códigocero

Subscribirse a Orixe códigocero
Información sobre novas tecnoloxías en Galicia e en galego.
Actualizado: fai 14 min 2 seg

A USC presenta un máster en protección de datos

Mér, 10/25/2017 - 12:32

A Universidade de Santiago presentou onte unha nova actividade destinada a formar estudantes en recursos avanzados para a salvagarda da información. Estamos a falar do Master en tratamento e protección de datos da USC, unha proposta formativa que avanzamos onte en Código Cero e que é a resposta da institución académica compostelá a unhas vindeiras disposicións máis activas e exhaustivas no que seguridade da información se refire: as disposicións do Regulamento Europeo en Protección de Datos (RGPD), do que terán que dar cumprimento administracións, institucións, organizacións e empresas a partir de maio do ano vindeiro.
Segundo informou a USC no acto de presentación, o desenvolvemento do posgrao habilitará ao alumando para certificarse profesionalmente como Delegado de Protección de Datos (DPO), unha nova figura contemplada no Regulamento Europeo e que deberá estar nomeada en todas as administracións públicas (interna ou externamente) e empresas do sector privado que traten datos especialmente protexidos antes de maio de 2018.
A USC tamén lembrou que o regulamento RGPD describe a necesidade de que o responsábel do tratamento de datos aplique medidas técnicas e organizativas apropiadas: “En termos prácticos, requírese que as entidades analicen que datos tratan, con que finalidade o fan e que tipo de operacións levan a cabo; a partir dese coñecemento deben determinar de maneira explícita a forma en que aplicarán as medidas que o RGPD prevé, asegurándose de que son as axeitadas e de que poden demostralo ante os interesados e as autoridades de supervisión”.
O máster contará en palabras da Universidade “cun cadro docente de recoñecido prestixio”e impartirase “cun formato eminentemente en liña e telemático”, o que facilitará o seu seguimento. Achegará tamén tres clases maxistrais, impartidas por responsábeis de institucións e organismos especializados en protección de datos.
Os detalles do novo posgrao, a impartir entre xaneiro e setembro do vindeiro ano, ofrecéronos este martes na Facultade de Dereito a secretaria xeral da USC, Consuelo Ferreiro; o director do Centro de Estudos de Seguridade de la USC (CESEG), José Julio Fernández; a directora da Axencia de Modernización Tecnolóxica de Galicia (AMTEGA), Mar Pereira Álvarez; e a directora do mestrado, Luz Mª Ruibal Pereira.

Categorías: Ciencia

Santiago lanza un xeoportal con exhaustiva información urbanística, administrativa e catastral

Mér, 10/25/2017 - 12:05

O Concello de Santiago vén de habilitar na súa web municipal un servizo directamente encamiñado a que os cidadáns-internautas coñezan polo miúdo a relación que ten cada inmóbel ou leira coas administracións, amais das súas características, disposición e cualidade urbanística; favorecéndose o coñecemento sobre cada lugar e facilitándose ao máximo o seu achado coa axuda das tabletas, smartphones ou computadores. Estamos a falar do novo Xeoportal do Concello de Santiago, en palabras do Goberno local “unha ferramenta que fai accesíbel para toda a cidadanía a información xeográfica relativa ao municipio”. O servizo, un visor dixital, foi dado a coñecer polo concelleiro de Espazos Cidadáns, Dereito á Vivenda e Mobilidade, Jorge Duarte, que estivo acompañado polo xefe da sección de Cartografía do Concello de Santiago, Rogelio Canedo. Segundo fixeron saber, o Xeoportal é froito de meses de intenso traballo: un traballo encamiñado a conseguir que a xente teña no camiño os mínimos atrancos para obter información.
Jorge Duarte apuntou que, a través do visor, “institucións, profesionais e cidadanía en xeral poderán coñecer en detalle cuestións como cal é a cualificación urbanística dunha finca determinada, cal é a administración titular dun viario ou cal é a área de influencia de cada colexio da cidade”. Duarte tamén fixo fincapé na natureza evolutiva do portal, “un instrumento vivo que se irá cargando de información a medida que vaia xurdindo”. Segundo fixo saber, a día de hoxe o servizo ten incorporados máis de 300 documentos urbanísticos e todas as ortofotos realizadas dende 2001 a 2014 no Concello de Santiago.
Pola súa banda, o xefe da sección de Cartografía do Concello salientou a sinxeleza e utilidade do portal, seguindo a liña das esixencias estipuladas polas actuais directivas europeas e pola lexislación española, que establecen que a información cartográfica ten que ser accesíbel e de balde para a cidadanía.
Máis detalles
O Xeoportal do Concello de Santiago está artellado en seis apartados, unha disposición que responde á necesidade de “facilitar a navegación dos usuarios e usuarias”. Conta cun visor web xeral, unha serie de visores destacados “feitos á carta”, unha ferramenta para a descarga de información, un apartado centrado no planeamento urbanístico, unha sección de ligazóns a outras infraestruturas de datos espaciais, e unha sección de Servizos OGC, máis dirixida a profesionais.
Segundo explicaron, o visor xeral permite acceder a un mapa base do Concello de Santiago, no que se poden activar distintas capas de información. Entre as vantaxes principais desta ferramenta específica inclúese un xeolocalizador que elaborado polo propio Concello que, en palabras de Duarte e Canedo, “fornece de datos máis exactos sobre o municipio que outros buscadores dispoñíbeis”.
No que atinxe á posibilidade de facernos con información para os nosos discos duros, o Xeoportal permite descargar e preparar para a impresión cartografía relativa á localización da rede de transporte, das distintas redes de servizos, ou mesmo do mobiliario urbano. Tamén se poden descargar diferentes planos de Santiago, dende 1783 até 1984.

Categorías: Ciencia

Lugo implícase coa reciclaxe de refugallos electrónicos

Mér, 10/25/2017 - 09:48

Ten a tecnoloxía que non usamos os días contados? Non ten porque ser así. De feito, boa parte dos aparellos aos que (polas razóns que sexan) non lles damos uso poden ter moita máis vida da que imaxinamos. Por exemplo os computadores. Combater a filosofía de usar (durante pouco tempo) e botar ao lixo é un dos grandes obxectivos de iniciativas como a presentada os días pasados polo Concello de Santiago e Teimas (nos centros sociais), e tamén da campaña de información e concienciación O que se enchufa recíclase, coa que colabora o Concello de Lugo e que equipará á cidade da Muralla, permanentemente, de 7 contedores para depositar residuos eléctricos e electrónicos en establecementos comerciais. A súa situación pode consultarse na web www.oqueseenchufareciclase.gal.
Onte mesmo, o concelleiro de Desenvolvemento Sostible e Persoal, Daniel Piñeiro, visitou as actividades desenvolvidas no mercado municipal Quiroga Ballesteros no marco da dita campaña.
Piñeiro sinalou que o Concello “está moi implicado con este tipo de iniciativas, que axudan a atallar o descoñecemento que aínda teñen moitas persoas sobre a reciclaxe de aparellos eléctricos e electrónicos, que nalgúns casos poden ser perigosos”. De feito, engadiu, no novo contrato de limpeza viaria e recollida de lixo que o Goberno local está a preparar, “estudamos incluír a instalación de puntos móbiles na cidade para facilitar precisamente a recollida deste tipo de residuos”.
O que se enchufa recíclase ten unha duración de 9 meses e percorrerá 138 municipios galegos de máis de 4.000 habitantes. En cada municipio instálase un posto informativo no que un equipo de técnicos explicará á cidadanía distintas inquedanzas sobre a reciclaxe.

Categorías: Ciencia

Apple quere colas para recibir ao iPhone X

Mér, 10/25/2017 - 02:23

A presentación dos novos móbiles de Apple provocou unha grande expectación por realizarse a súa comercialización en dúas fases, de xeito que mentres os iPhone 8 e 8 Plus están xa no mercado, o agardado iPhone X está a facerse de rogar, e non será até o vindeiro venres ás 9:01 horas cando se iniciará o seu proceso de reserva na páxina web da compañía e na súa aplicación móbil, o que fará que sexan moitos os ansiosos que estean pendentes para conseguir as primeiras posicións na compra dun dispositivo que non os bota atrás pese a ter un prezo moi elevado (1.159 euros o modelo con 64 GB de capacidade e 1.329 euros o modelo con 256 GB de capacidade).
A chegada ás tendas non será até o 3 de novembro ás 8:00 horas, e pese a que nos últimos anos as colas para facerse cun dos novos terminais desapareceron ante a posibilidade de realizar o pedido a través da Internet, parece que Apple quere recuperar a tradición, e anunciou que en tal data o iPhone X estará dispoñible en moitos países para clientes sen cita, ou sexa, que os máis madrugadores poderán mercar un iPhone X con independencia de telo reservado ou non.
Os analistas prevén que facerse cun iPhone X non vai ser un problema só polo seu prezo, senón tamén porque o número de unidades dispoñible vai ser moito menor do esperado, dadas as dificultades de fabricación dun smartphone tan diferente aos anteriores, e cuns compoñentes que actúan como grandes limitadores (como serían os sensores de FaceID, dos que o provedor non é capaz de atender á demanda). Tamén hai informacións que apuntan a que houbo problemas cos paneis OLED no comezo da produción en masa do novo teléfono, ou sexa, que terían sido varias as incidencias que levarían a que Apple só poida colocar no mercado 20 millóns de dispositivos no que resta de ano, cantidade claramente insuficiente (en 2015 os iPhone 6S e 6S Plus venderan 13 millóns de unidades só na súa primeira fin de semana en 12 países, mentres que agora o lanzamento será en 55 países), de aí que os entusiastas probablemente busquen facerse cun dos novos smartphones nas primeira horas ante o temor de ter que agardar meses para conseguir o móbil máis tarde.

Categorías: Ciencia

O investigador do CiTIUS Alejandro Ramos Soto, recoñecido nos Premios de Informática Fundación BBVA

Mar, 10/24/2017 - 22:25
Carmen Vela, secretaria de Estado de I+D+i; Francisco González, presidente da Fundación BBVA; o premiado Alejandro Ramos e Antonio Bahamonde, presidente da SCIE

A Fundación BBVA e a SCIE veñen de entregar os recoñecementos da primeira edición dos Premios de Investigación Sociedade Científica Informática de España. Nos galardóns, a entidade recoñeceu a excelencia de seis novos doutores menores de 30 anos que realizan investigación de alta calidade no ámbito estatal, abranguendo ámbitos como a intelixencia artificial, a información a gran escala (Big Data), a arquitectura de supercomputadores, a aprendizaxe automática ou o tratamento dixital de imaxes. Entre esta media ducia de novos investigadores atópase Alejandro Ramos Soto, do centro CiTIUS (Universidade de Santiago de Compostela), cuxo traballo deu lugar a Galiweather, como lembraremos un sistema que traduce a linguaxe natural os datos dos técnicos da axencia meteorolóxica galega (Meteogalicia) producindo de maneira automática 314 previsións do tempo diarias, unha por cada un dos municipios da nosa terra.
Os Premios de Investigación Sociedade Científica veñen da man, como dixemos, da SCIE (Sociedade Científica Informática de España) e a Fundación BBVA. Os galardóns foron creados para “impulsar e dar visibilidade aos mozos informáticos menores de 30 anos que realizan investigación de alta calidade en España”. A cerimonia, celebrada hoxe na sede madrileña da Fundación BBVA, serviu para salientar até que punto o eido da informática, “unha ciencia relativamente recente”, supuxo “todo un cambio de paradigma tecnolóxico, económico e social, e tamén para sinalar os retos que iso implica”. En palabras do presidente da Fundación BBVA, Francisco González, “a informática, ao pór a información ao alcance de todos, e grazas ao abaratamento dos dispositivos, está a demostrar ser unha tecnoloxía altamente democratizadora, alterando a organización das empresas, o consumo, a comunicación, o lecer, a xeración de coñecemento, o acceso e coidado da saúde e as relacións persoais”.
Tanto Francisco González como Antonio Bahamonde, presidente da SCIE, resaltaron “o alto nivel alcanzado pola investigación en informática en España”, e lembraron a necesidade de seguir atraendo talento.
Os Premios de Investigación Sociedade Científica Informática de España-Fundación BBVA recoñeceron “a creatividade, orixinalidade e excelencia” dos novos doutores. Cada un dos seis premios concedidos nesta edición inaugural está dotado con 5.000 euros. Os premiados son: Cristóbal Camarero, da Universidade de Cantabria (que investiga como mellorar as interconexións entre os procesadores dun supercomputador para optimizar o seu rendemento, así como a demostración automática de teoremas e en aplicacións en banca); Elena Garcés, da Universidade de Zaragoza (que desenvolveu algoritmos para o tratamento dixital de imaxes que resultan de gran interese para o cinema e o desenvolvemento de programas de realidade virtual); Josué Feliu Pérez, da Universidade Politécnica de Valencia (que mellorou a eficiencia dun tipo de procesadores
chamados multinúcleo- presentes hoxe tanto nos teléfonos intelixentes como en grandes centros de cálculo); Petar Jovanovic, da Universidade Politécnica de Cataluña (autor de aplicacións para análises de Big Data que xa usa a Organización Mundial da Saúde para erradicar doenzas en países desfavorecidos, como o mal de Chagas); María Pérez Ortiz, da Universidade de Córdoba (que desenvolveu aplicacións innovadoras en áreas como a agricultura sustentábel, os transplantes de órganos, o cambio climático e a oncoloxía); e Alejandro Ramos Soto, da Universidade de Santiago de Compostela.
Premios Nacionais de Informática
Durante a cerimonia celebrada hoxe na sede da Fundación BBVA en Madrid entregáronse tamén os Premios Nacionais de Informática, que outorga a SCIE desde 2005 para recoñecer a investigadores xa consolidados e incentivar a investigación en informática. Este ano os gañadores foron Miguel Toro, catedrático de Linguaxes e Sistemas Informáticos da Universidade de Sevilla, Mario Piattini, catedrático de Linguaxes e Sistemas Informáticos da Universidade de Castela-A Mancha, e Nuria Oliver, enxeñeira de Telecomunicacións pola Universidade Politécnica de Madrid,

Categorías: Ciencia

Instagram permite facer directos con amigos a pantalla partida

Mar, 10/24/2017 - 21:54

Tras iniciar as probas en agosto, finalmente Instagram fai oficial a súa opción para facer directos con amigos, de xeito que cando esteamos a facer unha retransmisión de vídeo en vivo poderemos convidar a calquera dos espectadores a unirse á retransmisión, que pasar a realizarse a pantalla partida para que os 2 participantes poidan verse simultaneamente, e incluso na sección de historias de Instagram aparecerán os avatares de ambas persoas solapados para que se vexa claramente que é un directo conxunto.
Coa realización de directos con amigos Instagram busca que moitos usuarios perdan o medo a realizar retransmisións en vídeo, aínda que esta funcionalidade pode verse tamén como un novo xeito de interacción, xa que a persoa que inicia a emisión pode retirar ao convidado en calquera momento e convidar a outra persoa a participar, de xeito que a participación dos espectadores pode ir moito máis aló dos comentarios en modo texto. Unha vez rematada a retransmisión poderase compartir na sección de historias para que estea visible durante 24 horas.
Os directos con amigos están dispoñibles na aplicación móbil de Instagram para iOS e Android dende a versión 20.

Os directos a través de Instagram poden animarse coa participación de convidados

A nova funcionalidade vista en vídeo

Categorías: Ciencia

Mar Pereira destaca a importancia do tratamento e a protección de datos

Mar, 10/24/2017 - 21:30

A directora da AMTEGA, Mar Pereira, indicou esta mañá na presentación do Mestrado Propio en Tratamento e Protección de Datos organizado polo Centro de Estudos de Seguridade da Universidade de Santiago de Compostela que «os cambios derivados da transformación dixital requiren profesionais con novas competencias e habilidades», e de aí a importancia de que as universidades dean reposta con formación especializada, non só para profesionais TIC senón para perfís doutros ámbitos. Pereira gabou o novo mestrado, que ofrece formación específica a xuristas e profesionais relacionados co tratamento de datos ante a entrada en vigor do novo Regulamento europeo nesta materia.
Pereira destacou o valor estratéxico dos datos no contexto dixital para crear máis e mellores servizos pero coa obriga de garantir a súa seguridade e confidencialidade. Neste sentido, a directora da Axencia subliñou que o novo Regulamento europeo é «o máis esixente neste materia» e incorpora novos dereitos para os cidadáns como o dereito ao esquecemento, o consentimento expreso ou a portabilidade dos datos e implica e un maior compromiso das organizacións, públicas e privadas coa protección de datos así como unha forma diferente de xestionalos.
Entre as novas obrigacións que implica a lei está a de contar nas administracións públicas coa figura do delegado de protección de datos, un novo perfil profesional vinculado ao contexto dixital, que terá unha importante demanda tras a entrada en vigor da normativa europea o vindeiro ano e que constitúe un dos obxectivos deste curso.
A Xunta de Galicia, a través da AMTEGA, está afrontar a adaptación a estas novas obrigas normativas a través das medidas do Plan Director de Seguridade TIC. Grazas as actuacións desenvolvidas no marco deste Plan, a Administración autonómica incrementou a súa capacidade de prevención, detección e reposta ante incidentes de seguridade.

Categorías: Ciencia

UCGAL sitúa a Movistar como o operador con mellores servizos de TV

Mar, 10/24/2017 - 17:15

A Unión de Consumidores de Galicia (UCGAL) vén de presentar os resultados do seu primeiro Estudo Operadores e Televisión, unha investigación que avalía os principais aspectos que poden determinar a elección dunha compañía (en detrimento doutra) por parte dos consumidores, aspectos ligados á oferta televisiva e á calidade en Internet dos seis operadores examinados. Para realizar este estudo UCGAL atendeu a listaxe de canles da oferta básica de televisión dos distintos operadores e tamén das principais plataformas de streaming (Netflix, HBO España, Wuaki TV e Amazon Prime Video), así como as funcionalidades ofertadas e os datos de calidade. Os operadores analizados foron Euskaltel, R Cable, Vodafone, Movistar, Orange e Telecable. No informe, Movistar sobresae como “o operador coa mellor opción en servizos de televisión” e consegue unha nota alta en calidade.
Euskaltel consegue a segunda posición e Telecable a terceira. Na listaxe, o operador con peor puntuación é Orange, seguido de R Cable. “No estudo ambas compañías lograron aprobar”, sinala UCGAL, “pero é máis que evidente que teñen moitos aspectos que mellorar na súa oferta”.
Á hora de analizar as funcionalidades das distintas opcións de TV ofertadas, UCGAL valorou a práctica totalidade das mesmas: control do directo, acceso a contidos dos últimos días, oferta VOD, ver sen conexión, multidispositivos e simultaneidade, aplicacións móbiles, control familiar, servizo de gravación, accesibilidade e canles da oferta básica.
Como dixemos, os resultados en relación coas funcionalidades e oferta do servizo de televisión sitúan a Movistar no primeiro posto con 9,82 puntos, mentres que Orange suspende cun 4,92. Segundo a entidade galega de usuarios e consumidores, “a cualificación de Movistar fundaméntase en grande medida no seu amplo catálogo de contidos, a posibilidade de visualización sen conexión e a súa aposta pola accesibilidade das persoas con discapacidade visual ou auditiva”.
En segundo lugar sitúase Euskaltel cun 7,36 e Telecable en terceiro posto cun 7.
No referente á calidade, os aspectos a considerar para a realización do estudo foron: tempo de subministro, avarías, tempos de reparación de avarías e reclamacións. Analizados os parámetros que afectan á calidade do servizo de Internet, UCGAL concluíu que Movistar, cunha nota de 8,73, ofrece a maior calidade con case tres puntos de diferenza sobre o último, R Cable, que non chega ao 6. Só outro operador supera a cualificación de oito, Euskaltel (8,53).
No que respecta ao tempo que transcorre dende o intre no que o operador recibe unha solicitude válida de subministro dun acceso a Internet sobre unha liña en servizo até o instante no que o servizo actívase para o seu uso, o mellor dato correspóndelle a Telecable cunha media de 12,67 días, seguido de Movistar e Euskaltel con 13 días.
No que atinxe ás avarías, a investigación reflicte que a porcentaxe máis baixa correspóndelle a Movistar cun 2,51% seguido de Telecable (2,88%). Sobre o tempo de reparación das mesmas, volve ser Movistar o operador con mellor puntuación xa que repara o 95% das avarías de menor duración nun tempo máximo de 44,5 horas e case o 97% dentro do prazo obxectivo.
Para rematar, no apartado das reclamacións relativas ao servizo telefónico e/ou ao servizo de acceso a Internet, Vodafone é o operador con menor porcentaxe de reclamacións en relación ao servizo fixo. No estudo tamén se sinala “que os peores datos son para Telecable e R Cable”.

Categorías: Ciencia

Galicia Maker Faire arrancará cunha xornada profesional de Industria 4.0

Mar, 10/24/2017 - 14:18

Galicia Maker Faire, a feira referencial de argalleiras/os da nosa terra (e de máis alá), vai collendo corpo. Se os días pasados falamos da incorporación á equipa de participantes dun argalleiro de excepción, Richard Stallman, hoxe é a quenda de confirmar que a feira celebrarase en Compostela os días 24, 25 e 26 de novembro e que contará, por vez primeira, cunha xornada dirixida especificamente ao sector profesional e na que participarán figuras senlleiras a nivel internacional no ámbito da innovación. Esta xornada profesional está programada para a mañá do 24 de novembro. O programa de actividades abranguerá charlas e debates sobre múltiples temas (Industria 4.0, tecnoloxía, innovación, produtividade intelixente e movemento Maker) con múltiples vantaxes para todo tipo de ámbitos empresariais; e abordados dende múltiples puntos de vista. Por exemplo o de Tomás Garces, enxeñeiro principal de Deseño en First Build, proxecto innovador levado a cabo por General Electric; ou os de Arian Group e Edesdev.
Ademais, haberá un espazo de exposición sobre Industria 4.0 no que os asistentes poderán coñecer de primeira man exemplos da Galicia máis innovadora, coa presencia de makers galegos compartindo os seus achados e enxeños tecnolóxicos. O acto rematará cunha entrega de premios na que se resaltará ao proxecto máis innovador dos expostos​ durante ese​ día. As empresas interesadas en asistir a esta xornada poderán inscribirse na páxina web do evento, galicia.makerfaire.com, onde teñen habilitado un formulario.
O obxectivo dos organizadores da Galicia Maker Faire con esta sesión profesional de apertura é “que a xornada funcione como punto de encontro entre os argalleiros e a industria máis avanzada, favorecendo a aparición de sinerxías que poidan levar a unha colaboración fluída entre estes dous mundos tan complementarios”. Desta maneira, “as compañías poderán coñecer os proxectos tecnolóxicos máis innovadores levados a cabo por​ emprendedores e estes terán unha gran oportunidade​ de acadar posíbeis socios e colaboradores”.
Os contidos desta primeira xornada terán continuidade con diferentes charlas e actividades durante a celebración da feira propiamente dita, o 25 e 26 de novembro, na que contarán, entre outros, coa presenza de importantes figuras significativas a nivel mundial como a de Richard​ ​ Stallman,​ ​ creador​ ​ do​ ​ movemento​ ​ do​ ​ software​ ​ libre.
Detalles sobre a xuntanza
O evento internacional Galicia Maker Faire vén da man de VermisLAB e O Gato Cósmico, do Concello de Santiago (Concellería de Igualdade, Desenvolvemento Económico e Turismo) e da Fundación Cidade da Cultura de Galicia.
Na presentación da feira, celebrada o pasado mes de maio, fíxose saber que durante as edicións de 2015 e 2016 acudiron máis de 24.000 asistentes e máis de 300 makers dando conta dos seus enxeños, converténdose “en punto de encontro dos mellores creadores da Comunidade e axudando a potenciar unha Galicia máis innovadora e colaborativa”, explicouse.
Nesta nova edición, ademais, puxéronse en xogo unha serie de novidades. Por exemplo o cambio de emprazamento, que pasa a ser a Cidade da Cultura, con todo o que de visibilidade e amplitude implica o troco de localización.

Categorías: Ciencia

Preséntase Palleira.gal, o catálogo aberto do patrimonio de Combarro

Mar, 10/24/2017 - 13:51

Este sábado 21 de outubro celebrouse na Escola do Campo de Combarro o lanzamento oficial da web Palleira.gal, unha iniciativa da asociación Xeopesca destinada a materializar e afianzar un catálogo dixital libre dos bens de interese cultural do casco histórico de Combarro. No acto fíxose saber, a maiores, que se trata dun proxecto que contou co apoio da Xunta (Plan de Acción do Software Libre de AMTEGA) e que o seu nome (Palleira.gal) alude directamente ao xeito de denominar os horreos da veciñanza de Combarro: palleiras. Á presentación asistiron unhas trinta persoas, incluíndo representantes de Xeopesca (Xosé Rial), O Zulo (Alberto Permuy), o Concello de Poio (Xulio Barreiro) e AMTEGA (Eladio Otero).
Xosé Rial espuxo os obxectivos de Palleira.gal (amosar información detallada dos emblemáticos elementos da vila pontevedresa), os porqués do nome do proxecto e as súas orixes. Ao fio disto último, sinalou que a iniciativa é herdeira doutros proxectos anteriores como aculturadaauga.org e abeancos.gal, levados a cabo en Mugardos e Melide, respectivamente. Rial tamén expresou a súa confianza en que o proxecto presentado en Combarro sirva “non só para divulgar o patrimonio do casco histórico da vila de Combarro, senón tamén para ofrecerse como modelo co fin de que o facho da cultura local continúe a alumearse noutras comarcas e vilas”.
Xeopesca lembrou igualmente o traballo despregado pola asociación A Solaina, cuxa colaboración, sinalou Rial, “foi fundamental para o desenvolvemento do proxecto”. Tamén agradeceu á Concellería de Patrimonio e da oficina do ARI de Combarro a cesión de información “que enriqueceu a iniciativa”, así como a colaboración das familias propietarias das palleiras, “piares fundamentais da plataforma-catálogo ao proporcionar información sobre estes elementos e a súa contorna”.
Segundo explicou Rial, Palleira.gal tamén é un proxecto etnográfico, que revela os costumes que tiñan as familias, e que “nos axuda a comprender mellor o pasado”, unha condición imprescindíbel, engadiu, “para percorrer do mellor xeito as calellas do futuro”.
No acto tamén se informou das mans que están a impulsar o catálogo, unha equipa multidisciplinar impulsada por Xeopesca e especializada en diferentes eidos de traballo (arquitectura técnica, enxeñaría técnica informática, historia, tradución e interpretación…), formada por Manuel Pastoriza, Pablo Belay, David Belay, Verónica Castiñeira, Andrés Dacosta, Tamara Andrés, Alberto Permuy e Xosé Rial.
Palleira.gal foi creado con dous obxectivos básicos: por unha banda coñecer e recoñecer o contexto histórico e social no que foron construídas e empregadas as palleiras en Combarro; pola outra, achegar un catálogo de palleiras individual e pormenorizado no que se ofrecerá a súa xeolocalización e incorporará tanto características arquitectónicas como aquelas aportadas pola intrahistoria familiar.
O catálogo acubilla arestora 8 hórreos. Xeopesca anunciou que de maneira periódica publicará un novo elemento até chegar ás 76 palleiras existentes no casco histórico. “Esta estratexia”, explicou Rial, “permitirá ter unha web dinámica con actualizacións durante todo o ano”. Unha vez cubertos todos os hórreos, catalogaranse outros bens existentes no casco vello coma os cruceiros. Xeopesca non desbota ampliar o marco xeográfico até cubrir zonas máis amplas, toda a parroquia ou mesmo o concello. Todo este traballo poderase seguir a través da web e das redes sociais coas que contará o propio proxecto.
Por cada ben rexistrado mostrarase unha imaxe do elemento, a súa xeolocalización, a súa tipoloxía, o seu enderezo, a accesibilidade, o seu estado, o século e ano de construción, a propiedade, o uso que se lle dá e o tipo de protección que posúe. Ademais, visualizarase unha descrición detallada do elemento, amosaranse as súas dimensión e identificaranse as distintas partes do ben. Igualmente, amosarase información sobre a historia familiar dos propietarios de cada palleira.
Rial tamén incidiu en que o proxecto tecnolóxico utilizado por palleira é software libre, indicando que calquera pode descargar o proxecto, estudalo, instalalo e mesmo melloralo.
Alberto Permuy, pertencente a asociación O Zulo de Mugardos e principal desenvolvedor do sitio web do que xurdiron non só Palleira.gal, senón tamén os desvanditos catálogos dixitals Aculturadaauga.org e Abeancos.gal, lembrou os comezos “dun proxecto que permitiu crear un catálogo dixital de lavadoiros en Mugardos” e amosou a súa satisfacción na capacidade de espallamento deste proxecto, que chegou primeiro en Melide, despois a Poio e, en datas vindeiras, tamén a Teo (A Coruña).
No apartado tecnolóxico, Permuy comentou que Palleira.gal supón “un avance con respecto aos outros portais” e centrou a súa intervención en dous apartados: no software libre e na facilidade de acceso a datos. No primeiro punto, comentou “a facilidade de instalación do proxecto”, xa que o código publicado baixo licencia GPL é público, e “o empaquetado da plataforma facilita a súa instalación por calquera programador”. Tamén fixo fincapé nas facilidades para a descarga dos contidos (fotos e textos) de Palleira.gal a través de formatos estruturados e libres.
Xulio Barreiro, concelleiro de Patrimonio de Poio, felicitou a Xeopesca polo traballo realizado e comentou que o catálogo dixital “aumenta o coñecemento sobre un dos emblemas de Combarro, as palleiras”. Para rematar a rolda de prensa, interviu o xefe de innovación tecnolóxica da AMTEGA, Eladio Otero, quen comentou que a iniciativa forma parte do convenio que a Xunta de Galicia asinou coas asociación de software libre de Galicia, así como a asociación empresarial AGASOL dentro do Plan de Acción do Software Libre 2017. Otero apuntou a maiores que “un proxecto tecnolóxico baseado no software e contidos libres beneficia a toda a sociedade a través da mostra, neste caso, de bens de interese cultural”.

Categorías: Ciencia

Centos de milleiros de lentes con cámara de Snapchat acumúlanse sen vender

Mar, 10/24/2017 - 12:40

Hai algo máis dun ano Snap Inc., compañía detrás de Snapchat, fixo unha arriscada xogada consistente en comercializar unhas lentes con cámara chamadas Spectacles, que estaban dispoñibles inicialmente só a través dunhas poucas tendas efémeras repartidas por cidades de EE.UU., e que non foi até o pasado mes de xuño cando chegaron a Europa a un prezo de 149,99 euros, o que non parece ter sido dabondo para popularizar este produto de moda que só podía rexistrar fotografías e vídeos para compartirse a través de Snapchat, o que é todo un problema actualmente, xa que esta plataforma social está claramente en decadencia grazas en boa medida á incorporación das historias por parte de Instagram.
The Information está a pór en cifras a situación deste produto, que estaría a padecer os problemas dunha mala previsión de vendas, acumulando milleiros de unidades nos seus almacéns. Neste último ano Snap tería vendido máis de 150.000 unidades das Spectacles, pero nos almacéns chineses da compañía habería centos de milleiros de unidades á espera, da que moitas estarían incluso sen ensamblar, deixando claro que realmente non hai esperanza en que poidan chegar realmente ao mercado ante a súa falta de demanda real, confiándose en que as pezas poidan aproveitarse para unha posible revisión deste produto, que anunciaríase en breve.
O fracaso das Spectacles parecía algo cantado, xa que o produto non puido mercarse en liña até o pasado mes de febreiro, ou sexa, deixando pasar a expectación inicial e a campaña de Nadal, o que claramente foi un erro de calendario, e o seu elevado prezo tampouco favorece a súa compra impulsiva como un simple produto de tempada. Confiemos en que a compañía aprenda dos erros, e agora que se autodefinen como «unha compañía de cámaras», saiban comercializar os seus futuros produtos dun xeito máis efectivo.

Categorías: Ciencia

O FBI recoñece non poder acceder ao contido de máis de 6.900 móbiles

Mar, 10/24/2017 - 12:11

Durante o ano pasado a investigación sobre os contidos dun iPhone 5c propiedade dun terrorista falecido nun tiroteo en San Bernardino provocou grandes polémicas, xa que o FBI quería forzar a Apple a axudar na vulneración do terminal para acceder á información almacenada no mesmo, e aínda que finalmente teríase accedido á información grazas á compañía israelí Cellebrite (aínda que o FBI nunca confirmou este detalle nin a importante cantidade económica que investiron para tal fin), resultaba evidente que a industria non podía ceder ás autoridades gobernamentais se non quería crear un perigoso precedente que exporía os datos de todos os usuarios a gobernos de todo o mundo (e, por extensión, a calquera).
Aínda que o feito de que existisen métodos para vulnerar a seguridade de terminais non actualizados, hai que recoñecer que non é unha tarefa doado, e grazas á participación do director do FBI Christopher Wray nun foro sobre seguridade sabemos da dimensión que está a acadar o problema: nos primeiros 11 meses do ano fiscal os axentes federais non foron quen de acceder ao contido de máis de 6.900 dispositivos móbiles.
Wray recoñece que isto é «un grandísimo problema» que atinxe a investigacións de todo tipo (narcóticos, tráfico de persoas, anti-terrorismo, crime organizado...), pois boa parte do material aprehendido nas redadas ten restrinxido o seu acceso mediante contrasinal, dificultando o acceso ás evidencias. Os fabricantes de tecnoloxía néganse a colaborar coas autoridades para manter protexidos os datos dos seus usuarios, postura á que Wray responde declarando a necesidade de que poida existir un punto intermedio, xa que precisan ferramentas para poder velar pola seguridade pública e o cifrado está a ser un atranco moi importante.
Os expertos de seguridade apuntan pola súa banda que agora que se está a normalizar a comunicación cifrada entre extremos resulta case imposible interceptar mensaxes de xeito efectivo, de xeito que sería preciso empregar portas traseiras e outros tipos de medidas que en xeral reducirían a seguridade para todos, polo que non serían moi aconsellables.

Categorías: Ciencia

Todo o que quixemos saber da mercadotecnia dixital, nunha xornada de balde da Cámara de Santiago

Mar, 10/24/2017 - 11:56
A xornada contará coa presenza das expertas en mercadotecnia en liña, Elena Díaz e Cristina Varela

Meternos de cheo na mercadotecnia en liña e coa máxima eficacia, visualizando de maneira clara as vantaxes da promoción e a comunicación dixital para incrementar vendas, facer clientes e mantelos no tempo, e aumentar a rendibilidade. Este é o gran obxectivo da xornada de balde que organiza o 31 de outubro a Cámara de Comercio Santiago, unha xeira divulgativa titulada Como atraer visitantes ao meu sitio web? e programada coa finalidade de dar a coñecer a PEME e autónomos “distintas posibilidades de desenvolvemento empresarial a través de internet”. A xornada, que forma parte das actividades do programa TICCámaras, está organizada en colaboración co Fondo Europeo de Desenvolvemento Rexional (FEDER) da Unión Europea baixo o lema Unha maneira de facer Europa. Celebrarase entre as 12:00 e as 13:15 horas no salón de actos da entidade.
A xornada contará cunha introdución do xestor de Innovación da Cámara, Anselmo Díaz, que fará unha presentación de TICCámaras, un programa de axudas para PEME e autónomos que fornece de solucións para mellorar a competitividade das empresas a través da incorporación de novas tecnoloxías.
A conferencia central da xornada estará impartida polas consultoras da empresa Invbit de deseño e desenvolvemento de software, Elena Díaz e Cristina Varela. Na súa exposición, farán unha introdución ao conxunto de accións que as empresas poden facer en internet para darse a coñecer, xerar clientes potenciais e mesmo vendas online. Asemade, debullarán os pasos a dar desde a análise inicial do proxecto á creación dunha web adaptada ás necesidades da marca e as diversas promocións coas que se poden alcanzar aos usuarios.
Elena Díaz define desta maneira algunhas das principais vantaxes de estarmos na Rede: “Vivimos nunha era cada vez máis dixital, e isto nótase no proceso de busca de información previo á compra ou contratación dun produto ou servizo. Se precisamos un fontaneiro ou un carpinteiro buscaremos cales están más preto e as súas tarifas, ou se estamos viaxando e queremos pasar a noite nun hotel seguramente nos declinemos polo que teña mellores fotos subidas e opinións. Toda empresa que o consumidor poida buscar en internet ten posibilidades para desenvolver o seu negocio neste medio”.
Díaz e Varela analizarán tamén a eficacia das campañas publicitarias en Adwords e en redes sociais. As consultoras indican que estas campañas “adoitan dar bos resultados en pouco tempo e ofrecen variedade de posibilidades de formatos de anuncio en función dos obxectivos desexados”.

Categorías: Ciencia

As metodoloxías áxiles e o seu futuro, ao detalle nunha xornada formativa impulsada por Vitae

Mar, 10/24/2017 - 11:48

O vindeiro 21 de novembro temos unha cita en Vigo con boa parte das metodoloxías máis avanzadas para poñernos na pel dos usuarios dos nosos servizos, sendo quen de atopar as súas demandas mesmo antes de que sexan formuladas. Estamos a falar do evento Xestión de Proxectos Áxiles vs. Xestión de Organizacións Áxiles, unha cita formativa, de balde, na que se falará arreo sobre o escenario actual das metodoloxías áxiles e do seu futuro, facendo fincapé en como deseñar de maneira adaptativa produtos e servizos, e afondando en cuestións como a xestión da calidade do software, na xestión das persoas e en como implantar metodoloxías eficaces nunha organización con casos reais. O evento vén da man de Vitae Consultores, o CITEXVI, a Universidade de Vigo e Scrum Manager. Celébrase o martes 21 na sede do CITEXVI.
Outro dos obxectivos do evento é xuntar forzas, intercambiando experiencias e amosándoas ao detalle, a prol de conseguir unha integración óptima das metodoloxías áxiles no seo dunha empresa. “As metodoloxías áxiles para a xestión de proxectos”, explica Vitae, “estanse a introducir con moita forza e rapidez nas organizacións e ás veces estas non están preparadas para o cambio de prioridades nin dos procesos nin nas persoas”.

Programa de actividades

09:45 - 10:00 Recepción de asistentes
10:00 - 10:10 Benvida e introdución
Nacho Armesto, Universidade de Vigo
Marcos Carbonell, Vitae
10:10 - 10:40 Relatorio: Axilidade e Innovación
Juan Palacio
10:40 - 11:20 Relatorio: Deseño adaptativo con Design Thinking
Adrián Ager
11:20 - 11:40 Café - Networking
11:40 - 12:10 Casos de éxito : Calidade e Testing en Proxectos Áxiles
Juan Martínez
12:10 - 12:50 Casos de éxito, Xestión de Persoas en Metodoloxías Áxiles
Josefina Alonso Nocelo
12:50 - 13:50 Casos de éxito, Implantación de Metodoloxías Áxiles nunha organización
Manuel Doval
13:50 - 14:00 Rogos e preguntas

Relatores

– Juan Palacio. Profesor de Enxeñaría do Software e profesional con máis de 20 anos de experiencia en xestión de empresas, proxectos e equipos.
Dirixiu a área técnica de iA Soft (actualmente Grupo Oesía - Zaragoza). É fundador de Scrum Manager, proxecto que actualmente preside, e tamén fundador de Safe Creative e Safe Stamper, empresas que dirixe a día de hoxe.

– Adrián Ager. Licenciado en Publicidade e Relacións Públicas cun master en Mercadotecnia ademais de posgraos en Innovación e Creatividade.
Profesional con máis de 5 anos de experiencia desenvolvendo proxectos dixitais a través de metodoloxías como Design Thinking e Lean Startup tanto para grandes empresas como para proxectos en startups. Traballou en Orange, na Fundación Telefónica e en BEEVA, consultora de Innovación e Tecnoloxía do grupo BBVA.

– Juan Martínez Neira. Licenciado en Matemáticas pola Universidade de Santiago de Compostela.
A día de hoxe é director da área de desenvolvemento de software de Plexus, consultora tecnolóxica galega con máis de 700 empregados. Profesional con máis de 15 anos de experiencia no sector TI traballando con metodoloxías áxiles e preditivas.

– Josefina Alonso Nocelo. Enxeñeira Superior en Informática pola Universidade de Vigo.
Actualmente é responsábel da área de Aseguramento da Calidade e Seguridade Funcional da División de Electrónica, HMI e Sistemas ITS do Centro Tecnolóxico de Automoción de Galicia (CTAG). Posúe máis de 18 anos de experiencia no eido do desenvolvemento de software destacando a súa actividade na xestión e dirección de proxectos TI con metodoloxías áxiles (Scrum, XP) e Preditivas (PMI, CMMI) para os sectores do motor, o aeronáutico e do espazo.

– Manuel Doval. Licenciado en Ciencias Biolóxicas pola Universidade Complutense de Madrid e posgrao en Dirección de Empresas polo IESE.
Foi durante 19 anos o director IT na empresa R Cable e Telecomunicacións, sendo uns dos pioneiros en implantar metodoloxías áxiles tanto a nivel de proxectos como na organización.

Categorías: Ciencia

Santiago organiza nos centros sociais un obradoiro de reacondicionamento de computadores refugados

Lun, 10/23/2017 - 23:04

O Concello de Santiago e a firma Teimas, a través da iniciativa Tropa Verde, van organizar un obradoiro para promover as segundas e terceiras vidas dos computadores refugados. O taller, que se sitúa na campaña Longa vida aos teus residuos tecnolóxicos, foi convocado con motivo da Semana Europea da Prevención de Residuos, unha iniciativa cuxo obxectivo é promover a sensibilización sobre recursos sustentábeis e xestión de refugallos. Segundo informa o Concello, a raizame do obradoiro está na necesidade de contribuír a poñer o freo sobre o escaso nivel de sustentabilidade, en liñas xerais, do mercado tecnolóxico, un dos ámbitos produtivos onde máis se fomenta o consumo e o reemprazo prematuro de aparellos perfectamente operativos por outros novos. “Só en España”, lembran dende Tropa Verde, “xéranse 800 mil toneladas ao ano de residuos de aparellos eléctricos e electrónicos das cales apenas un terzo destas xestiónanse de maneira axeitada”.
O obradoiro realizarase en dous centros socioculturais da cidade de Compostela. O obxectivo principal é “que os asistentes tomen conciencia do importante que é para o medio ambiente unha correcta xestión deste tipo de material desbotado e ensinarlles a valorizar de maneira sinxela algúns destes aparellos”. Segundo engaden o Concello e Teimas, o reacondicionamiento dun equipo informático completo permite un aforro de emisións de CO2 á atmosfera equivalente ao dun vehículo para percorrer 1600 quilómetros.
Ao abeiro do obradoiro realizarase un caso práctico de reutilización dun computador, mostrándolles aos participantes como abrir a carcasa, os principais compoñentes que se poden cambiar (RAM , disco duro), o borrado seguro da información dos discos duros e como volver instalar o sistema operativo. Esta iniciativa lévase a cabo grazas a colaboración do Concello de Santiago de Compostela coas empresa Teimas Desenvolvemento, Revetia e Recyclia. Celebrarase o 23 de novembro, en horario de 17:30 a 19:00 horas, no Centro Sociocultural de Vite; e o mesmo día, con horario de 19:30 a 21:00 horas, no Centro Sociocultural do Ensanche.

Categorías: Ciencia

Xiaomi ultima o seu desembarco español

Lun, 10/23/2017 - 20:18

A marca Xiaomi está de máis actualidade que nunca, pois tras desvelarse que, sen contar con distribución nin servizo técnico oficial en España é a cuarta marca que máis móbiles vende (superando a Apple), chegaron informacións que apuntaban á apertura dunha tenda oficial no centro comercial Xanadú de Madrid, que parece estar a preparar a súa campaña de lanzamento, xa que vén de abrir presenza en Twitter e Facebook, onde publicaron unha imaxe coa mascota da marca chinesa cunha bailadora de flamenco na que reza a frase Ola, España.
A apertura dunha tenda física en España supón para moitos unha magnífica nova, pois ven as posibilidades que podería achegar o contar cunha canle oficial de compra e asistencia, aínda que habería que ser prudentes, pois non podemos obviar que a tenda non ten obriga de dar servizo a quen non sexa o seu cliente e cando as marcas chinesas se establecen oficialmente teñen que facer fronte aos impostos locais e ofrecer garantía europea de 2 anos, elementos que encarecen os produtos considerablemente fronte ás compras internacionais a través da Rede (que normalmente evitan o pago de aranceis e IVE, e teñen unha garantía moi limitada, case inviable de exercer).
As tendas de Xiaomi fóra dos mercados asiáticos tenden a ter un catálogo de móbiles reducido (pois algúns terminais poderían ter problemas de comercialización ante problemas de patentes e de propiedade industrial) e apostar por amosar algúns dos centos de produtos de todo tipo de Xiaomi vende, que van dende robots-aspiradora até mochilas, converténdose os establecementos físicos nun excelente escaparate para un abano de produtos que para o fabricante chinés producen uns beneficios moi superiores aos smartphones (que son un negocio con marxes reducidas que manteñen principalmente polo valor de marca que achega).

Categorías: Ciencia

A Deputación de Lugo contribúe á operatividade tecnolóxica da RAG

Lun, 10/23/2017 - 16:49

A Real Academia Galega (RAG) é unha das entidades da nosa terra de meirande actividade na Rede, obxecto de incontábeis demandas relacionadas con dúbidas lingüísticas, tal e como certifica o feito de que a última revisión do dicionario deixara unha media de 60.000 consultas diarias de palabras. Malia estes e outros datos, a RAG ten só un orzamento de 900.000 euros, que é tres veces menos có da Academia Vasca, ou dez veces menos có da Catalá. Co obxectivo de contribuír ao funcionamento da entidade galega, a Deputación de Lugo vén de asinar un convenio de colaboración coa RAG, con vixencia dun ano e dirixido a contribuír ao funcionamento da institución, tanto no plano off-line como no dixital.
Segundo fixo saber no acto de sinatura o presidente da Academia Galega, Víctor Freixanes, “existe unha forte demanda social nestes intres ao redor da lingua”, e proba diso é o elevado número de consultas diarias de palabras na Rede. “Os datos falan por si sós, e iso hai que sostelo con profesionais con soporte técnico, e despois está tamén o traballo dos académicos que participan de maneira desinteresada; polo tanto este convenio para nós é moi importante”, apuntou o presidente da RAG.
No acto de sinatura tamén participou a académica e escritora Marilar Aleixandre e o deputado de Relacións Institucionais, Álvaro Santos Ramos, quen sinalou que o apoio da entidade provincial lucense diríxese en termos xenéricos a “apoiar o labor da institución a prol do fomento da cultura galega e a promoción e estudo do idioma galego”. A achega anual da Deputación á RAG será de 9.000 euros.
O deputado apuntou que a Deputación non pode ficar á marxe ante “o lamentábel retroceso que a lingua galega está tendo na nosa sociedade, nos ámbitos urbanos e incluso nas xeracións máis novas, cada día se fala menos galego e iso non é unha situación só para avaliar é unha situación sobre a que temos que actuar, porque cando estimamos máis a nosa lingua estimámonos máis a nós mesmos”.
Pola súa parte Freixanes quixo agradecer “en nome da Real Academia Galega a sensibilidade da Deputación de Lugo no apoio ás iniciativas da institución e no apoio ao funcionamento da propia Academia”. Así mesmo, salientou que “o galego é intercomprensíbel oralmente e por escrito co portugués, por iso os galegofalantes teñen un acceso moi doado a 250 millóns de persoas que se expresan en portugués, a sexta lingua máis falada no mundo”.

Categorías: Ciencia

Google quere potenciar o seu sistema de pagamentos en liña

Lun, 10/23/2017 - 16:00

Aínda que durante moitos anos os pagamentos a través da Rede parecían un territorio dominado por PayPal e as tarxetas bancarias, non faltaron os intentos de grandes compañías para entrar nese negocio para facilitar os pagamentos e fomentar o comercio electrónico, e agora quen reforza a súa actividade neste eido, e agora dan conta das posibilidades de Pay with Google, servizo que busca que o usuario non teña que enredar con complicados formularios de pagamento ao mercar produtos a través do teléfono e a tableta, aproveitando os datos de pagamento que o usuario tivera introducido en Google Play, YouTube, Chrome ou Android Pay.
Esta funcionalidade está a funcionar tanto en aplicacións móbiles de compañías de distintos países como nas súas páxinas web, e dende Google lembran que os desenvolvedores só teñen que incluír unhas poucas liñas de código para facer compatibles as páxinas web e as aplicacións con Pay with Google, servizo que non cobrará taxas por transacción.
Google quere promover o uso do seu sistema de pagamentos para compras de produtos, restaurantes e incluso aparcadoiros, facendo que pagar en mobilidade sexa cada vez máis doado e rápido, deixando claro que o principal interesa da súa plataforma é derrubar barreiras.

Categorías: Ciencia

O prazo para participarnos no curso de animación en 3D de Allariz, aberto até novembro

Lun, 10/23/2017 - 14:52

O Concello de Allariz está a organizar un obradoiro que nos sitúa de face ás novas tecnoloxías ao servizo do audiovisual, máis polo miúdo co eido da animación en 3D. O Curso de introdución ao desenvolvemento de películas de debuxos animados vaise desenvolver até xullo do ano vindeiro, establecéndose os contidos en dous bloques: un de contidos prácticos e outro de teóricos. O Concello vén de anunciar que quere acadar a máxima participación nesta actividade, de aí que abrise até novembro un novo prazo para formalizarnos nela a nosa inscrición.
O obradoiro está dirixido a aquelas persoas que desexen introducirse no mundo da animación xerada por computador. “Os seus contidos”, sinala o Concello, “darannos una visión de conxunto do software en 3D e da produción de debuxos Animados, amais dun coñecemento en profundidade das ferramentas de traballo e o ámbito no que se desenvolven cinematograficamente”.
O Goberno local tamén informou de que o obradoiro, que se vai desenvolver na Casa da Mocidade, inclúe unha clase semanal de tres horas e media de duración, a sexta feira (venres) pola tarde, e o sábado pola mañá. A formación compleméntase cunha clase por video-conferencia semanal durante a cal resolveranse dúbidas sobre exercicios prácticos e farase un seguimento dos proxectos persoais que alumnos e alumnas estean a desenvolver durante o curso.
O primeiro dos bloques abordará cuestións como a interface, o modelado (técnicas, mallas e curvas, modelado de textos), cámaras e iluminación, texturas e materiais, modelado de personaxes, animación (claves e liña de tempo, editores, animación de obxectos, de personaxes e de FX) e composición.
O bloque teórico introducirá aos participantes en procesos de produción, pre-produción (linguaxe cinematográfica, ideas para o guión, storyboard), creación de personaxes (anatomía, estereotipos, poses e siluetas, liñas de acción), teoría da animación (técnicas, os principios da animación, as leis físicas aplicadas, tempo e ritmo, animación facial, locomoción) e elaboración de proxectos de animación (mercados e festivas, axudas á produción).
As persoas que estean interesadas en asistir ao obradoiro deberán chamar ao 615 395 871 ou ben enviar un correo electrónico a animacion3d@allariz.com.

Categorías: Ciencia

Os usuarios das redes elixirán a mellor achega emprendedora TIC de Ferrolterra

Lun, 10/23/2017 - 13:18

O venres pasado, AJE Ferrolterra presentou no consistorio local a quinta edición do seus Premios Ferrolterra Emprende, unha iniciativa que conta coa colaboración do Concello, a Deputación da Coruña, IESIDE (Escola de Negocios AFundación) e o IGAPE, e que se encamiña a recoñecer o pulo emprendedor e innovador das firmas con sede de operacións nas comarcas de Ferrol, Eume e Ortegal. O certame, cuxo prazo para a presentación de candidaturas estará aberto a partir deste 23 de outubro, inclúe dúas categorías e catro accésit. As primeiras son Premio Empresaria/o Nova/o (3.200 euros en formación a cargo de IESIDE, para empresarias/os que leven constituídas/os máis de tres anos) e Premio Emprendedora/or Nova/o (1.000 euros de contía, abranguendo participantes con 3 anos ou menos de actividade e cunha facturación inferior a 1 millón de euros). Os accésit son á creación de emprego, á RSE e conciliación laboral, á innovación e, por último, ás novas tecnoloxías.
Os tres primeiros inclúen, a xeito de premio, formación do IESIDE. O accésit TIC, pola súa parte, vén co seguinte recoñecemento: un ano de publicidade de balde en Ferrol. Esta distinción específica ás iniciativas emprendedoras do ámbito das novas tecnoloxías será elixido polo público nun concurso que se convocará a partir de que se abra o prazo de presentar as candidaturas nas redes sociais.
O xurado que emitirá o fallo das restantes modalidades estará composto por diversas personalidades do mundo empresarial, financeiro e institucional. O prazo para a entrega da documentación será ata o día 17 de novembro do 2017, na sede da asociación ou por correo electrónico a info@ajeferrolterra.org. O acto de entrega de recoñecementos será nunha gala prevista para o venres 24 de novembro ás 19:30 h na Fundación Exponav sita en Cantón de Molíns de Ferrol.

Categorías: Ciencia

Páxinas