códigocero

Subscribirse a Orixe códigocero
Información sobre novas tecnoloxías en Galicia e en galego.
Actualizado: fai 6 horas 31 min

A carga sen fíos Qi queda sen competencia

Lun, 01/08/2018 - 18:05

Durante os últimos anos vimos como chegaban distintas tecnoloxías de carga sen fíos baseadas en indución, das que a tecnoloxía Qi parecía ser a máis forte, mentres que as plataformas competidores, Alliance for Wireless Power e Power Matters Alliance, tiveron que unir forzas, o que non resultou dabondo e agora o principal representante desta alianza, Powermat, anuncia que dá o brazo a torcer e sumarase ao Wireless Power Consortium (WPC) para contribuír ao ecosistema de Qi.
Lembremos que a tecnoloxía Qi leva presente en móbiles como os Nokia Lumia ou distintos Samsung Galaxy dende hai bastantes anos, converténdose practicamente no estándar a seguir (e que incluso adoptou Apple hai poucos meses), resultando moi complicado ás tecnoloxías competidoras facerse un oco no mercado. O feito de que agora todos os axentes traballen baixo o mesmo paraugas facilitará a evolución da tecnoloxía de carga por indución, o que poderá ser moi positivo para os consumidores, xa que será máis doado adquirir produtos con esta tecnoloxía e máis probable que en lugares públicos se instalen puntos de carga.
O director xeral de Powermat, Elad Dubzinski, recoñece que a adopción de Qi por parte de Apple evidenciou o éxito desta tecnoloxía, polo que non tiña sentido fuxir dun estándar que actualmente está amparado por máis de 360 compañías.

Categorías: Ciencia

Valga acolle en xaneiro media ducia de obradoiros de alfabetización dixital

Lun, 01/08/2018 - 16:43

O concello de Valga vai acoller este mes de xaneiro media ducia de actividades para introducir á veciñanza nos principais usos e vantaxes das novas tecnoloxías da información. Os obradoiros do programa formativo, centrado na aula CeMIT local (emprazada no auditorio municipal), teñen o nexo de facer fincapé na alfabetización dixital da cidadanía, como por exemplo as actividades para as que aínda hai prazas libres: o curso Crea o teu email, que se desenvolverá entre os días 15 e 17, e o curso Fai a túa compra online, que se celebrará entre os días 22 e 31 de xaneiro.
Amais das actividades devanditas, desenvolverase o curso Iniciación á informática, con datas por confirmar, e os cursos Personaliza o teu calendario, Descubre Google Earth e Sorprende coas túas presentacións en Impress.
Por outra banda, a aula tamén informa que o vindeiro 26 de xaneiro ás 10 horas realizaranse no dito local TIC os exames presenciais dos cursos EMA de teleformación. Soamente poderán inscribirse nestas probas as persoas que activaran a opción de Cuestionario de avaliación na plataforma de teleformación EMA, unha vez seguidos todos os contidos do curso. Unha vez realizada a súa inscrición, é necesario ter recibido o correo confirmatorio de matriculación para asistir ás probas.

Categorías: Ciencia

nVIDIA presenta as súas achegas aos vehículos autónomos

Lun, 01/08/2018 - 14:30

Comeza a ser unha tradición para nVIDIA que a súa participación no CES de Las Vegas sexa o lugar no que dan conta dos seus avances en computación para vehículos autónomos, deixando un pouco de lado as súas populares tarxetas gráficas, e este ano deron conta de nVIDIA Drive Xavier, os seus novos procesadores para vehículos que anunciáronse hai un ano e que durante este trimestre chegarán ao mercado.
Xavier é un dos sistemas integrados nun chip máis complexos creados nunca, con máis de 9.000 millóns de transistores. Conta cun procesador de 8 núcleos, unha gráfica Volta con 512 núcleos, aceleración para deep learning, aceleración para visión artificial e procesadores para vídeo 8K con HDR, todo compatible cunha plataforma de software de nVIDIA orientada á intelixencia artificial.
Con este tipo de solucións nVIDIA non só busca conseguir a maior potencia de procesamento posible, senón tamén reducir o consumo, conseguíndose actualmente a realización de 30 billóns de operacións por segundo con só 30 watts, o que supón multiplicar por 15 a eficiencia enerxética fronte á anterior xeración desta tecnoloxía.
Xavier é un dos compoñentes clave da plataforma de computación nVIDIA Drive Pegasus AI, que congregaría a potencia de cálculo dun camión cheo de ordenadores no tamaño dunha placa de matrícula e que sería o primeiro superordenador para vehículos do mundo deseñado para robotaxis con autonomía de nivel 5, ou sexa, totalmente autónomos en calquera escenario. Pegasus integra 2 Xavier e un par de gráficas nVIDIA da vindeira xeración, de xeito que non veremos unidades desta tecnoloxía ate mediados de ano. Espérase que sexa capaz de procesar 320 billóns de operacións por segundo.
Estes avances non están a lanzarse ao tolo, senón que van da man de alianzas con grandes fabricantes e compañías, anunciando en Las Vegas nVIDIA que pecharon acordos con Volkswagen, Uber, Aurora e outras compañías, de xeito que confían en poder facer posible que o servizo de Uber non precise de condutores humanos no futuro. Actualmente está a probar o uso de tecnoloxía de nVIDIA de coches autónomos nunha frota de proba de SUV Volvo XC90 e tamén exploran esta tecnoloxía en camións, tendo realizado xa máis de 2 millóns de millas en máis de 50.000 desprazamentos.
No caso de Volkswagen, neste momento están enfocados no uso da tecnoloxía de nVIDIA para permitir unha copilotaxe intelixente, ou sexa, que os seus vehículos aproveiten os seus sensores externos e internos para axudar na condución do novo I.D. Buzz, vehículo inspirado no clásico VW MicroBus, que agora funciona de xeito eléctrico e avanza cara á condución totalmente autónoma. A gama de vehículos I.D. de Volkswagen prevé iniciar o seu lanzamento en 2020, de xeito que en 2025 poida contar xa con máis de 20 modelos.

O clásico VW MicroBus inspira a un novo vehículo eléctrico e con copilotaxe intelixente
Categorías: Ciencia

Kuka, HP e o Grupo PSA mostrarán nas JAI as grandes vantaxes da Industria 4.0

Lun, 01/08/2018 - 13:38
O profesor José Ignacio Armesto da Universidade de Vigo

Paseniño pero sen pausa vai quecendo motores a sétima edición das Xornadas sobre Tecnoloxías e Solucións para a Automatización Industrial (JAI), con toda probabilidade o evento máis galego máis referencial en materia de Industria 4.0 e, sen dúbida, un dos máis importantes do seu ámbito a nivel estatal. Este ano, ademais, o evento conta co engadido de ser a edición con máis empresas participantes e con máis actividades de divulgación e traballo en rede arredor de cuestións como a robótica colaborativa, a impresión 3D e a realidade virtual. Ou sexa, arredor dos diferentes piares da nova revolución tecnolóxica. En total, concorrerán 20 compañías, mostrando potencial e, asemade, procurando talento. Por exemplo o Grupo PSA (Juan José Areal, falando de Automoción 4.0), Repsol (Hugo Pachón, cun relatorio sobre técnicas smart na industria de proceso), Navantia (Miguel Vilar), HP (Jaume Homs, introducindo aos presentes nas vantaxes da tecnoloxía 3D Multi Jet Fusion de HP) ou Kuka (David Alonso, mostrando o potencial dos robots como compañeiros do traballo do futuro).
Dende outras beiras acoden tamén os nosos centros tecnolóxicos e unha manchea de estudantes, cada un/unha con cadanseu currículo no cartafol. As JAI celébranse en Vigo (Escola de Enxeñaría Industrial) entre o 12 e o 16 de marzo e veñen da man do profesor do Departamento de Enxeñaría de Sistemas e Automática (Universidade de Vigo), José Ignacio Armesto.
Entre as grandes novidades deste ano, amais das devanditas, atópase o fornecemento dun espazo específico para demostracións de proxectos innovadores, no que os centros tecnolóxicos galegos exporán os seus deseños. A previsión, segundo lembrou estes días o profesor Armesto, é superar o milleiro de asistentes da anterior edición.
Entre os grandes obxectivos do evento figura novamente o de marcar diferenzas con respecto a outros eventos tecnolóxicos, apostando de cheo por estreitar o contacto entre empresas e mocidade. Búscase, polo tanto, que estudantes, fabricantes e usuarios profesionais poidan interactuar nun contexto tecnolóxico e universitario.
O programa, que abrangue máis de 35 horas de presentacións técnicas e relatorios, abordará temas como robótica colaborativa e sensitiva, robótica móbil, seguridade industrial, análise de datos, ciberseguridade, IoT (Internet das Cousas), xemelgo dixital, mecatrónica, información a gran escala (Big Data), intelixencia artificial, comunicacións sen fíos ou eficiencia enerxética. Para isto, contarase con preto de 50 relatores procedentes de diferentes cidades e países, que presentarán as principais novidades e tendencias do sector.
Participarán vellas coñecidas das JAI como Phoenix Contact, Rockwell Automation, Schneider Electric e Siemens e outras de recente creación como Universal Robots ou MiR.
Por outra banda, no programa de relatorios estarán presentes compañías doutros sectores que dependen da automatización no seu proceso produtivo, entre as que se contan PSA Peugeot Citroën (que presentará as innovacións relacionadas coa industria 4.0 que aplican na factoría viguesa), Repsol (que mostrará as novas técnicas do proceso químico que empregan, por exemplo, na refinaría da Coruña) e Navantia (que dará a coñecer o seu proxecto Estaleiro 4.0, no que utilizan técnicas de realidade virtual no deseño dos seus produtos). Tamén participarán nos relatorios representantes de centros tecnolóxicos como CTAG, Gradiant ou Aimen, visualizando as súas iniciativas de innovación e desenvolvemento vencelladas aos ditos eidos e procesos industriais.
As xornadas poderán seguirse tanto de xeito virtual como presencial, neste último caso o prazo de inscrición remata o 12 de febreiro.


Categorías: Ciencia

Un curso en Compostela introducirá ao deseño de videoxogos

Lun, 01/08/2018 - 11:38

Os Círculos de Aprendizaxe en Galicia, grupo de persoas que se xuntan para adquirir ou complementar coñecementos a partires de contidos e cursos dispoñibles en liña (MOOC), inician mañá en Santiago de Compostela un curso introdutorio ao deseño de videoxogos, que impartirase durante 4 semanas os martes e mércores de 19:30 a 21:00 horas, servindo para amosar os aspectos que hai que considerar no videoxogos e que permita abordar individualmente os temas que se consideran nucleares: deseño, arte, motor do videoxogo e xogabilidade.
Este será o primeiro dunha serie de 6 cursos de especialización en videoxogos con credencial universitaria, resultando de utilidade para axudar a identificar, nomear e explicar a importancia dos diferentes aspectos do deseño de videoxogos, para poder avaliar as partes que nos interesan de cara a seguir o curso específico sobre tal temática.
O curso precisa de inscrición previa e aínda que os Círculos de Aprendizaxe son de acceso libre e de balde, aceptan contribucións, valorándose esta actividade en 25 euros ou 10 euros e 15 landras. A facilitadora desta actividade é Cora Coco, consultora en enxeñaría cultural e artística.

Categorías: Ciencia

En marcha unha campaña en Kukumiku para devolver un monte de Lousame ao bosque galego

Lun, 01/08/2018 - 11:37

Pode o micromecenado e o activismo en liña enfiar a reparación definitiva dos nosos montes? Se atendemos ao que nos conta as asociacións Verdegaia e Coluna Sanfíns, non é só que poidan, é que tamén é factíbel abrir a vía para que outras contornas con semellantes problemas, sexan quen de facelo. Segundo a organización, a resposta ao problema da eucaliptización, dos lumes e da perda de diversidade, estaría en boa medida na fórmula do crowdfunding. Para demostralo e para mostrar como se pode recuperar un monte en concreto (o monte de Froxán, en Lousame, A Coruña) veñen de pór en marcha na plataforma Kukumiku (crowdfunding solidario) unha campaña para amadriñarmos árbores ou fanegas enteiras (2.100 m2). A iniciativa arrancou a semana pasada e xa ten recadados 3.150 euros (este luns 8 de xaneiro). Ademais, recibiu máis dun centenar de doazóns, a case tres semanas para o remate da campaña.
Como dixemos, do que se trata é de amadriñar árbores no devandito monte de Froxán, distinguido en 2017 por ser o primeiro en todo o Estado español a ser incluído no rexistro das Nacións Unidas de Áreas Conservadas por Pobos Indíxenas e Comunidades Locais. Coas achegas recibidas por Internet as entidades promotoras (Verdegaia, a Sociedade Coluna Sanfíns e a comunidade de montes local) queren transformar un total de 10 hectáreas dese monte, actualmente inzadas de masas de eucaliptos, nun bosque de frondosas autóctonas. En palabras de Iolanda Mato, unha das coordinadoras do proxecto, isto impedirá no futuro “o avance de lumes, garantirá o regulación hídrica e restaurará a biodiversidade actualmente degradada pola expansión de especies exóticas”.
Segundo engaden as comunidades impulsoras da iniciativa, de acadarse o obxectivo óptimo de financiamento, plantaranse máis de 13.000 árbores, sobre todo a través do programa de voluntariado Montescola, que implica as nosas crianzas no coñecemento, na restauración e na posta en valor do monte veciñal (Montescola xa mobilizou en 2017 máis de 300 escolares galegos acompañados das súas familias e docentes).
As comunidades tamén sinalan que as achegas realizadas a través da Fundación Kukumiku son deducíbeis en Facenda e permiten aínda participar en varios sorteos, incluíndo o dunha noite para dúas persoas nunha casa rural ou de varios exemplares da Guía para o descenso enerxético, unha publicación en defensa do monte comunal como “fundamento para o futuro do país”. Desde as entidades promotoras salientan que o resultado final desta iniciativa será “un bosque único, froito da participación cidadá” e convidan a todo o mundo a facer parte e axudar na súa difusión nas redes sociais e no “boca-a-boca”.

Categorías: Ciencia

AXEGA fortalece o seu equipamento cun dron operativo en condicións extremas

Lun, 01/08/2018 - 10:14

Os drons, en materia de resposta ante incidencias (operacións de rescate, localización de lumes, salvamento, achado de persoas extraviadas), teñen un amplo potencial de efectividade ao incrementar a nosa capacidade de ver, ouvir, atopar e xerar información de campo. Co fin de seguir tirando o máximo proveito destes aparellos, e descubrir todo o seu potencial, a Axencia Galega de Emerxencias (AXEGA) vén de adquirir unha nova nave non tripulada de última xeración, desenvolvida polo fabricante DJI. Con esta incorporación fortalécese a operativa da Unidade Operativa de Drons (UOD), tanto a nivel Estatal como da Unión Europea a través da EENA (Asociación Europea do número único de Emerxencias).
Entre as características máis salientábeis do dron atopan as seguintes: conta con certificación IP-43; sensores antichoque de varrido 360 graos; dobre Gimbal con posicionamento variábel; zoom óptico de vídeo de 30x; termografía con obxectivo de 19mm; ou batería calefactada con posibilidade de voo con baixas temperaturas. Ademais, a aeronave adáptase plenamente aos requirimentos da nova normativa neste eido e amplía a súa operatividade ao poder voar con chuvia e baixas temperaturas.
Balance de 2017
A UOD da AXEGA vén de prestar durante o ano 2017 un total de 20 servizos, a maioría en colaboración coas forzas e corpos de seguridade na busca de persoas desaparecidas, aínda que tamén en dispositivos de carácter preventivo, divulgativo-formativo e como ferramenta de autoprotección do Grupo de Apoio Loxístico da AXEGA, integrándose no dispositivo de seguridade do continxente galego desprazado a Portugal a raíz da vaga de lumes forestais, a fin da detección de eventuais atrancos nas estradas por arbores/obstáculos que dificultaran o desprazamento dos vehículos de grandes dimensións mobilizados.

Categorías: Ciencia

O programa Efervescencia logrou máis de 52.000 descargas e escoitas en 2017

Ven, 01/05/2018 - 16:51
Manuel Vicente, director e presentador do programa Efervescencia

Os responsábeis do programa radiofónico Efervesciencia impulsado pola Universidade de Santiago veñen de enfiar o cambio de ano facendo balance da súa actividade recentemente, moi salientábel en materia de seguimento en liña. Segundo fan saber, o programa acadou en 2017 máis de 52.000 descargas e escoitas a través da plataforma Ivoox, unha das moitas aplicacións de podcast dende a que se pode acceder a todas as emisións. Como lembraremos, Efervesciencia emítase dende hai unha década na Radio Galega e é un dos mais veteranos programas de divulgación científica da grella das radios en España.
O programa está producido pola USC e emítese todos os domingos ás 15.00 horas grazas ao financiamento da Fundación Española para a Ciencia e a Tecnoloxía (FECYT) do Ministerio de Economía, Industria e Competitividade. Ao longo do pasado ano emitíronse 42 programas novos, ademais de 12 reemisións en verán. Entre eles, os seus responsábeis destacan a gala do décimo aniversario que tivo lugar o 30 de setembro no Teatro Principal de Compostela e na que interveu unha nutrida representación dos mais de mil investigadores que pasaron polos seus micrófonos, como Ángel Carracedo, José Edelstein, Minia Manteiga, Ana Ulla ou Fernando Aguado. Tamén destacan a gala Stat Wars: O espertar dos datos, que anunciamos en Código Cero o pasado mes de novembro e que conseguiu, finalmente, a participación de case medio milleiro de cativos de toda a nosa xeografía.

Categorías: Ciencia

O Concello de Mugardos fortalece cunha nova plataforma a súa comunicación coa cidadanía

Ven, 01/05/2018 - 16:35

O Concello de Mugardos rematou 2017 poñendo en marcha unha plataforma dixital de información á cidadanía. O servizo, que xa está en marcha dende decembro, céntrase basicamente en acurtar distancias coa veciñanza en materia de comunicación e en incentivar a súa participación na vida pública local, achegando as novas do municipio por correo electrónico, mensaxes de texto no móbil ou mensaxes instantáneas a través da aplicación Telegram.
A plataforma foi dada a coñecer pola alcaldesa Pilar Díaz, que salientou que se trata dun novo instrumento “que reforza as canles de comunicación” do Goberno local coa veciñanza e que permite “achegarlle o traballo institucional, moitas veces pouco coñecido”. O servizo está dispoñíbel en concellodemugardos.tcinforma.com.
A plataforma leva o nome TCI (Túa Cidade Informa) e, segundo informou a rexedora, a súa creación e posta en marcha foi adxudicada á empresa Codery Os Solutions por 3.000 euros. Durante 2018 a aplicación estará en fase de probas e validación, avaliando os responsábeis municipais a súa eficacia en materia de transparencia e seguindo moi de preto o nivel de uso acadado entre unha poboación, a mugardesa, “que polo seu grao de envellecemento non está afeita a recibir información mediante este tipo de ferramentas”, sinalaron fontes do Concello, engadindo que o emprego da plataforma vaise impulsar coa distribución de cartaces e dípticos para informar á cidadanía da existencia do servizo e acadar o maior número de usuarios.

Categorías: Ciencia

O impacto da mitigación de Meltdown está a ser desigual

Ven, 01/05/2018 - 14:21
Nalgunhas instancias de AWS EC2 o impacto dos parches aplicados esta semana foi máis que notable no consumo de recursos.

Inicialmente falouse de que a mitigación de Meltdown podería ocasionar un importante impacto no rendemento dos procesadores Intel, non parece que iso sexa certo no caso de equipos de consumo, e serían os equipos destinados a plataformas na nube os que padecerían ralentizacións, aínda que non todos por igual, como están a comprobar nas súas carnes os usuarios de servidores na nube de Amazon, que están a ver como as súas máquinas virtuais EC2 están a incrementar o seu consumo de CPU tras recibir as últimas actualizacións de seguridade só nalgúns casos, mentres que dende Amazon aseguran que na meirande parte das instancias non detectaron un impacto significativo dos parches. Amazon comprométese a axudar a solucionar os casos problemáticos.
No caso da outra grande vulnerabilidade, Specre, o rendemento non serían un problema, como confirman dende Google, compañía que vén de publicar un método de mitigación chamado Retpoline, que están a aplicar aos seus sistemas, e que protexería dos ataques de Spectre sen afectar de xeito perceptible ao rendemento dos servidores.
Microsoft aínda non aplicou os parches aos servidores de Azure (estando xa programada tal actualización) pero xa deron conta de que as súas consolas Xbox non teñen problema cos as vulnerabilidades desveladas esta semana, o que non sorprende por estar baseadas en procesadores de AMD.
Intel tamén declarou que xa conta parches que distribuirá a finais da vindeira semana que protexerán aproximadamente ao 90% dos procesadores lanzados nos últimos 5 anos, de xeito que boa parte do mercado poderá protexerse rapidamente das vulnerabilidades detectadas. Matizan que o impacto no desempeño dos equipos dependerá moito da carga que teña cada un, e confían en que as sucesivas actualizacións que vaian xurdindo mitiguen aínda máis este impacto que na meirande parte dos casos será imperceptible.

Categorías: Ciencia

Meltdown e Spectre afectan aos ordenadores e dispositivos móbiles de Apple

Ven, 01/05/2018 - 13:05

Non cesan as informacións ao redor de Meltdown e Spectre, e agora é Apple a compañía que da un paso adiante para insistir en que o problema de seguridade afecta a todos os sistemas operativos e dispositivos informáticos modernos, para recoñecer que non só todos os sistemas Mac están comprometidos, senón que tamén acontece o mesmo cos dispositivos con iOS, aínda que chaman á tranquilidade ao asegurar que polo momento os consumidores non corren risco, aínda que para unha protección futura recomendan actualizar iOS, macOS e tvOS para manter os dispositivos protexidos deste tipo de vulnerabilidades.
Curiosamente o Apple Watch é un dispositivo que polo momento non estaría afectado por Meltdown. Pola contra, o navegador web Safari sería vulnerable a Spectre, polo que en breve recibirá unha actualización para procurar defenderse deste tipo de ataque.
Aínda que nun principio falouse de que as medidas de seguridade para evitar a Meltdown provocarían unha redución de rendemento nos equipos de entre o 5 e o 30%, dende Apple aseguran que os parches que aplicaron non teñen un impacto perceptible nun uso normal dos seus equipos, para tranquilidade dos consumidores.

Categorías: Ciencia

A Estrada pon a disposición do programa SmartPEME o seu Viveiro de Empresas

Ven, 01/05/2018 - 11:42

Semella que amais das novidades que citamos recentemente (a nova adxudicataria, un programa de actividades máis amplo e ambicioso), a rede TIC de formación e asesoramento impulsada pola Deputación de Pontevedra, a rede SmartPEME, vai recibir máis folgos co novo ano Segundo puidemos saber, estase a preparar o terreo para que as sedes operativas de SmartPEME (en Pontevedra, Vigo, Porriño, Ponteareas, Cambados e en Lalín) incrementen o seu número coa incorporación de A Estrada. Será a partir do vindeiro mes, contando co apoio integral do Concello local, que pon a disposición do programa da Deputación de Pontevedra as instalacións do seu Viveiro de Empresas.
O obxectivo do Goberno estradense é achegar asesoramento tecnolóxico avanzado aos emprendedores, empresarios e autónomos locais. Estas novidades foron dadas a coñecer polo tenente de alcalde, Juan Constenla, durante a presentación de SmartPEME na Estrada.
Na presentación, Constenla estivo acompañado polos deputados Carlos López Font e Javier Dios, por técnicos de SmartPEME, así como representantes da Asociación de Comerciantes da Estrada, da Asociación Comarcal de Empresarios, da Asociación de Fabricantes e Comerciantes do Moble, da Asociación de Xóvenes Empresarios de Pontevedra e dos responsables da empresa Central Científica Galega, que acaba de incorporarse hai uns días ao Viveiro de Empresas.
Segundo fixeron saber, o horario de atención ao público na Estrada será dúas veces ao mes, concretamente o primeiro e o último mércores en horario de 10.00 a 14.30 e de 16.00 a 19.00 horas variando en agosto que será de mañá, de 09.00 a 14.30 horas, e terá lugar no Viveiro de Empresas. Será un servizo de asesoramento individualizado, cen por cen de balde, no que cada interesado contará cunha bolsa de 10 horas para poder informarse sobre cada cuestión. O Concello e a Deputación tamén engadiron que a este servizo súmase un asesoramento vía telemática que ofrece unha solución a todas as empresas que non teñen tempo para acudir de maneira presencial ás ditas dependencias. Ademais, tal e como comentaron os técnicos encargados deste proxecto, levarase a cabo un obradoiro cada mes, con posibilidade de ampliar o número segundo a demanda e as necesidades que vaian xurdindo. Tamén se fixo saber que “debido a gran influencia do sector agrario e gandeiro en Tabeirós-Terra de Montes”, daráselle forma a un programa piloto para “incentivar a implantación das novas tecnoloxías que melloren o rendemento e a produtividade neste sector”. O obxectivo é converter o Viveiro no “referente tecnolóxico para asociacións empresariais e os seus asociados nas comarcas”.
Sobre SmartPEME
Recordar que SmartPEME é un modelo de servizo orientado á mellora competitiva das pequenas e medianas empresas e á procura dunha melloría nas vendas e na eficacia e eficiencia das súas tarefas. “Este proxecto”, explica a Deputación de Pontevedra, “abre novos eidos de actuación e alcanza novos grupos de interese coma os emprendedores, as asociacións empresariais e os axentes de dinamización en concellos”.
Para o seu desenvolvemento, os asesores e asesoras TIC das oficinas do Porriño, Cambados, Pontevedra, Lalín, Ponteareas e Vigo póñense en marcha itinerarios de obradoiros temáticos con diversos niveis de dificultade adaptados ás necesidades das empresas, eventos de networking trimestrais coa participación de profesionais de prestixio, colaboración con asociacións e promoción de alianzas institucionais, especialización sectorial dos asesores en función das necesidades da súa área de influencia, kits de asesoramento en novas tecnoloxías a emprendedores e emprendedoras, identificación e difusión das necesidades TIC aos provedores de solucións para as PEME e, tamén, impulso de novas carteiras de servizos de asesoramento.
No último ano SmartPEME bateu unha serie de récords importantes. Máis polo miúdo, aumentouse en preto dun 50% tanto as persoas que se formaron a través dos obradoiros e accións formativas, por unha banda, como o número de empresas e persoas ás que se lles realizaron asesoramentos, pola outra.

Categorías: Ciencia

TIC Arqueolóxico e Lugo Cóidate achegan formación a 31 persoas desempregadas

Xov, 01/04/2018 - 23:28

Os participantes na iniciativa TIC Arqueolóxico de Lugo, dirixida a dinamizar o Vello Cárcere a través das novas tecnoloxías, mostraron hoxe o seu traballo perante os responsábeis do Concello de Lugo e da Xunta. Máis polo miúdo, amosárono perante a concelleira de Economía, Emprego e Desenvolvemento Económico, Ana Prieto, e máis o delegado da Xunta na provincia, José Manuel Balseiro. Amais de coñecer o obradoiro TIC Arqueolóxico, Prieto e Balseiro tiveron oportunidade de informarse en detalle do desenvolvemento de Lugo Cóidate, outra proposta de formación teórica práctica do Concello. Os dous programas, impulsados polo Goberno local e con financiamento da Xunta, están a favorecer a inserción laboral de 31 desempregados lucenses no eido do patrimonio e o benestar social. Levan tres meses en marcha e rematarán a finais de marzo o Lugo Cóidate e a finais de xuño o TIC Arqueolóxico.
Ambas accións forman parte do compromiso do Goberno local coa creación de emprego, aínda sendo unha competencia da Xunta e da Administración central.
O obradoiro TIC Arqueolóxico, con 224.000 euros de orzamento, ten como obxectivos a posta en valor e comunicación do patrimonio histórico de Lugo e, asemade, facilitar a formación de 16 desempregados maiores de 18 anos fornecéndoos de coñecementos para a súa posterior inserción laboral. Ademais, búscase impulsar a actividade no Vello Cárcere, centro que conta precisamente cun espazo dedicado á arqueoloxía.
Segundo a proposta municipal, aprobada integramente pola Xunta, este obradoiro ten unha duración de 9 meses. Entre as actuacións principais que se contemplan nas diferentes especialidades formativas atópase a catalogación e dixitalización en 3D de bens pezas arqueolóxicas achadas na cidade, a elaboración de diversas programacións culturais para desenvolver no Vello Cárcere e a creación dunha canle cultural.
En canto ao obradoiro Lugo Cóidate, conta cun orzamento de 135.000€, 6 meses de duración e 15 beneficiarios, neste caso, menores de 30 anos. Ofrécese formación e traballo no coidado e atención de persoas maiores, dependentes e nenos e nenas.

Categorías: Ciencia

A AMTEGA colabora co proxecto de software libre Ansible

Xov, 01/04/2018 - 22:30

A Axencia para a Modernización Tecnolóxica de Galicia (AMTEGA) colabora co proxecto de software libre Ansible a través da publicación de código que permite a automatización da configuración e despregue de diversos servizos en infraestruturas TIC.
Para favorecer e incrementar a visibilidade e reusabilidade do código liberado optouse por contribuír ao proxecto Ansible publicándoo seguindo as pautas e protocolos de colaboración da propia comunidade. Así, publicáronse os compoñentes liberados na plataforma da comunidade Ansible, denominada Galaxy. Seguindo o procedemento de liberación de software da Xunta de Galicia tamén publicouse o código fonte liberado a través do repositorio de Software Libre da Xunta de Galicia.

Ansible, ferramenta de automatización de infraestruturas TI

Ansible é unha tecnoloxía de automatización que permite mellorar os procesos necesarios na xestión dunha infraestrutura de tecnoloxía da información. Actualizar a configuración de varios equipos ao mesmo tempo, instalar unha aplicación en todos eles á vez, ou despregar un novo conxunto de servidores coa mesma configuración, son algunhas das vantaxes que nos ofrece esta tecnoloxía.
Os denominados Roles de Ansible son pequenos proxectos que permiten automatizar a realización de varias destas accións de xeito combinado. Podemos entendelos como unha receita onde están definidos todos os pasos que hai que facer para automatizar calquera tarefa. Unha vez que está definida esta receita (o que o proxecto Ansible denomina Rol), esta pode ser aplicada a través da rede a un grupo de equipos ou servidores, tanto nunha rede local como a través de Internet.
No marco deste proxecto de liberación, todos os novos roles que se vaian definindo na AMTEGA e que poidan ser de interese para calquera outra administración, entidade ou particulares, serán tamén publicados seguindo o mesmo protocolo, fomentando a súa reutilización e a colaboración con este importante proxecto de software libre.

Galaxy, a plataforma oficial da comunidade Ansible para compartir Roles

A comunidade de usuarios e desenvolvedores oficial do proxecto Ansible articúlase a través da plataforma Galaxy, un portal web a través do cal se comparten Roles, publicados baixo licenza libre. Deste xeito calquera que queira compartir a súa receita creada con Ansible pode subila a este portal para que outros poidan empregala.
Neste portal, a AMTEGA está publicando varios destes Roles, liberados baixo unha licenza de software libre e seguindo as recomendacións e boas prácticas da comunidade en canto á organización dos mesmos, a fin de que poidan ser de utilidade e favorecendo así a súa reutilización.

Conta oficial da AMTEGA en GitHub

Adicionalmente a esta colaboración co proxecto Ansible, a AMTEGA estrea conta oficial no repositorio de proxectos colaborativos GitHub. Esta plataforma é ben coñecida entre os desenvolvedores de software libre xa que é unha das máis empregadas para desenvolver este tipo de proxectos de xeito público para que todo o mundo poida ter acceso ao código fonte dos mesmos e colaborar.
Deste xeito poténciase a presenza dos proxectos de software publicados como Software Libre pola Xunta de Galicia, facilitando a súa reutilización e as posibilidades de colaboración nos mesmos por parte doutras entidades ou administracións.

Categorías: Ciencia

A Deputación de Pontevedra incrementa os orzamentos TIC

Xov, 01/04/2018 - 18:06

A Deputación de Pontevedra rematou ano aprobando o seu orzamento para 2018, unha contía que ascende a 160 millóns e que, en palabras o voceiro provincial, Carlos López Fonte, constitúe a máis salientábel cifra da historia da Deputación. Isto polo que se refire ás cifras. En termos de contidos, o orzamento mostra unha clara aposta “polo benestar da cidadanía”, recollendo principios como o dunha meirande equidade, o de garantir o meirande número de dereitos ou o recoñecemento da autonomía local. En cuestión de innovación e TIC, a Deputación apostará polas empresas, o emprendemento e as novas tecnoloxías da información.
O deputado destacou que en definitiva “este orzamento resume con claridade as grandes liñas do Goberno da Deputación, cun proxecto global de provincia para construír unha sociedade avanzada baseada no respecto á autonomía local”.
En termos máis concretos, os orzamentos medran nun 5 % en materia de recursos destinados ao apoio á actividade económica, con preto de 2 millóns de euros para SmarPEME (a rede de formación e asesoramento TIC, que este ano multiplicou por tres o número de asesoramentos), 340.000 para os viveiros e 5,4 millóns de euros para implantación e espallamento das novas tecnoloxías da información.

Categorías: Ciencia

Vimianzo lánzase a dixitalizar a súa documentación histórica

Xov, 01/04/2018 - 14:48

O Concello de Vimianzo encarou a recta final de 2017 realizando un importante labor de recuperación e conservación da súa documentación histórica. Este traballo, un importante proceso de dixitalización de actas plenarias, encádrase na aposta do actual equipo de Goberno a prol do patrimonio local, no que se integran os devanditos documentos históricos. O proceso de dixitalización foi realizado pola consultora Unayta, empresa con sede en Milladoiro, especializada na xestión documental e responsábel de diferentes proxectos en arquivos públicos e privados, amais de iniciativas destinadas a incrementar a seguridade TIC ou a pór en valor cousas concretas como o noso mar.
Segundo informou o Concello, as actas de plenos que se incluíron no proxecto son as correspondentes a tres volumes con datas comprendidas entre xullo de 1930 e xullo de 1940 e que conteñen información municipal “cunha importante interese histórica” e que xa se atopan en formato dixital a disposición da Administración local.
No seu cometido, os técnicos de Unayta levaron a cabo tarefas como o manipulado especial da documentación, a numeración e a nomenclatura das imaxes así como a descrición das mesmas, “todo isto aplicando rigorosos controis de calidade específicos para este tipo de documentación histórica”, explica o Concello, engadindo que os traballos tamén incluíron a realización de fichas de rexistro para cada sesión plenaria con datos como o tipo de sesión, a data e lugar da xuntanza,os asistentes, a orde do día e os asinantes.
Para o Goberno de Vimianzo, a información xerada “será de capital importancia para que tanto os traballadores do consistorio coma os investigadores e os historiadores poidan realizar buscas polas temáticas indicadas coa finalidade de atopar de xeito rápido e cómodo información relacionada ben co traballo diario ou ben cos contidos das súas investigacións”.
Para o alcalde, Manuel Antelo, a dixitalización das actas plenarias desta década “reviste unha enorme importancia”. Segundo engade, “cómpre lembrar que a década dos 30 do século pasado a época de moita intensidade política coa democratización das institucións coa proclamación da República e co seu derrocamento co golpe militar do ano 36 e os posteriores 40 anos de ditadura”. Entre o patrimonio documental recuperado inclúese, por exemplo, o acordo da Corporación municipal de Vimianzo para expropiar o Castelo e que pasara a ser propiedade municipal, tal e como foi durante algúns días a finais de xullo de 1936 até que as forzas sublevadas depuxeron o Goberno democrático municipal.
Para as persoas interesadas nestas e noutras informacións, dicirlles que o Concello ten previsto pór a disposición das e dos investigadores e do público xeral toda esta información a través dunha plataforma na Internet.

Categorías: Ciencia

O sector galego do videoxogo quere crear este ano unha aceleradora de proxectos

Xov, 01/04/2018 - 12:32
Os estudios Gato Salvaje durante a visita rencente da directora de GAIN, Patricia Argerey

Hai potencial no sector dos videoxogos da nosa terra. En base a isto, desenvolvedores/creadores galegos están a impulsar, co novo ano, unha aceleradora de proxectos relacionados con este tipo de produtos dixitais. Unha tolemia? É probábel que si, pero tamén é certo que ao longo destes anos boa parte dos analistas foron quen ver en Galicia sobradas sementes que xustifiquen un cultivo conxunto e específico. A aceleradora, apadriñada polo estudio coruñés Gato Salvaje (creador da aventura gráfica AR-K ou do xogo de acción Bullshot, que é o primeiro xogo publicado en galego na plataforma Steam), ten o obxectivo de impulsar iniciativas e, tamén, visualizar produtos nosos no mercado. Asemade, preténdese achegar un recurso que mostre o camiño a seguir aos novos talentos.
Segundo puidemos saber os días pasados, o estudio coruñés ten a previsión de que a aceleradora se poña en marcha no segundo semestre de 2018. Para apuntalala e garantir ao máximo a súa repercusión (no mercado e tamén no ámbito da xeración de emprego e oportunidades), os impulsores da palestra empresarial estarían a procurar apoios nas administracións, entre as que se contan a Deputación da Coruña ou a Xunta, que, como lembraremos, enxalzou recentemente o papel da empresa (e do sector galego por enteiro) a través da Axencia Galega de Innovación (GAIN).
Nunha entrevista con Europa Press, Gato Salvaje recoñeceu que se ben a presenza galega no conxunto do sector estatal dos videoxogos non é aínda moi relevante, a nosa terra atesoura un gran potencial, en boa medida de profesionais do eido da animación, un eido parello e moi achegado ao ámbito dos videoxogos. A metodoloxía a seguir para o desenvolvemento da aceleradora sería en parte a metodoloxía lean startup, botando man de recursos de micromecenado para novos proxectos, ao estilo de Kickstarter, e con vistas a crear financiamento e, tamén, a xerar estudos de mercado e incrementar a comunicación con clientes reais e potenciais. Tamén se empregarían estas ferramentas para “facer” audiencias.

Categorías: Ciencia

Chegan numerosos parches para mitigar os problemas de seguridade de Meltdown e Spectre

Xov, 01/04/2018 - 12:00

Tras levantarse o veto sobre a información relativa ás vulnerabilidades coñecidas como Meltdown e Spectre imos sabendo máis deste gravísimo problema que afecta á meirande parte dos procesadores modernos, e que non trataríase dun fallo de hardware ou un simple bug, senón que afectaría a nivel de arquitectura, de xeito que a súa solución a longo prazo non será doada e librarnos desta ameaza podería levar bastantes anos.
Meltdown e Spectre serían os nomes que recibirían as técnicas que permite evitar a protección dos contidos que circula polo núcleo dos procesadores, polo que exporían información moi sensible e poderían empregarse para expor potencialmente calquera tipo de información, sendo tal a gravidade que levan máis de medio ano traballando en mitigar o problema antes de comunicalo publicamente.
A técnica coñecida como Meltdown sería a que afectaría principalmente aos procesadores de Intel, e xa conta con parches para evitala, separando e protexendo os espazos de memoria para impedir que as aplicacións poidan interferir nos datos das outras, o que podería ter un custo no rendemento dos equipos que poderemos coñecer con precisión nas vindeiras semanas, cando poida comprobarse o impacto real das medidas que eviten esta vulnerabilidade.
Pero no caso de Spectre a situación complícase, pois afectaría a procesadores de Intel, AMD e ARM, ou sexa, que non sería só cousa de ordenadores persoais, senón que tamén podería chegar a smartphones, tabletas e moitos dispositivos conectados, e aínda non hai unha solución total para esta vulnerabilidade.
Temos así que tanto sistemas con Windows, macOS, Linux, Android, FreeBSD... e moitas outras plataformas serían vulnerables teoricamente, podendo entenderse que todo produto con procesadores modernos veríase afectado dalgún xeito.
Agora chega a parte máis complicada do asunto: haberá que actualizar todos os sistemas que se poida, cando menos para Meltdown, mentres que a protección contra Spectre é moito máis difícil, e principalmente buscarase establecer medidas que limiten a súa explotación práctica, aínda que queda a porta aberta a que xurdan métodos de aproveitamento desta vulnerabilidade. Comeza así un xogo do rato e o gato no que haberá que procurar mitigar as posibilidade de aproveitar unha vulnerabilidade que polo momento é teórica. De feito, tanto Meltdown e Spectre son polo momento ameazas potenciais, e aínda non xurdiu malware que tiren proveito das mesmas, grazas en boa medida ao hermetismo dos expertos que traballaron nos últimos meses para tomar medidas de seguridade contra estas vulnerabilidades.
As grandes compañías xa están a tomar medidas contra as potenciais ameazas, e Google anunciou que xa están a actualizar os seus servizos na nube, o navegador Chrome e Chrome OS para mitigar estas vulnerabilidadess; o navegador web Firefox tamén incorporou medidas de seguridade a partires da súa versión 57; Microsoft tamén publicou unha actualización de seguridade nas últimas horas que avanza na protección contra estes problemas de seguridade, e que está dispoñible para Windows 10 de xeito automático a través de Windows Update (para Windows 7 e 8 chegará a través de Windows Update a partires da vindeira semana); as novas versións do kernel de Linux; pese a que non foron aínda quen de reproducir Spectre en dispositivos con Android, na actualización de seguridade de xaneiro incluíron controis que evitarían os vectores de ataque coñecidos para procesadores ARM; e tamén sábese que macOS 10.13.2 inclúe algunhas correccións (aínda que en macOS 10.13.3 contará con novas medidas de seguridade). En definitiva, que practicamente toda a industria está a tomarse este problema de seguridade moi en serio, deixando claro que non se trata dun problema de Intel como se deu a entender inicialmente.

Categorías: Ciencia

Altia, elixida para acometer o redeseño do conxunto de portais de madrid.org

Xov, 01/04/2018 - 11:30

A Axencia para a Administración Dixital da Comunidade de Madrid contratou a empresa galega Altia, especializada en servizos de consultoría tecnolóxica, para acometer integramente o redeseño do conxunto de portais que conforman a plataforma www.madrid.org. O obxectivo da axencia, con estes traballos de fonda remodelación das súas ferramentas dixitais, é “proporcionar á cidadanía a mellor información e calidade nos servizos prestados a través de madrid.org, coa intención, ademais, de converter o portal nunha referencia a nivel estatal e internacional”. Este proceso, lembra Altia, inclúe a adopción dos seguintes piares básicos de traballo: socialización da web e difusión 2.0, contidos multimedia, boletíns informativos e adecuación ás distintas audiencias.
Os traballos tamén abranguen unha migración a un novo xestor de contidos (CMS) que forneza meirande axilidade tecnolóxica, estandarización e melloras na accesibilidade. Segundo reflicte a empresa galega, esta migración é “o primeiro paso cara a unha plataforma web que cubra novas necesidades como a transformación cara a un goberno aberto”.
Altia tamén fai fincapé en que estes obxectivos, unidos á experiencia da firma galega neste tipo de procesos (ampla experiencia no ámbito da implantación de proxectos con solucións CMS, en concreto con Drupal, a solución software elixida finalmente), motivaron a contratación da compañía que preside Tino Fernández. “Desde o noso punto de vista o contrato supón tanto para a Axencia como para Altia un reto compartido, pois a nosa implicación no proxecto é plena, como parte da nosa misión”, explican dende a empresa galega, engadindo que se trata dun contrato cunha duración inicial de dous anos, coa opción de prórroga por outros dous anos máis.

Categorías: Ciencia

Meltdown e Spectre: novas vulnerabilidades que afectan a numerosos procesadores

Mér, 01/03/2018 - 23:30

Ante as informacións sobre o fallo de seguridade que afectaría aos procesadores de 64 bits de Intel, a compañía de semicondutores realizou por fin un comunicado público no que rexeitan a idea de que a vulnerabilidade detectada sexa exclusiva dun fallo de seguridade que só afecte a produtos de Intel, asegurando que nas investigacións realizadas identificáronse multitude de dispositivos informáticos susceptibles de verse afectados con independencia do vendedor do procesador e do sistema operativo.
Dende Intel aseguran que para garantir a seguridade dos usuarios están a colaborar con desenvolvedores de sistemas operativos e outros fabricantes como ARM Holdings e AMD (aínda que dende AMD matizan que os seus procesadores non están afectados polo problema detectado), e xa comezaron a subministrar solucións de software e firmware para axudar a mitigar os posibles xeitos de aproveitar a vulnerabilidade, confiando en que o impacto destas solucións para os usuarios non sexa significativo.
Aínda que non se esperaba que desen detalles sobre a vulnerabilidade até a vindeira semana, finalmente deron conta das 3 variantes deste problema de seguridade, respondendo as dúas primeiras ao alcume de Spectre e a terceira ao de Meltdown, contando incluso cunha páxina web específica para recompilar a información sobre o tema.
Entre a información publicada detállase que os procesadores de AMD si terían en potencia a vulnerabilidade, pero na práctica non se verían afectados xa que para que acontecese habería que activar manualmente unha funcionalidade nun par de sistemas operativos moi concretos.

Categorías: Ciencia

Páxinas