códigocero

Subscribirse a Orixe códigocero
Información sobre novas tecnoloxías en Galicia e en galego.
Actualizado: fai 6 min 17 seg

O ciclo de encontros sobre Industria 4.0 chega a Pontevedra

Mar, 10/03/2017 - 19:30

Este 5 de outubro celébrase en Pontevedra un encontro empresarial especialmente acaído para todos aqueles que anden na procura de metodoloxías-tecnoloxías para producir mellor, con menor esforzo, dun xeito máis sustentábel co medio e máis eficiente. Estamos a falar da edición local do ciclo Retos e oportunidades da Industria 4.0 para Galicia. Celebrarase na sede de Afundación situada no número 2 da na rúa Augusto González Bicada, a partir das 9:15horas. A sesión vén da man, conxuntamente, do IGAPE, o Círculo Financeiro de Galicia e APD, coa colaboración ademais de ABANCA, AJE Pontevedra, AEMPE e a firma de novas tecnoloxías da información Emetel.
A xuntanza desta semana forma parte dun ciclo itinerante (primeiro Vigo e Ourense e agora Pontevedra) que busca promover novos xeitos de xerar información, coñecemento, producir e facer actividade industrial. “Con estes encontros”, sinala a organización, “preténdese reflexionar, concienciar, debater, compartir experiencias e promover a colaboración entre empresas, administracións, centros tecnolóxicos, universidades, clústers, etcétera, así como analizar as oportunidades que a revolución tecnolóxica en todos os seus aspectos ofrece á industria galega”.
A sesión de Pontevedra será inaugurada por Mª Carmen Fdez Penas, directora territorial de Pontevedra de ABANCA, Marcelino Otero, do Círculo de Empresarios de Galicia. Participarán Norberto Penedo, director da área de Competitividade do IGAPE, Camilo Lobato, director adxunto de Emetel, Francisco Izquierdo, presidente de Grupo IZ, e Antonio Casal, director territorial de ENCE en Pontevedra.
As vindeiras sesións empresariais deste ciclo terán lugar en Ferrol, Lugo e Boiro ao longo deste mes de outubro.

Categorías: Ciencia

Vodafone e unha ducia de grandes empresas amosarán en Vigo as claves do seu éxito

Mar, 10/03/2017 - 18:55

Vigo vai acoller o vindeiro 11 de outubro unha macrosesión de presentación de casos de éxito empresarial. E dicirmos o de “macro” non tanto pola cantidade de compañías que participan, mostrando os seus achados e os froitos recollidos ao longo das súas traxectorias no mercado, senón máis ben polo seu tamaño. Concorren, entre outras empresas de envergadura, a operadora de telecomunicacións Vodafone, UniversalPay (servizos de pago dixital e con cartón), JCDecaux (publicidade exterior), Mercedes-Benz, Banco Santander ou American Express. Todas elas debullarán as claves do seu éxito perante as PEME locais.
A cita será inaugurada ao fío das 9.00 horas polo alcalde de Vigo, Abel Caballero, e polo presidente da CEP, Jorge Cebreiros. Celebrarase no Museo de Arte Contemporánea de Vigo. Está prevista a asistencia de preto de 200 empresas galegas.
A sesión insírese no movemento Impulsando PEME, promovido por 13 compañías referenciais nos seus sectores e que conta coa colaboración de CEPYME. O seu obxectivo é o desenvolvemento e modernización das pequenas e medianas empresas do ámbito estatal, a partir das mellores ideas e innovacións de, en palabras dos impulsores do movemento, “grandes compañías que tamén foron PEME e que hoxe son líderes nos seus respectivos mercados”.
A xornada, ao longo de dúas horas, achegará aos presentes a cuestións como a dixitalización nas empresas, o aforro e a xestión eficiente da enerxía, a apertura de mercados internacionais, a prevención de “ciber-riscos”, a xestión intelixente de frotas, a sustentabilidade e xestión de residuos ou as oportunidades que ofrece o uso avanzado dos novos medios de pago.
Asemade, no transcurso do evento, farase entrega a dúas empresas galegas do Premio Vodafone á Transformación e do Premio Endesa á Eficiencia Enerxética.

Categorías: Ciencia

Creadores de videoxogos mostran no Campus de Ferrol as oportunidades (moitas) do sector

Mar, 10/03/2017 - 18:30

Chega a segunda edición dos Encontros Profesionais do Campus Industrial de Ferrol e, desta volta, tócalles aos seareiros de Código Cero máis preto que nunca. Por que motivo? Pois entre outras cousas porque o fío temático desta convocatoria son As potencialidades profesionais na industria dos videoxogos (PDF). Isto significa que imos poder escoitar in situ a algúns creadores de aventuras gráficas contándonos as súas experiencias e mostrándonos os camiños a seguir? Afirmativamente. Para quen queira anotalo na súa axenda, a cita será este 4 outubro no salón de actos do Campus ás 16:30 horas.
Nesta sesión intervirán Cristina Arbones Pérez e Bruno Galán Adega, graduados en Enxeñaría de Deseño Industrial e Desenvolvemento do Produto pola Universidade da Coruña.
En palabras da organización, “os Encontros Profesionais pretenden achegar o mundo profesional de antigos alumnos aos estudantes do Campus Industrial a través das súas propias experiencias laborais”.
Cristina Arbones Pérez estudou na Escola Universitaria de Deseño Industrial da UDC, onde obtivo o Grao e realizou un Mestrado propio Universitario en Deseño de Videoxogos: especialidade Deseño & Arte na Universidade de Málaga. Foi co-fundadora de MoitaPechá, un estudio formado para o desenvolvemento do videoxogo Paradaim; artista 2D e 3D en Pixel Surfers, estudio dedicado ao desenvolvemento de videoxogos e á formación e, actualmente, é deseñadora gráfica de mercadotecnia de videoxogos para ABYstyle Studio.
Bruno Galán Adega graduouse tamén na EUDI da UDC e realizou o mesmo mestrado na Universidade de Málaga. Na súa experiencia profesional, foi artista 2D en Altivasoft, empresa adicada ao desenvolvemento de videoxogos para móbiles, participando no desenvolvemento de máis de vinte proxectos dixitais deste tipo; co-fundou a empresa Aristokraken Games, adicada ao desenvolvemento de videoxogos para dispositivos móbiles, na que prosegue a día de hoxe.

Categorías: Ciencia

O CPETIG lévanos da man aos retos da informática xudicial e da intelixencia artificial

Mar, 10/03/2017 - 17:09

Este 4 de outubro toca falar de novas tecnoloxías e de todos aqueles puntos nos que estas se tocan cos ámbitos xudicial, policial e legal. O motivo? A celebración da sétima Xornada de Informática Xudicial, na Cidade da Cultura de Santiago e da man (novamente) do Colexio Profesional de Enxeñaría Técnica en Informática (CPETIG) en colaboración coa Axencia para a Modernización Tecnolóxica de Galicia (AMTEGA). Os temas a tratar serán múltiples e variados pero, segundo nos fixo saber recentemente o colexio que preside Marcos Mata, farase especial fincapé na intelixencia artificial, un ámbito en proceso de medre cuxas infinitas contribucións para mellorar a nosa vida persoal e empresarial precisarán, sen remedio, de medidas acordes de protección. Tanto dos datos xerados, como dos sistemas como de nós mesmos os usuarios.
A cita será inaugurada ás 9.30 horas por Mar Pereira, directora da Axencia para a Modernización Tecnolóxica de Galicia, AMTEGA; acompañada polo director xeral de Xustiza, Juan José Martín; e o presidente do Colexio de Enxeñaría Técnica en Informática de Galicia, CPETIG, Marcos Mata.
A edición deste ano, convocada baixo o título Ciberseguridade, privacidade e intelixencia artificial, adopta o nome propio de #IURISTICGAL17. Baixo este epígrafe e este nome, a organización busca principalmente “singularizar o evento”, unha cita “moi consolidada” a nivel galego e estatal e que serve de punto de referencia para a reflexión e o debate acerca dos rumbos que debera seguira loita contra o cibercrime.
Segundo nos conta o CPETIG, a xornada reunirá un salientábel panel de relatoras/es expertas/os do ámbito da avogacía, a enxeñaría informática, a maxistratura e as forzas de seguridade do Estado, que “darán unha visión integral da ciberseguridade e da revolución que supón a intelixencia artificial na aplicación da lei”.
Nun plano máis detallado, farase fincapé en cuestións innovadoras como a condución autónoma ou as fábricas plenamente automatizadas, e en como estes escenarios están a ser percibidos pola sociedade dun xeito ambivalente, á vez como oportunidade e como ameaza, “especialmente pola inevitábel destrución de postos de traballo que serán copados progresivamente por robots intelixentes”. En palabras da organización da xornada, esta “complexa realidade abre numerosas esixencias no eido do dereito, de xeito que os profesionais da xustiza están obrigados a coñecer, interpretar e aplicar estas tecnoloxías para dar unha resposta acorde aos crecentes requirimentos”.
Nun plano máis concreto e meténdonos xa no programa, sinalar que a intelixencia artificial na interpretación e na aplicación da lei, mediante un xuíz robot, será o tema de apertura da VII Xornada de Informática Xudicial, cun relatorio ofrecido por Alejandro Sánchez del Campo Redonet, regulatory counsel en Telefónica Digital.
Despois, Ofelia Tejerina, avogada da Asociación de Internautas e membro do Grupo de Traballo sobre Dereitos Dixitais da Secretaría de Estado para a Sociedade da Información e a Axenda Dixital, exporá un relatorio sobre privacidade e dereitos fundamentais.
A ciberseguridade e a peritaxe informática centrarán o terceiro dos relatorios, ofrecido por Pilar Vila, perita informática en Forensic &Security, seguido dunha mesa redonda sobre Privacidade e xustiza ante un mundo plenamente dixital, moderada por Víctor Salgado, avogado TIC e director técnico da xornada.
A sesión de tarde comezará coa exposición de Juan Antonio Frago, fiscal do Grupo de Delitos Económicos en A Coruña, titulada e-Xustiza, mito ou realidade?, para dar paso despois a Manuel Guerra, analista forense na Sección Técnica da Unidade Central de Investigación Tecnolóxica, UIT, da Policía Nacional, que exporá o relatorio titulado A ciberdelincuencia desde o outro punto de vista.

O xuíz Eloy Velasco falará novamente na xornada do CPETIG

Como punto e final, #IURISTICGAL17 rematará cunha mesa redonda sobre Efectividade na persecución dixital de delitos e a súa validez probatoria na que actuará como relator e moderador Eloy Velasco, maxistrado da Sala de Apelación da Audiencia Nacional.
Programa de actividades
Ciberseguridade, privacidade e intelixencia artificial
9:00
Recepción e Entrega do Material
9:00
9:30
Recepción dos asistentes e entrega do material correspondente á VII Xornada Xudicial.
9:30
Presentación VII Xornada Xudicial
10:00
O xuíz robot: a intelixencia artificial na interpretación e aplicación da lei
10:50
Privacidade e dereitos fundamentais na Sociedade da Información
11:40
Descanso Café
12:10
Ciberseguridade e peritaxe informática
13:00
Mesa Redonda I
14:00
Xantar
16:00
A e-xustiza mito ou realidade?
Ciberdelincuencia desde outro punto de vista
17:40
Mesa Redonda II
18:45
Clausura

Categorías: Ciencia

Xeopesca convídanos a iniciar proxectos de hardware libre

Mar, 10/03/2017 - 17:08

O vindeiro sábado 14 de outubro a asociación Xeopesca vainos achegar unha cita para compartirmos coñecemento e habilidades arredor do hardware libre. O encontro será novamente no Centro Sociocultural de Caramoniña de Santiago, emprazamento (tamén) das máis recentes actividades de divulgación de Xeopesca. Un dos obxectivo desta cita (Biblioteca de Hardware Libre) será, en palabras da organización, axudarnos a que iniciemos proxectos con tecnoloxías sen cancelas, abertas e cen por cen dispoñíbeis.
Con esta finalidade, entre as 10:00 e as 13:30 horas levarase a cabo un servizo de empréstamo de placas Arduino e Raspberry co obxectivo de que “afondemos na súa aprendizaxe e poidamos colaborar coa comunidade que apoia e tira proveito destas tecnoloxías”.
Segundo nos contan dende Xeopesca, para participarmos no obradoiro precisaremos carrexar o noso computador portátil co seu cargador e, previamente, inscribirnos na actividade no enderezo específico habilitado.
Esta cita do 14 de outubro forma parte do programa de accións que a asociación Xeopesca realiza no marco do convenio de colaboración asinado coa Axencia para a Modernización Tecnolóxica de Galicia (AMTEGA), e incluídas no Plan de Acción de Software Libre 2017 da Xunta de Galicia.

Categorías: Ciencia

O CPEIG gozará de descontos ao rexistrar dominios .gal

Mar, 10/03/2017 - 11:19
Dario Janeiro, director xeral da Asociación PuntoGal

O Colexio Profesional de Enxeñaría en Informática de Galicia (CPEIG) e a Asociación PuntoGal ampliaron hoxe un convenio de colaboración que lles posibilitará obter aos enxeñeiros colexiados un importante desconto na adquisición de dominios á vez que desenvólvese o patrocinio que PuntoGal realizou o pasado xuño da Noite da Enxeñaría en Informática de Galicia que organiza o CPEIG.
O convenio entre PuntoGal e o CPEIG permitiralles aos enxeñeiros e enxeñeiras colexiados un desconto importante no rexistro dos dominios .gal, cunha rebaixa de máis do 60% sobre o prezo de venta do dominio. Para iso, PuntoGal habilitoulle ao Colexio unha serie de códigos de desconto que poderán ser validados a través das dúas empresas rexistradoras que se uniron á promoción: Dinahosting e CDmon. O propio CPEIG será o encargado de xestionar e distribuír os códigos entre os colexiados e colexiadas.
O presidente do CPEIG sinala que este convenio «reforza os lazos entre dúas entidades destacadas pola súa labor de fomento das TICs en Galicia, promovendo ao mesmo tempo o uso do dominio propio da sociedade galega». Pola súa banda, o director xeral de PuntoGal, Darío Janeiro, sinalou que a sinatura «pon sobre o papel unha traxectoria de entendemento e colaboración xa existente entre ambas entidades que agora se materializa nuns descontos importantes para que os colexiados e colexiadas poidan ter un .gal a un prezo moi competitivo». Janeiro agradeceu o apoio que, «dende o primeiro momento, o CPEIG fixo e segue facendo ó dominio .gal».

Categorías: Ciencia

Vitae introdúcenos nos segredos de React e Redux para optimizar o noso desenvolvemento TIC

Mar, 10/03/2017 - 09:41

Vitae Consultores vai achegar este mes de novembro unha actividade formativa especialmente preparada para os nosos profesionais TIC que queiran optimizar o seu traballo de desenvolvemento (aplicacións modernas con capacidade de adaptación e evolución, doadas de xestionar, de manter e de probar) e desta maneira incrementar a súa produtividade. A terceira edición do Curso React e Redux: Desenvolvemento frontend moderno mostraralles aos creadores de ferramentas e servizos TIC como fortalecer as devanditas vertentes de traballo ao tempo que se familiarizan ao máximo con React e Redux. O obradoiro terá unha duración de 20 horas e desenvolverase na Coruña (Hotel Attica 21) os días 3, 4, 10 e 11 de novembro.
Segundo explica Vitae, React é unha libraría Javascript para construír interfaces de usuario que proporcionan, entre outras cousas, unha maneira doada de crear compoñentes personalizados. A maiores, sinala a consultora, “é extremadamente eficiente e flexíbel” e ten capacidade para afacerse a novas contornas e necesidades. Por outra banda, atesoura recursos para xestionar a vista e os seus estados de xeito sinxelo, “o que incrementa a produtividade no desenvolvemento de aplicacións”.
Respecto da súa orixe, React foi materializada e mantida por Facebook e trátase dun recurso en rápido crecemento. Está a ser empregado pola devandita rede social e por outras de primeiro nivel como Instagram, Netflix, Paypal, Imgur, Feedly ou Airbnb. Segundo salientan dende Vigo, trátase de código aberto, polo que conta cunha gran comunidade ás súas costas que velan por ela, incluíndo os propios equipos de Facebook e Instagram.
Redux, pola súa banda, é un contedor de estado que funciona de maneira preditiva e que nos axuda a xestionar o estado dunha aplicación cando esta incrementa a súa complexidade. En parte foi posta en funcionamento por Flux, que é o patrón de arquitectura de aplicación que empregan Facebook e outras moitas compañías no desenvolvemento de aplicacións React.
“Neste curso”, explican dende a consultora, “o alumno aprenderá a empregar estas tecnoloxías, xunto con outras como o xestor de paquetes de Node (npm) e Webpack para aumentar a súa produtividade ao ser quen de desenvolver aplicacións modernas que sexan flexíbeis e sinxelas de manexar, manter e probar”.
Este obradoiro insírese na estratexia de Vitae a prol de mellorar a formación e capacitación dos nosos profesionais e empresas no sector das novas tecnoloxías da información, centrándose na mesma medida nos aspectos humanos e organizativos que nos aspectos tecnolóxicos.
O encargado de impartir estes contidos será Félix Horro Pita, enxeñeiro técnico en Informática e profesional con máis de 13 anos de experiencia como programador na empresa Corunet, amais de co-desenvolvedor de grandes proxectos para empresas do talle de Inditex, Abanca ou BricoKing.

Categorías: Ciencia

A UVigo intégrase na organización que impulsa o avance dos sistemas de comunicación 5G

Lun, 10/02/2017 - 23:23
O investigador da Universidade de Vigo, Felipe Gil

A Universidade de Vigo xa é membro oficial da entidade internacional que traballa nas tecnoloxías de comunicación 5G, que é a nova xeración de banda larga sen fíos, con capacidade para meirandes velocidades, cobertura e funcionalidades cá actual (a tecnoloxía LTE-4G) e con potencial para ser 100 veces máis rápida. A entidade internacional na que vén de xuntar forzas a UVigo non é outra que a OpenAirInterface (5G software alliance for democratising wireless innovation), unha alianza que promove a creación de novas solucións abertas para o núcleo de rede (EPC), a rede de acceso e os equipos de usuario para as futuras redes de comunicación 5G.
Segundo informa a Universidade, a súa concorrencia materialízase a través da área Data Networks de AtlantTIC, sendo o investigador do grupo GTI Felipe Gil a persoa que se encargará de xestionar esta colaboración. Segundo explica, OpenAirInterface Software Alliance é “unha organización sen ánimo de lucro que se financia con contribucións dos socios empresariais e que busca avanzar nas tecnoloxías de comunicación 5G”. Para iso, engade, “a organización está desenvolver compoñentes software que permitan crear unha rede de comunicación 4G ou 5G empregando hardware comercial ao alcance de calquera”. Segundo salienta Gil, “esta organización está a dar forma ás pezas que farán posíbel que o avance na creación dos sistemas de comunicación 5G sexa máis rápido, xa que ao publicalas como código libre facilítase a participación de máis entidades e investigadores, e até agora, a maior parte da investigación só a podían facer os grandes vendedores de equipos de telecomunicación”.
Entre os membros desta institución está Eurecom, centro de investigación francés que lanzou a iniciativa, así como empresas como Nokia (cos seus laboratorios de investigación Bell Labs), Fujitsu, Orange, Technicolor e TCL (propietarios das marcas Alcatel e Thomson) ou diversas universidades e entidades de investigación como universidades estadounidenses, francesas, inglesas, alemás, chinesas e españolas.
A entrada da institución viguesa nesta asociación responde á estratexia aliñada coas novas tecnoloxías NFV (Virtualización de funcións de Rede) e SDN (Redes Definidas por Software) aplicadas especificamente ao novo marco tecnolóxico que abre o 5G. Así, a Universidade de Vigo participará “nunha iniciativa punteira mundial” que xa está achegando resultados que van cambiar os sistemas de comunicación móbiles. Por un lado, engade, “permítenos estar ao día das últimas novidades e, por outro, contribuír e influír neses avances”.

Categorías: Ciencia

Xiaomi podería contar cunha tenda oficial en Madrid

Lun, 10/02/2017 - 23:00

Que Xiaomi superase en número de smartphones vendidos a Apple en España non debería pillar por sorpresa a ninguén, pese a non contar con distribución oficial no noso territorio, pero o fabricante chinés vai ter as cousas máis doadas nos vindeiros meses, se atendemos á información publicada por Cinco Días, medio que asegura que no mes de novembro Xiaomi abrirá a súa primeira tenda oficial.
Ao parecer, Xiaomi abriría o seu primeiro establecemento español no centro comercial de Xanadú en Madrid, e sería o primeiro de varios que estarían repartidos pola xeografía española dentro dunha campaña de expansión internacional.
A apertura dunha tenda de Xiaomi sería unha grande nova para os amantes da marca, xa que non só garantiría a dispoñibilidade de moitos dos produtos da marca (que non se limita a smartphones, senón que ten un amplo abano de produtos de electrónica de consumo entre os que non faltan drons e patíns eléctricos), senón que tamén daría a seguridade de contar con garantía europea e servizo técnico, así como poder ver e tocar os produtos antes de adquirilos.
Pese a que a nova difundida asegura que a tenda será de Xiaomi, non parece que sexa unha afirmación moi rigorosa, e o máis probable é que esteamos ante unha tenda autorizada ou Authorized Reseller, como a que vén de abrir en Atenas (e que pertence realmente á compañía Info Quest Technologies), ou sexa, que podemos entender que a presenza de Xiaomi en España pasaría a ser semellante á de Apple en Galicia (onde non temos ningunha Apple Store, pero si varios Apple Reseller).

Categorías: Ciencia

Microsoft di adeus ao seu servizo de streaming musical

Lun, 10/02/2017 - 20:30

No ano 2012 Microsoft estrou o servizo Xbox Music, que ofrecía un catálogo musical con 30 millóns de cancións para competir con Spotify e que coa chegada de Windows 10 pasaría a chamarse Groove, pero en vista de que o servizo non conseguiu callar, anuncian hoxe que van abandonar o sistema de subscrición de Groove, mantendo a funcionalidade de reprodución musical dos contidos propios do usuario, e facilitando a migración desta plataforma a Spotify, de xeito que os usuarios poderán trasladar as súas listaxes de reprodución e coleccións a Spotify dun xeito sinxelo.
Microsoft pon así data de caducidade á aplicación Groove que coñecemos hoxe, xa que a partires do 31 de decembro deixarán de ofrecer o streaming, a compra e a descarga musical a través desta aplicación.
A migración entre Groove e Spotify é un proceso pouco traumático, xa que chega con ter instaladas as últimas versións da aplicacións, identificarse nas mesmas e seguir as instrucións que aparecerán en pantalla se somos subscritores do servizo de pagamento de Groove.
A elección de Spotify como substituto de Groove non é algo aleatorio, senón que dende Microsoft son conscientes de que é a plataforma de streaming musical máis completa a nivel mundial, con grande soporte de dispositivos entre os que non falta a consola Xbox One, de aí que os usuarios non percibirán carencias no servizo, senón que incluso terán máis opcións, o que facilita a transición que deberá concluírse antes do 31 de xaneiro de 2018 de querer conservar a información en Groove.

Categorías: Ciencia

Concello, USC e CESGA mostran nos coles o gran labor das nosas investigadoras

Lun, 10/02/2017 - 16:15

Imos ter, estes días, nova edición do programa Unha enxeñeira ou científica en cada cole, organizado pola Oficina de Igualdade de Xénero da Universidade de Santiago e o Concello de Santiago a través do Departamento de Igualdade, no que participaban os colexios composteláns. Nesta nova entrega, que novamente busca visualizar no ámbito docente o traballo de enxeñeiras e científicas locais (co fin de espertar vocacións STEM entre as estudantes e contribuír a derrubar a falsa crenza de que a ciencia e a tecnoloxía non son aptas para elas), participan o CEIP López Ferreiro, o CEIP Mestre Rodríguez Xixirei, o CEIP Pío XII, o CEIP Raíña Fabiola, o CEIP de Roxos e o CEIP de Vite. O programa, que inclúe obradoiros para o alumando de quinto de Primaria, volverá contar coa presenza activa de investigadoras da Universidade de Santiago (por exemplo do CiTIUS) e do Centro de Supercomputación de Galicia (CESGA).
Entre as relatoras atópanse Natalia Costas e Mª José R. Malmierca, do CESGA, que concorren co obradoiro Falando cos superordenadores. Nesta sesión, “de forma lúdica e práctica”, levaranse a cabo varias experiencias de uso da programación básica e a súa interacción con microcontroladores e diversos compoñentes externos. Tamén traballará no programa a profesora María Jesús Taboada Iglesias da Área de Ciencias da Computación e Intelixencia Artificial da USC, que falará do significado da intelixencia. E tamén intervirá, entre outras, a profesora Eva Cernadas, do Departamento de Electrónica e Computación da USC e investigadora do CiTIUS (este 4 de outubro no Pío XII para mostrar as aplicacións da informática visual na bioloxía).
Como sinalamos por estas mesmas datas o ano pasado, a iniciativa Unha enxeñeira ou científica en cada cole ten como principal obxectivo dar a coñecer ás enxeñeiras e científicas para crear referentes femininos e incentivar a presenza de rapazas en carreiras relacionadas coas disciplinas coñecidas como STEM (Ciencia, Tecnoloxía, Enxeñaría e Matemáticas), tradicionalmente asociadas ao mundo masculino. Na anterior edición desenvolvéronse unha vintena de obradoiros onde se mostrou a relación da ciencia e das tecnoloxías coa nosa vida cotiá co fin de achegar ao alumnado a estas disciplinas dun xeito lúdico.
As temáticas foron moi variadas: programación, supercomputadores, física divertida, xogos coa luz, informática visual aplicada á bioloxía, astronomía, pegada ecolóxica, realidade virtual e aumentada ou intelixencia artificial, entre outras e as encargadas de impartilos foron científicas e enxeñeiras da Universidade de Santiago e do Centro de Supercomputación de Galicia (CESGA).

Categorías: Ciencia

Amplíase até o 6 de outubro o prazo do Premio ao Mellor Proxecto Universitario con Licenza Libre

Lun, 10/02/2017 - 14:36

A Axencia para a Modernización Tecnolóxica de Galicia (AMTEGA) vén de anunciar que amplía o prazo de presentación de candidaturas á décima edición do Premio ao Mellor Proxecto Universitario con Licenza Libre. A prórroga, até o vindeiro día 6 de outubro, diríxese en palabras da axencia “a facilitar a inscrición aos alumnos que teñan presentado o seu proxecto nos tribunais no mes de setembro”. Os requerimentos que deben cumprir estes traballos son: ter sido realizados cunha implementación libre de calquera linguaxe de programación e ter publicado o software desenvolvido durante o proxecto cunha licenza libre entre as recoñecidas como tal pola Free Software Foundation ou a Open Source Initiative. Así mesmo, tamén poden participar proxectos que fagan uso de hardware libre.
AMTEGA tamén lembra que os estudantes interesados en participar neste certame deben seguir todos os pasos requiridos nas bases do premio antes vindeiro seis de outubro: inscrición do proxecto na forxa de mancomún, entrega de memoria, alta na listaxe de correo do premio e cumprimentado do formulario de inscrición. Logo, unha vez rematado o prazo de presentación das candidaturas, o xurado seleccionará os finalistas que deberán acudir ao acto de resolución do premio, que se celebrará o vindeiro día 27 de outubro na Cidade da Cultura. A axencia recorda a maiores que os finalistas deberán realizar unha breve presentación do traballo realizado no seu proxecto, facendo especial fincapé nos aspectos do seu proxecto relacionados co software libre, dos logros acadados ou as perspectivas de futuro, entre outros.
O xurado valorará o nivel de actividade pública do traballo, é dicir, a publicación continúa do traballo, ben sexa utilizando as listas de correo dun proxecto existente, as da forxa de mancomun.org ou calquera outro medio web; o emprego axeitado dunha licenza libre: e calidade do proxecto.
“Este premio”, explica a axencia, “ten por obxectivo non só recompensar a un proxecto tecnicamente bo, senón a un bo proxecto de software libre”.
O galardón, como lembraremos, está dotado con 2.250 euros, repartidos nun primeiro premio de 1.500 euros e nun segundo de 750 euros, grazas á achega do Consorcio para o desenvolvemento de aplicacións para a Xestión Universitaria (CIXUG), e do Grupo de programadores e usuarios de Linux (GPUL), respectivamente. Ambas entidades son patrocinadoras do premio no marco do convenios de colaboración asinados coa AMTEGA para a realización de actividades de promoción do software libre en Galicia.
Toda a información sobre como participar está dispoñible na páxina do premio dentro do portal Mancomún.

Categorías: Ciencia

As TIC baten forte na quinta edición de ViaGalicia

Lun, 10/02/2017 - 13:06

As entidades responsábeis de ViaGalicia, a aceleradora de empresas tecnolóxicas con sede de seu en Vigo e Lugo, veñen de facer reconto das expectativas (moitas) que acompañan a quinta edición do programa. Segundo indican, un total de 202 iniciativas empresariais presentáronse a esta nova edición da palestra innovadora, promovida polo Consorcio Zona Franca de Vigo e Xunta de Galicia, que pechou o 29 de setembro o prazo de inscrición de proxectos. En concreto, 149 iniciativas empresariais presentáronse para a súa aceleración na sede de Vigo e un total de 53 para a de Lugo. Unha vez máis, teñen un papel salientábel os proxectos vencellados ás Tecnoloxías da Información e Comunicación (TIC), que supoñen máis dun 18% do total. Ao abeiro desta porcentaxe teñen cabida iniciativas do máis variado: de aplicacións tecnolóxicas, de servizos de software ou as iniciativas de organización de procesos.
Ao sector TIC ségueno en importancia as propostas relacionadas co sector da agroalimentación e a pesca (11%), o turismo e a hostalaría (10%) e a cultura e o lecer (10%).
De entre todas as propostas, o comité técnico de ViaGalicia seleccionará, tendo en conta os criterios de innovación, investibilidade, acelerabilidade e relevancia das propostas, até un máximo de corenta proxectos por sede, que se darán a coñecer a principios do mes de novembro para a súa participación na seguinte fase. Para iso, desde ViaGalicia realizaranse diversas entrevistas cos emprendedores, co obxectivo de coñecer mellor as propostas, aclarar algunhas dúbidas e coñecer aos equipos promotores.
Esta quinta edición conta cun orzamento de 2,65 millóns de euros, destinados á formación, asesoramento, apoio, traballo cooperativo (coworking) e financiamento dos proxectos que participen no programa de aceleración.

Categorías: Ciencia

AMTEGA e Orange organizan en outubro trece obradoiros para maiores sobre o uso dos móbiles

Lun, 10/02/2017 - 12:20

A Axencia para a Modernización Tecnolóxica de Galicia (AMTEGA) segue a tirar proveito dos seus acordos coas operadoras de telecomunicacións no camiño de combater as fendas dixitais en calquera das súas manifestacións. Nesta liña, na liña de loitar contra a exclusión relativa ás TIC (ao tempo que se fomenta a dinamización social) sitúase a iniciativa Ao lado dos nosos maiores, posta en marcha con Orange. Trátase dun programa de actividades que abrangue obradoiros de balde sobre o uso de dispositivos móbiles para maiores. No mes de outubro, por terceiro mes consecutivo, achegará 13 obradoiros (entre o 2 e o 20 de outubro).
As actividades serán novamente nas aulas CeMIT dos concellos, un por cada taller. Terán unha duración máxima de 2 horas e estarán impartidos por persoal da dita compañía, que fornecerá aos asistentes de tabletas e móbiles para realizar as actividades do curso.
O obxectivo principal desta actividade, que se está a desenvolver en 23 concellos con aulas CeMIT, é “ensinar aos participantes as pautas básicas do funcionamento das tabletas e móbiles para facer a súa experiencia máis doada, que adquiran maior autonomía persoal e se familiaricen coa tecnoloxía móbil”. Entre outros contidos tratarase como acceder ás redes móbiles e Wi-Fi, enviar e recibir WhatsApp, enviar fotos, vídeos e mensaxes, gardar os contactos e todas aquelas dúbidas que lles poidan xurdir no uso normal do teléfono e/ou tableta.
O único requisito para poder asistir a estas actividade gratuíta é solicitar praza na localidade de interese, ben directamente na aula CeMIT de cada concello, ou a través da web http://cemit.xunta.gal.
Plan de Inclusión Dixital de Galicia 2020
Orange vén de incorporarse ao colectivo de máis de 700 aliados dixitais do Plan de Inclusión Dixital de Galicia 2020, impulsado pola AMTEGA, ao que se poden sumar aquelas empresas e entidades interesadas en participar no desenvolvemento da sociedade dixital en Galicia no marco da súa responsabilidade social empresarial, mediante a achega de recursos financeiros, humanos ou, como neste caso, de coñecemento.
O Plan de Inclusión Dixital é a estratexia autonómica para “facilitar a calquera persoa, con independencia do nivel dixital no que se atope, avanzar, madurar e acceder a maiores niveis de coñecemento e uso das TIC.

Categorías: Ciencia

Vodafone estrea tarifa plana de vídeo móbil por 8 euros/mes

Lun, 10/02/2017 - 11:27

Aínda que no fogar estamos afeitos a consumir contidos da Internet sen limitacións, cando empregamos conexións móbiles, pese a ter cada vez un maior límite de datos dispoñibles, temos que medir o consumo, especialmente para a reprodución de contidos en streaming, o que no verán levou a Vodafone a lanzar Vodafone Pass.
Vodafone Pass contaba até o momento con dúas modalidades: Social Pass, que por 3 euros/mes facilita o uso sen limitacións de Facebook, Twitter, Instagram e outras plataformas sociais, e Music Pass, que por 5 euros/mes facía o propio con Apple Music, Spotify, Napster, SoundCloud e Deezer. E agora o operador achegará unha nova modalidade moi esperada, Video Pass, que por 8 euros/mes permitirá gozar do streaming de vídeo das aplicacións máis populares (con calidade limitada) sen descontar datos da nosa tarifa.
Deste xeito, os clientes de Vodafone que paguen 8 euros/mes poderán gozar de YouTube, HBO, Netflix, Vimeo, Rakuten TV, Twitch, Vodafone TV Online, YouTube Kids, Vevo e Daily Motion sen límite de tráfico, aínda que bloqueando a resolución máxima a 720p, mentres que os usuarios que non se conformen con tal resolución poderán pagar 17 euros/mes para así poder gozar de contidos en Full HD. Unha solución que resultará de grande utilidade especialmente durante os períodos nos que se estea afastado do fogar (por exemplo, de viaxe ou vacacións) para así poder manter os hábitos de consumo audiovisual sen ter que facer un grande desembolso económico.
Adicionalmente tamén se estrea Maps Pass, que por 3 euros/mes ofrece acceso sen límite a Google Maps, Google Earth, HERE, Tomtom, iCoyote e Waze.

Categorías: Ciencia

A galega OpSeeker, primeira startup estatal no programa de aceleración Startupbootcamp fintech

Lun, 10/02/2017 - 10:35

A startup santiaguesa OpSeeker, especializada en adestramento financeiro en liña, foi seleccionada pola aceleradora de proxectos tecnolóxicos Startupbootcamp para o seu programa de impulso empresarial destinado a firmas de nova creación pertencentes aos aos sectores fintech e ciberseguridade. Segundo nos contan dende OpSeeker, esta aceleradora emprazada en Ámsterdam ofrece un programa de tres meses nesta cidade e, dende alí, centra os seus esforzos en preparar ás novas firmas seleccionadas para traballar con compañías financeiras líderes en todo o mundo. Entre os socios da aceleradora atópanse Mastercard, PwC, Lloyds, Rabobank, ING ou ABN Amro.
Nesta edición, un total de 11 compañías foron seleccionadas entre as 541 solicitudes enviadas desde 73 países. Os equipos seleccionados deberán “superar agora tres meses de duro traballo”, sinalan dende Opseeker, explicando que ao remate deste camiño de adestramento agárdalles o Demo Day, que será en febreiro do 2018 e que servirá para que as participantes presenten os seus resultados a centos de startups, tech influencers, mentores, socios e investidores. Recibirán tamén 15.000 euros de investimento e, asemade, un espazo para traballar na capital holandesa. Ademais, terán a oportunidade de traballar de xeito conxunto con empresas como Rabobank, ABN Amor, ING, PGGM, Nationale Nederlanden ou De Volksbank, entre outras.
En palabras do director executivo (CEO) de OpSeeker, Gonzalo Camiña, “a nosa proposta de mellorar a saúde financeira dos clientes das grandes institucións financeiras non puido ter un mellor recibimento en Holanda, un país que, malia o seu magnífico sistema económico e financeiro, quere sempre mellorar a súa proposta de valor para o cliente final”.
Segundo engade, para o proceso de selección na Startupbootcamp foi clave a participación de OpSeeker no programa Santander Yuzz, no que “fomos elixidos gañadores do VIII Edición no Centro de Santiago de Compostela”. Amais disto, tamén foi decisiva a concorrencia de OpSeeker no programa de aceleración de ABANCA Innova by Conector. “Sen estas dúas magníficas experiencias non poderiamos conseguir entrar no programa de Startupbootcamp”, explica.

Categorías: Ciencia

Dende AMTEGA salientan que o novo Regulamento Europeo de Protección de Datos incrementa os dereitos dos cidadáns

Sáb, 09/30/2017 - 01:44

Reforzar a confianza dos cidadáns no uso dos servizos dixitais é un dos obxectivos da Axenda Dixital de Galicia 2020 e o novo Regulamento Europeo de Protección de Datos incrementa os dereitos dos cidadáns e implica un maior compromiso das administracións públicas e das empresas neste ámbito. Así o sinalou hoxe a directora da AMTEGA, Mar Pereira na clausura da a Xornada sobre a adaptación da Lei de Protección de Datos ao Regulamento Europeo, organizada polo Colexio Profesional de Enxeñaría en Informática de Galicia. No acto interviñeron tamén a directora da Escola Galega de Administración Pública (EGAP), Sonia Rodríguez-Campos e a directora da Axencia Española de Protección de Datos (AEDP), Mar España.
A directora a AMTEGA indicou que o novo Regulamento supón unha harmonización e unidade de criterio en canto á aplicación e garantía dos dereitos dos cidadáns europeos en materia de privacidade e protección de datos e que incide en tres aspectos: a accesibilidade, a prevención e a proactividade.

Aplicación do novo regulamento europeo na Xunta de Galicia

A Xunta de Galicia, a través da AMTEGA, está afrontar as novas obrigas normativas con liñas de traballo orientadas a identificar con precisión as finalidades e a base xurídica dos tratamentos que levamos a cabo e a elaborar un Rexistro de actividades; deseñar a figura do Delegado de Protección de Datos (DPD) adaptado á contorna da administración pública galega; implementar accións de concienciación e formación para o persoal da administración e desenvolver unha guía que facilite o exercicio de dereitos por parte da cidadanía establecer o principio de transparencia como o alicerce fundamental nas relacións cos cidadáns, facilitando a información o máis completa, concisa, clara e transparente posible.

O trabalo realizado: Plan de Ciberseguridade

Todos estes medidas de adaptación enmárcanse no Plan Director de Seguridade TIC da AMTEGA, que se está a actualizar para incorporar as liñas de traballo derivadas da aparición desta nova normativa
A través deste Plan estanse a desenvolver diferentes actuacións que nos permitiron aumentar as capacidades de prevención, detección e reposta ante incidentes de seguridade.
Todas estas melloras permitiron tamén unha mellor colaboración coas Forzas e Corpos de Seguridade do Estado, achegando información de valor para axudar na investigación de posibles de delitos relacionados co ciberespazo.
A nivel organizativo, constituíronse na Xunta de Galicia órganos colexiados coa responsabilidade do goberno dos aspectos relacionados seguridade da información, con participación de tódalas consellerías da Xunta de Galicia, a Asesoría Xurídica e AMTEGA, xa que a seguridade da información non é un aspecto unicamente técnico e é necesario elevar esta cuestión a niveis directivos das organizacións.
As liñas de actuación deste Plan Director veranse reforzadas mediante a Lei de Administración Dixital de Galicia (LEDIXGA), actualmente en proceso de elaboración e coa que buscamos prestar un servizo personalizado e de carácter proactivo á cidadanía, podendo a Administración ofrecer vantaxes grazas ás relacións xa existentes cos cidadáns. Para iso será necesario garantir o cumprimento da lexislación aplicable en materia de Protección de Datos e, en particular, no caso de compartición de datos entre distintos organismos da mesma administración

Formación da EGAP

Pola súa banda, a directora da EGAP resaltou o apoio constante da Escola a todas aquelas actividades formativas que contribúan á capacitación dos empregados públicos. Esta xornada comporta unha relevancia especial dentro do sector público como consecuencia do auxe da Administración electrónica, que trae consigo numerosos retos aos que os empregados públicos deberán facer fronte. Por este motivo, segundo Sonia Rodríguez-Campos, faise ineludible a convocatoria de actividades formativas que contribúan a crear un escenario de seguridade xurídica.
Esta situación motivou que na EGAP se ofrezan cursos sobre protección de datos persoais dentro do plan anual desde hai xa varios anos, tanto a través de actividades específicas como O novo regulamento europeo en materia de tratamento de datos persoais ou Seguridade da información como incluíndo estes coñecementos de maneira transversal noutras actividades formativas.

Categorías: Ciencia

Trescentos profesionais e empresarios participaron na Noite Galega das Telecomunicacións

Ven, 09/29/2017 - 22:30
Instantánea de Sergio Aramburu

Finalmente celebrouse este venres, no recinto de PALEXCO (A Coruña) e contando coa presenza de 300 profesionais e empresarios do sector, a XXII Noite Galega das Telecomunicacións e da Sociedade da Información. A gala, organizada un ano máis polo Colexio Oficial e a Asociación de Enxeñeiros de Telecomunicación de Galicia, COETG-AETG, comezou ás 20.00 horas e estivo presidida polo titular da Xunta de Galicia, Alberto Núñez Feijóo. A actriz Silvana Sestelo presentou o evento, que xirou arredor da necesidade de adestrarnos e xuntar forzas para tirar proveito das oportunidades da información a gran escala e facelo con total seguridade e confianza. Segundo fixo saber na súa intervención Julio Sánchez Agrelo, decano do Colexio e presidente da AETG, “só desde a unión podemos avanzar e afrontar con éxito os grandes retos que se nos presentan cada día como son, entre outros, a ciberseguridade e o Big Data. Ou facémolo nós ou alguén o fará por nós”.
A cita comezou ás oito da tarde cun networking, no que participaron uns 300 profesionais e empresarios do sector. Ás 21.30 horas principiou a gala (adicada como dixemos á ciberseguridade) presentada pola actriz e bailarina Silvana Sestelo. En palabras da organización, “foi un espectáculo disruptivo e orixinal, no que se conxugaron, con gran ritmo, a música, a iluminación, a danza, a proxección de vídeos, os discursos e a entrega de premios”.
No seu transcurso foron galardoados profesionais e empresas: Enxeñeiro do Ano, Paulino González; Socio de Honra, Mar Pereira, directora da Axencia para a Modernización Tecnolóxica de Galicia (AMTEGA); Enxeñeiro Gerardo García Campos á mellor iniciativa empresarial no sector TIC, Situm Technologies; Gradiant á mellor tese doutoral aplicada ao sector TIC, Alejandro Ramos Soto; ao Mellor Proxecto TIC con Beneficios Sociais, outorgado en colaboración coa AMTEGA e a firma Balidea Consulting & Programming; ao mellor expediente académico do Máster en Enxeñería de Telecomunicación da Universidade de Vigo, Víctor Manuel Segura Sieiro; e o premio Acuntia á empresa galega que aposta polo desenvolvemento de infraestruturas intelixentes de telecomunicacións, FINSA.
No nome dos premiados interveu Paulino González, quen subliñou que volvendo a vista atrás, “pódolles dicir que foi unha satisfacción exercer como teleco. Se volvese nacer, volvería elixir, sen dúbida, esta marabillosa profesión”. González fixo referencia ao seu paso por Telettra, Airtel e Vodafone e á súa contribución ou desenvolvemento da rede de telefonía móbil de Vodafone en Galicia, que, dixo, “posibilitou a dinamización do mercado e a sempre estimulante competencia”. E unha consecuencia clara: “Unha maior calidade dun servizo, que hoxe é de primeira necesidade”.
“A infraestrutura da nosa rede”, engadiu Paulino González, “desenvolveuse en igualdade de condicións que no resto de España, tanto en tempo como en calidade. O que, por desgraza”, dixo, “non podemos afirmar en relación con outras infraestruturas tamén esenciais”.
O enxeñeiro do año rematou o seu breve discurso cunha referencia familiar e adicando o premio a un “elenco de extraordinarios profesionais que me axudaron e acompañaron ao longo desta fantástica carreira profesional. Sen eles nada sería posible”. Por iso, engadiu, “nun acto de xustiza, quero compartir con todos eles o premio que tiveron a amabilidade de concederme”.
A Noite desenvolveuse logo do proceso electoral celebrado no primeiro semestre deste ano, co que se abre “unha nova etapa no Colexio e na Asociación de Enxeñeiros de Telecomunicación de Galicia”. Segundo salientou Julio Sánchez Agrelo, “estamos aquí para recoller a magnífica herdanza dos equipos directivos que nos precederon e para, na medida do posible, superala e mellorala”.
Despois dunhas palabras de recoñecemento para o decano e presidente saínte, o seu substituto sinalou que “tomamos o relevo con tanta determinación como ilusión”. A maiores, fixou como o seu principal obxectivo “vertebrar os profesionais das TIC, comezando pola integración, no colexio e na asociación, de todos os enxeñeiros de Telecomunicación de Galicia”.
Por outra banda, o novo decano e presidente do Colexio e da Asociación de Enxeñeiros de Telecomunicación de Galicia puxo especial énfase na “defensa da dignificación do noso traballo”. E engadiu: “Reivindicaremos a nosa función como profesionais das Tecnoloxías da Información e da Comunicación. A ninguén debe molestarlle que reclamemos o que lexitimamente nos corresponde”.
Xusto antes do remate da Noite, Sánchez Agrelo tivo unha lembranza emocionada para Fernando Pardo, falecido hai hoxe xustamente un ano, ao que definiu “coma un dos pais fundadores da TVG, un mestre e un magnífico divulgador da enxeñería de Telecomunicación; unha referencia a seguir, tanto no ámbito persoal como profesional”.
Segundo fixo saber a organización, este acto celebrado en PALEXCO (“e 22 anos despois da súa posta en marcha”), a Noite Galega das Telecomunicacións e da Sociedade da Información, pasará a ser itinerante e, nos vindeiros anos, celebrarase nas cidades máis importantes da nosa comunidade. Esta edición coincidiu, como lembraremos, co 25 aniversario da Asociación de Enxeñeiros de Telecomunicación de Galicia.

Categorías: Ciencia

A Coruña habilita coa Cousateca un espazo dixital para intercambiar bens

Ven, 09/29/2017 - 15:30

A relación entre A Coruña e as ferramentas con licenzas abertas está tendo esta tempada especial actividade. Se hoxe mesmo falamos do Hackatiño de datos abertos que se celebra en outubro para pór un gran de area no importante tema da mobilidade sustentábel, agora é a quenda da posta en marcha dunha plataforma directamente encamiñada a permitir que a cidadanía promova anuncios e ofertas de cousas para empresta ou agasallar. Este é un dos obxectivos da Cousateca, impulsada polo Programa Co-Lab da Concellería de Participación e Innovación Democrática.
Trátase, en palabras da devandita Concellería, “dunha plataforma para intercambio de cousas, que pretende afondar nas posibilidades e potencialidades da compartividade”. Para achegar máis detalles sobre este novo acubillo dixital, celebrouse onte unha primeira xornada de contacto (no centro cívico Accede Papagaio) entre responsábeis do proxecto e a cidadanía, reservándose un tempo da xuntanza para o intercambio de puntos de vista e propostas sobre o proxecto Cousateca.
Logo desta xeira de traballo celebraranse outros encontros para favorecer que a plataforma colla corpo definitivo. A iniciativa estará dispoñíbel en modo beta (aínda que admitirá xa a posibilidade de subir e solicitar cousas) desde o 1 de outubro. “A partir desa data”, sinala o Concello da Coruña, “haberá máis encontros co obxectivo de explicar e dinamizar que é e para que serve a plataforma”.

Categorías: Ciencia

Os usuarios de software libre botaranlle unha man á Coruña en materia de mobilidade limpa

Ven, 09/29/2017 - 13:56

Xa vai quedando menos para a segunda edición do Hackatiño de datos abertos que organiza o vindeiro 7 de outubro o Grupo de Programadores e Usuarios de Linux (GPUL), con sede de operacións na Facultade de Informática da Coruña. Como dixemos recentemente, a actividade celebrarase no centro municipal Ágora, terá formato de xornada aberta á cidadanía e, tematicamente, xirará arredor da mobilidade sustentábel e de até que punto as ferramentas de software libre son “amigas” deste xeito de movernos máis ecolóxico, eficaz e económico. O evento conta coa colaboración das asociacións Árticos, o GDG Coruña e mailo Concello (a través da área de Participación e Innovación Democrática que dirixe Claudia Delso).
Segundo nos comentan dende o GPUL, a súa intención é clara: botarlle unha man á Coruña e aos seus cidadáns. “Queremos mellorar a mobilidade na nosa cidade e buscamos como, a idea é aproveitar os datos abertos para que a xente deixe o coche na casa e vexa a necesidade de moverse dun xeito mais sustentábel”.
Segundo informou recentemente o Concello a respecto do formato da xuntanza, o Hackathiño é un evento que xuntará profesionais do desenvolvemento de datos abertos, xornalistas, deseñadores e deseñadoras co obxectivo de idear proxectos que melloren, a través de datos abertos, un aspecto en concreto da sociedade.
Como na anterior edición, os e as asistentes a este encontro tratarán de aproveitar ou xerar datos en formato aberto e a tecnoloxía sen cancelas. Estes serán publicados cunha licenza de carácter libre que permitirá a súa reutilización para calquera uso.
Entre as propostas concretas da cita do 7 de outubro figuran os seguintes: debullar a información xerada polo servizo Bicicoruña para actuar, conforme aos datos dispoñíbeis, favorecendo o uso da bicicleta nos puntos onde máis requira; visualizar o tráfico en tempo real; crear os alicerces dunha aplicación mobil para que os visitantes poidan coñecer a cidade sen coller o coche, etc.

Categorías: Ciencia

Páxinas