códigocero

Subscribirse a Orixe códigocero
Información sobre novas tecnoloxías en Galicia e en galego.
Actualizado: fai 6 horas 44 min

Apple acompaña a estrea do iMac Pro coa renovación do Final Cut Pro X

Xov, 12/14/2017 - 22:00

Chegou o día, e por fin está dispoñible para a súa compra o iMac Pro, o ordenador de sobremesa máis potente feito nunca por Apple, e un dos máis potentes que podemos atopar no mercado, estreando unha nova gama de dispositivos e que parte dun procesador Intel Xeon W de 8 núcleos a 3,2 GHz, 32 GB de RAM, 1 TB de SSD, gráfica Radeon Pro Vega 56 con 8 GB de memoria HBM2, Ethernet a 10 Gbps, 4 portos Thunderbolt 3 e pantalla 5K de 27 polgadas a un prezo de 5.499 euros.
Os usuarios máis esixentes poden seguir sumándolle elementos, de xeito que configuren un equipo cun procesador Intel Xeon W de 18 núcleos a 2,3 GHz, 128 GB de memoria RAM, 4 TB de SSD, gráfica Radeon Pro Vega 64 con 16 GB de memoria HBM2 e algún que outro complemento máis que fai que o equipo chegue a superar os 16 mil euros, deixando clarísimo que non estamos ante un equipo para o fogar ou para gamers, senón para un uso profesional, de xeito que pode realizar renderizacións tridimensionais a grande velocidade, correr máquinas virtuais e compilar código con grande fluidez, manexar grandes conxuntos de datos, mover fotografías e vídeos de elevada resolución e incluso contribuír á creación de contidos para a realidade virtual. Todo isto nun fermoso corpo de cor gris espacial que permitirá distinguir claramente o iMac Pro dos iMac ordinarios.

Novo Final Cut Pro X

Precisamente este lanzamento vén acompañado coa actualización do Final Cut Pro X, a ferramenta de edición de vídeo profesional de Apple que agora incorpora tanto soporte de HDR como a posibilidade de editar vídeos en 360 graos, de xeito que pode tirar proveito da elevada potencial do iMac Pro, equipo co que incluso podería editarse vídeo 8K.
De cara á realidade virtual, o novo Final Cut Pro X incluso pode empregarse en combinación cun casco de realidade virtual HTC Vive, para así ver os proxectos en tempo realmente. Os contidos de 360 graos creados con esta aplicación poderán compartirse directamente a través de plataformas como YouTube, Facebook e Vimeo.
Outras prestacións adicionais de Final Cut Pro 10.4 son a posibilidade de importar proxectos de iMovie de iOS en Final Cut Pro X para unha edición máis avanzada, incorpórase compatibilidade con HEVC e HEIF para traballar con arquivos con codificadores de alta eficiencia, conta con novos engadidos de efectos de audio de Logic Pro X e aproveita Metal para unha análise de fluxo óptico máis rápido e de máis calidade.

Categorías: Ciencia

Philippe Colombet mostrará na Coruña o traballo de Google a prol do xornalismo de calidade

Xov, 12/14/2017 - 20:33

Philippe Colombet, director de Relacións Estratéxicas, Noticias e Editores de Google (para Europa e Medio Oriente de África), estará os días 18 e 20 de decembro no Máster en Produción Xornalística e Audiovisual (MPXA), para ofrecer unha clase maxistral sobre a actividade desenvolvida polo xigante de Internet con editores de toda Europa. O obxectivo desta actividade non é outro que ofrecer, xuntando forzas, un xornalismo serio, contrastado e de produción propia. Como lembraremos, o dito máster é un título propio da Universidade da Coruña organizado pola Fundación Santiago Rey Fernández-Latorre e a Fundación Amancio Ortega. Colombet, amais de falar das oportunidades que brindan as redes para facer avanzar a comunicación, valorará os proxectos do alumnado da especialidade de Xornalismo Avanzado Multiplataforma.
Máis en concreto, o labor de Colombet ao abeiro do MPXA terá varias vertentes. Na sesión do luns, Colombet impartirá a devandita clase maxistral, debullando os obxectivos de proxectos periodísticos de Google como DNI (Iniciativa para Noticias Dixitais), que achega un total de 150 millóns de euros para proxectos de innovación no sector do xornalismo en Europa, e que dá apoio a proxectos como RADAR, unha plataforma que desenvolverán La Voz de Galicia, Henneo e outros 22 xornais de España.
O mércores 20, os alumnos da especialidade en Xornalismo Avanzado Multiplataforma expoñerán ante o executivo de Google os proxectos nos que traballarán durante este curso, asesorados por un equipo de titores. Propostas como por exemplo unha idea de branded content xornalístico ou unha iniciativa para reportaxes de investigación long-form.
Para quen non o saiba, Philippe Colombet é o responsábel da iniciativa DNI en España, Francia e Italia. Foi un dos deseñadores do DNI Innovation Fund (lanzado no ano 2015), e, anteriormente, dirixiu o departamento de Medida de Audiencia e Anuncios do xigante da Internet.

Categorías: Ciencia

O CPETIG colabora na celebración coruñesa da Hora do Código

Xov, 12/14/2017 - 20:32

É hora de pechar fileiras arredor da importancia de educarnos en programación dende as idades máis temperás. Nisto consiste, basicamente, a celebración internacional A Hora do Código que se celebra na primeira quincena de decembro en máis de 180 países co obxectivo de achegar aos nenos e aos adolescentes á creación de ferramentas e recursos informáticos. E todo da maneira máis natural e divertida posíbel. Entre as entidades da nosa terra que se fan eco da celebración, poñendo todo da súa parte para darlle voz e presenza, atópase o Colexio Profesional de Enxeñaría Técnica en Informática de Galicia, CPETIG, que vén de informarnos da súa colaboración coa FIC da UDC para as actividades do sábado 16 preparadas ao abeiro da Hora do Código.
Na cita, organizaranse diversas actividades para acurtar a distancia entre os escolares (nenas e nenos de entre 8 e 14 anos) e o miolo dixital. A Hora do Código UDC 2017 terá lugar na Facultade de Informática, no Campus de Elviña. Segundo informa o CPETIG, aquelas persoas que non poidan asistir pero estean interesadas en tirar proveito da celebración, poden participar desde a súas casas conectándose a www.code.org e probando algún dos titoriais dispoñíbeis: Minecraft, Star Wars, Frozen, Flappy, etc. O prazo para formalizar as inscricións remata o sábado día 16 ás 12.00 horas. Para máis información cómpre visitar a web específica habilitada, https://hourofcode.fic.udc.es.
Segundo engadiu hoxe a Universidade da Coruña, A Hora do Código UDC 2017 ten o mesmo obxectivo didáctico có evento global: ensinar aos nenos e ás nenas conceptos fundamentais de programación mediante ferramentas gráficas baseadas en bloques que poden realizar unha acción concreta, como por exemplo mover un personaxe nunha escena ou facer o deseño dun obxecto. “Ademais”, explica a UDC, “o evento coruñés ten un segundo obxectivo, xa que pretende ser un punto de reunión para todos aqueles nenos e nenas da provincia que estean interesados na programación ou simplemente queiran coñecer este mundo”.

Categorías: Ciencia

Os camiños do éxito tecnolóxico, polo miúdo hoxe na Coruña

Xov, 12/14/2017 - 15:56

Hoxe, a partir das 18.00 horas, o Centro de Empresas ACCEDE Papagaio vai acoller unha xornada dirixida a mostrar os recursos que configuran unha posíbel aposta segura en materia de iniciativas tecnolóxicas e innovadoras, tanto dende o punto de vista dos negocios como no que atinxe á cultura ou ao activismo contra a brecha dixital de xénero. A xornada Experiencias dixitais que triunfan terá unha duración de tres horas e irá encamiñada, principalmente, a persoas, empresas e colectivos interesados en como tirar o máximo proveito das novas tecnoloxías para termos a máxima repercusión empresarial ou social.
A xornada, na que participan empresarias do sector dixital e tecnolóxico amosando casos de éxito (un total de tres), vén da man da Concello da Coruña e insírese no convenio asinado entre a Administración local e a Deputación provincial. A maiores, a cita incluirá unha mesa redonda centrada na fenda dixital existente entre boa parte da poboación feminina actual e o ámbito das novas tecnoloxías.

Categorías: Ciencia

A Deputación da Coruña convoca a segunda edición dos seus premios ás mellores iniciativas empresariais

Xov, 12/14/2017 - 15:30

A Deputación da Coruña quere alentar a innovación empresarial e o espírito creativo aplicado ao tecido produtivo: todas aquelas cousas (tecnoloxías, servizos, propostas, solucións, materiais) que teñen a capacidade de marcar un antes e un despois no mercado e na nosa contorna. Por este motivo, vén de convocar a segunda edición do seu Premio Provincial á Mellor Iniciativa Empresarial, que abrangue tres galardóns por un importe total de 75.000 euros. A convocatoria, cuxas bases pódense consultar na páxina web emprego.dacoruna.gal/premio, ten o prazo aberto até o 31 de xaneiro. Ao igual que o ano pasado, o premio contará coas categorías de Mellor Iniciativa Empresarial Nova (dirixida a proxectos emprendedores con menos de 12 meses de antigüidade), e Mellor Iniciativa Empresarial Consolidada (para empresas con máis de cinco anos de actividade).
En ambas categorías os criterios a valorar serán a orixinalidade do negocio, a formación do seu promotor, o seu grao de innovación, a participación en redes de networking ou a implantación de medidas de Responsabilidade Social Corporativa, RSC, entre outros parámetros. Entre as grandes novidades desta edición inclúese unha terceira categoría que engadir ás devanditas, unha modalidade dirixida a recoñecer propostas socialmente responsábeis que “contribúan ao medre sustentábel da provincia nos ámbitos económico, medioambiental e social”. Valorase, ao abeiro desta categoría, a idea de negocio e as medidas implantadas en ámbitos coma o desenvolvemento sustentábel, a conciliación laboral, familiar e persoal ou a promoción da igualdade de xénero, entre outros. En cada unha destas categorías, o premio será de 25.000 euros.
A Deputación da Coruña, facendo reconto, lembrou que o ano pasado o galardón contou cunha elevada participación: máis de 70 candidaturas presentadas, unha cifra de achegas que converteron o certame “nun dos premios de referencia para as empresas coruñesas”. As empresa pontesa EVASA e a firma compostelá eMonte (que dá nome a unha plataforma dixital -emonte.es-que facilita a compravenda de madeira na nosa terra) foron as gañadoras da pasada edición, das que o xurado salientou a súa aposta pola innovación.

Categorías: Ciencia

A AEPD condena a creación dun grupo de WhatsApp por parte dun concello

Xov, 12/14/2017 - 13:41

A Axencia Española de Protección de Datos (AEPD) vén de publicar unha resolución na que resolve que o Concello de Boecillo (Valladolid) infrinxiu os artigos 4.2 e 10 da Lei Orgánica de Protección de Datos, tipificadas como infracción grave nos artigos 44.3.c) e 44.3.d) respectivamente pola creación dun grupo de WhatsApp no que incluíron a veciños sen o seu consentimento, o que supón unha dobre infracción por empregar o número de teléfono (dato persoal) dos afectados recollido anteriormente para outras finalidades e compartir indebidamente tal información (xa que todos os membros dun grupo de WhatsApp poden acceder ao número telefónico do resto de integrantes).
Por desgraza este tipo de prácticas por administracións públicas só teñen como consecuencia un apercibimento, cando no caso de particulares ou empresas as sancións poderían chegar aos 600.000 euros. Temos que extraer desta resolución a gravidade que supón a vulneración da LOPD que pode supor a creación de grupos de WhatsApp de xeito indiscriminado, xa que nesa operación estamos a divulgar información de ámbito privado que non sempre quere compartirse, polo que debemos ser máis prudentes, tanto por respecto aos demais como para evitar as elevadas sancións ás que poderiamos ter que enfrontarnos.

Categorías: Ciencia

O Concello de Vigo activa a web para solicitar o cartón electrónico cidadán

Xov, 12/14/2017 - 13:20

O Concello de Vigo está a impulsar as máis avanzadas tecnoloxías para acurtar a distancia entre os servizos públicos municipais e a cidadanía. Nesta liña, puxo en marcha a tarxeta PassVigo, un cartón moedeiro que permite o acceso a todos os servizos que ofrece a Administración local, mesmo o transporte público da cidade e contorna. Pois ben, segundo informe o Concello esta semana, a web que permite solicitar a tarxeta xa está operativa. O Goberno de Abel Caballero quere chegar ás 100.000 cartóns enviados antes do 19 de xaneiro. A páxina está dispoñíbel en passvigo.vigo.org.
Estes e outros datos foron achegados polo propio rexedor, os días pasados, coincidindo coa aprobación das instrucións para a solicitude, expedición e uso da tarxeta. Segundo o alcalde, “trátase dun medio de pago que, usando as máis modernas tecnoloxías, permitirá acceso a todos os servizos vinculados coa administración local”. Tamén engadiu que nun primeiro termo, o cartón vai funcionar co transporte urbano pero, progresivamente, estenderase ao resto dos servizos municipais e incluso a outros como poderían ser os taxis, interesados en formar parte desta iniciativa. Caballero salientou igualmente o factor comodidade de PassVigo, “xa que unificará nun mesmo sistema de tarxeta moedeiro varios documentos como o carné da biblioteca, o carné das instalacións deportivas, entre outros”.
A expedición da primeira alta da tarxeta, así como a renovación ou cambio de perfil asociado, serán gratuítos, segundo explicou o rexedor. A solicitude poderá realizarse fisicamente ou telematicamente e o prazo de entrega será dun máximo de dez días.

Categorías: Ciencia

Oitenta emprededores participaron nos StartupDay de ViaGalicia

Xov, 12/14/2017 - 12:40
Os participantes na cita de Lugo, na sede da Fundación CEL

Arredor de oitenta emprendedores participaron esta semana, en Lugo e Vigo, na celebración dos Startup Day da aceleradora de proxectos innovadores ViaGalicia, unha iniciativa impulsada polo Consorcio da Zona Franca e a Axencia Galega de Innovación e que conta con dúas sedes de seu, unha en Vigo e outra na cidade da Muralla (na sede da Fundación CEL), dende onde se ofrecen variados recursos tecnolóxicos, loxísticos e humanos para o aceleramento de todo tipo de proxectos novos. Na cita de Lugo, na que participaron Teresa Pedrosa (delegada do Consorcio) e Patricia Argerey (directora de GAIN), déronse a coñecer hoxe os trinta proxectos seleccionados para a sede local, que puideron demostrar as súas habilidades e competencias ante o equipo avaliador (con vistas a obteren un pase para a fase de Academia). Trátase da quinta convocatoria de ViaGalicia, para a que se presentaron 200 proxectos. O pasado martes celebrouse esta mesma sesión cos proxectos seleccionados para a sede de Vigo.
A selección das iniciativas empresariais que pasarán á fase de Academia (até un máximo de 40 proxectos, 20 iniciativas por cada sede, Lugo e Vigo) daranse a coñecer a semana vindeira. Neste seguinte chanzo formativo de ViaGalicia, os emprendedores coñecerán as ferramentas necesarias para definir o seu modelo de negocio e mellorar as súas propostas de valor.
Cun orzamento de 2,65 millóns de euros para a súa quinta convocatoria, ViaGalicia apoia con este programa de aceleración a proxectos de negocio a través de formación, asesoramento, traballo en colaboración (co-working) e financiamento. Poderán obter ata 125.000 euros en axudas directas e de capital risco.

Categorías: Ciencia

A ESEI e o CPEIG desvelan o seu completo programa de obradoiros para festexar a Hora do Código

Xov, 12/14/2017 - 11:55

Pór de relevo as vantaxes de contarmos con formación para programar, aínda que básica, é un dos grandes obxectivos da Hora do Código, iniciativa internacional (con edición galega) posta en marcha pola entidade Code.org, organismo público sen fins de lucro adicado a ampliar a participación en Informática. Con respecto á nosa terra, a Hora do Código ten este 16 de decembro varios eixes de actividade fundamentais. Un deles é a FIC da Universidade da Coruña, de cuxo programa de accións xa dimos conta os días pasados. O outro é o Campus de Ourense (Universidade de Vigo), máis polo miúdo a Escola Superior de Enxeñaría Informática, que vén de presentar ao detalle o seu roteiro para o 16 de decembro. Tras este roteiro, dando o seu máximo apoio, está tamén o Colexio Profesional de Enxeñaría en Informática de Galicia (CPEIG).
Como lembraremos, a Hora de Código é un evento internacional que ten como obxectivo o de ensinar programación e as bases da Informática ás nenas e nenos partindo de titoriais básicos dunha hora de duración. A iniciativa busca estender os coñecementos de ciencias da computación aos máis pequenos e pequenas para que coñezan os conceptos e o mundo no que viven, “unha realidade na que a tecnoloxía está cada día máis presente en todas as facianas, desde o lecer á educación”, explicou hai uns días o CPEIG.
A Hora do Código está promovida desde o ano 2013 pola entidade sen ánimo de lucro estadounidense Code.org. A nivel internacional a iniciativa está apoiada polas grandes compañías tecnolóxicas, como Google, Amazon, Apple, Facebook e Microsoft, e por persoeiros como Bill Gates ou Mark Zuckerberg. Code.org, para quen non o saiba, é un organismo público adicado a ampliar a participación en Informática. O seu obxectivo é que todos os estudantes teñan a oportunidade de aprender programación.
Volvendo ás accións previstas pola Escola Superior de Enxeñaría Informática do Campus de Ourense, sinalar que haberá sete obradoiros gratuítos relacionados coa programación e a tecnoloxía nos que poderán participar 300 rapaces e rapazas de 6 e 18 anos de idade. Alma Gómez, subdirectora da Escola Superior de Enxeñaría Informática, e Fernando Suárez, presidente do Colexio Profesional de Enxeñaría Informática de Galicia, foron os encargados de presentar este mércores a programación que se desenvolverá no Campus de Ourense, cuxa matrícula xa está aberta.
Durante a súa intervención, Fernando Suárez lembrou como a Hora do Código “é unha iniciativa de carácter mundial que pretende introducir aos nenos e nenas no pensamento computacional” coa idea de que “empecen a coñecer ferramentas que na actualidade teñen á súa disposición practicamente desde que nace”. Pola súa banda, Alma Gómez animou aos cativos e cativas a participar nos talleres, que teñen un enfoque fundamentalmente práctico e divulgativo. Especialmente fixo fincapé na necesidade de que as rapazas se animen a participar, e para iso convocouse o obradoiro Rapazas nas TIC , que responde directamente “á preocupación que temos tanto no colexio como nesta escola pola baixa implicación das mulleres no eido tecnolóxico”.
As actividades previstas no Campus de Ourense desenvolveranse coa participación de voluntarios do CPEIG e da escola universitaria en horario de mañá, participando os rapaces e rapazas en grupos de 15 persoas, podendo asistir nais e pais. Entre os obradoiros previstos están talleres de iniciación á programación, no que en sesións dunha hora e media de duración os participantes poden aprender a programar con xogos de Minecraft, Disney, Starwars ou Frozen, e de iniciación á programación con Scratch. Tamén haberá un taller de robótica no que os participantes familiarizaranse coa programación de dispositivos con Arduino.
O taller Outra vida do hardware consistirá en sesións de hora e media na que rapaces e rapazas de 8 e os 12 anos poderán facer distintos traballos manuais con pezas hardware. Pola súa banda, Coñece a impresión en 3D, recomendado para o tramo de 6 a 18 anos, ofrecerá sesións dunha hora nas que aprender como facer pezas e traballar con impresoras 3D. Os drons serán os protagonistas tamén dun obradoiro de hora e media na que rapaces e rapazas de 6 a 18 anos poderán ver e aprender como funcionan estes aparellos, desde os de xoguete ata os profesionais, e velos voar.
A programación tamén inclúe o obradoiro Crea o teu mundo - Realidade Virtual, consistente en sesións de hora e media, recomendadas para o tramo de 14 a 18 anos, onde os participantes poderán dar forma ao seu propio mundo virtual e navegar por el con lentes de realidade virtual. Por último, tamén está prevista a actividade Rapazas nas TICs, de iniciación á programación de dispositivos. Será un única sesión de tres horas de duración destinada a rapazas de Bacharelato ou ciclos superiores de formación profesional de idades comprendidas entre os 16 e os 18 anos.

Categorías: Ciencia

Amena premia a fidelidade con datos móbiles

Xov, 12/14/2017 - 11:30

Para chamar a atención sobre as súas promocións hai compañías que adoptan fórmulas orixinais, como Amena, que anuncia que por cada ano novo que pasen os seus clientes con eles recibirán 1 GB de datos adicionais ao mes, o que parecería toda unha ganga se non fose porque comeza a contar a permanencia a partires do 1 de xaneiro de 2018 e cun máximo de 3 GB acumulados.
Temos así unha ferramenta de fidelización que posiblemente saia barata para a compañía, xa que non todos os seus clientes esgotan os datos incluídos na súa tarifa, os beneficios tardarán un ano en facerse notar e a recompensa que reciben os clientes é cada ano máis barata, pero o efecto psicolóxico de perder os beneficios en caso de baixa, migración ou falta de pago pode funcionar ben como incentivo.

Categorías: Ciencia

Netun e o seu dispositivo de emerxencias nas estradas, Premio Novo Emprendedor 2017

Mér, 12/13/2017 - 22:47

A firma innovadora Netun Solutions, da que falamos recentemente en Código Cero para salientar o seu proceso internacional de espallamento (sobre todo cara aos Estados Unidos) e máis a incorporación ás súas fileiras de Lucía Gregorio (ex directora xeral da asociación Ineo), vén de recibir un novo impulso á súa actividade, centrada, como lembraremos, no deseño, desenvolvemento e comercialización dun dispositivo destinado a rematar cos riscos dos triángulos de sinalización de avarías, ao dispositivo Help Flash. Segundo puidemos saber, Netun Solutions e a súa tecnoloxía de seguridade nas estradas foron recoñecidos co Premio Novo Emprendedor 2017 que outorga AJE Vigo (edición número 12). Amais de Netun, tamén obtivo unha importante distinción (categoría Mozo Emprendedor) a empresa oSIGris.
Como temos sinalado no seu día, Help Flash é unha luz de emerxencia na estrada que, ante un accidente ou avaría, pódese adherir de xeito magnético ao teito do noso vehículo sen necesidade de que teñamos que abandonar o coche. O dispositivo luminoso de activación automática e autónomo funciona cunha batería de alto rendemento independente do vehículo e emite uns escintileos visíbeis a un quilómetro de distancia. A tecnoloxía comezou a comercializarse en abril de 2016 e hoxe en día xa é obxecto de 450.000 pedidos ao ano. Netun recibiu, froito deste premio, unha contía en metálico de 1.000 euros e outro premio en formación na Escola de Negocios Afundación de IESIDE, valorado tamén en máis de 3.000 euros; ademais dun acceso á base de datos de Ardán durante un ano, un diagnóstico e dirección financeira de INFI Consultores durante seis meses valorado en 4.000 euros e seis meses de afiliación gratis a AJE Vigo.
Na categoría de Mozo Emprendedor, o gañador foi a empresa oSIGris, unha firma innovadora centrada na agricultura de precisión. O proxecto, en activo en varias adegas e centros de I+D, emprega sistemas de información xeográfica (SIG) para aumentar a cantidade de datos sobre un determinado cultivo. O sistema axuda a diminuír os custos e a optimizar os sistemas de produción. O gañador recibiu un premio en metálico de 500 euros; aloxamento gratuíto con asesoramento nun Viveiro de Empresa de Zona Franca de Vigo; un acceso á base de datos de Ardán durante un ano, un plan de viabilidade de Infi Consultores valorado en 1.700 euros e seis meses de afiliación de balde a AJE Vigo.
Dentro da categoría Mellor Empresario entregáronse tres accésits. O de Calidade foi para Del mar al plato, unha plataforma en liña que distribúe produtos das lonxas galegas a toda España e Baleares, ademais de conservas, viños galegos e produtos gourmet. O accésit de Innovación foi para Bob y Blue, empresa especializada en viaxes dirixidas a todo tipo de familias, amais de ser a primeira axencia de España especializada en turismo militar ofrecendo destinos tanto nacionais como internacionais.
O terceiro accésit, o de Responsabilidade Social Empresarial foi outorgado a SomosOcéano, que fabrica pezas de algodón natural e algodón orgánico, facendo primar a proximidade dos seus provedores e reducindo emisións de CO2 en transporte e loxística. Os gañadores deste tres accésit recibirán un bono formativo de 10 horas valorado en 390 euros nun seminario dun programa especializado de IESIDE e unha tableta de última xeración.
Durante a gala de entrega de premios, a empresaria Delfina Cendón recibiu o Premio Honorífico AJE Vigo.
O acto, ao que asistiron máis de 150 invitados, celebrouse no MARCO coa presenza do alcalde de Vigo, Abel Caballero; o conselleiro de Economía, Francisco Conde; a delegada do Consorcio de Zona Franca de Vigo, Teresa Pedrosa; o director do do IGAPE, Juan Cividanes, entre outros representantes públicos e das nosas empresas.

Categorías: Ciencia

Google destaca as buscas que emerxeron en 2017

Mér, 12/13/2017 - 21:00

Ante a proximidade do peche do ano é habitual que Google faga un repaso das buscas máis realizadas, ou mellor dito, das que destacan segundo os datos rexistrados por Google Tendencias, deixando claro o interese da poboación polos desastres naturais, de xeito que os furacáns e terremotos centraron moita da actividade, sendo a tendencia máis salientable a nivel mundial o furacán Irma, seguido por outros elementos máis banais, como o iPhone 8 e o iPhone X, o presentador televisivo Matt Lauer (afectado por un escándalo sexual), a actriz Meghan Markle (quen prometeuse co Príncipe Harry de Inglaterra) ou incluso a serie televisiva 13 Razones (que xerou un intenso debate sobre o suicidio xuvenil).
Se botamos a vista a España temos que o termo que máis medrou en volume de consultas foi Cataluña, seguido polo atentado de Barcelona. Tamén disparáronse as consultas sobre figuras públicas que dixeron adeus (Bimba Bosé, Ángel Nieto e Carme Chacón). Do mundo do lecer tamén destacaron Eurovisión, a HBO e, como non, o tema Despacito.
Google permítenos revisar as tendencias de 2017 por categorías e territorios nunha páxina web creada a tal efecto, o que serve para ter máis detalles dos intereses do público durante os últimos meses e, aparte de poder saber os programas de televisión máis consultados, os deportes que captaron máis atención e as personalidades que espertaron máis interese, podemos tamén coñecer certas consultas que fan os usuarios para saber máis sobre distintas temáticas, para o que preguntas comezando por como ou que é. Así sabemos do interese emerxente sobre o método para facer slime ou que é un spinner, as dúbidas sobre as cláusulas chan e os gastos das hipotecas ou incluso o que é o artigo 155 da Constitución. Cuestións que poden servir para debuxar un bosquexo do que foi para moitos este ano que está a piques de rematar.

Vídeo no que Google resume as buscas que foron tendencia en 2017

Categorías: Ciencia

A ducia de firmas do Pacto Dixital xuntan forzas coa Xunta para impulsar o noso talento TIC

Mér, 12/13/2017 - 17:54

O Pacto Dixital de Galicia, a alianza asinada en 2013 para contribuír a converter Galicia nun punto tecnolóxico de referencia (coa participación, por unha banda, do Goberno galego a través de AMTEGA, e, pola outra, dunha ducia de empresas punteiras do sector), vén de avanzar un novo e importante paso cara a consecución do devandito obxectivo. Estamos a falar da posta en marcha do Plan de Promoción do Talento Dixital de Galicia, DigiTalent 2020, destinado a reducir a fenda entre a dispoñibilidade de traballadores con competencias dixitais e a crecente demanda destes perfís no mercado laboral.
O Plan foi impulsado pola Axencia para a Modernización Tecnolóxica de Galicia que dirixe Mar Pereira. Segundo informa este organismo, inclúense ao abeiro da dita iniciativa, e como punto de partida, máis de 20 actuacións.
Estas 20 actuacións artéllanse en tres eixos de actuación: impulsar as vocacións STEM, promover a adaptación aos novos perfís dixitais e a formación de líderes dixitais para a transformación tecnolóxica. Cun orzamento público-privado de 5 millóns de euros ata 2020, DigiTalent constitúese como “unha iniciativa aberta ás achegas dos axentes do ecosistema dixital”, entre os que están as 12 empresas que en 2013 se adheriron ao Pacto Dixital da Xunta para impulsar o crecemento tecnolóxico da Comunidade
Segundo lembra AMTEGA acerca dos porqués e das orixes deste Plan, a día de hoxe en Galicia só o 9,3% dos matriculados no sistema universitario cursa carreiras do ámbito do ámbito STEM (estudos científicos, tecnolóxicos, en Enxeñarías ou Matemáticas), “unhas cifras que contrastan coa alta empregabilidade dos profesionais do ámbito dixital”. A respecto disto, a axencia lembra que “só na Comunidade o sector tecnolóxico mantivo una taxa de emprego estábel en torno ao 1,6%, batendo o seu récord de emprego en 2016 con máis de 16.000 traballadores”.
Responsábeis das empresas tecnolóxicas adheridas ao Pacto Dixital, Indra, Everis, Iecisa, Satec, Televés, R Altia, Coremain, Telefónica, Vodafone, DXC e o Clúster TIC Galicia participaron esta mañá nunha xuntanza e traballo coa directora da Axencia para a Modernización Tecnolóxica de Galicia, Mar Pereira, para articular a súa participación no Plan DigiTalent. Como punto de partida, a Xunta propuxo a estas a súa participación en dúas das iniciativas previstas en DigiTalent: o Programa de becas Áncora e a Iniciativa Tecnólogos por un día.
Áncora é un programa de prácticas non laborais en grandes empresas do sector TIC, tanto en centros de traballo de Galicia como do estranxeiro, con compromiso de contratación das persoas que superen con éxito o período de prácticas, que será de entre 6 e 9 meses. Está dirixido a estudantes universitarios, de FP ou recentemente titulados que estean cursando formación no eido tecnolóxico.
Tecnólogos por una día, pola súa banda, é unha iniciativa dirixida a rapaces e rapaces de entre 12 e 17 anos, que “terán a oportunidade de experimentar en primeira persoa a xornada laboral dun profesional do sector, participando nas distintas actividades que teña na axenda de traballo (reunións, visitas a clientes tecnolóxicos, comida de traballo, etc.)”. O obxectivo, explica AMTEGA, é “mostrarlles as dinámicas que dominan este tipo de profesións e resolver as súa dúbidas vocacionais”.
Primeiro eixo: impulso das vocacións STEM
O primeiro eixo do Plan busca fomentar o atractivo vocacional das profesións científico-tecnoloxías entre a poboación máis nova, especialmente entre as mozas, con exposicións e accións lúdico-formativas e actividades de asesoramento. Crearanse espazos con equipamento de última xeración para achegar aos máis novos as novas tendencias tecnolóxicas, axendas de actividades con talleres e competicións de robótica, enxeñaría, programación etc.
Nesta mesma liña fomentarase o atractivo das profesións STEM desde as primeiras etapas escolares con actuacións como Tecnólogo por un día ou campamentos de verán con obradoiros TIC. E tamén o talento precoz con programas para a xestión de talento STEM de alto rendemento para alumnos con aptitudes tecnolóxicas avanzadas.
Segundo eixo: fomento de novos perfís dixitais
DigiTalent contempla actuacións para ofrecer capacitación continua aos profesionais con accións formativas e de asesoramento como o programa Áncora, sesións divulgativas de novos perfís dixitais, ou o Observatorio Tecnolóxico DXC. Facilitar a adaptación de profesionais non TIC con programas de reciclaxe profesional e garantir capacitación dixital básica de todos os profesionais
Terceiro eixo: E-líders para a transformación dixital
O Plan conta con medidas para facilitar a estes perfís directivos formación e sensiblización e iniciativas para impulsar o emprendemento e a xeración de ideas innovadoras.
Pacto Dixital de Galicia
En 2013, un total de 11 empresas tecnolóxicas, de ámbito internacional, autonómico e o Clúster TIC de Galicia asinaban coa Xunta un acordo no que, ambas partes, asumían un decálogo de compromisos para atraer investimento a Galicia, favorecer a internacionalización das PEME galegas e colaborar para conseguir o crecemento do sector. Desde entón xeráronse diferentes iniciativas como os centros de emprendemento dixital de Telefónica Galicia Open Future; o centro para a innovación social dixital, Vodafone Conecting for Good Galicia ou o Centro de Excelencia en Intelixencia de Negocio de DXC. Todos eles situados na Cidade da Cultura, conformando xunto coa sede da AMTEGA, o polo tecnolóxico do Gaiás.

Categorías: Ciencia

O Concello de Lugo mostra ás familias e o profesorado os riscos dun mal uso de Internet

Mér, 12/13/2017 - 13:05

Hoxe celébrase en Lugo unha xornada divulgativa para convidarnos a reflexionar sobre a faciana negativa das novas tecnoloxías, a que vén derivada dun mal uso das mesmas e que se traduce en cousas como acoso dixital (ciberacoso), adiccións ou trastornos de conduta. A xornada vén da man da Concellería de Benestar Social, Igualdade e Inclusión que dirixe Ana González Abelleira. Será unha cita de balde, dirixida sobre todo a familias e docentes e cuxa temática principal, como dixemos, versará sobre o uso das novas tecnoloxías dixitais, principalmente internet, móbiles e redes sociais, sen riscos en adolescentes. O encontro celebrarase no auditorio do Vello Cárcere a partir das 19:00 horas. A asistencia é de balde pero é preciso inscribirse a través do Servizo de Información Municipal 010.
A xornada será impartida por Jorge Flores Fernández, licenciado en informática e autor de varias publicacións e materiais didácticos relacionados co usos seguro das TIC. Segundo informa o Concello de Lugo, un dos obxectivos desta convocatoria é “dar a coñecer como viven as e os adolescentes a súa vida dixital, identificar cales son os retos e as estratexias preventivas, así como pór en valor e potenciar as oportunidades que brinda a actual sociedade conectada a Internet”. A iniciativa, organizada pola entidade local (a Concellería de Ana Abelleira) xunto ao colectivo Pantallas Amigas, quere ser tamén unha chamada de atención ás nais e aos pais, aos docentes e aos profesionais que traballan coa mocidade en diversos ámbitos (educación, saúde ou acción social), sobre a importancia dun bo uso das novas tecnoloxías entre os menores, “que son vítimas de un de cada catro delitos informáticos”, explican dende o departamento local de Benestar Social e Igualdade.
En concreto, abordaranse os seguintes aspectos: Internet, riscos e oportunidades para nenos e nenas e adolescentes, clasificación dos riscos, uso das principais redes sociais, contidos nocivos como o ciberacoso, ciberbullyng, sextorsión, revenge porn ou ciberviolencia de xénero, así como a detección de problemas ergonómicos e psicosociais derivados dun uso abusivo das redes, a privacidade no móbil, os videoxogos, as medidas a tomar no fogar para previr un mal uso e lugares de referencia para pedir axuda.

Categorías: Ciencia

O CITIC mostra esta semana o presente e o futuro do Deep Learning

Mér, 12/13/2017 - 13:00

O Centro de Investigación en Tecnoloxías da Información e as Comunicacións (CITIC) da Universidade da Coruña organiza este xoves 14 un titorial sobre tecnoloxías Deep Learning. A formación será impartida polo catedrático da Universidade de Oviedo na área de Computación e Intelixencia Artificial e presidente da Sociedade Científica Informática de España (SCIE), o doutor Antonio Bahamonde Rionda. Desenvolverase nas instalacións do CITIC, no Campus de Elviña da UDC, entre as 10 e as 12 horas. O acceso é de balde e libre para investigadores e empresas socias até completar aforamento.
Como lembraremos, baixo o concepto de Deep Learning (DL) agrúpanse as tecnoloxías que constitúen o seguinte paso evolutivo das ciencias da información, o alicerce dos servizos smart do futuro. As orixes do Deep Learning responden a unha demanda concreta dos investigadores e desenvolvedores: a necesidade ampliar a capacidade do Procesamento de Linguaxe Natural ante a aparición de múltiples frontes de coñecemento. Dito doutra maneira, do que se trataría é de facer comprensíbel e asimilábel para os sistemas tecnolóxicos a linguaxe empregada polas persoas nos múltiples acubillos da sociedade dixital, incluídas as redes sociais, facendo que as erratas, os erros e os elementos como cancelos ou etiquetas non impidan a comprensión dos textos nin a súa análise. A tecnoloxía Deep Learning fai posíbel que a aprendizaxe e análise da información se faga de maneira eficaz e automática.

Categorías: Ciencia

A webserie Peter Brandon estrearase na Rede o vindeiro domingo

Mér, 12/13/2017 - 12:14

Peter Brandon. Unha vida pola comedia é a terceira serie de Porco Bravú, que puido facerse realidade grazas a facerse co Premio ao mellor proxecto de webserie en galego do Carballo Interplay 2016, pero curiosamente, pese a ser un proxecto orientado á súa distribución en liña, a súa traxectoria por distintos festivais está a adiar a súa estrea en liña, que finalmente será o vindeiro domingo dun xeito moi especial, xa que, en vez de publicarse os contidos directamente para a súa reprodución baixo demanda, a emisión realizarase mediante un stream en directo a través de YouTube.
Dende Porco Bravú quixeron facer unha estrea en liña moi especial, de xeito que o día 17 ás 12:00 horas realizarán catro pases do primeiro capítulo de Peter Brandon, o falso documental protagonizado por Pedro Brandariz, completando as distintas retransmisións con conexións en directo antes e despois co equipo técnico que fixo posible esta produción e que responderá a preguntas a través de Facebook, Twitter e Instagram, onde conversarán a través dos cancelos #PeterBrandon e #BrandonDay.

Pedro Brandariz durante a presentación da webserie a pasada edición do Carballo Interplay

En Peter Brandon podemos ver numerosas caras coñecidas do panorama audiovisual galego, como María Tasende, Xosé A. Touriñán, Marcos Pereiro, María Costas, Evaristo Calvo, Isabel Risco ou Daniel Vilaverde, e incluso chega a introducirse na propia gala dos Premios Mestre Mateo, reforzando este formato no que quere amosarse a face máis triste do humor ao seguir os pasos de Pedro Brandariz na súa reformulación artística como Peter Brandon.

No Carballo Interplay 2017 puideron verse os primeiros episodios de Peter Brandon, webserie que pasou logo polo Teatro Rosalía da Coruña e o Teatro Principal de Pontevedra

Vídeo no que explican como será a estrea en liña de Peter Brandon o vindeiro domingo

Categorías: Ciencia

Vitae axúdanos a crear aplicacións limpas para seren entendidas e melloradas

Mér, 12/13/2017 - 12:03

Para moitos desenvolvedores, materializar un programa significa dúas cousas esencias: achegar algo útil á sociedade e estar cen por cen disposto a que algún dos integrantes desa sociedade se apunte a mellorar o programa orixinal. O problema xorde cando a falta de clarificación impide que a ferramenta resulta se entenda e se optimice en todos os seus aspectos. Segundo os expertos en técnicas áxiles e eficaces de desenvolvemento, escribir programas para seren comprendidos é unha arte difícil pero, tamén, unha obriga ineludíbel. Para axudarnos neste punto e adestrarnos no que seria o deseño transparente de programas, Vitae Consultores vén de convocar a segunda edición do seu curso Clean Code: Crear e refacer aplicacións limpas (formato PDF). O obradoiro, de dez horas de duración, celebrarase os días 2 e 3 de febreiro do ano vindeiro no Hotel Attica 21 da Coruña.
En termos xerais, serviranos para ampliar ao máximo o noso coñecemento sobre técnicas de código limpo, recursos que, segundo informa Vitae, “axudan a escribir programas sinxelos de entender, que achegan valor e que, ademais, poden evolucionar”.
A consultora, a propósito dos porqués deste curso, lembra que “programar é expresar procesos con detalle nunha linguaxe non ambigua, feita, coma calquera linguaxe, para comunicar verbalmente ou textualmente”. Vitae engade que “ao escribir cómpre pensar no lector, sobre todo porque, en moitas ocasións, os lectores imos ser nós mesmos”. Os obxectivos do obradoiro son, polo tanto, desenvolver aplicacións difíciles de manter, reducir a cantidade de erros e facilitar o seu achado e distinguir as boas e malas prácticas de programación.
O curso está dirixido sobre todo a programadores con experiencia nalgunha linguaxe orientada a obxectos. O requirimento principal é sermos usuarios de editores de código, recomendándose o VSCode. A actividade formativa terá unha duración de 10 horas e cun enfoque eminentemente práctico.
O formador será Alberto Basalo, enxeñeiro técnico en Informática con dúas décadas de experiencia como analista programador, xefe de proxectos e formador en pequenas e grandes empresas. Basalo é, a día de hoxe, socio director de AgoraBinaria e consultor asociado a Vitae Consultores. Entre as empresas e organismos que ten asesorado ou formado atópanse Tecnocom, ABANCA, Softek, GADISA, Inditex, Optare, Altia, Gradiant ou SIVSA.

Categorías: Ciencia

Chega un proxecto tecnolóxico galego para facilitar as tarefas do persoal sanitario

Mér, 12/13/2017 - 11:41
O investigador Víctor Manuel Alonso, responsábel do sistema

O enxeñeiro vigués Víctor Manuel Alonso Rorís, a través da súa tese de doutoramento, vén de desenvolver un proxecto tecnolóxico para facilitar ao máximo as tarefas diarias dun centro médico. O sistema, que foi avaliado durante tres meses no Hospital Son Espase de Palma de Mallorca, consiste nunha tecnoloxía de seguimento flexíbel, de baixo custe e accesíbel a través de móbiles ou tabletas. No devandito hospital, empregouse o método para facer monitoraxe dos labores de elaboración e administración das mesturas de nutrición parenteral: a que achega ao paciente por vía intravenosa os nutrientes básicos que precisa. Estes labores son particularmente delicados (os erros humanos ou a contaminación poden causar danos nos pacientes) e demandan dende hai tempo recursos que permitan o máximo control nos procesos. Neste caso concreto, o sistema do enxeñeiro galego saldouse con valoracións moi positivas.
O seu proxecto ten o alicerce, como dixemos, na súa tese doutoral, defendida na Escola de Enxeñaría de Telecomunicación e dirixida polos profesores Juan M. Santos e Luis M. Álvarez Sabucedo. O traballo fai fincapé en até que punto no ámbito sanitario actual establecéronse xa múltiples mecanismos para o seguimento dos protocolos de actuación con maior repercusión (xestión do persoal, control de citas...), pero, pola contra, existen múltiples accións rutineiras que seguen sen estar monitorizadas e que afectan de forma directa á saúde dos pacientes.
En total, no devandito caso de estudo específico trazáronse máis de 500 mesturas, obtendo información exhaustiva sobre todo o seu ciclo de vida en case 4.000 rexistros de seguimento. O novo sistema púxose a proba do 1 de xuño ao 6 de setembro de 2016, tres meses de desenvolvemento que serviron para mellorar e evolucionar a proposta inicial e para conseguir, en base aos bos resultados, financiamento para iniciar un novo proxecto de investigación que terá como obxectivo a materialización dun sistema máis avanzado co que se pretende facer seguimento de novos escenarios de aplicación en novos contextos e organizacións.

Categorías: Ciencia

VozTelecom abre punto de servizo en Carballo

Mar, 12/12/2017 - 23:36

VozTelecom, operador de comunicacións para empresas e de servizos na nube, vén de dar un novo paso no seu proceso de espallamento na nosa terra coa apertura do que sería o seu primeiro punto de servizo en Galicia, ou sexa, unha nova oficina comercial especializada en asesoramento, venda e apoio post-venda arredor dos seus servizos de comunicacións para empresas. O punto de servizo galego está emprazado no 22 da rúa Tarragona de Carballo, dende o que se quere crear un centro de operacións e actividade para dar cobertura ao puxante tecido empresarial da provincia, e máis en detalle ao seu tecido de PEME (máis de 12.000 empresas con entre 3 e 99 empregados).
A apertura destas dependencias, en palabras de Stéphane Quinnez, director comercial de VozTelecom, responde ao obxectivo de ofrecer ás PEME da nosa terra “unha atención máis próxima, personalizada e adaptada ás súas necesidades reais”. Por certo que o xerente do punto de servizo é Diego Iglesias, profesional cunha longa experiencia no sector de servizos TIC para empresas e que dirixe á súa vez a compañía DonClic Solucións Tecnolóxicas, firma que este 2017 cumpre 10 anos. O novo centro de operacións de VozTelecom conta con zona de tenda, taller e oficinas comerciais, onde ofrece os servizos de central virtual, telefonía fixa e móbil, acceso a Internet de alta velocidade, videoconferencia, copias de seguridade e almacenamento, ademais das aplicacións profesionais GSuite de Google.

Categorías: Ciencia

Instagram permite seguir cancelos

Mar, 12/12/2017 - 22:30

Os cancelos, pese a ser unha característica moi asociada a Twitter, están presentes tamén no resto de plataformas sociais, e a que vai darlle un valor inusitado é Instagram, que dende hoxe ofrece a posibilidade de que os usuarios podamos seguir cancelos, como un novo xeito de descubrir fotografías, vídeos e persoas.
Deste xeito non teremos que limitar o uso de cancelos a un uso activo, xa que non será preciso facer unha exploración intensiva de perfís de Instagram afíns aos nosos gustos e intereses, senón que poderemos seguir directamente temáticas, o que tamén terá un grande impacto para os creadores de contidos, que terán que optimizar máis o uso de cancelos para chegar a un público máis amplo e axeitado.
Seguir cancelos é equivalente a seguir a amigos, de xeito que cada cancelo terá a súa propia páxina de perfil na que podemos premer o botón para seguir (e deixar de seguir) esa temática, e tamén estarán dispoñibles na páxina se seguidos do noso perfil (onde poderemos diferenciar agora entre persoas e cancelos, facilitando así a xestión destes últimos).
Cómpre matizar que, agás que mudemos a nosa configuración de privacidade, os cancelos que sigamos estarán visibles para outros usuarios.

Os cancelos compórtanse agora coma se fosen contas de usuarios
Categorías: Ciencia

Páxinas