códigocero

Subscribirse a Orixe códigocero
Información sobre novas tecnoloxías en Galicia e en galego.
Actualizado: fai 6 horas 46 min

Descobren un gravísimo fallo de seguridade nos Mac

Mar, 11/28/2017 - 22:30

O desenvolvedor Lemi Orhan Ergin desvelou hoxe a través de Twitter un gravísimo fallo de seguridade de macOS High Sierra, o sistema operativo actual dos ordenadores de Apple, que permite que calquera poida identificarse ante un Mac con só introducir o nome de usuario root e un contrasinal baleiro, operación que falla ao primeiro intento, pero funciona ao segundo, permitindo o ingreso no equipo como superusuario, de xeito que sería o meirande fallo de seguridade dun equipo informático de Apple do que temos memoria.
Distintos usuarios comprobaron con éxito a presenza de tal vulnerabilidade en macOS 10.13.1, chegando dende Apple a recoñecer que están a traballar en solucionar o problema, e dando conta que mentres non se atopa unha solución definitiva recomendan activar o usuario root nos equipos e pórlle un contrasinal que non estea en branco.
Normalmente os fallos de seguridade notifícanse de xeito privado, para dar tempo a corrixilos, pero ao facerse publicamente desta volta supón unha seria ameaza de seguridade para todos os usuarios de Mac, que deberían proceder rapidamente a tomar medidas para evitar que calquera poida acceder e manipular sen autorización o seu equipo.

Categorías: Ciencia

Lance Weiler amosa en Santiago o día a día dun artista transmedia

Mar, 11/28/2017 - 22:15

Lance Weiler, artista transmedia, estará este mércores en Santiago para falar de como tirar partido do noso pulo creador para, combinado con tecnoloxías e contidos literarios contemporáneos, dar forma a “experiencias creativas colectivas”. Lance Weiler, referente nestes novos formatos e feituras de creación que non se deixan catalogar polas clasificacións tradicionais (no universo transmedia cada cousa que se fai ten o seu correlativo na Rede, e viceversa, e nada se concibe por e para unha única linguaxe e sen a participación dun público que tamén é co-autor) falará no Centro de Estudos Avanzados da USC ao abeiro do foro Memoria, identidade, mundo: o desafío das humanidades. O relator é director do Digital Storytelling Lab da Universidade de Columbia e figura internacional no eido da narrativa transmedia.
A intervención de Weiller, prevista para as 19.30 horas, poderase seguir en directo a través do servizo de TV da USC.
Segundo informa a Universidade de Santiago, o relator é unha das principais referencias no ámbito do cinema dixital e da innovación en formas do relato con mediacións tecnolóxicas ligadas a Internet e a procedementos dixitais e colaborativos. Ao longo da súa carreira no mundo do cinema colaborou con directores de fotografía como Conrad Hall, Darius Khondji e Harris Savides.
Ademais, participou en proxectos de carácter transmedial, con recurso á Intelixencia Artificial, a formas de realidade virtual ou aumentada e á Internet das Cousas (Internet of Things) con directores da proxección de David Cronenberg, Gore Verbinski, Marshall Herskovitz e Ed Zwicker.
Tamén ten traballado como consultor e asesor para festivais e entidades como Sundance Institute, o Tribeca Film Institute, PBS, Power to the Pixel, Screen Australia, o Festival de Cinema de Berlín, o National Film Board de Canada e o National Endowment for the Humanities de Estados Unidos.
Entre os seus últimos proxectos cómpre salientar Sherlock Holmes & the Internet of Things e Frankenstein AI: a monster made of many.

Categorías: Ciencia

Vodafone achega de balde o seu servizo Pass durante este Nadal

Mar, 11/28/2017 - 22:00

Achégase o Nadal e a súa pegada déixase notar non só nas luces das rúas das nosas vilas e na proliferación de catálogos de xoguetes por todos os recantos e caixas de correos, senón tamén nas cousas que as operadoras preparan para celebrar as festas cos clientes. Entre as “cousas” que prepara Vodafone hai ofertas e lanzamentos variados, pero tamén un agasallo temporal concreto. Segundo informa a operadora, regalará un dos catro Vodafone Pass aos seus clientes de contrato de carteira, e tamén aos novos membros da “comunidade Vodafone”. A data límite do presente é o 14 de febreiro. Para quen non o saiba, o servizo Vodafone Pass permite aos usuarios empregar a tempo completo as súas aplicacións de vídeo, redes sociais, música ou mapas.
Os clientes poden activar a oferta entre o 4 de decembro e o 7 de xaneiro a través da app A miña Vodafone, chamando ao 1444 ou nas tendas Vodafone. Transcorrido o período de promoción, quen non desexe seguir gozando do Pass poderá cancelalo a través das canles devanditas. Doutra banda, Vodafone Pass incorpora desde o 1 de decembro dez novas aplicacións nas categorías de Vídeo e Maps.

Categorías: Ciencia

O Campus de Ferrol mostra as cousas que poden facer as tecnoloxías a prol da moda

Mar, 11/28/2017 - 21:30

Este mércores celébrase un evento destinado a pór de relevo, achegando exemplos concretos, a importancia e o potencial das ferramentas innovadoras para optimizar o rendemento, a creatividade e o radio de alcance do noso sector téxtil. Trátase do Simposio Internacional en tecnoloxías industriais da moda, que se inaugura ao fío das 9.15 horas da man do reitor da Universidade, Julio Abalde, no salón de actos do Campus de Ferrol.
Segundo fai saber a organización (o propio Campus), o simposio ten como obxectivo “dar a coñecer o potencial tecnolóxico do Campus á industria da moda e detectar as tendencias e necesidades do sector”. Co evento tamén se quere buscar a mellor sintonía posíbel entre os requirimentos do sector e a UDC (con vistas ao novo grao en Xestión Industrial da Moda que se implantará o vindeiro curso en Ferrol).
O programa inclúe unha conferencia sobre a implantación do sistema RFID na industria téxtil. Como lembraremos, o sistema RFID (identificación por radiofrecuencia, polas súas siglas en inglés Radio Frecuency Identification) é unha tecnoloxía de almacenamento e recuperación de información que emprega dispositivos como etiquetas, tarxetas ou transpondedores RFID. A través destes elementos transmítese a identidade dun obxecto mediante ondas de radio, abríndose un amplo espectro de posibilidades para o ámbito da rastrexabilidade (trazabilidade) de produtos.
Ademais, o evento dará acubillo a tres mesas de debate:
· 11:00 horas. Modelos innovadores de transferencia de tecnoloxías desde as universidades e centros tecnolóxicos ao sector da moda.
· 13:00 horas. Visión compartida da enxeñaría aplicada á industria da moda. Necesidades do sector e capacidades da universidade.
· 16:00 horas. Emprendemento galego na industria da moda.
O simposio conta coa participación de investigadores da UDC, deseñadores e representantes do Cluster Téxtil Moda así como de empresas do mesmo.

Categorías: Ciencia

Vodafone lanza unha oferta de paquetes para as familias

Mar, 11/28/2017 - 16:49

Vodafone España presentou hoxe a súa nova proposta especialmente dirixida a facilitar as comunicacións e o lecer dixital nos fogares onde hai rapazada. Trátase de Vodafone One Familia, unha proposta acaida, en palabras da operadora, “para aquelas familias que o queren todo en entretemento e en comunicacións e non queren preocuparse por nada”. A nova oferta inclúe paquetes pechados con todos os servizos de comunicacións fixas e en mobilidade (voz, datos compartidos, fibra e liñas móbiles adicionais “cos mesmos beneficios cá liña principal) e contidos de lecer (coas “mellores series e o catálogo de HBO España, fútbol, cinema actual e contido infantil”).
Vodafone One Familia estará dispoñíbel desde o 16 de decembro e consta de catro tipos de paquetes distintos, que permiten ao cliente elixir a velocidade da fibra (50Mb, 300Mb e 1Gbps), a tarifa móbil (con 200 minutos ou chamadas ilimitadas, e 6 GB ou 10 GB) e os contidos de TV. Ademais, as tarifas móbiles incluirán o servizo Chat Pass, que permite usar as aplicacións de mensaxería sen gastar datos e itinerancia na Unión Europea e en Estados Unidos. Ademais, os usuarios poderán gozar da TV en calquera dispositivo (TV, PC, tabletas ou móbiles). A operadora tamén lembra que os clientes que contraten calquera paquete de Vodafone One Familia até o 7 de xaneiro de 2018 beneficiaranse dun desconto do 20%.
Con esta nova proposta, a compañía recorda que completou a súa oferta converxente para todos os perfís de clientes. Podemos ver máis información sobre esta liña de actividade na web específica de Vodafone One Familia.

Categorías: Ciencia

Handytronic desenvolve unha cadeira de rodas smart guiada por ondas cerebrais

Mar, 11/28/2017 - 16:48

O grupo galego Telecon, do que falamos recentemente en Código Cero para dar conta do seu acordo coa Universidade da Coruña arredor da marca Handytronic (centrada no desenvolvemento e distribución dun amplo e innovador catálogo de solucións de mobilidade para persoas dependentes ou con diversidades funcionais), vén de achegar unha importante novidade tecnolóxica ao abeiro desta marca de seu. Trátase dunha cadeira de rodas intelixentes guiada por ondas cerebrais.
Segundo lembran dende Telecon, “empregar tecnoloxías que marquen un antes e un despois para mellorar a calidade de vida das persoas con diversidades funcionais e promover o diagnóstico precoz da deterioración cognitiva é a razón de ser de Handytronic”. Agora, respecto da dita cadeira de rodas, o seguinte paso é obter unha solución comercial economicamente alcanzábel para os usuarios potenciais.
O alicerce do proxecto é unha conxunción entre as máis avanzadas Tecnoloxías da Información e a Comunicación (TIC), os últimos avances en Neurociencia e máis os recentes achados en materia de Intelixencia Artificial. O resultado dos traballos de Telecon-Handytronic é unha plataforma de encefalografía que é quen de captar os impulsos eléctricos do cerebro, interpretalos e transformalos en ordes. Estes impulsos, grazas a un software específico, actúan directamente sobre o sistema de guiado da cadeira de rodas.
Segundo informa Laura Montes, programadora xefa do proxecto, “a interface cerebro-computadora na que estamos a traballar permitiranos non só completar o desenvolvemento da cadeira de rodas, senón tamén, a medio prazo, acometer proxectos para a detección temperá da deterioración cognitiva”. Pola súa banda, Jacobo Penide, director xeral da firma, engade que “a vocación e o compromiso de Handytronic é facer a vida máis doada a aquelas persoas que teñen algún tipo de diversidade funcional”. Segundo fai saber, “a neurociencia e a intelixencia artificial proporciónannos as bases tecnolóxicas necesarias para desenvolver solucións non só efectivas, sen tamén sustentábeis desde un punto de vista económico”.
Respecto do prototipo no que traballa a día hoxe Handytronic, está integrado por unha cadeira de rodas motorizada, un casco con 14 electrodos, unha tableta cun software específico e máis un hardware de integración. Segundo explican Montes e Penide, a conexión entre o casco e o computador é unha conexión sen fíos, a través do protocolo Bluetooth.
A medio prazo, e de face ao fornecemento dunha solución comercial, está prevista a substitución do casco por unha diadema ou parche, que, segundo engaden dende Handytronic, “resultará máis cómodo para o usuario”.
Os responsábeis da marca tamén fan saber, respecto da entrada en xogo da intelixencia artificial, que a inclusión desta na interface cerebro-computadora permite que “o software aprenda das rutinas mentais do usuario, adaptándose a el e reducindo así o tempo de adestramento necesario para o manexo da cadeira, posibilitando ao mesmo tempo que o sistema recoñeza diferentes usuarios, afacéndose a cada un deles”.
Para quen queira ver o funcionamento do dispositivo, Handytronic ten un vídeo específico en Vimeo.

Categorías: Ciencia

As enxeñarías en Informática, as titulacións máis demandadas polas empresas

Mar, 11/28/2017 - 12:48

Que o paro non afecta a todos os estudos por igual é algo que xa sabíamos, e tamén é coñecida a importancia crecente, de cara ao mercado laboral, que teñen as carreiras ligadas ás novas tecnoloxías, principalmente por ser estas o ingrediente básico de toda acción empresarial modernizadora, e tamén da nova revolución industrial na que estamos mergullados (a 4.0). Porén, non deixa de ser salientábel que as enxeñerías en Informáticas corran a velocidade de foguete, mentres outras titulacións fano simplemente a bo ritmo. Segundo os datos do informe Infoempleo de Adecco (dispoñíbel en formato PDF), correspondente a 2016, as enxeñarías TIC lideran hoxe a demanda de emprego das empresas en España.
Os perfís máis valorados son os que xuntan ampla marxe de adaptación, bo nivel de linguas, dispoñibilidade xeográfica, experiencia en contornas multiculturais e emprego intensivo de novas tecnoloxías.
A investigación, que avalía en detalle as ligazóns entre a formación académica e o mercado laboral, revela que os titulados universitarios seguen sendo os candidatos máis demandados polas empresas nas súas ofertas de emprego. As carreiras técnicas máis demandadas polas empresas durante 2016 foron as enxeñerías en Informática (6%), Enxeñería Industrial (5,45%), Enxeñería de Telecomunicacións (2,6%), Enxeñería en Electrónica Industrial e Automática (2%) e Enxeñería Mecánica (1,6%). O informe sinala tamén que a informática continúa liderando a demanda de emprego no macrosector TIC, cun 5,5% da oferta estatal.
Segundo reflicte o Colexio Profesional de Enxeñaría Técnica en Informática (CPETIG), o informe revela que durante 2016 o requisito de experiencia profesional aumentou a súa presenza na oferta de emprego en máis de catro puntos, chegando ao 79,55% neste último ano. Polo que atinxe a previsións, a entidade profesional que preside Marcos Mata tamén achega, en base ao dito estudo, o seguinte prognóstico: o ano vindeiro, o 43% das organizacións contratarán máis empregados, “un horizonte no que de novo aparece a informática como un dos perfís profesionais que serán máis demandados polas empresas”.

Categorías: Ciencia

Amazon instala un dos seus armarios de recollida de paquetes na Coruña

Mar, 11/28/2017 - 11:45
Os Locker de Amazon teñen nome. O localizado en Marineda City chámase Ana.

Para os usuarios que non estean habitualmente no seu domicilio Amazon ofrece distintos puntos de recollida repartidos por toda a xeografía española, aos que agora súmanse os Amazon Lockers, unha serie de armarios repartidos por máis de 120 puntos de España dos que polo momento só hai un en Galicia, concretamente no centro comercial Marineda City da Coruña.
Estas taquillas automatizadas están repartidas principalmente en estacións de servizo Repsol, restaurantes de Telepizza, supermercados Dia, rochos OhMyBox e centros comerciais, ou sexa, lugares principalmente de paso non que resulte cómodo pasarse de camiño ao fogar para recoller un paquete.
Para facer uso de Amazon Locker chega con que, ao realizar un pedido en Amazon.es, elixamos un enderezo de recepción alternativo, aparecendo alí como opción o Locker que teñamos máis próximo, para despois recibir unha notificación por correo electrónico cun código único, a localización do Locker e o seu horario, de xeito que nos tres días seguintes poderemos achegarnos alí, introducir o código manualmente (ou escanear o código de barras correspondente) e así poder acceder ao caixón no que se garda o paquete dirixido a nos. Temos así un método de recepción de paquetes que non só é cómodo, senón tamén seguro.

Infografía na que se explica o funcionamento de Amazon Locker
Categorías: Ciencia

O CiTIUS celebra este sábado unha xornada de portas abertas

Mar, 11/28/2017 - 10:04

O CiTIUS, Centro Singular de Investigación en Tecnoloxías da Información, vai estar aberto ao público en xeral o vindeiro 2 de decembro. Esta xornada de portas abertas, que terá formato de xornada de divulgación tecnolóxica (facendo fincapé nas liñas de traballo do centro e algúns dos seus principais achados recentes), será compartida polos outros dous centros singulares da USC, o CiQUS, centrado na química biolóxica e máis os materiais moleculares, e mailo CiMUS, cuxo eido de acción son a medicina molecular e máis as doenzas crónicas. Segundo informa a Universidade, esta cita coa excelencia científica e tecnolóxica permitirá aos visitantes “comprobar de primeira man o valor engadido que poñen estes tres centros na sociedade”, traballando para mellorar a nosa calidade de vida dende múltiples frontes e abranguendo non só a contorna galega, senón o ámbito global.
Entre as actividades programadas ao longo do día figuran demostracións con drons, robots, e lentes 3D; obradoiros de experimentos en química e biomedicina; circuítos de xeración de enerxía, teatros científicos ou charlas divulgativas ofrecidas por investigadores referentes como Angel Carracedo, María José Alonso ou Senén Barro. Asemade, tamén se fará fincapé no alcance e no potencial de tecnoloxías concretas desenvolvidas no marco de traballo dos centros.
Estas tecnoloxías, no caso do CiTIUS, teñen feitura de recursos dirixidos a facernos a vida máis doada e para resolver, tamén, algúns dos principais desafíos científicos mundiais que fan posíbel o noso desenvolvemento. No caso do CiQUS, os seus achados céntranse na saúde ou a industria (materiais funcionais, catálise). Polo que atinxe ao CiMUS, céntrase na prevención, comprensión e tratamento das enfermidades crónicas en áreas como cancro, endocrinoloxía e nutrición, trastorno cardiovascular, neurociencias, xenética ou xenómica Funcional, entre outras.
A participación nesta xornada require inscrición previa (completamente de balde) a través do formulario web disposto pola organización. O programa está deseñado para facilitar a visita ós tres centros (en quenda de mañá ou de tarde) a través do itinerario completo. Segundo engade a USC, as persoas que non dispoñan do tempo para facer o percorrido recomendado poden participar tamén mediante inscrición na franxa horaria desexada, ata completar aforo, co itinerario personalizado.

Categorías: Ciencia

Amazon busca repartidores autónomos en España

Lun, 11/27/2017 - 21:44

A última semana foi un claro exemplo de como o comercio electrónico está a ter serios problemas loxísticos ante o incremento de pedidos que están a experimentarse, facendo que, por exemplo, moitos dos pedidos realizados a través de Amazon.es o pasado xoves con envío en 24 horas non vaian chegar ás mans dos seus compradores até mañá, de aí que non sorprende que se animen a probar solucións de loxística innovadoras como Amazon Flex, un servizo de paquetería no que a popular tenda en liña permite a traballadores autónomos realizar entregas a domicilio con seu propio vehículo, permitíndolles definir o seu propio horario e podendo conseguir así uns ingresos de até 28 euros por cada 2 horas de traballo.
Esta solución de envío de paquetes funciona a través dunha aplicación móbil, na que permite que os mensaxeiros definan os seus horarios en función da súa dispoñibilidade, podendo empregarse o móbil tamén para escanear os paquetes e levalos, así como para localizar os enderezos de entrega e comprobar os ingresos.
Temos así un novo xeito para que Amazon atenda mellor aos seus clientes, á vez que crea oportunidades aos traballadores dun sector cada vez máis dinámico. Amazon Flex xa leva tempo operando en EE.UU. e Reino Unido, e agora chega a España nun momento pouco oportuno, xa que en diversos medios están dando conta da precariedade laboral dos repartidores de Amazon en España, que nalgúns casos cobrarían entre 5,38 e 6,30 euros/hora.
Polo momento descoñécense os detalles de espallamento territorial deste novo servizo de Amazon, pero parece que inicialmente só vai estar dispoñible en grandes cidades españolas, onde a entrega a domicilio resulta máis complicada de atender.

Categorías: Ciencia

Movistar comezará 2018 con subas de prezo

Lun, 11/27/2017 - 19:00

Unha vez máis semella que as compañías volverán aproveitar o Aninovo para subir as tarifas, e como adianto sabemos xa que Movistar incrementará en 2 euros/mes as súas tarifas que inclúe só fibra óptica, á vez que tamén aumentan o seu prezo os servizos de contestador automático e chamada a tres.
O vindeiro 5 de xaneiro os paquetes Movistar Fibra Óptica de 50 e 300 Mbps subirán o seu prezo 2 euros ao mes, ou sexa que non afectaría aos paquetes Movistar Fusión, quedando a tarifa normal de 50 Mbps en 57,40 euros/mes (62,40 euros de contar con velocidade simétrica) e a de 300 Mbps custaría 62,40 euros/mes (67,40 euros con simetría). Máis importante é a suba de prezo da Línea Tarifa Plana de Telefónica (que só ofrece liña fixa sen acceso á Rede) que pasa de 35,21 a 40 euros/mes.
As chamadas par recuperar mensaxes do contestador automático tamén pasarán de custar 12,1 a 18,15 céntimos, o desvío de chamadas pasará de 1 a 3 euros/mes, a chamada a través pasa de 3,6 a 5 euros/mes e o servizo integral de mantemento sube 2 euros mensuais (quedando en 8 euros).

Categorías: Ciencia

Cangas estreou portal cidadán e portal turístico

Lun, 11/27/2017 - 17:00

O Concello de Cangas estreou este mes dúas grandes novidades tecnolóxicas. Por unha banda, o seu novo portal cidadán, dispoñíbel no dominio cangas.gal, dende o que fai gala dunha remodelación completa con respecto ao anterior sitio dixital (aplicando novos estándares de usabilidade e transparencia e fornecendo á cidadanía a máxima utilidade en materia de consultas, xestión ou actualidade). Pola outra, o portal turístico de Cangas, unha web deseñada para salientar e visualizar polo miúdo os principais atractivos turísticos do Concello.
Segundo nos conta a empresa Abertal, encargada de levar a cabo as iniciativas, o portal turístico é froito “dun gran labor de recompilación de contidos para ofrecer información detallada de cada punto de interese, xunto coa súa localización”. Ademais, ofrece unha completa guía de aloxamentos, restaurantes e outros servizos que poden ser de utilidade para os turistas que se acheguen ao concello pontevedrés.
O portal turístico, que fai gala dun deseño visual onde prima a información clarificada e sinxela, fornécese en tres idiomas, galego, castelán e inglés. Descubre Cangas, Que facer, Lugares con encanto e Actividades son as pestanas principais do sitio.
Volvendo ao portal cidadán, salienta polo deseño práctico e accesíbel, con todos os elementos artellados para que a veciñanza poida consultar doadamente toda a información ou os datos de contacto sobre as diferentes áreas que forman parte da Administración local, sobre as xestións municipais, sobre as novas, eventos ou avisos; entre outros recursos e servizos. Unha das principais novidades é a Liña directa co Concello, unha ferramenta que permite aos cidadáns escribir e dirixir suxestións directamente a calquera departamento do Consistorio.

Categorías: Ciencia

Un reloxo intelixente para axudar ás persoas dependentes e os seus familiares, premiado pola USC

Lun, 11/27/2017 - 16:11

A semana pasada a Universidade de Santiago entregou os galardóns da sexta edición do seu Concurso de Proxectos Empresariais Innovadores, unha convocatoria dirixida novamente a impulsar a creación de empresas con servizos e ferramentas que acheguen puntos de inflexión na evolución do noso tecido investigador e produtivo, postas en marcha por universitarias e universitarios dos campus composteláns. Entre os proxectos premiados atopábase unha iniciativa para axudar con novas tecnoloxías ás persoas que sofren alzhéimer. Trátase de E-Wear Tecnologies, impulsada polos investigadores-emprendedores Ángel Rodríguez Cerdeira, Carlos García Campos e María Luz Mosteiro del Pilar.
A proposta, distinguida como mellor Proxecto Empresarial Start-Up, ten a súa orixe na situación persoal dun dos seus co-fundadores, con persoas enfermas da dita doenza no seu fogar. O punto de partida foi o seguinte: como usar as novas tecnoloxías para axudar no día a día destes familiares e do resto das persoas que teñen a mesma doenza, e todo buscando a meirandes comodidade e efectividade?
Segundo fixeron saber os seus creadores, E-Wear Technologies pretende proporcionar seguridade e independencia a persoas maiores dependentes. A iniciativa foi recoñecida co premio ao mellor proxecto empresarial Start-Up e unha premio metálico de 2.000 euros. O proxecto aspira a levar ao mercado un reloxo asistente para persoas maiores, que envía alarmas de cando teñen que tomar a medicación e permite avisar á familia ou servizos de emerxencias en caso de necesidade.
O reloxo ten unha tarxeta SIM que o capacita para facer e recibir chamadas e enviar mensaxes de aviso. Á súa vez, a familia ten unha aplicación móbil que permite facer seguimento do usuario do reloxo, sabendo en todo intre se toma a medicación ou se sufriu algunha caída. Son os seus promotores Ángel Rodríguez Cerdeira, Carlos García Campos e María Luz Mosteiro del Pilar.
Empresa EBT
Dotado con 2.000 euros, o premio destinado a empresas coa cualificación de Empresa de Base Tecnolóxica (EBT) da USC recaeu en HGBeyond Materials Science, spin-off que centra a súa actividade na ciencia de materiais, especializada en tecnoloxía de hidroxeles. Constituíuse en xuño de 2015 como Lentimed Medical Devices, nome que mudou en 2017 ao medrar a súa proxección internacional e o seu ámbito de actividade. Na actualidade HGBeyond deseña e desenvolve novos materiais para lentes de contacto de alto valor engadido, que sirvan como correctores de visión máis confortábeis e como plataformas de cesión sostida de sustancias activas. O seu obxectivo principal será a explotación das primeiras lentes medicadas do mundo.
A actividade empresarial desta spin-off aséntase sobre unha das liñas de investigación do Grupo I+D Farma da USC, que ten unha importante actividade científica, sendo un referente no seu campo de traballo. Esta é unha sociedade que promoven Carmen Álvarez Lorenzo, Ángel Concheiro Nine e Paloma Cabello Esteban.
Proxectos EBT
Na categoría de proxectos EBT outorgaranse idénticos premios de 2.000 euros a Biorecovery e Pharmatox-Lab. No primeiro caso o proxecto propón unha empresa enfocada á reciclaxe e valorización de subprodutos das industrias agroalimentarias. A curto prazo o seu obxectivo é a transformación de sangue dos matadoiros, que constitúe un residuo perigoso, en fariña de sangue, un composto inocuo con aplicación na elaboración de fertilizantes para agricultura, tanto convencional como ecolóxica. Promoven este proxecto Abraham Rivera Peña, Hiram Varela Rodríguez, José Manuel Magide Ameijide, Adrián Rodríguez Chantres e Juan José Redondo Floriano.
No caso de Pharmatox-Lab, o proxecto baséase na oferta de análises toxicolóxicas específicas non cubertas actualmente polos laboratorios existentes no mercado. Estas análises inclúen a determinación de drogas e fármacos nas mostras biolóxicas clásicas como son sangue ou ouriños, pero tamén en mostras alternativas, que proporcionan solucións a problemas non resoltos coa análise das mostras clásicas. Os seus promotores son Ana de Castro Ríos, Salvador Blanco Turnes, Elena Lendoiro Belío, Angelines Cruz Landeira e Manuel López-Rivadulla.
Muller Emprendedora
AYeconomics Research Centre, premio na modalidade Muller Emprendedora dotado con 2.000 euros, é unha spin-off especializada en investigación de calidade e recomendación de políticas derivadas da mesma en temas socioeconómicos. Conta con metodoloxías innovadoras que permiten facer análises de impacto con escaseza de información (PATH-RAS) e análises espaciais (EVAL-SET). O equipo de promotoras confórmano Aizhan Samambayeva, Yolanda Pena Boquete, Melchor Fernández Fernández e Manuel Fernández Grela.
Promoción da lingua galega
A proposta gañadora, cunha dotación de 1.000 euros, é Coeduca, en palabras da USC “a primeira entidade especializada en coeducación de España” que implanta plans de igualdade con metodos finlandeses para centros escolares, administracións públicas e entidades que queiran promover unha sociedade máis igualitaria entre mulleres e homes. O proxecto social nace “coa intención de previr a violencia de xénero dende a educación en igualdade e co obxectivo de implantar a primeira rede de centros co educativos de Galicia e a primeira de España da formación profesional”. Esta é unha proposta de María del Pilar, Cecilia e Sandra Porral Iglesias.
Os proxectos gañadores terán acceso de balde á incubadora do edificio Emprendia durante seis meses, contados a partir da data de constitución da empresa. Ademais, a Área de Valorización, Transferencia e Emprendemento da USC (AVTE) facilitará aos distintos proxectos e empresas gañadoras reunións de contacto coas entidades inversoras Unirisco e Xesgalicia. No caso das empresas gañadoras poderán participar nos fondos de inversión organizados por IGAPE e Xesgalicia.

Categorías: Ciencia

O COETG-AETG mostrou a súa andaina perante o alumnado de Enxeñaría de Telecomunicación

Lun, 11/27/2017 - 16:11

O venres día 24 de novembro celebrouse na Escola de Enxeñería de Telecomunicación da Universidade de Vigo unha conferencia impartida polo secretario do COETG e da AETG (Colexio e Asociación de Enxeñeiros de Telecomunicación de Galicia), Ricardo Fernández, dirixida aos alumnos do Máster en Enxeñería de Telecomunicación da EET da Universidade de Vigo. Fernández, na súa intervención, fixo un percorrido pola historia das telecomunicacións e a profesión do enxeñeiro de telecomunicación. Ademais, achegou unha charla expositiva sobre o Colexio Oficial de Enxeñeiros de Telecomunicación e da Asociación, explicando as función de ambas entidades e os servizos que ofrecen tanto aos profesionais como aos estudantes, incidindo especialmente na traxectoria de ambas entidades das que este ano se conmemora o 50 e 25 aniversario respectivamente.
Ademais, o representante do COETG/AETG explicou aos alumnos as diferentes vertentes da profesión da enxeñería de telecomunicación e a súa transversalidade. Esta actuación enmarcase na liña de colaboración que o COETG/AETG mantén coa propia Escola de Enxeñaría de Telecomunicación, facendo un achegamento os estudantes para darlles a coñecer tamén a existencia tanto da asociación como do colexio oficial e a importancia e vantaxes de formar parte deles.

Categorías: Ciencia

O MS Office para Android por fin funciona nos Chromebooks

Lun, 11/27/2017 - 14:49

Dende o ano pasado os ordenadores portátiles con Chrome OS comezaron a poder correr aplicacións para Android, funcionalidade que foise estendendo entre distintos modelos de Chromebook, aínda que tras recibila percibían tamén unha curiosa carencia: as aplicacións ofimáticas de Microsoft non estaban dispoñibles. Agora parece que a eiva vén de superarse, e finalmente parece que o Microsoft Office xa corre sen problemas nos Chromebooks que teñen acceso a Google Play, tende de aplicacións para Android dende a que xa é posible instalar o Word, o Excel ou o PowerPoint, precisando dunha subscrición a Office 365 se queremos tirar un proveito completo destas aplicacións.
Estamos ante unha magnífica nova para moitos usuarios deste tipo de equipos (de grande éxito no ámbito educativo estadounidense) xa que abre interesantes posibilidades para o uso dos Chromebook en traballos de produtividade pois, aínda que eses equipos estean deseñados pensando nas solucións ofimáticas de Google, nalgúns contornos continúan a estar implantadas as solucións de Microsoft. Tamén é interesante esta opción para usuarios que non se atrevían a adquirir un Chromebook polas súas limitacións de software, e ao saber que poderán empregar ferramentas ofimáticas coas que están familiarizados resultaralles máis doado dar o salto a Chrome OS.

Categorías: Ciencia

R ampliará os datos de varias tarifas móbiles para achegarse ás ofertas da competencia

Lun, 11/27/2017 - 14:23

O operador de telecomunicacións R, pertencente ao grupo Euskaltel, anuncia que o vindeiro 22 de decembro vai mellorar o volume de datos incluído en varias das súas tarifas, sen incremento de prezo, no que parece un axuste da súa oferta fronte á realidade do mercado, xa que non podemos esquecer que o seu servizo móbil chega a través da rede de Orange, a máis empregada polos operadores móbiles virtuais e das peor percibidas por parte dos usuarios en Galicia.
Entre as tarifas que verán aumentados os seus datos móbiles están as tarifas R 5GB e R 10GB, que pasarán a ofrecer 6 e 15 GB de datos; a tarifa 200 + 3 GB pasará a 5 GB; a tarifa plana 200 + 8 GB pasará a ter chamadas ilimitadas e 10 GB de datos; a plana + 5GB dobrará os seus datos; e as tarifas plana + 6 GB e + 10 GB pasarán a ter 15 e 25 GB respectivamente.
Estas ofertas renovadas continuarían a ter uns prezos complicados de encaixar no mercado actual (de non combinarse con outras tarifas) xa que, por exemplo, Amena, o operador de baixo custo de Orange, ofrece chamadas ilimitada e 10 Gb de datos por 19,95 euros/mes e chamadas ilimitadas e 25 GB de datos por 24,95 euros/mes, mentres que para esas condicións R cobraría 25 e 35 euros respectivamente.
Entre os cambios de tarifas de R destaca a aparición dunha nova tarifa móbil que por 45 euros/mes ofrece tarifa plana de chamadas e 50 GB de datos. Para liñas principais tamén lanzarán unha tarifa con 200 minutos en chamadas e 4 GB de datos por 16 euros/mes e outra de 500 minutos en chamadas e 5 GB de datos por 20 euros/mes.
Aparte dos cambios nas tarifas móbiles, R tamén anunciou que as conexións de banda larga fixa de 50 Mbps pasarán a ter 60 Mbps de velocidade a partires do 22 de decembro, de xeito que os clientes só terán que reiniciar o seu router para gozar da nova velocidade de acceso á Rede.

Categorías: Ciencia

MuyComputerPRO entrevista a Antonio Vidal, premio ao mellor científico de datos en España

Lun, 11/27/2017 - 13:26

A web MuyComputerPRO, canle especializada en información tecnolóxica e un dos medios dixitais máis referenciais do ámbito TIC, vén de publicar unha entrevista co enxeñeiro galego Antonio Vidal, científico de datos de SIVSA, co gallo de ter sido galardoado co premio ao Mellor Científico de Datos de España, edición 2017. Na reportaxe, Antonio Vidal fai un percorrido polo proxecto que está na orixe do dito recoñecemento, pola súa experiencia profesional e, tamén, polo que está por vir en materia de tratamento de datos, tanto a nivel de formación como de aplicación e posta en marcha.
Como lembraremos, Vidal é enxeñeiro de Telecomunicación pola Universidade de Vigo. A día de hoxe é responsábel de Ciencia de Datos na empresa SIVSA, da que temos falado en Código Cero para salientar as vantaxes e características pioneiras das plataformas Fenix (para facilitar o día a día de clínicas e centros médicos) e Geenie (para axilizar nos organismos públicos a compra de bens dentro do sistema de Contratación Centralizada do Ministerio de Facenda).
O enxeñeiro distinguido, ademais, está a compatibilizar o traballo en SIVSA coa elaboración da súa tese de doutoramento na Universidade, baixo a dirección do catedrático Javier González Casteño e co obxectivo de dar forma a algoritmos que axuden (de maneira automática) a predicir o prezo de poxa dun servizo na nube, con vistas a minimizar custes na contratación dun servizo. Trátase do proxecto AWS SpotPred, en palabras de Vidal “un sistema que predí os prezos das poxas das máquinas virtuais Amazon EC2 e especialmente deseñado para asegurar que as subastas se gañen ao menor prezo posíbel”, o que posibilitaría a optimización de custes de infraestrutura nas empresas que usan os servizos de Amazon AWS na nube.
Os galardóns
Os premios Data Science Awards Spain 2017, impulsados por Synergic Partners, empresa do grupo Telefónica, distinguen as mellores iniciativas particulares e empresariais e de xornalismo de datos no eido da información a gran escala (Big Data). Para esta segunda edición, resolta recentemente, recibíronse máis de 300 propostas, a distribuír en tres categorías. O xurado elixiu aos gañadores nas categorías de científico de datos, na que triunfou Antonio Vidal; na modalidade de empresas que foi para Ebury e con mención de honra PepsiCo; e o premio ao mellor traballo de xornalismo de datos en España foi para Mar Cabra. Ademais, o xurado decidiu outorgar dúas mencións de honra na categoría de científicos de datos por un lado a Roberto Martín, como Mellor Visualización de Datos e, por outro, a Alejandro Baldominos coa mención á Mellor Solución de Arquitectura Big Data.

Categorías: Ciencia

O Concello de Cabanas crea dúas aulas multimedia no antigo consistorio

Lun, 11/27/2017 - 13:01

O Concello de Cabanas (A Coruña) vén de crear dúas multimedia na antiga casa consistorial. Os novos espazos foron dados a coñecer polo alcalde, Germán Castrillón, quen informou que se trata de dúas estancias equipadas “coas últimas tecnoloxías” que requiriron, para o seu acondicionamento (derrube de tabiques, ampliación de superficie útil, achega de equipamento TIC de alumeado), dunha intervención orzamentada nuns 59.000 euros co-financiados por AGADER e a Consellería de Cultura. Coas dúas aulas multimedia, sinalou o rexedor, potenciarase a actividade do inmóbel, até o de agora sede da Escola Municipal de Música. A intención do Concello é entrar á formar parte da Rede CeMIT de Galicia nos vindeiros meses e iniciar a achega de accións formativas no eido da alfabetización dixital e do emprendemento.
As novas aulas están emprazadas no primeiro andar e, segundo engadiu Castrillón son cen por cen accesíbeis. A primeira sala conta con 13 CPU con monitor LED, impresora láser, proxector de vídeo, equipo de son con altofalantes, pantalla de proxección, cámara motorizada para vídeo-conferencias, mesas de aula e cadeiras. A segunda, concibida como complementaria da primeira, é unha aula multiusos con mesa para reunións, cadeiras, CPU con monitor LED e armario. Por último, o Concello tamén dotou o inmóbel dun sistema de alarma para garantir a súa seguridade.

Categorías: Ciencia

Vilar de Santos optimiza a súa web e implanta servizo de eAdministración

Lun, 11/27/2017 - 12:50

O Concello de Vilar de Santos (Ourense) vén de levar a cabo unha serie de importantes avances en materia de tecnoloxías, transparencia e participación. Estas melloras, que responden ao Plan de Modernización Dixital posto en marcha hai uns meses, abranguen a modernización da web municipal e máis a implantación local da Administración Electrónica. O obxectivo xenérico do Concello é “fomentar a transición do modelo analóxico ao dixital co horizonte de 2018”, incorporando novos servizos e impulsando a xestión interna municipal. A orixe deste Plan está no convencemento de que as TIC e a Internet son “unha ferramenta fundamental para axilizar e dotar de maior eficiencia a relación que mantemos cos novos veciños e veciñas”.
Respecto á modernización e actualización do portal web, abrangueu a adopción dun novo formato, adaptado e adaptábel, cunha maior presenza nos dispositivos móbiles e nas redes sociais cara ao novo dominio, vilardesantos.gal, que xa está operativo. Segundo informou o Concello, grazas ás melloras aplicadas “poderemos compartir directamente os contidos en calquera aplicación social”, gozando, no que ao portal se refire, “dun deseño máis moderno, limpo, contidos máis accesíbeis e con capacidade para adaptarse a calquera dispositivo de navegación”. Ademais, o sitio tamén permite crear novos apartados “dun xeito máis doado de cara a adaptarse con maior axilidade ás necesidades informativas e de comunicación do Concello”.
Os traballos de actualización e optimización, levados a cabo pola empresa Ainet, deixan marxe ampla para a inclusión de novos servizos e funcionalidades e para ficar “en permanente actualización”. Ademais, a estrutura da nova web persegue estruturar os contidos en función do interese de quen a visite.
O novo portal, a maiores, incorporará unha aplicación municipal que arestora atópase en fase de probas e que se prevé estea operativa en xaneiro. Esta ferramenta, en palabras do Goberno local, permitirá non só acceder a contidos de interese, senón tamén comunicar de xeito electrónico ao Concello todo tipo de incidencias e consultas sobre cuestións como avarías de auga, saneamento, alumeado público, camiños, mobiliario urbano, etc.
A outra gran novidade da web, como dixemos, é a incorporación do novo servizo da Administración Electrónica, co que se pretende “dar cumprimento ás esixencias e normativas legais actuais e futuras”. O Concello comunicou que irá introducindo de maneira paulatina este servizo nos seus procedementos. Dentro deste proceso estase abrindo a sede electrónica (vilardesantos.sedelectronica.gal/info.0), que será “o punto de referencia para as xestións administrativas online coa Administración local, de información e de transparencia municipal”. O obxectivo é acadar “unha Administración sen papel, baseada nun funcionamento que non só sirva mellor aos principios de eficacia e eficiencia, de aforrar custos, senón que tamén reforce as garantías dos veciños nas xestións coa administración: simplificando e facilitando os procedementos con transparencia, en calquera momento e desde calquera lugar con acceso a Internet”.
Este proceso iniciouse no mes de agosto para implantar a Administración Electrónica na actividade diaria e os servizos municipais, coa plataforma Gestiona e a necesaria formación e acompañamento do persoal dos diferentes servizos municipais, ademais da adquisición de novos equipos.


Categorías: Ciencia

Actualizado o servizo de tradución Gaio con vocabulario dos eidos xurídico e administrativo

Lun, 11/27/2017 - 10:24

O servizo de tradución Gaio, que ten aplicación móbil de seu para ser descargada de balde en Google Play e App Store, vén de ser obxecto dunha serie de melloras. Segundo fai saber a Xunta, a actualización do portal (tradutorgaio.xunta.gal) incorpora tres vocabularios personalizados diferentes: o xeral, o administrativo con nomenclatura das administracións galegas e nomes propios de lugares e persoas, e o xurídico con terminoloxía propia do campo xudicial e lexislativo. Xunto con estas incorporación, anovouse o deseño e mellorouse e simplificouse o funcionamento do tradutor, que segundo informa a Xunta, agora permite introducir na mesma caixa tanto o texto como a URL da web que se quere traducir.
Gaio, como lembraremos, é portal-aplicación que posibilita a tradución directa e inversa de textos e de webs en galego, castelán, portugués, inglés, francés e catalán. A axencia AMTEGA e a Secretaría Xeral de Política Lingüística puxeron á disposición da cidadanía este servizo hai dous anos, nos que rexistraron máis de 2,6 millóns de visitas e ao abeiro do cal traducíronse 430 millóns de palabras.
Segundo engaden AMTEGA e Política Lingüística, a nova versión de Gaio está adaptada a todos os dispositivos móbiles, permite reverter nun só clic o sentido da tradución e copiar, tamén, nun só clic o texto traducido. Outra das novidades é a tradución inmediata, que se vai xerando mentres o usuario introduce o texto orixinal.

Categorías: Ciencia

Páxinas