códigocero

Subscribirse a Orixe códigocero
Información sobre novas tecnoloxías en Galicia e en galego.
Actualizado: fai 49 min 28 seg

Google quere potenciar a interacción a través do correo electrónico

Mar, 02/13/2018 - 19:30

Definitivamente a tecnoloxía AMP de Google quere ir máis aló da aceleración da carga de novas dende o móbil, e tras anunciar as historias AMP, agora anticipan unha versión das Accelerated Mobile Pages (AMP) para o correo electrónico, de xeito que Google publica un framework de código aberto que hoxe ábrese de xeito preliminar a desenvolvedores e que permitirá crear experiencias por correo electrónico que inclúan interacción.
Deste xeito será posible efectuar accións sinxelas dende as propias mensaxes de correo electrónico (cando menos se temos unha conta de Gmail, aínda que ao ser unha especificación aberta confían en que outras plataformas adopten esta tecnoloxía) o que permitirá responder a un convite, programar unha cita ou completar un formulario sen saír do cliente de correo electrónico.
Os compoñentes AMP que poderán incluírse nas mensaxes de correo electrónico serán carruseis, acordeóns e formularios, entre outros, de xeito que os correos electrónicos xa non serán elementos pasivos e desfasados, podendo amosar sempre información actualizada, o que podería ser de grande utilidade para numerosos servizos de compra de entradas, reservas de voos, seguimento de envíos, comercio electrónico... Queda agora en mans dos desenvolvedores tirar proveito desta tecnoloxía con moito potencial, especialmente se pasa a ser adoptada rapidamente polos servizos de correo electrónico de Yahoo e Microsoft (xa que, de limitarse a Gmail podería ser complicada a súa implantación de xeito xeral).

Categorías: Ciencia

Poñen cancela aos números telefónicos 118 para evitar abusos

Mar, 02/13/2018 - 19:06

O Ministerio de Enerxía, Turismo e Axenda Dixital modificou a Orde Ministerial que regula os números telefónicos 118, os que se usan para proporcionar servizos de información sobre números de teléfono, para eliminar o custo de establecemento de chamada, limitar o prezo por minuto e fixar a duración máxima da chamada.
A nova norma, publicada hoxe no BOE, inclúe a prohibición de cobrar un prezo polo establecemento de chamada ao servizo de información, de xeito que facturaríase só por tempo, sen cota fixa inicial, evitando así o abuso de casos nos que chegaban a cobrarse até 6 euros por establecemento de chamada.
A Orde tamén fixa o prezo máximo de 2,5 euros/minuto (cando había compañías que cobraban 6 euros/minuto) e, no caso de querer establecerse un prezo superior, estes números 118 non serían de acceso libre, senón que só estarían dispoñibles mediante solicitude previa ao operador.
A duración das chamadas tampouco poderá superar os 10 minutos de duración, incluíndo nesta duración aos servizos que ofrecen a posibilidade de conectar a chamada co número polo que se realizou a consulta, restrinxindo considerablemente os sustos que recibían moitos consumidores nos últimos anos.
Cando chamemos a un número 118 escoitaremos unha locución de 20 segundos no que informarase do prezo por minuto da chamada, da súa duración máxima e do responsable do servizo, estando prohibido que se inclúa contido adicional algún.
Tamén queda prohibido que as chamadas a servizos 118 podan realizarse mediante sistemas de marcación automática ou inadvertida, sendo obrigatoria a marcación activa, manual e consciente por parte do usuario.
A Orde pasará a ser efectiva dentro de tres meses a partires de mañá, para dar así tempo a que os provedores do servizo poidan adaptarse ao regulamento.

Categorías: Ciencia

Dispoñíbel para iOS e Android a app galega que nos axuda a aforrar, CoinScrap

Mar, 02/13/2018 - 16:56

Os creadores da aplicación Senseitrade, ferramenta galega que nos permite tomarlle o pulso ás redes sociais en materia bolsista (facéndonos recomendacións sobre os valores nos que cumpriría investir), están a darlle impulso, neste comezo do ano, a unha nova app destinada igualmente a mellorar a nosa economía, aínda que dun xeito diferente: redondeando cada compra realizada con cartón de débito ou de crédito, pasando a diferenza entre a compra e o redondeo a unha conta de aforro do usuario. Estamos a falar da aplicación CoinScrap, da que temos falado en Código Cero para salientar a súa participación en Galicia Open Future (o centro de emprendemento innovador de Telefónica) e a obtención do Premio Novo Emprendedor 2016 (concedido por AJE Vigo). Tanto Senseitrade como o peto dixital CoinScrap veñen da man de TxStockData, con sede na Tecnópole.
CoinScrap, que estreou nas tendas en liña a súa primeira versión, ten a súa orixe no seguinte feito: os atrancos que impiden ao 60% dos fogares españois dar aforrado aínda que sexa pequenas cantidades mensuais. A aplicación, que se sitúa eido das solucións fintech, é unha tentativa de abrir este tipo de ferramentas financeiras ao gran público, co obxectivo último de axudar ao cidadán de a pé, ao meirande número de familias. Segundo sinala David Conde, director executivo da empresa, “con CoinScrap queremos democratizar o aforro, a través dunha ferramenta totalmente dixital e que se adapte ao estilo de vida de cada persoa”. O seu funcionamento, como dixemos, baséase en redondear ao euro máis próximo calquera compra pagada con tarxeta, de forma totalmente automatizada e dixital. Os redondeos xerados transfírense a un produto que a aseguradora Caser deseñou especialmente para ofrecer un servizo acorde coas necesidades dos usuarios, buscando, en palabras de Conde, “simplicidade, flexibilidade e liberdade”. Segundo engade, a través de CoinScrap os aforros acumúlanse nun seguro de vida-aforro.
Os responsábeis de TxStockData tamén explican que o usuario só ten que rexistrarse, crear un obxectivo financeiro (por exemplo, mercar un smartphone), axustar as súas preferencias (importe do obxectivo, duración, redondeos e achegas mensuais) e, finalmente, conectar unha tarxeta de pago (crédito ou débito) e/ou unha conta bancaria á aplicación móbil para permitir o cálculo de redondeos.
Os desenvolvedores da ferramenta tamén explican, para despexar dúbidas, que en contra do que se pode pensar, as operacións de redondeo si que teñen potencial para crear aforros significativos. En base aos seus datos e experiencia, un usuario de 35 anos que comece a redondear aos 2 euros máis próximos e cunha achega mensual de 25 euros podería chegar a acumular ao momento da súa xubilación uns 54.000 euros.
Nesta primeira versión, CoinScrap só ten dispoñíbel a opción para aforrar a curto prazo, aínda que a finalidade é axudar aos usuarios a aforrar para metas a longo prazo como a xubilación.
A aplicación pódese descargar de balde na App Store de iTunes (para iOS) ou en Google PlayStore (para móbiles con Android).

Categorías: Ciencia

O investigador do CITIC Ignacio García dirixirá un proxecto sobre teoría de xogos

Mar, 02/13/2018 - 14:24

Ignacio García, investigador da área de Ciencia de Datos e Información do Centro de Investigación TIC da Universidade da Coruña (CITIC), dirixirá un proxecto de Investigación e Desenvolvemento (I+D) sobre teoría de xogos, un eido da matemática aplicada que afonda nas decisións que cómpre tomar para acadar a resolución dun reto ou dun desafío, atinxindo (tamén) as decisións tomadas polo resto dos axentes que interveñen no reto ou no desafío. Máis polo miúdo, o proxecto que vai dirixir Ignacio García busca optimizar aplicacións en loxística e estudar problemas de teoría de xogos.
Os traballos artéllanse ao redor de catro liñas de investigación: solucións en teoría de xogos, aplicacións dos xogos cooperativos en modelos de investigación operativa multi-axente, optimización en problemas de transporte e planificación e optimización en problemas de enerxía e medioambiente.
O equipo humano deste proxecto está composto por dezaoito matemáticos coordinados por investigadores do CITIC da UDC e no que tamén participan investigadores da Universidade de Santiago e da Universidade de Vigo.
Este proxecto está co-financiado polo Plan Estatal de Investigación Científica e Técnica e de Innovación 2013-2016 do MINECO e os Fondos europeos FEDER. Ademais, o MINECO concedeulles un contrato predoutoral dentro do seu Programa Estatal de Promoción do Talento e a súa Empregabilidade en I+D+i.
Para quen non o saiba, a teoría de xogos é arestora un dos ámbitos de estudo máis relevantes no eido económico, de especial relevante na pescuda de metodoloxías que axuden entender o noso comportamento fronte á toma de decisións. As investigacións desta teoría, polo tanto, afondan nas estratexias máis indicadas ante un problema e os diferentes comportamentos previstos e observados. Emprégase moito en economía aínda que tamén en bioloxía (selección natural), socioloxía, psicoloxía, filosofía e ciencias da computación.

Categorías: Ciencia

Vitae organiza a sexta edición do seu curso sobre datos masivos e arquitecturas

Mar, 02/13/2018 - 12:35

A consultora galega Vitae vai ofrecer os días vindeiros a sexta edición do seu exitoso obradoiro centrado na información a gran escala e nas súas posibilidades, centrándose en poñernos ao alcance da man ferramentas que nos axuden mellor a manexar datos de envergadura, avalialos e extraer, para noso día a día, conclusións e pautas de valor. O Curso Big Data Deseño e Arquitectura de Solucións con Hadoop, Spark e R, cuxa primeira edición remóntase a 2012, achega 20 horas de formación avanzada sobre recursos axeitados para tirar proveito de cada pequena parte de coñecemento que xeremos ou recibamos. E máis tendo en conta que, como sinalan dende Vitae, “na era da información cada dato importa”.
Por exemplo á hora de proporcionar vantaxes competitivas (onde é preciso coñecer as diferentes aproximacións que temos dispoñíbeis para xestión de grandes cantidades de datos).
Durante este obradoiro, que se celebra na Coruña os días 9, 10, 16 e 17 de marzo na Coruña (Hotel Attica 21), avaliaranse os diferentes camiños para abordar o manexo de datos a gran escala, mostrando as alternativas de arquitectura dispoñíbeis, con vistas a dar resposta aos requirimentos de análise de información de cada entidade ou empresa.
No curso empregarase HDinisght, a distribución Hadoop de Microsoft na nube para os laboratorios prácticos durante o curso, aínda que os conceptos serán válidos para calquera das distribucións do mercado.
Os obxectivos do obradoiro son os seguintes: coñecer as diferentes arquitecturas dispoñíbeis e posíbeis para definir unha arquitectura Big Data; diferenciar os diversos tipos de requirimentos de análise de información; e introducirnos na analítica avanzada a través dos programas Spark e R.
O curso vai dirixido a profesionais do ámbito das Tecnoloxías da Información (TI) que queiran adquirir coñecementos sobre a xestión, o manexo e a interpretación do coñecemento a esgalla.
O temario abrangue unha introdución a Hadoop, os fundamentos de almacenamento, un achegamento á configuración de servizos Hadoop, o uso de Ambari para seguimento e administración, os fundamentos de Hive, a arquitectura de Apache Spark e un achegamento ao R-Server en Spark.
O profesional que impartirá o obradoiro será Antonio Soto Rodríguez, enxeñeiro en Informática de Sistemas pola Universidade da Coruña e profesional con máis de dúas décadas de experiencia como consultor técnico experto e certificado, achegando formación na Universidade Microsoft e a empresas e organismos como a NASA, NASDAQ, PEMEX, SERGAS, Citroen, CEAGA, Inditex, Ferroplast, Banco Popular, ABANCA, Xunta de Galicia ou Abertis.

Categorías: Ciencia

O Messenger quere axudar a celebrar o amor

Mar, 02/13/2018 - 12:30
.spip_doc_titre{margin-right:auto;margin-left:auto;font-weight:bold;font-size:0.90em;}


O Día dos Namorados tamén se celebra en Facebook, e para facelo máis especial decidiron aproveitar as funcionalidades do seu Messenger para axudar a conectar máis ás parellas durante este 14 de febreiro, de xeito que os usuarios que recentemente fixeran público en Facebook que están a manter unha relación romántica, recibirán unha notificación que abrirá unha conversa coa persoa que queren.

Categorías: Ciencia

Google quere que os medios conten historias para móbiles en vertical

Mar, 02/13/2018 - 11:58

Google leva uns anos promovendo a súa tecnoloxía de Accelerated Mobile Pages (AMP) para axilizar a carga de páxinas web no móbil dende o seu buscador, pero este proxecto quere chegar máis aló, e agora presentan o formato AMP story, que vén a ser o equivalente ás historias de Instagram e outras plataformas sociais, pero levadas aos grandes medios, que poden agora ofrecer novas e informacións de xeito enriquecido e optimizadas para o seu consumo en vertical no móbil.
As historias AMP buscan servir para narrar a través de imaxes e vídeos en dispositivos móbiles, atendendo ao atractivo que ten o visual no consumo rápido, xa que este tipo de contidos téñeno máis doado para captar audiencias, atendendo ao feito de que no teléfono é máis difícil que os usuarios fagan lecturas repousadas.
Para experimentar con este formato Google puxo as súas especificacións en mans dun pequeno grupo de editores (CNN, Conde Nast, Hearst, Mashable, Meredith, Mic, Vox Media e The Washington Post) para que comezasen a elaborar contidos optimizados para móbiles sen preocuparse polos desafíos técnicos e centrado aos creadores na narrativa das súas historias. Agora as primeiras destas historias AMP xa son visibles para calquera no móbil, e calquera creador tamén pode comezar a desenvolver contidos neste formato para que apareza nos resultados de busca de Google.

Vídeo de presentación das AMP stories

Categorías: Ciencia

A galega DabyzSoft equipa os polígonos do Grove e Ribadumia con pantallas de publicidade interactiva controladas na nube

Mar, 02/13/2018 - 11:18

A firma galega DabyzSoft, con sede no Grove e centrada en sistemas e tecnoloxías de publicidade interactiva, vén de dotar aos polígonos industriais de Ribadumia e Cambados (7 Pías) con pantallas xigantes de información aos usuarios. Os traballos despregados por DabyzSoft nos complexos industriais arousáns remataron o pasado mes. O resultado foi a instalación de pantallas de seis metros cadrados de superficie cada unha na entrada de cada polígono.
Máis polo miúdo, trátase de dispositivos con soporte tipo tótem de catro metros de altura por dous metros de ancho que se van empregar para sinalización dixital nos polígonos, información institucional dos Concellos e información de interese para os veciños e para os usuarios. Segundo informan fontes de DabyzSoft, as propias empresas emprazadas nas dúas áreas industriais terán a oportunidade de contar cun espazo de seu para as súas comunicacións, mediante vídeo e imaxes fixas.
Dende DabyzSoft indican que se instalaron módulos Fullcolor con vídeo a toda cor e un tamaño de pitch P6,67, o que dota a pantalla dunha resolución de 288 píxeles de ancho por 432 píxeles de alto, e polo tanto 124.416 LED. Así mesmo, equipáronse con controladoras e player con xestión dende a nube, polo que todos os contidos son incorporados en remoto dende os propios Concellos a través dunha web de xestión.
A empresa tamén informou de que este tipo de dispositivos responde a unha importante demanda das empresas, da cidadanía en xeral e tamén das propias entidades públicas, sobre todo polo importante compoñente de información accesíbel e inmediata que poñen en xogo.
DabyzSoft tamén salienta o elemento de coidado medioambiental que achegan estas tecnoloxías, xa que liberan ás empresas do gasto continuo en materias primas que implica a publicidade tradicional. “A nosa tecnoloxía non xera residuos e os recursos LED teñen un consumo enerxético de só 310W/m2”, explican, engadindo que o baixo gasto enerxético non impide dispor dun alto nivel de brillo (5500cd/m2) e contraste (4000:1) para garantir a máxima visibilidade dos paneis a plena luz do día cun ángulo de visión de 140º en horizontal, 120º en vertical e protección IP65 para a meteoroloxía galega.
DabyzSoft é unha empresa radicada en O Grove que se adica a integrar pantallas de gran formato en diversos soportes, xa sexa integración en fachadas e escaparates, así como deseño de soportes para dar o servizo que demandan os clientes. Así mesmo ten pantallas para publicidade en O Grove e Cambados e tamén diversas pantallas en aluguer para diferentes eventos que se desenvolven tanto en interior coma en exterior.

Categorías: Ciencia

Vodafone proba unha nova tecnoloxía de mastros para levar o 4G ao rural

Lun, 02/12/2018 - 23:00

Para facilitar a achega da banda larga móbil ás zonas pouco poboadas Vodafone vén de probar con éxito en Porthcurno (Cornwall, Reino Unido) un pequeno mastro móbil 4G que permite que os usuarios poidan gozar de voz servizos de voz e de datos até a 200 Mbps. Esta instalación consistiría nun pequeno mastro telescópico que só levantaría 8 metros ao estenderse ao máximo, de xeito que sería a metade de alto que un mastro estándar, e podería pintarse para pasar desapercibido en contornos naturais. Tampouco precisaría de grandes instalacións eléctricas para funcionar, polo que sería unha solución moi discreta.
Esta tecnoloxía desenvolveuse en colaboración con CommScope, e podería ser ideal para casas de turismo rural, praias, parques e outras zonas turísticas, levando a súa implantación a terceira parte de tempo que a instalación dunha antena de telefonía móbil ordinaria.
Polo momento estes pequenos mastros 4G instalaranse en Reino Unido para facilitar a cobertura 4G en zonas rurais nas que buscan un pequeno impacto visual e ambiental, atendendo a necesidade de conectividade da poboación. Aínda non se confirmou se estes mini mastros 4G chegarán a instalarse en España.

A nova tecnoloxía de pequenos mastros 4G provouse con éxito en Porthcurno
Categorías: Ciencia

O CEIP de Laredo, finalista en Wisibilízalas 2018

Lun, 02/12/2018 - 22:54

O CEIP de Laredo (Chapela, Redondela), un dos nosos principais referentes en afianzamento das tecnoloxías no día a día das/os escolares, comezou ano con forza no que a participación en certames tecnolóxicos se refire. Se recentemente falamos da súa presenza no proxecto educativo-aeroespacial Hana (no que concorre como centro piloto), hoxe puidemos saber que o seu proxecto Donas do Código foi un dos tres seleccionados, de entre 300 centros aspirantes a nivel estatal e latinoamericano, para parar á rolda final do Premio Wisibilízalas, convocado por Google e a Universitat Pompeu Fabra coa finalidade de dinamizar a ciencia e as tecnoloxías nos perfís femininos, visualizando figuras referentes nestes eidos. O proxecto galego, finalista na categoría junior con outras dúas achegas, foi realizado pola titora de sexto de EP (Educación Primaria) Paula Pérez, e (por suposto), na compaña das súas alumnas e alumnos.
Os obxectivos de Donas do Código son os seguintes: xerar reflexión no centro de Redondela sobre a menor visibilidade das mulleres en ciencia e tecnoloxía; mostrar mulleres que traballan no ámbito das novas Tecnoloxías da Información e a Comunicación (TIC), salientando referentes locais, autonómicos, estatais; potenciar as referencias femininas no ámbito da ciencia e a tecnoloxía nun contexto escolar; e sensibilizar sobre a “interdisciplinariedade” do ámbito tecnolóxico: medicamento, pedagoxía, astrofísica... escollendo figuras senlleiras en diferentes ámbitos.
Para acadar os ditos obxectivos o alumnado investigou durante o primeiro trimestre do curso 2017-2018 a nove mulleres senlleiras no ámbito do TIC en Galicia, creando unha páxina web específica (donasdocodigo.ceipdelaredo.com) na que describen carreira (biografía, resultados destacados, curiosidades...) de maneira libre (incluíndo texto, fotos, vídeos...) e achegando testemuños inéditos como entrevistas persoais.

Categorías: Ciencia

A firma galega OpSeeker mellora a saúde financeira da mocidade holandesa

Lun, 02/12/2018 - 16:47

A firma innovadora OpSeeker, con sede en Compostela e especializada en adestramento financeiro en liña, está a levar a cabo unha importante actividade de asesoramento entre os usuarios dos sistemas e servizos financeiros holandeses. A empresa, da que falamos hai pouco para salientar a súa participación na aceleradora de proxectos tecnolóxicos Startupbootcamp (sectores fintech e ciberseguridade), estableceu un acordo con Rabobank e Vivat, dúas das entidades bancarias locais máis importantes e innovadoras, para estudar xeitos de mellorar a economía da mocidade do país. Esta traballo con Rabobank e Vitat permitiralle ao equipo impulsor de OpSeeker, en última instancia, contribuír á optimización do sistema financeiro holandés. “Isto non é máis que outra proba de que en Galicia hai talento, e moito”, explican dende a firma galega.
Como dixemos, a presenza de OpSeeker en Holanda fortaleceuse o pasado mes de outubro, cando foi elixida pola aceleradora fintech máis importante de Europa, Startupbootcamp, con sede en Holanda. A firma galega, de feito, foi unha das 11 startups, de máis de 540 que se presentaron á convocatoria, seleccionadas para o programa de aceleración nos devanditos eidos de actividade.
Gonzalo Camiña Ceballos, Lucie Hefnerová e Carlos Rodríguez Raposo, 3 dos 4 fundadores da empresa, están a traballar desde Amsterdam para facer “o seu soño realidade”. Ou sexa, para fornecer ás novas xeracións dos recursos que lles permitan mellora a súa saúde financeira. Sen ir máis lonxe, esta semana, o 8 de febreiro, participarán no Demo Day da dita aceleradora, evento que os emprendedores galegos culminan o programa e presentan, perante máis de 400 profesionais do mundo financeiro europeo, o traballo desenvolvido ao longo dos últimos tres meses.
Segundo explican, a súa experiencia en Startupbootcamp foi “inmellorábel”. O programa de aceleración, de feito, permitiulles traballar diversas partes do negocio e operar, por exemplo, con profesionais da interpretación e de creación de contidos para mellorar a súa comunicación. Amais, dispuxeron do asesoramento de mentores que lles axudaron a fortalecer áreas tan importantes como o desenvolvemento de cliente e de produto, a cultura de empresa ou a parte tecnolóxica.
A respecto de toda esta bagaxe acumulada, Gonzalo Camiña, director executivo de OpSeeker, sinala que “este programa marcou un antes e un despois na nosa startup, permitíndonos, entre outras cousas, obter en tres meses o que en circunstancias normais conseguiríamos en dous anos”. Porén, tamén recoñecen que o traballo foi duro e que lles ocupou moitas horas da semana, chegando a vivir, nalgunhas xornadas, practicamente na oficina de seu. Tamén lles valeu, ademais, para que Rabobank, o segundo banco cooperativo en Holanda, líder de mercado nunha chea de segmentos, e Vivat, unha das maiores aseguradoras do país, fixáranse no labor OpSeeker e na súa proposta principal: utilizar as finanzas de comportamento a favor do usuario para así conseguir dúas cousas moi importantes, que os usuarios novos empecen a entender a importancia de investir a longo prazo e que o se lancen a investir dunha maneira axeitada.
Para quen non o saiba, as finanzas “condutuais”, ou finanzas do comportamento, son un eido que se centra na psicoloxía dos investimentos. Naceu a finais dos 70 da man de Armos Tversky e Daniel Kahneman e este ano o premio Nobel de Economía recaeu no máximo estandarte desta corrente de pensamento na actualidade, Richard Thaler, autor de libros como Nudge (un pequeno empuxón) ou Misbehaving.

Categorías: Ciencia

A Deputación de Ourense anuncia un portal para facilitar aos concellos o inventariado dos seus bens

Lun, 02/12/2018 - 13:13

Tirar proveito das novas tecnoloxías para que todo os recursos cos que contan os nosos concellos estean centralizados, documentados e visualizados nun acubillo único, favorecendo o seu mantemento, a súa visualización e o traballo diario con eles. Este é o leit motiv dunha nova iniciativa dixital da Deputación de Ourense, que, co gallo de axudar ás administracións locais nos ditos traballos, vén de pór á súa disposición un portal web de xestión e publicación dos inventarios de bens municipais. A medida foi dada a coñecer polo deputado provincial Pablo Pérez, na xornada de presentación desta acción de colaboración cos concellos, celebrada no Centro Cultural Marcos Valcárcel e á que asistiron preto de 100 representantes e técnicos do ámbito local.
Segundo fixo saber, este portal web vai combinar os datos dos concellos cos que ofrece a Enquisa de Infraestruturas e Equipamentos Locais (EIEL), un instrumento de análise dos servizos municipais que ten como obxectivo “coñecer a situación e o nivel dos servizos ofrecidos aos habitantes dos municipios, sendo a Deputación a encargada de realizar esta enquisa para os termos administrativos de menos de 50.000 habitantes”. Asemade, a entidade provincial anunciou que tamén porá técnicos a disposición dos concellos para que colaboren co persoal local no traballo de campo do inventario, cuxos datos serán expostos no portal web anunciado.
Por outra banda, Pablo Pérez engadiu que a plataforma porá en xogo “maior eficacia” e permitirá “un mellor aproveitamento da enquisa de infraestruturas locais”, así como a creación e xestión de inventarios que cubran as necesidades das administracións. O deputado lembrou que a día de hoxe a entidade provincial conta cun Xeo-portal no que se poden consultar os equipamentos existentes nos concellos da provincia de Ourense (a excepción da capital), tanto en materia de infraestruturas como no que atinxe ao abastecemento de auga, rede de estradas, recollida de lixo e iluminación pública, entre outros recursos.

Categorías: Ciencia

A Fundación TIC inmortaliza a Queima das Fachas de Castelo

Lun, 02/12/2018 - 11:14

O patrón da Fundación TIC e deputado de Relacións Institucionais (Deputación de Lugo), Álvaro Santos, presentou este sábado o primeiro documental sobre A Queima das Fachas de Castelo nun acto celebrado no local social desta parroquia de Taboada e acompañado polo presidente da Asociación Cultural A Fachas, Manuel Fidalgo. Nesta cita coa veciñanza de Santa María de Castelo, Santos salientou o importante papel despregado polas xentes da localidade a prol da permanencia e promoción da dita festividade, ao tempo que puxo o foco sobre o principal obxectivo da Fundación TIC apoiando a festividade: “Queremos contribuír a manter viva unha tradición ancestral e das máis singulares de Galicia, unha iniciativa que se remonta á época castrexa e que nos fai sentir orgullosos da nosa cultura e das nosas orixes”. O documental que inmortaliza a Queima das Fachas, que será promovido nunha chea de canles tecnolóxicas (redes sociais, webs propias da Deputación), foi feito polo alumnado e os profesores da Fundación TIC.
A peza audiovisual, de 15 minutos de duración, abrangue todo o proceso de desenvolvemento da festividade: dende a recollida dos agucios, a elaboración das fachas, o traslado ao castro, a súa instalación, até a queima propiamente dita, que ten lugar todos os anos, desde hai séculos, na noite do 7 ao 8 de setembro.
Ademais, a obra conta coa participación do antropólogo Xabier Viana, e inclúe “declaracións dos veciños que conservan a tradición dos seus antepasados e de rapaces que nos fan confiar en que se manteña no futuro”, sinalou Santos, engadindo que o audiovisual “tamén é un recoñecemento ao traballo que está a desenvolver a Asociación Cultural As Fachas”.
Apoio da TIC ao tecido asociativo
A Asociación Cultural As Fachas constituíuse a finais de 1992 e ten entre os seus obxectivos “procurar que non se extinga esta tradición ancestral, a súa organización e a conservación patrimonial da parroquia”. É unha das organizacións sen ánimo de lucro que ten asinado convenio coa Fundación TIC. Esta colaboración forma parte dunhas das principais liñas de actuación da entidade da Deputación de Lugo, de apoio ao tecido asociativo da provincia e ao labor que desenvolve en diversos ámbitos.

Categorías: Ciencia

AMTEGA libera o arquetipo corporativo de seu para favorecer o desenvolvemento de aplicacións Java

Lun, 02/12/2018 - 11:13

Favorecer a reutilización do arquetipo corporativo de AMTEGA en beneficio de outras administracións, entidades ou particulares, e tamén, en beneficio do enriquecemento do propio arquetipo. Este é o gran obxectivo da liberación do modelo-esqueleto de seu que vén de impulsar a Axencia para a Modernización Tecnolóxica de Galicia, unha liberación que resume o ideario básico do software libre e que, neste caso concreto, ampliaría os recursos dos que dispón a comunidade de desenvolvedores para dar forma a aplicacións Java Spring Web. Segundo informa a axencia, o código fonte está dispoñíbel no repositorio de Software Libre da Xunta de Galicia, na Forxa de Mancomún.
O obxectivo deste novo ceibado de programas de AMTEGA é “pór a disposición de desenvolvedores, tanto particulares, empresas como outras administracións, o esqueleto común das aplicacións que se materializan na axencia, co fin de que poida servir como guía para a realización de aplicacións baseadas nesta tecnoloxía, favorecendo a reutilización e fomentando a estandarización das mesmas”. Así mesmo, permitirá “tamén que o traballo de liberación das novas solucións que se desenvolvan tomando como base este arquetipo sexa moito máis áxil e sinxelo”.
Segundo informan os desenvolvedores de AMTEGA, o código fonte dispoñibilizado acubilla, amais do modelo construtivo para dar forma a novas ferramentas, varios compoñentes transversais que se empregan dentro da axencia e aos que se lles pode dar unha manchea de novas vidas, dende en sistemas de autenticación de usuario a sistemas de configuración ou de plugins.
Para quen non o saiba, Spring é un framework ou entorno de traballo para o desenvolvemento de aplicacións web usando a linguaxe de programación Java. O arquetipo sería pois un “esqueleto base común para a realización de aplicacións”, que acubilla o alicerce preciso para construír sobre el funcionalidades máis específicas. Esta liberación enmárcase no Plan de Acción en materia de Software Libre da Xunta de Galicia e contou coa participación da Oficina de Software Libre da Amtega, quen elaborou un informe técnico que garante a viabilidade xurídica da liberación e as condicións nas que se pode realizar. O Arquetipo publícase cunha licenza libre ASLv2 (Apache Software License version 2) e tamén baixo a EUPL (European Union Public License).

Categorías: Ciencia

Vodafone agasalla aos clientes con datos e chamadas sen límite o 14 de febreiro

Lun, 02/12/2018 - 11:13

Con motivo da celebración do día de San Valentín, este 14 de febreiro, Vodafone vén de pór en marcha unha nova campaña específica ao servizo dos seus clientes e, por suposto, das demandas extra de comunicación e información propias desta data. Segundo informa a compañía, os seus usuarios poderán gozar de chamadas nacionais, así como de datos sen límite para navegar por Internet durante o 14 de febreiro.
O devandito tradúcese no seguinte: os particulares, os profesionais e as pequenas empresas de contrato terán a posibilidade de empregar todo o que queiran calquera aplicación móbil de vídeo, redes sociais, música, etc, sen consumir datos da súa tarifa, en palabras de Vodafone “coa mellor rede 4G do mercado español”. Ademais poderán realizar chamadas nacionais a móbiles e fixos sen custo, excepto a números de tarifas adicionais, números premium, etc. Para gozar desta promoción, os clientes deben acceder á páxina web específica www.vodafone.es/sanvalentin.

Categorías: Ciencia

As lonxas galegas avanzan na súa dixitalización ao abeiro do Programa Primare

Lun, 02/12/2018 - 10:30

A Xunta inicia a dixitalización das lonxas en 10 das 35 rulas previstas no marco do Programa Primare. A conselleira do Mar, Rosa Quintana, e a directora da AMTEGA, Mar Pereira, mantiveron unha xuntanza de traballos co patróns maiores e responsables das confrarías que participan na primeira fase da iniciativa: Arcade, Cangas, Ferrol, Fisterra, Illa de Arousa, Moaña, Portonovo, Redondela, Vigo e Vilaboa.
Serán as primeiras lonxas que terán á súa disposición unha plataforma tecnolóxica única, que integrará os sistemas de xestión, comercialización e emisión de notas de venda, modernizando a xestión duns procesos fundamentais na xestión e comercialización que se desenvolve nas lonxas galegas.
As lonxas terán acceso nesa plataforma a unha nova solución de comercialización que lles permitirá obter información de xeito automático da identificación, clasificación e pesada das capturas descargadas na lonxa para a súa poxa nas distintas modalidades e emitir os documentos relacionados coa comercialización dos produtos; así como introducir e validar a información de xeito directo desde outros sistemas de información. A iniciativa inclúe a renovación dos equipos tecnolóxicos asociados que sexa necesario: pantallas de poxa, servidores, smartphones, equipamento que facilite a comunicación con básculas e etiquetadores, etc.
Disporán tamén dun novo sistema de xestión da actividade propia da lonxa e da confraría (comercialización, subministracións, presentación de servizos,...), que lles facilitará a tramitación da contabilidade, da facturación, do pago impostos coas distintas administracións e a xestión social da entidade (censo, información de interese, etc.).

Poxas en liña

Ademais, o novo sistema de comercialización posibilitará as poxas a través da Internet, que poderán realizarse directamente desde unha nova aplicación instalada no smartphone. Poderase tamén poxar en diferentes rulas ao mesmo tempo por parte de compradores presenciais e non presenciais, o que cambiará de maneira substancial os procedementos das lonxas tradicionais, permitindo obter maior valor engadido para os vendedores.
En paralelo, as actuacións que se porán en marcha teñen previsto a mellora ao longo do 2018 tanto da conectividade ás redes de comunicacións, ampliando as capacidades e mellorando a fiabilidade actual, como das infraestruturas e equipamentos tecnolóxico das rulas.

Modernización de centros neurálxicos

Co proceso de dixitalización mellorarase a xestión das lonxas en todo o que ten que ver coa a trazabilidade e a seguridade alimentaria e contribuirase a aumentar a eficiencia, a seguridade e a mellora das condicións de traballo. Estes son aspectos fundamentais, tendo en conta que as lonxas son na actualidade os centros neurálxicos para a comercialización en orixe dos produtos pesqueiros, acadando no ano 2016 os 500 millóns de euros de facturación pola venda de peixe e marisco.
Para levar a cabo estas actuacións a Consellería do Mar investirá máis de 3,8 millóns de euros distribuídos nas anualidades 2017, 2018 e 2019. Esta cantidade será cofinanciada nun 75% polo Fondo Europeo Marítimo e da Pesca (FEMP).

Categorías: Ciencia

O Concello de Lalín pescuda a presenza de adicións relacionadas coa Internet entre a mocidade local

Ven, 02/09/2018 - 23:10

O Concello de Lalín vén de presentar as conclusións dun completo estudo sobre hábitos de dependencia entre a mocidade local, facendo fincapé na sobre-presenza de Internet e dos aparellos ligados a Internet. Os datos obtidos, relevantes dende calquera punto de vista (e de gran interese non só para Lalín, senón para todo conxunto dos concellos da nosa terra), foron dados a coñecer onte polo concelleiro de Benestar Social, Nicolás González Casares, quen sinalou que o informe puxo o foco en rastrexar a presenza de condutas aditivas, en relación ás novas tecnoloxías e tamén a substancias estupefacientes.
Realizouse no marco o programa municipal de prevención das adiccións que se desenvolveu o ano pasado e que terá continuidade no actual en colaboración co Concello de Silleda. Entre as principais conclusións que achega, figura a constatación dunha importante porcentaxe de adolescentes consumindo Internet máis de catro horas ao día (o 25%). Ademais, o 42,3% considera que o uso da Rede algunha vez restou rendemento no ámbito académico e un 37% sufriu sensación de ansiedade cando tentou conectarse e non foi capaz.
Este estudo, do que xa foron presentados os resultados relativos ao consumo de drogas, busca, segundo Casares, “ser un espello da realidade lalinense no referente aos trastornos aditivos e servir como base para que as persoas que se encarguen de traballar sobre a prevención teñan un marco de referencia”.
O informe sobre Internet baséase nas enquisas que cubriron anonimamente alumnos e alumnas de 3º e 4º de ESO dos IES Laxeiro, Aller Ulloa e Sagrado Corazón, cun rango de idade comprendido entre os 13 e os 16 anos. Destes, o 52,6% foron mulleres e o 47,4% homes. Como dato introdutorio, segundo a análise do informe, o 58% recoñece as adicións como condutas repetitivas daniñas, pero só o 14,9% recoñece que presenta algunha na actualidade. Pola contra, o 60,5% asegura que alguén do seu círculo de familiares e de amigos padece algunha adicción.
Segundo fixo saber o edil, entre as condutas aditivas máis frecuentes na adolescencia figuran os comportamentos fóra de control relacionados coas novas tecnoloxías, a Internet, aos xogos e ás compras. Casares sinalou que o uso de Internet “pode ser problemático cando o número de horas de conexión afecta ao correcto desenvolvemento da vida cotiá, causando, por exemplo, estados de somnolencia, alteracións no estado de ánimo, redución das horas adicadas ao estudo, etc”.
Segundo se desprende do estudo, o 42,3% dos enquisados emprega Internet unha media de entre 2 e 4 horas diarias, mais o 25,1% afirma realizar un consumo medio da Rede maior de 4 horas ao día. O 90% úsano principalmente para o servizos de mensaxes instantáneas e redes sociais, afirmando o 100% que dispón dun dispositivo móbil de última xeración propio. A día de hoxe, o informe sinala que a rede social máis empregada polos adolescentes lalinenses é o Instagram.
Na investigación tamén se afirma que o 77% dos participantes realiza un uso de Internet persoal e o 20,9% recoñece ficar sempre conectado máis tempo do que tiña planificado. En relación aos usos, o 85% nunca deixou de facer plans cos amigos e familiares para usar Internet, pero o 36,7% refire enfadarse cando alguén o interrompe mentres usa o móbil ou outro dispositivo. Así mesmo, o 42,3% considera que o uso de internet algunha vez restou rendemento de xeito negativo no ámbito académico e un 37% sufriu sensación de ansiedade ou preocupación cando tentou conectarse e non foi quen.
No informe tamén que se fai saber que o 40% dos participantes fan un uso de xogos por Internet. O edil, se ben recoñeceu que o xogo en si “é unha actividade normal e positiva na vida de calquera adolescente, que lle permite un desenvolvemento físico, psicolóxico e social”, pode converterse nun problema cando se converte en recorrente e hai diñeiro en liña de por medio. “As condutas de risco ante o xogo”, sinalou, “xorden en primeiro lugar pola dependencia que esta actividade pode crear”, e neste senso o 37% dos participantes refiren molestarse se os interrompen mentres están xogando. Ademais, do 40% que participa en xogos online soamente un 9% dos estudantes enquisados refire ter realizado apostas nalgunha ocasión.
Compras
O 19% dos participantes utiliza o comercio electrónico no seu uso habitual de Internet. O 46,9% dos participantes sentiu algunha vez a necesidade de mercar algo que non precisase e un 7% sempre sinte a necesidade de ir de compras aínda que non precise nada.
Como conclusión, e aínda que os casos de risco son puntuais, o estudo sinala que “se debe prestar especial atención a este tipo de adicións de conduta, especialmente ás redes sociais e aos comportamentos abusivos relacionadas co uso de Internet”.
Nicolás González Casares fixo fincapé en que o estudo aporta datos reais da sociedade lalinense e que servirá como a base sobre a que pivotará o programa de prevención de condutas aditivas, que se iniciou o ano pasado con estudios e diversos obradoiros incluídos no programa Mocidade Activa e que terán continuidade este ano en colaboración co Concello de Silleda.

Categorías: Ciencia

YouTube promete máis medidas contra os vídeos tóxicos

Ven, 02/09/2018 - 19:30
Logan Paul está a converterse no exemplo das medidas de YouTube contra os vídeos que prexudican á comunidade de creadores por provocar a fuxida de anunciantes

O escándalo provocado por Logan Paul ao filmar un vídeo no célebre bosque dos suicidios no Xapón resístese a pasar ao esquecemento e, aínda que parecía que YouTube rematara este capítulo simplemente expulsando ao autor do programa Google Preferred, finalmente decidiron suspender temporalmente a publicidade nas súas canles atendendo ao seu patrón de comportamento recente, que consideran que prexudica tanto a anunciantes como á comunidade de creadores. Tras a polémica ao redor do suicidio, Paul mantivérase afastado de YouTube de xeito preventivo, pero co seu retorno volveu ás andadas, con moitos comportamentos que boa parte da audiencia consideraba ofensivo, de aí que YouTube tivese que adoptar unha medida exemplarizante.
Dende YouTube chegaron a publicar unha entrada no seu blog para creadores asegurando que o comportamento dalgúns youtubeiros prexudica a toda a comunidade, xa que os contidos pouco axeitados poden ofender ao público, afastar a anunciantes e, en definitiva, prexudicar a todo o ecosistema de YouTube, ou sexa, que o mal comportamento en liña ten consecuencias no mundo real, polo que prometen que tomarán medidas para que o comportamento duns poucos non afecten ao 99,9% restante que utilizan as canles en liña correctamente.
As novas pautas de comportamento de YouTube no que respecta á publicidade inclúen un sistema de infraccións que poderían chegar ao peche dunha canle.
A partires de agora advirten que cando vexan que unha canle sube vídeos que poden ser nocivos para a comunidade de creadores, os espectadores e os anunciantes tomarán varias medidas: eliminar a canle de Google Preferred e outros programas semellantes; suspender a posibilidade de monetizar unha canle mediante publicidade; e tamén facer que os seus vídeos non aparezan recomendados en YouTube (reducindo a súa visibilidade).
Dende YouTube admiten que no pasado as súas respostas ante as polémicas foron lentas e non sempre efectivas, polo que agora comprométense a operar mellor e manter unha comunicación máis clara.

Categorías: Ciencia

VLC estrea retransmisión de contidos a Chromecast

Ven, 02/09/2018 - 19:30

O célebre reprodutor multimedia VLC estrea versión 3.0.0, alcumada Vetinari, na que podería considerase como a meirande actualización desta aplicación que podemos lembrar, ao concentrar numerosas novidades, das que serían as máis relevantes o uso da descodificación por hardware de xeito predeterminado para poder conseguir reproducir vídeos 4K e 8K, soporte de contidos de 10 bits e HDR, soporte de vídeos en 360 graos con audio 3D, reprodución de menús Java de discos Blu-ray, soporte de unidades de rede e, como funcionalidade máis salientable de todas: poder transmitir a Chromecast incluso dende formatos non soportados nativamente (como películas en DVD).
No caso da aplicación de Android hai algunhas características específicas, como o soporte de Chromecast dende o teléfono, a posibilidade de descodificar por hardware o formato HEVC, soportar ordes por voz con Android Auto, contar con picture-in-picture, detectar ficheiros de listaxes de reprodución e estar dispoñible incluso en Android TV, Chromebooks e Samsung DeX.

Categorías: Ciencia

As nosas universidades conmemoran con xuntanzas virtuais e charlas de divulgación o Día das Mulleres e Nenas na Ciencia

Ven, 02/09/2018 - 17:23

O 11 de febreiro conmemórase un festexo mundial de especial significado, o Día Internacional das Mulleres e as Nenas na Ciencia, unha celebración relevante por dous grandes motivos: en parte porque implica defender o coñecemento igualitario e a equidade nas oportunidades, en parte porque leva implícito a arela de conseguir mellor ciencia, mellor tecnoloxía e, polo tanto, un mundo mellor para todas e todos (o coñecemento e a investigación precisan das mulleres para acadar as pólas máis altas da excelencia e a solidariedade). Entre as entidades galegas que están a pechar fileiras arredor deste evento están a Universidade de Santiago, que prepara (entre outras cousas) unha Editatona, e máis a Universidade da Coruña, que ten un amplo programa de relatorios de divulgación e e de reivindicación da muller desenvolvedora de ciencia e tecnoloxías.
A primeira das accións programadas pola USC busca recuperar as científicas pioneiras que se formaron nas aulas e laboratorios das facultades de ciencias experimentais dos campus composteláns e recoñece o seu empeño “por seguir a súa vocación científica”. Deste xeito, no marco dun acordo co Concello compostelán, durante este mes e o seguinte os institutos de educación secundaria da cidade acollerán a exposición Mulleres no laboratorio: as primeiras científicas da USC elaborada pola investigadora da USC Xoana Pintos Barral.
Tamén conmemorando o día marcado polas Nacións Unidas, o ciclo Reactiva a túa Química, que organiza regularmente a Facultade de Química, adica a esta temática a súa sesión do vindeiro mércores 14. Será a doutora en Historia das Ciencias e das Técnicas pola USC Xoana Pintos, autora do traballo As mulleres nos estudos experimentais na Universidade de Santiago: 1910-1960, a encargada de pronunciar a conferencia, que leva por título Non só Marie Curie. Será ás 13.00 horas na Aula Magna do centro.
Ademais, a Oficina de Igualdade de Xénero e a Biblioteca Universitaria da USC teñen previsto para o 20 de febreiro a Editatona Investigadoras na USC: as pioneiras. Esta actividade, coa que colaboran Galipedia e a Asociación de Mulleres Investigadoras e Tecnólogas de Galicia (AMIT-Gal), consiste nunha reunión virtual para editar e mellorar colectivamente os contidos dunha Wikipedia sobre un tema ou unha serie de artigos relacionados con el, neste caso as mulleres na ciencia, biografías de científicas e as súas achegas. A editatona celebrarase o 20 de febreiro de 2018 de 9 a 14 horas na Biblioteca Concepción Arenal.
Universidade da Coruña
Pola que respecta ás contribucións da Universidade da Coruña comezarán mañá, sábado, os actos de celebración do Día Internacional das Mulleres e as Nenas na Ciencia. Así, a Oficina para a Igualdade de Xénero e a Unidade de Divulgación Científica e Cultural organizan dous ciclos de microcharlas, un en Ferrol e outro na Coruña, coa finalidade de visualizar a vida e as achegas de mulleres destacadas na ciencia e na tecnoloxía, incluídas as achegas a prol do progreso das ferramentas dixitais e da información.
O 10 de febreiro, na Libraría Lea de Ferrol, de 12.00 a 13 horas, falarán Ana Tarrío Tobar e María José Souto Salorio (María Wonenburguer, matemática galega e universal ), Sara Fernández Basanta e Carla Freijomil Vázquez (co relatorio Florence Nightingale, a dama da lámpada) e María Carreiro Otero (coa conferencia Milagros Rey Hombre, unha arquitecta pioneira). O 12 de febreiro, a Domus da Coruña acollerá, a partir das 19.00 horas, a primeira edición das Xornadas de Neurocientíficas, organizada polo grupo de investigación Neurocom, e as facultades de Ciencias da Saúde e Fisioterapia da UDC. Participan Mónica Folgueira (Avances e retos da neuroanatomía no século XXI), Rosa Señarís (O teu cerebro, o teu metabolismo) e María del Mar Castellanos (Muller, cerebro, ciencia e o meu gran de area). Culminará a xornada cunha esa redonda, As mulleres na ciencia, moderada por Fernanda Tabarés e coa participación de Carme Adán.
O 16 de febreiro, no espazo Normal, de 19.00 a 21.00 horas, falarán Ana M. González Tizón (Nettie Stevens, seguindo o seu propio camiño), Érika García Cardesín (Mary Anning, as pegadas da vida), Laura Pita García (Bárbara Mcclintock e os xenes saltaricos), Carolina Núñez Puente (Charlotte Perkins Gilman, unha escritora feminista na época vitoriana) e Nieves Rodríguez Brisaboa (Informática, sociedade e mulleres).

Categorías: Ciencia

Páxinas