códigocero

Subscribirse a Orixe códigocero
Información sobre novas tecnoloxías en Galicia e en galego.
Actualizado: fai 1 min 29 seg

Spotify comeza a amosar os autores e produtores dos temas musicais

Ven, 02/02/2018 - 17:43

Unha longa reivindicación por parte dos artistas por fin vese atendida, e a aplicación de escritorio de Spotify estrea sección de créditos de xeito que os compositores das cancións aparecen reflectidos en cada tema. Para ver a relación de autores dun tema chega con premer sobre a pista musical co botón dereito do rato e premer na opción de Amosar Créditos para poder ver os nomes dos intérpretes, os compositores e os produtores dos temas.
Polo momento esta información amosada en Spotify provén dos selos discográficos, e tamén indicarán a fonte desta información, xa que dende Spotify son conscientes de que é moi incompleta, polo que aseguran que estamos só ante un primeiro para un mellor recoñecemento da autoría nesta plataforma musical.
Dende Spotify aseguran que esta novidade busca dar unha maior visibilidade aos compositores e produtores musicais, e sosteñen que canta máis información se comparte maiores son as oportunidades para estes profesionais do sector musical, que merecen un recoñecemento polo seu traballo e, de feito, levan bastante tempo loitando por ser mellor tratados polas plataformas de streaming musical.

Categorías: Ciencia

A oficina SmartPEME do Porriño mostrou os seus logros á presidenta da Deputación

Ven, 02/02/2018 - 17:30

A presidenta da Deputación de Pontevedra, Carmela Silva, visitou onte as instalacións da oficina SmartPEME do Porriño, onde tivo ocasión de coñecer, de primeira man, o importante traballo despregado polo equipo técnico das dependencias, que lograron convertelas nun referente da formación TIC a nivel provincial e galego. Segundo salientou Silva, durante 2017 realizáronse nestas instalacións 378 asesoramentos, un 66% máis que en 2016, e impartíronse 80 obradoiros aos que asistiron 452 persoas, un 32% máis que o ano pasado. A presidenta estivo acompañada polo deputado de Innovación, Javier Dios, a alcaldesa do Porriño, Eva García, e dúas emprendedoras locais, Ángeles Paz e Jana Kadlecová, que recibiron asesoramento na oficina SmartPEME e fortaleceron, coa formación, cadansúas experiencias de éxito.
As instalacións prestan asesoramento nas comarcas de Vigo e do Baixo Miño, é, tal e como apuntou Silva, “O Porriño tiña que estar neste programa porque é un dos grandes centros de actividade económica da provincia”. Sobre o proxecto, Silva explicou que “queremos achegar as novas tecnoloxías a todos os emprendedores e emprendedoras da nosa provincia e ás pequenas e medias empresas, que son o 90% da actividade económica, para que teñan máis e mellores beneficios que acaben xerando riqueza e emprego”.
Como dixemos, durante a visita a presidenta provincial tivo ocasión de compartir impresións con Ángeles Paz e Jana Kadlecová, usuarias da oficina local de SmartPEME. Ángeles Paz, de Dronval, empresa centrada na mercadotecnia turística que presta servizos aéreos con drons para fotografía e vídeo, salientou a importancia dos obradoiros achegados polo programa da Deputación, obradoiros que lle facilitaron asesoramento dixital, planificación de estrutura e contidos do seu futuro sitio web, así como asesoramento para a súa posición no mercado e nos buscadores. Tamén lle ofreceu análise de redes sociais e Web para facer seguimento dos resultados e achegoulle ferramentas de deseño para optimizar a súa imaxe en liña.
Pola súa banda, Jana Kadlecová, da empresa East West Experience, centrada tamén na mercadotecnia turística (e en liñas de actividade como fornecer a restaurantes da posibilidade de promover os seus menús e ás persoas usuarias de localizar menús a prezo fixo en función do seu emprazamento xeográfico e preferencias gastronómicas), enxalzou as potencialidades de SmartPEME para superar atrancos en materia dixital, preparándoa para tirar o máximo proveito da Internet e as redes sociais. Segundo dixo, o programa da Deputación subministroulle asesoramento en mercadotecnia, información para optimizar a súa plataforma de Internet (realizada en Wordpress) e ferramentas de analítica web para facer seguimento dos resultados. Igualmente, proporcionoulle datos relativos a plataformas de construción de aplicacións móbiles para proxectos asociados á súa actividade, xeración de contidos a través do blog para a mellora da súa posición en buscadores e atracción do público obxectivo.
Carmela Silva resaltou que “destas reunións unha sempre sae con optimismo ao ver que hai moita xente con ideas creando negocios adaptados ás necesidades do século XXI”. Segundo dixo, “o noso programa permitiulles coñecer todas as ferramentas existentes nas TIC para responder as novas necesidades”.
Datos sobre o Proxecto SmartPEME
SmartPEME, programa da Deputación de Pontevedra, é un novo modelo de servizo orientado á mellora competitiva das PEME e á procura dunha melloría nas vendas e na eficacia e eficiencia das tarefas, que abre novos eidos de actuación e acada novos grupos de interese coma os emprendedores, as asociacións empresariais e os axentes de dinamización en concellos.
O devandito obxectivo, nas oficinas do Porriño, Cambados, Pontevedra, Lalín, Ponteareas e Vigo abrangue seguintes actividades: itinerarios de obradoiros temáticos con diversos niveis de dificultade adaptados ás necesidades das empresas, eventos de networking trimestrais coa participación de profesionais de prestixio, colaboración con asociacións e promoción de alianzas institucionais, especialización sectorial dos asesores en función das necesidades da súa área de influencia, kits de asesoramento en novas tecnoloxías a emprendedores, identificación e difusión das necesidades TIC aos provedores de solucións para as PEME e, tamén, impulso de novas carteiras de servizos de asesoramento.

Categorías: Ciencia

A galega Serinfer presenta en Madrid a nova versión do seu revolucionario sistema de xestión para concesionarios

Ven, 02/02/2018 - 16:30

Serinfer, empresa TIC do Grupo Alvariño especializada no desenvolvemento de software de xestión para o mundo do motor, presentou o 31 de xaneiro sen Madrid a última versión do seu sistema de xestión documental (DMS polas súas siglas en inglés) para o traballo diario dos concesionarios, Serauto 7.0. Segundo informa o Clúster TIC Galicia, do que forma parte Serinfer, Serauto é unha completa plataforma que aborda de maneira modular e integrada todas as áreas de actividade dun concesionario ou taller de automóbiles. Arestora xa conta con máis de medio milleiro de clientes en todos os recantos do Estado e achega recursos de xestión a concesionarios das principais marcas do motor. Por exemplo, é o sistema en exclusividade para os puntos de venda de Porsche en España e Portugal.
Segundo fixo saber en Madrid a compañía galega, a versión Serauto 7.0 incorpora melloras importantes en rendemento, funcionalidade e visualización. Polo que se refire ás optimizacións no rendemento, estas incrementan a rapidez no acceso aos datos en procesos de tratamento masivo de información, así como a habilitación de novas estruturas de datos que permitirán a integración de outras aplicacións con Serauto.
Os cambios visuais supoñen a incorporación dunha feitura externa “completamente nova na aplicación”, co deseño de controles máis intuitivos e xanelas máis cómodas e mellor organizadas, todo “co propósito de optimizar a experiencia do usuario”.
Polo que atinxe ás melloras funcionais, van dende a incorporación dunha nova axuda en liña desenvolvida con tecnoloxía web até novidades nos módulos principais da aplicación.

Categorías: Ciencia

O ITG luciu en Israel a súa bagaxe en Industria 4.0 e tecnoloxías aéreas

Ven, 02/02/2018 - 15:58
Foto de grupo dos participantes na misión comercial galega a Israel

Entre as entidades TIC que participaron na pasada misión comercial galega a Israel atopábase o Instituto Tecnolóxico de Galicia (ITG), cuxa presenza tiña o obxectivo de fortalecer as súas capacidades tecnolóxicas. Na súa andaina polo país de Oriente Medio, o ITG concorreu no evento 2018 OurCrowd Global Investor Summit celebrado en Xerusalem, que pasa por ser o principal foro de investimento internacional en materia de micromecenado, un escenario referencial onde se dan cita centos de investidores e novas firmas innovadoras de todo mundo.
Segundo informa o ITG, a viaxe a Israel foi un xeito de dar continuidade á aposta do instituto polo espallamento das solucións que desenvolve. Tamén tivo ocasión de poñer en valor a súa bagaxe en Industria 4.0, información a gran escala (Big Data), drons ou Internet das Cousas (IoT).
O director xeral do Instituto Tecnolóxico de Galicia, Carlos Calvo, salientou que “o ITG participa nestes foros porque entendemos que é onde temos que estar. Trátase de encontros moi relevantes nos que temos a oportunidade de transferir e de recibir información de gran valor”.
No evento israelí, o instituto tivo a oportunidade de “abrir a porta a novas vías de colaboración”. Agora, sinala Calvo, “toca traballar intensamente para que axiña poidamos ver os resultados”.
Entre as iniciativas dadas a coñecer no devandito evento atópanse os seus achados en materia de vehículos aéreos non tripulados, materializados a través de Civil UAV Initiative (proxecto da Axencia Galega de Innovación, no que o ITG colabora con Babcock para dar forma a novos sistemas de control, un software de misión intelixente e un centro de simulación para formación de pilotos) ou da primeira Unidade Mixta de investigación (UMI) especializada en drons en Galicia, constituída trala unión do Instituto Tecnolóxico de Galicia e Star Defence Logistics & Engineering (SDLE).

Categorías: Ciencia

Kaz Hirai deixará a dirección xeral de Sony

Ven, 02/02/2018 - 14:03

Coincidindo coa publicación dos resultados financeiros do último trimestre, nos que Sony rexistrou un incremento de ingresos dun 11,5%, a compañía nipoa anunciou que a partires do 1 de abril a dirección xeral pasará a ser responsabilidade de Kenichiro Yoshida, un dos principais directivos na actualidade, que collería o relevo de Kaz Hirai, quen manterá o un posto directivo. Este cambio nos máximos postos de responsabilidade supoñen o inicio dun novo plan corporativo a medio prazo.
Tras a decisión do cambio no cadro de mandos da empresa, Hirai recoñeceu que Yoshida leva traballando dun xeito moi próximo a el dende decembro de 2013, contribuíndo á transformación experimentada por Sony nos últimos anos, e asegurando que agora será o propio Hirai o que axude a Yoshida na súa nova función.
Nos últimos meses Sony continuou a acumular perdas no seu departamento de smartphones, na que levan bastante tempo contendo gastos ante as dificultades para recuperar posicións, mentres que no ámbito das consolas de videoxogos a PlayStation 4 e PlayStation VR son grandes éxitos, como tamén acontece na división audiovisual da compañía que leva varios meses medrando até conseguir uns resultados moi positivos.

Categorías: Ciencia

O alumnado de ESDEMGA mergúllase nas posibilidades da impresión 3D no deseño téxtil

Ven, 02/02/2018 - 11:29

O alumnado de ESDEMGA (Campus de Pontevedra) achegouse esta semana ao potencial da impresión 3D para o deseño téxtil. Foi no transcurso dun obradoiro impartido polos artistas e investigadores Alberto Valverde e María Castellanos, nos que se lles aprendeu aos estudantes cousas como usar unha tecnoloxía destas características para crear formas directamente sobre tecidos, unha función que é posíbel grazas ao prototipo de impresora que o tecnólogo Valverde desenvolveu pensando no deseño de moda. Os participantes no obradoiro tiveron ocasión de descubrir a longa listaxe de vantaxes que se abre na creación téxtil coas tecnoloxias 3D. Por exemplo, agora é posíbel crear un deseño in situ sobre unha prenda.
O enxeño desenvolvido por Valverde, feito a partir dun modelo de impresora 3D de código aberto, é un prototipo “moi experimental” que, polas súas dimensións e por contar cunha superficie de impresión ríxida, permite traballar con pezas de tea de maior tamaño que os modelos convencionais.
O achegamento ao funcionamento destes dispositivos e aos programas informáticos de deseño centrou o inicio deste taller dirixido ao alumnado da dita escola e do máster en Deseño e Dirección Creativa en Moda, xunto coa presentación, por parte de Castellanos, dunha serie de exemplos de traballos realizados con estas tecnoloxías no mundo da moda. No obradoiro, que prosegue hoxe, as e os asistentes poden tamén experimentar o comportamento deste novo equipamento da titulación que se imparte na Facultade de Belas Artes.

Categorías: Ciencia

Apple remata 2017 coa primeira caída en vendas de iPhone na campaña de Nadal

Ven, 02/02/2018 - 11:28

Os resultados de Apple para o primeiro trimestre fiscal de 2018 (que remata o 30 de decembro de 2017) rexistran uns impresionantes ingresos de 88.300 millóns de dólares, o que supón un incremento interanual do 13% e un máximo histórico, deixando claro que o iPhone X superou as expectativas da compañía e, pese ao seu elevado prezo, conseguiu ser o modelo de iPhone máis vendido dende o seu lanzamento.
Curiosamente os resultados de vendas de smartphones de Apple poden verse de xeito positivo ou negativo, e mentres algúns analistas apuntan a caída dun 1,3% no número de teléfonos vendidos (pasando de 78,3 a 77,3 millóns de unidades), o feito de que os prezos do iPhone X sexan moi superiores aos de modelos anteriores supuxo un incremento de ingresos (dun 13%). Iso si, estamos ante a primeira vez na historia do iPhone na que baixa o número de unidades vendidas durante o trimestre da campaña de Nadal.
Ao presentar os resultados, o director xeral de Apple, Tim Cook, destacou que viñan de marcar un fito moi importante, xa que a base de dispositivos activos de Apple superou os 1.300 millóns, o que supón un incremento do 30% en só 2 anos, constatando a crecente popularidade dos produtos da compañía da mazá.
No que a ordenadores persoais se refire, as vendas interanuais caeron un 5%, o que non está mal para un segmento de mercado que leva anos caendo; pero as vendas de dispositivos doutras categorías (como o Apple Watch, os AirPods ou os auriculares Beats) non cesan de medrar, e rexistraron un incremento interanual do 70%. Uns magníficos resultados que deixan con certa incógnita principalmente á hora de analizar a acollida do iPhone X.

Categorías: Ciencia

Office 2019 só funcionará en Windows 10

Ven, 02/02/2018 - 10:38

Tras a consolidación comercial de Office 365 parecía que tras Office 2016 non habería máis versión perpetuas da suite ofimática de Microsoft, pero o pasado outono confirmaron que estaba previsto o lanzamento de Office 2019 para a segunda metade de 2018, de xeito que os usuarios interesados en mercar unha licenza de Office sen ter que subscribirse a un servizo continuarán a ter opcións actualizadas, aínda que cunha importante limitación: só funcionará baixo Windows 10.
Enténdese así que se queremos utilizar aplicacións ofimáticas modernas o sistema operativo tamén ten que ser acorde, facilitando así o seu mantemento e a integración de características avanzadas.
Aínda que Office 2019 non verá a luz até a segunda metade do ano, durante o vindeiro trimestre xa distribuirán versións de proba das aplicacións cliente (Word, Excel, PowerPoint, Outlook e Skype) e de servidor (Exchange, SharePoint e Skype) para que as compañías poidan comprobar nos seus sistemas o funcionamento do vindeiro Office.
Office 2019 contará con soporte ordinario durante 5 anos coa posibilidade de estendelo só un par de anos máis, cando até o momento o período de soporte estendido era de 5 anos (de xeito que Office 2016 manterá o soporte estendido até o 14 de outubro de 2025).

Categorías: Ciencia

O Foro Económico de Galicia salienta o noso potencial para afrontar os retos da dixitalización

Ven, 02/02/2018 - 09:32

O Foro Económico de Galicia vén de presentar o documento Diagnóstico actual e propostas de futuro para a dixitalización en Galicia, asinado polo catedrático da Universidade de Vigo Domingo Docampo. A investigación, entre outras cousas, tenda dar resposta ás dúbidas relativas ao noso proceso de transformación tecnolóxica, un proceso que asumimos de maneira incompleta e que, sobre o papel, debera levarnos, co seu impulso, cara a todo tipo de melloras empresariais, sociais, científicas, culturais ou administrativas. A pregunta da que parte o informe: Estamos nun situación boa para afrontar os retos da dixitalización? Segundo se fai saber no estudo, a resposta é afirmativa.
O autor, a respecto do devandito, salienta que “Galicia semella non estar lonxe do lugar que lle corresponde, non hai ningún atranco debido á falta de infraestruturas que impida levar a cabo proxectos empresariais na sociedade dixital, e cada vez son máis os cidadáns, mesmo en vilas de moi pouca poboación, que van ter ao seu dispor infraestruturas de rede de primeiro nivel”.
O documento foi presentado esta quinta feira nas instalacións do Club Financeiro de Vigo polo seu autor e acompañado por Santiago Lago, director do Foro Económico de Galicia e tamén catedrático da Universidade de Vigo, e polo empresario Víctor del Canto, de Civisglobal. O obxectivo deste informe foi “analizar ese compoñente necesario da dixitalización que ten que ver coas oportunidades de acceso a infraestruturas modernas de telecomunicación, as que nos permiten como país xogar en pé de igualdade no contexto global, tanto a nivel individual como empresarial”. Con esta finalidade, Docampo achanda o terreo explicando como debera ser o proceso dixitalizador ideal, cunhas infraestruturas axeitadas (que as hai, sostén) para emprender proxectos innovadores, cunha cidadanía que dispoña de redes de primeiro nivel e cunhas administracións públicas que impulsen e favorezan estes cambios (que as hai tamén), comezando por si mesas. Docampo, ao fío disto, destaca que as entidades públicas galegas “están xogando un papel activo no acceso e na promoción dos usos de Internet”, compromiso ao que se suman o noso sector TIC, que “está desenvolvido”, e mailo noso tecido de investigación pública e privada. Porén, tamén é partidario de seguir xuntando esforzos: “O feito de que por fin se estea collendo o paso de Europa no mundo das TIC debería tomarse como unha excelente oportunidade para intensificar os esforzos público e privados na dirección indicada pola Unión Europea na súa estratexia para o mercado dixital único”, sublíñase no documento.
No eido da Administración Electrónica galega e con vistas a seguir avanzando no devandito, desde o Foro Económico de Galicia guíndanse propostas como a de “acelerar a mellora dos procesos e procedementos organizativos de xeito que se garanta a transición a unha eficaz administración dixital, na que os servizos públicos poidan ser prestados a través de Internet”. Tamén se propón “converter ao sector público nunha fonte de información contrastada e fiábel, que permita a empresas e cidadáns enfrontar con maiores garantías a toma de decisión na sociedade dixital”.
Polo que respecta ao sector TIC galego apúntase que “debe aspirar a converterse nun sector especializado coa intención de penetrar con máis eficacia nos mercados internacionais, apoiándose para ese desempeño en parcerías con sectores tradicionais nos que Galicia ten unha posición de referencia, como o téxtil, o naval ou o agroalimentario”.
Por último, no eido das infraestruturas, o documento recolle a proposta de que a Administración galega “redobre o compromiso co desafío de facer chegar a banda larga fixa a toda Galicia, de xeito que o despregue da fibra óptica previsto non sufra ningunha demora”.

Categorías: Ciencia

Instagram estrea historias de texto

Xov, 02/01/2018 - 22:56

As historias de Instagram están tradicionalmente formadas por imaxes ou vídeos breves en vertical, pero atendendo á necesidade dos usuarios de expresar en moitas ocasións unha idea ou un sentimento sen ter apoio gráfico para tal fin estrean unha nova modalidade de historia composta por textos, e que podemos acceder á mesma dende a cámara das historias, onde aparece unha nova opción chamada Letra xunto á de Directo.
Con este novo modo de composición os usuarios poden escribir o que desexen, para logo xogar a mudar entre distintos estilos de texto e de fondo, para así personalizar o xeito no que transmitir unha mensaxe que compartir durante 24 horas a través de Instagram.
Estas novas posibilidades de personalización de texto tamén poden empregarse cando se publica unha imaxe ou vídeo curto nunha historia.

Categorías: Ciencia

Telegram desaparece temporalmente da App Store

Xov, 02/01/2018 - 22:22

A aplicación de mensaxería Telegram está a reinventarse, para poder ser unha ferramenta máis rápida, áxil e doada de utilizar, polo que deciron emprender un novo proxecto, Telegram X, que supòn unha reescritura da aplicación dende cero, ou sexa, prescindindo de compoñentes que foron herdando ao longo dos anos e que supoñen un lastre. Deste xeito pódese descargar Telegram X para Android e para iOS, aínda que esta última versión, xunto co Telegram Messenger de sempre, desapareceron durante varias horas da App Store por achegar contidos inapropiados aos usuarios.
A tenda de aplicacións de Apple ten normas que teñen que cumprir as aplicacións con contidos xerados polos usuarios, que dende Telegram parecen ter incumprido, aínda que reaccionaron a tempo para corrixir as súas aplicacións e así estar pouco tempo fóra da App Store. Os responsables da aplicación non detallaron os motivos da expulsión temporal da aplicación, pero parece ser un simple accidente, ao non incluír en Telegram medidas para o control de contidos.
Deixando este incidente aparte, agora os usuarios teñen dúas opcións: seguir a empregar a aplicación orixinal ou dar unha oportunidade a Telegram X, un experimento que, de funcionar ben, anticiparía o futuro da aplicación principal.

Categorías: Ciencia

WhatsApp chega á tenda de aplicación de Windows

Xov, 02/01/2018 - 20:33

Para facilitar o uso do cliente web de WhatsApp en equipos informáticos vén de estrearse na tenda de Windows 10 a aplicación WhatsApp Desktop, que vén a ser un simple xeito de encapsular WhatsApp Web para permitir a súa instalación no sistema operativo de Microsoft e, especialmente, en Windows 10 S, versión de Windows que só permite a instalación de aplicacións da tenda oficial en aras da seguridade do sistema.
A aplicación ten un tamaño que pode parecer excesivo (242,66 MB) e non ofrece vantaxes fronte ao uso dun atallo á versión web orixinal, mantendo as súas limitacións, xa que realmente estamos ante unha ferramenta que se conecta ao smartphone, que é onde se executa realmente a aplicación de WhatsApp e onde se almacenan as conversas, mantendo así a seguridade propia desta plataforma, na que as conversas están cifradas entre extremos.

Categorías: Ciencia

O Clúster TIC e LaconNetwork entregan mañá na Coruña os seus premios conxuntos

Xov, 02/01/2018 - 19:48

Este 2 de febreiro, no marco da celebración do oitavo aniversario da xuntanza de profesionais galegos LaconNetwork, entregaranse os galardóns da primeira edición dos Premios TIC Galicia. A cita dupla, como lembramos os días pasados, será na Coruña, no recinto de PALEXCO, incluíndo charlas, mesas de debate e a entrega de galardóns propiamente dita (pola tarde engadirase un Demo Day da aceleradora Conector e unha nova iniciativa de pitching onde emprendedores de proxectos exporán a asistentes e investidores cadansúas propostas de negocio). No que se refire aos premios, veñen da man do Clúster TIC Galicia e da organización da LaconNetwork. Segundo nos contan os promotores do certame, as mencións especiais irán dar Tino Fernández (Altia), o CNTG e a firma Supervisión e Control.
A entrega de condecoracións comezará ás 11:30 horas e, ao longo dela, daranse a coñecer oficialmente os gañadores das seis categorías que teñen finalistas. No transcurso da gala, que presentará Fran Hermida, faranse mencións especiais á Traxectoria, cuxo recoñecemento será para Tino Fernández da empresa Altia Consultores, mención especial a Iniciativa TIC, que será para o Centro de Novas Tecnoloxías de Galicia (CNTG) pola axuda na creación, lanzamento e/ou asentamento de empresas e, por último, para a Empresa Tractora, que este ano recae en Supervisión e Control pola súa aposta e confianza nas startups galegas, contratando os seus servizos e/ou produtos e, en palabras do xurado, “ofrecendo unha oportunidade firme de negocio”.
Finalistas das 6 categorías
Categoría: Startup
· Situm Techologies
· Citious Team (ConverFit)
· Boardfy Pricing
Categoría Software Libre
· Implantación de Koha ILS na Rede de Bibliotecas Públicas de Galicia, de Xercode
· Migración a LibreOffice da Xunta de Galicia, de LibreBit
· Escornabot, de Escornabot
Categoría Marketing Dixital
· Campaña de lanzamento de Trazers, de Visual Publinet
· Campaña Menos Cotilleo más Pulpo, de Roi Scroll
· Campaña Fai Historia con nós, da axencia Nasas
Categoría: Innovación (I+D+i)
· CO2 Smart Tech, polo proxecto Cloud Computing aplicado á Xestión Enerxética Integral da Industria 4.0
· Bahía Software, polo proxecto uForest
· Cinfo, polo proxecto Multicam
Categoría: Internacionalización
· Imatia Innovation
· Netex Knowledge Factory
· Redegal
Categoría: Evanxelizador
· José Luis de la Casa de la Aldea
· Jacobo García Durán
· André Castelo

Categorías: Ciencia

A Fundación Uxío Novoneyra e a Deputación de Lugo crearán unha plataforma de literatura galega e integración social

Xov, 02/01/2018 - 19:30

A Fundación Uxío Novoneyra e a Deputación de Lugo van pór en marcha unha plataforma tecnolóxica para promover a literatura galega entre colectivos vulnerábeis en Europa. O labor de promoción, que tamén se levará a cabo polas canles tradicionais de coñecemento e de acceso á lectura, terá como marco de acción o Proxecto Comunitario SILO (Operacións Literarias Socialmente Inclusivas), impulsado pola entidade que leva o nome do célebre poeta do Courel e coa colaboración da Deputación. A iniciativa SILO foi presentada hoxe (durante o Obradoiro do Libro do CENTRAD) pola deputada de Cultura, Pilar García Porto, o xerente da Fundación Uxío Novoneyra, Uxío Novo Rey.
O Proxecto SILO terá, nun principio, un alcance de tres anos. Trátase, como dixemos, de impulsar, visualizar e achegar a nosa literatura a Europa, e viceversa (a europea na nosa terra). A iniciativa, dotada de 335.000 euros, mostrará as letras galegas e europeas en lugares como, por exemplo, poboacións illadas do rural e da Montaña, coma O Courel sen ir máis lonxe; centros escolares; residencias de maiores, así como entre colectivos vulnerábeis: drogodependentes ou reos, entre outros. A Deputada avanzou que a primeira xornada deste encontro celebrárase dende o 21 ao 26 de agosto no Courel, e haberá un intercambio de escritores, poetas, tradutores de toda Europa.
García Porto avanzou que SILO é o único proxecto de Europa Creativa que se realiza na provincia de Lugo, cun investimento de 335.000 euros dos que 200.000 euros son financiados pola Unión Europea, e 135.000 euros polas 7 entidades internacionais: Fundación Uxío Novoneira, en España; Aarhus Public Libraries e Aaurus Universitet, en Dinamarca; Association Krokodil, en Serbia; Câmara municipal da Madalena do Pico, en Portugal; Cultuurhuis de Warande, en Bélxica; e Szepirok Tarsasaga, en Hungría.
Este proxecto, engadiu, contará tamén con unha plataforma dixital coa que os participantes de toda Europa poderán interactuar.

Categorías: Ciencia

Os usuarios dan un suspenso ás aplicacións das principais operadoras en España

Xov, 02/01/2018 - 16:13

A consultora española BrainTrust vén de presentar os resultados dun estudo sobre as aplicacións móbiles das grandes operadoras telefónicas que operan no mercado estatal. A investigación salienta e sorprende, entre outras cousas, pola baixa puntuación que lle outorga ás app das dúas compañías con meirande cantidade de clientes e peso no mercado: Movistar e Vodafone. De feito, no estudo dise que ámbalas ferramentas móbiles obteñen un suspenso. Iso si, o suspenso é compartido (en maior ou menor medida) por todas as demais avaliadas e valoradas.
O Estudo Comparativo sobre as Apps móbiles do sector de telecomunicacións elaborouse en base ás valoracións realizadas por 6.530 usuarios de Android (que supoñen o 88% do mercado) no terceiro cuadrimestre de 2017. Segundo sinalan dende BrainTrust en relación á predisposición dos usuarios destas ferramentas, “hoxe en día os usuarios son cada vez máis esixentes coas aplicacións móbiles que ofrecen as operadoras telefónicas e castigan con dureza a través dos seus comentarios e valoracións a todas aquelas que non están deseñadas desde o principio co fin de facerlles a vida máis doada”.
BrainTrust salienta “a pésima valoración obtida polas apps da maioría das operadoras”. De feito, das 10 aplicacións móbiles analizadas, ningunha logra aprobar. As mellores valoradas polos clientes foron O meu Simyo (+4) e Lowi.es (-26) No lado oposto, as peor valoradas foron as aplicacións das operadoras O meu Yoigo (-76), A miña fibra ONO (-88) e Masmóvil (-93).
No estudo indica que se comparamos a evolución do posicionamento da valoración respecto ao cuadrimestre anterior, só a ferramenta de Movistar (-63,2) e Lowi.es (-26,9) melloraron a súa posición en 13 e 21 puntos, respectivamente.
Para entender as baixas valoracións dos clientes das apps, a consultura tamén analizou os comentarios deixados polos usuarios. Os clientes castigan fortemente nas súas valoracións ás aplicacions pola súa peor usabilidade, utilidade, servizo e deseño.

Categorías: Ciencia

O Concello de Ames convida aos estudantes a mergullarse no espírito Maker

Xov, 02/01/2018 - 16:12

O Concello de Ames, a xeito de complemento da gran xornada Maker do 2 de febreiro no Milladoiro (a xuntanza argalleira Innovames, da que falamos polo miúdo os días pasados dende Código Cero), organizou esta terceira feira, martes 30, unha charla sobre a filosofía do Do it yourself (faino coas túas mans) aplicada á tecnoloxía, á robótica e ao desenvolvemento científico. A cita foi no IES do Milladoiro, e foi impartida por Marcos Saavedra, de Design Thinkers & Makers SL, quen mostrou perante o alumnado de 4º da ESO en que consiste o concepto Maker e que tipo de argalleira/o define: unha persoa innovadora que inventa ou desenvolve un produto e súbeo á Rede para compartilo co resto do mundo. Deste xeito, sinalou, “o mundo Maker é un movemento aberto, un modelo orientado a actividades de fabricación tecnolóxica, robótica, impresión 3-D, metalurxia, carpintería”.
Saavedra tamén explicou que este movemento a prol do coñecemento e as habilidades en aberto compleméntase coa firme crenza nas importantes capacidades de cada quen (todo o mundo sen excepción leva un deseñador ou creador de tecnoloxías dentro) e nas importantes potencialidades da reciclaxe (un mundo con máis reciclaxe é un mundo máis intelixente e sustentábel). Isto, sinalou, é aplicábel á xente de a pé, pero tamén ao eido empresarial: “Cada día son máis as empresas que advirten o potencial deste perfil e incorporan makers ao seu persoal para que solucionen os problemas máis variados”.
A charla tivo unha duración aproximada dunha hora, e ademais, de falar disto tamén se lles explicou aos rapaces e rapazas o programa da xornada Innovames deste venres 2 de febreiro. Por último, animouse ao alumnado a inscribirse nos obradoiros que se van a celebrar en dita xornada.
Sobre Innovames
Este 2 de febreiro, na Casa de Cultura do Milladoiro, temos unha cita co espírito Maker. A cita Innovames vén da man do Concello de Ames, e trátase dunha xornada de innovación e argalleira (Maker). Contarase coa presenza de grandes referentes da filosofía do Do it yourself aplicada ao software, á robótica, a proxectos científicos ou a calquera tipo de enxeño, tanto a nivel galego como estatal e internacional.
Pola mañá, de 09:00 a 14:00 horas, haberá unha xornada adicada a profesionais do sector. De seguido, pola tarde, entre as 16:00 e as 20:00 horas, desenvolveranse obradoiros para nenos/as, unha exposición de proxectos da Maker Faire Galicia 2018 e demostracións de experimentos científicos. Este é o segundo evento destas características que organiza o Concello de Ames, despois do Roteiro Maker feito en decembro de 2016. Para obter máis información ou inscribirse na xornada profesional e nos obradoiros hai que acceder á web innovames.gal. Segundo informa a organización, premendo na ligazón da dereita, baixo o apartado de descargas, poderemos obter o programa de Innovames.
O obxectivo deste encontro Maker é achegar as últimas tendencias no mundo da innovación a todos os públicos, “xerando un espazo para a aprendizaxe e o diálogo, onde se comparta coñecemento e xurdan sinerxías que dean lugar a proxectos innovadores”. Esta iniciativa está composta de conferencias e mesas de debate que versan sobre a tecnoloxía, a innovación, o audiovisual e a utilización de novos materiais. Todo isto, informa o Concello, conforma o groso dunha programación que se artella en dúas xeiras. Por unha banda, a matinal, que estará dirixida exclusivamente ao sector profesional. As 09:30 realizarase a presentación do evento. De seguido, de 10:00 a 10:30 horas, contarase coa presenza de Sonia Pazos Álvarez do INL, International Iberian Nanotechnology Laboratory, que ofrecerá un relatorio sobre as posibilidades que nos outorga a nanotecnoloxía en múltiples sectores e onde presentará todo o que se está a facer neste centro de referencia internacional. No programa matinal tamén destaca a presenza de diferentes representantes das empresas asentadas no polígono do Novo Milladoiro como NanoGap, Escenoset, Cartogalicia, CineMar films ou Zenit entre outras compañías locais, que ofrecerán a súa visión particular do estado da innovación dentro dos seus diferentes sectores.
Ademais, haberá un espazo de exposición no que os asistentes poderán coñecer de primeira man exemplos da Galicia máis innovadora, coa presenza de makers galegos creadores de proxectos de innovación de referencia. Uns petiscos porán o punto final a unha sesión de networking que se dirixe a impulsar creación de sinerxías entre empresarios e argalleiros asistentes.
A concelleira de Promoción Económica, Isabel González, destaca que “coa creación de Innovames o Concello de Ames busca pór en valor os recursos e a capacidade de innovación da nosa Comunidade, fomentando a colaboración entre as empresas e inventores galegos, e dando a coñecer ao público xeral o capital Maker galego”.
Programa de tarde
O evento completarase cunha sesión de tarde que estará máis enfocada ao público familiar a través da programación de diferentes actividades e obradoiros orientados aos máis cativos. Celebraranse demostracións de ciencia e de realidade virtual, obradoiros de robótica e videoxogos, e habilitarase un espazo para programar aplicacións móbiles. A xeira de tarde comezará as 16:00 horas cun obradoiro de papirotrónica, dirixido a nenos e nenas de máis de 6 anos. De 18:00 a 20:00 haberá outros dous obradoiros de robótica e de programación de apps, que están dirixidos a nenos/as de máis de 8 anos.
Ademais, durante toda a tarde haberá unha exposición de proxectos da Maker Faire Galicia 2017 na que participarán as entidades 3D Limitless, MAKEROID, Arcade Pi, B.R.A.I.S., I.E.S. Sánchez Cantón, MINIMO, IOTLAB, PSICOVR, e SPAINLABS, así como demostracións de experimentos científicos.

Categorías: Ciencia

Vodafone medra un 2% en materia de ingresos por servizo

Xov, 02/01/2018 - 12:56

Vodafone anunciou hoxe os resultados financeiros do terceiro trimestre do seu ano fiscal (que, como lembraremos, vai do 1 de outubro ao 31 de decembro de 2017) en España. Entre os datos máis salientábeis da batería de números figuran, como eran de agardar, os relativos ao crecemento e aos ingresos. Segundo se fai saber no informe, no devandito período os ingresos por servizo acadaron os 1.144 millóns de euros, un 2% máis ca no mesmo período do ano pasado.
Os ingresos totais ascenderon a 1.257 millóns de euros no trimestre, un 0,3% máis ca un ano antes. Sobre as razóns para esta tendencia á alza, Vodafone esgrime que se debe a unha razón lóxica e visíbel, o aumento da carteira de clientes, e tamén ao lanzamento de novos plans de prezos a principios de ano.
Por outra banda, o crecemento viuse fortalecido cos esforzos en materia de innovación (diversificación da rede, Internet das Coustas, posta en marcha de novos modelos de atención personalizada) e de converxencia (meirande alcance da oferta de fibra, nova velocidade de banda larga fixa ultrarrápida até 1 Gbps simétrico, rápida evolución de Vodafone TV, etc). Este avance reflíctese no crecemento nun 13,1%, no último trimestre, dos ingresos por servizos converxentes no segmento residencial. Ademais, a carteira de clientes de Vodafone One pechou o trimestre con 45.000 máis que tres meses antes e 369.000 máis que hai un ano, até superar os 2,5 millóns ao peche de decembro.
Igualmente, a base de clientes de contrato de telefonía móbil de Vodafone España aumentou en 30.000 no devandito trimestre, acadando os 11,6 millóns, 220.000 máis que un ano antes. Doutra banda, a carteira total de usuarios de telefonía móbil achegouse aos 14,4 millóns a final do trimestre.
A maiores, o volume de datos facturábeis na rede de Vodafone España medrou un 63,3% no último trimestre, impulsado polo lanzamento da nova familia de Vodafone Pass (Vídeo e Maps, que se engadiron aos xa existentes Chat Pass, Social Pass e Music Pass), así como polo maior volume de datos móbiles incluídos nos plans de prezos e o crecente número de usuarios que visitan España.
A 31 de decembro de 2017, a rede 4G+ de Vodafone estendeuse a máis de 1.100 poboacións, que xa poden gozar de velocidades de ata 350 Mbps.

Categorías: Ciencia

A Deputación de Pontevedra ofrece dezaoito novos obradoiros TIC para a contorna de Vigo

Xov, 02/01/2018 - 12:55

A rede SmartPEME da Deputación de Pontevedra ten deparado un amplo programa de actividades TIC para autónomos, empresarios e empresas da provincia este mes de febreiro. Segundo vén de informar a entidade que preside Carmela Silva, as oficinas da SmartPEME da área de Vigo, situadas nos concellos de Ponteareas, O Porriño e Vigo, acollerán durante este mes de febreiro dezaoito novos obradoiros. Como lembraremos, SmartPEME é a rede tecnolóxico-dixital de formación e asesoramento impulsada pola Deputación de Pontevedra, a rede SmartPEME (con sedes operativas en Pontevedra, Vigo, Porriño, Ponteareas, Cambados, Lalín e, a partir de datas vindeiras, todo apunta a que tamén na Estrada).
En febreiro, a primeira oficina en acoller un dos obradoiros será Ponteareas, que o venres 2 acollerá o curso Woocommerce II – A solución para vender por internet. Unha semana despois, o xoves 8 febreiro impartirase o obradoiro Edición de fotografía para plataformas e-commerce. Pola súa banda, o mércores 14 de febreiro será a quenda do curso Aprende a promover a túa empresa con Pinterest e o martes 20, Desenvolve a túa propia estratexia de email marketing. Dous días máis tarde, Ponteareas acollerá o curso Linkedin: a túa rede de networking e rematará o mes o luns 26 con Mide os teus obxectivos en redes sociais: Análise de estatísticas. A oficina SmartPEME de Ponteareas, no Centro de Desenvolvemento Local, atópase en Lomba do Cruceiro, nº 5. Todos os cursos tamén comezarán ás 19.00h.
Pola súa parte, as dependencias do Porriño acollerán o seu primeiro obradoiro do mes o vindeiro luns 5 de febreiro con Fotografía de vehículos para a súa venda online. Esa mesma semana, o mércores 7 de febreiro, celebrarase o obradoiro Unifica a xestión das túas redes con Hootsuite. A actividade no Porriño seguirá o luns 12 de febreiro, con Linkedin: a túa rede de networking. Tamén esa mesma semana, o xoves 15 de febreiro, terá lugar o curso Woocommerce I – A solución para vender por Internet. Para rematar, o mércores 21 de febreiro terá lugar o curso Aprende a promover a túa empresa con Pinterest e o martes 27, Sesión informativa: Así funciona Whatsapp Business. A oficina SmartPEME do Porriño, no Multicentro do concello, atópase na rúa Ribeira, s/n.
En canto as quendas na oficina de Vigo, a primeira será o martes 6 de febreiro, co curso Fotografía e vídeo para establecementos de turismo e hostalería. A segunda, será Facebook para non iniciados e impartirase o luns 12 de febreiro, tan só dous días antes do terceiro obradoiro do mes, Crea os teus propios informes: Google Data Studio. Unha semana despois, o martes 22 de febreiro, impartirase en Vigo o curso Sabes como converter a túa páxina web nunha páxina segura?. Pola súa banda, o xoves 22 de febreiro terá lugar o obradoiro Comercio electrónico para micropemes e para rematar, o mércores 28 de febreiro, Prestashop I: Comeza a crear a túa propia tenda online. A oficina SmartPEME de Vigo, na sede da Deputación da cidade, atópase na Rúa Oporto, nº 3. Os catro obradoiros comezarán ás 19.00h.
Datos sobre o Proxecto SmartPEME
SmartPEME é un novo modelo de servizo orientado á mellora competitiva das PEME e á procura dunha melloría nas vendas e na eficacia e eficiencia das tarefas, que abre novos eidos de actuación e acada novos grupos de interese coma os emprendedores, as asociacións empresariais e os axentes de dinamización en concellos.
O devandito obxectivo, nas oficinas do Porriño, Cambados, Pontevedra, Lalín, Ponteareas e Vigo abrangue seguintes actividades: itinerarios de obradoiros temáticos con diversos niveis de dificultade adaptados ás necesidades das empresas, eventos de networking trimestrais coa participación de profesionais de prestixio, colaboración con asociacións e promoción de alianzas institucionais, especialización sectorial dos asesores en función das necesidades da súa área de influencia, kits de asesoramento en novas tecnoloxías a emprendedores, identificación e difusión das necesidades TIC aos provedores de solucións para as PEME e, tamén, impulso de novas carteiras de servizos de asesoramento.

Categorías: Ciencia

Coruña Dixital mobilizou a creatividade local cunha chea de sesións divulgativas e obradoiros en 2017

Mér, 01/31/2018 - 21:30

O Concello da Coruña (Concellería de Culturas, Deporte e Coñecemento) vén de facer reconto do acadado coa programación da segunda tempada de Coruña Dixital, que dende maio a novembro fortaleceu e ampliou o cometido inicial do programa: facilitar a expansión das distintas prácticas de cultura dixital que se dan na cidade e na súa contorna. Segundo lembra a organización, este ano fíxose fincapé na creación audiovisual coa posta en marcha do LAIC: Laboratorio Audiovisual de Innovación e Creación. O seu obxectivo foi potenciar o talento, facer comunidade e tirar proveito das posibilidades da Internet.
Entre as principais actividades desenvolvidas ao abeiro do LAIC atopouse a súa presentación a Casa dos Peixes (o 16 de xuño, contando coa participación dos principais colectivos de creación audiovisual e dixital da Coruña, como por exemplo Videolume ou Bricolabs) ou a convocatoria aberta para facer comunidade arredor do LAIC (o 26 de xuño, nunha xuntanza á que acudiron medio cento de persoas de diversos perfís: youtubers, cineastas, expertos en redes sociais e mercadotecnia, arquivos, etc). Asemade, o 13 de setembro presentouse de xeito oficial a programación do LAIC, nunha xuntanza arredor da innovación audiovisual na que estivo presente o concelleiro de Culturas, José Manuel Sande, coa asistencia de 40 persoas. Neste encontro presentouse a imaxe de marca propia do LAIC, e comezouse a difundir o cartel e mais o folleto coa programación por toda a cidade e polas redes sociais.
A programación do #LAIC desenvolveuse “de xeito intensivo”, en palabras do Concello, durante os meses de outubro e novembro en distintos espazos da cidade. Estas foron as nove sesións celebradas:
· Jorge Lama debullou o uso de licenzas libres na primeira actividade da programación #LAIC
· Unha tarde aprendendo a sacarlle o máximo partido a Youtube
· Supercine: o valor das comunidades para facer unha película
· Todo o que tes que saber para seres "legal" en Youtube
· A Coruña Rebelde: experimentamos coa memoria histórica da cidade
· Un encontro sobre as novas posibilidades de traballo no audiovisual en Internet
· Dos memes analóxicos aos microvídeos no Taller de Narrativas Populares Contemporáneas
· Pensando videoxogos coa xente de MOLAB
· As emocións dos participantes no taller de Lance Weiler estarán presentes no festival de Sundance
Fóra da programación do LAIC, Coruña Dixital estivo presente na organización de distintas actividades impulsadas por outras iniciativas na cidade, facilitando espazos ou apoiando en tarefas de produción e comunicación. Ao abeiro desta liña de actividade, realizáronse varias charlas sobre software libre ao abeiro dos GPUL Labs, estreouse a serie Peter Brandon no Teatro Rosalía (co apoio de Coruña Dixital), celebrouse o Noroeste Videocampo ou desenvolveuse o Hackatiño (onde seu deu forma a catro aplicacións para mellorar a mobilidade na Coruña.
Ademais, Coruña Dixital colaborou con outras actividades como o LabComSeaSons, un laboratorio de comunicación multimedia para o festival Sea Sons, que xurdiu do colectivo Videolume. A maiores, o programa viaxou até Pontevedra para participar na segunda edición do Tek-Fest, Encontro de Tecnoloxía e Patrimonio, nunha mesa redonda sobre culturas de vangarda en Galicia, xunto con outras iniciativas e festivais como SinSal, WOS ou Carballo Interplay.
Outra das actividades foi o desenvolvemento do Kit de activación dixital, que se define como un punto de encontro e guía profesional web para poñer en común experiencias, retos e recursos cos que poder expandir novas prácticas culturais e activistas a través da creación e a innovación audiovisual, especialmente nas aulas de centros educativos e nos espazos socioculturais de proximidade.

Categorías: Ciencia

As startups galegas lanzan concurso para converter aos escolares en investigadores espaciais: o programa Hamsternauta

Mér, 01/31/2018 - 18:15

Este 2 de febreiro celébrase o oitavo aniversario do evento Laconnetwork, tal e como avanzamos os días pasados dende Código Cero, detallando o programa de actividades, e entre as cousas que vai acoller esta oitava edición e que non podemos deixar de lado atópase sen dúbida a presentación do Programa Especial Hamsternauta (HANA). De que se trata o programa Hamsternauta? Pois basicamente de facilitar aos centros de educación secundaria os recursos precisos para converter o soño espacial do seu alumnado en realidade: o soño de contribuír, cos seus recursos, á carreira espacial e ao coñecemento do que está alén das nosas nubes.
Máis polo miúdo, a través desta iniciativa poderán enviar fóra da Terra o dummy dun hámster coa axuda dunha sonda e un globo meteorolóxico. O programa vén da man das startups da Asociación Galega de Innovadores en TICs. O reto do alumnado participante: lograr a misión máis completa.
Segundo nos explica Frankie Gómez dende a organización, a clave para acadar a misión máis completa e as mellores valoracións do xurado reside nas seguintes tarefas: ensamblaxe de compoñentes informáticos con programacións sinxelas, adestramento do Hamster, cálculos de gases, aceleracións, deceleracións, xeolocalización e “unha longa listaxe de posíbeis investigacións tan reais como as que até hai moi pouco só eran posíbeis para as axencias espaciais”.
Como dixemos, os instrumentos básicos a empregar son un globo meteorolóxico e unha sonda desenvolvida polos propios escolares. A súa misión consistirá en recuperala e manter con “vida” o seu boneco-hámster, polo que terán que avaliar ao detalle cada fase do proxecto.
A xeito de respaldo tecnolóxico, achegando a súa bagaxe, as empresas da dita asociación (asiduas dende hai oito anos ao evento Laconnnetwork, estreitando ligazóns e xerando colaboracións) subministrarán dende diferentes áreas de actividade os elementos técnicos, os coñecementos en programación e as sinerxías precisas para que este proxecto colectivo se converta en éxito.
Entre estas firmas innovadoras atópanse, por exemplo, Fitting Pup, adicada a facer seguimento da saúde das mascotas (será a encargada de prover o dummy e a sonorización do hámster); Lupeon ou IPglobal, que interveñen fornecendo de compoñentes de impresión 3D ou aditiva, así como compoñentes tecnolóxicos de última xeración, entre os que se contan sensores, placas e sistemas de alimentación para que os enxeños soporten os menos de setenta graos que pode acadar a sonda a 30.000 pés de altura (unha altura dúas veces máis grande cá aquela na que adoitan voar os avións). Tamén contribuirán ao proxecto APDTIC, Confirmsign, Mememtum, Taniwa, Filament2print, Tuco Systems, Primate, Cactus Digital ou Imaxin.
Para elixir o proxecto gañador, teranse en conta aspectos como o investimento en compoñentes, o número de participantes por grupo, cantos mozos e mozas concorren no grupo, os experimentos e cálculos realizados antes da misión, o grao de colaboración con outros equipos, se é a súa primeira sonda ou é un reincidente, etc. “En resumo”, lembran a organización, “trátase dunha verdadeira carreira espacial divertida para nenos, pero coma nos anos sesenta”.
Como parte do proxecto está previsto realizar un campamento científico a finais de curso cos colexios que finalicen as sondas onde expertos de diferentes áreas darán o visto e prace definitivo aos lanzamentos. Aqueles que consigan un maior éxito da misión, poderían gozar dunha viaxe ás instalacións da NASA ou a unha das axencias espaciais da nosa contorna.
HANA é un programa educativo que achega a ciencia e a tecnoloxía de maneira divertida aos nenos de educación secundaria a través do desenvolvemento dunha misión espacial real.

Categorías: Ciencia

Páxinas