códigocero

Subscribirse a Orixe códigocero
Información sobre novas tecnoloxías en Galicia e en galego.
Actualizado: fai 15 min 24 seg

SIVSA celebra os seus trinta anos de andaina como referente TIC galego

Mar, 12/19/2017 - 09:56

A empresa galega SIVSA, centrada no desenvolvemento de servizos e ferramentas informáticas avanzadas (por exemplo as plataformas Fenix e Geenie), está a rematar 2017 celebrando as súas tres décadas de andaina. Con motivo da conmemoración destes trinta anos de actividade, a compañía con sede en Vigo vén de botar a vista atrás e de facer reconto “dos grandes fitos que nos permitiron converternos hoxe en referente dentro do sector TIC”.
Fitos relativamente recentes como por exemplo o lanzamento das plataformas Fenix (para facilitar o día a día de clínicas e centros médicos) e Geenie (para axilizar nos organismos públicos a compra de bens dentro do sistema de Contratación Centralizada do Ministerio de Facenda), ou o nomeamento de Antonio Vidal, responsábel de Ciencia de Datos na empresa SIVSA, como Mellor Científico de Datos de España.
Ou fitos máis afastados no tempo, como a propia posta en marcha de SIVSA (en 1987, co obxectivo de “dar resposta ás necesidades de sistemas de xestión do mercado) ou o desenvolvemento, na década dos 90, do sistema HOSIX para a xestión hospitalaria, un feito que marca o inicio da especialización da compañía no ámbito da saúde, unha liña que continúa até o de hoxe con presenza nunha manchea de países de ámbalas beiras do Atlántico.
SIVSA tamén lembra, no seu reconto, outros fitos importantes, como por exemplo o acontecido en 2007, cando “gañamos un importante concurso do SERGAS para a implantación dos nosos produtos de desenvolvemento na zona sur, ademais de comezar a traballar co grupo PSA”, ou os importantes procesos de ampliación de mercado experimentados en 2008 e 2009, cando a empresa conseguiu afianzarse en Marrocos e máis en Chile, e máis tarde a Perú.

Categorías: Ciencia

Os emprendedores de Ourense locen capacidade innovadora

Lun, 12/18/2017 - 23:07

O venres da semana pasada celebrouse en Ourense (La Molinera) a segunda edición do demoday da iniciativa de traballo colaborativo Go2work Ourense, un programa organizado pola Deputación e o Ministerio de Industria a través da EOI, coa colaboración do Concello, e co obxectivo de “pór en valor casos de éxito empresariais e promover o emprendemento de iniciativas locais”. Nesta edición presentáronse unha vintena de proxectos de diferentes sectores económicos en materia de comercio electrónico, novas tecnoloxías aplicadas a diversos sectores tradicionais (gastronomía, agro, ensino, moda), servizos turísticos e saúde, entre outros.
Manuel Baltar, presidente da Deputación, salientou “a importancia da innovación, da formación e da información no coworking”, felicitando aos emprendedores que impulsan iniciativas “para convertelas en realidades empresariais partindo dunha boa idea, principal elemento para iniciar un proxecto consistente e duradeiro”.
Ao longo da xornada, amais de presentar as iniciativas cada un dos emprendedores participantes, desenvolveuse unha clase maxistral a cargo de Jorge Vázquez, director executivo de Redegal, quen mostrou as claves do éxito desta empresa tecnolóxica local, centrada en servizos innovadores de desenvolvemento web e mercadotecnia en liña.
Segundo lembrou no acto o concelleiro de Promoción Económica de Ourense, Jorge Pumar, os participantes formaranse ao longo de cinco meses no edificio de La Molinera "froito do convenio de cooperación co Concello de Ourense, unha formación que repercutirá positivamente no sector produtivo da nosa provincia”.
Pola súa banda, Javier de Benito, director do Departamento de Aceleración empresarial da Escola de Organización Industrial (EOI), dixo que os emprendedores “son os principais protagonistas desta iniciativa” e agradeceu á Deputación de Ourense a colaboración a prol das políticas que melloren a empregabilidade e as oportunidades para a mocidade.

Categorías: Ciencia

Noruega cesa as emisións estatais de radio FM

Lun, 12/18/2017 - 22:00

Tal e como estaba previsto, o plan de dixitalización da radio en Noruega segue adiante, de xeito que convértese no primeiro país do mundo en proceder ao apagamento das súas emisións estatais de radio FM, levando así aos cidadáns a ter que optar polas emisións en dixital (DAB) pese a que a cobertura é moito peor e os receptores extraordinariamente caros (normalmente custan entre 100 e 200 euros).
Estímase que na actualidade só a metade dos vehículos están adaptados para a recepción de radio dixital en Noruega, polo que a transición dixital está a resultar bastante complicada para os cidadáns, como demostrou o feito de que tras cada apagamento analóxico rexional houbese unha caída da audiencia para recuperarse algo despois.
Pero o apagamento analóxico da radio FM non foi finalmente tan drástico como era de esperar, xa que finalmente a meirande parte das emisoras de radio local continuarán a operar en FM.
Espérase que nos vindeiros anos outros países como Reino Unido, Suíza ou Dinamarca tamén dean o paso de cesar as emisións da súa radio FM, aínda que haberá que ver se será algo absoluto ou só parcial. En calquera caso sorprende esta estratexia de cesamento de emisións analóxicas cando, en contraste, nos EE.UU. están a xurdir iniciativas para potenciar o uso da radio FM grazas á súa utilidade en caso de catástrofes, onde é o método con maior dispoñibilidade para informar á poboación.

Categorías: Ciencia

Pepephone volverá mudar de rede móbil

Lun, 12/18/2017 - 21:22

A primeiros de 2015 Pepephone mudou da rede móbil de Vodafone á de Movistar para poder ofrecer conectividade 4G aos seus clientes, e hoxe anuncian que nos vindeiros meses van abordar un novo cambio de cobertura, bastante profundo, que suporá a migración de todas as súas liñas á unha rede móbil de seu, o que permitiralles ofrecer mellores tarifas e gozar dalgunha mellora adicional.
O novo escenario será bastante curioso, xa que Pepephone empregará a rede 4G de Yoigo (compañía pertencente ao mesmo grupo que Pepephone) alí onde teña cobertura, completando esta rede coa de Orange como secundaria e coa de Movistar como terciaria, de xeito que garanten cobertura no 99% do territorio estatal.
Esta nova mudanza vai ser progresiva, comezando o progreso cunha comunicación por correo electrónico e SMS para confirmar o enderezo ao que terán que enviar a nova tarxeta SIM. Máis adiante enviarase á nova tarxeta e, confirmada a recepción recibirase unha data para o cambio de rede (sempre de madrugada, para evitar molestias), que será cando o usuario poderá substituír a súa SIM actual pola nova.
En calquera caso dende Pepephone aseguran que o procedemento de migración vai desenvolvese pouco a pouco, reducindo así a posibilidade de incidencias.

Categorías: Ciencia

A Fundación TIC xunta forzas co director galego Oliver Laxe

Lun, 12/18/2017 - 16:29

O director galego Oliver Laxe, unha das grandes talentos audiovisuais da nosa terra (creador da multipremiada Todos vós sodes capitáns e de Mimosas, distinguida en Cannes), está a dar forma á súa nova obra nunha contorna que lle colle de preto: Os Ancares. Trátase da rodaxe de Aquilo que arde, que inclúe localizacións en diversas zonas da provincia de Lugo e que hoxe fixo unha parada en Navia de Suarna para dar conta dalgúns detalles do proceso de filmación. Na parada, amais de Laxe, participou o presidente da Deputación de Lugo, Darío Campos, quen avanzou datos sobre a colaboración da entidade provincial (e da Fundación TIC) co novo traballo do director galego. Campos Conde explicou que esta colaboración favorecerá que Navia de Suarna sexa a principal localización de Aquilo que arde. Ademais, ao abeiro deste apoio da entidade provincial, Laxe rodará un vídeo de promoción sobre a Reserva dos Ancares Lucenses e ofrecerá un ciclo de conferencias e clases maxistrais aos estudantes da EIS (Escola de Imaxe e Son da Fundación TIC).
Na cita en Navia tamén participaron o alcalde deste municipio, José Fernández, e a produtora-executiva de Miramemira, Andrea Vázquez. Campos Conde salientou que “queremos formar parte desta produción cinematográfica porque é unha oportunidade para a economía, o emprego e a promoción turística, especialmente dos Ancares, pero tamén doutras localidades da nosa provincia, que non debemos desaproveitar”. Segundo fixo saber, o filme rodarase en galego e posuirá “un especial valor cultural e social”, constituíndo en si mesmo unha aposta “por fomentar o tecido industrial do noso sector audiovisual”.
A rodaxe está prevista entre os meses de febreiro e agosto en diferentes localizacións do territorio lugués, especialmente en Navia de Suarna, pero tamén en Monterroso, Monforte, Viveiro, Becerreá, Cervantes e Lugo. Segundo engadiu Campos Conde, o feito de que Oliver Laxe elixise Os Ancares para centrar boa parte da acción de Aquilo que arde é unha sorte e un privilexio para dar a coñecer esta contorna, e tamén terá un especial significado por ter o director unha estreita relación familiar e familiar coa montaña de Lugo, onde están precisamente as súas raíces.
En termos máis concretos, a colaboración da Deputación permitirá ao Concello de Navia asumir a metade dos 43.000 euros dos custos de aloxamento, manutención e transporte do equipo de rodaxe.
No marco da cita de hoxe, Campos Conde e a produtora executiva de Miramemira Andrea Vázquez asinaron o convenio de colaboración coa TIC para “favorecer a experiencia formativa dos alumnos e titulados da Escola de Imaxe a Son”. O máximo responsábel provincial avanzou o comezo (mañá) dun ciclo de conferencias e clases maxistrais sobre cine de autor, que continuará con charlas doutros profesionais de Aquilo que arde. “Os estudantes”, engadiu, “terán a oportunidade de estar en contacto directo coa industria audiovisual e con profesionais de prestixio que poden ser a súa mellor tarxeta de presentación de cara a súa inserción laboral”.
Campos Conde tamén informou do vídeo de promoción que rodará Oliver Laxe sobre a Biosfera dos Ancares Lucenses, “unha das nosas xoias naturais e etnográficas máis prezadas”. Ao fío disto, o presidente salientou que “o compromiso de Laxe para contribuír a revivificar os Ancares non remata aquí, pois entre os seus proxectos está o de xerar en Navia de Suarna unha escola de cinema e unha cooperativa de agricultura ecolóxica”.

Categorías: Ciencia

O CPEIG aposta por un 2018 de meirande progreso tecnolóxico, máis vocacións STEM e máis seguridade TIC

Lun, 12/18/2017 - 13:14

O ano 2017 está a ser un dos anos máis importantes para a actividade do Colexio Profesional de Enxeñaría en Informática (CPEIG). Por que motivo? Pois, entre outras cousas, porque se celebran os dez anos da súa importante andaina defendendo a profesión informática na nosa terra e impulsando os avances tecnolóxico-dixitais da sociedade, das empresas e das administracións. As accións conmemorativas xa comezaron hai tempo, este 2017, pero neste remate de ano están a coller un significado especial. Para falar de todas estas cousas xuntámonos con Fernando Suárez, presidente do CPEIG, e isto foi o que nos contou do pasado, do presente e, sobre todo, do futuro da entidade profesional.

-Nesta recta final de ano queríamos insistir un chisco máis na celebración dos vosos dez anos de vida. A nós ocórrensenos moitos motivos para facelo (lembrar esta celebración), e a vós, as/os representantes do colexio, seguro que unhas cantas máis. Fernando, cóntanos brevemente que significa para vós esta celebración deste ano, 2017, que está xa a piques de rematar.
-Como ben dis, non se cumpren dez anos todos os días. Para nós é motivo de ledicia e orgullo acadar esta cifra e criamos que cumpría un repaso á nosa traxectoria, pero non dun xeito “cpeigcéntrico”, senón analizando de forma paralela os avances tecnolóxicos a nivel mundial e galego e contrapoñéndoos cos principais fitos do CPEIG. Se Gardel dicía que “20 anos non é nada”, no noso sector 10 son unha barbaridade. Non hai máis que recordar que xusto no ano de creación do Colexio naceu o iPhone, que parece levar toda a vida entre nós.
Creo que o principal éxito do Colexio nestes anos é constituírse como un dos nexos do sector, colaborando con outros actores fundamentais como o Cluster TIC, Ineo, os centros tecnolóxicos e moitas das empresas tecnolóxicas que teñen presenza na nosa Comunidade. Nesta celebración, tivemos a enorme fortuna de contar con moitos destes “amigos”, que nos axudaron a facer este percorrido histórico polas TIC na nosa comunidade, podendo amosar a altísima calidade dos proxectos e dos profesionais que están a liderar os cambios que a informática incorpora á nosa sociedade en todos os seus ámbitos.

-Que vos agarda aos membros do CPEIG a longo dos vindeiros anos?
-Sobre todo, moito traballo. Creo que o Colexio ten corda para rato e que, se ben é moito o acadado ata o de agora, aínda queda moito traballo por levar a cabo. Por exemplo, continuamos a reivindicar sen descanso (somos teimudos, como di o anuncio) a regulación da nosa profesión para situala ao nivel do resto de enxeñarías, pero non só co fin da defensa da mesma e dos seus profesionais, senón principalmente, para garantir a seguridade e transmitir a confianza á sociedade nos medios electrónicos. Estes son cada vez máis empregados para as nosas relacións, xa sexan a nivel persoal, laboral ou coas administracións. É fundamental que todos sexamos capaces de empregalos con soltura e confianza, con independencia da nosa formación, idade, sexo ou situación social. Os próximos anos continuaremos traballando para que o progreso tecnolóxico sexa unha realidade e poidamos deixar de empregar o adxectivo “electrónica” en moitas das nosas transaccións, para que isto sexa o habitual.

-Tendes algunha actividade máis para o que resta de ano, divulgativa ou conmemorativa?
Estamos a rematar o Curso Superior de Administración Electrónica, en colaboración con AMTEGA e EGAP, con grande éxito de participación, xa que tivemos máis de 400 solicitudes para as 70 prazas ofertadas. Tamén lideramos en Galicia, un ano máis, a iniciativa Hora do Código (horadocodigo.gal) para levar charlas sobre programación ás escolas galegas. Temos moi avanzado un novo convenio coa AMTEGA, con foco na estimulación das vocacións STEM (Ciencia, Tecnoloxía, Enxeñaría e Matemáticas) e na busca de talento. E temos pendente pechar a colaboración coa Consellería de Cultura e Educación, para unha nova edición do programa Navega con Rumbo, que sempre digo que é a iniciativa máis satisfactoria de todas cantas levamos desenvolvidas.

-Estes días vimos de reflectir uns datos de Adecco nos que se dá conta, novamente, da importancia das enxeñarías en Informática dende o punto de vista de oportunidades laborais. Segundo se fai saber, as as enxeñarías TI lideran hoxe a demanda de emprego das empresas en España, por diante de todas as demais. Que opinión che merece isto? É un síntoma da profunda revolución tecnolóxica que estamos a vivir, e moitas veces sen decatarnos das súas implicacións?
-Xa ao principio da andaina do CPEIG elaboramos un estudo da situación laboral da nosa profesión, no que as cifras de empregabilidade eran extremadamente altas (preto do 95 %), nun momento en que a crise económica comezaba a despuntar. E mesmo a pesares desta, os índices de demanda de profesionais mantivéronse constantes. O problema a día de hoxe é que a demanda de profesionais está por riba da oferta, coas dificultades que iso implica para as empresas, que cada vez precisan máis empregados con coñecementos e competencias tecnolóxicos.
Obviamente, nos sentimos orgullosos e privilexiados de vivir este auténtico cambio de era promovido polo auxe tecnolóxico, do que a sociedade se empeza a decatar dun xeito positivo, por todos os beneficios que pon en xogo.

-Na pregunta anterior deixamos vía libre para reflexionar, tamén, nos porqués da escaseza de mulleres na profesión e, previamente, nos estudos universitarios relacionados coas novas tecnoloxías. Como é posíbel que, tendo en conta a importante demanda profesional de enxeñeiras/os en Informática que existe dende as empresas, unha demanda que seguirá a medrar no futuro (ao que cómpre engadir as moitas posibilidades laborais e creativas que achega esta profesión), non haxa máis mulleres apostando por este tipo de carreiras?
-Este é o grande cabalo de batalla que temos non só no Colexio, senón en todo o sector. Non é algo particular de Galicia ou España, senón que é un problema a nivel mundial, xa que con taxas inferiores ao 15 % de matrículas femininas en carreiras como a Enxeñaría en Informática, e o que é peor aínda, esta cifra vai en descenso, estamos a perder case a metade do talento da nosa sociedade. Posiblemente haxa varias causas que o xustifiquen, como a dificultade de transmitir en que consiste a profesión. Fáltanos unha serie ou película cunha personaxe protagonista que transmita atractivo por unha profesión na que podes desenvolver a túa actividade en ámbitos tan heteroxéneos como a educación, a sanidade, o deporte, o cuidado asistencial, a arquitectura, o xornalismo..., xa que en todos eles hai ferramentas informáticas. Existen unha serie de variables que inflúen nos alumnos á hora de elixir o seu itinerario formativo e que non dependen unicamente do propio alumno, senón que tamén se estenden á contorna próxima, ao eido educativo e ao ecosistema social. Alá polos anos 80, cando se popularizou o PC, os anuncios do mesmo estaban dirixidos a un público maioritariamente masculino. Aínda estamos a pagar as consecuencias diso, xa que moitos dos destinatarios daquela publicidade son hoxe pais, orientadores, educadores..., que teñen interiorizado un sesgo de xénero sobre a tecnoloxía.
Cómpre, por tanto, transmitir unha imaxe diferente do papel que deben xogar os profesionais do sector. Dende o CPEIG traballamos sen descanso para reverter esta situación colaborando en iniciativas como ICT Go Girls, Rapaciñ@s ou cos premios Ada Byron que concedemos anualmente co fin de xerar referentes femininos para as nosas rapazas.

Un intre do acto de celebración dos dez anos do CPEIG celebrado os días pasados en Compostela

-Seguiredes a traballar tamén na divulgación tecnolóxica entre a nosa rapazada? Por que credes que ten tanta importancia achegar o máximo posíbel as novas tecnoloxías ás novas xeracións, non só a nivel de uso, senón tamén de implicación directa (programación para crianzas, robótica, desenvolvemento de páxinas web, xogos, etc)?
-Hai unha frase de Mandela que me encanta: “O futuro dunha nación é tan prometedor como a próxima xeración de cidadáns”. Estamos ante cambios sen precedentes na historia da humanidade, como o cambio de modelo económico cara a unha economía baseada no coñecemento ou a introdución das TIC no tecido produtivo coa denominada “Industria 4.0”. Pero o que realmente resulta fundamental e non debemos esquecer en ningún momento é que son as persoas a chave no cambio que estamos a vivir, e non a tecnoloxía por si mesma. Temos a responsabilidade de preparar aos nosos rapaces para o mundo que herdarán de nós; un mundo no que a tecnoloxía estará (xa o está) presente en todos os ámbitos do noso día a día. Debemos ser conscientes, xa que logo, nunha economía do coñecemento, os recursos máis importantes son persoas talentosas que podemos educar e atraer ao noso país. A economía do coñecemento pode medrar máis, crear mellores empregos e ofrecer unha mellor calidade de vida para todos.
Nesta reforma da educa­ción debemos ter en conta cales serán as competencias máis demandadas nun futuro próximo. Entre elas, destacan as coñecidas “soft skills”, como resolución de problemas, pensamento crítico, creatividade, xestión de equipos, intelixencia emocional, xuízo e toma de decisións e flexibilidade cognitiva. E, tal vez por riba de todas estas, destacaría a formación ética e en valores.

-Como se atopa neste intre o proceso iniciado polo CPEIG e as restantes entidades análogas autonómicas e estatais para conseguir o debido e axeitado recoñecemento da profesión, a Enxeñaría en Informática, por parte da Administración central (unha falta de recoñecemento que implicaba a non equiparación da Enxeñaría en Informática con respecto ás restantes enxeñarías)?
-Esta é unha carreira de fondo, xa que non son cambios sinxelos. Como ben apuntas, é un proceso no que o CPEIG participa de forma directa a través do Consejo General de Colegios de Ingeniería en Informática, onde ostenta a vicepresidencia. O cambio pasa pola aprobación da Lei de Servizos e Colexios Profesionais, lei que leva pendente de aprobación e con distintos borradores de contidos, xa 4 lexislaturas. Nela se establecerá un novo modelo de prestación dos servizos profesionais, ademais de acometer unha profunda reforma do funcionamento dos Colexios. Para nós é unha oportunidade importante de acadar a tan ansiada regulación profesional, entendendo esta como unha garantía para a sociedade ante un comportamento neglixente. Estamos en continuas conversas co Goberno, a través dos distintos departamentos, para tentar transmitirlles a relevancia que ten a Enxeñaría en Informática en actividades nas que é fundamental asegurar a seguridade física e xurídica das persoas e que, en consecuencia, estas actividades sexan lideradas por persoas con competencias e coñecementos acordes a esa responsabilidade. Somos moderadamente optimistas de que conseguiremos o noso fin, aínda que os prazos, como apuntaba, son moito máis longos do que todos nos desexariamos.

Categorías: Ciencia

Polémica ao redor do Firefox por mor dun engadido instalado sen permiso

Lun, 12/18/2017 - 13:11
O engadido Looking Glass muda o xeito no que saen en pantalla certas palabras chave.

A pasada semana Mozilla e NBC Universal lanzaron unha extensión experimental para Firefox chamada Looking Glass 1.0.3, que facía que algunhas palabras chave relacionadas coa serie Mr. Robot (como fsociety, robot ou privacy) aparecesen coa súa orientación invertida (concretamente volteadas horizontalmente e xiradas 180 graos), que podería considerase como unha promoción bastante orixinal se non fose porque a extensión instalouse de xeito automático para os usuarios que teñen activadas as funcións experimentais (opción marcada de xeito predeterminado), o que causou un grande malestar entre a comunidade de usuarios, que veu como non se lle pedía consentimento para instalar unha extensión e, especialmente, por estarmos ante publicidade.
Cómpre destacar que moitos usuarios non seguen a serie de televisión, polo que ao ver palabras que saían mal na pantalla do seu navegador podían pensar que o seu equipo informático estaba comprometido, especialmente ao comprobar que en Firefox aparecía de un día para outro unha extensión sen a súa intervención.
A intromisión nos navegadores web dos usuarios por parte de Mozilla é para moitos un comportamento inaceptable, como tamén o é o feito de que Mozilla, en vez de pedir perdón, limitouse a explicar a situación e instar agora aos usuarios a instalar o engadido Looking Glass 1.0.4 (versión que recoñece claramente a relación coa serie de televisión Mr. Robot) de xeito manual se queren participar no experimento.
Esta polémica está a causar un tremendo dano á imaxe de Mozilla porque a fundación insiste en que entre os seus principios están o considerar que a seguridade e a protección da intimidade dos usuarios non é algo opcional, o que choca bastante co que veñen de facer.

Categorías: Ciencia

O CDTIC acolle a presentación dun par de programas de red.es para PEME

Lun, 12/18/2017 - 11:47

O Centro Demostrador TIC (CDTIC) da AMTEGA acolle mañá unha xornada de presentación dos programas Asesores Dixitais e Oficinas de Transformación Dixital que se desenvolverá nas súas instalacións de Santiago de Compostela entra as 16:30 e as 18:00 horas, tempo no que Pablo Osuna, da Dirección de Economía Dixital en Red.es, encargarase de presentar as características dos devanditos programas e respostar ás as dúbidas formuladas polas persoas asistentes.
Esta xornada está destinada, principalmente, a xestores de PEME, provedores e asociacións empresariais. Para participar nesta actividade cómpre inscribirse na web do CDTIC ou a través da súa aplicación móbil, dispoñible para plataformas Android e iOS. A asistencia é de balde.

Os programas de axudas para a Transformación Dixital das PEME

A entidade pública Red.es vén de publicar as bases dos programas de axudas de Asesores Dixitais e das Oficinas de Transformación Dixital. Cada un destes programas está dotado cun orzamento de 5 millóns de euros, destinados á dixitalización das pequenas e medianas empresas, e contan co cofinanciamento do Fondo Europeo de Desenvolvemento Rexional (FEDER), no marco do Programa Operativo de Crecemento Intelixente.
De Asesores Dixitais, cuxas bases poden consultarse na web de red.es, van beneficiarse un mínimo de 1000 PEME, xa que os 5 millóns de orzamento estarán distribuídos en axudas de ata 5000 euros por empresa. Red.es achegará entre un 50 e un 80 % do custo do servizo, mentres que o resto correrá a cargo do beneficiario.
Pola súa banda, as futuras Oficinas de Transformación Dixital permitirán a creación dun máximo de 50 unidades repartidas por toda España. Están dirixidas a asociacións e colexios profesionais, co obxectivo de fortalecer o ecosistema de soporte ás persoas emprendedoras no ámbito dixital e á PEME en materia TIC. O importe mínimo da axuda é, neste caso, de 100 000 euros por cada entidade beneficiaria e o máximo de 200.000. As entidades deberán achegar un mínimo do 20% do orzamento subvencionable.

Categorías: Ciencia

A Cámara de Santiago premia un proxecto de comida caseira online e unha axencia de deseño web

Lun, 12/18/2017 - 09:23

A Cámara de Comercio de Santiago de Compostela entregou o pasado venres os seus galardóns de emprendemento, uns recoñecementos dirixidos a promover novas propostas, visualizándoas, e fornecer apoios para a súa posta en marcha, desenvolvemento e consolidación. O IV Premio Camiño do Emprendemento 2017, que contou co patrocinio de ABANCA, saldouse distinguindo un proxecto de comida caseira e online, por unha banda, e máis unha axencia de deseño gráfico, web e audiovisual, pola outra. Trátase das novas propostas innovadoras El Comedor e máis 4BajoCero.
Asistiron ao acto de entrega de diplomas, que se celebrou na sala de xuntas da entidade compostelá, o presidente da Cámara, Jesús Asorey; o director de Negocio Institucional de ABANCA Galicia, Asturias e León, José Lino Comesaña; o director da Oficina de Relacións con Institucións de ABANCA, Álvaro Rodríguez Cabo; o secretario xeral da Cámara de Comercio de Santiago, Fernando Barros; e a responsable do viveiro de empresas de Costa Vella, Rosa Cardeso.
Segundo se fixo saber, o premio cubrirá o 50 por cento dos gastos da estancia no viveiro de empresas de Costa Vella durante un ano aos proxectos distinguidos. Os gañadores poderán solicitar as liñas de financiamento presentadas por ABANCA con condicións financeiras preferentes (a concesión do financiamento estará suxeita, en todo caso, á previa análise do risco por ABANCA).
Durante ese tempo, os emprendedores, ademais do servizo de aloxamento, infraestrutura e loxística, recibirán servizos de acompañamento, consultoría e asesoramento dos seus proxecto empresariais “coa finalidade de favorecer a súa arrincada, creación e consolidación e mellorar así as súas expectativas de implantación e supervivencia empresarial”.
El Comedor. Comida rápida, sana y barata é un proxecto ideado polo empresario Carlos Alberto Balboa Castelo. Actualmente, dirixe o restaurante La Fábrica no Milladoiro (Ames), no que ofrece aos clientes comida caseira e elaborada a través do sistema de autoservizo para consumir no establecemento. E partindo deste xerme inicial, apostou pola ampliación do negocio con novas fases complementarias: a creación dun mostrador de comida para levar (envasada ao baleiro con sistemas innovadores de embalaxe) tan só como punto de venda; unha máquina de autovending no exterior onde os clientes poidan mercar as 24 horas do día; e o reparto a domicilio con furgoneta da comida envasada ou o envío de pedidos online a través dun servizo de paquetería refrixerada para terceiros comercializadores.
Os mozos Pedro Maceira, Antonio Millán e Alfonso Maceira crearon recentemente a empresa 4 BajoCero, unha nova axencia de publicidade multidisciplinar que ten como obxecto cubrir todas as necesidades de comunicación das pequenas e medianas empresas, aportando ás compañías un servizo de imaxe, visibilidade, reputación e posicionamento na Rede e, máis polo miúdo, nos busdadores. Tendo como zona influencia a área metropolitana de Santiago, os tres profesinais realizan tarefas de deseño gráfico e web, fotografía audiovisual, comunicación e mercadotecnia.

Categorías: Ciencia

YouTube prepara unha aplicación de realidade virtual para PC

Ven, 12/15/2017 - 22:30

En YouTube hai numerosos contidos de vídeo en 360 graos, que para gozalos en cascos de realidade virtual de ordenador actualmente precisan de procesos incómodos como descargar as películas para poder gozalas de xeito envolvente a través dun reprodutor de vídeo de 360 graos, e para facilitar todo iso en sistemas informáticos vén de chegar a Steam a aplicación YouTube VR, polo momento como acceso anticipado, permitindo así que os usuarios de HTC Vive poda probar esta ferramenta durante o seu desenvolvemento.
YouTube VR transforma YouTube nun mundo tridimensional que explorar, resultando especialmente interesante o seu uso con vídeos envolventes (tanto de 360 como de 180 graos), e unha vez que o produto sexa debidamente probado, a súa versión definitiva non se limitará a HTC Vive, senón que tamén podería estar dispoñible no resto de solucións de realidade virtual para PC compatibles con Steam (entendéndose que botan a andar nunha única plataforma para facilitar a depuración da ferramenta).
Neste momento a aplicación aínda está nunha fase pouco madura, principalmente no que se refire aos erros que presenta, con numerosos usuarios que nin sequera poden usala porque péchase ao inicio.

Categorías: Ciencia

O comercio da Mariña promóvese nas redes sociais ao abeiro de Merca e Gaña polo Nadal

Ven, 12/15/2017 - 19:30

Viveiro acolleu hoxe a presentación da campaña Merca e Gaña polo Nadal, impulsada pola Deputación de Lugo e a Federación Galega de Comercio. Segundo se fixo saber, a dita campaña (dirixida a visualizar perante os cidadáns a importancia de apostar polos establecementos de proximidade) xa xunta 700 locais da comarca da Mariña. Na presentación participaron o deputado de Relacións Institucionais, Álvaro Santos Ramos, a alcaldesa de Viveiro, María Loureiro García, e o presidente da Federación Galega de Comercio, José María Seijas López. Na cita en Viveiro tamén se fixo fincapé nos importantes premios postos en xogo ao abeiro da iniciativa (premios para recoñecer a fidelidade da xente polo comercio de toda a vida) e nas diferentes facianas comunicativas da campaña, que se materializa a través de distintos soportes promocionais, incluídas as redes sociais e a páxina web www.nadalmercaegana.com.
Santos Ramos salientou que “decidimos poñer en marcha esta campaña debido á importancia do comercio na economía lucense”. Segundo fixo saber, na provincia hai uns 5.500 establecementos que xeran máis de 12.500 postos de traballo. Pola súa banda, a rexedora sinalou que a iniciativa “é unha forma máis de promover o pequeno comercio de Viveiro fronte ás compras nas grandes superficies durante unha das épocas máis importantes para o sector, como é o Nadal”. Segundo lembrou, en Viveiro preto do 50% do emprego xérase a través do comercio ou da hostalería”.
Merca e Gaña polo Nadal desenvolverase até o 6 de xaneiro. Durante estas datas, ademais de incentivar as compras no comercio local con contidos de promoción nas rúas dos 67 concellos ou en redes sociais co cancelo #nadalmercaegaña; as persoas que merquen en calquera dos establecementos da provincia poderán participar no sorteo de 20 cartóns agasallo de 300 euros e 20 tarxetas máis de 200 euros. Para isto, débese fotografar o tícket da compra e rexistralo en www.nadalmercaegana.com, ou solicitar o seu rexistro ao comerciante (o sorteo ante notario será o 12 de xaneiro). Para máis información, na presentación da campaña recomendouse facer seguimento da mesma a través de www.nadalmercaegana.com e nas redes sociais.

Categorías: Ciencia

Ineo amosa perante as PEME galego-portuguesas o potencial de mercado de Latinoamérica

Ven, 12/15/2017 - 16:36

A asociación Ineo, referencial alianza galega de empresas TIC, celebrou este venres na súa sede unha xornada de traballo sobre as oportunidades comerciais que ofrece Latinoamérica ás pequenas e medianas empresas galegas e portuguesas pertencentes á Eurorrexión Galicia Norte de Portugal. A cita, desenvolvida baixo o epígrafe Como vender en Colombia, Panamá e Perú, celebrouse no marco do proxecto europeo Ecicii Plus e contou coa participación de Armando Priegue, socio director de Axperia Venture; Piedad Rojas, consultora experta en mercados internacionais; Alexandre Gonzales, experto en América do Sur; e Aurora Villalba, profesional especializada no mercado panameño. Luis Rey, director de operacións de Ineo, foi o encargado de abrir a xornada.
Na súa intervención, Rey explicou aos asistentes os obxectivos do proxecto Estrutura Empresarial Conxunta para o Impulso e a Captación de Iniciativas de Internacionalización (Ecicii Plus), un programa que fomenta a internacionalización das PEME da Eurorrexión e que ofrece servizos de apoio especializado para o acceso conxunto a mercados exteriores. Segundo fixo saber, “en Ecicii Plus ofrecemos servizos de diagnóstico, asesoramento e información, que complementamos coa organización de xornadas como esta que nos axudan a obter información e as ferramentas precisas para competir con éxito tirando proveito das oportunidades de negocio que existen nos mercados internacionais”.
Segundo se fixo saber na cita de hoxe, o proxecto Ecicii Plus (que se prolongará até finais do 2019), conta coa participación de sete entidades de Galicia e do norte de Portugal: a Confederación de Empresarios de Pontevedra (CEP), o Instituto Galego de Promoción Ecnómica (IGAPE), a Confederación de Empresarios de Ourense (CEO); a Associação Empresarial de Portugal (AEP), a AssociaçãoIndustrial do Minho (AIMinho), a Associação Empresarial de Viana do Castelo (AEVC) e a Asociación de Empresas de Tecnoloxía de Galicia (Ineo).
A xeira de traballo estivo conducida por Armando Priegue, socio director de Axperia Ventures, e contou con distintos relatorios, unha mesa redonda e reunións entre os representantes das empresas asistentes e os distintos expertos especializados nas oportunidades en Colombia, Panamá e Perú.
Piedad Rojas, consultora experta en mercados internacionais, foi a encargada de expor as claves interculturais para unha negociación efectiva en Latinoamérica. Durante a súa intervención fixo especial fincapé no potencial de Colombia, pais que (dixo) é o terceiro provedor de tecnoloxía TIC (novas Tecnoloxías da Información e a Comunicación) en Latinoamérica e que en 2032 será a primeira potencia mundial en bioteconoloxía.
Pola súa banda, Alexandre Gonzales, experto en América do Sur, detallou as características e oportunidades do mercado latinoamericano, incidindo nas que ofrece Perú. Gonzales salientou a importancia dos acordos de libre comercio entre este país e Europa e deu conta de proxectos con meirande potencial investidor no país, como o que está a levar a cabo o Goberno peruano para trasladar a auga do Amazonas á zona desértica do país.
Para rematar, Aurora Villalba, experta en Panamá, enxalzou durante a súa participación a importancia que están a adquirir actualmente os investimentos en loxística, turismo, obras públicas, enerxía e novas tecnoloxías que se están a realizar neste país.

Categorías: Ciencia

A Deputación da Coruña financia a renovación informática do Centro de Formación de Narón

Ven, 12/15/2017 - 16:30
Valentín González Formoso, presidente da Deputación da Coruña

O Centro Municipal de Formación Irmáns Froilaz (Narón) contará con novos equipos informáticos financiados a través do Plan Único da Deputación da Coruña. O proxecto, que conta cun investimento de 39.012 euros por parte da institución provincial (fondos do Plan Único) incluirá unha renovación integral dos computadores (16 equipos de sobremesa e 10 portátiles) e dos seus programas e aplicacións, entre os que se atopa un sistema de xestión de imaxes, “co obxectivo de mellorar as formacións e actividades que se imparten no centro”, explican a Deputación e máis o Concello de Narón, que foi quen iniciou a solicitude de contar cunha achega dos ditos fondos para acometer os traballos de actualización.
Segundo engaden as entidades, estes equipamentos teñen máis de seis anos de antigüidade, polo que algunhas funcionalidades están obsoletas e non ofrecen as prestacións necesarias para desenvolver as actividades formativas.
Por certo que a través deste Plan Único da Deputación, que este ano achega preto de 2,2 millóns de euros ao Concello de Narón, tamén se financiará a renovación dalgúns dos espazos do Centro Municipal de Formación. Este inmóbel, situado no polígono da Gándara, será obxecto de reformas para reconverter o espazo de 715 metros cadrados actualmente ocupado por unha cuberta metálica, pensada para albergar actividades ao aire libre pero que está infrautilizada.

Categorías: Ciencia

As cousas que Ferrolterra pode extraer de Silicon Valley, ao detalle nunha xornada da AEF

Ven, 12/15/2017 - 13:30

A Asociación de Empresarios Ferrolterra quere despedir o ano “na compaña de socios, colaboradores e amigos”. Por esta razón, vén de convocar unha xornada de implicación e confraternización, Ferrotera participa. A cita será o martes 19 de decembro, a partir das sete da tarde, no Sercotel Odeón. Primeiro celebrarase a presentación da xornada, a cargo de José Ramón Franco, presidente da AEF e logo, a partir das 19.15, desenvolverase unha conferencia sobre as posibilidades das novas tecnoloxías para sermos máis competitivos, facéndose fincapé en dúas vertentes: nas oportunidades que se abren co desenvolvemento de novas ferramentas e servizos, e nas oportunidades que se abren empregándoas de apoio para a nosa actividade empresarial. Este relatorio correrá a cargo de Enrique de la Rica, profesor da Galicia Business School, referente internacional no eido da innovación.
A conferencia de Enrique de la Rica desenvolverase baixo o seguinte epígrafe: Cara a un modelo produtivo centrado na innovación. Que podemos trasladar de Silicon Valley á realidade de Ferrolterra? O relator achegará aos empresarios locais claves e ideas de boas prácticas orientadas a impulsar o desenvolvemento produtivo e económico da comarca de Ferrol.
Logo da devandita sesión, o presidente da AEF, presentará Ferrolterra participa, que iniciará o vindeiro martes a súa andaina e terá continuidade durante o vindeiro mes de xaneiro, cunha mesa de traballo sobre aspectos económico-empresariais e demográficos-sociais en Ferrol, Eume e Ortegal, e que dará continuidade ao Diagnóstico socioeconómico comparado de Ferrol e área de influencia presentado este ano.

Categorías: Ciencia

El Español convértese en accionista maioritario da galega Vandal.net

Ven, 12/15/2017 - 12:50
Pedro J. Ramírez (El Español) xunto a Pablo Grandío (Vandal) durante a sinatura do acordo

Unha das páxinas web de videoxogos de referencia a nivel estatal e incluso dentro da Internet en español é a galega Vandal.net, que escribe agora un novo capítulo da súa historia ao pechar un acordo empresarial con El Español, editora que convértese no seu accionista maioritario, co que pretenden que Vandal pase a ser un medio líder no sector dos videoxogos, o lecer e a cultura dixital e completar a oferta formativa de El Español, cubrindo nichos de mercado de grande atractivo para público e anunciantes. O acordo tamén suporá a posta en marcha de iniciativas comúns en ámbitos específicos da información en liña, como é o caso do xornalismo local.
Esta operación está la liña que vén seguindo El Español nos últimos meses a través de investimentos, adquisicións e alianzas para conseguir converterse nun referente mediático, senda na que avanzan con paso firme, sumando un volume de lectores en España sen precedentes para un medio con só 2 anos de vida.
No que respecta a Vandal.net, proxecto do coruñés Pablo Grandío, temos que lembrar que está a celebrar o seu 20 aniversario con moitas novidades, como espazos especializados en eSports ou en cultura popular, tomando tamén un rol máis activo nas redes sociais, como constata o feito de que superasen os 1,2 millóns de seareiros en Facebook.
Grandío asegura que «unirnos ao ambicioso proxecto de El Español é unha grande oportunidade para potenciar Vandal e converternos no meirande referente dos videoxogos no mundo de fala hispana, e tamén expandir a nosa marca de lecer e novos horizontes da xeración dixital. Nestes vinte anos vivimos a evolución dos videoxogos dende un pasatempo de nicho até un fenómeno de entretemento e competición global, e Vandal superou o desafío de medrar con eles. Co noso equipo talentoso e o pulo de El Español imos subir de nivel. Estamos desexando iniciar xuntos novos proxectos e desenvolver nosa ideas editoriais dende Galicia».

Categorías: Ciencia

Gradiant e o CHUS presentan unha app para medirnos a dificultade respiratoria dos nosos fillos

Ven, 12/15/2017 - 12:30

O Centro Tecnolóxico Gradiant e o Complexo do Hospital Clínico Universitario de Santiago (CHUS) presentaron onte unha ferramenta tecnolóxica con gran potencial para mellorar o día a día das familias onde hai crianzas con problemas respiratorios. Trátase da aplicación móbil ReSVinet, unha app para móbiles e tabletas que permite aos pais medir a dificultade para respirar dos seus fillos.
A escala da tecnoloxía, validada para cativos menores de dous anos (aínda que o sector da poboación obxectivo da ferramenta é todo paciente pediátrico que presente o devandito cadro de saúde), vén da man dos grupos GENVIP (Grupo de Xenética, vacinas, infeccións e pediatría) do Hospital Clínico de Santiago, REGALIP (Rede Galega de Investigación Pediátrica) e a rede europea ReSVinet, coordinados por Federico Martinón e Antonio Justicia.
A aplicación que dá soporte á escala, con versións para iOS e Android, foi desenvolvida polo Centro Tecnolóxico Gradiant, e contou co apoio da Axencia Galega de Innovación e do Ministerio de Economía e Competitividade no marco da Estratexia Española da Innovación en Galicia.
Segundo nos conta Gradiant, a escala foi validada cientificamente por profesionais do servizo de pediatría da Xerencia de Santiago e permite aos pais, como dixemos, avaliar o estado clínico dos seus fillos menores de dous anos ingresados por dificultade respiratoria aguda, basicamente bronquite aguda. A aplicación móbil está dispoñíbel dende outubro deste ano, e posibilita a aplicación da dita escala tanto para profesionais sanitarios como para o ámbito familiar. Faino de dúas maneiras: unha rápida para persoas xa familiarizadas coa mesma ou dirixida a través de preguntas. Ademais o programa permite o almacenamento dos resultados con anotacións e comentarios para a súa posterior consulta, así como asociar diversos parámetros biomédicos.

Categorías: Ciencia

Facebook incluirá anuncios de 6 segundos antes dos vídeos

Ven, 12/15/2017 - 12:28
Facebook abrirá o contido patrocinado a todas as súas páxinas

O vídeo ten cada vez máis peso en Facebook, en boa medida polo seu potencial publicitario, o que leva á compañía a adoptar novas medidas para potenciar o aproveitamento económico destes formatos por parte dos creadores de contidos, o que vai ter consecuencias moi directas no funcionamento de Facebook. Por unha banda temos que Facebook vai incrementar a distribución de vídeos, amosando cada vez máis contidos deste tipo (especialmente das páxinas das que o usuario vise máis vídeos anteriormente), van reforzar a presenza das pausas publicitarias nos vídeos de longa duración (tanto en diferido como en directo) e, como medida máis polémica, van incluír de xeito xeral a partires do ano que vén os pre-roll, ou sexa, os anuncios antes do inicio dos vídeos, na liña de como tamén fai YouTube. Os anuncios en pre-roll terán inicialmente unha duración de 6 segundos, o que servirá para analizar a aceptación que ten este formato publicitario en Facebook.
Aparte das pausas publicitarias e os ­pre-roll tamén potenciará a creación de contido patrocinado, que era unha opción para un reducido número de editores e creadores, e que vai abrirse en breve a todas as páxinas de Facebook.

Categorías: Ciencia

A FCC rexeita a neutralidade de rede nos EE.UU.

Ven, 12/15/2017 - 12:06

Onte foi un día negro para a Internet nos EE.UU., xa que a Comisión Federal de Comunicacións (FCC) aprobou a erradicación das normas aprobadas hai un par de anos para defender a neutralidade de rede na Internet, ou sexa, que o Goberno dos EE.UU. eliminou a prohibición de que os provedores de acceso á Internet puidesen tratar os diferentes tipos de tráfico da Rede de xeito desigual, deixando a porta aberta a que as compañías que comercializan as conexións dos cidadáns á Internet poidan bloquear ou reducir a velocidade de certos tipos de tráfico e mesmo ofrecer vías rápidas de pagamento, o que atentaría contra os principios nos que se sustenta a Rede.
Esta serie de medidas da FCC está a ser criticada unanimemente a nivel mundial, e conta cun grande rexeitamento social, pese a que as autoridades estadounidenses aseguren cinicamente que restauraron a liberdade na Internet, cando o que realmente fan é deixar o sector en mans das empresas, o que pode traducirse en abusos, especialmente no escenario actual na que existen ligazóns evidentes entre empresas de telecomunicacións e creadores de contidos, de xeito que uns servizos poderían operar mellor que outros en función do operador de telecomunicacións que se empregue, creando situacións anti-competitivas que poden ter un importante impacto para servizos actuais e supor un serio freo para a creacións de novos servizos no futuro por parte de axentes que non estean baixo o paraugas dun dos grandes operadores.
Cómpre salientar que a FCC promove normas para manter unha Internet aberta dende hai máis dunha década, de xeito que este cambio de rumbo só atende a unha clara imposición da administración Trump e as súas políticas liberais, que en defensa das grandes empresas pode rematar deteriorando gravemente os dereitos dos cidadáns.
Aínda que a normativa estadounidense non ten impacto directo sobre os cidadáns europeos, o feito de que as principais compañías da Internet estean en territorio norteamericano deixa fai que as medidas contra a neutralidade de rede nos EE.UU. poidan ter repercusións globais, aínda que é moi cedo para sacar conclusións.

Categorías: Ciencia

O Obradoiro CAB aposta pola tecnoloxía ADESTRapp de Balidea

Ven, 12/15/2017 - 11:23

A tecnoloxía ADESTRapp, achegada pola firma compostelá Balidea, espállase a ritmo de vertixe. Logo da súa sonora presentación facendo fincapé nas súas vantaxes e finalidades (trátase dun produto para captación, transmisión e análise de vídeo aplicado a contornas de competición, adestramento e arbitraxe), da estrea da páxina web de seu ou de grandes fitos como a súa incorporación aos clubs Deportivo da Coruña e Atlético de Madrid, vén de dar un importante paso (por proximidade, por significado especial) coa súa integración no club de baloncesto Obradoiro. Segundo nos conta Balidea, a entidade deportiva compostelá apostou por esta tecnoloxía para tirar partido das súas posibilidades tácticas e técnicas. Para a tempada en curso xa conta con dúas cámaras “ADESTRapp”, unha para o primeiro equipo e outra para a canteira.
O asistente do Monbus Obradoiro, Dan Petts, valorou positivamente esta ferramenta, “moi interesante para analizar detalles moi concretos durante os partidos ou adestramentos”. Tamén salientou unha das grandes características da tecnoloxía de Balidea: o seu carácter de servizo inmediato. “A través dunha tableta e cun emprazamento privilexiado da cámara, con moita visibilidade, podemos extraer o que necesitemos ao momento”, explicou Dan Petts.
Como lembraremos, o sistema de ADESTRapp grava como adestran ou como compiten os deportistas e permite aos responsábeis dunha equipa analizar as imaxes para a toma de decisións en tempo real. Para Petts a utilidade está máis que demostrada no que se refire ao devandito, especialmente á hora de facer cousas como axudar ao xogador ou ao adestrador a realizar calquera axuste durante o partido. “Nos adestramentos utilizámolo para observar detalles técnicos, por exemplo, como fai un xogador un xesto, para poder corrixilo ao momento mostrándollo”, explica Petts.

Categorías: Ciencia

A Deputación de Lugo colabora na dixitalización do patrimonio oral do Museo do Pobo Galego

Ven, 12/15/2017 - 10:34

A Deputación de Lugo vai colaborar co Museo do Pobo Galego para dixitalizar os fondos culturais do seu Arquivo de Patrimonio Oral da Identidade. Así o fixeron saber onte a deputada de Promoción Económica e Social, Sonsoles Vázquez, a coordinadora do proxecto, Concha Losada, e o musicólogo Sergio de la Ossa. Xuntos deron a coñecer o devandito Arquivo (na sede da Deputación) e máis os seus principais obxectivos: achegar un acubillo integral e accesíbel de música tradicional galega, incluíndo gravacións de actuacións, festas, celebracións populares e outros documentos audiovisuais de gran interese cultural e etnográfico. A idea do Museo é que, ademais de ser unha gran base de datos con vontade preservadora, sexa didáctica, divulgadora e ilustradora dunha identidade concreta: a nosa.
Segundo se informou no acto, Sergio de la Ossa está a ser o encargado de realizar o proceso de dixitalización e catalogación de todo este material para que poida ser empregado e consultado en www.apoi-mpg.org. Tamén se sinalou que os arquivos da base de datos do APOI son cedidos polos autores que asinan os seus traballos, sendo publicamente recoñecidos e respectando o seus dereitos.
López Izquierdo salientou que a colaboración da entidade provincial co Museo inclúe unha contía de 16.000 euros e responde a un compromiso compartido a prol “do estudo e posta en valor dos recursos senlleiros do noso pobo”. Dentro desta liña, recordou que o Goberno da Deputación colabora a día de hoxe con ducias de asociacións culturais como a Fundación Uxio Novoneyra; Manuel María; Otero Pedrayo; Carlos Casares ou coa propia Real Academia Galega, “coa que vimos de asinar un convenio de 9.000 euros para a promoción do Galego”.
Catro décadas de andaina
O Museo do Pobo Galego foi creado en 1976, hai 40 anos, cos obxectivos de investigar, conservar, divulgar, defender e promover a cultura galega en todos os seus ámbitos; e concretamente crear e desenvolver un museo ao servizo destes obxectivos. As primeiras salas inauguráronse en 1977, no antigo convento de San Domingos de Bonaval, cedido polo Concello de Santiago de Compostela.

Categorías: Ciencia

Páxinas