códigocero

Subscribirse a Orixe códigocero
Información sobre novas tecnoloxías en Galicia e en galego.
Actualizado: fai 52 min 5 seg

Até 200 escolares participarán en Ferrol na First LEGO Galicia

Ven, 02/09/2018 - 16:25

O sábado 17 de febreiro celébrase no Auditorio de Ferrol a nova edición (a cuarta xa) da competición First LEGO League Galicia. A xuntanza, na que se agarda xuntar máis de 200 escolares de Galicia e Asturias, vén da man do Campus de Ferrol e, máis polo miúdo, do profesor da UDC José Antonio Becerra, coordinador das actividades. Segundo avanza a organización, o evento ten dúas modalidades: o desafío, para nenos e nenas de 10 a 16 anos; e a modalidade junior, para nenos e nenas de 6 a 9 anos. No caso desta categoría, o obxectivo é “espertar nos máis pequenos a curiosidade pola ciencia e a tecnoloxía”. A súa participación consiste na construción dunha maqueta con pezas LEGO e un póster ilustrativo do seu traballo”.
No desafío, a finalidade é “descubrir a diversión e a emoción pola ciencia e a tecnoloxía” coa proposta dun reto relacionado cun problema do mundo real. Nesta edición, o obxectivo a superar ten que ver co ciclo humano da auga. Así, a rapazada deberá presentar un proxecto científico, e participar nun xogo de robot nun taboleiro relacionado con este “desafío hídrico”. O xurado valorará tamén a integración de valores educativos nos dous casos. Os gañadores da FLL Galicia representarán á Comunidade Autónoma na gran final FLL España que terá lugar en Logroño no mes de marzo, onde, á súa vez, os dez mellores equipos participarán nos torneos internacionais.

Categorías: Ciencia

Colle pulo a promoción das vilas termais pontevedresas con códigos QR e presenza nos móbiles

Ven, 02/09/2018 - 12:28

A presidenta da Deputación de Pontevedra, Carmela Silva, xunto ao deputado de Turismo, Santos Héctor Rodríguez, presentaron onte o seu proxecto de sinalización tecnolóxica para as vilas termais provinciais. A cita cos medios de comunicación celebrouse na compaña, precisamente, dos alcaldes das localidades termais de Ponte Caldelas (Andrés Díaz), Catoira (Alberto García), Cuntis (Manuel Campos), Caldas de Reis (Juan Manuel Rey), O Grove (José Cacabelos), e Mondariz-Balneario (José Antonio Lorenzo). Como lembraremos, esta iniciativa inclúe (entre outras cousas) o fornecemento de paneis con códigos QR para promover os recursos turísticos destas vilas, ás que cómpre engadir tamén Vila de Cruces.
Carmela Silva, na súa intervención, salientou a potencialidade da provincia de Pontevedra, “que conta co maior número de prazas de aloxamento termal de España e balnearios de referencia internacional en diferentes tratamentos”. Ademais, sinalou que estas localidades contan con “centos de historias que xunto ás augas termais, as mellores do mundo e tan importantes nunha sociedade como a actual que cada vez máis aposta pola saúde, teñen unha enorme capacidade de atracción”.
Impulsar esta capacidade de atracción e estas altas potencialidades é, precisamente, o obxectivo do programa presentando onte da man da titular do Goberno da Deputación, que explicou, ao fío desta cobertura tecnolóxica, que “xa que vivimos no século XXI e neste século hai ferramentas tecnolóxicas que permiten dar unha información de vangarda e situarnos como unha referencia tecnolóxica no entorno da promoción turística, cómpre que lles tiremos o máximo proveito”. E isto, apuntou, “é o que queremos conseguir con estes sete paneis informativos con códigos QR que instalaremos nas vilas termais da provincia”.
Segundo se fixo saber aos medios na cita cos alcaldes, os paneis informativos contan cunha imaxe antiga da vila e un mapa co resto dos concellos termais. A través do móbil, as persoas visitantes poderán acceder a unha información en galego, castelán e inglés, máis ampla cá que se atopa no panel, ben accedendo a través da web, ben escaneando o código QR ou coa tecnoloxía NFC, moi empregada por persoas con diversidade funcional. A información que achegan os códigos permiten ver máis fotografías, facer navegacións e recibir datos relativos a localidades situadas preto de cada unha das vilas termais.
Nun plano concreto de reivindicación histórica e patrimonial, Silva enxalzou as burgas romanas de Caldas de Reis e Cuntis, o emprego das augas de Brea (Vila de Cruces) polos monxes de Carboeiro para tratamentos reumatolóxicos, as augas termais que en Catoira se empregaban desde o século XVII, o nome relacionado coas augas termais de Caldas de Reis e Ponte Caldelas así como os edificios rexios de Mondariz-Balneario e da Toxa, nos “que se aloxaron persoeiros históricos desde a segunda metade do século XIX”.

Categorías: Ciencia

O enxeñeiro Alejandro Cardesín mostrou no Campus de Ourense os pequenos e grandes detalles da exploración planetaria

Ven, 02/09/2018 - 09:54

A nosa comunidade investigadora hai tempo que comezou a facer algo máis que ollar as estrelas: asumiu o reto aeroespacial e, en pouco, tempo, converteuse en referente no desenvolvemento de novos servizos e enxeños que permitisen coñecer mellor o que está por enriba (moi por enriba) das nosas cabezas. Na vangarda deste desafío están os investigadores xurdidos da UVigo, que, tanto dende aquí como de diferentes recantos do mundo, achegan importantes contribucións a esta liña colectiva de traballo. Por exemplo Alejandro Cardesín, enxeñeiro da ESA (Axencia Espacial Europea) e titulado en Telecomunicación pola UVigo, que estivo este 8 de febreiro no Campus de Ourense para ofrecer unha conferencia no marco do ciclo Foro Aero, impulsada pola Escola de Enxeñaría Aeronáutica e do Espazo. O título do seu relatorio foi en boa medida un resumo da súa traxectoria investigadora: De Galicia a Marte e máis alá: explorando o sistema solar coa European Space Agency (ESA).
Durante a súa intervención Alejandro Cardesín, doutor en Ciencias e Tecnoloxía Aeroespacial pola Universidade de Padua, en Italia, fixo partícipe ao alumnado asistente da súa traxectoria de arredor de 13 anos na European Space Agency e da súa paixón por traballar nos proxectos de exploración planetaria. Esa traxectoria, lembrou, iniciouse cando por unha serie de casualidades foi realizar o seu proxecto fin de carreira á ESA en Holanda e alí comezou a desenvolver o seu traballo no eido aeroespacial. En 2008 incorporouse á ESA en Madrid e desde entón participou e participa en diferentes misións de exploración planetaria. Entre elas están Rosetta, unha sonda enviada a un cometa; Venus Express, a primeira misión da ESA ao planeta Venus, e as misións a Marte Mars Express, a primeira misión interplanetaria europea, e a vindeira misión ExoMars, que buscará vida nese planeta. “Parece ciencia ficción pero non o é e os estudantes que hoxe están nesta escola pode formar parte no futuro dese soño”, destacou o enxeñeiro.
Segundo fixo saber sobre a natureza do seu traballo, “primeiro empecei como enxeñeiro puro, de Telecomunicación e Informática, pero logo movinme cara unha beira máis científico tralo doutoramento. Agora estou no medio, en operacións científicas, que é a interface entre os enxeñeiros e os científicos. Falar estes dous idiomas e traballar con ambas partes o que che permite é ter unha visión global de toda a misión, algo moi interesante”, explicou, engadindo que “do meu traballo tamén destaco como me permite traballar na coordinación de proxectos internacionais, que implican a expertos de todo tipo de áreas sen os cales non poderíamos facer realidade estes proxectos”.
Máis conferencias
As conferencias do Foro Aero continuarán ao longo do cuadrimestre, cunha periodicidade aproximada dunha conferencia por mes. Tendo en conta que o vindeiro curso académico xa se impartirá o terceiro curso do Grao en Enxeñaría Aeroespacial e que nel o alumnado xa terá que escoller entre a especialización en Aeronaves ou en Equipos e Materiais Aeroespaciais, entre as conferencias que se levarán a cabo haberá dúas centradas en cada unha destas mencións co obxectivo de orientar aos estudantes na súa escolla.
O Foro Aero, explicou na conferencia Arno Formella, director da Escola de Enxeñaría Aeronáutica e do Espazo, naceu o pasado curso co obxectivo de ofrecer ao alumnado do centro a oportunidade “de escoitar a profesionais de diversos sectores afondar na actividade aeroespacial, subministrándolles diferentes perspectivas profesionais”.

Categorías: Ciencia

UNICEF Galicia advirte do incremento do ciberacoso e o sexting na nosa terra

Xov, 02/08/2018 - 23:38

A Facultade de Educación de Santiago acubillou este 8 de febreiro unha xornada de UNICEF Galicia sobre novas tecnoloxías, sobre fenda dixital na mocidade e sobre os riscos derivados de converter as novas tecnoloxías en armas e instrumentos dos acosadores. O encontro, que serviu para presentar informe da dita ONG Os nenos e nenas da fenda dixital en España 2018, puxo o foco na necesidade de mobilizarnos (familias, colexios, pais, nais, institucións, organizacións internautas de pé) contra as prácticas de intimidación e violencia derivadas dun mal uso das novas ferramentas da comunicación. Prácticas como o sexting, o grooming ou o ciberacoso, hábitos que, segundo UNICEF Galicia, están cada vez máis estendidas entre os nosos adolescentes, con especial risco para os nenos das comunidades xitana, inmigrante e LGTBI.
Segundo se fixo saber no acto de hoxe, en España, “o 95% dos nenos entre 10 e 15 anos usa Internet, pero aínda hai 300.000 nenos e adolescentes que non empregou un computador e 140.000 que non tivo un só contacto na Rede”. As consecuencias disto son, evidentemente, unha situación discriminatoria con respecto a aquelas crianzas que, por razóns xeográficas ou económicas ou sociais, non teñen oportunidade de convivir na Sociedade do Coñecemento. En palabras de Cristina Junquera, responsábel de Incidencia Política e Estudos de UNICEF en España, “nun mundo onde todo é dixital, estar fóra do TIC é unha forma máis de exclusión”. Na súa opinión, un déficit nas capacidades, habilidades e competencias dixitais sobre o uso destas tecnoloxías “é un motivo de desigualdade e pode levar á exclusión no futuro”.
No informe tamén se indica que entre as comunidades que máis atrancos ten para tirar proveito das novas ferramentas áchase a comunidade xitana. Así, malia ser frecuente que os nenos deste colectivo teñan móbiles, “a maioría non sempre dispón de tarifa de datos para conectarse”, sinálase no estudo, reflectindo que dun estudo da Fundación Secretariado Xitano extráese que o 22% dos mozos xitanos non teñen Internet en casa por motivos económicos.
A respecto de todo o devandito, Natalia Gómez Fidalgo, técnica de Intervención Social da Fundación Secretariado Xitano, explicou na xornada celebrada este 8 de febreiro que “a pobreza é sen dúbida unha das barreiras para acceder a Internet, e outro atranco sería o uso que se fai das TIC. Ou sexa, o mal emprego que se fai destas ferramentas.
O encontro tamén contou coa presenza da presidenta do Consello de Participación Infantil de Castrelo de Miño, Edita Pousada, que trasladou as recomendacións dun grupo de crianzas galegas para facer un bo uso do TIC e, asemade, puxo o foco no caldo de cultivo para a violencia que se crea arredor do anonimato e a viralidade inherentes ás redes sociais. Segundo fixo saber, “os riscos en liña son o elemento máis subliñado e alarmante cando se aborda a relación entre nenos e redes sociais en Internet. A maioría de nós sentiuse violentado por actitudes en redes sociais de carácter agresivo tanto cara á nosa persoa como cara a terceiros. Todos coñecemos a algunha persoa, persoal ou virtualmente, que sufrise eses ataques”.
Outro dos especialistas presentes na xornada foi Antonio Rial Boubeta, doutor en Psicoloxía Social da USC, Universidade de Santiago de Compostela, quen lembrou unha cifra certamente preocupante: arestora, aproximadamente 1 de cada 5 adolescentes galegos presenta un uso problemático da Internet. Entre os hábitos que meirande inquietude xeran está sen dúbida o sexting, unha práctica relativamente frecuente na nosa terra, ou o feito de que ao redor de 20.000 menores galegos combinasen con persoas que coñeceron por Internet, “o cal constitúe un caldo de cultivo especialmente perigoso para a nova forma de pederastia coñecida como grooming”, explicou.
Pola cita de Compostela tamén pasou Fernando Gil, xefe do Departamento de Sociedade da Información da axencia AMTEGA, quen sinalou que é dos obxectivos da axencia “dotar á cidadanía das competencias e recursos para participar activamente no desenvolvemento da Sociedade da Información”. Con este fin, dixo, “puxemos libros dixitais a disposición de máis de 12.000 mozas e mozos que estudan en Galicia no presente curso, abordando a aprendizaxe cos mesmos elementos cos que desenvolven a súa vida fóra das aulas”.

Categorías: Ciencia

Twitter consegue beneficios trimestrais por primeira vez na historia

Xov, 02/08/2018 - 23:00
Táboa cos ingresos trimestrais de Twitter dos últimos anos

Os resultados financeiros de Twitter do último trimestre veñen de acadar un importante fito grazas ao recorte de gastos: por primeira vez na historia a compañía rexistra beneficios. Concretamente ao ingresar 732 millóns de dólares (só un 2% máis que o ano pasado) conseguiron beneficios de 91 millóns de dólares, cando no mesmo período do ano anterior perdera 167,1 millóns de dólares.
Cómpre destacar que os resultados son positivos no ámbito económico, pero no que se refire ao número de usuarios a compañía leva bastante tempo estancada, pero a axuste nos gastos (despedindo persoal e pechando áreas de negocio como Vine) conseguiu que os seus resultados operativos fosen positivos, facendo así que a empresa poida resultar atractiva para futuros compradores.
Twitter ten actualmente 330 millóns de usuarios activos ao mes, mentres que en usuarios activos ao día medrou un 12% interanual, aínda que as melloras de Twitter son bastante máis complicadas de detallar, xa que están no ámbito do compromiso dos usuarios, que cos últimos cambios da plataforma realizan cada vez máis accións e consumen máis tempo en Twitter e, en consecuencia, xeran máis oportunidades de negocio para a compañía, principalmente no que a publicidade se refire.

Categorías: Ciencia

Fíltrase o código fonte dunha parte crucial de iOS

Xov, 02/08/2018 - 22:30

O código fonte de iBoot, un dos elementos críticos do sistema operativo móbil de Apple, publicouse de xeito anónimo en GitHub, e aínda que Apple solicitou a súa eliminación, iso supuxo a confirmación da súa autenticidade, o que podería supor un serio problema para a seguridade de iOS, xa que a análise do código facilitará a localización de vulnerabilidades, aínda que cómpre detallar que non falamos dunha versión actual, senón da correspondente a iOS 9, ou sexa, que é unha versión vella do sistema operativo, polo que o impacto da filtración do código podería ser menor da que algúns esperan.
Confíase en que a publicación de iBoot facilite a realización do jailbreak de iOS, pero dende Apple xa apuntaron que a seguridade dos seus produtos non depende da ocultación do seu código, senón que teñen numerosas capas de protección tanto de software coma de hardware, de aí que sempre insten aos usuarios a empregar a última versión do software, conseguindo así o maior nivel de seguridade posible.

Categorías: Ciencia

Educación e Telefónica levarán aos centros de ensino o programa Creando Código

Xov, 02/08/2018 - 19:13

O conselleiro de Cultura, Educación e Ordenación Universitaria, Román Rodríguez; e Carolina Jeux, CEO de Telefónica Educación Digital; asinaron hoxe un convenio de colaboración para a posta en marcha nos centros educativos galegos do programa Creando Código, co que se procura afondar nas competencias dixitais STEM (Ciencias, Tecnoloxía, Enxeñaría e Matemática) do alumnado de Infantil, Primaria e ESO, nun acto que contou coa presenza da directora de Telefónica en Galicia, Marta Menéndez.
A iniciativa leva consigo un programa de formación do profesorado, homologado polo departamento educativo da Xunta de Galicia, así como o acceso a ScolarTIC, un espazo social de aprendizaxe en aberto e gratuíto para a comunidade educativa iberoamericana impulsado por Telefónica Educación Digital.
O profesorado que desexe participar poderá inscribirse no portal educativo da Xunta de Galicia, que lle dará acceso a ScolarTIC.

Propostas didácticas

A iniciativa susténtase sobre a aprendizaxe baseada en proxectos e busca fomentar as competencias STEM de forma transversal en todo o currículo escolar a través dunha exposición na que o alumnado se enfronta a un reto que require localizar, procesar información e pensamento computacional, crear algún tipo de produto tecnolóxico e presentar os resultados que dan resposta ao devandito desafío. Para iso, proporciónase as docentes un repositorio de proxectos e propostas didácticas curriculares listas para ser implementadas na aula, incluíndo as metas de comprensión e as preguntas condutoras, mención aos contidos curriculares que desenvolve, contidos en tecnoloxía, robótica ou programación, etc. Ademais, para facilitar a aplicación na aula, defínense as sesións de aprendizaxe necesarias coas pautas e actividades ou dinámicas que se deben realizar.
Creando Código presentará para a etapa de Infantil 18 propostas didácticas estruturadas en sesións que potencian o pensamento abstracto e computacional nas idades máis temperás, a través do xogo e traballando o coñecemento do medio, de si mesmo, as linguaxes e a autonomía persoal. Para Primaria deseñáronse 72 proxectos trimestrais que se desenvolven sobre os 6 cursos nas materias de Lingua Castelá e Literatura, Matemáticas, Ciencias da Natureza, Ciencias Sociais e Educación Artística. Pola súa banda, en ESO haberá 18 proxectos trimestrais e transversais para desenvolver nos tres primeiros cursos da etapa, que inciden sobre as materias de Bioloxía e Xeoloxía, Xeografía e Historia, Matemáticas, Música e Física e Química.

Formación para o docente

Para a súa implantación, Creando Código dispón dunha formación asociada aos proxectos que se compón de itinerarios formativos, cada un deles formado por cinco cursos de Programación, Robótica e Tecnoloxía que supoñen arredor de entre 90 e 110 horas de formación.
Ademais, os docentes poderán ampliar as súas competencias a través dos tutoriais e obradoiros que ofrece o espazo ScolarTIC, dirixido a que profesores, educadores e proxenitores podan formarse e informarse sobre as últimas tendencias educativas internacionais e que conta xa con máis de 400.000 usuarios. Neste espazo pódense atopar cursos en formato MOOC como Programando con Scratch, Iniciación á Robótica, etc.
Esta colaboración con Telefónica Educación Digital enmárcase na Estratexia galega para a educación dixital 2020, Edudixital, que ten como obxectivos principais que todo o alumnado de ensino obrigatorio teña formación en robótica e programación no curso 2020/21 e romper coa fenda de xénero nos estudos STEM.

Categorías: Ciencia

Apróbase o anteproxecto de Lei de Administración dixital de Galicia

Xov, 02/08/2018 - 18:52

O presidente da Xunta, na súa comparecencia semanal tras o Consello de Goberno, informou da aprobación do Anteproxecto de lei de Administración dixital de Galicia, co fin de acadar o papelame cero nas relacións entre a Administración e os cidadáns. Trátase dunha nova lei que vén completar o Plan da Administración e Goberno dixital 2020 que a Xunta puxo en marcha en 2015.
A aprobación deste anteproxecto supón a adaptación da Administración galega ás obrigas establecidas na normativa estatal, pero tamén mellorar estas exixencias e consolidalas con rango de lei.
Esta nova norma rexerase por tres principios básicos: que cada cidadán non teña que achegar os mesmos datos máis dunha vez, que a Administración empregue proactivamente a información da que dispón para adiantarse ás necesidades do cidadán e a automatización dos procesos para mellorar a eficiencia da xestión.

As novidades que introduce a lei

Como novidades, esta Lei da Administración dixital inclúe: a definición, por vez primeira, dun marco galego de competencias dixitais, que toma como referencia o marco común da Comisión Europea nesta materia e a través do cal se poderán avaliar e certificar os coñecementos dixitais dos cidadáns; a creación dun Plan de capacitación dixital do empregado público, que lles permitirá ás persoas que traballan na Administración acadar o certificado galego de competencias dixitais; a configuración dixital de procedementos administrativos e servizos para que teñan un funcionamento plenamente electrónico; a creación dun mapa de interoperabilidade das administracións públicas galegas, que será un inventario de datos e documentos que estean en poder das administracións e o desenvolvemento do posto de traballo dixital do empregado público.
Para a posta en servizo destas melloras, a nova lei recolle tamén a necesidade de creación dun Plan de continuidade dos servizos dixitais, que garantirá o acceso a estes con seguridade, calidade e de xeito continuo; o fomento da innovación dixital para impulsar novas formas de prestar servizos e a creación dunha comisión de coordinación interadministrativa para a promoción da prestación conxunta de servizos.
Para a análise da información sobre a implantación deste sistema e a introdución de melloras, o presidente da Xunta informou de que a lei prevé un sistema de indicadores da Administración dixital, que estará apoiado neste labor de seguimento polo Observatorio da Sociedade da Información e Modernización Tecnolóxica de Galicia (OSIMGA), cuxo papel se potenciará.

Categorías: Ciencia

AMTEGA e R rematarán 2018 con 11 polígonos de Ourense tirando proveito de redes ultrarrápidas

Xov, 02/08/2018 - 17:21
A rúa principal do polígono de Allariz vista con Google Street View

A Axencia para a Modernización Tecnolóxica de Galicia (AMTEGA) e operador R proseguen os seus traballos para dotar con Internet de altas capacidades os polígonos industriais da nosa terra que até o de agora non contaban con infraestruturas tecnolóxicas axeitadas para os novos tempos e para os novos requirimentos do mercado. A axencia que dirixe Mar Pereira avanzou este 8 de febreiro os traballos a realizar na provincia de Ourense ao abeiro do Plan de Banda Larga de Galicia, do que a firma R é adxudicataria. Segundo fixo saber, o plan subirá ao carro da Internet con velocidades de até 350 Mbps a outros catro polígonos industriais, que se engaden aos sete nos que xa se traballou previamente, dando como resultado (ao remate de 2018) un total de 11 complexos empresariais ourensáns con redes ultrarrápidas. Estes e outros datos foron achegados pola directora de AMTEGA, Mar Pereira, o director xeral de R, Alfredo Ramos, e a delegada da Xunta en Ourense, María Sol Díaz.
Segundo lembraron, as actuacións do plan comezaron en agosto de 2016 e ao remate de 2017 había 7 polígonos da provincia con este servizo de banda larga ultrarrápida. Ademais, recordaron que “unha vez completados os traballos programados, o 85% das superficies empresariais ocupadas da provincia terán acceso a redes de máis de 100Mbps”. Pereira tamén fixo saber que estes despregues estanse a complementar cunha liña de axudas, aberta o ano pasado, para equipar con redes ultrarrápidas as empresas e autónomos das contornas máis afastadas do rural. Ao fío desta liña, engadiu, destináronse un total de 400.000 euros á subvencionar solucións específicas a 30 empresas que agora dispoñen de velocidades de acceso a Internet de entre 50Mbps e 350Mbps.
Volvendo aos traballos despregados nos polígonos ao abeiro do plan, permitiralles dispor de Rede a través de fibra óptica cunhas velocidades de até 350 Mbps de baixada e 35 de suba, e cunha garantía de caudal do 80% sen límite de descargas. No acto de hoxe, AMTEGA e R fixeron fincapé en todo aquilo no que se traducen as devanditas capacidades: un abano de posibilidades competitivas e produtivas que van alén dun simple abastecemento de infraestrutura. En palabras de R, as ditas capacidades achandan o camiño para que as empresas “acometan a súa transformación dixital”. Ou sexa, para que boten man de servizos e solucións na nube como por exemplo a videoconferencia, o acceso á Internet das Cousas (IoT) ou os procedementos do que se coñece como Industria 4.0, vencellados a conceptos e metodoloxías como a eficiencia enerxética, o control de intrusións nas edificacións, os servidores virtuais e a analítica de datos (Big Data), entre outros eidos. “Todas estas cousas e outras moitas máis”, explica a compañía de raizame galega, “son posíbeis grazas ás vantaxes das redes FTTH (Fiber To The Home) que levan a fibra óptica ata a propia empresa nestes polígonos xa conectados ás redes ultrarrápidas de R”.
No acto deste 8 de febreiro, amais de todo o devandito, púxose o foco nas cifras a nivel autonómico, salientando que o plan xa completou o despregue 51 polígonos da nosa Comunidade e este ano chegará aos 30 restantes. Deste xeito, en 2018, un total de 130 polígonos, que concentran case o 93% da superficie empresarial ocupada, disporán de acceso a redes de máis de 100 Mpbs.
Lembrar que AMTEGA subvenciona estes traballos cunha axuda de 3,4 millóns de euros, que xerarán un investimento total de 5,2 millóns de euros. Estas subvencións co-fináncianse ao 75% polo Fondo Europeo Agrícola de Desenvolvemento Rural (FEADER) no marco do Plan de desenvolvemento rural de Galicia 2014-2020 (PDR).
Axudas para núcleos de poboación do rural
Tralas dúas primeiras actuacións orientadas a mellorar a conectividade no tecido empresarial, a axencia que dirixe Mar Pereira vén de pór en marcha a terceira actuación para facilitar o acceso a redes ultrarrápidas en zonas do rural que non contan con esta cobertura nin previsión de dispoñer destas redes.
O pasado día 15 xaneiro publicouse no DOG unha axudas, cun importe de 14,2 millóns de euros, dirixida a operadores de telecomunicacións para facilitar o acceso a Internet de cando menos 100Mbps en núcleos de menos de 150 habitantes.
Os operadores poderán actuar en calquera das 26.386 entidades de poboación de menos de 150 habitantes e noutros 80 núcleos de entre 150 e 300 habitantes. Poderán presentar varios proxectos cunha subvención mínima de 20.000€ para cada un deles ata esgotar a dotación orzamentaria prevista. O prazo de presentación é dun mes a contar dende o día seguinte á publicación no DOG.
Segundo se estipula nas bases, as redes coas que se dote ás entidades de poboación deberán proporcionar servizos de cando menos 100 Mbps de baixada e 20 de suba, non establecer limitacións de descargas e permitir a realización de comunicacións de voz e vídeo en tempo real.
A Administración autonómica concederá unha subvención máxima do 90% do custo total de cada proxecto. Estas subvencións co-fináncianse ao 75% polo Fondo Europeo Agrícola de Desenvolvemento Rural (FEADER) no marco do Plan de desenvolvemento rural de Galicia 2014-2020 (PDR).
Listado de Polígonos de Ourense cubertos e previstos en 2018
· Allariz, Parque Empresarial de Chorente · Allariz, Parque Empresarial de Chorente (Polígono Industrial) · O Barco, Parque Empresarial do Barco · Celanova, Parque Empresarial de Celanova · Ribadavia, Parque Empresarial de Ribadavia, · Verín, Parque Empresarial de Verín – Pazos · Pontedeva, Zona de Promoción Industrial de Trado · Vilamarín, Parque Empresarial de Vilamarín · Vilar de Santos, Parque Empresarial de Santa Marta · Xinzo de Limia, Parque Empresarial de Xinzo

Categorías: Ciencia

A Deputación da Coruña fornece de formación e prácticas TIC a 90 mozos da provincia

Xov, 02/08/2018 - 13:27

As novas tecnoloxías da información estarán moi presentes na vindeira iniciativa a prol da mocidade da Deputación da Coruña. Trátase, máis polo miúdo, dunha batería de programas de formación e prácticas para 90 mozos e mozas da provincia. Os sectores nos que se formarán serán as TIC e o turismo. A iniciativa, PEL Emprego Xuvenil, foi aprobada polo Fondo Social Europeo (FSE), ao abeiro da súa convocatoria de axudas destinadas á integración sustentábel de persoas novas no mercado de traballo. A Deputación da Coruña recibiu 490.820 euros do FSE, que constitúen máis do 30% das axudas concedidas ás entidades locais da provincia, e, segundo engade a entidade provincial, unha cuarta parte dos fondos acadados para toda Galicia.
Esta axuda servirá para financiar algo máis da metade do orzamento total do proxecto, mentres que o resto, ata chegar a 868.695 euros, será aportado pola propia Deputación.
A Deputación desenvolve esta iniciativa dentro do seu Plan de Emprego Local (PEL), un plan estratéxico que abrangue todos os recursos e actuacións destinados a fomentar a creación de emprego. Esta acción en concreto, PEL Emprego Xuvenil, está destinada aos mozos e mozas dos concellos coruñeses de entre 16 e 30 anos, e consistirá en seis itinerarios que incluirán formación específica e prácticas profesionais en empresas da provincia.
Para a escolma dos itinerarios que se ofertarán, a Deputación realizou un estudo do contexto socioeconómico nos concellos coruñeses de menos de 50.000 habitantes. Na investigación a entidade provincial achou que a maioría das ofertas de traballo diríxense a profesionais con capacitación nos sectores das novas Tecnoloxías da Información e a Comunicación (TIC) e a promoción turística, polo que este nicho de mercado sería, en palabras da institución, “o máis axeitado para asegurar a inserción laboral dos participantes”.
Así mesmo, os contidos de cada itinerario responden ás competencias máis demandas e necesarias para acceder a postos de traballo de calidade, e contribuír ao mesmo tempo ao desenvolvemento dos concellos.
Tres dos percorridos formativos estarán centrados no eido da informática e as novas tecnoloxías, coas especialidades de sistemas de xestión de información, seguridade informática e administración de bases de datos. De maneira complementaria, inclúese tamén un curso de 70 horas sobre manexo de aeronaves pilotadas en remoto ou drons e outro sobre redes sociais.
Por outra banda, na área do turismo ofreceranse tres itinerarios especializados en creación e xestión de viaxes e eventos, venta de produtos e servizos turísticos e promoción turística local e información ao visitante. Neste caso, os participantes recibirán tamén un curso de 50 horas sobre mercadotecnia aplicada ao turismo e realizarán un obradoiro de emprendemento cooperativo, que consistirá na creación de iniciativas que promovan destinos turísticos intelixentes.

Categorías: Ciencia

O Campus de Ourense pon en valor as súas árbores con códigos QR

Xov, 02/08/2018 - 12:18

Tecnoloxía e coñecemento e preservación da natureza non teñen porqué estar rifadas. De feito, de camiñaren xuntas, adquiriremos novas dimensións sobre a natureza que nos rodea, e esta, ademais, terá máis garantida a súa conservación. Por este vieiro está a transitar o Campus de Ourense, que conta dende 2007 cun salientábel itinerario verde, a Ruta das Árbores, que, amais de ser un lugar para o lecer e para reivindicar o respecto pola natureza, serve de exemplo do que podería ser un bosque universitario ideal (conta cunha chea de especies de todo o mundo, a xeito de resumo do que debe ser un campus: un entrecruzamento de coñecemento diverso). Para impulsar esta ruta, o campus emprazou códigos QR nas árbores do percorrido. Agora, os visitantes poderán recoñecer as diferentes especies e saber máis da súa orixe e características a través dos seus teléfonos móbiles,
Segundo explica José Manuel Pérez, responsábel de zonas verdes e xardinería do Campus de Ourense, hai arredor dun millar de árbores e arbustos de máis de 170 especies diferentes repartidas nas diferentes zonas verdes universitarias. Para pór en valor esta riqueza natural, apunta, téñense levado a cabo diferentes accións, como unha publicación, a sinalización de especies ou visitas guiadas para grupos. Agora, a tecnoloxía vén de permitir un novo e importante paso neste proceso de revalorización, levado a cabo pola Vicerreitoría do campus e a Oficina de Medio Ambiente da Universidade de Vigo.
Para comezar, a iniciativa implicou o fornecemento de códigos QR nos paneis informativos sobre o Campus emprazados nas diferentes entradas das rutas. Segundo lembran os impulsores da iniciativa, “esta ferramenta permite por medio de teléfonos intelixentes ou tabletas que teñan instalado Google Maps e un lector de códigos QR coñecer o nome das árbores ao pasar a carón delas. Poden tamén ter máis información de cada exemplar premendo sobre as iconas e as ligazóns propostas”. Os usuarios só terán que ler coas aplicacións para códigos QR dos seus teléfonos os códigos situados nos paneis informativos. O uso do GPS, indican, tamén permite ás persoas interesadas ser guiadas polo campus en busca da especie que queren ver entre todas as dispoñíbeis.
Alén de poder acceder de xeito inmediato e amplo á información de cada árbore, indica Pérez Teijeiro, unha das vantaxes deste sistema é que “permite visualizar no seu conxunto, de xeito global, a diversidade de especies con que contamos e ter unha imaxe de como están distribuídas fisicamente polas diferentes zonas”. Esta visualización, sinala, non é posíbel obtela consultando só os paneis informativos situados ao carón de parte das árbores ou o libro do roteiro.

Categorías: Ciencia

AMTEGA e a Secretaría do Deporte convocan unha xornada para axudar aos clubs deportivos a dixitalizárense

Xov, 02/08/2018 - 12:18

Impulsar a presenza das ferramentas e métodos da Administración Electrónica no ámbito das asociacións e clubs de deportes. Este é un dos grandes obxectivos da xornada que organizan este 9 de febreiro a Axencia para a Modernización Tecnolóxica de Galicia (AMTEGA) e a Secretaría Xeral para o Deporte, a xornada Faite dixit@l e tramita nun clic - Rexistro de Entidades Deportivas, que se retransmitirá desde as instalacións do Centro Demostrador TIC Galicia, en Santiago de Compostela, e poderase seguir a través de videoconferencia nas aulas CeMIT de diversas localidades de Galicia en horario de 12:00 h a 13:30 h.
A sesión divulgativa responde ao chamamento lanzado recentemente pola Secretaría ás máis de 8.000 entidades deportivas galegas, a prol da actualización dos seus datos no Rexistro autonómico. Este proceso de posta ao día da información de seu implicará que teñan que enviar dixitalmente (a través da sede electrónica da Xunta) a documentación que se lles esixe para cumprir o trámite. Para facilitar este proceso e capacitar ás entidades para levalo a cabo do mellor xeito posíbel (este trámite e todos os que veñan despois) xorde precisamente o devandito obradoiro por multiconferencia.
En palabras dos organizadores da xornada é facilitar aos clubs “as nocións básicas sobre o funcionamento da sede electrónica, clarexar posíbeis dúbidas, difundir os servizos dispoñíbeis na sede e indicarlles as canles para obter máis información en caso de que a precisen durante a realización da xestión”. O enfoque da xornada será eminentemente práctico con exemplos sobre emprego dos diversos sistemas de identificación e sinatura dixital admitidos pola sede, incluído o sistema Chave365, que evita o uso do certificado dixital.
As persoas interesadas en seguir esta xornada poden acercarse á aula CeMIT do Centro Demostrador TIC en Santiago de Compostela (cdtic.xunta.gal) ou ben a calquera das aulas CeMIT das localidades que mostraron o seu interese en retransmitir a través de videoconferencia a dita xornada e así poder evitar desprazamentos innecesarios: Santiago, Abegondo, Ames, Arzúa, Brión, Coruña, Narón, Oroso, Ortigueira, Barreiros, Carballedo, Ribadeo, Bande, Celanova, Ourense, Cuntis, Poio, Pontevedra e Valga.
En total disponse de máis de 260 prazas para asistentes, das que 25 están habilitadas de maneira presencial na aula CeMIT no CDTIC en Santiago de Compostela e o resto para seguir por videoconferencia. Pódense consultar os datos de contacto das aulas CeMIT na seguinte ligazón: cemit.xunta.gal/centros

Categorías: Ciencia

Compostela Monumental introduce á mocidade desempregada no manexo dos dispositivos tecnolóxicos

Xov, 02/08/2018 - 10:13

Compostela Monumental, a asociación santiaguesa de comerciantes e empresarios, iniciou estes días o primeiro dos obradoiros que conforma o seu programa de emprego, Empréga-Te 2. En concreto, deu comezo ao seu Curso Básico de Informática, no que participan novas aspirantes para traballar no sector servizos. Nesta actividade, fortalecen e amplían o seu coñecemento sobre os diferentes dispositivos informáticos e a súa aplicación no mundo laboral.
A acción formativa, primeira deste ano 2018, ten unha duración de 30 horas e desenvolverase ata o día 7 marzo na aula formativa que Compostela Monumental ten na súa sede da Algalia de Arriba 31. O curso trata sobre alfabetización informática, Internet e correo electrónico, segundo o seu obxectivo fundamental “mellorar o coñecemento e dominio da computadora entre o alumnado”, ademais de iniciar ás participantes no coñecemento da Internet, no correo electrónico e nas comunicacións, así como en nocións básicas de seguridade e privacidade. No programa formativo de Compostela Monumental colabora a Secretaría Xeral de Emprego da Xunta de Galicia, por medio da Dirección Xeral de Orientación e Promoción Laboral (Servizo de Programas Mixtos).

Categorías: Ciencia

En probas a función de compartir publicacións de Instagram como historias

Mér, 02/07/2018 - 22:44

Unha das grandes diferenzas de Instagram con respecto a Facebook e Twitter é que carece dun método nativo para compartir os contidos publicados anteriormente, o que fixo que xurdiran solucións de terceiros para facer regrams, pero agora estaría a probar unha nova opción que permitiría compartir publicacións con outros usuarios a través das historias, facilitando que se poida logo engadir comentarios ou adhesivos. Temos así unha nova opción para animar aos usuarios a publicar sobre contidos alleos, o que podería contribuír á dinamización de Instagram.
Esta nova funcionalidade compartiuna a través de Twitter Zachary Shakked, que sería un dos poucos usuarios que goza actualmente da nova opción que, tras unha fase de probas, é de prever que chegue ao resto de usuarios.

Podemos ver o funcionamento da función de compartir publicacións en historias no seguinte vídeo:

Categorías: Ciencia

Este ano poderemos presentar a declaración do IRPF dende o móbil

Mér, 02/07/2018 - 22:28

O director do Departamento de Xestión da Axencia Tributaria, Rufino de la Rosa, anunciou que a Facenda está a ultimar unha aplicación para móbiles que permitirá que o contribuínte poida descargar os seus datos fiscais e presentar a declaración do IRPF a través do teléfono.
A aplicación entrará en funcionamento a partires do 15 de marzo, aínda que a presentación de declaracións da Renda non botará a andar até o 4 de abril. Esta ferramenta estará dispoñible tanto para Android como para iOS, facendo aínda máis accesible a presentación de declaracións sen ter que acudir ás oficinas da Facenda, avanzando así na liña que supuxo a transformación do programa PADRE nos servizos actuais de Renta Web.
A nova aplicación móbil será especialmente práctica para usuarios con declaracións sinxelas, que poderán presentar a súa declaración cun único clic, situación na que estarían uns 4,8 millóns de contribuíntes.

Categorías: Ciencia

A Xunta aposta pola cualificación especializada a través das unidades formativas na empresa

Mér, 02/07/2018 - 22:15

O director xeral de Orientación e Promoción Laboral, Alfonso Marnotes, salientou hoxe en Santiago nun encontro que mantivo cos axentes do sector TIC galego, incluíndo tamén emprendedores, a aposta da Xunta por este eido ofrecendo unha formación especializada en consonancia coas demandas das empresas, que se traduce, en palabras de Marnotes, na creación de máis e mellores postos de traballo.
O director xeral explicou que o Goberno galego traballa en adaptar a formación dos traballadores galegos ás necesidades reais do tecido produtivo con diversas ferramentas orientadas ao novo modelo industrial e ás novas tecnoloxías, entre as que destacou as unidades formativas na empresa, dirixidas a empregados e ocupados, que permite ás compañías contar con persoal cualificado tras unha formación á carta, co apoio da Administración.
Para esta iniciativa, a Consellería de Economía, Emprego e Industria destina este ano 6,5 millóns de euros para formar a 2100 traballadores en 540 empresas galegas, que inclúe cualificación para firmas de sectores estratéxicos vinculados coa Axenda Industria 4.0, como é o ámbito das TIC.
As unidades formativas dirixidas a desempregados ofrecen formación á carta na propia empresa que, pola súa banda, ten que comprometerse a un mínimo de contratación, ao 40% dos alumnos que participen en cada unha das 40 unidades previstas. O prazo de solicitude para a primeira das convocatorias deste programa xa está aberto. Para presentar as inscricións das axudas correspondentes ao financiamento das accións formativas con compromiso de contratación, o prazo rematará o 5 de abril. No caso dos incentivos á actividade laboral vinculada ás accións formativas, o prazo de presentación de solicitudes será dun mes a partir da contratación laboral que se produza ao remate da acción formativa, respectando en todo caso o límite máximo do 14 de decembro de 2018.
A Consellería de Economía, Emprego e Industria financia, a través desta actuación, o 100% da formación, e para aquelas compañías que superen o compromiso mínimo de contratación ofreceráselles axudas para promover os contratos indefinidos, que oscilan entre os 7000 e 16.000 euros. O apoio mínimo de 7000 euros aumentará ata os 8000 para os parados de longa duración, persoas con discapacidade ou en risco de exclusión social. Ademais, as mulleres, maiores de 45 anos e emigrantes retornados, así como as empresas emprazadas no rural, recibirán un 25% máis de axuda sobre os 7000 ou 8000 euros, segundo sexa o caso, podendo chegar os apoios, desta maneira, aos 16.000 euros.
Nesta convocatoria, optarán a estas axudas as empresas ou agrupacións temporais de firmas que presenten unha solicitude conxunta. Este programa inclúe tamén para 2018 de xeito novidoso o seu carácter bianual coa finalidade de que os cursos sexan máis complexos e poidan prolongarse durante máis meses, ata o ano 2019.
O programa destinado a ocupados céntrase na formación en empresas de sectores estratéxicos, entre os que se atopan as TIC. A previsión é a través desta iniciativa formar a 1500 traballadores en 500 compañías. O prazo de solicitude deste programa tamén está aberto, rematando o 2 de abril. O Goberno galego, a través desta actuación, financia tamén o 100% da cualificación, cun límite de 200.000 euros para empresas ou agrupacións de firmas, priorizando actuacións vinculadas coa silvicultura, transformación de madeira, fabricación de compoñentes electrónicos e ordenadores, automoción, naval, aeronáutica, fabricación de mobles, edición de programas informáticos e telecomunicacións e actividades relacionadas coa informática. O principal requisito deste programa de axudas é que as compañías pertenzan a algún dos sectores estratéxicos da Axenda Industria 4.0.

Categorías: Ciencia

O Consello da Cultura avaliará as posibilidades do Big Data para estarmos máis informados... ou menos

Mér, 02/07/2018 - 21:02

O Consello da Cultura Galega vai organizar o vindeiro 15 de marzo un encontro arredor da información a gran escala e as posibilidades de coñecemento e desenvolvemento que se nos abren ante unha xestión optimizada (Big Data) desa información masiva: cousas como coñecer mellor o mercado editorial, impulsar retos científicos até o de agora de difícil resolución, saber a resposta da xente ante un produto ou atender a demandantes de servizos cos servizos que lles son máis devecidos. Sobre estes e outros temas (e tamén sobre o “reverso escuro” das novas canles de datos derivado dun mal uso das mesmas) e sobre as mellores maneiras de tratar o coñecemento masivo tratará a xornada do Consello da Cultura Galega (CCG) A cultura dixital en Galicia: viaxe de ida e volta ao Big Data, á verificación e á mobilidade. A cita ten aberto a día de hoxe o prazo de inscrición a través do web da institución.
Nesta xornada, coordinada por Xosé López, Xosé Ramón Pousa e Rosa Aneiros, preténdese “ofrecer unha visión panorámica do que acontece no panorama do Big Data, coa presentación dalgunhas experiencias, e analízanse vías para aproveitar esa circulación masiva de datos nas iniciativas culturais nos diferentes ámbitos”.
A xornada comeza cun relatorio xeral a cargo de Anaclet Pons, catedrático de Historia Contemporánea da Universitat de València, sobre o Big Data e os novos documentos.
Despois, o catedrático de Comunicación da Universidade Carlos III e da UNED Carlos Elías fala de ruído e información clave na era de sobreabundancia das mensaxes. A sesión da mañá remata cun relatorio sobre a utilidade e os desafíos do emprego de datos no eido da cultura e da ciencia. A visualización do coñecemento masivo e a súa aplicación nos produtos culturais será o tema que trate a xornalista Clara Higuera, que traballa como científica de datos na BBC, e tamén Xaquín González, xornalista e infografista.
A cuestión dos falsas informacións derivadas dun exceso de coñecemento será outro dos temas a avaliar na xornada. Disto falará pola tarde Jesús Miguel Flores Vivar, profesor de Ciberperiodismo e director de Internet Media Lab. da Universidad eComplutense de Madrid. Deseguido, Carmen García Mateo, catedrática do Departamento de Teoría do Sinal e Comunicacións da Universidade de Vigo, falará de intelixencia artificial e, entre outras cuestións, da automatización dos contidos.
Despois deste marco xeral, pecha a sesión unha mesa redonda, que centra o foco en Galicia. O director de innovación da Televisión de Galicia, Xosé Pereira, modera unha sesión en que participan María Yáñez, xornalista especialista en estratexias nas redes; Marcus Fernández, webmaster de Código Cero; e Rubén Bastón, Customer Happiness e director de Elogia.

Categorías: Ciencia

O certame Lingua de Namorar premiará ás súas gañadoras con tecnoloxía

Mér, 02/07/2018 - 21:02

Un ano máis son as voces femininas as que se fan cos premios do certame de dinamización lingüística Lingua de namorar, que convocan conxuntamente as consellerías de Cultura, Educación e Ordenación Universitaria e de Política Social, por medio da Secretaría Xeral de Política Lingüística e da Dirección Xeral de Xuventude, Participación e Voluntariado. Os dous departamentos fixeron público hoxe o ditame do xurado desta sexta edición da iniciativa, que dobrou considerablemente a participación da mocidade con respecto a todos os anos anteriores e chegou aos 1509 mozos e mozas. 704 concorreron ao concurso coas súas declaracións de amor en galego, 488 na categoría A (de 14 a 19 anos) e 216 na categoría B (de 20 a 35 anos); 805 en total, votaron as súas favoritas.
De entre as 50 máis votadas en cada categoría, resultaron gañadoras do primeiro premio na categoría A Nee Barros (Marín), pola mensaxe Muiñeira; do segundo Ania Ferreira (Vigo), pola mensaxe Tes lume? e do terceiro Uxía Martínez (Vigo), pola mensaxe Amor adiantado. Na categoría B fixérono do primeiro premio Teresa Pérez (Lousame), pola mensaxe Infinito; do segundo Aitana Iglesias (Narón), pola mensaxe Fagamos melodía e do terceiro Iria Carreira (Arzúa), pola mensaxe Terroristas.
Tal e como prevén as bases do concurso, as gañadoras recibirán os seus premios (un Hoveboard Nilox, unha cámara Fuji instantánea, un auricular Panasonic Diadema, un televisor conectado de Panasonic de 32 polgadas, un smartphone Wiko con pantalla de 5 polgadas e unha cámara deportiva, respectivamente, acompañados de cadansúa reprodución do Pergamiño Vindel conmemorativa da súa estadía en Vigo en 2017 e 2018), nun acto público que conducirá a escritora galega Rosalía Fernández Rial e que acollerá o Museo do Mar de Vigo o vindeiro 14 de febreiro, Día dos Namorados, ás 17:00 horas.

Categorías: Ciencia

Ribeira organiza novos obradoiros informáticos en catro parroquias do concello

Mér, 02/07/2018 - 20:32

O Concello de Ribeira vai organizar nas semanas vindeiras catro novos cursos de capacitación en novas Tecnoloxías da Información e a Comunicación (TIC). Os obradoiros, que se van desenvolver en catro parroquias do concello, abren este 8 de febreiro o prazo de inscrición. Trátase dos seguintes cursos: Iníciate na informática, Sácalle partido ao teu móbil, DNI electrónico e certificados dixitais, Retoque fotográfico e Edición de audio e vídeo).
As actividades desenvolveranse nas parroquias de Aguiño, Corrubedo, Oleiros e Ribeira.
Os cursos, que son de balde para a cidadanía, estenderanse dende o 19 de febreiro ata o 12 de abril. As inscricións estarán abertas ata o 16 de febreiro, en horario de 10 a 14 horas e de 16.30 a 20 horas na Aula CeMIT ou tamén na páxina web da rede autonómica de aulas de informática, a rede CeMIT.

Categorías: Ciencia

Novas axudas para a dixitalización do comercio e a artesanía

Mér, 02/07/2018 - 18:30

A directora xeral de Comercio e Consumo, Sol Vázquez Abeal, participou hoxe na praza de abastos de Santiago de Compostela nun encontro con comerciantes no que lles informou sobre as axudas da Xunta para apoiar este ano, con preto de 4,5 millóns de euros, a modernización e impulso do pequeno comercio e dos obradoiros artesanais galegos.
A través de tres iniciativas, financiaranse proxectos de expansión comercial e novas fórmulas de comercialización; dixitalización e modernización de empresas comerciais e artesanais; e programas da competitividade da artesanía galega.
O obxectivo destas convocatorias, que xa se publicaron no Diario Oficial de Galicia (DOG) a pasada semana, é ofrecer, segundo destacou Vázquez Abeal, un valor engadido ao comercio galego, vencellando o seu crecemento, expansión e modernización ás novas canles de comercialización, utilizando a innovación, o social commerce, e a mellora da imaxe, como factores para facer máis competitivo o tecido comercial de Galicia. Deste xeito, impúlsase entre o comercio e os obradoiros artesáns galegos a súa presenza na rede, a incorporación de ferramentas TIC de xestión e a mellora da loxística coa implantación do packaging axeitado.
Por unha banda, a Consellería de Economía, Emprego e Industria apoia con máis de 3,1 millóns de euros a dixitalización e modernización de empresas comerciais e, como novidade deste ano, tamén artesanais para a implantación de solucións dixitais que permitan os beneficiarios adaptarse ás novas fórmulas de comercialización e ás tendencias do mercado, así como proxectos de modernización integral dun local.
O investimento subvencionable, segundo o tipo de axuda solicitada, poderá ir dos 1000 aos 5000 euros no caso de dixitalización e entre os 15.000 e os 30.000 no caso de actuacións de modernización. A porcentaxe de axuda será en todos os casos do 50%. A Xunta incrementa o orzamento destinado para esta convocatoria en preto dun 59% con respecto ao ano pasado, cando se dedicaron dous millóns de euros.
Doutro lado, en canto á liña dedicada á expansión comercial e novas fórmulas de comercialización, conta cun orzamento dun millón de euros e poderanse beneficiar PEME e, no caso do desenvolvemento dun proxecto efémero, tamén comerciantes en liña e, como novidade, fabricantes. A directora xeral de Comercio explicou que o que se pretende é impulsar a apertura de novos establecementos comerciais por titulares doutro comercio cun mínimo de dous anos de antigüidade, así como proxectos efémeros por un prazo máximo de dous meses nun concello distinto onde se veña exercendo a actividade. No primeiro caso o investimento subvencionable máximo vai dos 3000 aos 60.000 euros e no caso das iniciativas efémeras vai ata os 8.000 euros. En todos os casos cóbrese o 50%.
Por último, apóiase con 255.000 euros o fomento da comercialización da artesanía e o impulso da actividade do sector. As axudas, dirixidas á promoción a través da participación en feiras e certames e a organización de eventos feirais, están destinadas a obradoiros artesanais, asociacións profesionais de empresarios e artesáns e concellos. As axudas máximas serán de 8000, 30.000 e 15.000 euros respectivamente e a intensidade pode chegar ao 80%. O orzamento aumenta en máis dun 18% con respecto ao ano pasado.
Con estes tres programas, a Xunta, segundo salientou Vázquez Abeal, agarda impulsar o comercio e a artesanía galegas coa finalidade de potenciar un tecido comercial diverso, moderno, competitivo e de calidade; adaptalo ás novas realidades co obxectivo de gañar en competividade e mellorar a imaxe dos centros urbanos das cidades facéndoos máis atractivos. Estas liñas permitiron, en 2017, apoiar preto de 375 proxectos con case dous millóns de euros.
Estas axudas reforzaranse con outras accións dirixidas a potenciar os espazos comerciais e o asociacionismo cun orzamento adicional de catro millóns de euros e enmárcanse no Plan estratéxico de impulso ao comercio de Galicia, que contempla 55 accións específicas ata 2020.

Categorías: Ciencia

Páxinas