectuouse investimento en empresas estratéxicas para achegar valor ao grupo e polo tanto aos seus clientes, tanto en México como en España”.
Todo isto, a maiores, viuse complementado cun proceso análogo no que a equipa profesional se refire. De feito, a cifra de empregados de Redegal incrementouse nun 25% respecto de 2016, a maioría deles procedentes de Galicia, o que certifica a aposta da compañía polo talento da nosa terra e por profesionais “con longa traxectoria no sector para reforzar a base da empresa e solidificar o seu crecemento, facendo unidades negocio sólidas, independentes e á vez colaborativas entre si”, engade Jorge Vázquez, que apunta que a finais de ano a firma ten programada a apertura dunha nova sede na Coruña.
Por certo que a previsión da empresa para o peche deste 2017 é facelo cunha facturación de 5 millóns de euros a nivel grupo, o que supón un incremento de case o 50% sobre o ano anterior.

Categorías: Ciencia

Witdom amosa esta semana en Vigo os seus resultados finais a prol dunha nube segura para datos sensíbeis

Lun, 10/16/2017 - 11:00
Unha das xuntanzas dos investigadores de Witdom celebrada en Vigo/ Imaxe de GCiencia

O proxecto Witdom, posto en marcha en xaneiro de 2015 co obxecto de avanzarmos no procesado seguro de datos xenómicos na nube (e coa finalidade de facilitar cousas como a detección temperá de doenzas xenéticas, entre outras aplicacións), segue a ser fonte de importantes novidades tecnolóxicas, logo dos achados dados a coñecer o ano pasado en materia de protección para os datos xenéticos en liña e da folla de ruta (presentada en 2015) para a procura de mecanismos que garantan unha nube onde todo estea baixo chave, mesmo para os provedores da propia nube. Agora, Witdom encara o seu último treito de traballo (a recta final da recta final) fornecendo de respostas claras e avances cen por cen visíbeis. Respostas e avances dos que se vai facer reconto esta semana en Vigo, na sede de Gradiant. Entre estes pasos adiante figura unha aplicación de referencia que se está a demostrar con dous pilotos nas áreas do procesado privado de datos xenómicos e a externalización segura de servizos financeiros.
Witdom (empoWering prIvacy and securiTy in non-trusteD envirOnMents), para quen non o saiba, é unha investigación europea, de carácter público-privado, centrada na protección de datos sensíbeis na nube e que contou cun financiamento de case 4 millóns de euros, dos que de euros 2,8 proviñan da Unión Europea no contexto do programa H2020. Arrancou en xaneiro de 2015 co obxectivo devandito de administrar mecanismos que asegurasen unha contorna segura e fiábel para os datos científicos. O consorcio internacional impulsor de Witdom é unha fronte de investigación coordinada pola empresa de servizos dixitais Atos España, coa participación de sete socios europeos, entre os que se atopa a Universidade de Vigo (e incluíndo a participación directa do Centro Tecnolóxico Gradiant).
Lilian Adkinson, investigadora de Gradiant, explica que Witdom “permite despregar servizos que procesan datos sensíbeis de forma segura e privada na nube”. Para iso, o consorcio do proxecto desenvolveu unha serie de mecanismos, tanto criptográficos como non criptográficos, que posibilitan protexer a seguridade e privacidade da información de especial relevancia e con necesidades específicas de coidado e salvagarda. Segundo apunta Adkinson, ao seu abeiro “tivéronse en conta todas as consideracións legais das normativas europeas de protección de datos”. A investigadora, neste punto, refírese en boa medida ao regulamento europeo General Protection Data Regulation (GPDR), que será de obrigado cumprimento para os países membros a partir de maio de 2018, impoñendo unha serie de restricións á hora de colleitar, almacenar e procesar datos persoais. A “boa nova” é que este regulamento pon en xogo unha serie de requirimentos para empresas e entidades cuxo coñecemento verase facilitade e fortalecido con recursos como os que achega Witdom. Así nolo explica Lilian Adkinson: “Un proxecto como Witdom resulta de gran axuda para as empresas e entidades que xestionan datos persoais, xa que ofrece un framework que protexe estes datos mediante diferentes mecanismos, tendo en conta non só requisitos técnicos senón tamén os aspectos legais impostos pola GPDR”.
Máis detalles
A investigación desenvolvida ao abeiro de Witdom permitiu deseñar un marco para a protección extremo a extremo de información en contornas de confianza non probada ou garantida, como poden ser os servizos de almacenamento na nube que ofrecen a día de hoxe algúns provedores de Internet; e enfócase principalmente cara a dous escenarios clave como son o ámbito da saúde e os servizos financeiros.
Witdom conta coa participación de sete socios europeos, desde universidades ata usuarios finais (hospitais e bancos), pasando por representantes industriais. Gradiant participa nesta iniciativa europea como entidade asociada á Universidade de Vigo, achegando a súa experiencia no deseño e desenvolvemento de tecnoloxías de anomizado e dun cloud broker. O anomizado (ou anomización), para quen non o saiba, consiste basicamente en expresar un dato relativo a entidades ou persoas eliminando a referencia á súa identidade.
Durante o desenvolvemento do proxecto no que participan a UVigo e Gradiant deseñouse tanto a metodoloxía para identificar os requisitos de privacidade e seguridade, como a arquitectura da plataforma de Witdom, materializándose diferentes tecnoloxías para protexer os datos, como o procesado seguro de sinal, recursos de data masking e de salvagarda de datos sensíbeis e técnicas de cifrado homomórfico e verificación de integridade de datos externalizados.
Na fase final do proxecto, as accións focalízanse na validación das tecnoloxías a través da súa aplicación en experiencias piloto aplicadas ao ámbito da eSaúde e ao sector financeiro. Concretamente, no escenario financeiro, os expertos de Gradiant aplican as técnicas desenvolvidas en tres casos determinados: risk scoring, fraud detection e cashflow prediction. “Nos tres casos de uso expostos”, engade Lilian Adkinson, “procésanse datos sensíbeis que esixen altas demandas de cómputo, polo que moitas entidades externalizan estes procesos nunha nube pública; o noso labor céntrase en desenvolver os algoritmos de anonimizado que nos permitan protexer os datos antes de envialos a esa contorna pública, onde se executarán eses tres procesados sobre os datos xa anonimizados, garantindo así a súa privacidade”.
Xuntanza final esta semana en Vigo
Gradiant acolle esta semana a última reunión de consorcio do proxecto Witdom. A sesión, cuxa organización rotou entre os socios do proxecto (pasando por Madrid, Milán, Liubliana, Zúric, Lovaina e Santa Cruz de Tenerife), terá lugar desde o martes 17 ata o xoves 19 de outubro na sede de Gradiant (edificio CITEXVI) para revisar os avances en todos os seus ámbitos e tomar decisións sobre a dirección do mesmo, agora que o proxecto atópase na súa fase final. Así, daranse cita en Vigo representantes de todos os socios do consorcio: a Universidade de Lovaina (Bélxica), IBM (Suíza), XLAB (Eslovenia) o Centro de Investigación Xenómica da Fondazione Centro San Raffaele (Italia), BBVA (España), a Universidade de Vigo e Atos España, líder do proxecto.

Categorías: Ciencia

A EGAP e o CPEIG achegan un curso superior sobre eAdministración

Lun, 10/16/2017 - 10:31

O Colexio Profesional de Enxeñaría en Informática de Galicia (CPEIG) vai colaborar no Curso Superior de Administración de Electrónica que convoca a Escola Galega de Administración Pública (EGAP). Esta actividade formativa, que vén da man da propia EGAP xunto con AMTEGA e máis o CPEIG, diríxese a afondar, “dende unha perspectiva técnico-xurídica”, nos detalles máis avanzados da xestión-organización pública dixital, facendo especial fincapé en cuestións como o arquivo electrónico administrativo e na súa relevancia para as nosas institucións.
Segundo nos conta o CPEIG, os contidos do programa buscan, “desde distintas perspectivas”, incrementar ao máximo o coñecemento e a capacitación das persoas participantes arredor da chamada eAdministración, achegando formación exhaustiva sobre a Informática, o Dereito e o espazo de confluencia entre ambos ámbitos de actividade.
O curso, que fornece de 50 prazas e 114 horas lectivas, desenvólvese dende o 30 de outubro até o 20 de decembro (os días de clase e o horario aparecen especificados no DOG). Os destinatarios son os integrantes do persoal empregado público das administracións públicas de Galicia, tanto autonómica como local e de xustiza, e das universidades do Sistema Universitario de Galicia.

Categorías: Ciencia

Recta final para solicitar axudas ao novo programa de emprego da Deputación de Lugo

Lun, 10/16/2017 - 10:05

Esta semana entra na súa recta final o prazo para solicitarmos axudas ao programa Ben Empregado 4 da Deputación de Lugo, que, como lembraremos, diríxese a achegar recursos a autónomos, PEME e asociacións (todas elas da provincia) para sumar novas/os profesionais dunha manchea de eidos de actividade ás súas equipas, entre os que se contan community managers (os profesionais que constrúen, xestionan e administran comunidades en liña arredor dunha marca en Internet), técnicos en informática, especialistas en mercadotecnia dixital ou responsábeis de proxectos transmedia. O prazo para a demanda de axudas remata este 18 de outubro.
Coa contía recibida, os solicitantes poderán pagar durante 1 ano os custos laborais de novas/os traballadoras/es lucenses que estean no paro (principais beneficiarias/os, xunto coas PEME obxecto de subvención, do programa Ben Empregado).
Máis polo miúdo, o Executivo provincial asumirá coas devanditas subvencións o 100% dos custos laborais cando os contratados sexan persoas con capacidades diferentes ou en risco de exclusión laboral; o 90% de traballadores en xeral para colectivos sen ánimo de lucro e o 50% para empresas. A contía máxima a recibir será de 22.000 euros.
Como lembraremos, Ben Empregado 4 máis social, o plan de emprego da Deputación de Lugo, está dotado con 2,2 millóns de euros e diríxese a beneficiar a un mínimo de 150 entidades e asociacións (con vistas xerar outros tantos novos postos de traballo na provincia). O programa, incluída esta cuarta edición do mesmo, responde a un duplo obxectivo do Goberno provincial: por unha banda combater a taxa de paro na provincia (“xerando postos de traballo de calidade ao incorporar cláusulas sociais nos contratos para salvagardar ou mellorar os dereitos laborais dos traballadores”) e, pola outra, “contribuír ao pulo da actividade do tecido empresarial e asociativo da provincia na procura da dinamización da economía lucense”.
Á hora de conceder as axudas, a Deputación favorecerá as empresas e colectivos que “non se teñan beneficiados das anteriores edicións co obxectivo de chegar a máis xente; ás que ofrezan contratacións indefinidas do posto subvencionado, medidas específicas de conciliación laboral a todo o cadro de persoal, de protección do medio ambiente ou de responsabilidade social e corporativa”.

Categorías: Ciencia

O CPEIG e AMTEGA convídannos a tirar proveito da economía dixital

Lun, 10/16/2017 - 09:47

[[[[ Hoxe temos unha cita con nós mesmas/os e coas nosas capacidades innovadoras, vistas (reflectidas) a través de diversos casos de éxito no ámbito TIC. Estamos a falar da Xornada Transformación Dixital e Talento (#XtdT), unha innovadora xuntanza de empresas, universidades e estudantes ao redor da economía dixital e das nosas ideas para sacarlle proveito. A cita vén da man da Axencia para a Modernización Tecnolóxica de Galicia (AMTEGA) e o Colexio Profesional de Enxeñaría en Informática de Galicia (CPEIG).
O equipo de relatores que participarán no encontro, “seleccionados polo seu perfil inspirador”, está formado por Constantino Fernández, presidente executivo de Altia; Enrique Dans, profesor de Innovación do IE Business School; Juan Carrillo, director de Relacións con Clientes de LinkedIn; e David Tomás, co-fundador e director executivo de Cyberclick.
O auditorio 2 do Edificio CINC Cidade da Cultura de Galicia, en Santiago de Compostela, é o lugar elixido para dar acollida ás charlas, en horario de mañá. Ademais, o mago mentalista Javier Luxor actuará de condutor do acto e mesmo realizará algunha pequena actuación.
Programa de actividades
· 10.00 H. Apertura da xornada. Mar Pereira, directora da AMTEGA e Fernando Suárez, presidente do CPEIG
· 10.15H. Presentación de Javier Luxor.
· 10.30H. Constantino Fernández, presidente executivo de Altia Consultores, co relatorio Retos da xestión do talento en servizo de transformación dixital.
· 11.15H. Enrique Dans, profesor de Innovación no IE Business School, co relatorio Carreira profesional: coa innovación como clave.
· 12.00H. Pausa para café
· 12.30H. David Tomás, cofundador e CEO de Cyberclick, falará de A empresa máis feliz do mundo.
· 13.15H. Juan Carrillo, director de Relacións con Clientes de LinkedIn
·14.00H. Peche da xornada
O CPEIG e a AMTEGA unen esforzos na organización da Xornada Transformación Dixital e Talento na procura “dun punto de encontro da mocidade e profesionais que buscan formarse nun dos sectores máis dinámicos da economía española e con máis saídas laborais, e con empresas que achegan a súa experiencia en demanda de recursos humanos no sector TIC”.
O seminario inscríbese no convenio de colaboración que manteñen a AMTEGA e o CPEIG.

Categorías: Ciencia

Facebook permite pedir comida a domicilio nos EE.UU.

Ven, 10/13/2017 - 20:30

Continua a incorporación de novos servizos nas aplicacións móbiles de Facebook, e desta volta sorpréndennos abrindo a posibilidade de realizar pedidas de comida a domicilio nos EE.UU., de xeito que os usuarios da aplicación teñen agora un novo xeito de pedir a servizos como EatStreet, Delivery.com, DoorDash, ChowNow e Olo sen saír de Facebook nin instalar as súas respectivas aplicacións, así como para pedir tamén a restaurantes como Jack in the Box, Five Guys, Papa John"s e Panera.
Facebook busca facer doada a localización de restaurantes aos que realizar un pedido, no que poderiamos considerar un xeito de competir a plataformas de éxito como Just Eat, ao igual que co seu Marketplace procura ocupar o nicho que en España domina Wallapop. De feito, a nova función de Facebook funciona dun xeito moi semellante a Just Eat, de xeito que podemos explorar restaurantes, comprobar o seu menú e realizar o pedido, aínda que desta volta parece que Facebook actuará unicamente como intermediario, pois cando, por exemplo, se fai un pedido a través deDelivery.com, é preciso contar previamente cunha conta no servizo (podendo realizarse ao momento identificándose coa propia conta de Facebook).
Este servizo de pedidos de comida limítase a EE.UU. e xa está dispoñible nas aplicacións para iOS e Android e tamén para a versión de escritorio de Facebook.

Categorías: Ciencia

Rúa Dixital presenta en América un software pioneiro para a xestión de bancos de sangue

Ven, 10/13/2017 - 20:30

A empresa compostelá Rúa Dixital, centrada en desenvolvemento web, mercadotecnia en liña e visualización en buscadores, vén de presentar na outra beira do Atlántico un software pioneiro que facilita a xestión de bancos de sangue. A presentación levouse a cabo nun encontro referencial americano no ámbito da saúde e da ciencia, o XXV Congreso Internacional do Grupo Cooperativo Latinoamericano de Hemostasia e Trombosis (CLAHT), que se celebra desde estes días en República Dominicana.
O sistema dado a coñecer por Rúa Dixital, o sistema Onega+, foi creado en base a experiencia acumulada por centos de profesionais e usuarios dos centros de transfusión (coñecedores das principais demandas e necesidades destes centros) e contou para coller corpo co traballo de médicos especialistas.
Segundo informa Rúa Dixital, é unha ferramenta con capacidade para adaptarse a diferentes contornas sanitarias, segura, eficaz e rendíbel dende o punto de vista económico e empresarial (froito da eliminación de non conformidades, aforro de tempo e optimización na toma de decisións).
José Luís Bueno, responsábel do Servizo de Transfusión e Unidade de Hemoterapia non Transfusional do Hospital Universitario Porta de Hierro-Majadahonda, está a ser o encargado de presentar este novo software no devandito congreso, no que participan profesionais de Arxentina, Brasil, Bolivia, Chile, Colombia, Costa Rica, Cuba, O Salvador, Ecuador, Guatemala, Honduras, México, Panamá, Paraguai, Perú, República Dominicana, Uruguai e Venezuela.

Categorías: Ciencia

A Biblioteca Ánxel Casal de Santiago apúntase cunha manchea de actividades á International Games Week

Ven, 10/13/2017 - 18:45

O evento International Games Week, como o seu nome indica unha semana de actividades sen fronteiras arredor dos xogos (os xogos como instrumento para a educación e a solidariedade, non como simples recursos para sermos máis competitivos), vai ter participación galega. Máis en detalle a da Biblioteca Pública de Santiago, a Biblioteca Ánxel Casal, que vai concorrer por vez primeira nun evento que vén da man da fronte común das bibliotecas norteamericanas (a entidade ALA, American Library Association) e no que tamén toman parte activa milleiros de voluntarios de todo o planeta “reconectando comunidades” mundiais a través das súas bibliotecas e a través da que, alén da lectura, vén sendo a cousa que máis teñen en común estas comunidades: a arela de xogar. A Semana dos Xogos da Biblioteca Ánxel Casal desenvolverase do 27 de outubro ao 3 de novembro. Boa parte do programa de actividades terá un cariz dixital.
Por exemplo a primeira Xornada League of Legends, que se celebra o 27 de outubro en horario de 17.00 a 21.00 horas no salón da actos da biblioteca compostelá. Esta xornada incluirá unha clase maxistral a cargo dun ex-xogador profesional e unha competición (o primeiro torneo LOL BPS). Ademais, segundo sinala a biblioteca, achegaráselles aos participantes unha ocasión inmellorábel para coñecer outros seareiros de League of Ledends. A entrada a esta quedada será libre até completar a capacidade da sala.
Amais da dita actividade, a Biblioteca Ánxel Casal manterá dende o 23 de outubro até o 3 de novembro unha mostra bibliográfica arredor da temática da International Games Week, a mostra Xogos e videoxogos, visitábel no segundo andar do edificio.
Por outra banda, os días 30 e 31 de agosto celebraranse unhas xornadas de xogos libres, tamén no salón de actos e consistindo nun convite directo aos seareiros para acudir, xuntarse e interactuar con todo tipo de xogos de mesa. Estes mesmos días a xoguetería Chafarís, situada na Algalia de Arriba, organiza unhas xornadas de xogos de lóxica para nenas e nenos de 2 a 13 anos, na sala de actividades infantil (primeiro andar), con horario de 16.30 a 20 horas.

Fachada da Biblioteca Pública Ánxel Casal de Santiago

A maiores, entre o luns 30 e o venres 3 de novembro, levarase a cabo a actividade Xogamos coas tabletas, no segundo andar da biblioteca. Trátase dun convite a probar as tabletas da Ánxel Casal, cargadas para a ocasión con xogos que estarán dispoñíbeis unicamente durante a International Games Week.
O día 3 de novembro, amais de todo o devandito, celebrarase unha xornada divulgativa sobre videoxogos. Será no salón de actos, con entrada libre até completar a capacidade da sala e en horario de 18 a 19 horas. Falarase do poder dos videoxogos para achegarnos vantaxes na nosa vida formativa e social... ou todo o contrario, dependendo do uso que lles deamos (beneficios e posíbeis riscos). Segundo informa a biblioteca, trátase dun espazo de encontro para o coñecemento das propostas lúdicas dixitais que temos no mercado, incidindo nos diferentes tipos de achegas, nos seus efectos positivos e nas principais preocupacións que xeran, afondando tamén nas repercusións de empregalos no ámbito do fogar. A sesión estará guiada e dinamizada por Silvia López Gómez, asesora pedagóxica e deseñadora de xogos serios en DIMElab. A xeira de divulgación estará aberta a todos os públicos: nais, pais, adolescentes, avós, avoas, nenas e nenos.
Amais da dita sesión, ás 19.15 horas está previsto que se presente o monográfico Aprendendo con videoxogos, pormenorizado estudo-investigación elaborado para o número 68 da Revista Galega de Educación. Participan Xesús Rodríguez Rodríguez (director) e Silvia López Gómez (coordinadora).
Amais de todo isto, na mesma xornada do 3 de novembro, darase a coñecer (ás 20.00 horas) o libro Historia de Nintendo: más de 125 anos de entretemento do documentalista Uxío Pérez. Trátase, en palabras da biblioteca compostelá, dunha “obra divulgativa sobre esta coñecida empresa que nos sorprende de principio a fin pola súa evolución e a enorme cantidade de feitos curiosos que protagonizou en todo o mundo”. Neste estudo, o autor fai tamén un repaso ás sagas ou xogos que “foron verdadeiros éxitos de ventas” ou nacementos accidentados coma o de Mario, “todo acompañado dunha sólida base documental para ilustrar cada unha das explicacións”, engade a Biblioteca Ánxel Casal.

Categorías: Ciencia

Oculus Dash permitirá correr aplicacións informáticas en fiestras virtuais

Ven, 10/13/2017 - 14:57

No filme Minority Report podiamos ver a Tom Cruise controlar un sistema informático baseado en holografías que podía manexarse directamente cos dedos (empregando unhas luvas especiais) e aínda que a xeración de imaxes no aire non sexa unha tecnoloxía madura, o control por xestos xa leva anos entre nós, e durante o evento Oculus Connect desvelaron unha actualización do software de Oculus Rift que nos leva a pensar que o futuro que presentaba a película baseada nunha historia de Philip K. Dick está máis preto de facerse realidade do que podiamos pensar.
Falamos concretamente de Rift Core 2.0, unha renovación do software da solución de realidade virtual de Oculus (compañía propiedade de Facebook) que non se conforma con facilitar o acceso a mundos virtuais e videoxogos, senón que tamén quere introducirse no noso día a dia, cun menú de inicio redeseñado e, moi especialmente, co novo Dash.
Oculus Dash é unha interface de sistema que abre a porta á computación inmersiva, xa que permite moverse polos menús mediante unha interface baseada nos controis de movemento Touch, pero sen limitar a experiencia a acceder ás aplicacións propias da realidade virtual, ou sexa, que permite que poidamos presentar no mundo virtual xanelas que poderemos colocar ao noso redor e que representarán a aplicacións informáticas, ou sexa, que permitiranos experimentar un escritorio holográfico virtual, o que resultará especialmente atractivo para desenvolvedores, que poderán depurar as súas aplicacións de realidade virtual mentres as están usando.
Rift Core 2.0 chegará en probas a partires do mes de decembro.

Vídeo de demostración de Oculus Dash

Categorías: Ciencia

O director xeral de Samsung Electronics renuncia ao seu posto

Ven, 10/13/2017 - 14:20

Grande sorpresa nas últimas horas ao saberse da dimisión do vicepresidente de Samsung Electronics, Oh-Hyun Kwon, que vén de anunciar a súa intención de non manterse ao cargo da división de negocio de Solucións para Dispositivos e tampouco buscará a reelección como membro do cadro de directores (do que remata o seu mandato actual en marzo de 2018). Kwon tamén renuncia á dirección xeral de Samsung Display, a división de pantallas da compañías surcoreana.
Kwon recoñece que a súa retirada foi unha difícil decisión, pero considera que é necesaria para a empresa, argumentando que están a vivir «unha crise sen precedentes» (no que parece unha alusión á condena de 5 anos de cadea para o máximo responsable da compañía) e considera que é o momento para renovar o liderado «para unha mellor respostas aos desafíos emerxentes da rapidamente cambiante industria das TIC».
Foi no ano 1985 cando Kwon entrou a formar parte de Samsung como investigador nos laboratorios de semicondutores nos EE.UU., ocupando dende entón numerosos cargos de responsabilidade, como a dirección xeral da división de semicondutores dende 2012, que resulta ser precisamente un dos negocios da compañía que máis beneficios xerou nos últimos anos, de aí que resulte sorprendente a renuncia, xa que non é habitual que os directivos deixen os seus cargos cando semella que están no seu mellor momento.

Categorías: Ciencia

En marcha unha plataforma tecnolóxica única para as lonxas ao abeiro do Programa Primare

Ven, 10/13/2017 - 12:12

O Programa Primare da Xunta, dirixido a modernizar os nosos sectores tradicionais, vén de achegar unha serie de novidades importantes para os ámbitos da pesca e o agro. No eido mariño, as novidades materialízanse no fornecemento de procesos dixitais para as lonxas. Segundo informa a Xunta, até 35 lonxas poderán beneficiarse de melloras tecnolóxicas nas súas instalacións, “que permitirán unha xestión máis eficiente da súa actividade, sobre todo en materia de comercialización, rastrexabilidade e seguridade alimentaria” e tamén en aspectos relacionados coa xestión económica. É unha das actuacións previstas no Programa Primare da Xunta, que impulsa a AMTEGA en colaboración coas Consellerías do Mar e do Medio Rural.
A modernización das lonxas desenvolverase a través de dúas liñas de actuación. Por unha banda, melloraranse tanto as infraestruturas como o equipamento tecnolóxico e, pola outra, porase a disposición das lonxas unha plataforma tecnolóxica única, que integrará os sistemas de xestión, comercialización, e emisión de notas de venda, informatizando a xestión duns procesos que até o de agora se viñan realizando de maneira manual e illada. “Esta medida”, explica a axencia que dirixe Mar Pereira, “redundará nunha axilización destes procedementos, posibilitará as poxas en liña, e mellorará a comercialización”. E engade: “As lonxas poderán sumarse á renovación, de maneira totalmente voluntaria, a través da Consellería do Mar”.
O proxecto de modernización, que está en fase de licitación, abrangue a modernización da infraestrutura tecnolóxica das lonxas, melloras nos sistemas de xestión (con servizos que faciliten as xestións da actividade da lonxa: contabilidade, cobros e pagos, relación coa administración, comercialización, subministración, prestación de servizos, ...) e de comercialización (de xestión das capturas descargadas, clasificación, pesada, poxa e a emisión dos documentos precisos para a súa venda e comercialización, ...).
Ademais, con estas accións de modernización, mellorarase a xestión das lonxas en todo o que ten que ver coa comercialización, a rastrexabilidade e a seguridade alimentaria. Asemade, contribuirase a aumentar a eficiencia e a seguridade e a mellora das condicións de traballo.
Para levar a cabo estas actuacións nas lonxas, a Consellería do Mar investirá máis de 3,8 millóns de euros que se distribuirán nas anualidades 2016, 2017, 2018 e 2019. Esta cantidade será co-financiada nun 75% polo Fondo Europeo Marítimo e da Pesca (FEMP).
No campo, o Programa Primare investirá preto de 3,5 millóns de euros no desenvolvemento de tres solucións tecnolóxicas, que non existían no mercado, para ofrecer servizos de valor engadido para mellorar a competitividade deste ámbito. A previsión é adxudicar a comezos do 2018 os tres proxectos. A partir dese momento as empresas terán de prazo un ano para crear as tres soluciones que conformarán un sistema global para a xestión do campo, que se comezará a probar en xuño de 2019.
A primeira das solucións permitirá a xestión de información xeográfica, territorial e agroambiental de maneira xeorreferenciada (algo preciso para o control da actividade agraria) que integrará os datos capturados mediante sensores transportados por UAV (vehículos aéreos non tripulados) ou outros dispositivos tecnolóxicos. Este sistema permitirá obter imaxes das parcelas con calidade de abondo para o seu posterior tratamento, así como datos relativos á xestión dos cultivos como poden ser a altura do terreo, a altura do cultivo ou grao de humidade.
Para transformar estes datos en información útil, crearase unha plataforma de procesado de información de parcelas agrarias, que permitirá obter mapas xeográficos, nos que identificar as parcelas, a súa morfoloxía topográfica, mesmo os cultivos e outros datos obtidos a través dos sensores. Toda esta información estará almacenada nunha plataforma con capacidade para explotala de forma útil, tanto por parte da Administración como dos axentes do sector primario.
A terceira solución prevista centrarase no deseño e posta en funcionamento dun sistema intelixente para automatizar os traballos sobre o terreo e a toma de decisións asociadas ás axudas europeas en Galicia. En base á información obtida coas solucións anteriores, este sistema permitirá axudar a determinar os tipos de parcelas e que os técnicos poidan tomar decisións sen trasladarse sempre fisicamente á parcela.

Categorías: Ciencia

Páxinas