códigocero

Subscribirse a Orixe códigocero
Información sobre novas tecnoloxías en Galicia e en galego.
Actualizado: fai 6 horas 50 min

Os proxectos da 5ª edición de ViaGalicia entran en preaceleración na Fundación CEL

Ven, 01/19/2018 - 18:00

A Fundación CEL Iniciativas por Lugo acolleu esta semana as primeiras sesións da fase de academia (ou preaceleración) da 5ª edición de ViaGalicia, programa de aceleración de empresas posto en marcha pola Xunta de Galicia e Zona Franca de Vigo, e no que colaboran outras entidades relevantes do ecosistema emprendedor galego (entre eles a propia Fundación CEL), a través do que se ofrece formación, asesoramento, sesións de networking, titorías, sesións de presentación (pitch), coworking e financiamento a emprendedores innovadores galegos.
Nesta fase, que se prolongará até o mes de marzo, os promotores dos proxectos seleccionados participarán en sesións formativas a través das que madurarán as súas ideas en procura do éxito empresarial, aprendendo a desenvolver o seu modelo de negocio, a súa proposta de valor, a probala no mercado con experimentos e mediante produtos mínimos viables (metodoloxía lean), a defendela e comunicar, a importancia do equipo e os seus roles na startup, a orientar a súa idea ao mercado en liña e fóra d eliña, a realizar proxeccións económico-financeiras e os aspectos legais relacionados co lanzamento dos seus proxectos (todos eles, innovadores, escalables, acelerables e relevantes).
Tamén se contemplan titorías individualizadas e asistencia especializada para o desenvolvemento da idea de negocio e apontoar a posta en marcha de cada iniciativa.
Finalizada a academia, dos 40 proxectos participantes que entre Lugo e Vigo están nesta fase, seleccionaranse os que accederán á fase final de aceleración de ViaGalicia, que inclúe financiamento (até 125.000 euros), apoio e seguimento durante varios meses para a posta en marcha e consolidación/crecemento.

Categorías: Ciencia

O Concurso Lucus Intercentros retransmitiuse en streaming grazas ao alumnado da Fundación TIC

Ven, 01/19/2018 - 16:46

Este 19 de xaneiro entregáronse en Lugo os premios da sétima edición do Concurso Lucus Intercentros do IES Muralla Romana. No acto, unha xornada lúdica e formativa organizada polos estudantes de Asistencia á Dirección do dito centro lucense, participou o responsábel de Deportes e Mocidade na Deputación de Lugo, Pablo Rivera. O certame foi retransmitido en directo con tecnoloxía streaming polos estudantes da Fundación TIC (Deputación de Lugo), que editarán un DVD co material gravado co fin de contribuír á difusión da actividade.
A xornada, como dixemos, está organizada polos alumnos de Administración e Xestión do IES Muralla Romana, coa axuda da Escola de Imaxe e Son de Lugo (EIS, Fundación TIC), da Escola de Arte e Superior de Deseño Ramón Falcón e o departamento de Informática do CIFP Politécnico de Lugo.
A sétima edición do certame reuniu a alumnos e profesores dos institutos de Educación Secundaria públicos de Lugo: Anxel Fole, Lucus Augusti, Nosa Señora dos Ollos Grandes, Xoan Montes, Leiras Pulpeiro, San Xillao e Muralla Romana. Ao longo da mañá disputáronse distintas probas eliminatorias ás que se enfrontaron os equipos participantes. Os alumnos sometéronse en cada unha delas a dez preguntas tipo test elaboradas por profesores das distintas áreas do instituto anfitrión.
Retransmisión en streaming
Dez alumnos e alumnas de segundo curso de Realización Audiovisual da Escola da Fundación TIC, baixo a supervisión dun docente, encargáronse da transmisión en streaming. Os estudantes rotaron entre os postos de realizador, mesturador, son e cámara. Estre traballo rotativo tivo o obxectivo de permitir que todas e todos tiveran as mesmas oportunidades de aprendizaxe. A de hoxe foi a primeira experiencia cunha práctica fóra das instalacións da Escola este ano. Segundo informa a Deputación de Lugo, repetirase esta oportunidade no Campionato Internacional de Baristas que se celebra dentro dun mes no Concello de Foz.

Categorías: Ciencia

Máis da metade dos galegos usan as TIC para informarse de cuestións de saúde

Ven, 01/19/2018 - 14:30

Medra a actividade dos galegos no que se vén coñecendo como eSaúde (eHealth), o ámbito de confluencia no que a atención médica optimízase e faise máis eficiente, exacta e inmediata grazas á contribución das novas tecnoloxías dixitais. Este crecemento foi confirmado hoxe mesmo polo conselleiro de Sanidade, Jesús Vázquez Almuiña, na apertura da Xornada técnica E-Health. Definición dos principios de interoperabilidade e innovación de apps. Liñas de empoderamento de pacientes.
Na súa intervención, Almuiña referiuse aos pacientes do Servizo Galego de Saúde como pacientes con meirande capacidade de acción e de análise: “Persoas que deixan de ser lectoras e buscan interactuar cos contidos e tamén cos profesionais por medio das tecnoloxías da información”. Tamén lembrou que a día de hoxe o 63% dos galegos maiores de 16 anos emprega Internet para procurar coñecemento sobre temas médicos. Esta cifra, dixo, mostra un incremento de case 10 puntos porcentuais nos últimos catro anos.
O titular de Sanidade afirmou que o crecemento do uso das tecnoloxías no ámbito sanitario é “imparábel”, polo que é “absolutamente necesario entender a contorna na que estamos e adaptarse a esta revolución que xa está aquí”.
O conselleiro lembrou que no Servizo Galego de Saúde “apostouse desde sempre pola innovación, tratando de aplicar as vantaxes das novas tecnoloxías para mellorar o día a día”. Destacou así o proxectos coma a plataforma de intercambio de información E-Saúde ou o proxecto Código 100, que se está en fase de desenvolvemento e inclúe unha liña de empoderamento de pacientes.

Categorías: Ciencia

O GPU Hackaton do CESGA e Appentra recunca en marzo

Ven, 01/19/2018 - 13:01

O Centro de Supercomputación de Galicia (CESGA) e a firma galega Appentra Solutions veñen de anunciar a vindeira celebración da segunda convocatoria do GPU Hackathon na sede do CESGA, en Santiago. A cita, que se vai desenvolver dende o 5 ao 9 de marzo de 2018, terá este ano un marcado cariz internacional, coa vontade de establecer máis pontes entre o noso ámbito innovador avanzado e os do resto do mundo. En palabras do CESGA e Appentra, o GPU Hackathon ten como obxectivo axudar aos científicos e programadores a acelerar a execución das súas aplicacións de simulación científica usando o hardware, o software e a un equipo de mentores expertos en optimización, paralelaxe e execución de programas de simulación.
Ao remate do evento, os participantes disporán dunha nova versión acelerada en GPU ou dunha folla de ruta para alcanzar dito obxectivo. O equipo gañador recibirá unha GeForce GTX 1080Ti, ofrecida por NVIDIA.
Appentra e máis o CESGA tamén lembran que os participantes, novamente, poderán chegar a crear casos de éxito, como aconteceu o ano pasado co equipo que traballa na predición de tsunamis da Universidade de Málaga, EDANYA. Coa colaboración de Appentra e Fernanda Foertter (ORNL) publicaron un artigo de investigación exhibido no SuperComputing17, en Denver, que pasa por ser a cita máis relevante no eido da Computación de Alto Rendemento.
A xornada artellarase nun día de conferencias para “todos os que queiran asistir”, e outras 5 xornadas intensivas de traballo para a optimización da aplicación de simulación científica de cada equipo participante. O prazo de inscrición estará aberto ata o 11 de febreiro e a participación é de balde.
Co fin de acadar a máxima repercusión, o CESGA e Appentra animan aos responsábeis de proxectos científicos a participar e obter “esta formación individualizada tan escasa e necesaria”, que, segundo engaden, “axudaralles a avanzar e aforrar tempo nas súas aplicacións de simulación”.
Como lembraremos, o CESGA (Fundación Publica Galega Centro Tecnolóxico de Supercomputación de Galicia) é o centro de calculo, comunicacións de altas prestacións e servizos avanzados da Comunidade Científica Galega, Sistema Académico Universitario e do Consello Superior de Investigacións Científicas (CSIC).
Appentra, pola súa banda é unha spin-off tecnolóxica da Universidade da Coruña fundada en 2012. Ofrece ferramentas de software de alta calidade que permiten un uso extensivo das técnicas de computación de alto rendemento (HPC) en todas as areas de enxeñería, ciencia e industria. Os clientes obxectivo son empresas e organizacións que executan con frecuencia aplicacións informáticas en eidos como o aeroespacial, o automóbil, a enxeñería civil, a biomedicina ou a química.

Categorías: Ciencia

Senssia converte en experiencia virtual a nosa busca do fogar ideal

Ven, 01/19/2018 - 12:12

Senssia, emprega galega de mobiliario de cociña e baño, presentou esta semana en Santiago, no Hotel Los Abetos, a súa nova liña de innovación, unha estratexia que pasa por introducir a virtualidade e os espazos en 3D no achegamento dos clientes-usuarios á súa oferta de equipamento doméstico. Na cita cos medios deuse a coñecer un software especificamente deseñado para experimentarmos virtualmente os elementos de Senssia e os espazos onde se insiren eses elementos: o software TeoLive.
Amais desta ollada ao futuro, da empresa fixo balance dos seus catro anos de andaina, achegando os principais fitos de mercado do período (por exemplo a súa facturación de 1.604.000 euros, un 30% máis que o pasado ano) e, tamén, os grandes desafíos aos que se enfronta en 2018 (por exemplo ampliar o número de tendas nun 10%).
Porén, unha das grandes cuestións tratadas na cita en Santiago foi o papel despregado pola empresa a prol da innovación e a Industria 4.0, un compromiso coa tecnoloxía que se traduciu en produtos de mellores prestacións, novos métodos de comunicación e avances no sistema de embalaxe e entrega. Nun plano máis concreto, o ano pasado Senssia puxo en marcha o servizo Vistas 360 graos, que achega percorridos virtuais que permiten mostrar espazos e ambientes, interactuando con eles. De maneira complementaria, a empresa lanzou tamén un ambicioso catálogo de 140 páxinas a toda cor que fornece dous tipos de lectura. Por unha banda mostra a colección “máis innovadora e rompedora”, onde o espazo e a contorna son os verdadeiros protagonistas: as imaxes que se representan tratan de pór en valor a arquitectura industrial mesturada co recordo. Doutra banda, preséntase un ambiente máis íntimo, un lugar onde compartir momentos coa familia, “apostando por recuperar a tradicional idea da cociña como o epicentro do fogar”, explican dende Senssia, engadindo que o carácter pioneiro do catálogo e os resultados obtidos valéronlle para obter o I Premio Paraugas de Comunicación e Mercadotecnia Galega.
Volvendo aos fitos e retos presentados, sen dúbida foi o software TeoLive unha das grandes estrelas da cita cos medios de comunicación. Segundo explicaron os responsábeis da empresa galega, trátase dunha evolución na maneira de presentar os proxectos, podendo visualizalos a través dunhas lentes de realidade virtual, permitindo a interacción cuns mandos. “O que posibilita esta aplicación”, explicaron, “é poder viaxar a outro mundo, interactuando virtualmente con todo o que nos rodea, permitindo un certo grao de desprazamento físico e seguimento real coas mans”. Grazas a TeoLive, engadiron, “o usuario sente plenamente a posición das mans na escena da súa cociña deseñada”, quedando os movementos físicos dos mandos plasmados no desprazamento físico que se fai dentro do espazo doméstico virtual (cociña, baño, salón, etc). Desta maneira, os pasos que se dan tamén se trasladan á contorna recreada.

Categorías: Ciencia

WhatsApp estrea aplicación para empresas

Ven, 01/19/2018 - 12:04

Tras moitos meses de rumores e esperas, por fin é realidade a aplicación WhatsApp Business, tamén coñecida como WhatsApp para Negocios, que permite que as PEME poidan facer un uso axeitado de WhatsApp, para unha boa relación cos seus clientes, e facilitando a separación das conversas profesionais das conversas con amigos e familiares.
Polo momento WhatsApp Business estréase como unha aplicación para Android de balde que pode descargarse dende Indonesia, Italia, México, Reino Unido e EE.UU., chegando ao resto do mundo nas vindeiras semanas e sendo tamén compatible con WhatsApp Web para facilitar o seu manexo dende un ordenador.
A nova aplicación facilita a creación de perfís de empresa, onde pode indicarse información de utilidade como o correo electrónico, o enderezo e a páxina web; as contas de empresa amosaranse como tal para o resto de usuarios e algunhas compañías poderán gozar de conta confirmada tras verificarse que o número de teléfono da conta coincide co teléfono da empresa; a aplicación será como a ferramenta de mensaxería particular, pero engadíndolle elementos como respostas rápidas, mensaxes de benvida e mensaxes de ausencia; e tamén contará con estatísticas, para que as compañías poidan coñecer informacións como o número de mensaxes lidas.

Categorías: Ciencia

A Deputación de Lugo enche a Rede de novos vídeos sobre os atractivos da provincia

Xov, 01/18/2018 - 22:55

Entre as entidades galegas que se atopan estes días no salón de turismo FITUR, en Madrid, lucindo xeodestinos e servizos innovadores para garantir a mellor estadía dos visitantes, atópase a Deputación de Lugo. Este mesmo xoves, sen ir máis lonxe, a entidade que preside Darío Campos presentou os novos traballos audiovisuais da campaña de promoción turística provincial que leva por nome Lugo Cambia. Trátase, segundo fixo saber en FITUR o propio Darío Campos, das primeiras iniciativas que o Goberno provincial ten preparadas para este ano, compostas por 7 vídeos en galego, castelán, inglés, alemán, francés, italiano e portugués. As pezas, que xa se poden ver na web da Deputación no apartado específico para visitantes e viaxeiros, turismo.deputacionlugo.org, divulgaranse nas redes sociais e en todo tipo de plataformas internacionais, comezando por medios galegos, españois e portugueses.
Segundo engadiu o presidente do Goberno provincial, os contidos dos vídeos son os recursos turísticos dos 67 concellos lucenses, nos que o coñecido presentador lucense Martín Barreiro convida a visitar a provincia, dando conta dos sentimentos que produce facelo e salientando que “unha viaxe á nosa provincia vos cambiará para sempre”.
Campos Conde presentou as pezas Os sentimentos dunha viaxe xunto a Martín Barreiro, embaixador da campaña Lugo Cambia, e dos Aacaldes dos principais Concellos da provincia polo seu número de habitantes: Lugo (Lara Méndez), Viveiro (María Loureiro) e Monforte de Lemos (José Tomé Roca). Tamén estivo na presentación, o Deputado de Turismo, Eduardo Vidal Baamonde.
Estes novos spots difundiranse a nivel internacional en reputadas plataformas para dar a coñecer os recursos patrimoniais, naturais, culturais ou gastronómicos que se poden atopar nos 67 Concellos co obxectivo de atraer á provincia máis visitantes. En primeiro lugar, farase en medios de Galicia, España e Portugal, posto que, como lembrou Conde, son as zonas inmediatas de captación de turistas.
O titular da Deputación tamén explicou que a presentación deste novo material é “un paso máis no traballo do Goberno provincial para promover o conxunto do territorio lugués e facer do turismo un motor económico da provincia capaz de xerar emprego e riqueza”. Neste senso, a campaña Lugo Cambia enmárcase no primeiro Plan Estratéxico de Turismo, “totalmente participativo”, que elaborou o Executivo. O presidente engadiu que en 2018, o Goberno da Deputación intensificará a campaña Lugo Cambia e reforzará a súa colaboración co sector turístico, desenvolvendo máis e novas iniciativas ao abeiro do Plan Estratéxico de Turismo.

Categorías: Ciencia

O bug chaiOS pode bloquear a aplicación de mensaxería do iPhone cunha ligazón

Xov, 01/18/2018 - 22:00

No ano 2015 xurdiu un texto que, de recibirse a través da aplicación de mensaxería do iPhone, provocaba o bloqueo da aplicación e incluso do teléfono, fallo bastante problemático xa que persistía ao tentar volver abrir iMessage, e agora este bug coñecido como Effective Power está de volta baixo o alcume de chaiOS, de xeito que reprodúcese o fallo a través dunha ligazón a unha páxina web, aproveitando o feito de que a aplicación de Mensajes precarga algunhas ligazóns para amosar unha vista previa do contido, o que provoca a carga de contido prexudicial para a aplicación.
Polo momento este fallo só está presente nunhas poucas páxinas web creadas coa intención de comprobar este erro na aplicación de mensaxería do iPhone, comprobándose que o problema no é consistente, de xeito que tanto pode bloquear a aplicación e forzar o reinicio do dispositivo como pode simplemente presentar un pouco de retardo. O fallo estaría presente nas versións de iOS da 10.0 até a 11.2.5 beta 5, e Apple xa ten listo o parche para corrixir este problema, que distribuirase a través dunha actualización a semana que vén.
Este caso resulta un tanto preocupante porque súmase a varios acontecidos en poucas semanas e que, en liñas xerais, parecían consecuencia de fallos nos controis de calidade das actualizacións dos sistemas operativos de Apple, algo que non acontecía no pasado dun xeito tan visible.

Categorías: Ciencia

Movistar incrementa o prezo das súas tarifas móbiles o mes que vén

Xov, 01/18/2018 - 22:00

Como se viña comentando nas últimas semanas, as compañías de telecomunicacións prepáranse para comezar o ano con subas de prezo, sendo unha das primeiras que afectan a un maior número de consumidores o cambio de tarifas móbiles de Movistar, que a partires do 18 de febreiro pasarán a custar 2-3 euros máis ao mes.
Concretamente a Tarifa #2, con chamadas a 0 céntimos/min. e 3 GB de datos pasará de 15 a 17 euros/mes, mentres que a Tarifa #6 (con 200 minutos en chamadas e 8 GB de datos) pasará de 27 a 30 euros/mes, a Tarifa #10 (con chamadas ilimitadas e 15 GB de datos) pasa de 37 a 40 euros/mes e a Tarifa #20 (con chamadas ilimitadas e 25 GB de datos) pasa de 47 a 50 euros/mes. Cómpre salientar que a renovación de tarifas realízase seguindo unha práctica habitual nos operadores: incrementar o volume de datos para xustificar o cambio de prezos. Neste casos, a Tarifa #2 inclúe 1 GB máis que coas tarifas anteriores, a Tarifa #6 2 GB adicionais e as tarifas #10 e #20 suman 5 GB cada unha ao seu límite de datos ao mes.

Categorías: Ciencia

Como construír un R2D2 con material de reciclaxe, polo miúdo no Campus de Vigo

Xov, 01/18/2018 - 21:23

O 23 de xaneiro, a Escola de Enxeñaría Industrial do Campus de Vigo vai acoller unha conferencia-obradoiro sobre as amplas posibilidades da robótica caseira e, máis polo miúdo, sobre o moito que lle debe a saga Star Wars a este ámbito de creación tecnolóxica. Por tratarse dunha conferencia-obradoiro, haberá unha vertente teórica (poñendo aos asistentes en materia do compoñente tecnolóxico da dita saga) e unha vertente abertamente práctica. A través desta última parte da actividade, mostrarase aos asistentes como construír unha réplica de R2D2 con material reciclado.
O relatorio virá da man de Eduardo Santos, un mozo de Cambre que forma parte da entidade Echo Base 28th Elite Forces, unha asociación que dende o ano pasado vén desenvolvendo diferentes actividades arredor do universo Star Wars. Unha das estrelas da súa liña de acción é precisamente o robot R2D2, un “personaxe” que máis alá do mérito de ter sido creado con materiais procedentes doutros aparellos, ten o mérito da mobilidade: xa percorreu unha manchea de escolas, institutos, hospitais e feiras tecnolóxicas por toda Galicia.
O obxectivo da conferencia-obradoiro do 23 é dar a coñecer a experiencia de Eduardo e amosar como os materias de refugallo poden ter unha segunda vida.
Para explicar o proceso de construción deste droide, o vindeiro martes 23 de xaneiro, Eduardo Santos e mailo seu pai (Eduardo Santos Baldomir) impartirán un relatorio titulado Construye tu propio R2D2. Robótica y educación para el presente na Escola de Enxeñería Industrial do Campus de Vigo. A conferencia, organizada polo profesor do Departamento de Enxeñaría de Sistemas e Automática José Ignacio Armesto, celebrarase ás 16.00 horas na aula 15. A actividade, segundo informa a Universidade de Vigo, forma parte do programa de relatorios e xornadas paralelo ás JAI 2018, Xornadas sobre Tecnoloxías e Solucións para a Automatización Industrial. De feito, o robot regresará ao campus en marzo para participar na demostración de Industria 4.0 que abrirá as JAI.
Segundo salienta Santos Baldomir, que preside a asociación Echo Base 28th Elite Forces, a conferencia está dirixida a calquera persoa interesada na tecnoloxía e na reciclaxe ou simplemente que sexa seareira dos filmes de Star Wars. seguidora dos filmes. Ademais, considera que tamén pode motivar o público asistente a concienciar da importancia da reciclaxe, amosando os resultados que se poden conseguir só empregando RAEE, Residuos de Aparellos Eléctricos e Electrónicos. “O droide está feito nun 98% con material reciclado, o que axuda a concienciar sobre a reutilización do lixo electrónico”, destaca Santos Baldomir, e na súa construción empregáronse paus de vasoira, unha roda dun carro de supermercado, parte dun farol circular, ademais de pezas impresas en 3D, 150 LED e un motor de aspiradora para que o pequeno droide sexa quen de moverse e iluminarse, sempre teledirixido da man de Santos Pérez mediante unha aplicación móbil que vai conectada ao cerebro de R2D2, feito a partir dunha placa base libre de Arduino.


Categorías: Ciencia

Amena en casa estrea bonos de 20 GB adicionais por 9,95 euros

Xov, 01/18/2018 - 20:30

Dende o ano 2013 Amena propón o uso de conexións móbiles 4G como solución para gozar de banda larga no fogar, mellorando as súas condicións ano tras ano, de xeito que partía dun volume de datos mensual de 10 GB até chegar aos 40 GB actuais, o que é unha interesante oferta por 29,95 euros/mes, que vén de mellorar coa posibilidade de poder engadirlle até 5 bloques de 20 GB adicionais por 9,95 euros cada un. Superado o volume de datos contratados a velocidade de conexión baixa até os 128 Kbps.
As conexións Amena en casa carecen de custos de instalación e cota de liña, podendo empregarse simplemente con conectar o seu router a corrente eléctrica onde haxa cobertura 4G, pasando así a gozar dunha conexión con velocidades de entre 20 e 50 Mbps de baixada (con picos de até 150 Mbps), o que en moitos casos é máis rápido que as conexións de ADSL. Outra vantaxe deste tipo de conexións é que son móbiles, ou sexa, que poden empregarse en distintos domicilios, polo que pode resultar práctico para familias que teñan unha segunda vivenda.

Categorías: Ciencia

Carlos Abal, novo presidente de Ineo

Xov, 01/18/2018 - 14:37

A asociación Ineo, a referencial alianza de empresas galegas de novas tecnoloxías, ten novo presidente. Trátase de Carlos Abal, que substitúe no seu cargo a Giovanni Giardina, o principal responsábel da entidade dende outubro de 2016. Segundo fixo saber Giardina sobre o peche da súa andaina á fronte de Ineo, o seu labor á fronte da entidade tiña dende a súa orixe unha natureza temporal, de tempo limitado, xa que o seu obxectivo foi o de impulsar a presidencia rotativa dentro da xunta directiva, “para así garantir a esencia participativa e colaborativa que rexe a entidade”. Por este motivo, Giardina non se desvincula da directiva senón que seguirá nela como secretario-tesoureiro, cedendo o seu cargo (previo acordo unánime dos demais membros da xunta), a Carlos Abal, anterior secretario-tesoureiro.
Pola súa banda, Carlos Abal, socio e director técnico da empresa Open Soft Servizos Informáticos, fixo saber que dará continuidade ás liñas de acción marcadas pola xunta directiva ao comezo do seu mandato: “Póñome á fronte de Ineo con moita ilusión para continuar facendo realidade os obxectivos que nos marcamos ao comezo do mandato. Por tanto, non haberá ningún cambio de estratexia, somos a mesma directiva e seguiremos co plan de acción que iniciaramos, simplemente houbo un cambio da cabeza visíbel da asociación”. Segundo engadiu respecto dos programas de estratexias futuras, “como representantes do sector TIC galego, seguiremos traballando para crear sinerxías a nivel nacional e internacional para as nosas empresas, para darlles visibilidade e un mellor posicionamento, axudalas a que sexan máis competitivas e para capacitar aos nosos profesionais, como viñemos facendo ata a data”.
O novo presidente de Ineo foi o encargado de inaugurar esta mañá, xunto con Jorge Cebreiros, presidente da Confederación de Empresarios de Pontevedra (CEP), unha xornada organizada en Vigo por ambas as entidades sobre o novo regulamento europeo de protección de datos e canon dixital, que contou cun centenar de asistentes. Na súa intervención, Carlos Abal salientou a relevancia desta xornada para coñecer as novidades e esixencias que introduce o novo regulamento: "Nas empresas aínda se detecta descoñecemento e unha falta de adaptación ás esixencias do mesmo". Así mesmo, engadiu que “estamos ante unha normativa bastante ríxida, onde as sancións ligadas aos incumprimentos son severas, polo que é moi importante unha pronta e rápida adaptación”.
Como dixemos, na cita participaron representantes de preto de 100 entidades galegas de distintos sectores. O seu obxectivo foi coñecer, de primeira man, os novos marcos regulamentarios no ámbito de protección de datos e canon dixital, e informarse dos seus principios reitores, implicacións prácticas e as posíbeis sancións derivadas do seu incumprimento.
Os encargados de detallar as novidades sobre as devanditas cuestións foron os avogados Jose Nogueira, experto en sector TIC e director executivo (CEO) en Sistemius; Francisco J. Abalde, socio de Auren Avogados; e Fabián Plaza, experto en protección de datos e dereito informático.

Categorías: Ciencia

Equipos parcheados contra Meltdown e Spectre experimentan reinicios frecuentes

Xov, 01/18/2018 - 14:37

As medidas de seguridade para mitigar as ameazas de Meltdown e Spectre continúan a dar que falar, e dende Intel Navin Shenoy recoñece que as últimas actualizacións de firmware que publicaron están a provocar problemas de reinicios en numerosos equipos, incluíndo procesadores das últimas xeracións, polo que están a realizar probas para corrixir os erros reportados. Admiten ter reproducido os fallos internamente en diferentes configuracións, polo que confían en identificar a cousa e corrixir o problema en breve.
Dende Intel tamén están a continuar o seu seguimento sobre o impacto no rendemento dos equipos que teñen os parches de seguridade, especialmente no ámbito dos grandes servidores para servizos na nube, que son os máis afectados polas medidas de mitigación.
Aínda que cada caso é un mundo, de xeito xeral aseguran que os sistemas de medición de rendemento máis comúns indicarían que o impacto dos parches nos servidores corporativos e na nube sería de até o 2%; no que se refire ao procesamento de transaccións en liña o impacto sería dun 4%; pero cando falamos de sistemas de almacenamento o impacto é moi superior, de xeito que en condicións extremas pode caer o rendemento un 18% (que en certos escenarios chegaría ao 25%).
Canto máis imos sabendo sobre este espiñento tema máis claro queda que os usuarios particulares serían os menos afectados, mentres que as grandes empresas e os servizos na nube son os que máis terían que temer tanto dos problemas de rendemento tras aplicar os parches como da propia ameaza á seguridade que poden supor as vulnerabilidades detectadas.

Categorías: Ciencia

Xulio Ferreiro e Raúl Ordóñez participarán no vindeiro Coruña Bloggers

Xov, 01/18/2018 - 13:14

Esta semana comentamos que Xulio Ferreiro, alcalde da Coruña, é o sexto rexedor con máis seareiros en Facebook e Twitter de España segundo un estudo, e casualmente veñen de desvelar dende Coruña Bloggers que Ferreiro será un dos relatores da edición décimo cuarta deste encontro de blogueiros e entusiastas en xeral das redes sociais e da tecnoloxía, para a que abrirase a inscrición de balde o vindeiro luns.
Este encontro de carácter solidario, no que os asistentes en vez de pagar por asistir acoden con alimentos non perecedoiros para achegar á Cociña Económica, contará tamén con outro relator, Raúl Ordóñez, consultor e formador TIC que estivo detrás da organización de numerosos eventos como os Premios Bitácoras, interQué, e o que nos colle máis preto, inLugo.
Ao abrirse a solicitude de inscricións ao evento darase conta das temáticas que abordarán Ferreiro e Ordóñez neste encontro que leva recollidos máis de dous mil quilogramos de alimentos durante as súas primeiras 13 edicións, de xeito que agora teñen como reto chegar ás tres toneladas en 2018.

Categorías: Ciencia

Os iPhone ofrecerán a opción de non perder rendemento con baterías degradadas

Xov, 01/18/2018 - 12:22

O director xeral de Apple, Tim Cook, ofreceu unha entrevista en exclusiva para ABC News na que deu conta de que a empresa de Cupertino investirá 350.000 millóns de dólares na economía estadounidense nos vindeiros 5 anos creando máis de 20.000 empregos, aproveitando a ocasión para falar da última polémica ao redor da compañía: a ralentización dos iPhone con baterías degradadas.
Cook asegura que dende Apple senten moito ter comunicado mal a medida que adoptaron para que os seus smartphones con baterías que perderan capacidade de xeito significativo, pois a súa intención en ningún momento foi facer que os móbiles tivesen un mal rendemento para animar aos usuarios a actualizar os seus terminais, senón que procuraban simplemente evitar reinicios inesperados e reducións drásticas da autonomía. A medida que tomaron para solucionar esta crise de reputación foi, inicialmente, reducir o prezo da substitución de baterías de 89 a 29 euros, pero engadiu que en poucas semanas unha actualización permitirá ao usuario elixir se quere manter o rendemento do seu iPhone ou prefire que se axuste automaticamente en función do estado da batería.

Categorías: Ciencia

Pontevedra e Cambados acollen estes días oito obradoiros de SmartPEME

Xov, 01/18/2018 - 11:37

A Deputación de Pontevedra está a informar estes días da vindeira actividade da rede SmartPEME, unha liña de acción para este arranque de 2018 que vén acompañada dun especial significado: pola nova andaina prevista da man da empresa KPMG, pola incorporación do Viveiro de Empresas do Concello da Estrada e, tamén, polos resultados de participación obtidos en 2017 que pasan por ser os mellores da historia de SmartPEME. Volvendo á actividade deste comezo de ano, a Deputación deu a coñecer o seu programa de obradoiros tecnolóxico-dixitais para as sedes de Cambados (con catro obradoiros) e de Pontevedra (outros catro).
Respecto de Cambados, o Centro Exposalnés acolleu este mércores o obradoiro Crea os teus propios informes: Google Data Studio e seguirá o luns 22 co curso Rendibiliza o teu perfil profesional en Facebook. Esa mesma semana, o xoves 25 de xaneiro, Cambados acollerá o obradoiro Sabes como converter a túa páxina web nunha páxina segura? Por último, o martes 30 de xaneiro, celebrarase o curso Como facturar electrónica mente.
A oficina de Cambados, no Centro ExpoSalnés, atópase no paseo da Calzada, s/n e as inscricións pódense facer no número de teléfono 886 202 020, o correo electrónico info.smartpeme@depo.es ou a páxina web www.smartpeme.depo.es. Todas as actividades comezan ás 19 horas.
Respecto de Pontevedra, este 18 de xaneiro, ás 19.00 horas celébrase o curso Sabes como converter a túa páxina web nunha páxina segura?. A seguinte cita terá lugar o luns 22 de xaneiro, tamén ás 19 horas, cando impartirase a actividade formativa Comercio electrónico para microPEME. Pola súa banda, o mércores 24 de xaneiro, a mesma hora, Pontevedra acollerá o curso Guía de boas prácticas para redes sociais. Por último, o luns 29 de xaneiro organizarase o obradoiro Recursos e ferramentas TIC para o teu negocio. A oficina de Pontevedra, no Edificio Administrativo da Deputación, atópase na Gran Vía de Montero Ríos, s/n e as inscricións pódense facer no número de teléfono 886 202 020, o correo electrónico info.smartpeme@depo.es ou a páxina web www.smartpeme.depo.es.
O Proxecto SmartPEME
SmartPEME é un novo modelo de servizo orientado á mellora competitiva das PEME e á procura dunha melloría nas vendas e na eficacia e eficiencia das tarefas, que abre novos eidos de actuación e acada novos grupos de interese coma os emprendedores, as asociacións empresariais e os axentes de dinamización en concellos.
O devandito obxectivo, nas oficinas do Porriño, Cambados, Pontevedra, Lalín, Ponteareas e Vigo abrangue seguintes actividades: itinerarios de obradoiros temáticos con diversos niveis de dificultade adaptados ás necesidades das empresas, eventos de networking trimestrais coa participación de profesionais de prestixio, colaboración con asociacións e promoción de alianzas institucionais, especialización sectorial dos asesores en función das necesidades da súa área de influencia, kits de asesoramento en novas tecnoloxías a emprendedores, identificación e difusión das necesidades TIC aos provedores de solucións para as PEME e, tamén, impulso de novas carteiras de servizos de asesoramento.

Categorías: Ciencia

Pequefilmes mergulla na virtualidade máis imaxinativa aos máis pequenos da casa

Xov, 01/18/2018 - 11:20

Os vindeiros días a Cidade da Cultura (20 e 21 de xaneiro) vai acoller un evento especialmente indicado para as crianzas e para as nais e os pais que comparten con elas o seu gusto pola animación e os mundos dixitais. Trátase de Pequefilmes 2018, a nova edición do festival de cinema de curtas que este ano incluirá a proxección de máis dun centenar de pezas e a celebración de obradoiros para familias: dúas accións formativas cuxo obxectivo é que pais, nais, fillas e fillos descubran a través do xogo os principios do cinema de animación.
Os obradoiros, un sobre técnicas stop motion con alimentos e outro sobre emuladores virtuais con mesas de luz, achegaranlles formación básica no uso de técnicas e ferramentas de creación audiovisual. Amais de proxeccións e actividades divulgativas, o certame abranguerá votacións e premios do público.
Boa parte das máis de cen curtas que se van exhibir no marco de Pequefilmes foron premiadas e/ou seleccionadas para os máis prestixiosos festivais de cinema infantil, xuvenil e de animación máis importantes do mundo, por exemplo o de Annecy (Francia), o Chicago ICFF, o Animamundi, o Animafest, o Dresdner Kinderfilfest ou o festival de Clermont Ferrand (Francia). As pezas, con orixe en 33 países dos cinco continentes, artéllanse en tres seccións: Pequefilmes Vagamules (de 0a 3 anos), Pequefilmes Miñocas (máis de 4 anos) e Pequefilmes Fanecas (máis de oito). Co obxectivo de subliñar o protagonismo das crianzas que acudan ao certame, fomentando a vertente activa e crítica da súa participación no mesmo, os dous galardóns (Premio Miñocas e Premio Fanecas) serán elixidos polas nenas e nenos do público.

Categorías: Ciencia

A tecnoloxía de Gradiant para o recoñecemento facial dos viaxeiros, presente en FITUR

Xov, 01/18/2018 - 11:04

O salón FITUR que se está a desenvolver en Madrid constitúe unha xanela ao turismo pero, tamén, á innovación de vangarda ligada ao turismo. Un exemplo disto é a solución faceIDNN do Centro Tecnolóxico Gradiant, unha tecnoloxía biométrica cunha completa listaxe de posibilidades para facilitar a operativa dos viaxeiros e dos lugares que acollen os viaxeiros. Por que motivo? Pois porque, entre outras cousas, permite que un establecemento hoteleiro saiba que un cliente é quen di ser (sen a marxe de dúbida e intuición existente nos procedementos tradicionais) só con comparar a súa faciana coa fotografía do DNI, carné de conducir ou pasaporte. A eficacia da solución baséase nas técnicas de recoñecemento facial desenvolvidas por Gradiant, que comproban en tempo real se dúas imaxes pertencen á mesma persoa.
A solución faceIDNN preséntase (até o 21 de xaneiro) en FITUR da man de Roommatik, que conta con presenza de seu na feira madrileña (pavillón 1010F30) e que permite probar a tecnoloxía galega ao tempo que dá conta da súa experiencia con ela na procura dun chek-in seguro en hoteis.
Segundo nos conta Gradiant, faceIDNN constitúe o elemento de seguridade, usabilidade e calidade que moitas das empresas do sector turístico estaban agardando. Entre as principais características desta tecnoloxía figura a de ter sido equipada cun motor de recoñecemento facial baseado en Deep Learning axeitado para os procesos de onboarding dixital (solucións de identificación electrónica de persoas) e de Know Your Customer (KYC). Por outra banda, faceIDNN tamén é salientábel por cumprir cos requirimentos legais que se lle esixen a este tipo de ferramentas, e, en palabras de Gradiant, “adáptase perfectamente aos procesos de check-in que requiren o carné de identidade do cliente ou a verificación co pasaporte”. Ademais, engade o centro tecnolóxico galego, “evita os ataques de suplantación de identidade mediante o emprego de mecanismos de detección de vida que combinan técnicas colaborativas e non colaborativas”.

Categorías: Ciencia

As mellores praias galegas para o surf estarán dispoñíbeis nunha app de Turismo de Galicia

Mér, 01/17/2018 - 23:05

Hoxe o salón de turismo FITUR que se está a celebrar en Madrid acolleu a presentación de Galicia Surfing, unha iniciativa para promover o turismo surfeiro da nosa terra a través de diferentes soportes e materiais, incluída unha aplicación para móbiles. A proposta, dada a coñecer pola directora de Turismo, Nava Castro, identifica as 100 praias galegas coas mellores condicións para practicar o devandito deporte. A idea da iniciativa, fixo saber Castro, é impulsar o potencial turístico da nosa costa, que abrangue 1.500 quilómetros de extensión e que presenta o 20% do total do Estado. Segundo engadiu, moitos destes quilómetros son especialmente axeitados para o surf a todos os niveis e na maior parte do ano.
Galicia Surfing, en cuxa presentación participou tamén o deportista galego Gony Zubizarreta, achéganos ás características e á localización de areais tan senlleiros como Pico de Patos, Montalvo, Río Siera, Nemiña, Soesto, Malpica, Razo, Caión, Orzán, Ondalonga, Doniños, Campelo, Pantín, Machacona, Peizás ou Oliñas.
Todas elas aparecen no material de promoción editado, cun mapa que identifica cada recurso e ofrece información de servizo. Ademais, disporase dunha aplicación móbil para facer consultas de xeito actualizado. A través dela poderán atoparse tamén as opcións de viaxe, denominadas Galicia Surf Escape (no caso das escapadas de tres días de duración), Galicia Surftrip (para as estadías de sete días) e Galicia Surfari (nas viaxes de 15 días na nosa Comunidade).

Categorías: Ciencia

Notábel presenza das escritoras galegas nas coleccións dixitais da BNE lanzadas en ePub

Mér, 01/17/2018 - 17:30

Autoras galegas como Rosalía de Castro, Emilia Pardo Bazán ou Concepción Arenal son algunhas das escritoras cuxas obras veñen de dar o chimpo ao formato ePub, co fin de achegarse ao máximo ás novas xeracións e á comunidade (crecente) de lectores en formatos dixitais. Así nolo contan hoxe as entidades estatais Red.es e a Biblioteca Nacional de España, que, no marco do seu convenio de traballo conxunto, están a incluír no devandito formato (compatíbel con tabletas, e-readers e mesmo con móbiles) as coleccións dixitais da Biblioteca (a Biblioteca Dixital Hispánica). A iniciativa, máis polo miúdo, supón a posta a disposición dunhas 700 obras en arquivos ePub.
Hai obras de literatura, lingua, historia, xeografía, medicina, biografías e viaxes. A maiores, achégase unha colección de mulleres autoras en cuxa escolma traballou un grupo de investigación da UCM e que xa está dispoñíbel na Biblioteca Dixital Hispánica. Para esta colección de e sobre mulleres recompiláronse títulos de Rosalía de Castro, Emilia Pardo Bazán, Carmen de Burgos, Hildegart ou Concepción Arenal, e tamén obras como Un retrato de muller de José Selgas, A emancipación da muller de Jacques Novicow ou A muller de todo o mundo de Alejandro Sawa.
Igualmente, están xa accesíbeis obras de literatura do século XIX e XX de autores tamén galegos como Valle-Inclán, aos que se engaden Lorca ou Alarcón, entre outros moitos.
Os libros poden descargarse en arquivo ePub ben mediante a icona habilitada na listaxe de resultados, ou ben unha vez accedendo directamente á obra. O obxectivo deste proxecto é duplo: por unha banda permitir a lectura destas obras en dispositivos electrónicos e así poder ofrecer novos formatos de acceso ás coleccións dixitalizadas da BNE, e pola outra corrixir textos obtidos mediante recoñecemento óptico automático dos documentos en PDF.

Categorías: Ciencia

Páxinas