códigocero

Subscribirse a Orixe códigocero
Información sobre novas tecnoloxías en Galicia e en galego.
Actualizado: fai 18 min 50 seg

Novo recoñecemento á aplicación galega SmartWood

Mér, 01/03/2018 - 23:04

O proxecto SmartWood, unha iniciativa de investigadores da Universidade de Santiago para achegar unha ferramenta dixital que nos axude a saber que facer con terreos forestais que non están a ser explotados (ou que non teñen o rendemento axeitado), vén de obter un novo recoñecemento que engadir ao recente accésit no certame Idea Lugo e ao primeiro premio da Greenweekend que promove o portal de emprego Enviroo (co obxecto de visualizar, distinguir e impulsar as máis relevantes propostas do ámbito das tecnoloxías verdes). Amais do devandito, a aplicación SmartWood foi quen de gañar a sétima edición do Premio Ideas da Fundación Unha Galicia Moderna, que incluíu unha contía de 5.000 euros.
Neste mesmo certame (sétima edición) convocado pola Fundación do Colexio de Economistas de Galicia, as iniciativas OpositaTest e Sense (x) acadaron o segundo e o terceiro galardón, respectivamente. Segundo puidemos saber, os tres proxectos foron moi ben valorados polo xurado, que o tivo complicado para elixir a proposta finalmente gañadora.
Como lembraremos, SmartWood vén da man do investigador de doutoramento do Campus Terra José Luis Gude (Escola Politécnica Superior de Enxeñaría) e trátase dunha ferramenta dixital que ofrece aos usuarios asesoramento e axuda para o optimizar o rendemento de parcelas forestais. A app bota man dun asistente forestal interactivo que guía a quen lle tire proveito entre os diferentes usos permitidos na parcela recollidos no plan urbanístico do municipio, deixándolle marxe para elixir o uso final en función da produción ou gustos persoais.
SmartWood, para o seu funcionamento, apóiase en sistemas de información xeográfica e en datos recollidos por drons. A iniciativa tivo ocasión de fortalecerse e coller pulo ao abeiro de Yuzz Lugo, o programa-palestra de emprendemento do Banco Santander desenvolvido en colaboración coas universidades (neste caso concreto a de Santiago).
Segundo indicou recentemente José Luis Gude, trátase dunha aplicación tecnolóxica feita a medida dos propietarios de parcelas forestais, con capacidade para mellorar o rendemento económico das fincas ao xeito dun asistente interactivo. Neste senso, SmartWood ofrece recomendacións e información sobre cales son as plantacións máis rendíbeis para cada parcela, complementando este servizo dun mercado dixital (marketplace) que xunta produtores e empresas dos servizos forestais.
O proxecto SmartWood, xerminado inicialmente por Gude, é agora unha startup en fase de constitución, impulsada por José Luis Gude con Begoña L. Castro e Siro González Rodríguez, dous emprendedores cos que coincidiu na edición do programa Yuzz Lugo deste ano.

Categorías: Ciencia

Oppo quere vender oficialmente os seus móbiles en España

Mér, 01/03/2018 - 22:30
Expositor de Oppo na pasada edición do Mobile World Congress

Unha das novas que máis atención captou en 2017 foi a chegada a España de Xiaomi, fabricante que xa conseguira consolidar unha magnífica posición no mercado cando carecía de distribución oficial, pero as cousas non as vai ter doada, e os seus competidores en China tamén queren traer a guerra ao territorio español, estando previsto que no mes de xuño chegue a España o fabricante chinés Oppo, o que resulta bastante curioso dado que o pasado mes de maio pechou a súa tenda en liña europea.
Oppo é unha das marcas de BBK, grupo ao que pertencen outras marcas de móbiles como Vivo (unha das máis importantes dentro de China) e OnePlus (con boa sona internacional), e aínda que carecía de presenza física en España, incluso chegou a ser official partner do F.C. Barcelona, o que permitiu que hai cousa de ano e medio lanzasen unha versión do seu smartphone F1 Plus inspirada no equipo de fútbol (curiosamente coa vista posta en mercados como China, Singapur e Indonesia).
Ao parecer unha delegación de directivos de Oppo visitaron Madrid en decembro, entrevistándose con varios distribuidores, cadeas de electrónica de consumo e operadores de telecomunicacións, cos que aínda non pecharon ningún acordo, pero tendo como obxectivo o desembarco de Oppo en xuño, cando tamén poderían chegar a Francia e Italia.

Categorías: Ciencia

Un fallo de seguridade en procesadores de Intel obrigará aos sistemas operativos a funcionar máis lento

Mér, 01/03/2018 - 20:38

Nos últimos meses estase a traballar na corrección dun fallo de seguridade presente na meirande parte de equipos informáticos a nivel mundial, xa que está provocado por un erro de deseño nos procesadores de Intel de 64 bits que para poder corrixirse hai que evitalo a nivel de software, o que forzará a un significativo redeseño dos núcleos de Linux e Windows.
As modificacións dos sistemas están a realizarse entre grandes medidas de seguridade para procurar manter o fallo de seguridade no maior segredo posible, de xeito que poidan elaborarse os parches que o eviten á vez que non fagan doado que xurdan métodos para aproveitalo e así poder vulnerar a seguridade dos millóns de equipos afectados.
Os cambios que están a realizarse en Linux e Windows poderían afectar ao rendemento final dos equipos, asegurando que en función da tarefa e do modelo podería chegar a reducirse o seu desempeño entre un 5 e un 30% e, dado que o fallo está presente nos procesadores con arquitectura Intel x86 de 64 bits tamén será preciso que macOS aplique unha actualización semellante para evitar futuros aproveitamentos da vulnerabilidade detectada (de feito, o parche xa está presente na versión en probas de macOS 10.13.3).
Os parches para Linux están xa dispoñibles, e a semana que vén está prevista a publicación dos de Windows, e que nun principio separarán completamente a memoria do núcleo dos procesos de usuario (o que é un proceso intensivo, xa que realízase en casa chamada de sistema e cada interrupción de hardware), evitando así posibles filtracións que terían consecuencias catastróficas en malas mans.
Aínda que o fallo de seguridade teña impacto en todo tipo de ordenador con procesadores Intel x86-64, é especialmente relevante no caso de contornos de computación na nube, incluíndo os de Amazon, Microsoft e Google, que xa están a programar a aplicación dos parches que evitan a vulnerabilidade (no caso das máquinas virtuais en Azure será o vindeiro día 10 cando as actualicen), aínda que temen as consecuencias a nivel de rendemento que poidan ter.
Dende AMD confirman que o fallo de seguridade dos procesadores de Intel coñecido como KPTI non afecta aos seus procesadores, pero dado que a súa cota de mercado está no contorno do 20% (e non exactamente nos equipos de maior rendemento) non parece que esa nova vaia tranquilizar aos grandes prexudicados pola aplicación dun parche que afecte ao rendemento dos seus sistemas.

Categorías: Ciencia

Ames introduce á súa veciñanza nas vantaxes da eAdministración

Mér, 01/03/2018 - 14:41

O Concello de Ames e a súa aula CeMIT veñen de dar a coñecer múltiples detalles sobre a actividade formativa da aula no ano que comeza, un completo programa de obradoiros destinados, en boa medida, a acurtar as distancias que poden separar á cidadanía das ferramentas dixitais, facendo fincapé en ámbitos como a Administración Electrónica. Trátase, máis en detalle, de tres cursos sobre as vantaxes que lle achega á veciñanza o feito de interactuar coas entidades públicas a través das ferramentas dixitais. Asemade, impartiranse cursos para adultos (Atopa na Rede e Android seguro para pais e nais) e para nenos/as de informática e mecanografía.
Respecto do ciclo de actividades sobre eAdministración, o primeiro curso, denominado DNI electrónico e certificados dixitais, impartirase do 9 ao 16 de xaneiro, os martes e xoves, de 10:00 a 11:30 horas. Introducirá aos participantes nos métodos para tirar proveito do DNIe, que dispón dun chip que nos permite identificarnos online e acceder a moitos recursos e trámites a través de Internet.
O segundo curso que se inclúe dentro deste ciclo chámase Trámites electrónicos e xestión de información. Esta actividade impartirase os martes e xoves, en horario de 10:00 a 11:30 horas, dende o 18 ata o 23 de xaneiro. Neste curso afondarase un pouco máis nos trámites electrónicos e coñeceranse as ferramentas que existen ademais do DNIe e do certificado dixital. O terceiro e último curso do ciclo é Trámites electrónicos co Concello de Ames. Impartirase os martes e xoves, de 10:00 a 11:30 horas, do 25 ao 30 de xaneiro.
Por outra banda, durante o mes de xaneiro impártense dous cursos para adultos. O primeiro, Atopa na Rede, desenvolverase do 8 ao 17 de xaneiro, os luns e mércores, de 18:15 a 19:45 horas. Segundo informa a aula, esta actividade ofrecerase información sobre os buscadores que ofrecen a posibilidade de facer unha busca avanzada mediante operadores, filtros, distintas seccións de busca, respostas rápidas. Ademais, achegarase o obradoiro Android seguro para pais e nais, os mércores 24 e 31 de xaneiro, en horario de 18:15 a 19:45 horas. O obxectivo é “que os pais e nais coñezan as plataformas móbiles ás que acceden os seus fillos/as para poder ter certo control sobre o seu uso”.
A maiores de todo o devandito, as crianzas tamén poderán acudir as actividades da aula de Ames drante este mes de xaneiro. Do 9 de xaneiro ao 13 de febreiro haberá un curso de informática para nenos/as. Impartirase os martes, en horario de 18:15 a 19:45horas. Trátase dunha actividade de iniciación ao universo dixital no que os nenos/as aprenderán a usar o rato e mailo teclado. Ademais aprenderán a empregar as xanelas, carpetas e documentos creados por eles mesmos, e introduciranse en como facer buscas por Internet.
Outro dos cursos dirixidos aos nenos/as é o de mecanografía que se desenvolverá do 11 de xaneiro ao 15 de febreiro. É un curso de introdución e práctica co teclado de 45 minutos por sesión. Ideal tanto para iniciarse como para repetir curso e continuar mellorando. Haberá dous grupos: un para a menores de 10 anos (impartiranse as clases os xoves de 18:15 a 19:00 horas) e outro para maiores de 10 anos (impartiranse as clases os xoves de 19:00 a 19:45 horas).

Categorías: Ciencia

Pontevedra enxalza o potencial innovador de Qbitia

Mér, 01/03/2018 - 12:20

O alcalde de Pontevedra, Miguel Fernández Lores, e maila concelleira de Promoción Económica, Anabel Gulías, mantiveron onte unha xuntanza co director executivo (CEO) da empresa local Qbitia, Luis Taboada, unha das máis salientábeis da contorna pontevedresa e toda a nosa xeografía en materia de desenvolvemento de software avanzado. Na cita os representantes do Concello fixeron fincapé no potencial innovador das firmas pontevedresas, enxalzando o labor despregado por compañías “xenuinamente locais” como Qbitia, que ten no seu haber logros tan importantes como a creación dunha plataforma que nos permite facer seguimento e control das nosas estratexias de investimento nos mercados, ou recoñecementos tan salientábeis como ter sido finalista na sétima edición dos premios The Technical Analyst Awards, ou , tamén, ter sido obxecto do Premio Emprendedor XXI de La Caixa en 2013. Na xuntanza tamén se fixo fincapé na presenza de Qbitia en máis de 30 países.
Creada no ano 2011, a empresa conta a día de hoxe con 17 traballadores e “compite a nivel internacional dende a cidade de Pontevedra, dende o barrio da Parda” subliñou o alcalde, incidindo na necesidade de “visualizar que é posíbel xerar actividade económica e emprego neste mundo globalizado, dende unha cidade que en principio está fóra dos circuítos financeiros”. Segundo engadiu, o éxito da iniciativa abrolla través das súas cifras (os 2 billóns de dólares de investimentos xestionados pola plataforma de Qbitia) e da súa presenza en mercados de capital como, por exemplo, Londres, Chicago ou Nova York.
“Pontevedra é a miña cidade e gústame estar aquí” sinalou Luis Taboada, quen subliñou que el e os outros membros da empresa imaxinan en Pontevedra. O fundador de Qbitia (elixido un dos cen executivos, de entre 30 e 42 anos, máis influentes do Estado polo Instituto Choiseul) aproveitou para “animar á xente a que emprenda, e que emprenda desde esta cidade pois hoxe en día co ecosistema que hai baseado nas novas tecnoloxías pode facerse”. E engadiu: “Pódese facer calquera tipo de innovación e de calquera sector desde aquí”.

Categorías: Ciencia

O CITIC pecha 2017 captando máis de 3 millóns para proxectos competitivos de I+D

Mér, 01/03/2018 - 11:34
O profesor Manuel González Penedo, coordinador do Centro de Investigación TIC

O Centro de Investigación TIC da Universidade da Coruña, o CITIC, rematou ano facendo reconto da súa actividade xerada en proxectos competitivos de Investigación e Desenvolvemento (I+D), unha liña de traballo que non fai máis que confirmalo como un dos centros galegos e estatais con meirande capacidade para a obtención de investimentos. Segundo informaron fontes do CITIC, este 2017 rematou cunha captación de fondos para os devanditos proxectos superior a 3 millóns de euros, o que representa un incremento do 10% con respecto ás cifras acadadas en 2016.
Estes e outros datos foron achegados durante a presentación dos resultados da actividade recente do CITIC, por parte de Manuel F. González Penedo, coordinador do centro coruñés, perante boa parte dos preto de 300 investigadores adscritos ao mesmo.
Na cita tamén se fixo fincapé noutros importantes logros, como por exemplo que os trece grupos que integran o CITIC tivesen dado forma en 2017 a arredor de 300 publicacións e 32 contratos abeirados ao artigo 83 da LOU. Tamén se lembrou que nos doce meses que vimos de deixar atrás o centro coruñés foi quen de captar 480.000 euros en proxectos internacionais, 951.000 a nacionais e 1,1 millóns a autonómicos.

Categorías: Ciencia

O sistema de xestión integrada das bibliotecas municipais chega a Narón e Fene

Mér, 01/03/2018 - 00:26

O catálogo único da Rede de Bibliotecas de Galicia segue a medrar co novo ano. Segundo informaron coa entrada de 2018 a Consellería de Cultura e Educación e a axencia AMTEGA, implantouse finalmente o sistema de xestión integrada nas bibliotecas públicas municipais de Fene e Narón. En materia de vantaxes para os usuarios, esta novidade implicará (entre outras cousas) máis comodidade á hora de facer as súas buscas. Durante o mes de xaneiro tamén disporán deste servizo as bibliotecas de Cedeira e As Pontes de García Rodríguez.
Segundo informa a Axencia para a Modernización Tecnolóxica de Galicia (AMTEGA), xa son preto de 90 as bibliotecas municipais públicas que xa dispoñen do novo sistema integrado de xestión, un software de código aberto (baseado en Koha) que “abre as portas da integración” de todos os centros nunha contorna unificada, “tanto para o traballo dos técnicos das bibliotecas como para a consulta dos catálogos das bibliotecas de Galicia para calquera usuario ou usuaria”.
O novo sistema, como dixemos, pon en xogo un catálogo único dispoñíbel en catalogo-rbgalicia.xunta.gal. Con esta tecnoloxía, a maiores do devandito, podemos facer cousas en liña como solicitar o carné da Rede, facer reservas e renovacións, trocar de contrasinal e acceder co mesmo usuario e contrasinal a este sistema e á plataforma GaliciaLe, o sistema pioneiro de préstamo de libro electrónico.

Categorías: Ciencia

Piden 1.600 millóns de dólares a Spotify por ofrecer milleiros de cancións sen licenza

Mar, 01/02/2018 - 23:30

A xestión dos dereitos de autor por parte das plataformas de música en streaming é extraordinariamente complexa, e aínda que este xeito de consumir música é agora o máis popular entre boa parte da poboación, non sempre facilita a reprodución musical cos permisos pertinentes das discográficas, como vén de denunciar Wixen Music Publishing, compañía que presentou unha demanda ante un tribunal federal de California contra Spotify, compañía á que acusa de ofrecer temas como Free Fallin" de Tom Petty, Light My Fire de The Doors e uns dez milleiros de cancións máis sen ter licenza para iso nin compensar economicamente pola súa explotación comercial, de aí que pidan 1.600 millóns de dólares en concepto de danos.
Esta demanda de Wixen deixa en evidencia que o copyright está a converterse nun grande problema para Spotify, compañía que ten varias demandas e xa chegou a varios acordos extraxudiciais ante situacións semellantes, resultando especialmente rechamante que a demanda sostén que preto do 21% dos 30 millóns de cancións do catálogo de Spotify carecerían da licenza necesaria.
A demanda parecer ser unha chamada de atención, e incluso é posible que non prospere ante as dúbidas de que Wixen teña a autorización necesaria para emprender accións tan agresivas, xa que nun principio só estaría autorizada para negociar acordos de licenza. Entre os artistas representados por Wixen estarían Tom Petty, Zach de la Rocha e Tom Morello (Rage Against The Machine), Dan Auerbach (The Black Keys), Donald Fagen (Steely Dan), Rivers Cuomo (Weezer), David Cassidy, Kim Gordon (Sonic Youth), Stevie Nicks e Neil Young, entre outros.

Categorías: Ciencia

O servizo SmartPEME da Deputación de Pontevedra, adxudicado á empresa KPMG Asesores

Mar, 01/02/2018 - 20:56

A rede TIC de formación e asesoramento impulsada pola Deputación de Pontevedra, a rede SmartPEME (con sedes operativas en Pontevedra, Vigo, Porriño, Ponteareas, Cambados e Lalín), afronta o novo ano con novidades. Segundo informa a entidade que preside Carmela Silva, a xunta de Goberno da Deputación aprobou a adxudicación, por procedemento aberto, do contrato de servizo de evolución e xestión da rede á empresa KPMG Asesores S.L, que presentou unha oferta de 986.271,00 euros. Esta contía, por certo, achega un aforro respecto ao licitado e abrangue unha serie de novidades importantes na cifra de accións complementarias mensuais a realizar en cada punto da rede. Tamén haberá novidades no equipo de traballo e no número de empresas asesoradas.
Recordar que SmartPEME é un modelo de servizo orientado á mellora competitiva das pequenas e medianas empresas e á procura dunha melloría nas vendas e na eficacia e eficiencia das súas tarefas. “Este proxecto”, explica a institución que preside Carmela Silva, “abre novos eidos de actuación e alcanza novos grupos de interese coma os emprendedores, as asociacións empresariais e os axentes de dinamización en concellos”.
Para o seu desenvolvemento, os asesores e asesoras TIC das oficinas do Porriño, Cambados, Pontevedra, Lalín, Ponteareas e Vigo póñense en marcha itinerarios de obradoiros temáticos con diversos niveis de dificultade adaptados ás necesidades das empresas, eventos de networking trimestrais coa participación de profesionais de prestixio, colaboración con asociacións e promoción de alianzas institucionais, especialización sectorial dos asesores en función das necesidades da súa área de influencia, kits de asesoramento en novas tecnoloxías a emprendedores e emprendedoras, identificación e difusión das necesidades TIC aos provedores de solucións para as PEME e, tamén, impulso de novas carteiras de servizos de asesoramento.
No último ano SmartPEME bateu unha serie de récords importantes. Máis polo miúdo, aumentouse en preto dun 50% tanto as persoas que se formaron a través dos obradoiros e accións formativas, por unha banda, como o número de empresas e persoas ás que se lles realizaron asesoramentos, pola outra.

Categorías: Ciencia

Facebook retransmitirá a alfombra vermella dos Globos de Ouro

Mar, 01/02/2018 - 19:30

Aínda que as redes sociais xa levan moito tempo operando como segunda pantalla durante as retransmisións deportivas e de moitos outros acontecementos, non faltan as iniciativas para conseguir impulsalas aínda máis, como cando o ano pasado Twitter retransmitiu en directo a alfombra vermella dos Globos de Ouro, pero Facebook vén de usurparlles a posibilidade de facer o mesmo coa retransmisión deste ano, no que os Globos de Ouro celebran a súa edición 75ª.
Deste xeito o vindeiro domingo Facebook terá a exclusiva en streaming en directo da alfombra vermella dos Globos de Ouro, o que parece bastante sorprendente polo feito de que a plataforma social de Mark Zuckerberg non está orientada ao tempo real, aínda que nos últimos meses si avanzou nos EE.UU. como plataforma audiovisual, de feito que quere converterse nunha especie de servizo de televisión baixo demanda con diversos programas orixinais.
O programa que precederá os Globos de Ouros en Facebook contarán con AJ Gibson, Jeannie Mai, Scott Mantz e Laura Marano e, aparte da retransmisión en vídeo tradicional tamén incluirá vídeos en 360 graos capturados na alfombra vermella, que poderán verse na páxina de Facebook dos Globos de Ouros. Aparte da cobertura exclusiva en Facebook, os Globos de Ouro tamén farán uso da súa conta de Instagram (con contidos exclusivos nas súas publicacións e momentos entre bambolinas como historias) e durante a data dos premios a actriz e cantante Laura Marano será a encargada de publicar historias dende a conta oficial de Instagram (con 230 millóns se seareiros).

Categorías: Ciencia

As profesións dixitais, presentes na nova edición de Ben Empregado da Deputación de Lugo

Mar, 01/02/2018 - 17:01

A nova edición de Ben Empregado máis social, a cuarta, tamén terá (como as anteriores convocatorias) vertente TIC. Máis polo miúdo, a través de oportunidades laborais para profesionais técnicos en informática ou xestores de comunidades en liña, expertos en redes sociais. Así se especifica hoxe no Boletín Oficial da Provincia, que publicou os 201 novos postos de traballo para lucenses no paro, en todos os sectores, ao abeiro do programa Ben Empregado impulsado pola Deputación de Lugo. Esta iniciativa materializarase (novamente) a través da concesión de axudas a autónomos, PEME e colectivos sociais. A contía total de apoios é de 2,4 millóns de euros. O BOP tamén recolle hoxe a listaxe completa de entidades e asociacións que resultaron beneficiadas de ditas subvencións.
Con ditos fondos, o Executivo provincial financia durante un ano os custos laborais dos novos traballadores (que serán todos lucenses a día de hoxe en situación de desemprego) que demandan e requiren entidades e asociacións da provincia para poder reforzar a súa actividade. Faino en diferentes porcentaxes, atendendo ao nivel de compromiso social dentro da súa aposta por unha Deputación social e coas persoas. En total, financiaranse ao cen por cen os custes laborais 60 lucenses con capacidades diversas ou en risco de exclusión social. Por outra banda, cubriranse ao 50% os custes doutros 141 veciños, actualmente desempregados, que comezarán a traballar en negocios na provincia de empresarios lucenses.
Na listaxe de postos de traballo a impulsar figuran os seguintes, entre outros moitos: técnico consultor enerxético, condutor de maquinaria, creativo audiovisual, técnico agrícola, técnico superior en administración de sistemas informáticos, axente de viaxe e administración, educador, responsábel de atención ao cliente, enxeñeiro técnico de obra pública, licenciado en ciencias químicas, técnico de emprendemento, técnico informático, técnico de atención á terceira idade, técnico superior en procesos de calidade na industria alimentaria, informador cultural, etc.

Categorías: Ciencia

O fenómeno de HQ Trivia chega a Android

Mar, 01/02/2018 - 14:11

Os creadores de Vine, Rus Yusupov e Colin Kroll, están a conducir a última revolución no ámbito das aplicacións móbiles nos EE.UU. con HQ Trivia, un xogo en liña bastante curioso que consiste nun concurso de preguntas e respostas en directo e con presentadores reais, no que a xente pode participar de balde dende o seu fogar para gañar premios económicos.
A mecánica é moi sinxela: o presentador realiza unha serie de 12 preguntas con 3 respostas posibles que haberá que responder antes de 10 segundos, quedando eliminados os usuarios tras errar (sendo posible continuar empregando vidas extra que poden conseguirse recomendado o xogo a outros usuarios). Entre os gañadores de cada partida repartirase un bote que normalmente é duns 2.000 dólares (que poden incrementarse bastante en datas especiais) converténdose en todo un fenómeno social que a pasada noite frustrou a moitos usuarios que non puideron participar no xogo por terse superado o límite de 750.000 xogadores simultáneos que tiñan establecido (e que agora van eliminar ao constatar que xa hai preto dun millón de usuarios interesados en participar en HQ Trivia).
Esta aplicación comezou sendo exclusiva para iPhone, pero decidiron comezar 2018 con bo pé, estreando aplicación para Android, que pese a estar aínda en probas, xa acumula centos de milleiros de descargas por parte de beta testers que queren coñecer este fenómeno de primeira man.
As aplicacións móbiles con toques de concurso televisivo non son ningunha novidade, e incluso en España puidemos ver no verán un orixinal formato no que a participación nun xogo e a súa retransmisión televisiva era simultánea, pero o fenómeno de HQ Trivia é moi rechamante por ser un formato exclusivo do contorno móbil que conseguiu entusiasmar a centos de milleiros de xogadores en poucos meses, conseguindo especial relevancia o pasado decembro.

HQ Trivia convida a competir xunto a amigos e familiares neste xogo en directo
Categorías: Ciencia

Máis de mil de empresas de 51 polígonos galegos xa contan con acceso á Rede de alta velocidade

Mar, 01/02/2018 - 12:23
Vista aérea do Polígono da Tomada na Pobra do Caramiñal

A Axencia para a Modernización Tecnolóxica de Galicia, AMTEGA, pechou o ano 2017 facendo reconto do acadado nos polígonos industriais da nosa terra a través do Plan de Banda Larga da Xunta. Segundo fai saber a entidade que dirixe Mar Pereira, 2017 saldouse cun total de 51 polígonos con acceso a Internet de redes ultrarrápidas, o que significa, entre outras cousas, que máis dun milleiro de empresas instaladas nestes complexos empresariais teñen ao seu alcance servizos de Rede a través de fibra óptica cunhas velocidades de até 350 Mbps de baixada e 35 de suba, “cunha garantía de caudal do 80% sen límite de descargas”. Como lembraremos, estas melloras tecnolóxicas están a ser desenvolvidas polo operador R, adxudicatario do Plan, cuxa previsión para este ano entrante é engadir 30 polígonos á Rede de alta velocidade, imprescindíbel, por outra banda, para a súa plena dixitalización.
Como resultado destas medidas, en 2018, un total de 130 polígonos (nos que se concentra case o 93% da superficie empresarial ocupada), disporán de acceso a redes de máis de 100 Mpbs. O resto cubriranse nas seguintes actuacións previstas no Plan.
AMTEGA tamén pechou ano recordando que os procesos de incorporación dos nosos complexos industriais á Rede de alta capacidade abren un abano de posibilidades que vai alén do simple fornecemento de infraestrutura. En palabras de R, achandan o camiño para que as empresas “acometan a súa transformación dixital”. Ou sexa, para que boten man de servizos e solucións na nube como por exemplo a videoconferencia, o acceso á Internet das Cousas (IoT) ou os procedementos do que se coñece como Industria 4.0, vencellados a conceptos e metodoloxías como a eficiencia enerxética, o control de intrusións nas edificacións, os servidores virtuais e a analítica de datos (Big Data), entre outros eidos. “Todas estas cousas e outras moitas máis”, explica a compañía de raizame galega, “son posíbeis grazas ás vantaxes das redes FTTH (Fiber To The Home) que levan a fibra óptica ata a propia empresa nestes polígonos xa conectados ás redes ultrarrápidas de R”.
AMTEGA subvenciona estes despregamentos cunha axuda de 3,4 millóns de euros, que se estima que xeren un investimento total de 5,2 millóns de euros. Estas subvencións co-fináncianse ao 75% polo Fondo Europeo Agrícola de Desenvolvemento Rural (FEADER) no marco do Plan de desenvolvemento rural de Galicia 2014-2020 (PDR).
Axudas a empresas illadas
Outra das liñas do Plan de Banda Larga foi a convocatoria de axudas para empresas e autónomos das zonas máis illadas do rural, da que, tralo remate do período de xustificacións, beneficiáronse un total de máis de 30 entidades. A axencia investiu neste punto preto de 400.000 euros. As subvencións solicitadas polas empresas beneficiarias comprenden entre o 70% e o 100% dos custos das tarefas necesarias para dotar de banda larga de ata 350 Mpbs ás empresas. As firmas beneficiadas abranguen diferentes sectores produtivos: alimentación, agricultura, hostalaría, asesoría, xestión de residuos, inmobiliario ou enerxético, entre outros.
Os importes das axudas solicitadas polos beneficiarios van dende os 2.000 euros ata os 20.000 euros. Segundo lembra a axencia, os servizos de banda larga ultrarrápida a fornecer “permitirán velocidades de acceso a Internet dende os 50Mbps ata os 350Mbps”. AMTEGA tamén lembra que a mellora no acceso á Rede das empresas beneficiarias, con respecto aos servizos actuais dos que dispoñen, “superará os 80Mbps en case o 90% dos casos chegando incluso a acadar máis dos 300Mbps nalgunha das empresas beneficiarias das axudas”.
Estas liña de axudas co-fináncianse ao 75% polo Fondo Europeo Agrícola de Desenvolvemento Rural (FEADER) no marco do Plan de desenvolvemento rural de Galicia 2014-2020 (PDR) e é a segunda das actuacións do Plan de Banda Larga 2020 para a extensión de redes de banda larga ultrarrápida na Comunidade.
Plan de Banda Larga de Galicia 2020
O Plan de Banda Larga de Galicia 2020, aprobado o 1 de outubro de 2015 no Consello da Xunta, asume os obxectivos establecidos na Axenda Dixital para Europa de garantir unha cobertura de banda larga de cando menos 30Mbps para a totalidade da poboación e impulsar a contratación nos fogares de servizos de banda larga por riba dos 100Mbps.
Polígonos xa cubertos en 2017
Parque Empresarial de Arzúa, Parque Empresarial A Piadela, Parque Empresarial de Coirós, Centro Loxístico do Transporte, Plan Sectorización Cerámicas Campo (Laracha), Parque Empresarial de Malpica, Parque Empresarial A Madanela (Melide), Polígono Industrial As Lagoas (Narón), Polígono Industrial Augalevada (Noia), Parque Empresarial de Ordes, Parque Empresarial de Sigüeiro e Oroso Pequeno, Polígono Industrial de Picusa (Padrón), Parque Empresarial da Picaraña (Padrón), Polígono Industrial A Tomada (Pobra do Caramiñal), Parque Empresarial de Ponteceso, Parque Empresarial de Penapurreira (As Pontes), Parque Empresarial de Rianxo, Polígono Industrial Arco Iris (Sada), Parque Empresarial de Santa Comba, Parque Empresarial de Vimianzo, Área Industrial de Carral, Parque Empresarial de Lourenzá, Parque Empresarial de Mondoñedo, Parque Empresarial de Outeiro de Rei, Polígono Industrial de Ribadeo, Parque Empresarial de Chorente (Allariz), Parque Empresarial do Barco de Valdeorras, Polígono Industrial de A Médua (O Barco), Parque Empresarial de Celanova, Parque Empresarial de Ribadavia, Parque Empresarial de Verín – Pazos, Parque Empresarial de Bueu – Castiñeiras, Polígono Industrial Arcos da Condesa (Caldas de Reis), Zona Industrial de As Veigas de Almorzar (Caldas), Área Empresarial de Forbesa (Caldas), Polígono Industrial de O Salnés (Cambados), Parque Empresarial de A Estrada – Toedo, Polígono de Porto Meloxo (O Grove), Polígono Industrial de As Covas (Meis), Polígono Industrial de Vilanoviña (Meis), Parque de A Reigosa e Central de Transportes e Ponte Caldelas, Polígono Industrial de A Lomba (Ponteareas), Parque Empresarial de O Campiño (Pontevedra), Área de Negocios Oceanis (O Porriño), Parque Empresarial de Silleda, Parque Empresarial de Areas (Tui), Polígono Industrial O Camballón (Vila de Cruces), Parque Empresarial de O Pousadoiro (Vilagarcía), Polígono Industrial de Bamio (Vilagarcía) e Parque Empresarial de Vilanova (Área Loxística de Baión – Ría de Arousa).

Categorías: Ciencia

Bota a andar o plan de substitución de baterías degradadas dos iPhone a 29 euros

Mar, 01/02/2018 - 12:05

A semana pasada Apple anunciou que, ante a polémica creada ao redor da súa falta de comunicación e transparencia sobre un cambio de iOS que fai que os móbiles con baterías degradadas reduzan a súa velocidade, reducirían o prezo da substitución das baterías afectadas, estando previsto este programa a partires de finais de xaneiro e até o remate de 2018, pero finalmente parece que o programa xa está operativo dende a pasada fin de semana segundo comunicaron a TechCrunch, de xeito que, os usuarios que teñan un iPhone 6/6 Plus/ 6s/6s Plus/SE cunha batería en mal estado poidan proceder á súa substitución a un prezo de 29 euros mentres que o prezo anterior era de 89 euros.
Cómpre lembrar que a degradación de baterías é algo habitual en todos os smartphones e, de feito, todos os fabricantes consideran o elemento como se dun consumible se tratase, de xeito que non ten o mesmo tratamento que o resto do terminal a efectos de garantía, pero no caso que nos ocupa non estariamos nun caso xeral porque Apple sería o primeiro fabricante do que se sabe que modificou o software dos seus terminais para mudar o seu comportamento en función do estado das baterías, algo que claramente debería ter comunicado aos consumidores para proceder en consecuencia. De feito, Apple insiste en que as modificacións de iOS que afectan ao rendemento dos seus móbiles cando teñen baterías degradadas é unha medida que consideran positiva, pese a que moitos consumidores prefiran ver como o móbil perde autonomía paulatinamente antes que padecer descensos de rendemento.

Categorías: Ciencia

O CPETIG presenta recurso contra o Parlamento polo que considera un novo caso de discriminación aos informáticos

Mar, 01/02/2018 - 11:41
Marcos Mata, presidente do CPETIG

O Colexio de Enxeñaría Técnica en Informática (CPETIG), a través do seu presidente, Marcos Mata, presentou o pasado 28 de decembro un recurso potestativo de reposición contra o acordo da Mesa do Parlamento de Galicia que abre a todas as titulacións a convocatoria de dúas prazas da escala técnica en informática da Cámara Galega. Segundo a entidade profesional galega, este acordo infrinxe “os principios de mérito e capacidade e quebranta o de igualdade”. O CPETIG lembra que en orixe estas prazas foron convocadas esixindo a titulación en Informática, segundo as bases publicadas no DOGA do 22 de agosto de 2017. Porén, como consecuencia dun recurso presentado e estimado pola Mesa do Parlamento, a Cámara aprobou cambios nos requisitos de formación.
Estas modificacións, engade o CPETIG, deixou o acceso a estas dúas prazas libre para “calquera persoa diplomada ou graduada nunha titulación de calquera rama”, segundo as bases, publicadas no DOGA do 28 de novembro de 2017. Nas súas alegacións, o colexio recorda que a formación esixida en orixe (Diplomatura en Informática, Enxeñaría Técnica en Informática ou Grao en Enxeñaría Informática) é a requirida “expresamente para os postos convocados pola lexislación do propio Parlamento”, do mesmo xeito que así se dispón na Relación de Postos de Traballo da Administración do Parlamento de Galicia.
O CPETIG engade que o feito de abrir a convocatoria destas prazas” á xeneralidade das profesións” supón “unha discriminación ao ver usurpada a súa especialización”. Ademais, o proceso pon de manifesto un problema que non adoita darse noutras Comunidades Autónomas, onde as convocatorias de postos análogos resérvanse “única e exclusivamente a persoas tituladas en Enxeñaría Técnica en Informática, que son as únicas oficialmente capacitadas segundo a súa titulación para o exercicio das funcións propias das prazas convocadas”.
Marcos Mata e o colexio engaden que este caso pon de relevo, novamente, “a indefensión na que viven os enxeñeiros técnicos en Informática de Galicia”.
Asemade, o CPETIG entende que “estaríanse conculcando os preceptos de igualdade, mérito e capacidade para o acceso ao emprego público, derivados na normativa vixente, e a necesaria adecuación entre o contido dos procesos selectivos e as funcións e tarefas a desenvolver, recollida no Estatuto Básico do Empregado Público”.

Categorías: Ciencia

A Xunta mobilizará máis de 100 millóns de euros na dixitalización e formación das PEME

Mar, 01/02/2018 - 11:21

A Consellería de Economía, Emprego e Industria, a través do IGAPE, destinará este ano preto de 6 millóns de euros en proxectos colectivos de dixitalización para apoiar a 100 PEME galegas e na formación en tecnoloxías, procesos e metodoloxías da Industria 4.0 para achegar coñecementos a 1.000 traballadores e mandos intermedios. Estas novas convocatorias, que vén de publicarse no Diario Oficial de Galicia (DOG), favorecerán conxuntamente a mobilización de máis de 10 millóns de euros.
A Xunta, dunha banda, promove proxectos colectivos de dixitalización nas PEME destinando para iso un total de 5 millóns de euros para apoiar investimentos ao abeiro da Axenda Galicia-Industria 4.0 e contando tamén con financiamento do Fondo Europeo de Desenvolvemento Rexional (FEDER). O obxectivo é potenciar a posta en marcha de sistemas informáticos que aporten valor ás empresas: tanto proxectos colectivos de soporte a procesos sectoriais multiempresa, como proxectos individuais de intelixencia artificial e de conectividade inter e intraempresarial.
Á realización de obradoiros para a xeración de proxectos colaborativos de dixitalización, financiados ao 100% co novo programa, súmanse as axudas a investimentos dixitais que poderán cubrir ata o 30% no caso das pequenas empresas e ata o 20% para as medianas, se ben os gastos de colaboracións externos necesarios poderán contar con apoios do 50%. O prazo para a presentación das solicitudes estará aberto ata o 31 de xaneiro de 2018 no caso de obradoiros e ata o 28 de febreiro no das axudas a investimentos en dixitalización. Haberá catro convocatorias ao longo do 2018.
Terán prioridade os proxectos colectivos formados por grupos de empresas e que, de maneira opcional, poden estar coordinadas por un organismo intermedio. A Xunta reforza con esta iniciativa a súa aposta por un modelo de empresa 4.0, dixital, innovadora e exportadora. Reforza e complementa así as convocatorias de axudas para impulsar investimentos 4.0, que se activarán por terceira vez en 2018 e que xa teñen beneficiado a 70 empresas con máis de 15 millóns de euros en investimentos.
O segundo dos programas, que vén de publicarse tamén no DOG, apoiará proxectos de capacitación en xestión e organización empresarial para achegar formación no eido 4.0 a 1000 profesionais, traballadores e mandos intermedios, que se formarán en organización industrial, liderado de proxectos, protocolos de cooperación interempresarial, utilización de ferramentas de business intelligence e de vixilancia tecnolóxica, co-creación de produtos, novos modelos de negocio e eficiencia enerxética.
Estas axudas á formación 4.0 contan cun orzamento de 700.000 euros para 2018, podendo beneficiarse organismos intermedios (clústers e centros tecnolóxicos) que organicen programas formativos nos que participen persoas vinculadas profesionalmente cunha PEME galega. Búscase así a especialización en eidos como a robótica, o tratamento masivo de información (Big Data), os vehículos autónomos, a conectividade (Internet das cousas), a ciberseguridade ou a Loxística 4.0.
Neste caso, as axudas cubrirán o 70% dos gastos no caso de que o organismo intermedio beneficiario cumpra as condicións de pequena empresa; do 60% no caso de mediana empresa; e do 50% nos restantes casos. Trátase da terceira convocatoria deste programa para o que o prazo de presentación de solicitudes será de dous meses a partir do 2 de xaneiro de 2018.
Deste xeito, a Xunta avanza no desenvolvemento da Axenda Galicia-Industria 4.0, impulsando a implantación da industria conectada e incrementando o seu peso no PIB ata 2020. Do desenvolvemento do primeiro plan bienal da Axenda Galicia-Industria 4.0 beneficiáronse 4.200 empresas, e para o segundo plan (2017-2018) cóntase cunha dotación orzamentaria de 175 millóns de euros para seguir avanzando na modernización do tecido produtivo galego.

Categorías: Ciencia

Feliz 2018!

Ven, 12/29/2017 - 23:50

Un ano máis chega á súa fin, e nós queremos aproveitar a ocasión para amosar a nosa satisfacción por poder ter dado conta da actualidade tecnolóxica de Galicia e o mundo aos nosos fieis lectores, recollendo os temas que consideramos que fosen de interese e axudando de paso a fornecer os contidos dispoñibles na nosa lingua na Rede.
Vivimos un ano de grandes cambios, no que o sector da telefonía móbil continúa a avanzar cara ao futuro 5G; o iPhone perdeu o seu característico botón de inicio; Nintendo demostrou que os móbiles, tabletas e ordenadores non mataron ás consolas de videoxogos; Twitter dixo adeus á súa limitación dos 140 caracteres; o mundo aprendeu polas malas os perigos do ransomware; e incluso puidemos comprobar como o público aplaudiu a chegada oficial ao noso mercado dun fabricante chinés (Xiaomi) constatando que certos sectores da electrónica de consumo son extraordinariamente dinámicos, de xeito que novos axentes poden ocupar o espazo de compañías con décadas de historia.
Moitos son os retos a superar o ano que vén, e moitos os cambios que viviremos, e dende Código Cero queremos acompañar un ano máis aos nosos lectores nesa viaxe cara adiante, que desexamos que sexa enriquecedora e satisfactoria para todos. Así pois, só nos queda desexar a todos unha feliz entrada de ano e un próspero 2018.

Categorías: Ciencia

Un novo Real Decreto busca facilitar a convivencia entre Uber e Cabify e o sector do taxi

Ven, 12/29/2017 - 23:42

O Consello de Ministros aprobou hoxe o Real Decreto polo que se establecen normas complementarias ao Regulamento da Lei de Ordenación dos Transportes Terrestres, Real Decreto 1211/1990, en relación coa explotación das autorizacións de arrendamento de vehículos con condutor co que búscase mellorar o regulamento no sector do aluguer de vehículos con condutor (VTC) (no que actualmente se encadran plataformas como Uber ou Cabify) e asegurar así a súa convivencia ordenada co do taxi.
A través deste Real Decreto impediranse as prácticas especulativas daqueles que solicitasen licenzas de VTC con obxecto unicamente de lucrarse coa súa inmediata revenda, sen intención de operalas. Para iso, introdúcese unha disposición que impide a transmisión de autorizacións durante un límite temporal de dous anos desde o seu outorgamento orixinal.
O Real Decreto tamén incluirá a creación dun rexistro único a nivel estatal ao que deberán comunicarse os servizos de VTC con carácter previo á súa realización para reforzar as garantías na esixencia da contratación previa do servizo de aluguer de vehículos con condutor (facilitando o labor dos servizos de inspección) e poderase controlar de maneira eficaz que o número de servizos realizados fóra da comunidade autónoma na que se ten licenza non supere ao 20% dos realizados.
Trátase, en definitiva, de garantir que os vehículos con autorización VTC sexan precontratados, evitando a captación de viaxeiros circulando polas vías públicas ou mentres están estacionados nos lugares de concentración e xeración de demanda destes servizos como son os portos, os aeroportos ou as estacións ferroviarias. Tamén permitirá garantir o cumprimento do criterio de habitualidade na prestación de servizos.
Por último, este Real Decreto impón que os vehículos para adscribir a novas autorizacións VTC, aínda que estas fosen obtidas mediante sentenza, deben cumprir os requisitos vixentes neste momento, con independencia dos que estivesen vixentes no momento en que se realizou a solicitude orixinal da correspondente autorización, co fin de garantir unha calidade na prestación destes servizos.

Categorías: Ciencia

A segunda edición de Youtubeir@s entregará 5.500 euros en premios

Ven, 12/29/2017 - 23:13

As entidades impulsoras da segunda edición do certame Youtubeir@s, destinado a encher a Rede de contidos audiovisuais na nosa lingua (facendo especial fincapé en YouTube), non queren rematar o ano 2017 sen lembrar o seu cometido (incrementar a presenza do galego na rede social de vídeos máis grande do mercado global), os xeitos de participar no concurso e os interesantes premios que se poñen en xogo para as gañadoras e gañadores. Segundo nos recorda hoxe a Universidade de Santiago, a segunda edición xa está en marcha, acollendo vídeos de opinión ou videotitoriais sobre os máis variados temas de interese. En total, o certame entregará 5.500 euros en premios repartidos nun conxunto de categorías que incrementan o seu número con respecto ao pasado ano.
Por modalidades, a convocatoria contempla os apartados de vídeos-facermos, vídeos-opinarmos, canle, creatividade, eficiencia comunicativa, calidade técnica ou calidade lingüística.
A USC tamén recorda que outra das novidades desta segunda convocatoria é o apartado Premio do público. As persoas usuarias da rede social Facebook poderán propoñer a través dun simple comentario no perfil de Youtubeir@s un vídeo do que sexan seareiros/as incluíndo cancelo #propostayoutubeira. As pezas propostas han de axeitarse ás categorías de vídeo-facermos e vídeo –opinarmos. As bases ao completo pódense consultar no web www.youtubeiras.gal e os premios entregaranse o vindeiro 20 de abril de 2018 nun acto público na Coruña no que o xurado dará coñecer os vídeos gañadores.
A nova convocatoria promóvena os servizos de normalización lingüística das tres universidades galegas, de nove concellos (Baña, Ames, Carballo, Ourense, Pontevedra, Ribadeo, Santiago, Teo e O Grove) e a Deputación da Coruña.

Categorías: Ciencia

Comproban o mal funcionamento do sistema de control de contidos en Facebook

Ven, 12/29/2017 - 20:17
Imaxe denunciada en Facebook que non foi eliminada polos moderadores por considerar que non é ofensiva

Dende ProPublica decidiron pór a proba o sistema de control de contidos de Facebook, para coñecer a fondo se a compañía de Mark Zuckerberg está a tomar en serio a súa loita contra os discursos de odio e outros contidos ofensivos que non deberían estar nunca ao alcance do público, constatando o que todos temiamos: o sistema de verificación é un completo desastre.
Como exemplo, denunciaron unha imaxe na que pode verse un cadáver xunto ao texto «o único bo musulmán é o puto musulmán morto» para recibir como contestación que non atoparan nada na imaxe que fose contra as normas de Facebook. O mesmo acontece con comentarios como «morte aos musulmáns!!» denunciados por numerosos usuarios, apoloxías da violación, comentarios racistas, bromas sexistas... demostrando que o equipo de 7.500 revisores de contido que actualmente ten Facebook non fan ben o seu traballo.
Non só constataron que nunha investigación realizada na que analizaron máis de 900 reclamacións a Facebook que a resposta era inconsistente (de xeito que os revisores actúan de xeito diferente ante contidos semellantes), senón que quixeron ser máis concretos, e colleron unha mostra de 49 elementos denunciados por usuarios e que son claramente ofensivos, para que dende Facebook recoñeceran o seu erro en 22 casos, en 19 considerasen que estaban dentro das normas da súa comunidade (como, por exemplo, no caso de insultos racistas nos que non se incite á violencia) e, en 6 casos, admitir que os contidos incumprían as normas pero os revisores non os eliminaron por estar mal denunciados ou por seren eliminados polos creadores. Nos 2 casos restantes recoñecen non ter información dabondo para responder.
Justin Osofsky, vicepresidente de Facebook, pediu desculpas polos erros cometidos e asegura que durante 2018 terán até 20.000 persoas encargándose destas tarefas, polo que confían en poder cumprir mellor as súas normas.
O peor destes sistemas de moderación é que non só fallan moito á hora de entender os discursos de odio, senón que tamén actúan no sentido contrario ao que deberían, censurando contidos indebidos, como borrar unha publicación contra unha marcha nazi precisamente por amosar a un neo-nazi na imaxe que a ilustra, co conseguinte bloqueo do usuario durante varios días, para logo pedir desculpas ante as medidas mal aplicadas, dando a impresión de que os revisores de contidos traballan a contra reloxo, sen chegar a entender os textos que están a censurar.
Sobra dicir que as normas de Facebook son pouco claras e non existen unhas pautas publicas para saber concretamente os contidos que aceptan ou rexeitan.

Categorías: Ciencia

Páxinas